Vidyāraṇya: Pañcadaśī 8

खादित्यदीपिते कुड्ये दर्पणादित्यदीप्तिवत् । कूटस्थभासितो देहो धीस्थजीवेन भास्यते

khādityadīpite kuḍye darpaṇādityadīptivat | kūṭasthabhāsito deho dhīsthajīvena bhāsyate

Sanskrit only: no published translation is held for this verse.

अनेकदर्पणादित्यदीप्तीनां बहुसन्धिषु । इतरा व्यज्यते तासामभावेऽपि प्रकाशते

anekadarpaṇādityadīptīnāṃ bahusandhiṣu | itarā vyajyate tāsāmabhāve'pi prakāśate

Sanskrit only: no published translation is held for this verse.

चिदाभासविशिष्टानां तथानेकधियामसौ । सन्धिं धियामभावं च भासयन्प्रविविच्यताम्

cidābhāsaviśiṣṭānāṃ tathānekadhiyāmasau | sandhiṃ dhiyāmabhāvaṃ ca bhāsayanpravivicyatām

Sanskrit only: no published translation is held for this verse.

घटैकाकारधीस्था चिद्घटमेवावभासयेत् । घटस्य ज्ञातता ब्रह्मचैतन्येनावभास्यते

ghaṭaikākāradhīsthā cidghaṭamevāvabhāsayet | ghaṭasya jñātatā brahmacaitanyenāvabhāsyate

Sanskrit only: no published translation is held for this verse.

अज्ञातत्वेन ज्ञातोऽयं घटो बुद्ध्युदयात्पुरा । ब्रह्मणैवोपरिष्टात्तु ज्ञातत्वेनेत्यसौ भिदा

ajñātatvena jñāto'yaṃ ghaṭo buddhyudayātpurā | brahmaṇaivopariṣṭāttu jñātatvenetyasau bhidā

Sanskrit only: no published translation is held for this verse.

चिदाभासान्तधीवृत्तिर्ज्ञानं लोहान्तकुन्तवत् । जाड्यमज्ञानमेताभ्यां व्याप्तः कुम्भो द्विधोच्यते

cidābhāsāntadhīvṛttirjñānaṃ lohāntakuntavat | jāḍyamajñānametābhyāṃ vyāptaḥ kumbho dvidhocyate

Sanskrit only: no published translation is held for this verse.

अज्ञातो ब्रह्मणा भास्यो ज्ञातः कुम्भस्तथा न किम् । ज्ञातत्वजननेनैव चिदाभासपरिक्षयः

ajñāto brahmaṇā bhāsyo jñātaḥ kumbhastathā na kim | jñātatvajananenaiva cidābhāsaparikṣayaḥ

Sanskrit only: no published translation is held for this verse.

आभासहीनया बुद्ध्या ज्ञातत्वं नैव जन्यते । तादृग्बुद्धेर्विशेषः को मृदादेः स्याद्विकारिणः

ābhāsahīnayā buddhyā jñātatvaṃ naiva janyate | tādṛgbuddherviśeṣaḥ ko mṛdādeḥ syādvikāriṇaḥ

Sanskrit only: no published translation is held for this verse.

ज्ञात इत्युच्यते कुम्भो मृदा लिप्तो न कुत्रचित् । धीमात्रव्याप्तकुम्भस्य ज्ञातत्वं नेष्यते तथा

jñāta ityucyate kumbho mṛdā lipto na kutracit | dhīmātravyāptakumbhasya jñātatvaṃ neṣyate tathā

Sanskrit only: no published translation is held for this verse.

ज्ञातत्वं नाम कुम्भेऽतश्चिदाभासफलोदयः । न फलं ब्रह्मचैतन्यं मनात्प्रागपि सत्वतः

jñātatvaṃ nāma kumbhe'taścidābhāsaphalodayaḥ | na phalaṃ brahmacaitanyaṃ manātprāgapi satvataḥ

Sanskrit only: no published translation is held for this verse.

