Padmagupta (alias Parimala): Navasahasankacarita 18

इति श्रीमृगाङ्कदत्तसूनोः परिमलापरनाम्नः पद्मगुप्तस्य कृतौ नवसाहसाङ्कचरिते महाकाव्ये हेमकमलहरणो नाम सप्तदशः सर्गः अष्टादशः सर्गः फणिराजदर्शनम् तं विष्टपत्रितयकण्टकदृष्टसारम् अभ्यागतं नृपतिम् उद्गतगाढहर्षः । प्रत्युद्ययाव् अधिपतिः फणिनाम् अनर्घ- रत्नार्घपाणिरशनैर् अथ शङ्खपालः

iti śrīmṛgāṅkadattasūnoḥ parimalāparanāmnaḥ padmaguptasya kṛtau navasāhasāṅkacarite mahākāvye hemakamalaharaṇo nāma saptadaśaḥ sargaḥ aṣṭādaśaḥ sargaḥ phaṇirājadarśanam taṃ viṣṭapatritayakaṇṭakadṛṣṭasāram abhyāgataṃ nṛpatim udgatagāḍhaharṣaḥ / pratyudyayāv adhipatiḥ phaṇinām anargha- ratnārghapāṇiraśanair atha śaṅkhapālaḥ

Sanskrit only: no published translation is held for this verse.

पुरप्रवेशः आदाय सादरफणीश्वरदत्तम् अर्घ्यम् अर्घ्यः सतां स बहिर् एव निवेश्य सैन्यम् । देवो ऽविशद् विनयवान् पुरम् अग्रयायि- विद्याधराधिपरमाङ्गदरत्नचूडः

purapraveśaḥ ādāya sādaraphaṇīśvaradattam arghyam arghyaḥ satāṃ sa bahir eva niveśya sainyam / devo 'viśad vinayavān puram agrayāyi- vidyādharādhiparamāṅgadaratnacūḍaḥ

Sanskrit only: no published translation is held for this verse.

उत्सृज्य गीतम् असमाप्य विलासलास्यम् अङ्काद् अपास्य सहसा मणिवल्लकीं च । अत्युन्मनास् तदवलोकनकौतुकेन वातायनान्य् अधिरुरोह पुरन्ध्रिलोकः

utsṛjya gītam asamāpya vilāsalāsyam aṅkād apāsya sahasā maṇivallakīṃ ca / atyunmanās tadavalokanakautukena vātāyanāny adhiruroha purandhrilokaḥ

Sanskrit only: no published translation is held for this verse.

उत्क्षिप्य वेपथुमता करपल्लवेन वातायनाग्रमणिमौक्तिकलाजकानि । स्मित्वैकया स विलसन् मकरावचूल- लीलालवाञ्चितविलोचनम् आलुलोके

utkṣipya vepathumatā karapallavena vātāyanāgramaṇimauktikalājakāni / smitvaikayā sa vilasan makarāvacūla- līlālavāñcitavilocanam āluloke

Sanskrit only: no published translation is held for this verse.

उद्यद्विवृत्तकरवेणिकया नृपेन्दौ तस्मिन् स्मरोल्लसितजृम्भिकया कया चित् । मुक्ता मुहुर् विबुधसिन्धुकलिन्दकन्या- किर्मीरवारिलहरीसुहृदः कटाक्षाः

udyadvivṛttakaraveṇikayā nṛpendau tasmin smarollasitajṛmbhikayā kayā cit / muktā muhur vibudhasindhukalindakanyā- kirmīravārilaharīsuhṛdaḥ kaṭākṣāḥ

Sanskrit only: no published translation is held for this verse.

वाचालरत्नवलया सविलासम् अस्मिन् निक्षिप्य कापि नवमौक्तिकलाजमुष्टिम् । तत्ताडितांसतटपार्थिवदत्तदृष्टिर् दीर्घेक्षणा किम् इव न त्रपया चकार

vācālaratnavalayā savilāsam asmin nikṣipya kāpi navamauktikalājamuṣṭim / tattāḍitāṃsataṭapārthivadattadṛṣṭir dīrghekṣaṇā kim iva na trapayā cakāra

Sanskrit only: no published translation is held for this verse.

वक्षो दधानम् अमराद्रिशिलाविशालम् आजानुबाहुम् अवलोक्य नरेन्द्रचन्द्रम् । चित्तोपनीतपरिरम्भसुखातिसान्द्रम् अन्या पयोधरभरे पुलकं बभार

vakṣo dadhānam amarādriśilāviśālam ājānubāhum avalokya narendracandram / cittopanītaparirambhasukhātisāndram anyā payodharabhare pulakaṃ babhāra

Sanskrit only: no published translation is held for this verse.

आलोक्य दर्पणतले प्रतिमागतं तम् ऽआत्तो मयैषऽ इति कापि कृतोत्सवाभूत् । मुग्धा गते ऽथ पुरतो ऽत्र तदीयबिम्बे शून्यात्मदर्शविधुरेन्दुमुखी बभूव

ālokya darpaṇatale pratimāgataṃ tam `ātto mayaiṣa' iti kāpi kṛtotsavābhūt / mugdhā gate 'tha purato 'tra tadīyabimbe śūnyātmadarśavidhurendumukhī babhūva

Sanskrit only: no published translation is held for this verse.

