इति श्रीमृगाङ्कगुप्तसूनोः परिमलापरनाम्नः पद्मगुप्तस्य कृतौ नवसाहसाङ्कचरिते महाकाव्ये चित्रमृगावलोकनो नाम द्वितीयः सर्गः त्रितीयः सर्गः अथ बहु चरतो ऽस्य चापपाणेश् चकितवलन्मृगयूथवीक्षितस्य । वनभुवि सुलभः परिश्रमो ऽभून् न तु हरिणः स हृतेन्द्रचापशोभः
iti śrīmṛgāṅkaguptasūnoḥ parimalāparanāmnaḥ padmaguptasya kṛtau navasāhasāṅkacarite mahākāvye citramṛgāvalokano nāma dvitīyaḥ sargaḥ tritīyaḥ sargaḥ atha bahu carato 'sya cāpapāṇeś cakitavalanmṛgayūthavīkṣitasya / vanabhuvi sulabhaḥ pariśramo 'bhūn na tu hariṇaḥ sa hṛtendracāpaśobhaḥ
Sanskrit only: no published translation is held for this verse.
धनुषि तनुभरं निधाय किंचित् तरुणतमालवने विनीतखेदः । मृगरुधिरकलङ्कितेन देवः समविषमेण पथा पुरः प्रतस्थे
dhanuṣi tanubharaṃ nidhāya kiṃcit taruṇatamālavane vinītakhedaḥ / mṛgarudhirakalaṅkitena devaḥ samaviṣameṇa pathā puraḥ pratasthe
Sanskrit only: no published translation is held for this verse.
विन्ध्यकन्दरप्रवेशः अथ स चटुलषट्पदोपगीतं वनगजदानसुगन्धिगन्धवाहम् । परिसरम् अभिनृत्तनीलकण्ठं न्यविशत विन्ध्यनगेन्द्रकन्दरस्य
vindhyakandarapraveśaḥ atha sa caṭulaṣaṭpadopagītaṃ vanagajadānasugandhigandhavāham / parisaram abhinṛttanīlakaṇṭhaṃ nyaviśata vindhyanagendrakandarasya
Sanskrit only: no published translation is held for this verse.
चटुलकृतकचग्रहः स गच्छन् वनलतया परिहासलोलयेव । नरपतिर् अवशः कृतः स कामं वियति मुखेन्दुम् उदञ्चयां चकार
caṭulakṛtakacagrahaḥ sa gacchan vanalatayā parihāsalolayeva / narapatir avaśaḥ kṛtaḥ sa kāmaṃ viyati mukhendum udañcayāṃ cakāra
Sanskrit only: no published translation is held for this verse.
नमद् अवनिपतिः पतिः प्रजानाम् अयि! चपले नु विकृष्यते कचेषु । विरम मुहुर् इतीव मन्युगुञ्जद्- ध्वनिभिर् असाव् अलिभिर् लताभ्यधायि
namad avanipatiḥ patiḥ prajānām ayi! capale nu vikṛṣyate kaceṣu / virama muhur itīva manyuguñjad- dhvanibhir asāv alibhir latābhyadhāyi
Sanskrit only: no published translation is held for this verse.
कतिचिदलिनिपीतधूपगन्धान् अनतिविलम्बिपरार्ध्यमौलिरत्नान् । त्वरितम् अथ रमाङ्गदो ऽस्य केशान् विपिनलताविटपान्तराच् चकर्ष
katicidalinipītadhūpagandhān anativilambiparārdhyamauliratnān / tvaritam atha ramāṅgado 'sya keśān vipinalatāviṭapāntarāc cakarṣa
Sanskrit only: no published translation is held for this verse.
हंसदर्शनम् नृपतिर् अथ तदोन्मुखश् चरन्तं झटिति सितच्छदम् अम्बरे ददर्श । दधतम् अधिगतां कुतो ऽपि चञ्च्वा बिसलतिकाम् इव तारहारलेखाम्
haṃsadarśanam nṛpatir atha tadonmukhaś carantaṃ jhaṭiti sitacchadam ambare dadarśa / dadhatam adhigatāṃ kuto 'pi cañcvā bisalatikām iva tārahāralekhām
Sanskrit only: no published translation is held for this verse.
विकसितकुमुदच्छदावदाते ततनिभृते पततां तती दधानम् । विरचयितुम् उपायनं नृपेन्दोर् नवघटिते इव दन्तपत्रलेखे
vikasitakumudacchadāvadāte tatanibhṛte patatāṃ tatī dadhānam / viracayitum upāyanaṃ nṛpendor navaghaṭite iva dantapatralekhe
Sanskrit only: no published translation is held for this verse.
