Narasimha-Purana 11

प्रणिपत्य जगन्नाथं चराचरगुरुं हरिम् । मार्कण्डेयो ऽभितुष्टाव भोगपर्यङ्कशायिनम्

praṇipatya jagannāthaṃ carācaraguruṃ harim / mārkaṇḍeyo 'bhituṣṭāva bhogaparyaṅkaśāyinam

Sanskrit only: no published translation is held for this verse.

प्रसीद भगवन् विष्णो प्रसीद पुरुषोत्तम । प्रसीद देवदेवेश प्रसीद गरुडध्वज

prasīda bhagavan viṣṇo prasīda puruṣottama / prasīda devadeveśa prasīda garuḍadhvaja

Sanskrit only: no published translation is held for this verse.

प्रसीद विष्णो लक्ष्मीश प्रसीद धरणीधर । प्रसीद लोकनाथाद्य प्रसीद परमेश्वर

prasīda viṣṇo lakṣmīśa prasīda dharaṇīdhara / prasīda lokanāthādya prasīda parameśvara

Sanskrit only: no published translation is held for this verse.

प्रसीद सर्वदेवेश प्रसीद कमलेक्षण । प्रसीद मन्दरधर प्रसीद मधुसूदन

prasīda sarvadeveśa prasīda kamalekṣaṇa / prasīda mandaradhara prasīda madhusūdana

Sanskrit only: no published translation is held for this verse.

प्रसीद सुभगाकान्त प्रसीद भुवनाधिप । प्रसीदाद्य महादेव प्रसीद मम केशव

prasīda subhagākānta prasīda bhuvanādhipa / prasīdādya mahādeva prasīda mama keśava

Sanskrit only: no published translation is held for this verse.

जय कृष्ण जयाचिन्त्य जय विष्णो जयाव्यय । जय विश्व जयाव्यक्त जय विष्णो नमो ऽस्तु ते

jaya kṛṣṇa jayācintya jaya viṣṇo jayāvyaya / jaya viśva jayāvyakta jaya viṣṇo namo 'stu te

Sanskrit only: no published translation is held for this verse.

जय देव जयाजेय जय सत्य जयाक्षर । जय काल जयेशान जय सर्व नमो ऽस्तु ते

jaya deva jayājeya jaya satya jayākṣara / jaya kāla jayeśāna jaya sarva namo 'stu te

Sanskrit only: no published translation is held for this verse.

जय यज्ञपते नाथ जय विश्वपते विभो । जय भूतपते नाथ जय सर्वपते विभो

jaya yajñapate nātha jaya viśvapate vibho / jaya bhūtapate nātha jaya sarvapate vibho

Sanskrit only: no published translation is held for this verse.

जय विश्वपते नाथ जय दक्ष नमो ऽस्तु ते । जय पापहरानन्त जय जन्मजरापह

jaya viśvapate nātha jaya dakṣa namo 'stu te / jaya pāpaharānanta jaya janmajarāpaha

Sanskrit only: no published translation is held for this verse.

जय भद्रातिभद्रेश जय भद्र नमो ऽस्तु ते । जय कामद काकुत्स्थ जय मानद माधव

jaya bhadrātibhadreśa jaya bhadra namo 'stu te / jaya kāmada kākutstha jaya mānada mādhava

Sanskrit only: no published translation is held for this verse.

जय शंकर देवेश जय श्रीश नमो ऽस्तु ते । जय कुङ्कुमरक्ताभ जय पङ्कजलोचन

jaya śaṃkara deveśa jaya śrīśa namo 'stu te / jaya kuṅkumaraktābha jaya paṅkajalocana

Sanskrit only: no published translation is held for this verse.

जय चन्दनलिप्ताङ्ग जय राम नमो ऽस्तु ते । जय देव जगन्नाथ जय देवकिनन्दन

jaya candanaliptāṅga jaya rāma namo 'stu te / jaya deva jagannātha jaya devakinandana

Sanskrit only: no published translation is held for this verse.