इत्य् आपतन् मदनबाणपरम्पराणाम् उन्मीलिताङ्गवलनश्लथमेखलानाम् । एणीदृशां विचरति स्म स राजहंसः पारोल्लसन्नवरसोर्मिषु मानसेषु

ity āpatan madanabāṇaparamparāṇām unmīlitāṅgavalanaślathamekhalānām / eṇīdṛśāṃ vicarati sma sa rājahaṃsaḥ pārollasannavarasormiṣu mānaseṣu

Sanskrit only: no published translation is held for this verse.

नायकवर्णनम् सङ्गीतवेश्मनि फणीश्वरचारणानां गीतेष्व् अजस्रम् इह शुश्रुम यद् यशांसि । यातः स एव नयनातिथिताम् अयं नः पुण्यैर् अहो बत नृपो नवसाहसाङ्कः

nāyakavarṇanam saṅgītaveśmani phaṇīśvaracāraṇānāṃ gīteṣv ajasram iha śuśruma yad yaśāṃsi / yātaḥ sa eva nayanātithitām ayaṃ naḥ puṇyair aho bata nṛpo navasāhasāṅkaḥ

Sanskrit only: no published translation is held for this verse.

कान्तिछटाछुरितदिक्तट एष देवो जीयाज्जगन्ति परमारकुलप्रदीपः । उन्मूल्य संप्रति सुरारितमः समूलं येनाहिविष्टपतले विहितः प्रकाशः

kāntichaṭāchuritadiktaṭa eṣa devo jīyājjaganti paramārakulapradīpaḥ / unmūlya saṃprati surāritamaḥ samūlaṃ yenāhiviṣṭapatale vihitaḥ prakāśaḥ

Sanskrit only: no published translation is held for this verse.

हन्तैष पन्नगपतेर् अतुलप्रतिज्ञा- प्राग्भारसागरसमुत्तरणैकपोतः । उत्पाकम् एष च फलं फणिराजकन्या- चित्ते चिरं कृतपदस्य मनोरथस्य

hantaiṣa pannagapater atulapratijñā- prāgbhārasāgarasamuttaraṇaikapotaḥ / utpākam eṣa ca phalaṃ phaṇirājakanyā- citte ciraṃ kṛtapadasya manorathasya

Sanskrit only: no published translation is held for this verse.

एतद् यशोभटकरे कनकाम्बुजं तल् लीलावतंसम् अचिराद् विरचय्य येन । प्रत्युप्तकल्पतरुपल्लवम् एष पाणिम् आदास्यते नृपतिर् अद्य शशिप्रभायाः

etad yaśobhaṭakare kanakāmbujaṃ tal līlāvataṃsam acirād viracayya yena / pratyuptakalpatarupallavam eṣa pāṇim ādāsyate nṛpatir adya śaśiprabhāyāḥ

Sanskrit only: no published translation is held for this verse.

हाटकेश्वरदर्शनम् सान्द्रानुरागपिशुनाः परशुः परेषाम् आकर्णयन्न् इति सः पौरजनस्य वाचः । श्रीहाटकेश्वर इति प्रथितस्य तुङ्गम् अग्रे ददर्श मणिमन्दिरम् इन्दुमौलेः

hāṭakeśvaradarśanam sāndrānurāgapiśunāḥ paraśuḥ pareṣām ākarṇayann iti saḥ paurajanasya vācaḥ / śrīhāṭakeśvara iti prathitasya tuṅgam agre dadarśa maṇimandiram indumauleḥ

Sanskrit only: no published translation is held for this verse.

तत्र प्रविश्य सकृतानतिर् आदिदेवम् आनर्च कल्पविटपिप्रभवैः प्रसूनैः । स्तोतुं कृताञ्जलिपुटः कुटजावदात- दन्तांशुपल्लवितवाग् उपचक्रमे च

tatra praviśya sakṛtānatir ādidevam ānarca kalpaviṭapiprabhavaiḥ prasūnaiḥ / stotuṃ kṛtāñjalipuṭaḥ kuṭajāvadāta- dantāṃśupallavitavāg upacakrame ca

Sanskrit only: no published translation is held for this verse.

हाटकेश्वरस्तुतिः अन्तर्जतापिहितसोमसुरापगाय प्रच्छन्नशरशासनलोचनाय । तीव्रव्रतग्लपितशैलसुतास्वरूप- विज्ञाननर्मपटवे बटवे नमस् ते

hāṭakeśvarastutiḥ antarjatāpihitasomasurāpagāya pracchannaśaraśāsanalocanāya / tīvravrataglapitaśailasutāsvarūpa- vijñānanarmapaṭave baṭave namas te

Sanskrit only: no published translation is held for this verse.

अत्यादरानतसुरासुरमौलिरत्न- नानामरीचिखचिताङ्घ्रिसरोरुहाय । देहार्धवर्तिगिरिजाविहिताभ्यसूय- सन्ध्याप्रणामविषमाञ्जलये नमस् ते

atyādarānatasurāsuramauliratna- nānāmarīcikhacitāṅghrisaroruhāya / dehārdhavartigirijāvihitābhyasūya- sandhyāpraṇāmaviṣamāñjalaye namas te

Sanskrit only: no published translation is held for this verse.