चितम् अतनु विसर्पता समन्तात् किरणलतानिकरेण हारयष्टेः । सितमणिमयसूचिनिर्मितस्य स्थितम् इव जङ्गमपञ्जरस्य मध्ये
citam atanu visarpatā samantāt kiraṇalatānikareṇa hārayaṣṭeḥ / sitamaṇimayasūcinirmitasya sthitam iva jaṅgamapañjarasya madhye
Sanskrit only: no published translation is held for this verse.
तरलमणिरुचावृतं प्रकृत्या विदलितविद्रुमकन्दकाञ्चितुण्डम् । प्रणयनिहितपादयावकाङ्कं कमलवनस्थितिलोलयेव लक्ष्म्या
taralamaṇirucāvṛtaṃ prakṛtyā vidalitavidrumakandakāñcituṇḍam / praṇayanihitapādayāvakāṅkaṃ kamalavanasthitilolayeva lakṣmyā
Sanskrit only: no published translation is held for this verse.
चरणयुगतले विभातकाल- स्फुटितजपाकुसुमाभिताम्रभासि । स्वयम् इव नलिनीवनप्रसूतेः परिचयतः कृतकान्तिसंविभागम्
caraṇayugatale vibhātakāla- sphuṭitajapākusumābhitāmrabhāsi / svayam iva nalinīvanaprasūteḥ paricayataḥ kṛtakāntisaṃvibhāgam
Sanskrit only: no published translation is held for this verse.
प्रतिपदम् अतिदीर्घहारभारात् अवनमदुन्नमयन्तम् उत्तमाङ्गम् । शिरसि निपततो निकामम् उष्णान् अहिमरुचः किरणान् इवोत्क्षिपन्तम्
pratipadam atidīrghahārabhārāt avanamadunnamayantam uttamāṅgam / śirasi nipatato nikāmam uṣṇān ahimarucaḥ kiraṇān ivotkṣipantam
Sanskrit only: no published translation is held for this verse.
विवृतमुखधृतस्य निष्पतद्भिस् तरलमणेर् अरुणस्य कान्तिलेशैः । अविरतम् अरविन्दवृन्दपीतान् मधुपृषतान् इव भूयसोद्वमन्तम्
vivṛtamukhadhṛtasya niṣpatadbhis taralamaṇer aruṇasya kāntileśaiḥ / aviratam aravindavṛndapītān madhupṛṣatān iva bhūyasodvamantam
Sanskrit only: no published translation is held for this verse.
परिखचितम् अयत्नपूरिताशैर् अविरलमौक्तिकदामरश्मिजालैः । यश इव परभूतभृतां निरुद्ध्य प्रसभम् उपाहृतम् आत्मनो यशोभिः
parikhacitam ayatnapūritāśair aviralamauktikadāmaraśmijālaiḥ / yaśa iva parabhūtabhṛtāṃ niruddhya prasabham upāhṛtam ātmano yaśobhiḥ
Sanskrit only: no published translation is held for this verse.
अभिनवबिसशङ्कयापहृत्य स्फटिकमयीम् असमक्षम् अक्षमालाम् । विहगम् इव विमानहंसपङ्क्तेर् विघटितम् एकतरं चतुर्मुखस्य
abhinavabisaśaṅkayāpahṛtya sphaṭikamayīm asamakṣam akṣamālām / vihagam iva vimānahaṃsapaṅkter vighaṭitam ekataraṃ caturmukhasya
Sanskrit only: no published translation is held for this verse.
च्युतम् इव सितचामरं मघोनेः श्रमजडवारविलासिनीकराग्रात् । अपहृतम् इव लोलपत्रजालं सुरसरितः पवनेन पुण्डरीकम्
cyutam iva sitacāmaraṃ maghoneḥ śramajaḍavāravilāsinīkarāgrāt / apahṛtam iva lolapatrajālaṃ surasaritaḥ pavanena puṇḍarīkam
Sanskrit only: no published translation is held for this verse.
हरहसितसितं दिवापि कान्ति- स्तबकम् इवापतितम् सुधाकरस्य । अपि पतितम् इवान्तरिक्षपीलोर् मघवदिभस्य विलासकर्णशङ्खम्
harahasitasitaṃ divāpi kānti- stabakam ivāpatitam sudhākarasya / api patitam ivāntarikṣapīlor maghavadibhasya vilāsakarṇaśaṅkham
Sanskrit only: no published translation is held for this verse.
स च परिणतलोध्रधूलिशुक्लस् तरलम् अवन्तिपतेश् चकार चेतः । किसलयम् इव बालचन्दनस्य स्तिमितगतिर् मलयाचलेन्द्रवातः
sa ca pariṇatalodhradhūliśuklas taralam avantipateś cakāra cetaḥ / kisalayam iva bālacandanasya stimitagatir malayācalendravātaḥ
Sanskrit only: no published translation is held for this verse.