परागर्थप्रमेयेषु या फलत्वेन संमता संवित्सैवेह मेयोऽर्थो वेदान्तोक्ति प्रमाणतः । इति वार्तिककारेण चित्सदृश्यं विवक्षितम् ब्रह्मचित्फलयोर्भेदः साहस्र्यां विश्रुतो यतः

parāgarthaprameyeṣu yā phalatvena saṃmatā saṃvitsaiveha meyo'rtho vedāntokti pramāṇataḥ | iti vārtikakāreṇa citsadṛśyaṃ vivakṣitam brahmacitphalayorbhedaḥ sāhasryāṃ viśruto yataḥ

Sanskrit only: no published translation is held for this verse.

आभास उदितस्तस्माज्ज्ञातत्वं जनयेद्घटे । तत्पुनःर्ब्रह्मणा भास्यमज्ञातत्ववदेव हि

ābhāsa uditastasmājjñātatvaṃ janayedghaṭe | tatpunaḥrbrahmaṇā bhāsyamajñātatvavadeva hi

Sanskrit only: no published translation is held for this verse.

धीवृत्त्याभासकुम्भानां समूहो भास्यते चिता । कुम्भमात्रफलत्वात्स एक आभासतः स्फुरेत्

dhīvṛttyābhāsakumbhānāṃ samūho bhāsyate citā | kumbhamātraphalatvātsa eka ābhāsataḥ sphuret

Sanskrit only: no published translation is held for this verse.

चैतन्यं द्विगुणं कुम्भे ज्ञातत्वेन स्फुरेत्ततः । अन्येऽनुव्यवसायाख्यमाहुरेतद्यथोदितम्

caitanyaṃ dviguṇaṃ kumbhe jñātatvena sphurettataḥ | anye'nuvyavasāyākhyamāhuretadyathoditam

Sanskrit only: no published translation is held for this verse.

घटोऽयमित्यसावुक्तिराभासस्य प्रसादतः । विज्ञातो घट इत्युक्तिर्ब्रह्मानुग्रहतो भवेत्

ghaṭo'yamityasāvuktirābhāsasya prasādataḥ | vijñāto ghaṭa ityuktirbrahmānugrahato bhavet

Sanskrit only: no published translation is held for this verse.

आभासब्रह्मणी देहाद्बहिर्यद्वद्विवेचिते । तद्वदाभासकूटस्थौ विविच्येतां वपुष्यपि

ābhāsabrahmaṇī dehādbahiryadvadvivecite | tadvadābhāsakūṭasthau vivicyetāṃ vapuṣyapi

Sanskrit only: no published translation is held for this verse.

अहंवृत्तौ चिदाभासः कामक्रोधादिकासु च । संव्याप्य वर्तते तप्ते लोहे वह्निर्यथा तथा

ahaṃvṛttau cidābhāsaḥ kāmakrodhādikāsu ca | saṃvyāpya vartate tapte lohe vahniryathā tathā

Sanskrit only: no published translation is held for this verse.

स्वमात्रं भासयेत्तप्तं लोहं नान्यत्कदाचन । एवमाभाससहिता वृत्तयः स्वस्वभासिकाः

svamātraṃ bhāsayettaptaṃ lohaṃ nānyatkadācana | evamābhāsasahitā vṛttayaḥ svasvabhāsikāḥ

Sanskrit only: no published translation is held for this verse.

क्रमाद्विच्छिद्य विच्छिद्य जायन्ते वृत्तयोऽखिलाः । सर्वा अपि विलीयन्ते सुप्तिमूर्च्छासमाधिषु

kramādvicchidya vicchidya jāyante vṛttayo'khilāḥ | sarvā api vilīyante suptimūrcchāsamādhiṣu

Sanskrit only: no published translation is held for this verse.

सन्धयोऽखिलवृत्तीनामभावाश्चावभासिताः । निर्विकारेण येनासौ कूटस्थ इति गीयते

sandhayo'khilavṛttīnāmabhāvāścāvabhāsitāḥ | nirvikāreṇa yenāsau kūṭastha iti gīyate

Sanskrit only: no published translation is held for this verse.

घटे द्विगुणचैतन्यं यथा बाह्ये तथान्तरे । वृत्तिष्वपि ततस्तत्र वैशद्यं सन्धितोऽधिकम्

ghaṭe dviguṇacaitanyaṃ yathā bāhye tathāntare | vṛttiṣvapi tatastatra vaiśadyaṃ sandhito'dhikam

Sanskrit only: no published translation is held for this verse.