नीरन्ध्रसिन्धुजलसिक्तकपालमुक्त- रत्नाङ्कुरस्य करणीं विधुरातनोति । मौलौ सदैव भवतो भवभेदकर्तुर् निर्दग्धभास्करमहाय नमो ऽस्तु तस्मै

nīrandhrasindhujalasiktakapālamukta- ratnāṅkurasya karaṇīṃ vidhurātanoti / maulau sadaiva bhavato bhavabhedakartur nirdagdhabhāskaramahāya namo 'stu tasmai

Sanskrit only: no published translation is held for this verse.

कन्दर्पदर्पशमनाय कृतान्तहर्त्रे कर्त्रे शुभस्य भुजगाधिपवेष्टनाय । उर्वीमरुद्रविनिशाकरवह्नितोय- याज्याम्बरोच्चवपुषे सुपुषे नमस् ते

kandarpadarpaśamanāya kṛtāntahartre kartre śubhasya bhujagādhipaveṣṭanāya / urvīmarudraviniśākaravahnitoya- yājyāmbaroccavapuṣe supuṣe namas te

Sanskrit only: no published translation is held for this verse.

नीरन्ध्रभूतिधवलाय गजेन्द्रकृत्ति- संवीतदेहकवलीकृतपन्नगाय । निर्दग्धदानवकुलाय विपत्क्षयैक- कार्याय कारणनुताय नमो ऽस्तु तुभ्यम्

nīrandhrabhūtidhavalāya gajendrakṛtti- saṃvītadehakavalīkṛtapannagāya / nirdagdhadānavakulāya vipatkṣayaika- kāryāya kāraṇanutāya namo 'stu tubhyam

Sanskrit only: no published translation is held for this verse.

ते ते यम् एव किल वाङ्मयसागरस्य पारं गताः प्रणवम् आत्मविदो वदन्ति । तस्मै समाहितमहर्षिविनिद्रहृद्य- हृत्पुण्डरीकविहितस्थितये नमस् ते

te te yam eva kila vāṅmayasāgarasya pāraṃ gatāḥ praṇavam ātmavido vadanti / tasmai samāhitamaharṣivinidrahṛdya- hṛtpuṇḍarīkavihitasthitaye namas te

Sanskrit only: no published translation is held for this verse.

उत्तंसितेन्दुशकलाय कपालजूट- सङ्घट्टितोर्मिमुखराम्बरनिर्झराय । भस्माङ्गरागशुचये विकचोपवीत- व्यालेन्दुमौलिमणिदीधितये नमस् ते

uttaṃsitenduśakalāya kapālajūṭa- saṅghaṭṭitormimukharāmbaranirjharāya / bhasmāṅgarāgaśucaye vikacopavīta- vyālendumaulimaṇidīdhitaye namas te

Sanskrit only: no published translation is held for this verse.

नास्त्रं न भस्म न जटा न कपालदाम नेन्दुः सिद्धतटिनी न फणीन्द्रहारः । नोक्षा विषं न दयितापि न यत्र रूपम् अव्यक्तम् ईश किल तद् दधते नमस् ते

nāstraṃ na bhasma na jaṭā na kapāladāma nenduḥ siddhataṭinī na phaṇīndrahāraḥ / nokṣā viṣaṃ na dayitāpi na yatra rūpam avyaktam īśa kila tad dadhate namas te

Sanskrit only: no published translation is held for this verse.

नागराजगमनम् स्तुत्वेत्य् अवन्तिपतिर् इन्दुकुलावतंसं तन्मन्दिरात् सहचरैः सह निर्जगाम । अन्तर्निवेशितहरिन्मणिवेदि वल्गन्- नागाङ्गनं सः फणिराजगृहं जगाम

nāgarājagamanam stutvety avantipatir indukulāvataṃsaṃ tanmandirāt sahacaraiḥ saha nirjagāma / antarniveśitaharinmaṇivedi valgan- nāgāṅganaṃ saḥ phaṇirājagṛhaṃ jagāma

Sanskrit only: no published translation is held for this verse.

तत्रावतीर्य रथतः स रमाङ्गदात्त- पाणिः समुच्छलितमङ्गलतूर्यघोषे । उन्निद्रसान्द्रकुसुमप्रकरावकीर्ण- माणिक्यकुट्टिमतले मसृणम् विवेश

tatrāvatīrya rathataḥ sa ramāṅgadātta- pāṇiḥ samucchalitamaṅgalatūryaghoṣe / unnidrasāndrakusumaprakarāvakīrṇa- māṇikyakuṭṭimatale masṛṇam viveśa

Sanskrit only: no published translation is held for this verse.

अन्योन्यपल्लविततद्विजयप्रशंसः प्राप्तस्थितिर् विकटकाञ्चनविष्टरेषु । पद्मछदायतदृशा ददृशे ऽथ तस्मिन्न् एकत्र तेन मिलितः फणिराजलोकः

anyonyapallavitatadvijayapraśaṃsaḥ prāptasthitir vikaṭakāñcanaviṣṭareṣu / padmachadāyatadṛśā dadṛśe 'tha tasminn ekatra tena militaḥ phaṇirājalokaḥ

Sanskrit only: no published translation is held for this verse.