नायकवर्णनम् अवदद् अथ विबुद्धपुण्डरीक- प्रतिमम् उपान्तचरे निधाय चक्षुः । दशनमणिमयूखभिन्नवर्णां गिरिम् इति मालवराजपूर्णचन्द्रः
nāyakavarṇanam avadad atha vibuddhapuṇḍarīka- pratimam upāntacare nidhāya cakṣuḥ / daśanamaṇimayūkhabhinnavarṇāṃ girim iti mālavarājapūrṇacandraḥ
Sanskrit only: no published translation is held for this verse.
सुरभिकुसुमचुम्बिनावनम्राम् अलिपटलेन लताम् इमां विना मे । खगम् अमुम् उपदर्शयेत् क एवं गगनरमापतिपाञ्चजन्यम् अन्यः
surabhikusumacumbināvanamrām alipaṭalena latām imāṃ vinā me / khagam amum upadarśayet ka evaṃ gaganaramāpatipāñcajanyam anyaḥ
Sanskrit only: no published translation is held for this verse.
स्मरवरकरिहस्तशीकराणाम् विदधति रुचयो नवहारमौक्तिकानाम् । विदधति रुचयो ऽस्य चन्न्चुकोटौ कवलितबालमृणालसूत्रलीलाम्
smaravarakarihastaśīkarāṇām vidadhati rucayo navahāramauktikānām / vidadhati rucayo 'sya canncukoṭau kavalitabālamṛṇālasūtralīlām
Sanskrit only: no published translation is held for this verse.
अयि! कथय सितच्छदः क्व चायं वननलिनीपुलिनान्तबद्धवासः । अवनिपतिकलत्रकण्ठयोग्यः क्व च शशिबन्धुर् अनर्घ एष हारः
ayi! kathaya sitacchadaḥ kva cāyaṃ vananalinīpulināntabaddhavāsaḥ / avanipatikalatrakaṇṭhayogyaḥ kva ca śaśibandhur anargha eṣa hāraḥ
Sanskrit only: no published translation is held for this verse.
वनभुविपतितः कुतो ऽयम् अस्यां कथम् अयम् अस्य मुखातिथित्वम् आप्तः? । गुरुविभवपदस्य कस्य वा स्याद् अयम् इति मे न परिच्छिनत्ति चेतः
vanabhuvipatitaḥ kuto 'yam asyāṃ katham ayam asya mukhātithitvam āptaḥ? / guruvibhavapadasya kasya vā syād ayam iti me na paricchinatti cetaḥ
Sanskrit only: no published translation is held for this verse.
अयम् उचिततरः फणिस्त्रियो वा कुचकलशान्तरमर्त्ययोषितो वा ? । नियतम् उदधिम् उद्रम् ईदृशानि क्षितितलम् आभरणानि न स्पृशन्ति
ayam ucitataraḥ phaṇistriyo vā kucakalaśāntaramartyayoṣito vā ? / niyatam udadhim udram īdṛśāni kṣititalam ābharaṇāni na spṛśanti
Sanskrit only: no published translation is held for this verse.
अ
a
Sanskrit only: no published translation is held for this verse.
किम् अपरम् अनुगम्य एष हंसः श्रमजडपक्षतिरावयोर् वनान्ते । अयि! यद् अयम् अवामनस्य भूमिर् मुखधृतहारलतः कुतूहलस्य् ॥ प्न्च् ३।२५ अ ॥ रमाङ्गदवाक्यम् इति विरतवचस्य् उदीर्य तस्मिन् कृतिनि नृपे परमारवंशकेतौ । स्फुरदधरविकीर्णदन्तकान्ति- प्रसरम् इदं जगदे रमाङ्गदेन
kim aparam anugamya eṣa haṃsaḥ śramajaḍapakṣatirāvayor vanānte / ayi! yad ayam avāmanasya bhūmir mukhadhṛtahāralataḥ kutūhalasy // PNc 3.25 a // ramāṅgadavākyam iti viratavacasy udīrya tasmin kṛtini nṛpe paramāravaṃśaketau / sphuradadharavikīrṇadantakānti- prasaram idaṃ jagade ramāṅgadena
Sanskrit only: no published translation is held for this verse.
जडरुचिर् अपि रोचते न कस्मै कथम् अपि दीर्घगुणेन लब्धसङ्गः । नरवर यद् अनेन हारदाम्ना तव पतगः स्पृहणीय एष जातः
jaḍarucir api rocate na kasmai katham api dīrghaguṇena labdhasaṅgaḥ / naravara yad anena hāradāmnā tava patagaḥ spṛhaṇīya eṣa jātaḥ
Sanskrit only: no published translation is held for this verse.
