इति श्रीमृगाङ्कदत्तसूनोः परिमलापरनाम्नः पद्मगुप्तस्य कृतौ नवसाहसाङ्कचरिते महाकाव्ये विद्याधराधिपसमागमो नाम त्रयोदशः सर्गः चतुर्दशः सर्गः आकाशारोहणम् अथाश्रमोपान्तमहीं विहाय नेमिस्वनोत्कण्ठितनीलकण्ठाम् । रथो ऽस्य विद्याधरमन्त्रशक्त्या रथाङ्गपणेः पदम् आरुरोह
iti śrīmṛgāṅkadattasūnoḥ parimalāparanāmnaḥ padmaguptasya kṛtau navasāhasāṅkacarite mahākāvye vidyādharādhipasamāgamo nāma trayodaśaḥ sargaḥ caturdaśaḥ sargaḥ ākāśārohaṇam athāśramopāntamahīṃ vihāya nemisvanotkaṇṭhitanīlakaṇṭhām / ratho 'sya vidyādharamantraśaktyā rathāṅgapaṇeḥ padam āruroha
Sanskrit only: no published translation is held for this verse.
ससंभ्रमोत्तंभितकर्णतालम् आकर्णितो दिक्करिभिः सकंपैः । आध्मातशङ्खस्वनमांसलो ऽग्रे तस्योदगान् मङ्गलतूर्यघोषः
sasaṃbhramottaṃbhitakarṇatālam ākarṇito dikkaribhiḥ sakaṃpaiḥ / ādhmātaśaṅkhasvanamāṃsalo 'gre tasyodagān maṅgalatūryaghoṣaḥ
Sanskrit only: no published translation is held for this verse.
उदस्य वक्त्राणि नभस्थलेन यान्तं तम् ऐक्षन्त तपस्विकन्याः । आकर्णविस्तारितमुग्धनेत्राः पत्रान्तरैर् आश्रमपादपानाम्
udasya vaktrāṇi nabhasthalena yāntaṃ tam aikṣanta tapasvikanyāḥ / ākarṇavistāritamugdhanetrāḥ patrāntarair āśramapādapānām
Sanskrit only: no published translation is held for this verse.
व्रजन् स विद्याधरवाहिनीनां मध्ये बभौ मध्यमलोकपालः । अनल्पसौन्दर्यसुधैकसूतिः शशीव नक्षत्रपरम्पराणाम्
vrajan sa vidyādharavāhinīnāṃ madhye babhau madhyamalokapālaḥ / analpasaundaryasudhaikasūtiḥ śaśīva nakṣatraparamparāṇām
Sanskrit only: no published translation is held for this verse.
कुतूहलोल्लोलासितपक्षलेखान्य् आकृष्टकर्णोत्पलविभ्रमाणि । तस्मिन्न् अमुञ्च्यन्त नितम्बिनीभिर् अपाङ्गवल्गीनि विलोचनानि
kutūhalollolāsitapakṣalekhāny ākṛṣṭakarṇotpalavibhramāṇi / tasminn amuñcyanta nitambinībhir apāṅgavalgīni vilocanāni
Sanskrit only: no published translation is held for this verse.
रमाङ्गदकृतं वर्णनम् अथान्तिकस्थेन सश् चाभ्यधायि रमाङ्गदेनेत्थम् अवन्तिनाथः । सहस्रशः खे चलितानि पश्यन् विद्याधराणां पुरतो बलानि
ramāṅgadakṛtaṃ varṇanam athāntikasthena saś cābhyadhāyi ramāṅgadenettham avantināthaḥ / sahasraśaḥ khe calitāni paśyan vidyādharāṇāṃ purato balāni
Sanskrit only: no published translation is held for this verse.
हैमं नृप स्यन्दनम् उत्पताकम् आकम्पि रत्नाङ्कितकेतुम् एते । सहस्ररश्मेर् इव वालखिल्या विध्याधरास् ते परिवारयन्ति
haimaṃ nṛpa syandanam utpatākam ākampi ratnāṅkitaketum ete / sahasraraśmer iva vālakhilyā vidhyādharās te parivārayanti
Sanskrit only: no published translation is held for this verse.
व्रजन्न् अमर्त्यप्रमदाविमुक्त- मन्दारमालाजटिलांसकुटः । कुन्दच्छटापाण्डुसटाकलापः कात्यायनीसिंह इवावभासि
vrajann amartyapramadāvimukta- mandāramālājaṭilāṃsakuṭaḥ / kundacchaṭāpāṇḍusaṭākalāpaḥ kātyāyanīsiṃha ivāvabhāsi
Sanskrit only: no published translation is held for this verse.
प्रयाणतूर्यध्वनिर् एष किं ते पातालकुक्षिप्रतिनादसान्द्रः । रवः प्रसर्पत्य् उत भैरवो ऽयम् अकालकल्पान्तपयोधराणाम्
prayāṇatūryadhvanir eṣa kiṃ te pātālakukṣipratinādasāndraḥ / ravaḥ prasarpaty uta bhairavo 'yam akālakalpāntapayodharāṇām
Sanskrit only: no published translation is held for this verse.
मूले भुवः कज्जलधूलिकल्पम् आलक्ष्यते पश्य निलीनम् एतत् । नीरन्ध्रविद्याधरमौलिरत्न- प्रभाङ्कुरप्राशितम् अन्धकारम्
mūle bhuvaḥ kajjaladhūlikalpam ālakṣyate paśya nilīnam etat / nīrandhravidyādharamauliratna- prabhāṅkuraprāśitam andhakāram
Sanskrit only: no published translation is held for this verse.