तत्कृतः सत्कारः तस्मिन् गते नयनगोचरम् उद्धृतारौ बद्धाञ्जलिर् झटिति पन्नगराजसंसत् । मन्दाकिनीव परितो हरिणावचूड- व्यालोककुड्मलितकाञ्चनपङ्कजाभूत्

tatkṛtaḥ satkāraḥ tasmin gate nayanagocaram uddhṛtārau baddhāñjalir jhaṭiti pannagarājasaṃsat / mandākinīva parito hariṇāvacūḍa- vyālokakuḍmalitakāñcanapaṅkajābhūt

Sanskrit only: no published translation is held for this verse.

न्यञ्चच्छिखाभरणभासुरपद्मराग- रोचिछटाघटिततत्फणरत्नकान्तिः । राजन्यमौलिमणिचुम्बितपादपीठस् तस्मै चकार स महाभिजनः प्रणामम्

nyañcacchikhābharaṇabhāsurapadmarāga- rocichaṭāghaṭitatatphaṇaratnakāntiḥ / rājanyamaulimaṇicumbitapādapīṭhas tasmai cakāra sa mahābhijanaḥ praṇāmam

Sanskrit only: no published translation is held for this verse.

प्रत्युप्तरत्नम् अभितः प्रमदावकीर्णं मुक्त्वा चतुष्कम् उरगेन्द्रनिदेशितं स । अध्यास्त सादरजरत्फणिकल्पिताशीस् तन्मध्यवर्तिकनकासनम् उन्नतांसः

pratyuptaratnam abhitaḥ pramadāvakīrṇaṃ muktvā catuṣkam uragendranideśitaṃ sa / adhyāsta sādarajaratphaṇikalpitāśīs tanmadhyavartikanakāsanam unnatāṃsaḥ

Sanskrit only: no published translation is held for this verse.

वत्सां व्रजनाय ममेति शनैर् विसृज्य नेपथ्यनीलमणिवेश्मनि रत्नचूडम् । तत्रासनद्वयम् अदापयद् अस्य पार्श्वे विद्याधराधिपयशोभटयोः फणीन्द्रः

vatsāṃ vrajanāya mameti śanair visṛjya nepathyanīlamaṇiveśmani ratnacūḍam / tatrāsanadvayam adāpayad asya pārśve vidyādharādhipayaśobhaṭayoḥ phaṇīndraḥ

Sanskrit only: no published translation is held for this verse.

स्वर्णासने स्वयम् अथाच्छफणातपत्र- रत्नप्रदीपशतजर्जरितान्धकारः । लोकत्रयैकतिलकस्य स नातिदूरे देवस्य दारितमहेन्द्ररिपोर् न्यषीदत्

svarṇāsane svayam athācchaphaṇātapatra- ratnapradīpaśatajarjaritāndhakāraḥ / lokatrayaikatilakasya sa nātidūre devasya dāritamahendraripor nyaṣīdat

Sanskrit only: no published translation is held for this verse.

स्थित्वैकतो युवतिमङ्गलगीतिम् अत्र शृण्वन् स विन्ध्यतटदृष्टचरः कुरङ्गः । चित्रे निवेशित इवाथ यशोभटेन स्मित्वा सविस्मयम् असूच्यत पार्थिवाय

sthitvaikato yuvatimaṅgalagītim atra śṛṇvan sa vindhyataṭadṛṣṭacaraḥ kuraṅgaḥ / citre niveśita ivātha yaśobhaṭena smitvā savismayam asūcyata pārthivāya

Sanskrit only: no published translation is held for this verse.

शशिप्रभादर्शनम् अत्रान्तरे प्रमदलोलदृशा नृपेण दूराद् अदर्शि फणिराजसुताभियान्ती । तन्वी शिरीशसुमनःसुकुमारमूर्तिर् देवस्य कार्मुकलतेव मनोभवस्य

śaśiprabhādarśanam atrāntare pramadaloladṛśā nṛpeṇa dūrād adarśi phaṇirājasutābhiyāntī / tanvī śirīśasumanaḥsukumāramūrtir devasya kārmukalateva manobhavasya

Sanskrit only: no published translation is held for this verse.

ज्योत्स्नासिताम्बररुचिस्नपिताननेन्दुर् मात्राचिरोद्गतयवाङ्कुरकर्णपूरम् । मुक्त्वोज्ज्वलं ललितकौतुककङ्कणं च वेषं विवाहसमयोचितम् उद्वहन्ती

jyotsnāsitāmbararucisnapitānanendur mātrācirodgatayavāṅkurakarṇapūram / muktvojjvalaṃ lalitakautukakaṅkaṇaṃ ca veṣaṃ vivāhasamayocitam udvahantī

Sanskrit only: no published translation is held for this verse.

सख्या कयापि लिखितं मदनानलैक- धूमावलीवलयसंशयम् अर्पयन्तम् । एकान्तकान्तम् असितागरुपत्रभङ्गम् आबिभ्रती लवलिपाण्डुतले कपोले

sakhyā kayāpi likhitaṃ madanānalaika- dhūmāvalīvalayasaṃśayam arpayantam / ekāntakāntam asitāgarupatrabhaṅgam ābibhratī lavalipāṇḍutale kapole

Sanskrit only: no published translation is held for this verse.