उपवन इव सम्भवः कदाचिन् नृप घटते विपिने ऽपि हारयष्टेः । यद् असुरसुरनागराजकन्या इह विहरन्ति नगेन्द्रकन्दरेषु
upavana iva sambhavaḥ kadācin nṛpa ghaṭate vipine 'pi hārayaṣṭeḥ / yad asurasuranāgarājakanyā iha viharanti nagendrakandareṣu
Sanskrit only: no published translation is held for this verse.
शकुनिर् अयम् इतो दिगन्तलग्नैर् अनुपममौक्तिकनिर्गतैर् मयूखैः । तव विरचयतीव सूत्रपातं सुकृतनिधान! भविष्यतः शुभस्य
śakunir ayam ito digantalagnair anupamamauktikanirgatair mayūkhaiḥ / tava viracayatīva sūtrapātaṃ sukṛtanidhāna! bhaviṣyataḥ śubhasya
Sanskrit only: no published translation is held for this verse.
द्रुतम् अयम् अनुगम्यताम् इदानीम् अनुगमनेन यतो ऽस्य हारलाभः । फलम् अधिकम् अतो ऽपि नः कदाचित् किम् अपि भवेद् अयम् अस्य हेतुः
drutam ayam anugamyatām idānīm anugamanena yato 'sya hāralābhaḥ / phalam adhikam ato 'pi naḥ kadācit kim api bhaved ayam asya hetuḥ
Sanskrit only: no published translation is held for this verse.
तरुविटपलतान्तरेण गच्छन् भुवम् अभजन् बहुमुक्तमेघवर्त्मा । अयम् अतिगुरुहारभारजातां श्रमजडतामलम् आत्मनो व्यनक्ति
taruviṭapalatāntareṇa gacchan bhuvam abhajan bahumuktameghavartmā / ayam atiguruhārabhārajātāṃ śramajaḍatāmalam ātmano vyanakti
Sanskrit only: no published translation is held for this verse.
नयनपथम् अयं यथा तवारात् त्वम् अपि तथास्य सितच्छदस्य यातः । अवनितलमृगाङ्क! यद् वनान्तश् चकितम् इवायम् इतस् ततः प्रयाति
nayanapatham ayaṃ yathā tavārāt tvam api tathāsya sitacchadasya yātaḥ / avanitalamṛgāṅka! yad vanāntaś cakitam ivāyam itas tataḥ prayāti
Sanskrit only: no published translation is held for this verse.
निचुलवनम् अतीत्य वर्तते ऽयम् पुरत इमाम् अयम् अब्जिनीम् उपेतः । नवजलधरशङ्कयेव शङ्के तरुणतमालवनादितो निवृत्तः
niculavanam atītya vartate 'yam purata imām ayam abjinīm upetaḥ / navajaladharaśaṅkayeva śaṅke taruṇatamālavanādito nivṛttaḥ
Sanskrit only: no published translation is held for this verse.
किसलयकलिताञ्जलिं त्वरावान् अयम् उपसर्पति नीलसिन्दुवारम् । क्षणम् अयम् इह बालचूतमौलौ विचकिलमाल्यविलासम् आदधाति
kisalayakalitāñjaliṃ tvarāvān ayam upasarpati nīlasinduvāram / kṣaṇam ayam iha bālacūtamaulau vicakilamālyavilāsam ādadhāti
Sanskrit only: no published translation is held for this verse.
अयम् अभिनवकर्णिकारयष्टिं झटिति घनस्तबकस्तनीम् उपैति । अयम् अतिचपलो निसर्गरक्तां स्थलनलिनीम् अवधीर्य देव! यातः
ayam abhinavakarṇikārayaṣṭiṃ jhaṭiti ghanastabakastanīm upaiti / ayam aticapalo nisargaraktāṃ sthalanalinīm avadhīrya deva! yātaḥ
Sanskrit only: no published translation is held for this verse.
अयम् इह हि लताम् उपैति कौन्दीं कुसुमवतीं नवमाधवीं विलङ्घ्य । क्वणदलिवलयासु नासु तेन स्खलितम् इतः सहकारमञ्जरीषु
ayam iha hi latām upaiti kaundīṃ kusumavatīṃ navamādhavīṃ vilaṅghya / kvaṇadalivalayāsu nāsu tena skhalitam itaḥ sahakāramañjarīṣu
Sanskrit only: no published translation is held for this verse.
