Matsya Purāṇa 24

*सूत उवाच ततः संवत्सरस्यान्ते द्वादशादित्यसंनिभः । दिव्यपीताम्बरधरो दिव्याभरणभूषितः

*sūta uvāca tataḥ saṃvatsarasyānte dvādaśādityasaṃnibhaḥ / divyapītāmbaradharo divyābharaṇabhūṣitaḥ

Sanskrit only: no published translation is held for this verse.

तारोदराद्विनिष्क्रान्तः कुमारश्चन्द्रसंनिभः । सर्वार्थशास्त्रविद्धीमान् हस्तिशास्त्रप्रवर्तकः

tārodarādviniṣkrāntaḥ kumāraścandrasaṃnibhaḥ / sarvārthaśāstraviddhīmān hastiśāstrapravartakaḥ

Sanskrit only: no published translation is held for this verse.

नाम यद्राजपुत्रीयं विश्रुतं गजवैद्यकम् । राज्ञः सोमस्य पुत्रत्वाद् राजपुत्रो बुधः स्मृतः

nāma yadrājaputrīyaṃ viśrutaṃ gajavaidyakam / rājñaḥ somasya putratvād rājaputro budhaḥ smṛtaḥ

Sanskrit only: no published translation is held for this verse.

जातमात्रः स तेजांसि सर्वाण्येवाजयद्बली । ब्रह्माद्यास्तत्र चाजग्मुर् देवा देवर्षिभिः सह

jātamātraḥ sa tejāṃsi sarvāṇyevājayadbalī / brahmādyāstatra cājagmur devā devarṣibhiḥ saha

Sanskrit only: no published translation is held for this verse.

बृहस्पतिगृहे सर्वे जातकर्मोत्सवे तदा । अपृच्छंस्ते सुरास्तारां केन जातः कुमारकः

bṛhaspatigṛhe sarve jātakarmotsave tadā / apṛcchaṃste surāstārāṃ kena jātaḥ kumārakaḥ

Sanskrit only: no published translation is held for this verse.

ततः सा लज्जिता तेषां न किंचिदवदत्तदा । पुनः पुनस्तदा पृष्टा लज्जयन्ती वराङ्गना

tataḥ sā lajjitā teṣāṃ na kiṃcidavadattadā / punaḥ punastadā pṛṣṭā lajjayantī varāṅganā

Sanskrit only: no published translation is held for this verse.

सोमस्येति चिरादाह ततो ऽगृह्णाद्विधुः सुतम् । बुध इत्यकरोन्नाम्ना प्रादाद्राज्यं च भूतले

somasyeti cirādāha tato 'gṛhṇādvidhuḥ sutam / budha ityakaronnāmnā prādādrājyaṃ ca bhūtale

Sanskrit only: no published translation is held for this verse.

अभिषेकं ततः कृत्वा प्रधानमकरोद्विभुः । गृहसाम्यं प्रदायाथ ब्रह्मा ब्रह्मर्षिसंयुतः

abhiṣekaṃ tataḥ kṛtvā pradhānamakarodvibhuḥ / gṛhasāmyaṃ pradāyātha brahmā brahmarṣisaṃyutaḥ

Sanskrit only: no published translation is held for this verse.

पश्यतां सर्वदेवानां तत्रैवान्तरधीयत । इलोदरे च धर्मिष्ठं बुधः पुत्रमजीजनत्

paśyatāṃ sarvadevānāṃ tatraivāntaradhīyata / ilodare ca dharmiṣṭhaṃ budhaḥ putramajījanat

Sanskrit only: no published translation is held for this verse.

अश्वमेधशतं साग्रम् अकरोद्यः स्वतेजसा । पुरूरवा इति ख्यातः सर्वलोकनमस्कृतः

aśvamedhaśataṃ sāgram akarodyaḥ svatejasā / purūravā iti khyātaḥ sarvalokanamaskṛtaḥ

Sanskrit only: no published translation is held for this verse.

