इति श्रीमृगाङ्कदत्तसूनोः परिमलापरनाम्नः पद्मगुप्तस्य कृतौ नवसाहसाङ्कचरिते महाकाव्ये कनकारविन्दप्रार्थनो नाम षोडशः सर्गः सप्तदशः सर्गः युद्धवर्णनं अथाहिविद्याधरराजसैन्यैर् निपीडितायां पुरि रत्नवत्याम् । भटाः सकोपं भुजदर्पभाजो निर्जग्मुर् आकृष्टकृपाणपट्टाः
iti śrīmṛgāṅkadattasūnoḥ parimalāparanāmnaḥ padmaguptasya kṛtau navasāhasāṅkacarite mahākāvye kanakāravindaprārthano nāma ṣoḍaśaḥ sargaḥ saptadaśaḥ sargaḥ yuddhavarṇanaṃ athāhividyādhararājasainyair nipīḍitāyāṃ puri ratnavatyām / bhaṭāḥ sakopaṃ bhujadarpabhājo nirjagmur ākṛṣṭakṛpāṇapaṭṭāḥ
Sanskrit only: no published translation is held for this verse.
अन्योन्यसङ्घट्टवशेन तेषाम् उदञ्चिताः काञ्चनकङ्कटेभ्यः । युगान्तकालानलबीजशङ्कां न कस्य चक्रुः शिखिनः स्फुल्लिङ्गाः
anyonyasaṅghaṭṭavaśena teṣām udañcitāḥ kāñcanakaṅkaṭebhyaḥ / yugāntakālānalabījaśaṅkāṃ na kasya cakruḥ śikhinaḥ sphulliṅgāḥ
Sanskrit only: no published translation is held for this verse.
भालेषु भीमा भृकुटीर् वहन्तो भृङ्गत्विषश् चासिलताः करेषु । खुराग्ररुग्णावनिभिः सरोषं निरीयुर् अन्ये चतुरैस् तुरङ्गैः
bhāleṣu bhīmā bhṛkuṭīr vahanto bhṛṅgatviṣaś cāsilatāḥ kareṣu / khurāgrarugṇāvanibhiḥ saroṣaṃ nirīyur anye caturais turaṅgaiḥ
Sanskrit only: no published translation is held for this verse.
न्यभाद् अनीकं करिणां च सान्द्र- सिन्दूरपूरारुणगण्डभित्ति । प्रत्यग्रदावानललीढकोटि- कुलाचलेन्द्रप्रचयोपमेयम्
nyabhād anīkaṃ kariṇāṃ ca sāndra- sindūrapūrāruṇagaṇḍabhitti / pratyagradāvānalalīḍhakoṭi- kulācalendrapracayopameyam
Sanskrit only: no published translation is held for this verse.
पुरो रणोत्सेकभृतां निरुद्धम् ओघेन विद्याधरवाहिनीनाम् । तत् पुञ्जितं सैन्यम् अमर्त्यशत्रोर् बभूव मूले मणितोरणस्य
puro raṇotsekabhṛtāṃ niruddham oghena vidyādharavāhinīnām / tat puñjitaṃ sainyam amartyaśatror babhūva mūle maṇitoraṇasya
Sanskrit only: no published translation is held for this verse.
साटोपम् आरोपितचापयाष्टिर् निबद्धतूणीरयुगो गजस्थः । सो निर्जगामाथ महासुरेन्द्रो वेगाद् अहंकार इवात्तदेहः
sāṭopam āropitacāpayāṣṭir nibaddhatūṇīrayugo gajasthaḥ / so nirjagāmātha mahāsurendro vegād ahaṃkāra ivāttadehaḥ
Sanskrit only: no published translation is held for this verse.
युगात्ययाम्भोधरनादधीरस् तस्योद्गतः सङ्गरतूर्यघोषः । बद्धप्रतिश्रुन्ति नितान्तभीमश् चकार पातालबिलोदराणि
yugātyayāmbhodharanādadhīras tasyodgataḥ saṅgaratūryaghoṣaḥ / baddhapratiśrunti nitāntabhīmaś cakāra pātālabilodarāṇi
Sanskrit only: no published translation is held for this verse.
सत्पुष्करानञ्जनपुञ्जभासस् पथो जयस्याथ गजान् असींश् च । व्यापारयन्ति स्म रयेण वीरास् तत्प्रेरिता वैरिवरूथिनीषु
satpuṣkarānañjanapuñjabhāsas patho jayasyātha gajān asīṃś ca / vyāpārayanti sma rayeṇa vīrās tatpreritā vairivarūthinīṣu
Sanskrit only: no published translation is held for this verse.
परस्परापातिकृपाणनिर्यत्- ज्वालावलीपल्लवितान्तरिक्षः । अभूत् प्रवृत्तः समरो महाहि- विद्याधरेन्द्रासुरपुङ्गवानाम्
parasparāpātikṛpāṇaniryat- jvālāvalīpallavitāntarikṣaḥ / abhūt pravṛttaḥ samaro mahāhi- vidyādharendrāsurapuṅgavānām
Sanskrit only: no published translation is held for this verse.
