Narasimha-Purana 14

शृणु वत्स महाबुद्धे शिष्याश् चैतां परां कथाम् । मयोच्यमानां शृण्वन्तु सर्वपापप्रणाशिनीम्

śṛṇu vatsa mahābuddhe śiṣyāś caitāṃ parāṃ kathām / mayocyamānāṃ śṛṇvantu sarvapāpapraṇāśinīm

Sanskrit only: no published translation is held for this verse.

पुरा द्विजवरः कश्चिद् वेदशास्त्रविशारदः । मृतभार्यो गतस् तीर्थं चक्रे स्नानं यथाविधि

purā dvijavaraḥ kaścid vedaśāstraviśāradaḥ / mṛtabhāryo gatas tīrthaṃ cakre snānaṃ yathāvidhi

Sanskrit only: no published translation is held for this verse.

तपः सुतप्तं विजने निःस्पृहो दारकर्मणि । भिक्षाहारः प्रवसितो जपस्नानपरायणः

tapaḥ sutaptaṃ vijane niḥspṛho dārakarmaṇi / bhikṣāhāraḥ pravasito japasnānaparāyaṇaḥ

Sanskrit only: no published translation is held for this verse.

स्नात्वा स गङ्गां यमुनां सरस्वतीं पुण्यां वितस्ताम् अथ गोमतीं च । गयां समासाद्य पितृन् पितामहान् संतर्पयन् सन् गतवान् महेन्द्रम्

snātvā sa gaṅgāṃ yamunāṃ sarasvatīṃ puṇyāṃ vitastām atha gomatīṃ ca / gayāṃ samāsādya pitṛn pitāmahān saṃtarpayan san gatavān mahendram

Sanskrit only: no published translation is held for this verse.

तत्रापि कुण्डेषु गिरौ महामतिः स्नात्वा नु दृष्ट्वा भृगुनन्दनोत्तमम् । कृत्वा पितृभ्यस् तु तथैव तृप्तिं व्रजन् वनं पापहरं प्रविष्टः

tatrāpi kuṇḍeṣu girau mahāmatiḥ snātvā nu dṛṣṭvā bhṛgunandanottamam / kṛtvā pitṛbhyas tu tathaiva tṛptiṃ vrajan vanaṃ pāpaharaṃ praviṣṭaḥ

Sanskrit only: no published translation is held for this verse.

धारां पतन्तीं महतीं शिलोच्चयात् संधार्य भक्त्या त्व् अनु नारसिंहे । शिरस्य् अशेषाघविनाशिनीं तदा विशुद्धदेहः स बभूव विप्रः

dhārāṃ patantīṃ mahatīṃ śiloccayāt saṃdhārya bhaktyā tv anu nārasiṃhe / śirasy aśeṣāghavināśinīṃ tadā viśuddhadehaḥ sa babhūva vipraḥ

Sanskrit only: no published translation is held for this verse.

विन्ध्याचले सक्तम् अनन्तम् अच्युतं भक्तैर् मुनीन्द्रैर् अपि पूजितं सदा । आराध्य पुष्पैर् गिरिसंभवैर् शुभैस् तत्रैव सिद्धिं त्व् अभिकाङ्क्ष्य संस्थितः

vindhyācale saktam anantam acyutaṃ bhaktair munīndrair api pūjitaṃ sadā / ārādhya puṣpair girisaṃbhavair śubhais tatraiva siddhiṃ tv abhikāṅkṣya saṃsthitaḥ

Sanskrit only: no published translation is held for this verse.

स नारसिंहो बहुकालपूजया तुष्टः सुनिद्रागतम् आह भक्तम् । अनाश्रमित्वं गृहभङ्गकारणं ह्य् अतो गृहाणाश्रमम् उत्तमं द्विज

sa nārasiṃho bahukālapūjayā tuṣṭaḥ sunidrāgatam āha bhaktam / anāśramitvaṃ gṛhabhaṅgakāraṇaṃ hy ato gṛhāṇāśramam uttamaṃ dvija

Sanskrit only: no published translation is held for this verse.