आयामिमालामणिकान्तिदण्डैर् उत्सारयन्तः परितस् तमांसि । अमी मरुन्नर्तितचामरास् ते खम् उल्लिखन्तीव खुरैस् तुरङ्गाः
āyāmimālāmaṇikāntidaṇḍair utsārayantaḥ paritas tamāṃsi / amī marunnartitacāmarās te kham ullikhantīva khurais turaṅgāḥ
Sanskrit only: no published translation is held for this verse.
विहस्य विद्याधरबालिकाभिः समं विमुक्ता नयनत्रिभागैः । प्रस्थानलाजाञ्जलयस् तवैते रथे पताकास्खलिताः पतन्ति
vihasya vidyādharabālikābhiḥ samaṃ vimuktā nayanatribhāgaiḥ / prasthānalājāñjalayas tavaite rathe patākāskhalitāḥ patanti
Sanskrit only: no published translation is held for this verse.
नरेन्द्र विद्याधरपुङ्गवानाम् एते पुरः पश्य कृपाणपट्टाः । कालाञ्जनश्यामतयाश्रयन्ते तरङ्गतां व्योममहार्णवस्य
narendra vidyādharapuṅgavānām ete puraḥ paśya kṛpāṇapaṭṭāḥ / kālāñjanaśyāmatayāśrayante taraṅgatāṃ vyomamahārṇavasya
Sanskrit only: no published translation is held for this verse.
वाचालयन्त्यः ककुभां मुखानि नादेन जाम्बूनदकिङ्किणीनाम् । इमा विमानावलयः कथं चिद् अन्योन्यरुद्धप्रसराः प्रयान्ति
vācālayantyaḥ kakubhāṃ mukhāni nādena jāmbūnadakiṅkiṇīnām / imā vimānāvalayaḥ kathaṃ cid anyonyaruddhaprasarāḥ prayānti
Sanskrit only: no published translation is held for this verse.
वातवर्णनम् आधूतकार्तस्वरकेतुयष्तिर् एनान्य् अशोकस्तबकारुणानि । आनर्तयत्य् एष पताकिनीनां वातः पताकांशुकपल्लवानि
vātavarṇanam ādhūtakārtasvaraketuyaṣtir enāny aśokastabakāruṇāni / ānartayaty eṣa patākinīnāṃ vātaḥ patākāṃśukapallavāni
Sanskrit only: no published translation is held for this verse.
नभश्चराणां व्रजताम् अमीषाम् अन्योन्यपीनांसविघर्षणेन । उल्लासितः कुङ्कुमपांसुपूरः पिशङ्गयत्य् एष दिशां मुखानि
nabhaścarāṇāṃ vrajatām amīṣām anyonyapīnāṃsavigharṣaṇena / ullāsitaḥ kuṅkumapāṃsupūraḥ piśaṅgayaty eṣa diśāṃ mukhāni
Sanskrit only: no published translation is held for this verse.
प्रेक्षकस्त्रीवर्णनम् सरत्नकाञ्चीवलयैर् विलास- सिंहासनैर् मन्मथपार्थिवस्य । इतो नितम्बैर् असितेक्षणानां व्याप्तान्तरं व्योम समाप्तिम् एति
prekṣakastrīvarṇanam saratnakāñcīvalayair vilāsa- siṃhāsanair manmathapārthivasya / ito nitambair asitekṣaṇānāṃ vyāptāntaraṃ vyoma samāptim eti
Sanskrit only: no published translation is held for this verse.
अन्योन्यसङ्घट्टविसूत्रितानि कुमुद्वतीकान्तकरोपमानि । एतानि पश्याम्बरतः पतन्ति विमानमुक्ताफलजालकानि
anyonyasaṅghaṭṭavisūtritāni kumudvatīkāntakaropamāni / etāni paśyāmbarataḥ patanti vimānamuktāphalajālakāni
Sanskrit only: no published translation is held for this verse.
एताः प्रयान्त्यः पुरतो विमानैर् विवर्त्य बाला मुखपङ्कजानि । अपाङ्गविश्रान्तविलोलतारैस् त्वां नाथ नेत्राञ्जलिभिः पिबन्ति
etāḥ prayāntyaḥ purato vimānair vivartya bālā mukhapaṅkajāni / apāṅgaviśrāntavilolatārais tvāṃ nātha netrāñjalibhiḥ pibanti
Sanskrit only: no published translation is held for this verse.
आसाम् इतः सत्वरगामिनीनां गतागताभ्यां मणिकुण्डलानि । भिन्दन्ति विद्याधरकामिनीनां कपोलकालागुरुपत्त्रकानि
āsām itaḥ satvaragāminīnāṃ gatāgatābhyāṃ maṇikuṇḍalāni / bhindanti vidyādharakāminīnāṃ kapolakālāgurupattrakāni
Sanskrit only: no published translation is held for this verse.
इतो मिथः पार्श्वविघट्टितेषु जवाद् विमानेषु समापतत्सु । आसाम् इतः प्रेङ्खितमध्यरत्न- विसूत्रिता हारलताः स्फुटन्ति
ito mithaḥ pārśvavighaṭṭiteṣu javād vimāneṣu samāpatatsu / āsām itaḥ preṅkhitamadhyaratna- visūtritā hāralatāḥ sphuṭanti
Sanskrit only: no published translation is held for this verse.