ज्ञातताज्ञातते न स्तो घटवद्वृत्तिषु क्वचित् । स्वस्य स्वेनागृहीतत्वात्ताभिश्चाज्ञाननाशनात्

jñātatājñātate na sto ghaṭavadvṛttiṣu kvacit | svasya svenāgṛhītatvāttābhiścājñānanāśanāt

Sanskrit only: no published translation is held for this verse.

द्विगुणीकृतचैतन्ये जन्मनाशानुभूतितः । अकूटस्थं तदन्यत्तु कूटस्थमविकारितः

dviguṇīkṛtacaitanye janmanāśānubhūtitaḥ | akūṭasthaṃ tadanyattu kūṭasthamavikāritaḥ

Sanskrit only: no published translation is held for this verse.

अन्तःकरणतद्वृत्तिसाक्षीत्यादावनेकधा । कूटस्थः एव सर्वत्र पूर्वाचार्यैर्विनिश्चितः

antaḥkaraṇatadvṛttisākṣītyādāvanekadhā | kūṭasthaḥ eva sarvatra pūrvācāryairviniścitaḥ

Sanskrit only: no published translation is held for this verse.

आत्माभासाश्रयश्चैवं मुखाभासाश्रया यथा । गम्यन्ते शास्त्रयुक्तिभ्यामित्याभासश्च वर्णितः

ātmābhāsāśrayaścaivaṃ mukhābhāsāśrayā yathā | gamyante śāstrayuktibhyāmityābhāsaśca varṇitaḥ

Sanskrit only: no published translation is held for this verse.

बुद्ध्यवच्छिन्नकूटस्थो लोकान्तरगमागमौ । कर्तुं शक्तो घटाकाश इवाभासेन किं वद

buddhyavacchinnakūṭastho lokāntaragamāgamau | kartuṃ śakto ghaṭākāśa ivābhāsena kiṃ vada

Sanskrit only: no published translation is held for this verse.

शृण्वसङ्गः परिच्छेदमात्राज्जीवो भवेन्न हि । अन्यथा घटकुड्याद्यैरवच्छिन्नस्य जीवता

śṛṇvasaṅgaḥ paricchedamātrājjīvo bhavenna hi | anyathā ghaṭakuḍyādyairavacchinnasya jīvatā

Sanskrit only: no published translation is held for this verse.

न कुड्यसादृशी बुद्धिः स्वच्छत्वादिति चेत्तथा । अस्तु नाम परिच्छेदे किं स्वाच्छ्येन भवेत्तव

na kuḍyasādṛśī buddhiḥ svacchatvāditi cettathā | astu nāma paricchede kiṃ svācchyena bhavettava

Sanskrit only: no published translation is held for this verse.

प्रस्थेन दारुजन्येन कांस्यजन्येन वा न हि । विक्रेतुस्तण्डुलादिनां परिमाणं विशिष्यते

prasthena dārujanyena kāṃsyajanyena vā na hi | vikretustaṇḍulādināṃ parimāṇaṃ viśiṣyate

Sanskrit only: no published translation is held for this verse.

परिमाणविशेषेऽपि प्रतिबिम्बो विशिष्यते । कांस्ये यदि तदा बुद्धावप्याभासो भवेद्बलात्

parimāṇaviśeṣe'pi pratibimbo viśiṣyate | kāṃsye yadi tadā buddhāvapyābhāso bhavedbalāt

Sanskrit only: no published translation is held for this verse.

ईषद्भासनमाभासः प्रतिबिम्बस्तथाविधः । बिम्बलक्षणहीनः सन्बिम्बवद्भासते स हि

īṣadbhāsanamābhāsaḥ pratibimbastathāvidhaḥ | bimbalakṣaṇahīnaḥ sanbimbavadbhāsate sa hi

Sanskrit only: no published translation is held for this verse.