वीरेषु धावत्सु चरत्स्व् अमन्दं गजेषु वल्गत्सु तुरङ्गमेषु । अकालकल्पात्यययशाङ्कितानि चकम्पिरे सप्त रसातलान्
vīreṣu dhāvatsu caratsv amandaṃ gajeṣu valgatsu turaṅgameṣu / akālakalpātyayayaśāṅkitāni cakampire sapta rasātalān
Sanskrit only: no published translation is held for this verse.
प्रकाशयन्तः करणप्रपन्न्चं सुराङ्गनाभिः स्पृहयेक्ष्यमाणाः । अत्यद्भुतं नृत्तम् इवारभन्त भटा रणप्राङ्गणरङ्गमध्ये
prakāśayantaḥ karaṇaprapanncaṃ surāṅganābhiḥ spṛhayekṣyamāṇāḥ / atyadbhutaṃ nṛttam ivārabhanta bhaṭā raṇaprāṅgaṇaraṅgamadhye
Sanskrit only: no published translation is held for this verse.
उत्प्लुत्य वेगात् पवमानमार्गं विद्याधरैर् दानजलाविलानि । पटु व्यपाट्यन्त मतङ्गजानां तीक्ष्णासिपत्रक्रकचैः शिरांसि
utplutya vegāt pavamānamārgaṃ vidyādharair dānajalāvilāni / paṭu vyapāṭyanta mataṅgajānāṃ tīkṣṇāsipatrakrakacaiḥ śirāṃsi
Sanskrit only: no published translation is held for this verse.
निपत्य कुम्भेषु महागजानां नीरन्ध्रमुक्तेषु पटु क्वणन्तः । भान्ति स्म विद्याधरपुङ्गवानां मुक्ताट्टहासा इव खड्गपट्टाः
nipatya kumbheṣu mahāgajānāṃ nīrandhramukteṣu paṭu kvaṇantaḥ / bhānti sma vidyādharapuṅgavānāṃ muktāṭṭahāsā iva khaḍgapaṭṭāḥ
Sanskrit only: no published translation is held for this verse.
आवर्तताम् ऊर्मिलतायमान- निस्त्रिंशवल्लीवलयाकुलासु । प्रपेदिरे पूर्वसुरोज्झितानि चक्राणि विद्याधरवाहिनीषु
āvartatām ūrmilatāyamāna- nistriṃśavallīvalayākulāsu / prapedire pūrvasurojjhitāni cakrāṇi vidyādharavāhinīṣu
Sanskrit only: no published translation is held for this verse.
फणावलीष्व् आपतितोरगाणाम् अफल्गुरत्नोपलकर्कशासु । कृपाणधरा मसृणीबभूव महासुराणां न तु सङ्गरेच्छा
phaṇāvalīṣv āpatitoragāṇām aphalguratnopalakarkaśāsu / kṛpāṇadharā masṛṇībabhūva mahāsurāṇāṃ na tu saṅgarecchā
Sanskrit only: no published translation is held for this verse.
अमान्ति पातालतले प्रसस्रुः क्षितौ बिलद्वारविनिर्गतानि । ज्याशब्दहृष्टासुरसिंहनाद- तुरङ्गहेषागजबृंहितानि
amānti pātālatale prasasruḥ kṣitau biladvāravinirgatāni / jyāśabdahṛṣṭāsurasiṃhanāda- turaṅgaheṣāgajabṛṃhitāni
Sanskrit only: no published translation is held for this verse.
प्रधावदश्वीयखुराहतानाम् अभ्युद्गतो रत्नभुवां परागः । गीर्वाणचापच्छविलाञ्छितानि कृत्स्नानि चक्रे ककुभां मुखानि
pradhāvadaśvīyakhurāhatānām abhyudgato ratnabhuvāṃ parāgaḥ / gīrvāṇacāpacchavilāñchitāni kṛtsnāni cakre kakubhāṃ mukhāni
Sanskrit only: no published translation is held for this verse.
भटास्त्रपूर्णैः परितो गजानां स्वदानपङ्कोपचितैः पदाङ्कैः । भयङ्कराभूत् तरुणार्कबिम्ब- सहस्रकीर्णेव रणाङ्गणोर्वी
bhaṭāstrapūrṇaiḥ parito gajānāṃ svadānapaṅkopacitaiḥ padāṅkaiḥ / bhayaṅkarābhūt taruṇārkabimba- sahasrakīrṇeva raṇāṅgaṇorvī
Sanskrit only: no published translation is held for this verse.
