Narasimha-Purana 67

तीर्थानि कथितान्य् एवं भौमानि द्विजसत्तम । मानसानि हि तीर्थानि फलदानि विशेषतः

tīrthāni kathitāny evaṃ bhaumāni dvijasattama / mānasāni hi tīrthāni phaladāni viśeṣataḥ

Sanskrit only: no published translation is held for this verse.

मनोनिर्मलता तीर्थं रागादिभिर् अनाकुला । सत्यं तीर्थं दया तीर्थं तीर्थम् इन्द्रियनिग्रहः

manonirmalatā tīrthaṃ rāgādibhir anākulā / satyaṃ tīrthaṃ dayā tīrthaṃ tīrtham indriyanigrahaḥ

Sanskrit only: no published translation is held for this verse.

गुरुशुश्रूषणं तीर्थं मातृशुश्रूषणं तथा । स्वधर्माचरणं तीर्थं तीर्थम् अग्नेर् उपासनम्

guruśuśrūṣaṇaṃ tīrthaṃ mātṛśuśrūṣaṇaṃ tathā / svadharmācaraṇaṃ tīrthaṃ tīrtham agner upāsanam

Sanskrit only: no published translation is held for this verse.

एतानि पुण्यतीर्थानि व्रतानि शृणु मे ऽधुना । एकभुक्तं तथा नक्तम् उपवासं च वै मुने

etāni puṇyatīrthāni vratāni śṛṇu me 'dhunā / ekabhuktaṃ tathā naktam upavāsaṃ ca vai mune

Sanskrit only: no published translation is held for this verse.

पूर्णमास्याम् अमावास्याम् एकभुक्तं समाचरेत् । तत्रैकभुक्तं कुर्वाणः पुण्यां गतिम् अवाप्नुयात्

pūrṇamāsyām amāvāsyām ekabhuktaṃ samācaret / tatraikabhuktaṃ kurvāṇaḥ puṇyāṃ gatim avāpnuyāt

Sanskrit only: no published translation is held for this verse.

चतुर्थ्यां तु चतुर्दश्यां सप्तम्यां नक्तम् आचरेत् । अष्टम्यां तु त्रयोदश्यां स प्राप्नोत्य् अभिवाञ्छितम्

caturthyāṃ tu caturdaśyāṃ saptamyāṃ naktam ācaret / aṣṭamyāṃ tu trayodaśyāṃ sa prāpnoty abhivāñchitam

Sanskrit only: no published translation is held for this verse.

उपवासो मनुश्रेष्ठ एकादश्यां विधीयते । नरसिंहं समभ्यर्च्य सर्वपापैः प्रमुच्यते

upavāso manuśreṣṭha ekādaśyāṃ vidhīyate / narasiṃhaṃ samabhyarcya sarvapāpaiḥ pramucyate

Sanskrit only: no published translation is held for this verse.

हस्तयुक्ते ऽर्कदिवसे सौरनक्तं समाचरेत् । स्नात्वार्कमध्ये विष्णुं च ध्यात्वा रोगात् प्रमुच्यते

hastayukte 'rkadivase sauranaktaṃ samācaret / snātvārkamadhye viṣṇuṃ ca dhyātvā rogāt pramucyate

Sanskrit only: no published translation is held for this verse.

आत्मनो द्विगुणां छायां यदा संतिष्ठते रविः । सौरनक्तं विजानीयान् न नक्तं निशि भोजनम्

ātmano dviguṇāṃ chāyāṃ yadā saṃtiṣṭhate raviḥ / sauranaktaṃ vijānīyān na naktaṃ niśi bhojanam

Sanskrit only: no published translation is held for this verse.

गुरुवारे त्रयोदश्याम् अपराह्णे जले ततः । तर्पयित्वा पितृन् देवान् ऋषींश् च तिलतन्दुलैः

guruvāre trayodaśyām aparāhṇe jale tataḥ / tarpayitvā pitṛn devān ṛṣīṃś ca tilatandulaiḥ

Sanskrit only: no published translation is held for this verse.

नरसिंहं समभ्यर्च्य यः करोत्य् उपवासकम् । सर्वपापविनिर्मुक्तो विष्णुलोके महीयते

narasiṃhaṃ samabhyarcya yaḥ karoty upavāsakam / sarvapāpavinirmukto viṣṇuloke mahīyate

Sanskrit only: no published translation is held for this verse.

यदागस्त्योदये प्राप्ते तदा सप्तसु रात्रिषु । अर्घ्यं दद्यात् समभ्यर्च्य अगस्त्याय महामुने

yadāgastyodaye prāpte tadā saptasu rātriṣu / arghyaṃ dadyāt samabhyarcya agastyāya mahāmune

Sanskrit only: no published translation is held for this verse.

शङ्खे तोयं विनिक्षिप्य सितपुष्पाक्षतैर् युतम् । मन्त्रेणानेन वै दद्याच् *छितपुष्पादिनार्चिते

śaṅkhe toyaṃ vinikṣipya sitapuṣpākṣatair yutam / mantreṇānena vai dadyāc *chitapuṣpādinārcite

Sanskrit only: no published translation is held for this verse.