आत्तप्रसाधनम् अनङ्गविलासवेश्म लीलाविधानम् अवधिर् नयनोत्सवस्य । लावण्यसंवलितम् अङ्गकम् उद्वहन्ती शृङ्गारदुग्धजलधेर् अधिदेवतेव

āttaprasādhanam anaṅgavilāsaveśma līlāvidhānam avadhir nayanotsavasya / lāvaṇyasaṃvalitam aṅgakam udvahantī śṛṅgāradugdhajaladher adhidevateva

Sanskrit only: no published translation is held for this verse.

सा पाटलाविधुतचामरमारुतेषत्- व्यानर्तितालकलता सहिता सखीभिः । नातिस्फुटक्वणितनूपुरम् आकुलानि किंचिद् विलम्ब्य दधती त्रपया पदानि

sā pāṭalāvidhutacāmaramāruteṣat- vyānartitālakalatā sahitā sakhībhiḥ / nātisphuṭakvaṇitanūpuram ākulāni kiṃcid vilambya dadhatī trapayā padāni

Sanskrit only: no published translation is held for this verse.

नायिकया नायकदर्शनम् उत्पक्ष्मणा निरुपमोल्लसितप्रमोद- विस्तारलङ्घितविलाससरोरुहेण । सान्द्रस्मरज्वरपिपासितया तयापि दूराद् अपायि नयनाञ्जलिना नरेन्द्रः

nāyikayā nāyakadarśanam utpakṣmaṇā nirupamollasitapramoda- vistāralaṅghitavilāsasaroruheṇa / sāndrasmarajvarapipāsitayā tayāpi dūrād apāyi nayanāñjalinā narendraḥ

Sanskrit only: no published translation is held for this verse.

माल्यवतीवाक्यम् व्रीडावनम्रमुखपद्मम् उपागतायां तस्यां पितुः कनकविष्टरभागभाजि । माल्यादिकल्पितयथोचितसत्क्रियान्ते तं मालवेन्द्रम् इति माल्यवती जगाद

mālyavatīvākyam vrīḍāvanamramukhapadmam upāgatāyāṃ tasyāṃ pituḥ kanakaviṣṭarabhāgabhāji / mālyādikalpitayathocitasatkriyānte taṃ mālavendram iti mālyavatī jagāda

Sanskrit only: no published translation is held for this verse.

राजन्! महीतलमृगाङ्ग! विलम्बसे किम्? अद्यापि तूर्णम् अमुना स्वभुजार्जितेन । हेमाम्बुजेन विरचय्य वतंसम् अस्याः पूर्णप्रतिज्ञम् उरगाधिपतिं विधेहि

rājan! mahītalamṛgāṅga! vilambase kim? adyāpi tūrṇam amunā svabhujārjitena / hemāmbujena viracayya vataṃsam asyāḥ pūrṇapratijñam uragādhipatiṃ vidhehi

Sanskrit only: no published translation is held for this verse.

कमलावतंसः उक्ते तयेत्य् अकृत काञ्चनपुष्करं तद् यावत् सः कर्णशिखरे फणिराजपुत्र्याः । तावद् विहाय मृगरूपम् उदारमूर्तिर् अग्रे बभूव पुरुषो ऽस्य सहेमवेत्रः

kamalāvataṃsaḥ ukte tayety akṛta kāñcanapuṣkaraṃ tad yāvat saḥ karṇaśikhare phaṇirājaputryāḥ / tāvad vihāya mṛgarūpam udāramūrtir agre babhūva puruṣo 'sya sahemavetraḥ

Sanskrit only: no published translation is held for this verse.

पुरुषं प्रति प्रश्नः कस् त्वं मृगः कथम् अभूर् इति पार्थिवेन पृष्टः स विस्मयसमुत्सुकमानसेन । इत्य् अब्रवीद् उरगनेत्रपरम्पराभिर् आपीयमानवपुर् उक्तिम् अवन्तिनाथम्

puruṣaṃ prati praśnaḥ kas tvaṃ mṛgaḥ katham abhūr iti pārthivena pṛṣṭaḥ sa vismayasamutsukamānasena / ity abravīd uraganetraparamparābhir āpīyamānavapur uktim avantinātham

Sanskrit only: no published translation is held for this verse.

प्रतीहारस्य वृत्तान्तः कैलासशैलवसतेर् गिरिशोपरोधाद् द्वारप्रवेशविनिषेधकषायितेन । शप्तो ऽस्मि कण्वमुनिनायम् अहं पितुस् ते श्रीहर्षदेवनृपतेः प्रतिहारपालस्

pratīhārasya vṛttāntaḥ kailāsaśailavasater giriśoparodhād dvārapraveśaviniṣedhakaṣāyitena / śapto 'smi kaṇvamunināyam ahaṃ pitus te śrīharṣadevanṛpateḥ pratihārapālas

Sanskrit only: no published translation is held for this verse.