हिमवच्छिखरे रम्ये समाराध्य जनार्दनम् । लोकैश्वर्यमगाद्राजा सप्तद्वीपपतिस्तदा

himavacchikhare ramye samārādhya janārdanam / lokaiśvaryamagādrājā saptadvīpapatistadā

Sanskrit only: no published translation is held for this verse.

केशिप्रभृतयो दैत्याः कोटिशो येन दारिताः । उर्वशी यस्य पत्नीत्वम् अगमद्रूपमोहिता

keśiprabhṛtayo daityāḥ koṭiśo yena dāritāḥ / urvaśī yasya patnītvam agamadrūpamohitā

Sanskrit only: no published translation is held for this verse.

सप्तद्वीपा वसुमती सशैलवनकानना । धर्मेण पालिता तेन सर्वलोकहितैषिणा

saptadvīpā vasumatī saśailavanakānanā / dharmeṇa pālitā tena sarvalokahitaiṣiṇā

Sanskrit only: no published translation is held for this verse.

चामरग्राहिणी कीर्तिः सदा चैवाङ्गवाहिका । विष्णोः प्रसादाद्देवेन्द्रो ददाव् अर्धासनं तदा

cāmaragrāhiṇī kīrtiḥ sadā caivāṅgavāhikā / viṣṇoḥ prasādāddevendro dadāv ardhāsanaṃ tadā

Sanskrit only: no published translation is held for this verse.

धर्मार्थकामान्धर्मेण समम् एवाभ्यपालयत् । धर्मार्थकामाः संद्रष्टुम् आजग्मुः कौतुकात्पुरा

dharmārthakāmāndharmeṇa samam evābhyapālayat / dharmārthakāmāḥ saṃdraṣṭum ājagmuḥ kautukātpurā

Sanskrit only: no published translation is held for this verse.

जिज्ञासवस्तच्चरितं कथं पश्यति नः समम् । भक्त्या चक्रे ततस्तेषाम् अर्घ्यपाद्यादिकं नृपः

jijñāsavastaccaritaṃ kathaṃ paśyati naḥ samam / bhaktyā cakre tatasteṣām arghyapādyādikaṃ nṛpaḥ

Sanskrit only: no published translation is held for this verse.

आसनत्रयमानीय दिव्यं कनकभूषितम् । निविश्याथाकरोत्पूजाम् ईषद्धर्मे ऽधिकां पुनः

āsanatrayamānīya divyaṃ kanakabhūṣitam / niviśyāthākarotpūjām īṣaddharme 'dhikāṃ punaḥ

Sanskrit only: no published translation is held for this verse.

जग्मतुस्तेन कामार्थाव् अतिकोपं नृपं प्रति । अर्थः शापमदात्तस्मै लोभात्त्वं नाशमेष्यसि

jagmatustena kāmārthāv atikopaṃ nṛpaṃ prati / arthaḥ śāpamadāttasmai lobhāttvaṃ nāśameṣyasi

Sanskrit only: no published translation is held for this verse.

कामो ऽप्याह तवोन्मादो भविता गन्धमादने । कुमारवनमाश्रित्य वियोगादुर्वशीभवात्

kāmo 'pyāha tavonmādo bhavitā gandhamādane / kumāravanamāśritya viyogādurvaśībhavāt

Sanskrit only: no published translation is held for this verse.

धर्मो ऽप्याह चिरायुस् त्वं धार्मिकश्च भविष्यसि । संततिस्तव राजेन्द्र यावच्चन्द्रार्कतारकम्

dharmo 'pyāha cirāyus tvaṃ dhārmikaśca bhaviṣyasi / saṃtatistava rājendra yāvaccandrārkatārakam

Sanskrit only: no published translation is held for this verse.