जय सर्वगुरो ज्ञेय जय शंभो नमो ऽस्तु ते । जय सुन्दर पद्माभ जय सुन्दरिवल्लभ । जय सुन्दरसर्वाङ्ग जय वन्द्य नमो ऽस्तु ते

jaya sarvaguro jñeya jaya śaṃbho namo 'stu te / jaya sundara padmābha jaya sundarivallabha / jaya sundarasarvāṅga jaya vandya namo 'stu te

Sanskrit only: no published translation is held for this verse.

जय सर्वद सर्वेश जय शर्मद शाश्वत । जय कामद भक्तानां प्रभविष्णो नमो ऽस्तु ते

jaya sarvada sarveśa jaya śarmada śāśvata / jaya kāmada bhaktānāṃ prabhaviṣṇo namo 'stu te

Sanskrit only: no published translation is held for this verse.

नमः कमलनाभाय नमः कमलमालिने । लोकनाथ नमस् ते ऽस्तु वीरभद्र नमो ऽस्तु ते

namaḥ kamalanābhāya namaḥ kamalamāline / lokanātha namas te 'stu vīrabhadra namo 'stu te

Sanskrit only: no published translation is held for this verse.

नमस् त्रैलोक्यनाथाय चतुर्मूर्ते जगत्पते । नमो देवाधिदेवाय नमो नारायणाय ते

namas trailokyanāthāya caturmūrte jagatpate / namo devādhidevāya namo nārāyaṇāya te

Sanskrit only: no published translation is held for this verse.

नमस् ते वासुदेवाय नमस् ते पीतवाससे । नमस् ते नरसिंहाय नमस् ते शार्ङ्गधारिणे

namas te vāsudevāya namas te pītavāsase / namas te narasiṃhāya namas te śārṅgadhāriṇe

Sanskrit only: no published translation is held for this verse.

नमः कृष्णाय रामाय नमश् चक्रायुधाय च । नमः शिवाय देवाय नमस् ते भुवनेश्वर

namaḥ kṛṣṇāya rāmāya namaś cakrāyudhāya ca / namaḥ śivāya devāya namas te bhuvaneśvara

Sanskrit only: no published translation is held for this verse.

नमो वेदान्तवेद्याय नमो ऽनन्ताय विष्णवे । नमस् ते सकलाध्यक्ष नमस् ते श्रीधराअच्युत

namo vedāntavedyāya namo 'nantāya viṣṇave / namas te sakalādhyakṣa namas te śrīdharāacyuta

Sanskrit only: no published translation is held for this verse.

लोकाध्यक्ष जगत्पूज्य परमात्मन् नमो ऽस्तु ते । त्वं माता सर्वलोकानां त्वम् एव जगतः पिता

lokādhyakṣa jagatpūjya paramātman namo 'stu te / tvaṃ mātā sarvalokānāṃ tvam eva jagataḥ pitā

Sanskrit only: no published translation is held for this verse.

त्वम् आर्तानां सुहृन् मित्रं प्रियस् त्वं प्रपितामहः । त्वं गुरुस् त्वं गतिः साक्षी त्वं पतिस् त्वं परायणः

tvam ārtānāṃ suhṛn mitraṃ priyas tvaṃ prapitāmahaḥ / tvaṃ gurus tvaṃ gatiḥ sākṣī tvaṃ patis tvaṃ parāyaṇaḥ

Sanskrit only: no published translation is held for this verse.

त्वं ध्रुवस् त्वं वषट्कर्ता त्वं हविस् त्वं हुताशनः । त्वं शिवस् त्वं वसुर् धाता त्वं ब्रह्मा त्वं सुरेश्वरः

tvaṃ dhruvas tvaṃ vaṣaṭkartā tvaṃ havis tvaṃ hutāśanaḥ / tvaṃ śivas tvaṃ vasur dhātā tvaṃ brahmā tvaṃ sureśvaraḥ

Sanskrit only: no published translation is held for this verse.

त्वं यमस् त्वं रविर् वायुस् त्वं जलं त्वं धनेश्वरः । त्वं मनुस् त्वम् अहोरात्रं त्वं निशा त्वं निशाकरः । त्वं धृतिस् त्वं श्रियः कान्तिस् त्वं क्षमा त्वं धराधरः

tvaṃ yamas tvaṃ ravir vāyus tvaṃ jalaṃ tvaṃ dhaneśvaraḥ / tvaṃ manus tvam ahorātraṃ tvaṃ niśā tvaṃ niśākaraḥ / tvaṃ dhṛtis tvaṃ śriyaḥ kāntis tvaṃ kṣamā tvaṃ dharādharaḥ

Sanskrit only: no published translation is held for this verse.