राजा फणीन्द्रदुहितुः कनकारविन्दं कर्णे करिष्यति यदा नवसाहसाङ्कः । स्वं रूपम् आप्स्यसि तदेति समादिदेश शापान्तम् एष विहितानुनयो महर्षिः

rājā phaṇīndraduhituḥ kanakāravindaṃ karṇe kariṣyati yadā navasāhasāṅkaḥ / svaṃ rūpam āpsyasi tadeti samādideśa śāpāntam eṣa vihitānunayo maharṣiḥ

Sanskrit only: no published translation is held for this verse.

तद् वासवारिविजयोत्थम् इदं यशस् ते गत्वैकपिङ्गलगिरेर् अवतंसयामि । उक्त्वेति दिव्यकुसुमैर् अवकीर्य मौलौ पातालमल्लम् अनिलस्य पथा जगाम

tad vāsavārivijayottham idaṃ yaśas te gatvaikapiṅgalagirer avataṃsayāmi / uktveti divyakusumair avakīrya maulau pātālamallam anilasya pathā jagāma

Sanskrit only: no published translation is held for this verse.

विवाहविधिः तूर्यस्वनेषु विलसत्सु पठत्स्व् अमन्दं बन्दिष्व् अनीयत फणीन्द्रपुरोधसा च । कोणावसक्तजलपूरितरत्नकुम्भां वेदिं तया सह स मध्यमलोकपालः

vivāhavidhiḥ tūryasvaneṣu vilasatsu paṭhatsv amandaṃ bandiṣv anīyata phaṇīndrapurodhasā ca / koṇāvasaktajalapūritaratnakumbhāṃ vediṃ tayā saha sa madhyamalokapālaḥ

Sanskrit only: no published translation is held for this verse.

अभ्युद्गतार्चिर् अनलोज्झितधूमराजि- श्यामीभवत् कनकतामरसावतंसाम् । तस्यां यथाविधि स मालवपुष्पकेतुः कन्याम् अहेः कुवलयाश्व इव उपयेमे

abhyudgatārcir analojjhitadhūmarāji- śyāmībhavat kanakatāmarasāvataṃsām / tasyāṃ yathāvidhi sa mālavapuṣpaketuḥ kanyām aheḥ kuvalayāśva iva upayeme

Sanskrit only: no published translation is held for this verse.

आनीतया झटिति रूपम् अदृष्टपूर्वम् अङ्गेन पुष्पशरभङ्गितरङ्गितेन । भाति स्म शन्तनुर् इव त्रिदिवस्रवन्त्या पातालचन्द्रकलया सस् तया समेत्य

ānītayā jhaṭiti rūpam adṛṣṭapūrvam aṅgena puṣpaśarabhaṅgitaraṅgitena / bhāti sma śantanur iva tridivasravantyā pātālacandrakalayā sas tayā sametya

Sanskrit only: no published translation is held for this verse.

फणिपतिवाक्यम् निर्गच्छदच्छरुचिनिर्भरम् अंशुकेन संछादितं किम् अपि पाणितले दधानः । ऊचे तम् इत्य् अधिपतिः फणिनाम् उदञ्चत्- दन्तांशुशारितरदछदरत्नकान्तिः

phaṇipativākyam nirgacchadaccharucinirbharam aṃśukena saṃchāditaṃ kim api pāṇitale dadhānaḥ / ūce tam ity adhipatiḥ phaṇinām udañcat- dantāṃśuśāritaradachadaratnakāntiḥ

Sanskrit only: no published translation is held for this verse.

यद् दीयते तव न तादृशम् अस्ति किंचिद् गेहे ममात्र नृपते नवसाहसाङ्क ! । कोशप्रतिष्ठितनिधानशतं यतस् त्वाम् ऐश्वर्यनिर्जितपुरन्दरम् आमनन्ति

yad dīyate tava na tādṛśam asti kiṃcid gehe mamātra nṛpate navasāhasāṅka ! / kośapratiṣṭhitanidhānaśataṃ yatas tvām aiśvaryanirjitapurandaram āmananti

Sanskrit only: no published translation is held for this verse.

तत् स्फाटिकं स्वम् इव शुद्धम् इदं गृहाण त्वष्टृप्रयत्नघटितं शिवलिङ्गम् एकम् । आकारम् अर्धवनितावपुषः पुरारेर् यस्यान्तरे सुकृतिनो हि विलोकयन्ति

tat sphāṭikaṃ svam iva śuddham idaṃ gṛhāṇa tvaṣṭṛprayatnaghaṭitaṃ śivaliṅgam ekam / ākāram ardhavanitāvapuṣaḥ purārer yasyāntare sukṛtino hi vilokayanti

Sanskrit only: no published translation is held for this verse.

व्यासः पुरा किल पुराणमुनेः प्रपेदे तस्मात् किलादिकविपाणितलं जगाम । लेभे ततो ऽपि भगवान् कपिलो महर्षिः सानुग्रहेण मम चेदम् अदायि तेन

vyāsaḥ purā kila purāṇamuneḥ prapede tasmāt kilādikavipāṇitalaṃ jagāma / lebhe tato 'pi bhagavān kapilo maharṣiḥ sānugraheṇa mama cedam adāyi tena

Sanskrit only: no published translation is held for this verse.