एते गतिक्षोभवशाद् वधूनां पश्योन्मयूखा मणिकर्णपूराः । इतस् तले सञ्चरताम् अहीनां निपत्य चूडामणिषु स्वनन्ति
ete gatikṣobhavaśād vadhūnāṃ paśyonmayūkhā maṇikarṇapūrāḥ / itas tale sañcaratām ahīnāṃ nipatya cūḍāmaṇiṣu svananti
Sanskrit only: no published translation is held for this verse.
पातालम् एतन् नयनोत्सवेन विचिन्त्य शून्यं शशलाञ्छनेन । इहाङ्गनाभिः स्वमुखछलेन कृतो ऽम्बरे चन्द्रमयीव सृष्टिः
pātālam etan nayanotsavena vicintya śūnyaṃ śaśalāñchanena / ihāṅganābhiḥ svamukhachalena kṛto 'mbare candramayīva sṛṣṭiḥ
Sanskrit only: no published translation is held for this verse.
इतो रसं पल्लवयन्ति वीरं विद्याधराणां करवालवल्ल्यः । एताश् च शृङ्गारम् इतो ऽङ्गनानां दृशो नवेन्दीवरदामदीर्घास्
ito rasaṃ pallavayanti vīraṃ vidyādharāṇāṃ karavālavallyaḥ / etāś ca śṛṅgāram ito 'ṅganānāṃ dṛśo navendīvaradāmadīrghās
Sanskrit only: no published translation is held for this verse.
झटित्य् अवाप्तप्रतिबिम्बम् एतत् सैन्यं विलोक्य स्फटिकाङ्गणेषु । सविस्मयं नागपुराङ्गनाभिर् इतः क्रियन्ते नयनोत्पलानि
jhaṭity avāptapratibimbam etat sainyaṃ vilokya sphaṭikāṅgaṇeṣu / savismayaṃ nāgapurāṅganābhir itaḥ kriyante nayanotpalāni
Sanskrit only: no published translation is held for this verse.
नरेन्द्र तस्माद् गगनावहगाहि- त्वद्दर्शनव्यग्रतपस्विपङ्क्तेः । दूरं हविर् धूमसुगन्धिसीम्नः स्थानाद् वयं वङ्कुमुनेः प्रवृत्ताः
narendra tasmād gaganāvahagāhi- tvaddarśanavyagratapasvipaṅkteḥ / dūraṃ havir dhūmasugandhisīmnaḥ sthānād vayaṃ vaṅkumuneḥ pravṛttāḥ
Sanskrit only: no published translation is held for this verse.
वनवर्णनम् यथायम् अभ्येति पुरो नभस्वान् आकृष्टनानाविधपुष्पगन्धः । अग्रे तथाभ्रंलिहभूरुहं नः शङ्के वनं दृक्पथम् एष्यतीति
vanavarṇanam yathāyam abhyeti puro nabhasvān ākṛṣṭanānāvidhapuṣpagandhaḥ / agre tathābhraṃlihabhūruhaṃ naḥ śaṅke vanaṃ dṛkpatham eṣyatīti
Sanskrit only: no published translation is held for this verse.
एभिर् महीपाल विमानरत्नैर् अग्रेसरैः सम्भ्रममुक्तमार्गः । निष्कम्पकेतुर् महतास्पदेन रथस् तवायं वियति प्रयाति
ebhir mahīpāla vimānaratnair agresaraiḥ sambhramamuktamārgaḥ / niṣkampaketur mahatāspadena rathas tavāyaṃ viyati prayāti
Sanskrit only: no published translation is held for this verse.
सितप्रसूनस्तबकैस् तरूणाम् एषा पुरस्तारिकान्तरिक्षा । झटित्य् अशेषैव निमेषमात्राद् उन्मीलिता पश्य वनान्तलेखा
sitaprasūnastabakais tarūṇām eṣā purastārikāntarikṣā / jhaṭity aśeṣaiva nimeṣamātrād unmīlitā paśya vanāntalekhā
Sanskrit only: no published translation is held for this verse.
यदीश विद्याधरवाहिनीयम् आकाशतः किञ्चिदधः प्रवृत्ता । अवैमि चित्ते निहितं तद् अस्याः पदं वनालोकनकौतुकेन
yadīśa vidyādharavāhinīyam ākāśataḥ kiñcidadhaḥ pravṛttā / avaimi citte nihitaṃ tad asyāḥ padaṃ vanālokanakautukena
Sanskrit only: no published translation is held for this verse.
एषा तमालावलिनीलकान्तेर् उपोढरामामुखहेमपद्मा । सेना वनस्याभिमुखं प्रयाति पश्याम्बुरासेर् इव जह्नुकन्या
eṣā tamālāvalinīlakānter upoḍharāmāmukhahemapadmā / senā vanasyābhimukhaṃ prayāti paśyāmburāser iva jahnukanyā
Sanskrit only: no published translation is held for this verse.
अस्याः क्षमापाल वनान्तराजेर् विमानपङ्क्तिः पुरतःस्थितेयम् । आलम्बते रत्नकिरीटलक्ष्मीं मणिप्रभोद्गीर्णमहेन्द्रचापा
asyāḥ kṣamāpāla vanāntarājer vimānapaṅktiḥ purataḥsthiteyam / ālambate ratnakirīṭalakṣmīṃ maṇiprabhodgīrṇamahendracāpā
Sanskrit only: no published translation is held for this verse.
