कर्मप्रभावसंभूतं षडायतनलक्षणम् । पुनर्भवम् इति ख्यातं प्रतिभासोपमं हि तत् ॥ न्श् ५ [१] ॥ निर्मितं नगरं यद्वद् विलोकयति निर्मितः । तद्वत् पश्यति रूपाणि कर्मभिर् निर्मितं जगत् ॥ न्श् ६ [२] ॥ धर्मं देशयतः शब्दा ये केचित् श्रुतिगोचराः । प्रतिश्रुत्कोपमाः सर्वे प्रोद्भूतश्रुतिनः श्रुताः ॥ न्श् ७ [३] ॥ आघ्रतं स्वादितं तथा स्प्रष्टं विषयलालासैः । स्वप्नतुल्यम् इदं सर्वम् उपलब्धं न विद्यते ॥ न्श् ८ [४] ॥ मायायन्त्रो नरो यद्वद् भिन्नां चेष्टां करोति वै । तद्वद् चेष्टां करोत्य् एव देहयन्त्रो निरात्मकः ॥ न्श् ९ [५] ॥ नानोपलब्धयो याश् च प्रतिक्षणसमुद्भवाः । मरीचिसदृशाश् चैते दृष्टनष्टाः विलक्षणाः ॥ न्श् १० [६] ॥ प्रतिबिम्बनिभं ग्राह्यम् अनादिचित्तसंभवम् । तदाकारं च विज्ञानम् अन्योन्यप्रतिबिम्बवत् ॥ न्श् ११ [७] ॥ ध्यायिनां स्वच्छसंताने यज् ज्ननेन्दुसमुद्भवम् । उदकचन्द्रोपमं तद् धि प्रत्यक्षं न विद्यते ॥ न्श् १२ [८] ॥ योगिनाम् अपि यज् ज्ञानं तद् अप्य् आकाशलक्षणम् । तस्माज् ज्ञानं च ज्ञेयं च सर्वम् आकाशलक्षणम् ॥ न्श् १३ [९] ॥ इति चिन्तयतः तत्त्वं सर्वभावेष्व् अनाश्रितम् । बोधिप्रणिधिचित्तेन ज्ञानं अग्रं भविष्यति
karmaprabhāvasaṃbhūtaṃ ṣaḍāyatanalakṣaṇam / punarbhavam iti khyātaṃ pratibhāsopamaṃ hi tat // Nś 5 [1] // nirmitaṃ nagaraṃ yadvad vilokayati nirmitaḥ / tadvat paśyati rūpāṇi karmabhir nirmitaṃ jagat // Nś 6 [2] // dharmaṃ deśayataḥ śabdā ye kecit śrutigocarāḥ / pratiśrutkopamāḥ sarve prodbhūtaśrutinaḥ śrutāḥ // Nś 7 [3] // āghrataṃ svāditaṃ tathā spraṣṭaṃ viṣayalālāsaiḥ / svapnatulyam idaṃ sarvam upalabdhaṃ na vidyate // Nś 8 [4] // māyāyantro naro yadvad bhinnāṃ ceṣṭāṃ karoti vai / tadvad ceṣṭāṃ karoty eva dehayantro nirātmakaḥ // Nś 9 [5] // nānopalabdhayo yāś ca pratikṣaṇasamudbhavāḥ / marīcisadṛśāś caite dṛṣṭanaṣṭāḥ vilakṣaṇāḥ // Nś 10 [6] // pratibimbanibhaṃ grāhyam anādicittasaṃbhavam / tadākāraṃ ca vijñānam anyonyapratibimbavat // Nś 11 [7] // dhyāyināṃ svacchasaṃtāne yaj jnanendusamudbhavam / udakacandropamaṃ tad dhi pratyakṣaṃ na vidyate // Nś 12 [8] // yoginām api yaj jñānaṃ tad apy ākāśalakṣaṇam / tasmāj jñānaṃ ca jñeyaṃ ca sarvam ākāśalakṣaṇam // Nś 13 [9] // iti cintayataḥ tattvaṃ sarvabhāveṣv anāśritam / bodhipraṇidhicittena jñānaṃ agraṃ bhaviṣyati
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.