Padma Purāṇa 2.21

सूत उवाच- एकदा व्यास देवोऽसौ ब्रह्माणं जगतः पतिम् । सुव्रताख्यानकं सर्वं पप्रच्छातीव विस्मितः

sūta uvāca- ekadā vyāsa devo'sau brahmāṇaṃ jagataḥ patim | suvratākhyānakaṃ sarvaṃ papracchātīva vismitaḥ

Sanskrit only: no published translation is held for this verse.

व्यास उवाच- लोकात्मँल्लोकविन्यास देवदेव महाप्रभो । सुव्रतस्याथ चरितं श्रोतुमिच्छामि सांप्रतम्

vyāsa uvāca- lokātma~llokavinyāsa devadeva mahāprabho | suvratasyātha caritaṃ śrotumicchāmi sāṃpratam

Sanskrit only: no published translation is held for this verse.

ब्रह्मोवाच- पाराशर्यमहाभाग श्रूयतां पुण्यमुत्तमम् । सुव्रतस्य सुविप्रस्य तपश्चर्यासमन्वितम्

brahmovāca- pārāśaryamahābhāga śrūyatāṃ puṇyamuttamam | suvratasya suviprasya tapaścaryāsamanvitam

Sanskrit only: no published translation is held for this verse.

सुव्रतो नाम मेधावी बाल्यादपि स चिंतयन् । गर्भे नारायणं देवं दृष्टवान्पुरुषोत्तमम्

suvrato nāma medhāvī bālyādapi sa ciṃtayan | garbhe nārāyaṇaṃ devaṃ dṛṣṭavānpuruṣottamam

Sanskrit only: no published translation is held for this verse.

स पूर्वकर्माभ्यासेन हरेर्ध्यानं गतस्तदा । शंखचक्रधरं देवं पद्मनाभं सुपुण्यदम्

sa pūrvakarmābhyāsena harerdhyānaṃ gatastadā | śaṃkhacakradharaṃ devaṃ padmanābhaṃ supuṇyadam

Sanskrit only: no published translation is held for this verse.

ध्यायते चिंतयेत्सो हि गीते ज्ञाने प्रपाठने । एवं देवं हरिं ध्यायन्सदैव द्विजसत्तमः

dhyāyate ciṃtayetso hi gīte jñāne prapāṭhane | evaṃ devaṃ hariṃ dhyāyansadaiva dvijasattamaḥ

Sanskrit only: no published translation is held for this verse.

क्रीडत्येवं सदा डिंभैः सार्द्धं च बालकोत्तमः । बालकानां स्वकं नाम हरेश्चैव महात्मनः

krīḍatyevaṃ sadā ḍiṃbhaiḥ sārddhaṃ ca bālakottamaḥ | bālakānāṃ svakaṃ nāma hareścaiva mahātmanaḥ

Sanskrit only: no published translation is held for this verse.

चकार स हि मेधावी पुण्यात्मा पुण्यवत्सलः । समाह्वयति वै मित्रं हरेर्नाम्ना महामतिः

cakāra sa hi medhāvī puṇyātmā puṇyavatsalaḥ | samāhvayati vai mitraṃ harernāmnā mahāmatiḥ

Sanskrit only: no published translation is held for this verse.

भोभोः केशव एह्येहि एहि माधवचक्रधृक् । क्रीडस्व च मया सार्धं त्वमेव पुरुषोत्तम

bhobhoḥ keśava ehyehi ehi mādhavacakradhṛk | krīḍasva ca mayā sārdhaṃ tvameva puruṣottama

Sanskrit only: no published translation is held for this verse.

सममेवं प्रगंतव्यमावाभ्यां मधुसूदन । एवमेव समाह्वानं नामभिश्च हरेर्द्विजः

samamevaṃ pragaṃtavyamāvābhyāṃ madhusūdana | evameva samāhvānaṃ nāmabhiśca harerdvijaḥ

Sanskrit only: no published translation is held for this verse.

क्रीडने पठने हास्ये शयने गीतप्रेक्षणे । याने च ह्यासने ध्याने मंत्रे ज्ञाने सुकर्मसु

krīḍane paṭhane hāsye śayane gītaprekṣaṇe | yāne ca hyāsane dhyāne maṃtre jñāne sukarmasu

Sanskrit only: no published translation is held for this verse.

पश्यत्येवं वदत्येवं जगन्नाथं जनार्दनम् । स ध्यायते तमेकं हि विश्वनाथं महेश्वरम्

paśyatyevaṃ vadatyevaṃ jagannāthaṃ janārdanam | sa dhyāyate tamekaṃ hi viśvanāthaṃ maheśvaram

Sanskrit only: no published translation is held for this verse.

तृणे काष्ठे च पाषाणे शुष्के सार्द्रे हि केशवम् । पश्यत्येवं स धर्मात्मा गोविंदं कमलेक्षणम्

tṛṇe kāṣṭhe ca pāṣāṇe śuṣke sārdre hi keśavam | paśyatyevaṃ sa dharmātmā goviṃdaṃ kamalekṣaṇam

Sanskrit only: no published translation is held for this verse.