एते खलीनक्षतशोणिताक्ताः पश्येन्द्रगोपश्रियम् उद्वहन्तः । तुरङ्गलालाजलबिन्दवस् ते लुठन्ति हेमद्रुमपल्लवेषु
ete khalīnakṣataśoṇitāktāḥ paśyendragopaśriyam udvahantaḥ / turaṅgalālājalabindavas te luṭhanti hemadrumapallaveṣu
Sanskrit only: no published translation is held for this verse.
मन्दानिलान्दोलितपल्लवाग्राः समग्रपुष्पाहरणोद्यताभ्यः । इतो लताः पार्थिव संरभन्ते लावण्यम् आदातुम् इवाङ्गनाभ्यः
mandānilāndolitapallavāgrāḥ samagrapuṣpāharaṇodyatābhyaḥ / ito latāḥ pārthiva saṃrabhante lāvaṇyam ādātum ivāṅganābhyaḥ
Sanskrit only: no published translation is held for this verse.
अमूनि पुष्पाणि महीरुहाणाम् आभान्ति लीनभ्रमरोदराणि । विद्याधरीविभ्रमदर्शनार्थम् उत्तानितानीव विलोचनानि
amūni puṣpāṇi mahīruhāṇām ābhānti līnabhramarodarāṇi / vidyādharīvibhramadarśanārtham uttānitānīva vilocanāni
Sanskrit only: no published translation is held for this verse.
पश्याग्रवातायनम् एतद् एत्य लताग्रपुष्पाण्य् अचिन्वतीनाम् । नृपातिभारेण नितम्बिनीनां विमानरत्नानि पुरो नमन्ति
paśyāgravātāyanam etad etya latāgrapuṣpāṇy acinvatīnām / nṛpātibhāreṇa nitambinīnāṃ vimānaratnāni puro namanti
Sanskrit only: no published translation is held for this verse.
शाखाग्रलग्नासु महातरूणां विटङ्करत्नद्युतिश्र्ङ्खलासु । विलम्बमानैर् इव चिम्बितेयम् इतो विमानैर् मणिपञ्जरश्रीः
śākhāgralagnāsu mahātarūṇāṃ viṭaṅkaratnadyutiśrṅkhalāsu / vilambamānair iva cimbiteyam ito vimānair maṇipañjaraśrīḥ
Sanskrit only: no published translation is held for this verse.
इमाः समं प्राणसमैर् वने ऽस्मिन् सर्वऋतुर् लक्ष्मीनिबिडोपगूढे । नभःस्थिता एव नरेन्द्र पश्य पुष्पोच्चये लोलदृशः प्रवृत्ताः
imāḥ samaṃ prāṇasamair vane 'smin sarvaṛtur lakṣmīnibiḍopagūḍhe / nabhaḥsthitā eva narendra paśya puṣpoccaye loladṛśaḥ pravṛttāḥ
Sanskrit only: no published translation is held for this verse.
एताः करैः काञ्चनपद्मगौरैर् विलासवत्यः सनिबन्धनानि । हरन्ति पुष्पाणि महीरुहाणां मृदूनि यूनाम् इव मानसानि
etāḥ karaiḥ kāñcanapadmagaurair vilāsavatyaḥ sanibandhanāni / haranti puṣpāṇi mahīruhāṇāṃ mṛdūni yūnām iva mānasāni
Sanskrit only: no published translation is held for this verse.
आसां लताग्रस्तबकोत्थितानि शिखण्डरत्नद्युतिचुम्बितानि । पश्योपरिष्टाद् अलिमण्डलानि नीलातपत्रभ्रमम् आरभन्ते
āsāṃ latāgrastabakotthitāni śikhaṇḍaratnadyuticumbitāni / paśyopariṣṭād alimaṇḍalāni nīlātapatrabhramam ārabhante
Sanskrit only: no published translation is held for this verse.
मुञ्चत्य् अलिः पुष्पलताम् इतो ऽयम् आघ्रातरामामुखपद्मगन्धः । गुणप्रकर्षे हि सदा मनांसि गुणान्तरज्ञावतां रमन्ते
muñcaty aliḥ puṣpalatām ito 'yam āghrātarāmāmukhapadmagandhaḥ / guṇaprakarṣe hi sadā manāṃsi guṇāntarajñāvatāṃ ramante
Sanskrit only: no published translation is held for this verse.
लतैतया चूततरोः सलीलम् आनीयमाना नतिम् आनताङ्ग्या । पश्योत्पतत्पुष्पशिलीमुखेयम् आभाति कन्दर्पधनुर्लतेव
lataitayā cūtataroḥ salīlam ānīyamānā natim ānatāṅgyā / paśyotpatatpuṣpaśilīmukheyam ābhāti kandarpadhanurlateva
Sanskrit only: no published translation is held for this verse.
भ्रमद्द्विरेफावलिलोलदृष्टिर् लीलावतंसक्रिययोन्मुखानि । विचेतुम् एषा कुसुमानि नालं तरोस्तनालिङ्गनदोहदस्य
bhramaddvirephāvaliloladṛṣṭir līlāvataṃsakriyayonmukhāni / vicetum eṣā kusumāni nālaṃ tarostanāliṅganadohadasya
Sanskrit only: no published translation is held for this verse.