ससङ्गत्वविकाराभ्यां बिम्बलक्षणहीनता । स्फूर्तिरूपत्वमेतस्य बिम्बवद्भासनं विदुः

sasaṅgatvavikārābhyāṃ bimbalakṣaṇahīnatā | sphūrtirūpatvametasya bimbavadbhāsanaṃ viduḥ

Sanskrit only: no published translation is held for this verse.

न हि धीभावभावित्वादाभासोऽस्ति धियः पृथक् । इति चेदल्पमेवोक्तं धीरप्येवं स्वदेहतः

na hi dhībhāvabhāvitvādābhāso'sti dhiyaḥ pṛthak | iti cedalpamevoktaṃ dhīrapyevaṃ svadehataḥ

Sanskrit only: no published translation is held for this verse.

देहे मृतेऽपि बुद्धिश्चेच्छास्त्रादस्ति तथा सति । बुद्धेरन्यश्चिदाभासः प्रवेशश्रुतिषु श्रुतः

dehe mṛte'pi buddhiścecchāstrādasti tathā sati | buddheranyaścidābhāsaḥ praveśaśrutiṣu śrutaḥ

Sanskrit only: no published translation is held for this verse.

धीयुक्तस्य प्रवेशश्चेन्नैतरेये धियः पृथक् । आत्मा प्रवेशं सङ्कल्प्य प्रविष्ट इति गीयते

dhīyuktasya praveśaścennaitareye dhiyaḥ pṛthak | ātmā praveśaṃ saṅkalpya praviṣṭa iti gīyate

Sanskrit only: no published translation is held for this verse.

कथं न्विदं साक्षदेहं मदृते स्यादितीरणात् । विदार्य मूर्ध्नः सीमानं प्रविष्टः संसरत्ययम्

kathaṃ nvidaṃ sākṣadehaṃ madṛte syāditīraṇāt | vidārya mūrdhnaḥ sīmānaṃ praviṣṭaḥ saṃsaratyayam

Sanskrit only: no published translation is held for this verse.

कथं प्रविष्टोऽसङ्गश्चेत्सृष्टिर्वास्य कथं वद । मायिकत्वं तयोस्तुल्यं विनाशश्च समस्तयोः

kathaṃ praviṣṭo'saṅgaścetsṛṣṭirvāsya kathaṃ vada | māyikatvaṃ tayostulyaṃ vināśaśca samastayoḥ

Sanskrit only: no published translation is held for this verse.

समुप्त्यायैव भूतेभ्यस्तान्येवानुविनश्यति । विस्पष्टमिति मैत्रेय्य याज्ञवल्क्य उवाच हि

samuptyāyaiva bhūtebhyastānyevānuvinaśyati | vispaṣṭamiti maitreyya yājñavalkya uvāca hi

Sanskrit only: no published translation is held for this verse.

अविनाश्ययमात्मेति कूटस्थः प्रविवेचितः । मात्रासंसर्ग इत्येवमसङ्गत्वस्य कीर्तनात्

avināśyayamātmeti kūṭasthaḥ pravivecitaḥ | mātrāsaṃsarga ityevamasaṅgatvasya kīrtanāt

Sanskrit only: no published translation is held for this verse.

जीवापेतं वाव किल शरीरं म्रियते न सः । इत्यत्र न विमोक्षोऽर्थः किन्तु लोकान्तरे गतिः

jīvāpetaṃ vāva kila śarīraṃ mriyate na saḥ | ityatra na vimokṣo'rthaḥ kintu lokāntare gatiḥ

Sanskrit only: no published translation is held for this verse.

नाहं ब्रह्मेति बुध्येत स विनाशीति चेन्न तत् । सामानाधिकरण्यस्य बाधायामपि सम्भवात्

nāhaṃ brahmeti budhyeta sa vināśīti cenna tat | sāmānādhikaraṇyasya bādhāyāmapi sambhavāt

Sanskrit only: no published translation is held for this verse.

योऽयं स्थाणुः पुमानेष पुंधिया स्थाणुधीरिव । ब्रह्मास्मीति धिया शेषा ह्यहं बुद्धिर्निवर्तते

yo'yaṃ sthāṇuḥ pumāneṣa puṃdhiyā sthāṇudhīriva | brahmāsmīti dhiyā śeṣā hyahaṃ buddhirnivartate

Sanskrit only: no published translation is held for this verse.