आकाशे भूमिमध्ये तु पर्वतेषु वनेषु च । जले स्थले च पाषाणे जीवेष्वेव महामतिः

ākāśe bhūmimadhye tu parvateṣu vaneṣu ca | jale sthale ca pāṣāṇe jīveṣveva mahāmatiḥ

Sanskrit only: no published translation is held for this verse.

नृसिंहं पश्यते विप्रः सुव्रतः सुमनासुतः । बालक्रीडां समासाद्य रमत्येवं दिनेदिने

nṛsiṃhaṃ paśyate vipraḥ suvrataḥ sumanāsutaḥ | bālakrīḍāṃ samāsādya ramatyevaṃ dinedine

Sanskrit only: no published translation is held for this verse.

गीतैश्च गायते कृष्णं सुरागैर्मधुराक्षरैः । तालैर्लयसमायुक्तैः सुस्वरैर्मूर्च्छनान्वितैः

gītaiśca gāyate kṛṣṇaṃ surāgairmadhurākṣaraiḥ | tālairlayasamāyuktaiḥ susvarairmūrcchanānvitaiḥ

Sanskrit only: no published translation is held for this verse.

सुव्रत उवाच- ध्यायंति वेदविदुषः सततं सुरारिं यस्यांगमध्ये सकलं हि विश्वम् । योगेश्वरं सकलपापविनाशनं च व्रजामि शरणं मधुसूदनस्य

suvrata uvāca- dhyāyaṃti vedaviduṣaḥ satataṃ surāriṃ yasyāṃgamadhye sakalaṃ hi viśvam | yogeśvaraṃ sakalapāpavināśanaṃ ca vrajāmi śaraṇaṃ madhusūdanasya

Sanskrit only: no published translation is held for this verse.

लोकेषु यो हि सकलेष्वनुवर्तते यो लोकाश्च यस्मिन्निवसंति सर्वे । दोषैर्विहीनमखिलैः परमेश्वरं तं तस्यैव पादयुगलं सततं नमामि

lokeṣu yo hi sakaleṣvanuvartate yo lokāśca yasminnivasaṃti sarve | doṣairvihīnamakhilaiḥ parameśvaraṃ taṃ tasyaiva pādayugalaṃ satataṃ namāmi

Sanskrit only: no published translation is held for this verse.

नारायणं गुणनिधानमनंतवीर्यं वेदांतशुद्धमतयः प्रपठंति नित्यम् । संसारसागरमनंतमगाधदुर्गमुत्तारणार्थमखिलं शरणं प्रपद्ये

nārāyaṇaṃ guṇanidhānamanaṃtavīryaṃ vedāṃtaśuddhamatayaḥ prapaṭhaṃti nityam | saṃsārasāgaramanaṃtamagādhadurgamuttāraṇārthamakhilaṃ śaraṇaṃ prapadye

Sanskrit only: no published translation is held for this verse.

योगींद्र मानससरोवरराजहंसं शुद्धं प्रभावमखिलं सततं हि यस्य । तस्यैव पादयुगलं विमलं विशालं दीनस्य मेऽसुररिपो कुरु तस्य रक्षाम्

yogīṃdra mānasasarovararājahaṃsaṃ śuddhaṃ prabhāvamakhilaṃ satataṃ hi yasya | tasyaiva pādayugalaṃ vimalaṃ viśālaṃ dīnasya me'suraripo kuru tasya rakṣām

Sanskrit only: no published translation is held for this verse.

ध्यायेऽखिलस्य भुवनं स्वपतिं च देवं दुःखांधकारदलनार्थमिहैव चंद्रम् । लोकस्य पालनकृते परिणीतधर्मं सत्यान्वितं सकललोकगुरुं सुरेशम्

dhyāye'khilasya bhuvanaṃ svapatiṃ ca devaṃ duḥkhāṃdhakāradalanārthamihaiva caṃdram | lokasya pālanakṛte pariṇītadharmaṃ satyānvitaṃ sakalalokaguruṃ sureśam

Sanskrit only: no published translation is held for this verse.

गायाम्यहं सुरसगीतकतालमानैः श्रीरंगमेकमनिशं भुवनस्य देवम् । अज्ञाननाशकमलं च दिनेशतुल्यमानंदकंदमखिलं महिमा समेतम्

gāyāmyahaṃ surasagītakatālamānaiḥ śrīraṃgamekamaniśaṃ bhuvanasya devam | ajñānanāśakamalaṃ ca dineśatulyamānaṃdakaṃdamakhilaṃ mahimā sametam

Sanskrit only: no published translation is held for this verse.

संपूर्णमेवममृतस्यकलानिधानं तं गीतकौशलमनन्यरसैः प्रगाये । युक्तं स्वयोगकरणैः परमार्थदृष्टिं विश्वं स पश्यति चराचरमेव नित्यम्

saṃpūrṇamevamamṛtasyakalānidhānaṃ taṃ gītakauśalamananyarasaiḥ pragāye | yuktaṃ svayogakaraṇaiḥ paramārthadṛṣṭiṃ viśvaṃ sa paśyati carācarameva nityam

Sanskrit only: no published translation is held for this verse.