प्रियार्पितः कान्तनिपीतमुक्त- पुरन्ध्रिबिम्बाधरकान्तिचोरः । अस्याः सरत्नत्विषि कर्णपाशे किम् अप्य् अशोकस्तबकश् चकास्ति
priyārpitaḥ kāntanipītamukta- purandhribimbādharakānticoraḥ / asyāḥ saratnatviṣi karṇapāśe kim apy aśokastabakaś cakāsti
Sanskrit only: no published translation is held for this verse.
अस्या लताक्षेपविसूत्रितस्य हारस्य लग्नस्तनकुङ्कुमस्य । भ्रष्टाः क्षितौ दाडिमबीजमोहाद् आक्षिप्य मुक्ताः कपयः क्षिपन्ति
asyā latākṣepavisūtritasya hārasya lagnastanakuṅkumasya / bhraṣṭāḥ kṣitau dāḍimabījamohād ākṣipya muktāḥ kapayaḥ kṣipanti
Sanskrit only: no published translation is held for this verse.
निदाघलक्ष्मीहसितछटेयं पर्याप्तकृष्णागुरुधूमगन्धे । बन्धे कचाना नवमल्लिकास्याः पश्यालिनीले परिभागम् एति
nidāghalakṣmīhasitachaṭeyaṃ paryāptakṛṣṇāgurudhūmagandhe / bandhe kacānā navamallikāsyāḥ paśyālinīle paribhāgam eti
Sanskrit only: no published translation is held for this verse.
असाव् इतः पार्थिव दन्तपत्रम् आपास्य हंसछदपाण्डु बाला । करोति कर्णे नवकर्णिकारम् उत्तापिताष्टापदरत्नशोभि
asāv itaḥ pārthiva dantapatram āpāsya haṃsachadapāṇḍu bālā / karoti karṇe navakarṇikāram uttāpitāṣṭāpadaratnaśobhi
Sanskrit only: no published translation is held for this verse.
स्थितो ऽयम् अन्तो नवपल्लवानां प्रवालताम्राङ्गुलिर् आयताक्ष्याः । व्यक्तिं शरच्चन्द्रकरोज्ज्वलाभिर् नखांशुरेखाभिर् इतः प्रयाति
sthito 'yam anto navapallavānāṃ pravālatāmrāṅgulir āyatākṣyāḥ / vyaktiṃ śaraccandrakarojjvalābhir nakhāṃśurekhābhir itaḥ prayāti
Sanskrit only: no published translation is held for this verse.
धावत्करा कर्णशिरीषलोभाद् इतस् ततः सम्पतति द्विरेफे । क्रीडाम् इव व्याकुलदृष्टिपाता बालेयम् अभ्यस्यति कन्दुकस्य
dhāvatkarā karṇaśirīṣalobhād itas tataḥ sampatati dvirephe / krīḍām iva vyākuladṛṣṭipātā bāleyam abhyasyati kandukasya
Sanskrit only: no published translation is held for this verse.
प्रावृड्विलासस्मितम् उद्वहन्ती कर्णे नवं केतकबर्हम् एषा । प्रियावतंसीकृतचन्द्रलेखा चकास्ति कन्येव हिमाचलस्य
prāvṛḍvilāsasmitam udvahantī karṇe navaṃ ketakabarham eṣā / priyāvataṃsīkṛtacandralekhā cakāsti kanyeva himācalasya
Sanskrit only: no published translation is held for this verse.
विलोकितालेख्यकपोलभागात् प्लवङ्गशावे ऽधिगते विमानम् । इतः कदम्बाद् अनिवृत्तहस्तम् आस्ते भयाद् आलिखितेव तन्वी
vilokitālekhyakapolabhāgāt plavaṅgaśāve 'dhigate vimānam / itaḥ kadambād anivṛttahastam āste bhayād ālikhiteva tanvī
Sanskrit only: no published translation is held for this verse.
पुष्पाणि चिन्वत्य् अतिमुक्तकस्य पश्य श्लथं केशकलापम् एषा । अंसे बिभर्तीव तमालनीलं विलासवालव्यजनं स्मरस्य
puṣpāṇi cinvaty atimuktakasya paśya ślathaṃ keśakalāpam eṣā / aṃse bibhartīva tamālanīlaṃ vilāsavālavyajanaṃ smarasya
Sanskrit only: no published translation is held for this verse.
विमुञ्चती चक्षुषि पुष्पधूलिम् एषा गते तं प्रति वल्लभस्य । चित्रं झटित्य् अश्रुलवावकीर्णे दृशौ सपत्न्याः कलुषीकरोति
vimuñcatī cakṣuṣi puṣpadhūlim eṣā gate taṃ prati vallabhasya / citraṃ jhaṭity aśrulavāvakīrṇe dṛśau sapatnyāḥ kaluṣīkaroti
Sanskrit only: no published translation is held for this verse.
मध्यच्युते बिभ्रति किंशुके ऽस्मिन्न् अस्रारुणस्याकृतिम् अङ्कुशस्य । अस्याः स्तनाभ्याम् अधुना धृतेयम् अनङ्गमत्तद्विपकुम्भलक्ष्मीः
madhyacyute bibhrati kiṃśuke 'sminn asrāruṇasyākṛtim aṅkuśasya / asyāḥ stanābhyām adhunā dhṛteyam anaṅgamattadvipakumbhalakṣmīḥ
Sanskrit only: no published translation is held for this verse.