अभिसरति वनस्थलीम् इवैतां मदनवतीमयमूढकामिलीलः । स्फुरदतनुशिलीमुखस्य चाग्रे विचरति कर्णे इवायम् अर्जुनस्य
abhisarati vanasthalīm ivaitāṃ madanavatīmayamūḍhakāmilīlaḥ / sphuradatanuśilīmukhasya cāgre vicarati karṇe ivāyam arjunasya
Sanskrit only: no published translation is held for this verse.
श्रमम् अपहरतस् तनूर्मिवातैर् अयम् अतिथिर् वनपल्वलस्य जातः । तरुततिषु तिरोहितो ऽयम् एतास्व् अयम् अरविन्दवनाद् इवोज्जिहीते
śramam apaharatas tanūrmivātair ayam atithir vanapalvalasya jātaḥ / tarutatiṣu tirohito 'yam etāsv ayam aravindavanād ivojjihīte
Sanskrit only: no published translation is held for this verse.
कुरबकवनतः कदम्बराजिं व्रजति ततो मुचकुन्दकाननानि । इति नगम् अवगाहते सहारस् त्वम् इव ध्र्तक्लम एष राजहंसः
kurabakavanataḥ kadambarājiṃ vrajati tato mucakundakānanāni / iti nagam avagāhate sahāras tvam iva dhrtaklama eṣa rājahaṃsaḥ
Sanskrit only: no published translation is held for this verse.
कुरु विजयम् इतो ममार्प्य एतद् धनुर् अधुना ससुवर्णपुङ्खबाणम् । यद् अयम् इतगतिर् गतो ऽतिदूरं जलपतगः सह नः कुतूहलेन
kuru vijayam ito mamārpya etad dhanur adhunā sasuvarṇapuṅkhabāṇam / yad ayam itagatir gato 'tidūraṃ jalapatagaḥ saha naḥ kutūhalena
Sanskrit only: no published translation is held for this verse.
हंसानुगमनम् इति कथयति चापम् अर्पयित्वा समम् इषुभिः स रमाङ्गदे नरेन्द्रस् । पतगम् अनु तम् आत्तहारं हरति न कं नववस्तुसंप्रयोगः
haṃsānugamanam iti kathayati cāpam arpayitvā samam iṣubhiḥ sa ramāṅgade narendras / patagam anu tam āttahāraṃ harati na kaṃ navavastusaṃprayogaḥ
Sanskrit only: no published translation is held for this verse.
ऋजु तम् अथ विहायसा व्रजन्तम् रभसवशाद् अनुगच्छतो नृपस्य । समजनि भृशम् आयतो ऽस्य पन्थास् तरुविटपावटवर्जनेन वक्रः
ṛju tam atha vihāyasā vrajantam rabhasavaśād anugacchato nṛpasya / samajani bhṛśam āyato 'sya panthās taruviṭapāvaṭavarjanena vakraḥ
Sanskrit only: no published translation is held for this verse.
नृपतिर् अनुययौ वने विहङ्गं नृपतिम् अभि प्रणयी रमाङ्गदो ऽपि । श्रुतम् इव विशदं शुचिर् विवेकः कृतिनि विवेकम् इवान्तरः प्रसादः
nṛpatir anuyayau vane vihaṅgaṃ nṛpatim abhi praṇayī ramāṅgado 'pi / śrutam iva viśadaṃ śucir vivekaḥ kṛtini vivekam ivāntaraḥ prasādaḥ
Sanskrit only: no published translation is held for this verse.
अथ कमलसरस्तरङ्गदोला- चलयविलोलरथाङ्गनामयुग्मम् । मदकलकलहंसनादकृष्टः श्रमविवेशः सः सितच्छदः प्रपेदे
atha kamalasarastaraṅgadolā- calayavilolarathāṅganāmayugmam / madakalakalahaṃsanādakṛṣṭaḥ śramaviveśaḥ saḥ sitacchadaḥ prapede
Sanskrit only: no published translation is held for this verse.
विलुलितकबरीकलापमाल्या मृदुनवशैवलमेखला वहन्त्यः । रतिरणम् अवसाय यत्र नित्यं सह रमणैर् अमराङ्गना रमन्ते
vilulitakabarīkalāpamālyā mṛdunavaśaivalamekhalā vahantyaḥ / ratiraṇam avasāya yatra nityaṃ saha ramaṇair amarāṅganā ramante
Sanskrit only: no published translation is held for this verse.
सलिलगतधियाथ तेन दूरात् स गुरुर् अमुच्यत निःसहेन हारः । जडहृतहृदयाः कियच् चिरं वा गुणमहताम् इह भारम् उद्वहन्ति
salilagatadhiyātha tena dūrāt sa gurur amucyata niḥsahena hāraḥ / jaḍahṛtahṛdayāḥ kiyac ciraṃ vā guṇamahatām iha bhāram udvahanti
Sanskrit only: no published translation is held for this verse.
