Library·Padma Purāṇa·2·2.36
सुनीथोवाच- सत्यमुक्तं त्वया भद्रे एवमेतत्करोम्यहम् । अनया विद्यया विप्रं मोहयिष्यामि नान्यथा
sunīthovāca- satyamuktaṃ tvayā bhadre evametatkaromyaham | anayā vidyayā vipraṃ mohayiṣyāmi nānyathā
Sanskrit only: no published translation is held for this verse.
साहाय्यं देहि मे पुण्यं येन गच्छामि सांप्रतम् । एवमुक्ता तया रंभा तामुवाच मनस्विनीम्
sāhāyyaṃ dehi me puṇyaṃ yena gacchāmi sāṃpratam | evamuktā tayā raṃbhā tāmuvāca manasvinīm
Sanskrit only: no published translation is held for this verse.
कीदृग्ददामि साहाय्यं तत्त्वं कथय भामिनि । दूतत्वं गच्छ मे भद्रे एतं प्रति सुसांप्रतम्
kīdṛgdadāmi sāhāyyaṃ tattvaṃ kathaya bhāmini | dūtatvaṃ gaccha me bhadre etaṃ prati susāṃpratam
Sanskrit only: no published translation is held for this verse.
एवमुक्तं तया तां तु रंभां प्रति सुलोचनाम् । एवमेव प्रतिज्ञातं रंभया देवयोषिता
evamuktaṃ tayā tāṃ tu raṃbhāṃ prati sulocanām | evameva pratijñātaṃ raṃbhayā devayoṣitā
Sanskrit only: no published translation is held for this verse.
करिष्ये तव साहाय्यमादेशो मम दीयताम् । सद्भावेन विशालाक्षी रूपयौवनशालिनी
kariṣye tava sāhāyyamādeśo mama dīyatām | sadbhāvena viśālākṣī rūpayauvanaśālinī
Sanskrit only: no published translation is held for this verse.
मायया दिव्यरूपा सा संबभूव वरानना । रूपेणाप्रतिमालोके मोहयंती जगत्त्रयम्
māyayā divyarūpā sā saṃbabhūva varānanā | rūpeṇāpratimāloke mohayaṃtī jagattrayam
Sanskrit only: no published translation is held for this verse.
मेरोश्चैव महापुण्ये शिखरे चारुकंदरे । नानाधातुसमाकीर्णे नानारत्नोपशोभिते
meroścaiva mahāpuṇye śikhare cārukaṃdare | nānādhātusamākīrṇe nānāratnopaśobhite
Sanskrit only: no published translation is held for this verse.
देववृक्षैः समाकीर्णे बहुपुष्पोपशोभिते । देववृंदसमाकीर्णे गंधर्वाप्सरसेविते
devavṛkṣaiḥ samākīrṇe bahupuṣpopaśobhite | devavṛṃdasamākīrṇe gaṃdharvāpsarasevite
Sanskrit only: no published translation is held for this verse.
मनोहरे सुरम्ये च शीतच्छायासमाकुले । चंदनानामशोकानां तरूणां चारुहासिनी
manohare suramye ca śītacchāyāsamākule | caṃdanānāmaśokānāṃ tarūṇāṃ cāruhāsinī
Sanskrit only: no published translation is held for this verse.
दोलायां सा समारूढा सर्वशृङ्गारशोभिता । कौशेयेन सुनीलेन राजमाना वरानना
dolāyāṃ sā samārūḍhā sarvaśṛṅgāraśobhitā | kauśeyena sunīlena rājamānā varānanā
Sanskrit only: no published translation is held for this verse.
बंधूकपुष्पवर्णेन कंचुकेन द्विजोत्तम । सर्वांगसुंदरी बाला वीणातालकराविला
baṃdhūkapuṣpavarṇena kaṃcukena dvijottama | sarvāṃgasuṃdarī bālā vīṇātālakarāvilā
Sanskrit only: no published translation is held for this verse.
गायमाना वरं गीतं सुस्वरं विश्वमोहनम् । ताभिः परिवृता बाला सखीभिः सुमनोहरा
gāyamānā varaṃ gītaṃ susvaraṃ viśvamohanam | tābhiḥ parivṛtā bālā sakhībhiḥ sumanoharā
Sanskrit only: no published translation is held for this verse.