अभ्यागतायाः सहसामुनास्याः कन्दर्पसाम्राज्यधुरोद्वहेन । सुगन्धिभिः पाटलिपादपेन पुष्पैर् इतः कल्पितम् आतिथेयम्
abhyāgatāyāḥ sahasāmunāsyāḥ kandarpasāmrājyadhurodvahena / sugandhibhiḥ pāṭalipādapena puṣpair itaḥ kalpitam ātitheyam
Sanskrit only: no published translation is held for this verse.
आर्द्रागसेयं गमिता प्रसादं कृतप्रणामाञ्जलिना प्रियेण । प्रमृष्टबाष्पा सुमुखी नखाभ्यां चूताङ्कुरं मानम् इवोच्छिनत्ति
ārdrāgaseyaṃ gamitā prasādaṃ kṛtapraṇāmāñjalinā priyeṇa / pramṛṣṭabāṣpā sumukhī nakhābhyāṃ cūtāṅkuraṃ mānam ivocchinatti
Sanskrit only: no published translation is held for this verse.
अध्यासते काम् अपि कान्तिम् आसाम् एते सकुन्दाः कबरीकलापाः । कुमुद्वतीकान्तकरानुविद्धास् तमःप्रताना इव यामिनीनाम्
adhyāsate kām api kāntim āsām ete sakundāḥ kabarīkalāpāḥ / kumudvatīkāntakarānuviddhās tamaḥpratānā iva yāminīnām
Sanskrit only: no published translation is held for this verse.
पुष्पाणि नानाविधवर्णभाञ्जि विमानवातायनतो विचित्य । युवायम् इन्द्रायुधवर्णकान्तम् उत्तंसम् अस्याः सदृशः करोति
puṣpāṇi nānāvidhavarṇabhāñji vimānavātāyanato vicitya / yuvāyam indrāyudhavarṇakāntam uttaṃsam asyāḥ sadṛśaḥ karoti
Sanskrit only: no published translation is held for this verse.
पश्येयम् उद्बाहुलताहितश्रीर् मध्येन नश्यत्त्रिवली लतेव । विमानतः कोमलम् उच्चिनोति वधूर् मधूकं स्वकपोलकान्ति
paśyeyam udbāhulatāhitaśrīr madhyena naśyattrivalī lateva / vimānataḥ komalam uccinoti vadhūr madhūkaṃ svakapolakānti
Sanskrit only: no published translation is held for this verse.
अदः सुगन्धीकुरु मत्प्रसूनं मुखाब्जसौगन्ध्यकणार्पणेन । इत्य् अञ्चलासक्तलतो न याञ्चाम् अस्याः करोतीव सः कर्णिकारः
adaḥ sugandhīkuru matprasūnaṃ mukhābjasaugandhyakaṇārpaṇena / ity añcalāsaktalato na yāñcām asyāḥ karotīva saḥ karṇikāraḥ
Sanskrit only: no published translation is held for this verse.
तथा न चूते नवमञ्जरीयम् अवाप्तवत्य् आत्मगुणप्रकर्षम् । अस्याः सकालागरुपत्रलेखे यथा कपोले कमलेक्षणायाः
tathā na cūte navamañjarīyam avāptavaty ātmaguṇaprakarṣam / asyāḥ sakālāgarupatralekhe yathā kapole kamalekṣaṇāyāḥ
Sanskrit only: no published translation is held for this verse.
वहत्य् अशोको ऽयम् अमर्त्यकान्ता- पदाहतः कान्तम् अलक्तकाङ्गम् । कृत्वा जगत्य् अस्खलितां निजाज्ञां स्कन्धे ऽर्पितं तूणाम् इव स्मरेण
vahaty aśoko 'yam amartyakāntā- padāhataḥ kāntam alaktakāṅgam / kṛtvā jagaty askhalitāṃ nijājñāṃ skandhe 'rpitaṃ tūṇām iva smareṇa
Sanskrit only: no published translation is held for this verse.
चिरेण मन्ये बकुलद्रुमो ऽयम् अवाप्तपारःस्पृहणीयतायाः । अर्थी करो ऽस्याः सुमनःसु यस्य जातो जितामर्त्यतरुप्रवालः
cireṇa manye bakuladrumo 'yam avāptapāraḥspṛhaṇīyatāyāḥ / arthī karo 'syāḥ sumanaḥsu yasya jāto jitāmartyatarupravālaḥ
Sanskrit only: no published translation is held for this verse.
फलं शिरीषेण चिराद् अवाप्तम् अस्याः समग्रं सुकुमारतायाः । निरस्य गीर्वाणतरुप्रसूनां यद् एतद् उत्तंसितम् आयाताक्ष्या
phalaṃ śirīṣeṇa cirād avāptam asyāḥ samagraṃ sukumāratāyāḥ / nirasya gīrvāṇataruprasūnāṃ yad etad uttaṃsitam āyātākṣyā
Sanskrit only: no published translation is held for this verse.
अस्याः श्रुतौ चम्पकम् आदधत्याः करेण मुक्तावलयाङ्कितेन । एष द्विजः स्वस्त्ययनं विरावैर् नास्याः करोतीति न मञ्जुकण्ठः
asyāḥ śrutau campakam ādadhatyāḥ kareṇa muktāvalayāṅkitena / eṣa dvijaḥ svastyayanaṃ virāvair nāsyāḥ karotīti na mañjukaṇṭhaḥ
Sanskrit only: no published translation is held for this verse.