नैष्कर्म्यसिद्धावप्येवमाचार्यैः स्पष्टमीरितम् । सामानाधिकरण्यस्य बाधार्थत्वं ततोऽस्तु तत्

naiṣkarmyasiddhāvapyevamācāryaiḥ spaṣṭamīritam | sāmānādhikaraṇyasya bādhārthatvaṃ tato'stu tat

Sanskrit only: no published translation is held for this verse.

सर्वं ब्रह्मेति जगता सामानाधिकरण्यवत् । अहं ब्रह्मेति जीवेन सामानाधिकृतिर्भवेत्

sarvaṃ brahmeti jagatā sāmānādhikaraṇyavat | ahaṃ brahmeti jīvena sāmānādhikṛtirbhavet

Sanskrit only: no published translation is held for this verse.

सामानाधिकरण्यस्य बाधार्थत्वं निराकृतम् । प्रयत्नतो विवरणे कूटस्थत्वविवक्षया

sāmānādhikaraṇyasya bādhārthatvaṃ nirākṛtam | prayatnato vivaraṇe kūṭasthatvavivakṣayā

Sanskrit only: no published translation is held for this verse.

शोधितस्त्वं पदार्थो यः कूटस्थो ब्रह्मरूपताम् । तस्य वक्तुं विवरणे तथोक्तमितरत्र च

śodhitastvaṃ padārtho yaḥ kūṭastho brahmarūpatām | tasya vaktuṃ vivaraṇe tathoktamitaratra ca

Sanskrit only: no published translation is held for this verse.

देहेन्द्रियादियुक्तस्य जीवाभासभ्रमस्य या । अधिष्ठानचितिः सैषा कूटस्थात्र विवक्षिता

dehendriyādiyuktasya jīvābhāsabhramasya yā | adhiṣṭhānacitiḥ saiṣā kūṭasthātra vivakṣitā

Sanskrit only: no published translation is held for this verse.

जगद्भ्रमस्य सर्वस्य यदधिष्ठानमीरितम् । त्रय्यन्तेषु तदत्र स्याद्ब्रह्मशब्दविवक्षितम्

jagadbhramasya sarvasya yadadhiṣṭhānamīritam | trayyanteṣu tadatra syādbrahmaśabdavivakṣitam

Sanskrit only: no published translation is held for this verse.

एतस्मिन्नेव चैतन्ये जगदारोप्यते यदा । तदा तदेकदेशस्य जीवाभासस्य का कथा

etasminneva caitanye jagadāropyate yadā | tadā tadekadeśasya jīvābhāsasya kā kathā

Sanskrit only: no published translation is held for this verse.

जगत्तदेकदेशाख्यसमारोप्यस्य भेदतः । तत्त्वंपदार्थौ भिन्नौ स्तो वस्तुतस्त्वेकता चितः

jagattadekadeśākhyasamāropyasya bhedataḥ | tattvaṃpadārthau bhinnau sto vastutastvekatā citaḥ

Sanskrit only: no published translation is held for this verse.

कर्तृत्वादीन्बुद्धिधर्मान्स्फूर्त्याख्यां चात्मरूपताम् । दधद्विभाति पुरत आभासोऽतो भ्रमो भवेत्

kartṛtvādīnbuddhidharmānsphūrtyākhyāṃ cātmarūpatām | dadhadvibhāti purata ābhāso'to bhramo bhavet

Sanskrit only: no published translation is held for this verse.

का बुद्धिः कोऽयमाभासः को वात्रात्मा जगत्कथम् । इत्यनिर्णयतो मोहः सोऽयं संसार इष्यते

kā buddhiḥ ko'yamābhāsaḥ ko vātrātmā jagatkatham | ityanirṇayato mohaḥ so'yaṃ saṃsāra iṣyate

Sanskrit only: no published translation is held for this verse.

बुद्ध्यादीनां स्वरूपं यो विविनक्ति स तत्त्ववित् । स एव मुक्त इत्येवं वेदान्तेषु विनिश्चयः

buddhyādīnāṃ svarūpaṃ yo vivinakti sa tattvavit | sa eva mukta ityevaṃ vedānteṣu viniścayaḥ

Sanskrit only: no published translation is held for this verse.