शतशो वृद्धिमायातु न नाशं भुवि यास्यति । इत्युक्त्वान्तर्दधुः सर्वे राजा राज्यं तदन्वभूत्

śataśo vṛddhimāyātu na nāśaṃ bhuvi yāsyati / ityuktvāntardadhuḥ sarve rājā rājyaṃ tadanvabhūt

Sanskrit only: no published translation is held for this verse.

अहन्यहनि देवेन्द्रं द्रष्टुं याति स राजराट् । कदाचिदारुह्य रथं दक्षिणाम्बरचारिणम्

ahanyahani devendraṃ draṣṭuṃ yāti sa rājarāṭ / kadācidāruhya rathaṃ dakṣiṇāmbaracāriṇam

Sanskrit only: no published translation is held for this verse.

सार्धमर्केण सो ऽपश्यन् नीयमानामथाम्बरे । केशिना दानवेन्द्रेण चित्रलेखामथोर्वशीम्

sārdhamarkeṇa so 'paśyan nīyamānāmathāmbare / keśinā dānavendreṇa citralekhāmathorvaśīm

Sanskrit only: no published translation is held for this verse.

तं विनिर्जित्य समरे विविधायुधपाणिना । बुधपुत्रेण वायव्यम् अस्त्रं मुक्त्वा यशो ऽर्थिना

taṃ vinirjitya samare vividhāyudhapāṇinā / budhaputreṇa vāyavyam astraṃ muktvā yaśo 'rthinā

Sanskrit only: no published translation is held for this verse.

तथा शक्रो ऽपि समरे येन चैवं विनिर्जितः । मित्रत्वम् अगमद् देवैर् ददाव् इन्द्राय चोर्वशीम्

tathā śakro 'pi samare yena caivaṃ vinirjitaḥ / mitratvam agamad devair dadāv indrāya corvaśīm

Sanskrit only: no published translation is held for this verse.

ततःप्रभृति मित्रत्वम् अगमत् पाकशासनः । सर्वलोकातिशायित्वं बलमूर्जो यशः श्रियम्

tataḥprabhṛti mitratvam agamat pākaśāsanaḥ / sarvalokātiśāyitvaṃ balamūrjo yaśaḥ śriyam

Sanskrit only: no published translation is held for this verse.

प्रादाद्वज्रीति संतुष्टो गेयतां भरतेन च । सा पुरूरवसः प्रीत्या गायन्ती चरितं महत्

prādādvajrīti saṃtuṣṭo geyatāṃ bharatena ca / sā purūravasaḥ prītyā gāyantī caritaṃ mahat

Sanskrit only: no published translation is held for this verse.

लक्ष्मीस्वयंवरं नाम भरतेन प्रवर्तितम् । मेनकामुर्वशीं रम्भां नृत्यतेति तदादिशत्

lakṣmīsvayaṃvaraṃ nāma bharatena pravartitam / menakāmurvaśīṃ rambhāṃ nṛtyateti tadādiśat

Sanskrit only: no published translation is held for this verse.

ननर्त सलयं तत्र लक्ष्मीरूपेण चोर्वशी । सा पुरूरवसं दृष्ट्वा नृत्यन्ती कामपीडिता

nanarta salayaṃ tatra lakṣmīrūpeṇa corvaśī / sā purūravasaṃ dṛṣṭvā nṛtyantī kāmapīḍitā

Sanskrit only: no published translation is held for this verse.

विस्मृताभिनयं सर्वं यत्पुरा भरतोदितम् । शशाप भरतः क्रोधाद् वियोगादस्य भूतले

vismṛtābhinayaṃ sarvaṃ yatpurā bharatoditam / śaśāpa bharataḥ krodhād viyogādasya bhūtale

Sanskrit only: no published translation is held for this verse.