अंगस्तु कंदरे पुण्ये एकांते ध्यानमास्थितः । कामक्रोधविहीनस्तु ध्यायमानो जनार्दनम्
aṃgastu kaṃdare puṇye ekāṃte dhyānamāsthitaḥ | kāmakrodhavihīnastu dhyāyamāno janārdanam
Sanskrit only: no published translation is held for this verse.
स श्रुत्वा सुस्वरं गीतं मधुरं सुमनोहरम् । तालमानक्रियोपेतं सर्वसत्वविकर्षणम्
sa śrutvā susvaraṃ gītaṃ madhuraṃ sumanoharam | tālamānakriyopetaṃ sarvasatvavikarṣaṇam
Sanskrit only: no published translation is held for this verse.
ध्यानाच्चचाल तेजस्वी मायागीतेन मोहितः । समुत्थायासनात्तूर्णं वीक्षमाणो मुहुर्मुहुः
dhyānāccacāla tejasvī māyāgītena mohitaḥ | samutthāyāsanāttūrṇaṃ vīkṣamāṇo muhurmuhuḥ
Sanskrit only: no published translation is held for this verse.
जगाम तत्र वेगेन मायाचलितमानसः । दोलासंस्थां विलोक्यैव वीणादंडकराविलाम्
jagāma tatra vegena māyācalitamānasaḥ | dolāsaṃsthāṃ vilokyaiva vīṇādaṃḍakarāvilām
Sanskrit only: no published translation is held for this verse.
हसमानां सुगायंतीं पूर्णचंद्रनिभाननाम् । मोहितस्तेन गीतेन रूपेणापि महायशाः
hasamānāṃ sugāyaṃtīṃ pūrṇacaṃdranibhānanām | mohitastena gītena rūpeṇāpi mahāyaśāḥ
Sanskrit only: no published translation is held for this verse.
तस्या लावण्यभावेन मन्मथस्य शराहतः । आकुलव्याकुलज्ञान ऋषिपुत्रो द्विजोत्तमः
tasyā lāvaṇyabhāvena manmathasya śarāhataḥ | ākulavyākulajñāna ṛṣiputro dvijottamaḥ
Sanskrit only: no published translation is held for this verse.
प्रलपत्यतिमोहेन जृंभते च पुनः पुनः । स्वेदः कंपोथ संतापस्तस्याजायत तत्क्षणात्
pralapatyatimohena jṛṃbhate ca punaḥ punaḥ | svedaḥ kaṃpotha saṃtāpastasyājāyata tatkṣaṇāt
Sanskrit only: no published translation is held for this verse.
मुह्यन्निव महामोहैर्ग्लानश्चलितमानसः । वेपमानस्ततस्त्वंगो दूयमानः समागतः
muhyanniva mahāmohairglānaścalitamānasaḥ | vepamānastatastvaṃgo dūyamānaḥ samāgataḥ
Sanskrit only: no published translation is held for this verse.
तामालोक्य विशालाक्षीं मृत्युकन्यां यशस्विनीम् । अथोवाच महात्मा स सुनीथां चारुहासिनीम्
tāmālokya viśālākṣīṃ mṛtyukanyāṃ yaśasvinīm | athovāca mahātmā sa sunīthāṃ cāruhāsinīm
Sanskrit only: no published translation is held for this verse.
का त्वं कस्य वरारोहे सखीभिः परिवारिता । केन कार्येण संप्राप्ता केन त्वं प्रेषिता वनम्
kā tvaṃ kasya varārohe sakhībhiḥ parivāritā | kena kāryeṇa saṃprāptā kena tvaṃ preṣitā vanam
Sanskrit only: no published translation is held for this verse.
तवांगं सुंदरं सर्वमत्र भाति महावने । समाचक्ष्व ममाद्यैव प्रसादसुमुखी भव
tavāṃgaṃ suṃdaraṃ sarvamatra bhāti mahāvane | samācakṣva mamādyaiva prasādasumukhī bhava
Sanskrit only: no published translation is held for this verse.