एवं च सति बन्धः स्यात्कस्येत्यादिकुतर्कजाः । विडम्बनादृढं खण्ड्याः खण्डनोक्तिप्रकारतः

evaṃ ca sati bandhaḥ syātkasyetyādikutarkajāḥ | viḍambanādṛḍhaṃ khaṇḍyāḥ khaṇḍanoktiprakārataḥ

Sanskrit only: no published translation is held for this verse.

वृत्तेः साक्षितया वृत्तेः प्रागभावस्य च स्थितः । बुभुत्सायां तथाज्ञोऽस्मीत्याभासाज्ञानवस्तुनः

vṛtteḥ sākṣitayā vṛtteḥ prāgabhāvasya ca sthitaḥ | bubhutsāyāṃ tathājño'smītyābhāsājñānavastunaḥ

Sanskrit only: no published translation is held for this verse.

असत्यालम्बनत्वेन सत्यः सर्वजडस्य तु । साधकत्वेन चिद्रूपः सदा प्रेमास्पदत्वतः

asatyālambanatvena satyaḥ sarvajaḍasya tu | sādhakatvena cidrūpaḥ sadā premāspadatvataḥ

Sanskrit only: no published translation is held for this verse.

आनन्दरूपः सर्वार्थसाधकत्वेन हेतुना । सर्व सम्बन्धवत्त्वेन सम्पूर्णः शिवसंज्ञितः

ānandarūpaḥ sarvārthasādhakatvena hetunā | sarva sambandhavattvena sampūrṇaḥ śivasaṃjñitaḥ

Sanskrit only: no published translation is held for this verse.

इति शैवपुराणेषु कूटस्थः प्रविवेचितः । जीवेशत्वादिरहितः केवलः स्वप्रभः शिवः

iti śaivapurāṇeṣu kūṭasthaḥ pravivecitaḥ | jīveśatvādirahitaḥ kevalaḥ svaprabhaḥ śivaḥ

Sanskrit only: no published translation is held for this verse.

मायाभासेन जीवेशौ करोतीति श्रुतत्वतः । मायिकावेव जीवेशौ स्वच्छौ तौ काचकुम्भवत्

māyābhāsena jīveśau karotīti śrutatvataḥ | māyikāveva jīveśau svacchau tau kācakumbhavat

Sanskrit only: no published translation is held for this verse.

अन्नजन्यं मनोदेहात्स्वच्छं यद्वत्तथैव तौ । मायिकावपि सर्वस्मादन्यस्मात्स्वच्छतां गतौ

annajanyaṃ manodehātsvacchaṃ yadvattathaiva tau | māyikāvapi sarvasmādanyasmātsvacchatāṃ gatau

Sanskrit only: no published translation is held for this verse.

चिद्रूपत्वं च सम्भाव्यं चित्त्वेनैव प्रकाशनात् । सर्वकल्पनशक्ताया मायाया दुष्करं न हि

cidrūpatvaṃ ca sambhāvyaṃ cittvenaiva prakāśanāt | sarvakalpanaśaktāyā māyāyā duṣkaraṃ na hi

Sanskrit only: no published translation is held for this verse.

अस्मन्निद्रापि जीवेशौ चेतनौ स्वप्नगौ सृजेत् । महामाया सृजत्येतावित्याश्चर्यं किमत्र ते

asmannidrāpi jīveśau cetanau svapnagau sṛjet | mahāmāyā sṛjatyetāvityāścaryaṃ kimatra te

Sanskrit only: no published translation is held for this verse.

सर्वज्ञत्वादिकं चेशे कल्पयित्वा प्रदर्शयेत् । धर्मिणं कल्पयेद्यास्याः को भारो धर्मकल्पने

sarvajñatvādikaṃ ceśe kalpayitvā pradarśayet | dharmiṇaṃ kalpayedyāsyāḥ ko bhāro dharmakalpane

Sanskrit only: no published translation is held for this verse.

