Padma Purāṇa 2.26

सूत उवाच- तं पुत्रं निहतं श्रुत्वा सा दितिर्दुःखपीडिता । पुत्रशोकेन तेनैव संदग्धा द्विजसत्तमाः

sūta uvāca- taṃ putraṃ nihataṃ śrutvā sā ditirduḥkhapīḍitā | putraśokena tenaiva saṃdagdhā dvijasattamāḥ

Sanskrit only: no published translation is held for this verse.

पुनरूचे महात्मानं कश्यपं मुनिपुंगवम् । इंद्रस्यापि सुदुष्टस्य वधार्थं द्विजसत्तम

punarūce mahātmānaṃ kaśyapaṃ munipuṃgavam | iṃdrasyāpi suduṣṭasya vadhārthaṃ dvijasattama

Sanskrit only: no published translation is held for this verse.

ब्रह्मतेजोमयं तीव्रं दुःसहं सर्वदैवतैः । पुत्रैकं दीयतां कांत सुप्रियाहं यदा विभो

brahmatejomayaṃ tīvraṃ duḥsahaṃ sarvadaivataiḥ | putraikaṃ dīyatāṃ kāṃta supriyāhaṃ yadā vibho

Sanskrit only: no published translation is held for this verse.

कश्यप उवाच- निहतौ बलवृत्रौ च मम पुत्रौ महाबलौ । अघमाश्रित्य देवेन इंद्रेणापि दुरात्मना

kaśyapa uvāca- nihatau balavṛtrau ca mama putrau mahābalau | aghamāśritya devena iṃdreṇāpi durātmanā

Sanskrit only: no published translation is held for this verse.

तस्यैव च वधार्थाय पुत्रमेकं ददाम्यहम् । वर्षाणां तु शतैकं त्वं शुचिर्भव यशस्विनि

tasyaiva ca vadhārthāya putramekaṃ dadāmyaham | varṣāṇāṃ tu śataikaṃ tvaṃ śucirbhava yaśasvini

Sanskrit only: no published translation is held for this verse.

एवमुक्त्वा स योगींद्रो हस्तं शिरसि वै तदा । दत्त्वादित्या सहैवासौ गतो मेरुं तपोवनम्

evamuktvā sa yogīṃdro hastaṃ śirasi vai tadā | dattvādityā sahaivāsau gato meruṃ tapovanam

Sanskrit only: no published translation is held for this verse.

तपस्तताप सा देवी तपोवननिवासिनी । शुचिष्मती सदा भूत्वा पुत्रार्था द्विजसत्तम

tapastatāpa sā devī tapovananivāsinī | śuciṣmatī sadā bhūtvā putrārthā dvijasattama

Sanskrit only: no published translation is held for this verse.

ततो देवः सहस्राक्षो ज्ञात्वा उद्यममेव च । दित्याश्चैव महाभाग अंतरप्रेक्षकोऽभवत्

tato devaḥ sahasrākṣo jñātvā udyamameva ca | dityāścaiva mahābhāga aṃtaraprekṣako'bhavat

Sanskrit only: no published translation is held for this verse.

पंचविंशाब्दिको भूत्वा देवराड्दैवतोपमः । ब्राह्मणस्य च रूपेण तस्याश्चांतिकमागतः

paṃcaviṃśābdiko bhūtvā devarāḍdaivatopamaḥ | brāhmaṇasya ca rūpeṇa tasyāścāṃtikamāgataḥ

Sanskrit only: no published translation is held for this verse.

स तां प्रणम्य धर्मात्मा मातरं तपसान्विताम् । तयोक्तस्तु सहस्राक्षो भवान्को द्विजसत्तम

sa tāṃ praṇamya dharmātmā mātaraṃ tapasānvitām | tayoktastu sahasrākṣo bhavānko dvijasattama

Sanskrit only: no published translation is held for this verse.

तामुवाच सहस्राक्षः पुत्रोऽहं तव शोभने । ब्राह्मणो वेदविद्वांश्च धर्मं जानामि भामिनि

tāmuvāca sahasrākṣaḥ putro'haṃ tava śobhane | brāhmaṇo vedavidvāṃśca dharmaṃ jānāmi bhāmini

Sanskrit only: no published translation is held for this verse.