स च विततमरीचिचञ्चुलेखो विगलितहारलतामिषेण हंसः । परिणतबिसकाण्डभङ्गपीतं पय इव विस्तृतधारम् उज्जगार
sa ca vitatamarīcicañculekho vigalitahāralatāmiṣeṇa haṃsaḥ / pariṇatabisakāṇḍabhaṅgapītaṃ paya iva vistṛtadhāram ujjagāra
Sanskrit only: no published translation is held for this verse.
अथ कनकमृणालिकायुगस्य द्युतिनिचयेन चितं विसर्पताधः । अशिशिरमहसो विसारिणा खे वलयितम् अंशुलताकदम्बकेन
atha kanakamṛṇālikāyugasya dyutinicayena citaṃ visarpatādhaḥ / aśiśiramahaso visāriṇā khe valayitam aṃśulatākadambakena
Sanskrit only: no published translation is held for this verse.
तटभुवि तम् अपश्यद् आपतन्तं पतिर् अवने रवतंसितायताक्षः । सितम् अभिनवहेमदण्डशोभि स्फटिकशलाकम् इवातपत्रम् ऐन्द्रम्
taṭabhuvi tam apaśyad āpatantaṃ patir avane ravataṃsitāyatākṣaḥ / sitam abhinavahemadaṇḍaśobhi sphaṭikaśalākam ivātapatram aindram
Sanskrit only: no published translation is held for this verse.
सरसि धवलिते ततः समन्ताद् अमृतमरीचिरुचेव तस्य कान्त्या । व्यधित बलवती वियोगपीडा पदम् अपदे हृदयेषु चक्रनाम्नाम्
sarasi dhavalite tataḥ samantād amṛtamarīciruceva tasya kāntyā / vyadhita balavatī viyogapīḍā padam apade hṛdayeṣu cakranāmnām
Sanskrit only: no published translation is held for this verse.
अतिविततगुणैकधाम्नि तस्मिन् विधुरम् अधःपतिते विशुद्धिभाजि । कथम् अपि वसुधाधिपः प्रमोदं झटिति जगाम गुणिष्व् अमत्सरो हि
ativitataguṇaikadhāmni tasmin vidhuram adhaḥpatite viśuddhibhāji / katham api vasudhādhipaḥ pramodaṃ jhaṭiti jagāma guṇiṣv amatsaro hi
Sanskrit only: no published translation is held for this verse.
अथ नभसि पिशङ्गसान्ध्यराग- च्छुरित इवाम्बरनिम्नगातरङ्गम् । कियद् अपि सरसस् तटे स गत्वा कमलरजःकपिशे ददर्श हारम्
atha nabhasi piśaṅgasāndhyarāga- cchurita ivāmbaranimnagātaraṅgam / kiyad api sarasas taṭe sa gatvā kamalarajaḥkapiśe dadarśa hāram
Sanskrit only: no published translation is held for this verse.
स च सपदि रमाङ्गदोपनीतं कनकसरोरुहकान्तिना करेण । निजयश इव मूर्तम् आददे तं भुवनतलाभयदानदीक्षितेन
sa ca sapadi ramāṅgadopanītaṃ kanakasaroruhakāntinā kareṇa / nijayaśa iva mūrtam ādade taṃ bhuvanatalābhayadānadīkṣitena
Sanskrit only: no published translation is held for this verse.
सुजनम् इव गुणैर् उपोढशोभं शुचितरबालमृणालसूत्रदीर्घैः । अहमहमिकया कृतप्रवेशं तरणिकरग्लपितैर् इवेन्दुपादैः
sujanam iva guṇair upoḍhaśobhaṃ śucitarabālamṛṇālasūtradīrghaiḥ / ahamahamikayā kṛtapraveśaṃ taraṇikaraglapitair ivendupādaiḥ
Sanskrit only: no published translation is held for this verse.
दधतम् अरुणम् अङ्गरागशेषं क्वचिद् अपि यष्टिषु तारमौक्तिकासु । घटितम् इव नवातपेन किंचिद् बहुनवया शशलक्ष्मणस् त्विषा च
dadhatam aruṇam aṅgarāgaśeṣaṃ kvacid api yaṣṭiṣu tāramauktikāsu / ghaṭitam iva navātapena kiṃcid bahunavayā śaśalakṣmaṇas tviṣā ca
Sanskrit only: no published translation is held for this verse.