मायामोहेन संमुग्धस्तस्याः कर्म न विंदति । मार्गणैर्मन्मथस्यापि परिविद्धो महामुनिः
māyāmohena saṃmugdhastasyāḥ karma na viṃdati | mārgaṇairmanmathasyāpi parividdho mahāmuniḥ
Sanskrit only: no published translation is held for this verse.
एवंविधं महद्वाक्यं समाकर्ण्य महामतेः । नोवाच किंचित्सा विप्रं समालोक्य सखीमुखम्
evaṃvidhaṃ mahadvākyaṃ samākarṇya mahāmateḥ | novāca kiṃcitsā vipraṃ samālokya sakhīmukham
Sanskrit only: no published translation is held for this verse.
रंभां च प्रेरयामास सुनीथा संज्ञया सखीम् । समुवाच ततो रंभा सादरं तं द्विजं प्रति
raṃbhāṃ ca prerayāmāsa sunīthā saṃjñayā sakhīm | samuvāca tato raṃbhā sādaraṃ taṃ dvijaṃ prati
Sanskrit only: no published translation is held for this verse.
इयं कन्या महाभागा मृत्योश्चापि महात्मनः । सुनीथाख्या प्रसिद्धेयं सर्वलक्षणसंपदा
iyaṃ kanyā mahābhāgā mṛtyoścāpi mahātmanaḥ | sunīthākhyā prasiddheyaṃ sarvalakṣaṇasaṃpadā
Sanskrit only: no published translation is held for this verse.
पतिमन्विच्छती बाला धर्मवंतं तपोनिधिम् । शांतं दांतं महाप्राज्ञं वेदविद्याविशारदम्
patimanvicchatī bālā dharmavaṃtaṃ taponidhim | śāṃtaṃ dāṃtaṃ mahāprājñaṃ vedavidyāviśāradam
Sanskrit only: no published translation is held for this verse.
एवंविधं महद्वाक्यं समाकर्ण्य महामुनिः । तामुवाच ततस्त्वंगो रंभामप्सरसां वराम्
evaṃvidhaṃ mahadvākyaṃ samākarṇya mahāmuniḥ | tāmuvāca tatastvaṃgo raṃbhāmapsarasāṃ varām
Sanskrit only: no published translation is held for this verse.
मया चाराधितो विष्णुः सर्वविश्वमयो हरिः । तेन दत्तो वरो मह्यं पुत्राख्यः सर्वसिद्धिदः
mayā cārādhito viṣṇuḥ sarvaviśvamayo hariḥ | tena datto varo mahyaṃ putrākhyaḥ sarvasiddhidaḥ
Sanskrit only: no published translation is held for this verse.
तन्निमित्तमहं भद्रे सुतार्थं नित्यमेव च । कस्यचित्पुण्यवीर्यस्य कन्यामेकां प्रचिंतये
tannimittamahaṃ bhadre sutārthaṃ nityameva ca | kasyacitpuṇyavīryasya kanyāmekāṃ praciṃtaye
Sanskrit only: no published translation is held for this verse.
सदैवाहं न पश्यामि सुभार्यां सत्यमीदृशीम् । इयं धर्मस्य वै कन्या धर्माचारा वरानना
sadaivāhaṃ na paśyāmi subhāryāṃ satyamīdṛśīm | iyaṃ dharmasya vai kanyā dharmācārā varānanā
Sanskrit only: no published translation is held for this verse.
मामेवं हि भजत्वेषा यदि कान्तमिहेच्छति । यं यमिच्छेदियं बाला तं ददामि न संशयः
māmevaṃ hi bhajatveṣā yadi kāntamihecchati | yaṃ yamicchediyaṃ bālā taṃ dadāmi na saṃśayaḥ
Sanskrit only: no published translation is held for this verse.
अदेयं देयमित्याह अस्याः संगमकारणात् । एकमेवं त्वया देयं श्रूयतां द्विजसत्तम
adeyaṃ deyamityāha asyāḥ saṃgamakāraṇāt | ekamevaṃ tvayā deyaṃ śrūyatāṃ dvijasattama
Sanskrit only: no published translation is held for this verse.