तपसस्तव साहाय्यं करिष्ये नात्र संशयः । शुश्रूषति स तां देवीं मातरं तपसान्विताम्

tapasastava sāhāyyaṃ kariṣye nātra saṃśayaḥ | śuśrūṣati sa tāṃ devīṃ mātaraṃ tapasānvitām

Sanskrit only: no published translation is held for this verse.

तमिंद्रं सा न जानाति आगतं दुष्टकारिणम् । धर्मपुत्रं विजानाति शुश्रूषंतं दिने दिने

tamiṃdraṃ sā na jānāti āgataṃ duṣṭakāriṇam | dharmaputraṃ vijānāti śuśrūṣaṃtaṃ dine dine

Sanskrit only: no published translation is held for this verse.

अंगं संवाहयेद्देव्याः पादौ प्रक्षालयेत्ततः । पत्रं मूलं फलं तत्र वल्कलाजिनमेव च

aṃgaṃ saṃvāhayeddevyāḥ pādau prakṣālayettataḥ | patraṃ mūlaṃ phalaṃ tatra valkalājinameva ca

Sanskrit only: no published translation is held for this verse.

ददात्येवं स धर्मात्मा तस्यै दित्यै सदैव हि । भक्त्या संतोषिता तस्य संतुष्टा तमभाषत

dadātyevaṃ sa dharmātmā tasyai dityai sadaiva hi | bhaktyā saṃtoṣitā tasya saṃtuṣṭā tamabhāṣata

Sanskrit only: no published translation is held for this verse.

पुत्रे जाते महापुण्ये इंद्रे च निहते सति । कुरु राज्यं महाभाग पुत्रेण मम दैवकम्

putre jāte mahāpuṇye iṃdre ca nihate sati | kuru rājyaṃ mahābhāga putreṇa mama daivakam

Sanskrit only: no published translation is held for this verse.

एवमस्तु महाभागे ते प्रसादाद्भविष्यति । तस्याश्चैवांतरं प्रेप्सुरभवत्पाकशासनः

evamastu mahābhāge te prasādādbhaviṣyati | tasyāścaivāṃtaraṃ prepsurabhavatpākaśāsanaḥ

Sanskrit only: no published translation is held for this verse.

ऊने वर्षशते चास्या ददर्शांतरमच्युतः । अकृत्वा पादयोः शौचं दितिः शयनमाविशत्

ūne varṣaśate cāsyā dadarśāṃtaramacyutaḥ | akṛtvā pādayoḥ śaucaṃ ditiḥ śayanamāviśat

Sanskrit only: no published translation is held for this verse.

शय्यांते सा शिरः कृत्वा मुक्तकेशातिविह्वला । निद्रामाहारयामास तस्याः कुक्षिं प्रविश्य ह

śayyāṃte sā śiraḥ kṛtvā muktakeśātivihvalā | nidrāmāhārayāmāsa tasyāḥ kukṣiṃ praviśya ha

Sanskrit only: no published translation is held for this verse.

वज्रपाणिस्ततो गर्भं सप्तधा तं न्यकृंतत । वज्रेण तीक्ष्णधारेण रुरोद उदरे स्थितः

vajrapāṇistato garbhaṃ saptadhā taṃ nyakṛṃtata | vajreṇa tīkṣṇadhāreṇa ruroda udare sthitaḥ

Sanskrit only: no published translation is held for this verse.

स गर्भस्तत्र विप्रेंद्रा इंद्रहस्तगतेन वै । रोदमानं महागर्भं तमुवाच पुनः पुनः

sa garbhastatra vipreṃdrā iṃdrahastagatena vai | rodamānaṃ mahāgarbhaṃ tamuvāca punaḥ punaḥ

Sanskrit only: no published translation is held for this verse.