पञ्चपञ्चाशदब्दानि लता सूक्ष्मा भविष्यसि । पुरूरवाः पिशाचत्वं तत्रैवानुभविष्यति

pañcapañcāśadabdāni latā sūkṣmā bhaviṣyasi / purūravāḥ piśācatvaṃ tatraivānubhaviṣyati

Sanskrit only: no published translation is held for this verse.

ततस्तमुर्वशी गत्वा भर्तारमकरोच्चिरम् । शापान्ते भरतस्याथ उर्वशी बुधसूनुतः

tatastamurvaśī gatvā bhartāramakarocciram / śāpānte bharatasyātha urvaśī budhasūnutaḥ

Sanskrit only: no published translation is held for this verse.

अजीजनत्सुतानष्टौ नामतस्तान्निबोधत । आयुर् दृढायुर् अश्वायुर् धनायुर् धृतिमान्वसुः

ajījanatsutānaṣṭau nāmatastānnibodhata / āyur dṛḍhāyur aśvāyur dhanāyur dhṛtimānvasuḥ

Sanskrit only: no published translation is held for this verse.

शुचिविद्यः शतायुश्च सर्वे दिव्यबलौजसः । आयुषो नहुषः पुत्रौ वृद्धशर्मा तथैव च

śucividyaḥ śatāyuśca sarve divyabalaujasaḥ / āyuṣo nahuṣaḥ putrau vṛddhaśarmā tathaiva ca

Sanskrit only: no published translation is held for this verse.

रजिर्दम्भो विपाप्मा च वीराः पञ्च महारथाः । रजेः पुत्रशतं जज्ञे राजेयमिति विश्रुतम्

rajirdambho vipāpmā ca vīrāḥ pañca mahārathāḥ / rajeḥ putraśataṃ jajñe rājeyamiti viśrutam

Sanskrit only: no published translation is held for this verse.

रजिराराधयामास नारायणमकल्मषम् । तपसा तोषितो विष्णुर् वरान्प्रादान्महीपते

rajirārādhayāmāsa nārāyaṇamakalmaṣam / tapasā toṣito viṣṇur varānprādānmahīpate

Sanskrit only: no published translation is held for this verse.

देवासुरमनुष्याणाम् अभूत्स विजयी तदा । अथ देवासुरं युद्धम् अभूद् वर्षशतत्रयम्

devāsuramanuṣyāṇām abhūtsa vijayī tadā / atha devāsuraṃ yuddham abhūd varṣaśatatrayam

Sanskrit only: no published translation is held for this verse.

प्रह्लादशक्रयोर्भीमं न कश्चिद्विजयी तयोः । ततो देवासुरैः पृष्टः प्राह देवश्चतुर्मुखः

prahlādaśakrayorbhīmaṃ na kaścidvijayī tayoḥ / tato devāsuraiḥ pṛṣṭaḥ prāha devaścaturmukhaḥ

Sanskrit only: no published translation is held for this verse.

अनयोर्विजयी कः स्याद् रजिर्यत्रेति सो ऽब्रवीत् । जयाय प्रार्थितो राजा सहायस्त्वं भवस्व नः

anayorvijayī kaḥ syād rajiryatreti so 'bravīt / jayāya prārthito rājā sahāyastvaṃ bhavasva naḥ

Sanskrit only: no published translation is held for this verse.

दैत्यैः प्राह यदि स्वामी वो भवामि ततस्त्वलम् । नासुरैः प्रतिपन्नं तत् प्रतिपन्नं सुरैस्तथा

daityaiḥ prāha yadi svāmī vo bhavāmi tatastvalam / nāsuraiḥ pratipannaṃ tat pratipannaṃ suraistathā

Sanskrit only: no published translation is held for this verse.

स्वामी भव त्वमस्माकं संग्रामे नाशय द्विषः । ततो विनाशिताः सर्वे ये ऽवध्या वज्रपाणिना

svāmī bhava tvamasmākaṃ saṃgrāme nāśaya dviṣaḥ / tato vināśitāḥ sarve ye 'vadhyā vajrapāṇinā

Sanskrit only: no published translation is held for this verse.