लूनाः समूलं सुभटासिपत्रैः सहस्रशः शोणितशीकरार्द्राः । उत्तालवैवस्वततालवृन्त- विच्छित्तिमूहुः करिकर्णतालाः
lūnāḥ samūlaṃ subhaṭāsipatraiḥ sahasraśaḥ śoṇitaśīkarārdrāḥ / uttālavaivasvatatālavṛnta- vicchittimūhuḥ karikarṇatālāḥ
Sanskrit only: no published translation is held for this verse.
अन्योन्यकृत्तास्तरसा भटानां नवातपाताम्रनखत्विषो ऽग्रे । भुजा निपेतुः समम् ईक्षणेन समौलिरत्ना इव पन्नगेन्द्राः
anyonyakṛttāstarasā bhaṭānāṃ navātapātāmranakhatviṣo 'gre / bhujā nipetuḥ samam īkṣaṇena samauliratnā iva pannagendrāḥ
Sanskrit only: no published translation is held for this verse.
अङ्गाद् असिप्रासपृषत्कभिन्नात्- असृक्प्रवाहेषु भृशं वहत्सु । लीलागलद्गैरिकनिर्झराणां गजैर् जगाहे कुलपर्वतानाम्
aṅgād asiprāsapṛṣatkabhinnāt- asṛkpravāheṣu bhṛśaṃ vahatsu / līlāgaladgairikanirjharāṇāṃ gajair jagāhe kulaparvatānām
Sanskrit only: no published translation is held for this verse.
क्ष्मायां बभुःखड्गपृथक्कृतानि सहस्रशः शस्त्रभृतां शिरांसि । कालेन सङ्ग्रामसरोन्तरालाद् उत्खण्डितानीव सरोरुहाणि
kṣmāyāṃ babhuḥkhaḍgapṛthakkṛtāni sahasraśaḥ śastrabhṛtāṃ śirāṃsi / kālena saṅgrāmasarontarālād utkhaṇḍitānīva saroruhāṇi
Sanskrit only: no published translation is held for this verse.
कबन्धकण्ठोच्छलदस्रवन्तः समीपम् एत्योपरि कङ्कयूथम् । मुहूर्तम् इद्धारुणरत्नदण्डम् अदृश्यत च्छत्रम् इवान्तकस्य
kabandhakaṇṭhocchaladasravantaḥ samīpam etyopari kaṅkayūtham / muhūrtam iddhāruṇaratnadaṇḍam adṛśyata cchatram ivāntakasya
Sanskrit only: no published translation is held for this verse.
मुक्तैः समूहेन नभश्चराणां कुम्भेषु चक्रैः करिणां पतद्भिः । अस्ताचलव्यायतवप्रपाति- पतङ्गबिम्बानुकृतिर् वितेने
muktaiḥ samūhena nabhaścarāṇāṃ kumbheṣu cakraiḥ kariṇāṃ patadbhiḥ / astācalavyāyatavaprapāti- pataṅgabimbānukṛtir vitene
Sanskrit only: no published translation is held for this verse.
पतद्भटं निर्दलिताश्ववारं निकृत्तमत्तेभकरं क्षणेन । व्यधायि विद्याधरसैनिकैस् तत् सनागवीरैर् असुरेन्द्रसैन्यम्
patadbhaṭaṃ nirdalitāśvavāraṃ nikṛttamattebhakaraṃ kṣaṇena / vyadhāyi vidyādharasainikais tat sanāgavīrair asurendrasainyam
Sanskrit only: no published translation is held for this verse.
हंसैर् इव स्मेरतटाःसमन्तात् परिच्युतैः कुञ्जरकर्णशङ्खैः । वोढुं प्रवृत्ता भवदुत्तरङ्गा झटित्य् अगाधा रुधिरस्रवन्ती
haṃsair iva smerataṭāḥsamantāt paricyutaiḥ kuñjarakarṇaśaṅkhaiḥ / voḍhuṃ pravṛttā bhavaduttaraṅgā jhaṭity agādhā rudhirasravantī
Sanskrit only: no published translation is held for this verse.
विद्याधरव्यालभटावलुप्त- धैर्येषु नश्यत्सु महासुरेषु । विश्वाङ्कुशो नाम सुरारिसूनुर् अथो रथेनाजिमहीं विवेश
vidyādharavyālabhaṭāvalupta- dhairyeṣu naśyatsu mahāsureṣu / viśvāṅkuśo nāma surārisūnur atho rathenājimahīṃ viveśa
Sanskrit only: no published translation is held for this verse.
आकर्णकृष्ताद् धनुषः पतद्भिर् बालेन्दुलेखाकृतिभिः पृषत्कैः । अरातिसैन्ये रणधीरवीरान् भीरूनिवैको विमुखीचकार
ākarṇakṛṣtād dhanuṣaḥ patadbhir bālendulekhākṛtibhiḥ pṛṣatkaiḥ / arātisainye raṇadhīravīrān bhīrūnivaiko vimukhīcakāra
Sanskrit only: no published translation is held for this verse.