अनाश्रमीति द्विज वेदपारगान् अपि त्व् अहं नानुगृह्णामि चात्र । तथापि निष्ठां तव वीक्ष्य सत्तम त्वयि प्रसन्नेन मयेत्य् उदीरितम्

anāśramīti dvija vedapāragān api tv ahaṃ nānugṛhṇāmi cātra / tathāpi niṣṭhāṃ tava vīkṣya sattama tvayi prasannena mayety udīritam

Sanskrit only: no published translation is held for this verse.

तेनैवम् उक्तः परमेश्वरेण द्विजो ऽपि बुद्ध्या प्रविचिन्त्य वाक्यम् । हरेर् अलङ्घ्यं नरसिंहमूर्तेर् भाधं च कृत्वा स यतिर् बभूव

tenaivam uktaḥ parameśvareṇa dvijo 'pi buddhyā pravicintya vākyam / harer alaṅghyaṃ narasiṃhamūrter bhādhaṃ ca kṛtvā sa yatir babhūva

Sanskrit only: no published translation is held for this verse.

त्रिदण्डवृक्षाक्षपवित्रपाणिर् आप्लुत्य तोये त्व् अघहारिणि स्थितः । जपन् सदा मन्त्रम् अपास्तदोषं सावित्र्यम् ईशं हृदये स्मरन् हरिम्

tridaṇḍavṛkṣākṣapavitrapāṇir āplutya toye tv aghahāriṇi sthitaḥ / japan sadā mantram apāstadoṣaṃ sāvitryam īśaṃ hṛdaye smaran harim

Sanskrit only: no published translation is held for this verse.

यथाकथंचित् प्रतिलभ्य शाकं भैक्ष्याभितुष्टो वनवासवासी । अभ्यर्च्य विष्णुं नरसिंहमूर्तिं ध्यात्वा च नित्यं हृदि शुद्धम् आद्यम्

yathākathaṃcit pratilabhya śākaṃ bhaikṣyābhituṣṭo vanavāsavāsī / abhyarcya viṣṇuṃ narasiṃhamūrtiṃ dhyātvā ca nityaṃ hṛdi śuddham ādyam

Sanskrit only: no published translation is held for this verse.

विविक्तदेशे विपुले कुशासने निवेश्य सर्वं हृदये ऽस्य सर्वम् । बाह्यं समस्तं गुणम् इन्द्रियाणां विलीय भेदं भगवत्य् अनन्ते

viviktadeśe vipule kuśāsane niveśya sarvaṃ hṛdaye 'sya sarvam / bāhyaṃ samastaṃ guṇam indriyāṇāṃ vilīya bhedaṃ bhagavaty anante

Sanskrit only: no published translation is held for this verse.

विज्ञेयम् आनन्दम् अजं विशालं सत्यात्मकं क्षेमपदं वरेण्यम् । संचिन्त्य तस्मिन् प्रविहाय देहं बभूव मुक्तः परमात्मरूपी

vijñeyam ānandam ajaṃ viśālaṃ satyātmakaṃ kṣemapadaṃ vareṇyam / saṃcintya tasmin pravihāya dehaṃ babhūva muktaḥ paramātmarūpī

Sanskrit only: no published translation is held for this verse.

इमां कथां मुक्तिपरां यथोक्तां पठन्ति ये नारसिंहं स्मरन्तः । प्रयागतीर्थप्लवने तु यत् फलं तत् प्राप्य ते यान्ति हरेः पदं महत्

imāṃ kathāṃ muktiparāṃ yathoktāṃ paṭhanti ye nārasiṃhaṃ smarantaḥ / prayāgatīrthaplavane tu yat phalaṃ tat prāpya te yānti hareḥ padaṃ mahat

Sanskrit only: no published translation is held for this verse.

इत्य् एतद् उक्तं तव पुत्र पृच्छतः पुरातनं पुण्यतमं पवित्रकम् । संसारवृक्षस्य विनाशनं परं पुनः कम् इच्छस्य् अभिवाञ्छितं वद

ity etad uktaṃ tava putra pṛcchataḥ purātanaṃ puṇyatamaṃ pavitrakam / saṃsāravṛkṣasya vināśanaṃ paraṃ punaḥ kam icchasy abhivāñchitaṃ vada

Sanskrit only: no published translation is held for this verse.