शिवलिङ्गार्पणम् उक्त्वेत्य् अनर्घम् अतिपावनम् अर्पितं तद् अन्तःस्फुटैकशिवरूपम् अहीश्वरेण । पूर्णेन्दुकान्ति सहसा निगृहीतशत्रुर् जग्राह पिण्डितम् इव स्वयशो नरेन्द्रः

śivaliṅgārpaṇam uktvety anargham atipāvanam arpitaṃ tad antaḥsphuṭaikaśivarūpam ahīśvareṇa / pūrṇendukānti sahasā nigṛhītaśatrur jagrāha piṇḍitam iva svayaśo narendraḥ

Sanskrit only: no published translation is held for this verse.

तत्राथ दिक्तटपरिस्खलितप्रवृत्त- सीमन्तिनीचटुलनूपुरकाञ्चिनादः । को ऽप्य् उच्छलत्पटहवंशहुड्डुक्कशङ्ख- वीणामृदङ्गमुरजध्वनिर् उत्सवो ऽभूत्

tatrātha diktaṭapariskhalitapravṛtta- sīmantinīcaṭulanūpurakāñcinādaḥ / ko 'py ucchalatpaṭahavaṃśahuḍḍukkaśaṅkha- vīṇāmṛdaṅgamurajadhvanir utsavo 'bhūt

Sanskrit only: no published translation is held for this verse.

स्वनगरीं प्रति प्रस्थापनम् वृत्ते वधूम् अथ विवाहमहोत्सवे ताम् आदाय निष्प्रतिमपौरुषवैजयन्तीम् । अन्वागतादरनिवर्तितपन्नगेन्द्रः पर्युत्सुकः स्वनगरीं स नृपः प्रतस्थे

svanagarīṃ prati prasthāpanam vṛtte vadhūm atha vivāhamahotsave tām ādāya niṣpratimapauruṣavaijayantīm / anvāgatādaranivartitapannagendraḥ paryutsukaḥ svanagarīṃ sa nṛpaḥ pratasthe

Sanskrit only: no published translation is held for this verse.

गत्वाथ दूरम् अहिविष्टपतः सहेलम् अंशः पुराणपुरुषस्य स निर्जगाम । शिप्रार्पितेन सहसा पुरतः प्रभाव- सीमन्तिताम्बुपटलेन पथा ससैन्यः

gatvātha dūram ahiviṣṭapataḥ sahelam aṃśaḥ purāṇapuruṣasya sa nirjagāma / śiprārpitena sahasā purataḥ prabhāva- sīmantitāmbupaṭalena pathā sasainyaḥ

Sanskrit only: no published translation is held for this verse.

तस्याः स्वहस्तमुनिसंहतिकल्पितार्घः सिन्धोस् तटे सः पदम् एकपदे चकार । शृङ्गे तदा च भगवान् अरविन्दबन्धुर् बन्धूकपाटलरुचिः कनकाचलस्य

tasyāḥ svahastamunisaṃhatikalpitārghaḥ sindhos taṭe saḥ padam ekapade cakāra / śṛṅge tadā ca bhagavān aravindabandhur bandhūkapāṭalaruciḥ kanakācalasya

Sanskrit only: no published translation is held for this verse.

उज्जयिनीप्रवेशः बालातपछुरितहर्म्यविटङ्कवर्ति- पारावतातिमधुरध्वनितछलेन । सम्भाषणं विदधतीम् इव पौरमुक्त- पुष्पाञ्जलिः सः पुरम् उज्जयिनीं विवेश

ujjayinīpraveśaḥ bālātapachuritaharmyaviṭaṅkavarti- pārāvatātimadhuradhvanitachalena / sambhāṣaṇaṃ vidadhatīm iva pauramukta- puṣpāñjaliḥ saḥ puram ujjayinīṃ viveśa

Sanskrit only: no published translation is held for this verse.

कान्तायशोभटयुतं कृशताम् अवाप्तास् तच्चिन्तयैव सचिवास् तम् अथ प्रणेमुः । काकुत्स्थम् आहतसुरारिम् इवानुयान्तं सौमित्रिणा जनकराजतनूजया च

kāntāyaśobhaṭayutaṃ kṛśatām avāptās taccintayaiva sacivās tam atha praṇemuḥ / kākutstham āhatasurārim ivānuyāntaṃ saumitriṇā janakarājatanūjayā ca

Sanskrit only: no published translation is held for this verse.

महाकालेश्वरदर्शनम् आनन्दबाष्पसलिलार्द्रदृशो ऽर्धमार्गे सम्भाष्य तान् स्मितमुखः सह तैर् जगाम । विद्याधरोरगकराहतहेमघण्टा- टाङ्कारहारि भवनं त्रिपुरान्तकस्य

mahākāleśvaradarśanam ānandabāṣpasalilārdradṛśo 'rdhamārge sambhāṣya tān smitamukhaḥ saha tair jagāma / vidyādharoragakarāhatahemaghaṇṭā- ṭāṅkārahāri bhavanaṃ tripurāntakasya

Sanskrit only: no published translation is held for this verse.