तद्वीर्यनिर्वासितसौष्ठवानां विद्याधराणाम् अपतन् करेभ्यः । धाराग्रलग्नद्विपकुम्भमुक्ताः सबाष्पलेशा इव खड्गलेखाः
tadvīryanirvāsitasauṣṭhavānāṃ vidyādharāṇām apatan karebhyaḥ / dhārāgralagnadvipakumbhamuktāḥ sabāṣpaleśā iva khaḍgalekhāḥ
Sanskrit only: no published translation is held for this verse.
क्षणाद् वलन्ति स्म तदा हतानि बलानि विद्याधरपन्नगानाम् । सरित्पयांसीव निशकरांशु- पूरप्रवृद्धार्णवपीडितानि
kṣaṇād valanti sma tadā hatāni balāni vidyādharapannagānām / saritpayāṃsīva niśakarāṃśu- pūrapravṛddhārṇavapīḍitāni
Sanskrit only: no published translation is held for this verse.
न शेकतुस् तस्य गतिं निरोद्धुं विद्याधरेन्द्रोरगराजपुत्रौ । रत्नाकरस्येव महेन्द्रसह्या वसह्यवेगं प्रलयोत्थितस्य
na śekatus tasya gatiṃ niroddhuṃ vidyādharendroragarājaputrau / ratnākarasyeva mahendrasahyā vasahyavegaṃ pralayotthitasya
Sanskrit only: no published translation is held for this verse.
दोर्दण्डकण्डूतिम् अथास्य हर्तुम् उद्भ्रूलतं भूपतिना नियुक्तः । जवाज् जगामाजिपथं रथेन रमाङ्गदःकुण्डलितो ऽग्रचापः
dordaṇḍakaṇḍūtim athāsya hartum udbhrūlataṃ bhūpatinā niyuktaḥ / javāj jagāmājipathaṃ rathena ramāṅgadaḥkuṇḍalito 'gracāpaḥ
Sanskrit only: no published translation is held for this verse.
तथोपलेभे समरोन्मुखस्य नादेन वृद्धिः शरजन्मनास्य । चक्रे पदं बाष्पकणोत्करेण यथा कपोलेष्व् असुराङ्गनानाम्
tathopalebhe samaronmukhasya nādena vṛddhiḥ śarajanmanāsya / cakre padaṃ bāṣpakaṇotkareṇa yathā kapoleṣv asurāṅganānām
Sanskrit only: no published translation is held for this verse.
दूरात् सुपर्वारिसुतं रथेन स रंहसा संमुखम् आपतन्तम् । रुरोध तं बाणपरंपराभिर् यशोभटः कर्णम् इवेन्द्रसूनुस्
dūrāt suparvārisutaṃ rathena sa raṃhasā saṃmukham āpatantam / rurodha taṃ bāṇaparaṃparābhir yaśobhaṭaḥ karṇam ivendrasūnus
Sanskrit only: no published translation is held for this verse.
विश्वाङ्कुशः सत्कवचे मुमोच वक्षःस्थले हैमम् अथास्य बाणम् । तटे ऽञ्जनश्यामतनौ महाद्रेः शातह्रदं ज्योतिर् इवाम्बुवाहः
viśvāṅkuśaḥ satkavace mumoca vakṣaḥsthale haimam athāsya bāṇam / taṭe 'ñjanaśyāmatanau mahādreḥ śātahradaṃ jyotir ivāmbuvāhaḥ
Sanskrit only: no published translation is held for this verse.
अलक्ष्यसंधानविमोक्षपातान् यशोभटस्यात्तरुषो ऽपि रोपान् । मूर्च्छालुठत्सारथिर् आहताश्वो रथः शशंसासुरनन्दनस्य
alakṣyasaṃdhānavimokṣapātān yaśobhaṭasyāttaruṣo 'pi ropān / mūrcchāluṭhatsārathir āhatāśvo rathaḥ śaśaṃsāsuranandanasya
Sanskrit only: no published translation is held for this verse.
विलासकाञ्चीम् अथ कालरात्रेर् उद्यत्क्रुधः पद्धतिम् अन्तकस्य । मौर्वीं पृषत्केण रमाङ्गदस्य चिच्छेद गीर्वाणरिपोस् तनूजः
vilāsakāñcīm atha kālarātrer udyatkrudhaḥ paddhatim antakasya / maurvīṃ pṛṣatkeṇa ramāṅgadasya ciccheda gīrvāṇaripos tanūjaḥ
Sanskrit only: no published translation is held for this verse.
सन्नाभिबिम्बेन महाजिलक्ष्म्या वीरश्रियो विभ्रमनूपुरेण । संरभ्य राहोर् इव चक्रपाणिः स अप्य् अस्य चक्रेण शिरश् चकर्त
sannābhibimbena mahājilakṣmyā vīraśriyo vibhramanūpureṇa / saṃrabhya rāhor iva cakrapāṇiḥ sa apy asya cakreṇa śiraś cakarta
Sanskrit only: no published translation is held for this verse.