अतिविततरुचिं वहन्तम् अन्तस् तरलमणिं तरुणेन्द्रगोपश्र्̆भम् । अविरलम् असकृन्निवासलग्नं ललितवधूहृदयाद् इवानुरागम्
ativitataruciṃ vahantam antas taralamaṇiṃ taruṇendragopaśr̆bham / aviralam asakṛnnivāsalagnaṃ lalitavadhūhṛdayād ivānurāgam
Sanskrit only: no published translation is held for this verse.
कतिचिद् अपि लतान्तरे दधानं मृगमदलिप्ततलानि मौक्तिकानि । शबलजललवैर् इवात्तजन्मान्य् अयम् अरनदीयमुनातिथेर् घनस्य
katicid api latāntare dadhānaṃ mṛgamadaliptatalāni mauktikāni / śabalajalalavair ivāttajanmāny ayam aranadīyamunātither ghanasya
Sanskrit only: no published translation is held for this verse.
अनुगुणपदवीविनिर्गतासु प्रतिलतम् आयतमौक्तिकप्रभासु । रजनिकरमरीचिसूचिदीर्घैर् बहुभिर् इव ग्रथितं मृणालसूत्रैः
anuguṇapadavīvinirgatāsu pratilatam āyatamauktikaprabhāsu / rajanikaramarīcisūcidīrghair bahubhir iva grathitaṃ mṛṇālasūtraiḥ
Sanskrit only: no published translation is held for this verse.
अतिदृढम् अनुरक्तया वितीर्णं मुखरमहोदधिमेखलां वहन्त्या । उरसि निहितबन्धुजीवम् उर्व्या विचकिलमाल्यम् इव स्वयंवराय
atidṛḍham anuraktayā vitīrṇaṃ mukharamahodadhimekhalāṃ vahantyā / urasi nihitabandhujīvam urvyā vicakilamālyam iva svayaṃvarāya
Sanskrit only: no published translation is held for this verse.
अरुचद् अथ करे स तस्य बिभ्रद् युवतिरदच्छदकान्तिमध्यरत्नम् । किम् अपि मनसिजेन शासनाङ्कः प्रहितनिजायुधचित्रपुष्पमुद्रः
arucad atha kare sa tasya bibhrad yuvatiradacchadakāntimadhyaratnam / kim api manasijena śāsanāṅkaḥ prahitanijāyudhacitrapuṣpamudraḥ
Sanskrit only: no published translation is held for this verse.
शशिकररुचा स तेन रेजे मृदुकरपुष्करवर्तिना नरेन्द्रः । अमरपुरधुनीसमुद्धृतेन त्रिदशकरीव मृणालकन्दलेन
śaśikararucā sa tena reje mṛdukarapuṣkaravartinā narendraḥ / amarapuradhunīsamuddhṛtena tridaśakarīva mṛṇālakandalena
Sanskrit only: no published translation is held for this verse.
उरसि नरपतेः पतंश् चकाशे कनकशिलाविपुले तदंशुपूरः । अखिलभुवनकोशराजलक्ष्म्या निहित इवाधिकम् उत्क्या कटाक्षः
urasi narapateḥ pataṃś cakāśe kanakaśilāvipule tadaṃśupūraḥ / akhilabhuvanakośarājalakṣmyā nihita ivādhikam utkyā kaṭākṣaḥ
Sanskrit only: no published translation is held for this verse.
विकृतिर् उदधिशुक्तिएषु च्युतानां ध्रुवम् इयम् इन्दुकलासुधालवानाम् । जलदजलकणोद्भवेषु कामं निवसति कान्तिर् इयं न मौक्तिकेषु
vikṛtir udadhiśuktieṣu cyutānāṃ dhruvam iyam indukalāsudhālavānām / jaladajalakaṇodbhaveṣu kāmaṃ nivasati kāntir iyaṃ na mauktikeṣu
Sanskrit only: no published translation is held for this verse.
न किम् अयम् उडुमण्डलापवादः कुमुदवनानि पुरो ऽस्य न त्रपन्ते । कथम् अयम् अवधिर् न मुक्तिभाजाम् इति तम् अवेक्ष्य स चिन्तयां चकार
na kim ayam uḍumaṇḍalāpavādaḥ kumudavanāni puro 'sya na trapante / katham ayam avadhir na muktibhājām iti tam avekṣya sa cintayāṃ cakāra
Sanskrit only: no published translation is held for this verse.
स्फुरदुदरनिवेशितेन्द्रनीलां मदजलराजिम् इव स्मरद्विपस्य । अवनिपतिर् अपश्यद् अक्षराणां ततिम् अथ हारमृणालिकान्तराले
sphuradudaraniveśitendranīlāṃ madajalarājim iva smaradvipasya / avanipatir apaśyad akṣarāṇāṃ tatim atha hāramṛṇālikāntarāle
Sanskrit only: no published translation is held for this verse.