पुत्रत्वमगमत्तुष्टस् तस्येन्द्रः कर्मणा विभुः । दत्त्वेन्द्राय तदा राज्यं जगाम तपसे रजिः

putratvamagamattuṣṭas tasyendraḥ karmaṇā vibhuḥ / dattvendrāya tadā rājyaṃ jagāma tapase rajiḥ

Sanskrit only: no published translation is held for this verse.

रजिपुत्रैस्तदाच्छिन्नं बलादिन्द्रस्य वैभवम् । यज्ञभागं च राज्यं च तपोबलगुणान्वितैः

rajiputraistadācchinnaṃ balādindrasya vaibhavam / yajñabhāgaṃ ca rājyaṃ ca tapobalaguṇānvitaiḥ

Sanskrit only: no published translation is held for this verse.

राज्यभ्रष्टस्तदा शक्रो रजिपुत्रैर्निपीडितः । प्राह वाचस्पतिं दीनः पीडितो ऽस्मि रजेः सुतैः

rājyabhraṣṭastadā śakro rajiputrairnipīḍitaḥ / prāha vācaspatiṃ dīnaḥ pīḍito 'smi rajeḥ sutaiḥ

Sanskrit only: no published translation is held for this verse.

न यज्ञभागो राज्यं मे निर्जितश्च बृहस्पते । राज्यलाभाय मे यत्नं विधत्स्व धिषणाधिप

na yajñabhāgo rājyaṃ me nirjitaśca bṛhaspate / rājyalābhāya me yatnaṃ vidhatsva dhiṣaṇādhipa

Sanskrit only: no published translation is held for this verse.

ततो बृहस्पतिः शक्रम् अकरोद्बलदर्पितम् । ग्रहशान्तिविधानेन पौष्टिकेन च कर्मणा

tato bṛhaspatiḥ śakram akarodbaladarpitam / grahaśāntividhānena pauṣṭikena ca karmaṇā

Sanskrit only: no published translation is held for this verse.

गत्वाथ मोहयामास रजिपुत्रान्बृहस्पतिः । जिनधर्मं समास्थाय वेदबाह्यं स वेदवित्

gatvātha mohayāmāsa rajiputrānbṛhaspatiḥ / jinadharmaṃ samāsthāya vedabāhyaṃ sa vedavit

Sanskrit only: no published translation is held for this verse.

वेदत्रयीपरिभ्रष्टांश् चकार धिषणाधिपः । वेदबाह्यान्परिज्ञाय हेतुवादसमन्वितान्

vedatrayīparibhraṣṭāṃś cakāra dhiṣaṇādhipaḥ / vedabāhyānparijñāya hetuvādasamanvitān

Sanskrit only: no published translation is held for this verse.

जघान शक्रो वज्रेण सर्वान्धर्मबहिष्कृतान् । नहुषस्य प्रवक्ष्यामि पुत्रान्सप्तैव धार्मिकान्

jaghāna śakro vajreṇa sarvāndharmabahiṣkṛtān / nahuṣasya pravakṣyāmi putrānsaptaiva dhārmikān

Sanskrit only: no published translation is held for this verse.

यतिर्ययातिः संयातिर् उद्भवः पाचिरेव च । शर्यातिर्मेघजातिश्च सप्तैते वंशवर्धनाः

yatiryayātiḥ saṃyātir udbhavaḥ pācireva ca / śaryātirmeghajātiśca saptaite vaṃśavardhanāḥ

Sanskrit only: no published translation is held for this verse.

यतिः कुमारभावे ऽपि योगी वैखानसो ऽभवत् । ययातिश्चाकरोद्राज्यं धर्मैकशरणः सदा

yatiḥ kumārabhāve 'pi yogī vaikhānaso 'bhavat / yayātiścākarodrājyaṃ dharmaikaśaraṇaḥ sadā

Sanskrit only: no published translation is held for this verse.