त्वं कर्ता जगताम् ईशस् त्वं हन्ता मधुसूदन । त्वम् एव गोप्ता सर्वस्य जगतस् त्वं चराचर

tvaṃ kartā jagatām īśas tvaṃ hantā madhusūdana / tvam eva goptā sarvasya jagatas tvaṃ carācara

Sanskrit only: no published translation is held for this verse.

करणं कारणं कर्ता त्वम् एव परमेश्वरः । शङ्खचक्रगदापाणे भो समुद्धर माधव

karaṇaṃ kāraṇaṃ kartā tvam eva parameśvaraḥ / śaṅkhacakragadāpāṇe bho samuddhara mādhava

Sanskrit only: no published translation is held for this verse.

प्रिय पद्मपलाशाक्ष शेषपर्यङ्कशायिनम् । त्वाम् एव भक्त्या सततं नमामि पुरुषोत्तमम्

priya padmapalāśākṣa śeṣaparyaṅkaśāyinam / tvām eva bhaktyā satataṃ namāmi puruṣottamam

Sanskrit only: no published translation is held for this verse.

श्रीवत्साङ्क जगद्बीजं श्यामलं कमलेक्षणम् । नमामि ते वपुर् देव कलिकल्मषनाशनम्

śrīvatsāṅka jagadbījaṃ śyāmalaṃ kamalekṣaṇam / namāmi te vapur deva kalikalmaṣanāśanam

Sanskrit only: no published translation is held for this verse.

लक्ष्मीधरम् उदाराङ्गं दिव्यमालाविभूषितम् । चारुपृष्ठं महाबाहुं चारुभूषणभूषितम्

lakṣmīdharam udārāṅgaṃ divyamālāvibhūṣitam / cārupṛṣṭhaṃ mahābāhuṃ cārubhūṣaṇabhūṣitam

Sanskrit only: no published translation is held for this verse.

पद्मनाभं विशालाक्षं पद्मपत्त्रनिभेक्षणम् । दीर्घतुङ्गमहाघ्राणं नीलजीमूतसंनिभम्

padmanābhaṃ viśālākṣaṃ padmapattranibhekṣaṇam / dīrghatuṅgamahāghrāṇaṃ nīlajīmūtasaṃnibham

Sanskrit only: no published translation is held for this verse.

दीर्घबाहुं सुगुप्ताङ्गं रत्नहारोज्ज्वलोरसम् । सुभ्रूललाटमुकुटं स्निग्धदन्तं सुलोचनम्

dīrghabāhuṃ suguptāṅgaṃ ratnahārojjvalorasam / subhrūlalāṭamukuṭaṃ snigdhadantaṃ sulocanam

Sanskrit only: no published translation is held for this verse.

चारुबाहुं सुताम्रौष्ठं रत्नोज्ज्वलितकुण्डलम् । वृत्तकण्ठं सुपीनांसं सरसं श्रीधरं हरिम्

cārubāhuṃ sutāmrauṣṭhaṃ ratnojjvalitakuṇḍalam / vṛttakaṇṭhaṃ supīnāṃsaṃ sarasaṃ śrīdharaṃ harim

Sanskrit only: no published translation is held for this verse.

सुकुमारम् अजं नित्यं नीलकुञ्चितमूर्धजम् । उन्नतांसं महोरस्कं कर्णान्तायतलोचनम्

sukumāram ajaṃ nityaṃ nīlakuñcitamūrdhajam / unnatāṃsaṃ mahoraskaṃ karṇāntāyatalocanam

Sanskrit only: no published translation is held for this verse.

हेमारविन्दवदनम् इन्दिरायनम् ईश्वरम् । सर्वलोकविधातारं सर्वपापहरं हरिम्

hemāravindavadanam indirāyanam īśvaram / sarvalokavidhātāraṃ sarvapāpaharaṃ harim

Sanskrit only: no published translation is held for this verse.