ननर्त विद्याधरसुन्दरीणां गणो नदन्नूपुरम् अम्बरे ऽथ । मौलौ शरक्षुण्णशिरस्त्ररत्ने चिक्षेप चास्याम् अरपुष्पवृष्टिम्
nanarta vidyādharasundarīṇāṃ gaṇo nadannūpuram ambare 'tha / maulau śarakṣuṇṇaśirastraratne cikṣepa cāsyām arapuṣpavṛṣṭim
Sanskrit only: no published translation is held for this verse.
दृष्टे शिरस्य् उत्फलिते स्वसूनोर् दिङ्मुललीनासु पताकिनीषु । वज्राङ्कुशाः संमुखम् आपपात पत्युर् विशाम् अस्तगिरेर् इवार्कः
dṛṣṭe śirasy utphalite svasūnor diṅmulalīnāsu patākinīṣu / vajrāṅkuśāḥ saṃmukham āpapāta patyur viśām astagirer ivārkaḥ
Sanskrit only: no published translation is held for this verse.
मदाम्बुवर्षी समरे ऽभिधावन् रेजे गजस् तस्य सहेमकक्ष्यः । भिन्ने ऽन्तराले पवमाननुन्नस् तमालनीलस् तडितेव मेघः
madāmbuvarṣī samare 'bhidhāvan reje gajas tasya sahemakakṣyaḥ / bhinne 'ntarāle pavamānanunnas tamālanīlas taḍiteva meghaḥ
Sanskrit only: no published translation is held for this verse.
पत्युः प्रसादस्मितरज्जुकृष्टा भटा विवृत्यास्य पुरो बभूवुः । स्वजीवितान्याजिमुखे विहातुम् अत्युत्सुका भङ्गमलीमसानि
patyuḥ prasādasmitarajjukṛṣṭā bhaṭā vivṛtyāsya puro babhūvuḥ / svajīvitānyājimukhe vihātum atyutsukā bhaṅgamalīmasāni
Sanskrit only: no published translation is held for this verse.
आरुह्य चन्द्रः खम् इवाभिरामं नक्षत्रमालाभरणं गजेन्द्रम् । देवो ऽपि तद्वैरितमो नियन्तुम् अथ प्रतस्थे नवसाहसाङ्कः
āruhya candraḥ kham ivābhirāmaṃ nakṣatramālābharaṇaṃ gajendram / devo 'pi tadvairitamo niyantum atha pratasthe navasāhasāṅkaḥ
Sanskrit only: no published translation is held for this verse.
एकत्र पार्श्वे शशिखण्डनामा विद्याधरेन्द्रो नृपतेर् बभूव । अरातिसेनानलिनीवनैक- शीतांशुर् अन्यत्र यशोभटश् च
ekatra pārśve śaśikhaṇḍanāmā vidyādharendro nṛpater babhūva / arātisenānalinīvanaika- śītāṃśur anyatra yaśobhaṭaś ca
Sanskrit only: no published translation is held for this verse.
स्फुरत्फणछत्रमणिप्रतान- तेजश्छटाजर्जरितान्धकारः । अफल्गुर् वीर्यः फणभृत्कुमारो ऽप्य् अग्रे ऽभवत् तस्य स रत्नचूडः
sphuratphaṇachatramaṇipratāna- tejaśchaṭājarjaritāndhakāraḥ / aphalgur vīryaḥ phaṇabhṛtkumāro 'py agre 'bhavat tasya sa ratnacūḍaḥ
Sanskrit only: no published translation is held for this verse.
विधूतनिस्त्रिंशतरङ्गितानि सबाणचक्रीकृतकार्मुकानि । हतावशेषाणि पुरो ऽस्य चेलुर् बलानि विद्याधरपन्नगानाम्
vidhūtanistriṃśataraṅgitāni sabāṇacakrīkṛtakārmukāni / hatāvaśeṣāṇi puro 'sya celur balāni vidyādharapannagānām
Sanskrit only: no published translation is held for this verse.
रक्तासवक्षीबसहस्तताल- वेतालतालोच्छलिताट्टहासः । महाभटानाम् असुनिर्व्यपेक्षम् अन्योन्यम् आवर्तत संपरायः
raktāsavakṣībasahastatāla- vetālatālocchalitāṭṭahāsaḥ / mahābhaṭānām asunirvyapekṣam anyonyam āvartata saṃparāyaḥ
Sanskrit only: no published translation is held for this verse.
चकाशिरे शस्त्रभृतां शिरःसु मिथः पतन्त्यः करवालवल्ल्यः । मुक्ताः सलीलां त्रिदशाङ्गनाभिर् माला इवेन्दीवरपत्रमय्यः
cakāśire śastrabhṛtāṃ śiraḥsu mithaḥ patantyaḥ karavālavallyaḥ / muktāḥ salīlāṃ tridaśāṅganābhir mālā ivendīvarapatramayyaḥ
Sanskrit only: no published translation is held for this verse.