विन्यस्तबन्धूकदली मुखे ऽस्याः स्वेदार्द्रकालागरुपत्रवल्ली । चकास्ति संध्यातपलेशशङ्कि कलङ्कलेखा शशलक्ष्मनीव
vinyastabandhūkadalī mukhe 'syāḥ svedārdrakālāgarupatravallī / cakāsti saṃdhyātapaleśaśaṅki kalaṅkalekhā śaśalakṣmanīva
Sanskrit only: no published translation is held for this verse.
एता मिथो रुद्धविमानमार्गा लताग्रजं पुष्पम् अनाप्नुवन्त्यः । भवन्ति भारानमिताङ्गकेषु बद्धाभ्यसूयाः स्तनमण्डलेषु
etā mitho ruddhavimānamārgā latāgrajaṃ puṣpam anāpnuvantyaḥ / bhavanti bhārānamitāṅgakeṣu baddhābhyasūyāḥ stanamaṇḍaleṣu
Sanskrit only: no published translation is held for this verse.
एतानि कान्तैः प्रमदाजनस्य नवप्रवालान्य् अवतंसितानि । पश्यन्ति पश्य स्वम् इवाप्तकान्तिं कपोलपालीमणिदर्पणेषु
etāni kāntaiḥ pramadājanasya navapravālāny avataṃsitāni / paśyanti paśya svam ivāptakāntiṃ kapolapālīmaṇidarpaṇeṣu
Sanskrit only: no published translation is held for this verse.
यद् यद् वने ऽभूत् कुसुमं सुगन्धि वधूजनैस् तत् तद् इतो गृहीतम् । कृत्स्नत्रिलोकीविजयावतंसं निर्मातुम् इष्वासम् इव स्मरस्य
yad yad vane 'bhūt kusumaṃ sugandhi vadhūjanais tat tad ito gṛhītam / kṛtsnatrilokīvijayāvataṃsaṃ nirmātum iṣvāsam iva smarasya
Sanskrit only: no published translation is held for this verse.
कर्णावतंसीकृतपल्लवानां विचित्रपुष्पाभरणोज्ज्वलेषु । पश्याभितः पल्लवितेयम् आसाम् अङ्गेषु सारङ्गदृशाम् ऋतुश्रीः
karṇāvataṃsīkṛtapallavānāṃ vicitrapuṣpābharaṇojjvaleṣu / paśyābhitaḥ pallaviteyam āsām aṅgeṣu sāraṅgadṛśām ṛtuśrīḥ
Sanskrit only: no published translation is held for this verse.
स्वेदोदबिन्दुछलतः कपोले वितीर्णमुक्तार्घ इव स्मरस्य । एणीदृशां कान्त इव प्रवृत्तः श्रमो ऽयम् आलिङ्गितुम् अङ्गलेखाम्
svedodabinduchalataḥ kapole vitīrṇamuktārgha iva smarasya / eṇīdṛśāṃ kānta iva pravṛttaḥ śramo 'yam āliṅgitum aṅgalekhām
Sanskrit only: no published translation is held for this verse.
आसां पृथुस्वेदकणाङ्कितानि वक्त्राणि नेत्रोत्सवम् अर्पयन्ति । प्रत्युप्तमुक्ताफलदन्तुराणि हिरण्यमयानीव सरोरुहाणि
āsāṃ pṛthusvedakaṇāṅkitāni vaktrāṇi netrotsavam arpayanti / pratyuptamuktāphaladanturāṇi hiraṇyamayānīva saroruhāṇi
Sanskrit only: no published translation is held for this verse.
एतानि पश्य च्युतपुष्पधूलि- व्यालुप्तपक्ष्मावलिसौष्ठवानि । श्रमेण किं चिन् मुकुलीभवन्ति सीमन्तिनीनां नयनोत्पलानि
etāni paśya cyutapuṣpadhūli- vyāluptapakṣmāvalisauṣṭhavāni / śrameṇa kiṃ cin mukulībhavanti sīmantinīnāṃ nayanotpalāni
Sanskrit only: no published translation is held for this verse.
एतासु सीदन्मणिबन्धमूल- निलीनलीलामणिकङ्कणासु । विलोक्यतां व्यक्तिम् उपैति खेदो विद्याधरस्त्रीजनदोर्लतासु
etāsu sīdanmaṇibandhamūla- nilīnalīlāmaṇikaṅkaṇāsu / vilokyatāṃ vyaktim upaiti khedo vidyādharastrījanadorlatāsu
Sanskrit only: no published translation is held for this verse.
अनङ्गकल्पद्रुममञ्जरीणाम् अमोघमन्त्रं कुसुमायुधस्य । भृशम् यथा पुष्पमयी विभूषा नासां तथा रत्नमयी विभाति
anaṅgakalpadrumamañjarīṇām amoghamantraṃ kusumāyudhasya / bhṛśam yathā puṣpamayī vibhūṣā nāsāṃ tathā ratnamayī vibhāti
Sanskrit only: no published translation is held for this verse.
वनान्तम् एता वनिता न मुक्तुम् अनेकपुष्पं नृप शक्नुवन्ति । विमुच्यते केन नाम स देशो यत्रास्ति सान्द्रः सुमनःप्रचारः
vanāntam etā vanitā na muktum anekapuṣpaṃ nṛpa śaknuvanti / vimucyate kena nāma sa deśo yatrāsti sāndraḥ sumanaḥpracāraḥ
Sanskrit only: no published translation is held for this verse.