सर्वलक्षणसंपन्नं सर्वसत्त्वमनोरमम् । विष्णुम् अच्युतम् ईशानम् अनन्तं पुरुषोत्तमम्

sarvalakṣaṇasaṃpannaṃ sarvasattvamanoramam / viṣṇum acyutam īśānam anantaṃ puruṣottamam

Sanskrit only: no published translation is held for this verse.

नतो ऽस्मि मनसा नित्यं नारायणम् अनामयम् । वरदं कामदं कान्तम् अनन्तं सूनृतं शिवम्

nato 'smi manasā nityaṃ nārāyaṇam anāmayam / varadaṃ kāmadaṃ kāntam anantaṃ sūnṛtaṃ śivam

Sanskrit only: no published translation is held for this verse.

नमामि शिरसा विष्णो सदा त्वां भक्तवत्सल । अस्मिन्न् एकार्णवे घोरे वायुस्कम्भितचञ्चले

namāmi śirasā viṣṇo sadā tvāṃ bhaktavatsala / asminn ekārṇave ghore vāyuskambhitacañcale

Sanskrit only: no published translation is held for this verse.

अनन्तभोगशयने सहस्रफणशोभिते । विचित्रशयने रम्ये सेविते मन्दवायुना

anantabhogaśayane sahasraphaṇaśobhite / vicitraśayane ramye sevite mandavāyunā

Sanskrit only: no published translation is held for this verse.

भुजपञ्चरसंसक्त- कमलालयसेवितम् । इह त्वां मनसा सर्वम् इदानीं दृष्टवान् अहम्

bhujapañcarasaṃsakta- kamalālayasevitam / iha tvāṃ manasā sarvam idānīṃ dṛṣṭavān aham

Sanskrit only: no published translation is held for this verse.

इदानीं तु सुदुःखार्तो मायया तव मोहितः । एकोदके निरालम्बे नष्टस्थावरजङ्गमे

idānīṃ tu suduḥkhārto māyayā tava mohitaḥ / ekodake nirālambe naṣṭasthāvarajaṅgame

Sanskrit only: no published translation is held for this verse.

शून्ये तमसि दुष्पारे दुःखपङ्के निरामये । शीतातपजरारोग- शोकतृष्णादिभिः सदा

śūnye tamasi duṣpāre duḥkhapaṅke nirāmaye / śītātapajarāroga- śokatṛṣṇādibhiḥ sadā

Sanskrit only: no published translation is held for this verse.

पीडितो ऽस्मि भृशं तात सुचिरं कालम् अच्युत । शोकमोहग्रहग्रस्तो विचरन् भवसागरे

pīḍito 'smi bhṛśaṃ tāta suciraṃ kālam acyuta / śokamohagrahagrasto vicaran bhavasāgare

Sanskrit only: no published translation is held for this verse.

इहाद्य विधिना प्राप्तस् तव पादाब्जसंनिधौ । एकार्णवे महाघोरे दुस्तरे दुःखपीडितः

ihādya vidhinā prāptas tava pādābjasaṃnidhau / ekārṇave mahāghore dustare duḥkhapīḍitaḥ

Sanskrit only: no published translation is held for this verse.

चिरभ्रमपरिश्रान्तस् त्वाम् अद्य शरणं गतः । प्रसीद सुमहामाय विष्णो राजीवलोचन

cirabhramapariśrāntas tvām adya śaraṇaṃ gataḥ / prasīda sumahāmāya viṣṇo rājīvalocana

Sanskrit only: no published translation is held for this verse.

विश्वयोने विशालाक्ष विश्वात्मन् विश्वसंभव । अनन्यशरणं प्राप्तम् अतो ऽत्र कुलनन्दन

viśvayone viśālākṣa viśvātman viśvasaṃbhava / ananyaśaraṇaṃ prāptam ato 'tra kulanandana

Sanskrit only: no published translation is held for this verse.

त्राहि मां कृपया कृष्ण शरणागतम् आतुरम् । नमस् ते पुण्डरीकाक्ष पुराणपुरुषोत्तम

trāhi māṃ kṛpayā kṛṣṇa śaraṇāgatam āturam / namas te puṇḍarīkākṣa purāṇapuruṣottama

Sanskrit only: no published translation is held for this verse.