तस्मिंश् चराचरगुरोर् हरिणावचूल- चूडामणेर् अपचितिं विधिवद् विधाय । साकं फणीन्द्रसुतयाम्बररोधिकम्बु- तूर्यस्वनोर्मि सश् च राजकुलं विवेश

tasmiṃś carācaraguror hariṇāvacūla- cūḍāmaṇer apacitiṃ vidhivad vidhāya / sākaṃ phaṇīndrasutayāmbararodhikambu- tūryasvanormi saś ca rājakulaṃ viveśa

Sanskrit only: no published translation is held for this verse.

धारागमनम् तत्रार्णवध्वनिघनोत्सवतूर्यघोषे स्थित्वा दिनानि कतिचित् स नरेन्द्रचन्द्रः । याति स्म भूषितकुलः कुलराजधानीं धाराम् अमात्यकथितामृगयेतिवृत्तः

dhārāgamanam tatrārṇavadhvanighanotsavatūryaghoṣe sthitvā dināni katicit sa narendracandraḥ / yāti sma bhūṣitakulaḥ kularājadhānīṃ dhārām amātyakathitāmṛgayetivṛttaḥ

Sanskrit only: no published translation is held for this verse.

उद्घाटितेष्व् अथ विलोकनकौतुकेन वातायनेषु परितः पुरसुन्दरीभिः । तस्मिंश् चिराद् विशति जीव इवेश्वरे सा प्रोन्मीलितोरुनयनेव पुरी बभूव

udghāṭiteṣv atha vilokanakautukena vātāyaneṣu paritaḥ purasundarībhiḥ / tasmiṃś cirād viśati jīva iveśvare sā pronmīlitorunayaneva purī babhūva

Sanskrit only: no published translation is held for this verse.

शिवलिङ्गप्रतिष्ठा तत् साध्व् अकारयद् अथाधिगतप्रतिष्ठं तत्राच्छरत्नशिवलिङ्गम् अनर्घशीलः । तस्य प्रभावघटितैर् व्यधुर् अर्हणां च विद्याधरा विकचकल्पतरुप्रसूनैः

śivaliṅgapratiṣṭhā tat sādhv akārayad athādhigatapratiṣṭhaṃ tatrāccharatnaśivaliṅgam anarghaśīlaḥ / tasya prabhāvaghaṭitair vyadhur arhaṇāṃ ca vidyādharā vikacakalpataruprasūnaiḥ

Sanskrit only: no published translation is held for this verse.

अनुयायिप्रस्थानम् कृत्वा यथोचितम् अकृत्रिमम् उत्सवान्ते सत्कारम् आयतननिश्लथमौलिरत्नौ । दत्ताङ्कपाणिर् उभयोः प्रजिघाय स अथ विद्याधराधिपफणीन्द्रसूतौ स्वदेशम्

anuyāyiprasthānam kṛtvā yathocitam akṛtrimam utsavānte satkāram āyatananiślathamauliratnau / dattāṅkapāṇir ubhayoḥ prajighāya sa atha vidyādharādhipaphaṇīndrasūtau svadeśam

Sanskrit only: no published translation is held for this verse.

एकस् तयोर् अगमद् अम्बरगामिसैन्य- सीमन्तिताभ्रपटलः शशिकान्तशैलम् । अन्यो ऽप्य् अगाधजलमालवजह्नुकन्या- विश्राणितोरुसरणिर् निजराजधानीम्

ekas tayor agamad ambaragāmisainya- sīmantitābhrapaṭalaḥ śaśikāntaśailam / anyo 'py agādhajalamālavajahnukanyā- viśrāṇitorusaraṇir nijarājadhānīm

Sanskrit only: no published translation is held for this verse.

शशिप्रभासखीगमनम् माभूः कदापि विमुखी रमेण यद् अस्य छन्दानुवृत्तिरतिसंवननं मदस्य । उक्त्वेति ताम् अहिसुताम् अगमन् गृहाणि गन्धर्वकिन्नरमहोरगसिद्धकन्याः

śaśiprabhāsakhīgamanam mābhūḥ kadāpi vimukhī rameṇa yad asya chandānuvṛttiratisaṃvananaṃ madasya / uktveti tām ahisutām agaman gṛhāṇi gandharvakinnaramahoragasiddhakanyāḥ

Sanskrit only: no published translation is held for this verse.

साम्राज्यलक्ष्मीस्वीकारः नीलछत्रावतंसा भुजगपतिसुतापाण्डुगण्डस्थलान्तः- कस्तूरीपङ्कपत्रव्यतिकरशबलव्यायतांसे सलीलम् । देवेनाथ स्वमन्त्रिप्रवरचिरधृता साहसाङ्केन दीर्घे रोहज्ज्याघातरेखे पुनो ऽपि निदधे दोष्णि साम्राज्यलक्ष्मीः

sāmrājyalakṣmīsvīkāraḥ nīlachatrāvataṃsā bhujagapatisutāpāṇḍugaṇḍasthalāntaḥ- kastūrīpaṅkapatravyatikaraśabalavyāyatāṃse salīlam / devenātha svamantripravaraciradhṛtā sāhasāṅkena dīrghe rohajjyāghātarekhe puno 'pi nidadhe doṣṇi sāmrājyalakṣmīḥ

Sanskrit only: no published translation is held for this verse.