इत्युज्ज्वले तस्य वचःप्रसूने नीते ऽपि कर्णातिथितां विहस्य । नृपो बभूवास्तमनाः सचित्रं स्मृताहिराजेन्द्रसुताविलासः
ityujjvale tasya vacaḥprasūne nīte 'pi karṇātithitāṃ vihasya / nṛpo babhūvāstamanāḥ sacitraṃ smṛtāhirājendrasutāvilāsaḥ
Sanskrit only: no published translation is held for this verse.
पुष्पप्रवालाङ्कुरमण्डलं तत् क्वणद्विमानावलिहेमघण्टम् । वनं विहायाथ समग्रम् अग्रे चचाल विद्याधरराजसैन्यम्
puṣpapravālāṅkuramaṇḍalaṃ tat kvaṇadvimānāvalihemaghaṇṭam / vanaṃ vihāyātha samagram agre cacāla vidyādhararājasainyam
Sanskrit only: no published translation is held for this verse.
गङ्गावर्णनम् अथ प्रवालाधरबिम्बचुम्बि- परिस्फुरत्फेनविलासहासा । वाचालहंसावलिकाञ्चिदाम- सनाथतीरोरुनितम्बबिम्बा
gaṅgāvarṇanam atha pravālādharabimbacumbi- parisphuratphenavilāsahāsā / vācālahaṃsāvalikāñcidāma- sanāthatīrorunitambabimbā
Sanskrit only: no published translation is held for this verse.
समीरवेल्लत्तटहेमवल्लि- लोलप्रभापिञ्जरितोर्मिलेखा । विलासमज्जत्फणिराजकन्या- सङ्क्रान्तकान्तस्तनकुङ्कुमेव
samīravellattaṭahemavalli- lolaprabhāpiñjaritormilekhā / vilāsamajjatphaṇirājakanyā- saṅkrāntakāntastanakuṅkumeva
Sanskrit only: no published translation is held for this verse.
निमग्नदिङ्नागकपोलभित्ति- सन्ताननिर्यन्मदवेणिकृष्णा । तृतीयनेत्रानलधूमवल्लि- कलङ्कितेव त्रिपुरान्तकस्य
nimagnadiṅnāgakapolabhitti- santānaniryanmadaveṇikṛṣṇā / tṛtīyanetrānaladhūmavalli- kalaṅkiteva tripurāntakasya
Sanskrit only: no published translation is held for this verse.
भारानमद्भोगिफणास्थितायाः स्थलोच्छलद्वीचिचयच्छलेन । उत्तम्भयन्तीव तले सतर्कम् अर्कोपलस्तम्भशतानि भूमेः
bhārānamadbhogiphaṇāsthitāyāḥ sthalocchaladvīcicayacchalena / uttambhayantīva tale satarkam arkopalastambhaśatāni bhūmeḥ
Sanskrit only: no published translation is held for this verse.
तटोद्गतप्रांशु तमालराजि- छायाघनश्यामलितार्धभागा । मूर्तिस् तुषाराचलतुल्यकान्तिर् उमापतिश्रीधरयोर् इवैका
taṭodgataprāṃśu tamālarāji- chāyāghanaśyāmalitārdhabhāgā / mūrtis tuṣārācalatulyakāntir umāpatiśrīdharayor ivaikā
Sanskrit only: no published translation is held for this verse.
कादम्बचञ्चूद्धृतचक्रवाकी- पारिप्लवव्यक्तमृणालकाण्डा । चण्डीधवोन्नद्धजटाविटङ्क- कृष्टेन्दुलेखाङ्कुरदन्तुरेव
kādambacañcūddhṛtacakravākī- pāriplavavyaktamṛṇālakāṇḍā / caṇḍīdhavonnaddhajaṭāviṭaṅka- kṛṣṭendulekhāṅkuradantureva
Sanskrit only: no published translation is held for this verse.
तरङ्गभङ्गोज्ज्वलचामरश्रीर् उद्दण्डहेमाम्बुरुहातपत्रा । पुण्या पुरो दूरत एव तेन त्रिमार्गगादृश्यत पार्थिवेन
taraṅgabhaṅgojjvalacāmaraśrīr uddaṇḍahemāmburuhātapatrā / puṇyā puro dūrata eva tena trimārgagādṛśyata pārthivena
Sanskrit only: no published translation is held for this verse.
तस्यास् तटे ऽथ कुसुमावचयश्रमार्त- सीमन्तिनीनिवहसस्मितवीक्षितायाः । विद्याधरेण विदधे धवलोर्मिधौत- पर्यन्तहेमसिकते पृतनानिवेशः
tasyās taṭe 'tha kusumāvacayaśramārta- sīmantinīnivahasasmitavīkṣitāyāḥ / vidyādhareṇa vidadhe dhavalormidhauta- paryantahemasikate pṛtanāniveśaḥ
Sanskrit only: no published translation is held for this verse.
तद् अनु पुलिने सद्यो विद्याधरैः परिकल्पितं न्र्पतिर् अविशल् लीलागारं सः साहसलाञ्छनः । भ्रमम् अजनयन् नेत्रोत्कीर्णा इति प्रतिबिम्बिताः सितमणिमये यस्मिन्न् अन्तो बहिश् च मृगीदृशः
tad anu puline sadyo vidyādharaiḥ parikalpitaṃ nrpatir aviśal līlāgāraṃ saḥ sāhasalāñchanaḥ / bhramam ajanayan netrotkīrṇā iti pratibimbitāḥ sitamaṇimaye yasminn anto bahiś ca mṛgīdṛśaḥ
Sanskrit only: no published translation is held for this verse.