केषां चिद् ऊहुः कवचानि शोभां क्व चित् क्व चिल् लोहितपाटलानि । खेलज्जयश्रीचरणारविन्द- लाक्षारसेनेव नवाङ्कितानि
keṣāṃ cid ūhuḥ kavacāni śobhāṃ kva cit kva cil lohitapāṭalāni / khelajjayaśrīcaraṇāravinda- lākṣāraseneva navāṅkitāni
Sanskrit only: no published translation is held for this verse.
हृदिप्रविष्टैर् अविशुद्धिमद्भिर् अभूद् व्यथा कापि शरैः परेषाम् । दुरात्मनां साधुगुणैर् इवाग्रे फलेन संयोगम् उपेयिवद्भिः
hṛdipraviṣṭair aviśuddhimadbhir abhūd vyathā kāpi śaraiḥ pareṣām / durātmanāṃ sādhuguṇair ivāgre phalena saṃyogam upeyivadbhiḥ
Sanskrit only: no published translation is held for this verse.
परस्परापातजुषाम् असीनां धाराच्युतः संयतिचूर्णरेणुः । अवाप तापिच्छरुचिर् जयश्री- विलासकालाञ्जनधूलिलीलाम्
parasparāpātajuṣām asīnāṃ dhārācyutaḥ saṃyaticūrṇareṇuḥ / avāpa tāpiccharucir jayaśrī- vilāsakālāñjanadhūlilīlām
Sanskrit only: no published translation is held for this verse.
पर्यायजातोभयसैन्यभङ्ग- करालकोलाहलकातराणाम् । सुरारिविद्याधरसुन्दरीणां दोलेव शोकप्रमादावभूताम्
paryāyajātobhayasainyabhaṅga- karālakolāhalakātarāṇām / surārividyādharasundarīṇāṃ doleva śokapramādāvabhūtām
Sanskrit only: no published translation is held for this verse.
अथासुरेन्द्रद्विरदेन वेगाद् अभ्युत्थितेनोद्गतदानधारम् । मध्येरणं मध्यमलोकभर्तुर् जवान् मदान्धो जघटे गजेन्द्रः
athāsurendradviradena vegād abhyutthitenodgatadānadhāram / madhyeraṇaṃ madhyamalokabhartur javān madāndho jaghaṭe gajendraḥ
Sanskrit only: no published translation is held for this verse.
महेभयोस् तत्र शिखाछलेन प्रतिप्रहारं रदजः कृषानुः । कोशेषु विदुत्कपिशा मुहूर्तं व्यधाद् इवाष्टापदपत्रवल्लीः
mahebhayos tatra śikhāchalena pratiprahāraṃ radajaḥ kṛṣānuḥ / kośeṣu vidutkapiśā muhūrtaṃ vyadhād ivāṣṭāpadapatravallīḥ
Sanskrit only: no published translation is held for this verse.
मुहुः प्रजानाम् अधिपेन गाढम् आकृष्यमाणस्य शरासनस्य । द्विषद्वधारम्भविधौ गभीरः क्रेङ्कारहुङ्कार इवोच्चचार
muhuḥ prajānām adhipena gāḍham ākṛṣyamāṇasya śarāsanasya / dviṣadvadhārambhavidhau gabhīraḥ kreṅkārahuṅkāra ivoccacāra
Sanskrit only: no published translation is held for this verse.
परिस्फुरत्कुण्डलघृष्टपुङ्खास् तेन प्रयुक्तास् पृथुविक्रमेण । प्रमृष्टकान्ताकुचपत्रलेखे लेखारिवक्षस्य् अपतन् पृषत्काः
parisphuratkuṇḍalaghṛṣṭapuṅkhās tena prayuktās pṛthuvikrameṇa / pramṛṣṭakāntākucapatralekhe lekhārivakṣasy apatan pṛṣatkāḥ
Sanskrit only: no published translation is held for this verse.
अरातिमुक्तेषु ततस् तनुत्राद् वह्निस्फुलिङ्गेषु समुल्लसत्सु । मूर्तिर् बभासे वसुधाधिपस्य निर्यत्प्रतापाग्निकणछटेव
arātimukteṣu tatas tanutrād vahnisphuliṅgeṣu samullasatsu / mūrtir babhāse vasudhādhipasya niryatpratāpāgnikaṇachaṭeva
Sanskrit only: no published translation is held for this verse.
हिरण्मयी पार्थिवबाणपङ्क्तिर् अत्युन्नते मूर्ध्नि महासुरस्य । रेजे तराम् अञ्जनपर्वतस्य लग्नेव तिग्मांशुमयूखमाला
hiraṇmayī pārthivabāṇapaṅktir atyunnate mūrdhni mahāsurasya / reje tarām añjanaparvatasya lagneva tigmāṃśumayūkhamālā
Sanskrit only: no published translation is held for this verse.