शर्मिष्ठा तस्य भार्याभूद् दुहिता वृषपर्वणः । भार्गवस्यात्मजा तद्वद् देवयानी च सुव्रता

śarmiṣṭhā tasya bhāryābhūd duhitā vṛṣaparvaṇaḥ / bhārgavasyātmajā tadvad devayānī ca suvratā

Sanskrit only: no published translation is held for this verse.

ययातेः पञ्च दायादास् तान्प्रवक्ष्यामि नामतः । देवयानी यदुं पुत्रं तुर्वसुं चाप्यजीजनत्

yayāteḥ pañca dāyādās tānpravakṣyāmi nāmataḥ / devayānī yaduṃ putraṃ turvasuṃ cāpyajījanat

Sanskrit only: no published translation is held for this verse.

तथा द्रुह्युमनुं पूरुं शर्मिष्ठाजनयत्सुतान् । यदुः पूरुश्चाभवतां तेषां वंशविवर्धनौ

tathā druhyumanuṃ pūruṃ śarmiṣṭhājanayatsutān / yaduḥ pūruścābhavatāṃ teṣāṃ vaṃśavivardhanau

Sanskrit only: no published translation is held for this verse.

ययातिर्नाहुषश्चासीद् राजा सत्यपराक्रमः । पालयामास स महीम् ईजे च विधिवन्मखैः

yayātirnāhuṣaścāsīd rājā satyaparākramaḥ / pālayāmāsa sa mahīm īje ca vidhivanmakhaiḥ

Sanskrit only: no published translation is held for this verse.

अतिभक्त्या पितॄनर्च्य देवांश्च प्रयतः सदा । अथाजयत्प्रजाः सर्वा ययातिरपराजितः

atibhaktyā pitṝnarcya devāṃśca prayataḥ sadā / athājayatprajāḥ sarvā yayātiraparājitaḥ

Sanskrit only: no published translation is held for this verse.

स शाश्वतीः समा राजा प्रजा धर्मेण पालयन् । जराम् आर्छन् महाघोरां नाहुषो रूपनाशिनीम्

sa śāśvatīḥ samā rājā prajā dharmeṇa pālayan / jarām ārchan mahāghorāṃ nāhuṣo rūpanāśinīm

Sanskrit only: no published translation is held for this verse.

जराभिभूतः पुत्रान् स राजा वचनमब्रवीत् । यदुं पूरुं तुर्वसुं च द्रुह्युं चानुं च पार्थिवः

jarābhibhūtaḥ putrān sa rājā vacanamabravīt / yaduṃ pūruṃ turvasuṃ ca druhyuṃ cānuṃ ca pārthivaḥ

Sanskrit only: no published translation is held for this verse.

यौवनेन चलान्कामान् युवा युवतिभिः सह । विहर्तुम् अहमिच्छामि साहाय्यं कुरुतात्मजाः

yauvanena calānkāmān yuvā yuvatibhiḥ saha / vihartum ahamicchāmi sāhāyyaṃ kurutātmajāḥ

Sanskrit only: no published translation is held for this verse.

तं पुत्रो देवयानेयः पूर्वजो यदुरब्रवीत् । साहाय्यं भवतः कार्यम् अस्माभिर्यौवनेन किम्

taṃ putro devayāneyaḥ pūrvajo yadurabravīt / sāhāyyaṃ bhavataḥ kāryam asmābhiryauvanena kim

Sanskrit only: no published translation is held for this verse.

ययातिरब्रवीत् पुत्राञ् जरा मे प्रतिगृह्यताम् । यौवनेनाथ भवतां चरेयं विषयानहम्

yayātirabravīt putrāñ jarā me pratigṛhyatām / yauvanenātha bhavatāṃ careyaṃ viṣayānaham

Sanskrit only: no published translation is held for this verse.