कूटस्थेऽप्यतिशङ्क्य स्यादिति चेन्मातिशंक्यताम् । कूटास्थमायिकत्वे तु प्रमाणं न हि वर्तते

kūṭasthe'pyatiśaṅkya syāditi cenmātiśaṃkyatām | kūṭāsthamāyikatve tu pramāṇaṃ na hi vartate

Sanskrit only: no published translation is held for this verse.

वस्तुत्वं घोषयन्त्यस्य वेदान्ताः सकला अपि । सपत्नरूपं वस्त्वन्यन्न सहन्तेऽत्र किंचन

vastutvaṃ ghoṣayantyasya vedāntāḥ sakalā api | sapatnarūpaṃ vastvanyanna sahante'tra kiṃcana

Sanskrit only: no published translation is held for this verse.

श्रुत्यर्थं विशदीकुर्मो न तर्कान्वच्मि किंचन । तेन तार्किकशंकानामत्र कोऽवसरो वद

śrutyarthaṃ viśadīkurmo na tarkānvacmi kiṃcana | tena tārkikaśaṃkānāmatra ko'vasaro vada

Sanskrit only: no published translation is held for this verse.

तस्मात्कुतर्कं सन्त्यज्य मुमुक्षुः श्रुतिमाश्रयेत् । श्रुतौ तु मायाजीवेशौ करोतीति प्रदर्शितम्

tasmātkutarkaṃ santyajya mumukṣuḥ śrutimāśrayet | śrutau tu māyājīveśau karotīti pradarśitam

Sanskrit only: no published translation is held for this verse.

ईक्षणादिप्रवेशान्ता सृष्टिरीशकृता भवेत् । जाग्रदादिविमोक्षन्तः संसारो जीवकर्तृकः

īkṣaṇādipraveśāntā sṛṣṭirīśakṛtā bhavet | jāgradādivimokṣantaḥ saṃsāro jīvakartṛkaḥ

Sanskrit only: no published translation is held for this verse.

असङ्ग एव कूटस्थः सर्वदा नास्य कश्चन । भवत्यतिशयस्तेन मनस्येवं विचार्यताम्

asaṅga eva kūṭasthaḥ sarvadā nāsya kaścana | bhavatyatiśayastena manasyevaṃ vicāryatām

Sanskrit only: no published translation is held for this verse.

अवाङ्मनसगम्यं तं श्रुतिर्बोधयितुं सदा । जीवमीशं जगद्वापि समाश्रित्यावबोधयेत्

avāṅmanasagamyaṃ taṃ śrutirbodhayituṃ sadā | jīvamīśaṃ jagadvāpi samāśrityāvabodhayet

Sanskrit only: no published translation is held for this verse.

यया यया भवेत्पुंसां व्युत्पत्तिः प्रत्यगात्मनि । सा सैव प्रक्रियेह स्यात्साध्वीत्याचार्यभाषितम्

yayā yayā bhavetpuṃsāṃ vyutpattiḥ pratyagātmani | sā saiva prakriyeha syātsādhvītyācāryabhāṣitam

Sanskrit only: no published translation is held for this verse.

श्रुतितात्पर्यमखिलमबुध्वा भ्राम्यते जडः । विवेकी त्वखिलं बुध्वा तिष्ठत्यानन्दवारिधौ

śrutitātparyamakhilamabudhvā bhrāmyate jaḍaḥ | vivekī tvakhilaṃ budhvā tiṣṭhatyānandavāridhau

Sanskrit only: no published translation is held for this verse.

मायामेघो जगन्नीरं वर्षत्वेष यथा तथा । चिदाकाशस्य नो हानिर्न वा लाभ इति स्थितिः

māyāmegho jagannīraṃ varṣatveṣa yathā tathā | cidākāśasya no hānirna vā lābha iti sthitiḥ

Sanskrit only: no published translation is held for this verse.

इमं कूटस्थदीपं योऽनुसन्धत्ते निरन्तरम् । स्वयं कूटस्थरूपेण दीप्यतेऽसौ निरन्तरम्

imaṃ kūṭasthadīpaṃ yo'nusandhatte nirantaram | svayaṃ kūṭastharūpeṇa dīpyate'sau nirantaram

Sanskrit only: no published translation is held for this verse.