काशपुष्पप्रतीकाश अग्निमारुतसंभव । मित्रावरुणयोः पुत्र कुम्भयोने नमो ऽस्तु ते

kāśapuṣpapratīkāśa agnimārutasaṃbhava / mitrāvaruṇayoḥ putra kumbhayone namo 'stu te

Sanskrit only: no published translation is held for this verse.

आतापी भक्षितो येन वातापी च महासुरः । समुद्रः शोषितो येन सो ऽगस्त्यः प्रीयतां मम

ātāpī bhakṣito yena vātāpī ca mahāsuraḥ / samudraḥ śoṣito yena so 'gastyaḥ prīyatāṃ mama

Sanskrit only: no published translation is held for this verse.

एवं तु दद्याद् यो सर्वम् अगस्त्ये वै दिशं प्रति । सर्वपापविनिर्मुक्तस् तमस् तरति दुस्तरम्

evaṃ tu dadyād yo sarvam agastye vai diśaṃ prati / sarvapāpavinirmuktas tamas tarati dustaram

Sanskrit only: no published translation is held for this verse.

एवं ते कथितं सर्वं भरद्वाज महामुने । पुराणं नारसिंहं च मुनीनां संनिधौ मया

evaṃ te kathitaṃ sarvaṃ bharadvāja mahāmune / purāṇaṃ nārasiṃhaṃ ca munīnāṃ saṃnidhau mayā

Sanskrit only: no published translation is held for this verse.

सर्गश् च प्रतिसर्गश् च वंसो मन्वन्तराणि च । वंशानुचरितं चैव सर्वम् एव प्रकीर्तितम्

sargaś ca pratisargaś ca vaṃso manvantarāṇi ca / vaṃśānucaritaṃ caiva sarvam eva prakīrtitam

Sanskrit only: no published translation is held for this verse.

ब्रह्मणैव पुरा प्रोक्तं मरीच्यादिषु वै मुने । तेभ्यश् च भृगुणा प्रोक्तं मार्कण्डेयाय वै ततः

brahmaṇaiva purā proktaṃ marīcyādiṣu vai mune / tebhyaś ca bhṛguṇā proktaṃ mārkaṇḍeyāya vai tataḥ

Sanskrit only: no published translation is held for this verse.

मार्कण्डेयेन वै प्रोक्तं राज्ञो नागकुलस्य ह । प्रसादान् नरसिंहस्य प्राप्तं व्यासेन धीमता

mārkaṇḍeyena vai proktaṃ rājño nāgakulasya ha / prasādān narasiṃhasya prāptaṃ vyāsena dhīmatā

Sanskrit only: no published translation is held for this verse.

तत्प्रसादान् मया प्राप्तं सर्वपापप्रणाशनम् । पुराणं नरसिंहस्य मया च कथितं तव

tatprasādān mayā prāptaṃ sarvapāpapraṇāśanam / purāṇaṃ narasiṃhasya mayā ca kathitaṃ tava

Sanskrit only: no published translation is held for this verse.

मुनीनां संनिधौ पुण्यं स्वस्ति ते ऽस्तु व्रजाम्य् अहम् । यः शृणोति शुचिर् भूत्वा पुराणं ह्य् एतद् उत्तमम्

munīnāṃ saṃnidhau puṇyaṃ svasti te 'stu vrajāmy aham / yaḥ śṛṇoti śucir bhūtvā purāṇaṃ hy etad uttamam

Sanskrit only: no published translation is held for this verse.

माघे मासि प्रयागे तु स स्नानफलम् आप्नुयात् । यो भक्त्या श्रावयेद् भक्तान् नित्यं नरहरेर् इदम्

māghe māsi prayāge tu sa snānaphalam āpnuyāt / yo bhaktyā śrāvayed bhaktān nityaṃ naraharer idam

Sanskrit only: no published translation is held for this verse.

सर्वतीर्थफलं प्राप्य विष्णुलोके महीयते । श्रुत्वैवं स्नातकैः सार्धं भरद्वाजो महामतिः

sarvatīrthaphalaṃ prāpya viṣṇuloke mahīyate / śrutvaivaṃ snātakaiḥ sārdhaṃ bharadvājo mahāmatiḥ

Sanskrit only: no published translation is held for this verse.

सूतम् अभ्यर्च्य तत्रैव स्थितवान् मुनयो गताः । सर्वपापहरं पुण्यं पुराणं नृसिंहात्मकम्

sūtam abhyarcya tatraiva sthitavān munayo gatāḥ / sarvapāpaharaṃ puṇyaṃ purāṇaṃ nṛsiṃhātmakam

Sanskrit only: no published translation is held for this verse.

पठतां शृण्वतां नृणां नरसिंहो प्रसीदति । प्रसन्ने देवदेवेशे सर्वपापक्षयो भवेत्

paṭhatāṃ śṛṇvatāṃ nṛṇāṃ narasiṃho prasīdati / prasanne devadeveśe sarvapāpakṣayo bhavet

Sanskrit only: no published translation is held for this verse.

प्रक्षीणपापबन्धास् ते मुक्तिं यान्ति नरा इति

prakṣīṇapāpabandhās te muktiṃ yānti narā iti

Sanskrit only: no published translation is held for this verse.