यजतो दीर्घसत्त्रैर्मे शापाच्चोशनसो मुनेः । कामार्थः परिहीनो मे ऽतृप्तो ऽहं तेन पुत्रकाः

yajato dīrghasattrairme śāpāccośanaso muneḥ / kāmārthaḥ parihīno me 'tṛpto 'haṃ tena putrakāḥ

Sanskrit only: no published translation is held for this verse.

स्वकीयेन शरीरेण जरामेनां प्रशास्तु वः । अहं तन्वाभिनवया युवा कामानवाप्नुयाम्

svakīyena śarīreṇa jarāmenāṃ praśāstu vaḥ / ahaṃ tanvābhinavayā yuvā kāmānavāpnuyām

Sanskrit only: no published translation is held for this verse.

न ते ऽस्य प्रत्यगृह्णन्त यदुप्रभृतयो जराम् । चतुरस्तान्स राजर्षिर् अशपच्चेति नः श्रुतम्

na te 'sya pratyagṛhṇanta yaduprabhṛtayo jarām / caturastānsa rājarṣir aśapacceti naḥ śrutam

Sanskrit only: no published translation is held for this verse.

तमब्रवीत्ततः पूरुः कनीयान्सत्यविक्रमः । जरां मा देहि नवया तन्वा मे यौवनात्सुखी

tamabravīttataḥ pūruḥ kanīyānsatyavikramaḥ / jarāṃ mā dehi navayā tanvā me yauvanātsukhī

Sanskrit only: no published translation is held for this verse.

अहं जरां तवादाय राज्ये स्थास्यामि चाज्ञया । एवमुक्तः स राजर्षिस् तपोवीर्यसमाश्रयात्

ahaṃ jarāṃ tavādāya rājye sthāsyāmi cājñayā / evamuktaḥ sa rājarṣis tapovīryasamāśrayāt

Sanskrit only: no published translation is held for this verse.

संस्थापयामास जरां तदा पुत्रे महात्मनि । पौरवेणाथ वयसा राजा यौवनमास्थितः

saṃsthāpayāmāsa jarāṃ tadā putre mahātmani / pauraveṇātha vayasā rājā yauvanamāsthitaḥ

Sanskrit only: no published translation is held for this verse.

ययातेश्चाथ वयसा राज्यं पूरुरकारयत् । ततो वर्षसहस्रान्ते ययातिरपराजितः

yayāteścātha vayasā rājyaṃ pūrurakārayat / tato varṣasahasrānte yayātiraparājitaḥ

Sanskrit only: no published translation is held for this verse.

अतृप्त इव कामानां पूरुं पुत्रमुवाच ह । त्वया दायादवान् अस्मि त्वं मे वंशकरः सुतः

atṛpta iva kāmānāṃ pūruṃ putramuvāca ha / tvayā dāyādavān asmi tvaṃ me vaṃśakaraḥ sutaḥ

Sanskrit only: no published translation is held for this verse.

पौरवो वंश इत्येष ख्यातिं लोके गमिष्यति । ततः स नृपशार्दूलः पूरुं राज्ये ऽभिषिच्य च

pauravo vaṃśa ityeṣa khyātiṃ loke gamiṣyati / tataḥ sa nṛpaśārdūlaḥ pūruṃ rājye 'bhiṣicya ca

Sanskrit only: no published translation is held for this verse.

कालेन महता पश्चात् कालधर्मम् उपेयिवान् । पूरुवंशं प्रवक्ष्यामि शृणुध्वमृषिसत्तमाः । यत्र ते भारता जाता भरतान्वयवर्धनाः

kālena mahatā paścāt kāladharmam upeyivān / pūruvaṃśaṃ pravakṣyāmi śṛṇudhvamṛṣisattamāḥ / yatra te bhāratā jātā bharatānvayavardhanāḥ

Sanskrit only: no published translation is held for this verse.