पश्यंति नैव यमिहाथ सुपापलोकास्तं केशवं शरणमेवमुपैति नित्यम्

paśyaṃti naiva yamihātha supāpalokāstaṃ keśavaṃ śaraṇamevamupaiti nityam

Sanskrit only: no published translation is held for this verse.

कराभ्यां वाद्यमानस्तु तालं तालसमन्वितम् । गीतेनगायते कृष्णं बालकैः सह मोदते

karābhyāṃ vādyamānastu tālaṃ tālasamanvitam | gītenagāyate kṛṣṇaṃ bālakaiḥ saha modate

Sanskrit only: no published translation is held for this verse.

एवं क्रीडारतो नित्यं बालभावेन वै तदा । सुव्रतः सुमनापुत्रो विष्णुध्यानपरायणः

evaṃ krīḍārato nityaṃ bālabhāvena vai tadā | suvrataḥ sumanāputro viṣṇudhyānaparāyaṇaḥ

Sanskrit only: no published translation is held for this verse.

क्रीडमानं प्राह माता सुव्रतं चारुलक्षणम् । भोजनं कुरु मे वत्स क्षुधा त्वां परिपीडयेत्

krīḍamānaṃ prāha mātā suvrataṃ cārulakṣaṇam | bhojanaṃ kuru me vatsa kṣudhā tvāṃ paripīḍayet

Sanskrit only: no published translation is held for this verse.

तामुवाच पुनः प्राज्ञः सुमना मातरं पुनः । महामृतेन तृप्तोस्मि हरिध्यानरसेन वै

tāmuvāca punaḥ prājñaḥ sumanā mātaraṃ punaḥ | mahāmṛtena tṛptosmi haridhyānarasena vai

Sanskrit only: no published translation is held for this verse.

भोजनासनमारूढो मिष्टमन्नं प्रपश्यति । इदमन्नं स्वयं विष्णुरात्मा ह्यन्नं समाश्रितः

bhojanāsanamārūḍho miṣṭamannaṃ prapaśyati | idamannaṃ svayaṃ viṣṇurātmā hyannaṃ samāśritaḥ

Sanskrit only: no published translation is held for this verse.

आत्मरूपेण यो विष्णुरनेनान्नेन तृप्यतु । क्षीरसागरसंवासो यस्यैव परिसंस्थितः

ātmarūpeṇa yo viṣṇuranenānnena tṛpyatu | kṣīrasāgarasaṃvāso yasyaiva parisaṃsthitaḥ

Sanskrit only: no published translation is held for this verse.

जलेनानेन पुण्येन तृप्तिमायातु केशवः । तांबूलचंदनैर्गंधैरेभिः पुष्पैर्मनोहरैः

jalenānena puṇyena tṛptimāyātu keśavaḥ | tāṃbūlacaṃdanairgaṃdhairebhiḥ puṣpairmanoharaiḥ

Sanskrit only: no published translation is held for this verse.

आत्मस्वरूपेण तृप्तस्तृप्तिमायातु केशवः । शयने याति धर्मात्मा तदा कृष्णं प्रचिंतयेत्

ātmasvarūpeṇa tṛptastṛptimāyātu keśavaḥ | śayane yāti dharmātmā tadā kṛṣṇaṃ praciṃtayet

Sanskrit only: no published translation is held for this verse.

योगनिद्रान्वितं कृष्णं तमहं शरणं गतः । भोजनाच्छादनेष्वेवमासने शयने द्विजः

yoganidrānvitaṃ kṛṣṇaṃ tamahaṃ śaraṇaṃ gataḥ | bhojanācchādaneṣvevamāsane śayane dvijaḥ

Sanskrit only: no published translation is held for this verse.

चिंतयेद्वासुदेवं तं तस्मै सर्वं प्रकल्पयेत् । तारुण्यं प्राप्य धर्मात्मा कामभोगान्विहाय वै

ciṃtayedvāsudevaṃ taṃ tasmai sarvaṃ prakalpayet | tāruṇyaṃ prāpya dharmātmā kāmabhogānvihāya vai

Sanskrit only: no published translation is held for this verse.

स युक्तः केशवध्याने वैडूर्यपर्वतोत्तमे । यत्र सिद्धेश्वरं लिंगं वैष्णवं पापनाशनम्

sa yuktaḥ keśavadhyāne vaiḍūryaparvatottame | yatra siddheśvaraṃ liṃgaṃ vaiṣṇavaṃ pāpanāśanam

Sanskrit only: no published translation is held for this verse.

रुद्रमोंकारसंज्ञं च ध्यात्वा चैव महेश्वरम् । ब्रह्मणा वर्द्धितं देवं नर्मदादक्षिणे तटे

rudramoṃkārasaṃjñaṃ ca dhyātvā caiva maheśvaram | brahmaṇā varddhitaṃ devaṃ narmadādakṣiṇe taṭe

Sanskrit only: no published translation is held for this verse.

सिद्धेश्वरं समाश्रित्य तपोभावं व्यचिंतयत्

siddheśvaraṃ samāśritya tapobhāvaṃ vyaciṃtayat

Sanskrit only: no published translation is held for this verse.