अभ्युद्गता भर्तुर् अरातिबाण- क्षुण्णेन्द्रनीलाङ्गदरेणुराजिः । अदृश्यतोद्दामभुजास्पदस्य पराक्रमाग्नेर् इव धूमलेखा
abhyudgatā bhartur arātibāṇa- kṣuṇṇendranīlāṅgadareṇurājiḥ / adṛśyatoddāmabhujāspadasya parākramāgner iva dhūmalekhā
Sanskrit only: no published translation is held for this verse.
रमाङ्गदो ऽप्य् उद्भ्रुकुटिः कृतास्त्रं वीरं द्विषः पार्श्वगतं निहत्य । शरैर् अलावीज् जयवैजयन्तीं ज्योत्स्नासितं कीर्तिम् इवासुरस्य
ramāṅgado 'py udbhrukuṭiḥ kṛtāstraṃ vīraṃ dviṣaḥ pārśvagataṃ nihatya / śarair alāvīj jayavaijayantīṃ jyotsnāsitaṃ kīrtim ivāsurasya
Sanskrit only: no published translation is held for this verse.
अधःस्थितोड्डामरवैरिपत्ति- मुक्तेषु निर्लूनशरासनज्यः । चिक्षेप चक्राण्य् अतिदीर्घबाहुः सः कालरात्रेर् इव कङ्कणानि
adhaḥsthitoḍḍāmaravairipatti- mukteṣu nirlūnaśarāsanajyaḥ / cikṣepa cakrāṇy atidīrghabāhuḥ saḥ kālarātrer iva kaṅkaṇāni
Sanskrit only: no published translation is held for this verse.
उत्प्लुत्य हेलाहतसंमुखारिर् विद्याधरेन्द्रो ऽप्य् असिना चकर्त । जगज्जयस्तम्भम् इवोद्धुरस्य सुरद्विषः काञ्चनकेतुदण्डम्
utplutya helāhatasaṃmukhārir vidyādharendro 'py asinā cakarta / jagajjayastambham ivoddhurasya suradviṣaḥ kāñcanaketudaṇḍam
Sanskrit only: no published translation is held for this verse.
सो रत्नचूडो ऽपि तथा भुशुण्ड्या पिपेष वैरिद्विषकुम्भपीठम् । सितातपत्रत्वम् उदञ्चद् आप यथास्य मुक्ताफलधूलिजालम्
so ratnacūḍo 'pi tathā bhuśuṇḍyā pipeṣa vairidviṣakumbhapīṭham / sitātapatratvam udañcad āpa yathāsya muktāphaladhūlijālam
Sanskrit only: no published translation is held for this verse.
तुङ्गं दधत्कर्कशताम् अभीकः श्रीसिन्धुराजद्विपकुम्भयुग्मम् । पयोधरद्वन्द्वम् इवाजिलक्ष्म्याश् चक्रे ऽर्धचन्द्राङ्कितम् इन्द्रशत्रुः
tuṅgaṃ dadhatkarkaśatām abhīkaḥ śrīsindhurājadvipakumbhayugmam / payodharadvandvam ivājilakṣmyāś cakre 'rdhacandrāṅkitam indraśatruḥ
Sanskrit only: no published translation is held for this verse.
परस्पराघट्टितदन्तकोटि- भ्रष्टाग्निवेशभ्रमम् आदधन्ति । रणाजिरे लोहितरञ्जितानि विरेजिरे कुञ्जरमौक्तिकानि
parasparāghaṭṭitadantakoṭi- bhraṣṭāgniveśabhramam ādadhanti / raṇājire lohitarañjitāni virejire kuñjaramauktikāni
Sanskrit only: no published translation is held for this verse.
चिक्षेप पृथीतिलके सुरारिर् यां याम् इषुं कोपकषायिताक्षः । तां तां जयाशाम् इव बाहुशाली शरैः सस् तस्यार्धपथे लुलोव
cikṣepa pṛthītilake surārir yāṃ yām iṣuṃ kopakaṣāyitākṣaḥ / tāṃ tāṃ jayāśām iva bāhuśālī śaraiḥ sas tasyārdhapathe lulova
Sanskrit only: no published translation is held for this verse.
तयोस् तथेष्वासप्रकर्ष- प्रत्युक्तकर्णार्जुनयोर् जयश्रीः । सुवेलरत्नाकरयोर् उदग्रा चकार वेलेव गतागतानि
tayos tatheṣvāsaprakarṣa- pratyuktakarṇārjunayor jayaśrīḥ / suvelaratnākarayor udagrā cakāra veleva gatāgatāni
Sanskrit only: no published translation is held for this verse.
पत्युः प्रजानाम् असुरेश्वरो ऽथ किरीटमाणिक्यचयं जहार । मणिप्रसूनस्तबकप्रतानं कल्पद्रुमस्येव युगान्तवातः
patyuḥ prajānām asureśvaro 'tha kirīṭamāṇikyacayaṃ jahāra / maṇiprasūnastabakapratānaṃ kalpadrumasyeva yugāntavātaḥ
Sanskrit only: no published translation is held for this verse.