अभिनवलिखिताम् इव प्रशतिं मदनमहानृपतेः स पार्थिवेन्द्रः । इति निबिडकुतूहलाकुलस् तां ललितपदाभरणाम् अवाचयच् च
abhinavalikhitām iva praśatiṃ madanamahānṛpateḥ sa pārthivendraḥ / iti nibiḍakutūhalākulas tāṃ lalitapadābharaṇām avācayac ca
Sanskrit only: no published translation is held for this verse.
ऽऽमनसिजवरवीरवैजन्त्यास् त्रिभुवनदुर्लभविभ्रमैकभूमेः । कुचमुकुलविचित्रपत्रवल्ली- परिचित एष सदा शशिप्रभायाःऽऽ
``manasijavaravīravaijantyās tribhuvanadurlabhavibhramaikabhūmeḥ / kucamukulavicitrapatravallī- paricita eṣa sadā śaśiprabhāyāḥ''
Sanskrit only: no published translation is held for this verse.
किम् उ विपुलम् इमं मनुष्यलोकं पुरम् उत पर्वतपक्षशातनस्य । किम् उ युवतिर् इयं भुजङ्गभर्तुर् भुवनम् अलङ्कुरुते शशिप्रभेति
kim u vipulam imaṃ manuṣyalokaṃ puram uta parvatapakṣaśātanasya / kim u yuvatir iyaṃ bhujaṅgabhartur bhuvanam alaṅkurute śaśiprabheti
Sanskrit only: no published translation is held for this verse.
वदति शशिमुखीम् इतस् न दूरे तरुणविलेपनभिन्न एष हारः । सरितम् इव वनान्तरे समीरः स्फुतितसरोरुहरेणुना पिशङ्गः
vadati śaśimukhīm itas na dūre taruṇavilepanabhinna eṣa hāraḥ / saritam iva vanāntare samīraḥ sphutitasaroruhareṇunā piśaṅgaḥ
Sanskrit only: no published translation is held for this verse.
कुसुमशरसखस्य कस्य चित् किं समजनि नाकतलाधिदेवतेयम् । उत मुकुलितमन्मथावतारे पथि विचरे ऽधिनाककन्यकानाम्
kusumaśarasakhasya kasya cit kiṃ samajani nākatalādhidevateyam / uta mukulitamanmathāvatāre pathi vicare 'dhinākakanyakānām
Sanskrit only: no published translation is held for this verse.
अपि कृतनयनोत्सवेन तन्वी तरुणसुधामधुरेण दर्शनेन । मुदम् उपजनेद् वने किम् एषा ? मम शरदिन्दुकलेव कैरवस्य
api kṛtanayanotsavena tanvī taruṇasudhāmadhureṇa darśanena / mudam upajaned vane kim eṣā ? mama śaradindukaleva kairavasya
Sanskrit only: no published translation is held for this verse.
इति कियद् अपि यावद् एव चिन्ता- वशम् अगमत् स मनुष्यलोकपालः । धनुर् अपि निचुलं विधाय तावत् कुसुमशरो ऽस्य बभूव पार्श्ववर्ती
iti kiyad api yāvad eva cintā- vaśam agamat sa manuṣyalokapālaḥ / dhanur api niculaṃ vidhāya tāvat kusumaśaro 'sya babhūva pārśvavartī
Sanskrit only: no published translation is held for this verse.
अथ सम्भ्रमाद् अनुचरेण निहिततमालपल्लवे । आस्त तरुकुसुमसंवलिते सरसः सः सैकतशिलातले नृपः
atha sambhramād anucareṇa nihitatamālapallave / āsta tarukusumasaṃvalite sarasaḥ saḥ saikataśilātale nṛpaḥ
Sanskrit only: no published translation is held for this verse.
आलक्ष्य स्तनसख्यलक्ष्मणि ततस् तस्मिन् कुरङ्गीदृशो मुक्तादाम्नि करोदरप्रणयिताम् आप्ते तुषारत्विषि । विस्मृत्या सहसा हृतं चतुरया क्रोडीकृतं चिन्तया चेतः श्रीनवसाहसाङ्कनृपतेर् उत्कण्ठयाकृष्यत
ālakṣya stanasakhyalakṣmaṇi tatas tasmin kuraṅgīdṛśo muktādāmni karodarapraṇayitām āpte tuṣāratviṣi / vismṛtyā sahasā hṛtaṃ caturayā kroḍīkṛtaṃ cintayā cetaḥ śrīnavasāhasāṅkanṛpater utkaṇṭhayākṛṣyata
Sanskrit only: no published translation is held for this verse.