अञ्जनाभ हृषीकेश मायामय नमो ऽस्तु ते । माम् उद्धर महाबाहो मग्ने संसारसागरे

añjanābha hṛṣīkeśa māyāmaya namo 'stu te / mām uddhara mahābāho magne saṃsārasāgare

Sanskrit only: no published translation is held for this verse.

गह्वरे दुस्तरे दुःख- क्लिष्टे क्लेशमहाग्रहैः । अनाथं कृपणं दीनं पतितं भवसागरे । मां समुद्धर गोविन्द वरदेश नमो ऽस्तु ते

gahvare dustare duḥkha- kliṣṭe kleśamahāgrahaiḥ / anāthaṃ kṛpaṇaṃ dīnaṃ patitaṃ bhavasāgare / māṃ samuddhara govinda varadeśa namo 'stu te

Sanskrit only: no published translation is held for this verse.

नमस् त्रैलोक्यनाथाय हरये भूधराय च । देवदेव नमस् ते ऽस्तु श्रीवल्लभ नमो ऽस्तु ते

namas trailokyanāthāya haraye bhūdharāya ca / devadeva namas te 'stu śrīvallabha namo 'stu te

Sanskrit only: no published translation is held for this verse.

कृष्ण कृष्ण कृपालुस् त्वम् अगतीनां गतिर् भवान् । संसारार्णवमग्नानां प्रसीद मधुसूदन

kṛṣṇa kṛṣṇa kṛpālus tvam agatīnāṃ gatir bhavān / saṃsārārṇavamagnānāṃ prasīda madhusūdana

Sanskrit only: no published translation is held for this verse.

त्वाम् एकम् आद्यं पुरुषं पुराणं जगत्पतिं कारणम् अच्युतं प्रभुम् । जनार्दनं जन्मजरार्तिनाशनं सुरेश्वरं सुन्दरम् इन्दिरापतिम्

tvām ekam ādyaṃ puruṣaṃ purāṇaṃ jagatpatiṃ kāraṇam acyutaṃ prabhum / janārdanaṃ janmajarārtināśanaṃ sureśvaraṃ sundaram indirāpatim

Sanskrit only: no published translation is held for this verse.

बृहद्भुजं श्यामलकोमलं शुभं वराननं वारिजपत्त्रनेत्रम् । तरंगभङ्गायतकुन्तलं हरिं सुकान्तम् ईशं प्रणतो ऽस्मि शाश्वतम्

bṛhadbhujaṃ śyāmalakomalaṃ śubhaṃ varānanaṃ vārijapattranetram / taraṃgabhaṅgāyatakuntalaṃ hariṃ sukāntam īśaṃ praṇato 'smi śāśvatam

Sanskrit only: no published translation is held for this verse.

सा जिह्वा या हरिं स्तौति तच् चित्तं यत् त्वदर्पितम् । ताव् एव केवलौ श्लाघ्यौ यौ त्वत्पूजाकरौ करौ

sā jihvā yā hariṃ stauti tac cittaṃ yat tvadarpitam / tāv eva kevalau ślāghyau yau tvatpūjākarau karau

Sanskrit only: no published translation is held for this verse.

जन्मान्तरसहस्रेषु यन् मया पातकं कृतम् । तन् मे हर त्वं गोविन्द वासुदेवेति कीर्तनात्

janmāntarasahasreṣu yan mayā pātakaṃ kṛtam / tan me hara tvaṃ govinda vāsudeveti kīrtanāt

Sanskrit only: no published translation is held for this verse.

इति स्तुतस् ततो विष्णुर् मार्कण्डेयेन धीमता । संतुष्टः प्राह विश्वात्मा तं मुनिं गरुडध्वजः

iti stutas tato viṣṇur mārkaṇḍeyena dhīmatā / saṃtuṣṭaḥ prāha viśvātmā taṃ muniṃ garuḍadhvajaḥ

Sanskrit only: no published translation is held for this verse.

प्रीतो ऽस्मि तपसा विप्र स्तुत्या च भृगुनन्दन । वरं वृणीष्व भद्रं ते प्रार्थितं दद्मि ते वरम्

prīto 'smi tapasā vipra stutyā ca bhṛgunandana / varaṃ vṛṇīṣva bhadraṃ te prārthitaṃ dadmi te varam

Sanskrit only: no published translation is held for this verse.