क्रोधाद् अथार्धशशलाञ्छनसोदरेण बाणेन वासवरिपोर् नवसाहसाङ्कः । चिच्छेद राम इव विश्रवसः सुतस्य पीनांसलोलमणिकुण्डलम् उत्तमाङ्गम्
krodhād athārdhaśaśalāñchanasodareṇa bāṇena vāsavaripor navasāhasāṅkaḥ / ciccheda rāma iva viśravasaḥ sutasya pīnāṃsalolamaṇikuṇḍalam uttamāṅgam
Sanskrit only: no published translation is held for this verse.
आसन् मुखानि ककुभाम् अभितो ऽथ चित्र- वादित्रनादलहरीमुखरोदराणि । देवस्य च त्रिदिवपुष्पमयं पपात माल्यं शिरस्य् असुरवैरिपुरन्ध्रिमुक्तम्
āsan mukhāni kakubhām abhito 'tha citra- vāditranādalaharīmukharodarāṇi / devasya ca tridivapuṣpamayaṃ papāta mālyaṃ śirasy asuravairipurandhrimuktam
Sanskrit only: no published translation is held for this verse.
लक्ष्मीपतेः पृथुभुजद्वयम् आर्द्रसान्द्र- ज्याघातलाञ्छितम् अलाञ्छितविक्रमस्य । अत्यादरागतजितोर्जितवैरिलक्ष्मी- पादाब्जयावकनिषक्तम् इवाचकाशे
lakṣmīpateḥ pṛthubhujadvayam ārdrasāndra- jyāghātalāñchitam alāñchitavikramasya / atyādarāgatajitorjitavairilakṣmī- pādābjayāvakaniṣaktam ivācakāśe
Sanskrit only: no published translation is held for this verse.
तस्याग्रतः कनककुण्डलताड्यमान- गण्डस्थलीलुलितकुङ्कुमपत्रलेखाः । विद्याधरोरगकुरङ्गदृशः प्रमोद- सान्द्रोच्छलध्वनि जगुर् जयमङ्गलानि
tasyāgrataḥ kanakakuṇḍalatāḍyamāna- gaṇḍasthalīlulitakuṅkumapatralekhāḥ / vidyādharoragakuraṅgadṛśaḥ pramoda- sāndrocchaladhvani jagur jayamaṅgalāni
Sanskrit only: no published translation is held for this verse.
स्मित्वा यशोभटकरार्पितचापयष्टिर् उन्मुक्तरत्नकवचः खचरेश्वरेण । उद्भिन्नमौक्तिकनिभश्रमवारिबिन्दुर् देवो ममार्ज मुखम् अंशुकपल्लवेन
smitvā yaśobhaṭakarārpitacāpayaṣṭir unmuktaratnakavacaḥ khacareśvareṇa / udbhinnamauktikanibhaśramavāribindur devo mamārja mukham aṃśukapallavena
Sanskrit only: no published translation is held for this verse.
दत्ताभयोपनतपौरशतार्प्यमाण- रत्नोपधाम् अथ स रत्नवतीं प्रविश्य । तं संयुगस्फुटपरीक्षितशौर्यसारं राज्ये रिपोः फणिकुमारकम् अभ्यषिञ्चत्
dattābhayopanatapauraśatārpyamāṇa- ratnopadhām atha sa ratnavatīṃ praviśya / taṃ saṃyugasphuṭaparīkṣitaśauryasāraṃ rājye ripoḥ phaṇikumārakam abhyaṣiñcat
Sanskrit only: no published translation is held for this verse.
मूर्तं मनोरथम् इवोपवनात् सकन्दम् आदाय तत् कनककोकनदं नरेन्द्रः । आदातुम् ईप्सितमहीन्द्रसुतेति रत्नम् अभ्युत्सुकस् तद् अनु भोगवतीं प्रतस्थे
mūrtaṃ manoratham ivopavanāt sakandam ādāya tat kanakakokanadaṃ narendraḥ / ādātum īpsitamahīndrasuteti ratnam abhyutsukas tad anu bhogavatīṃ pratasthe
Sanskrit only: no published translation is held for this verse.
देवः साहसिको ऽप्य् अमन्दमुरजध्वानानुमेयोत्सवाम् उन्नम्रैः परितो महीं मणिगृहैर् उत्तम्भयन्तीम् इव । ताम् अत्युन्नतरत्नतोरणशिखाप्रेङ्खोलमुक्ताफल- प्रालम्बोच्छलदच्छकान्तिनिकरस्मेराम् अवापत् पुरीम्
devaḥ sāhasiko 'py amandamurajadhvānānumeyotsavām unnamraiḥ parito mahīṃ maṇigṛhair uttambhayantīm iva / tām atyunnataratnatoraṇaśikhāpreṅkholamuktāphala- prālambocchaladacchakāntinikarasmerām avāpat purīm
Sanskrit only: no published translation is held for this verse.