शतक्रतुर्महातेजा मा रोदीरित्यभाषत । सप्तधा कृतवाञ्छक्रस्तं गर्भं दितिजं पुनः

śatakraturmahātejā mā rodīrityabhāṣata | saptadhā kṛtavāñchakrastaṃ garbhaṃ ditijaṃ punaḥ

Sanskrit only: no published translation is held for this verse.

एकैकं सप्तधा च्छित्त्वा रुदमानं स देवराट् । एवं वै मरुतो जातास्ते तु देवा महौजसः

ekaikaṃ saptadhā cchittvā rudamānaṃ sa devarāṭ | evaṃ vai maruto jātāste tu devā mahaujasaḥ

Sanskrit only: no published translation is held for this verse.

यथा इंद्रेण ते प्रोक्ता बभूवुर्नामभिस्ततः । अतिवीर्य महाकायास्तीव्र तेजः पराक्रमाः

yathā iṃdreṇa te proktā babhūvurnāmabhistataḥ | ativīrya mahākāyāstīvra tejaḥ parākramāḥ

Sanskrit only: no published translation is held for this verse.

एकोना वै बभूवुस्ते पंचाशन्मरुतस्ततः । मरुतो नाम ते ख्याता इंद्रमेव समाश्रिताः

ekonā vai babhūvuste paṃcāśanmarutastataḥ | maruto nāma te khyātā iṃdrameva samāśritāḥ

Sanskrit only: no published translation is held for this verse.

भूतानामेव सर्वेषां रोचयंति गणं महत् । निकायेषु निकायेषु हरिः प्रादात्प्रजापतिः

bhūtānāmeva sarveṣāṃ rocayaṃti gaṇaṃ mahat | nikāyeṣu nikāyeṣu hariḥ prādātprajāpatiḥ

Sanskrit only: no published translation is held for this verse.

क्रमशस्तानि राज्यानि पृथुपूर्वाणि तानि वै । स देवः पुरुषः कृष्णः सर्वव्यापी जगद्गुरुः

kramaśastāni rājyāni pṛthupūrvāṇi tāni vai | sa devaḥ puruṣaḥ kṛṣṇaḥ sarvavyāpī jagadguruḥ

Sanskrit only: no published translation is held for this verse.

तपोजिष्णुर्महातेजाः सर्व एकः प्रजापतिः । पर्जन्यः पावकः पुण्यः सर्वात्मा सर्व एव हि

tapojiṣṇurmahātejāḥ sarva ekaḥ prajāpatiḥ | parjanyaḥ pāvakaḥ puṇyaḥ sarvātmā sarva eva hi

Sanskrit only: no published translation is held for this verse.

तस्य सर्वमिदं पुण्यं जगत्स्थावरजंगमम् । भूतसर्गमिमं सम्यग्जानतो द्विजसत्तम

tasya sarvamidaṃ puṇyaṃ jagatsthāvarajaṃgamam | bhūtasargamimaṃ samyagjānato dvijasattama

Sanskrit only: no published translation is held for this verse.

नावृत्तिभयमस्तीह परलोकभयं कुतः । इमां सृष्टिं महापुण्यां सर्वपापहरां शुभाम्

nāvṛttibhayamastīha paralokabhayaṃ kutaḥ | imāṃ sṛṣṭiṃ mahāpuṇyāṃ sarvapāpaharāṃ śubhām

Sanskrit only: no published translation is held for this verse.

यः शृणोति नरो भक्त्या सर्वपापैः प्रमुच्यते । स हि धन्यश्च पुण्यश्च स हि सत्यसमन्वितः

yaḥ śṛṇoti naro bhaktyā sarvapāpaiḥ pramucyate | sa hi dhanyaśca puṇyaśca sa hi satyasamanvitaḥ

Sanskrit only: no published translation is held for this verse.

यः शृणोति इमां सृष्टिं स याति परमां गतिम् । सर्वपापविशुद्धात्मा विष्णुलोकं स गच्छति

yaḥ śṛṇoti imāṃ sṛṣṭiṃ sa yāti paramāṃ gatim | sarvapāpaviśuddhātmā viṣṇulokaṃ sa gacchati

Sanskrit only: no published translation is held for this verse.