त्वत्पादपद्मे देवेश भक्तिं मे देहि सर्वदा । यदि तुष्टो ममाद्य त्वम् अन्यद् एकं वृणोम्य् अहम्

tvatpādapadme deveśa bhaktiṃ me dehi sarvadā / yadi tuṣṭo mamādya tvam anyad ekaṃ vṛṇomy aham

Sanskrit only: no published translation is held for this verse.

स्तोत्रेणानेन देवेश यस् त्वां स्तोष्यति नित्यशः । स्वर्लोकवसतिं तस्य देहि देव जगत्पते

stotreṇānena deveśa yas tvāṃ stoṣyati nityaśaḥ / svarlokavasatiṃ tasya dehi deva jagatpate

Sanskrit only: no published translation is held for this verse.

दीर्घायुष्ट्वं तु यद् दत्तं त्वया मे तप्यतः पुरा । तत् सर्वं सफलं जातम् इदानीं तव दर्शनात्

dīrghāyuṣṭvaṃ tu yad dattaṃ tvayā me tapyataḥ purā / tat sarvaṃ saphalaṃ jātam idānīṃ tava darśanāt

Sanskrit only: no published translation is held for this verse.

वस्तुम् इच्छामि देवेश तव पादाब्जम् अर्चयन् । अत्रैव भगवन् नित्यं जन्ममृत्युविवर्जितः

vastum icchāmi deveśa tava pādābjam arcayan / atraiva bhagavan nityaṃ janmamṛtyuvivarjitaḥ

Sanskrit only: no published translation is held for this verse.

मय्य् अस्तु ते भृगुश्रेष्ठ भक्तिर् अव्यभिचारिणी । भक्त्या मुक्तिर् भवत्य् एव तव कालेन सत्तम

mayy astu te bhṛguśreṣṭha bhaktir avyabhicāriṇī / bhaktyā muktir bhavaty eva tava kālena sattama

Sanskrit only: no published translation is held for this verse.

यस् त्व् इदं पठते स्तोत्रं सायं प्रातस् तवेरितम् । मयि भक्तिं दृढां कृत्वा मम लोके स मोदते

yas tv idaṃ paṭhate stotraṃ sāyaṃ prātas taveritam / mayi bhaktiṃ dṛḍhāṃ kṛtvā mama loke sa modate

Sanskrit only: no published translation is held for this verse.

यत्र यत्र भृगुश्रेष्ठ स्थितस् त्वं मां स्मरिष्यसि । तत्र तत्र समेष्यामि दान्तो भक्तवशो ऽस्मि भोः

yatra yatra bhṛguśreṣṭha sthitas tvaṃ māṃ smariṣyasi / tatra tatra sameṣyāmi dānto bhaktavaśo 'smi bhoḥ

Sanskrit only: no published translation is held for this verse.

इत्य् उक्त्वा तं मुनिश्रेष्ठं मार्कण्डेयं स माधवः । विरराम स सर्वत्र पश्यन् विष्णुं यतस् ततः

ity uktvā taṃ muniśreṣṭhaṃ mārkaṇḍeyaṃ sa mādhavaḥ / virarāma sa sarvatra paśyan viṣṇuṃ yatas tataḥ

Sanskrit only: no published translation is held for this verse.

इति ते कथितं विप्र चरितं तस्य धीमतः । मार्कण्डेयस्य च मुनेस् तेनैवोक्तं पुरा मम

iti te kathitaṃ vipra caritaṃ tasya dhīmataḥ / mārkaṇḍeyasya ca munes tenaivoktaṃ purā mama

Sanskrit only: no published translation is held for this verse.

ये विष्णुभक्त्या चरितं पुराणं भृगोस् तु पौत्रस्य पठन्ति नित्यम् । ते मुक्तपापा नरसिंहलोके वसन्ति भक्तैर् अभिपूज्यमानाः

ye viṣṇubhaktyā caritaṃ purāṇaṃ bhṛgos tu pautrasya paṭhanti nityam / te muktapāpā narasiṃhaloke vasanti bhaktair abhipūjyamānāḥ

Sanskrit only: no published translation is held for this verse.