रंभोवाच- विप्रेंद्र त्वं शृणुष्वेह प्रतिज्ञां वच्मि सांप्रतम् । एषा नैव त्वया त्याज्या धर्मपत्नी तवैव हि
raṃbhovāca- vipreṃdra tvaṃ śṛṇuṣveha pratijñāṃ vacmi sāṃpratam | eṣā naiva tvayā tyājyā dharmapatnī tavaiva hi
Sanskrit only: no published translation is held for this verse.
अस्या दोषो गुणो नैव ग्राह्य एव त्वया कदा । इत्यर्थे प्रत्ययं विप्र प्रत्यक्षं परिदर्शय
asyā doṣo guṇo naiva grāhya eva tvayā kadā | ityarthe pratyayaṃ vipra pratyakṣaṃ paridarśaya
Sanskrit only: no published translation is held for this verse.
स्वहस्तं देहि विप्रेंद्र सत्यप्रत्ययकारकम् । एवमस्तु मया दत्तो ह्यस्या हस्तो न संशयः
svahastaṃ dehi vipreṃdra satyapratyayakārakam | evamastu mayā datto hyasyā hasto na saṃśayaḥ
Sanskrit only: no published translation is held for this verse.
सूत उवाच- एवं संबधिकं कृत्वा सत्यप्रत्ययकारकम् । गांधर्वेण विवाहेन सुनीथामुपयेमिवान्
sūta uvāca- evaṃ saṃbadhikaṃ kṛtvā satyapratyayakārakam | gāṃdharveṇa vivāhena sunīthāmupayemivān
Sanskrit only: no published translation is held for this verse.
तस्मै दत्वा सुनीथां तां रंभा हृष्टेन चेतसा । सा तां चामंत्रयित्वा वै गता गेहं स्वकं पुनः
tasmai datvā sunīthāṃ tāṃ raṃbhā hṛṣṭena cetasā | sā tāṃ cāmaṃtrayitvā vai gatā gehaṃ svakaṃ punaḥ
Sanskrit only: no published translation is held for this verse.
प्रहृष्टचेतसः सख्यः स्वस्थानं परिजग्मिरे । गतासु तासु सर्वासु सखीषु द्विजसत्तमः
prahṛṣṭacetasaḥ sakhyaḥ svasthānaṃ parijagmire | gatāsu tāsu sarvāsu sakhīṣu dvijasattamaḥ
Sanskrit only: no published translation is held for this verse.
रेमे त्वंगस्तया सार्धं प्रियया भार्यया सह । तस्यामुत्पाद्य तनयं सर्वलक्षणसंयुतम्
reme tvaṃgastayā sārdhaṃ priyayā bhāryayā saha | tasyāmutpādya tanayaṃ sarvalakṣaṇasaṃyutam
Sanskrit only: no published translation is held for this verse.
चकार नाम तस्यैव वेनाख्यं तनयस्य हि । ववृधे स महातेजाः सुनीथातनयस्तदा
cakāra nāma tasyaiva venākhyaṃ tanayasya hi | vavṛdhe sa mahātejāḥ sunīthātanayastadā
Sanskrit only: no published translation is held for this verse.
वेदशास्त्रमधीत्यैव धनुर्वेदं गुणान्वितम् । सर्वासामपि मेधावी विद्यानां पारमेयिवान्
vedaśāstramadhītyaiva dhanurvedaṃ guṇānvitam | sarvāsāmapi medhāvī vidyānāṃ pārameyivān
Sanskrit only: no published translation is held for this verse.
अंगस्य तनयो वेनः शिष्टाचारेण वर्तते । स वेनो ब्राह्मणश्रेष्ठः क्षत्त्राचारपरोऽभवत्
aṃgasya tanayo venaḥ śiṣṭācāreṇa vartate | sa veno brāhmaṇaśreṣṭhaḥ kṣattrācāraparo'bhavat
Sanskrit only: no published translation is held for this verse.
दिवि चेंद्रो यथा भाति सर्वतेजःसमन्वितः । भात्येवं तु महाप्राज्ञः स्वबलेन पराक्रमैः
divi ceṃdro yathā bhāti sarvatejaḥsamanvitaḥ | bhātyevaṃ tu mahāprājñaḥ svabalena parākramaiḥ
Sanskrit only: no published translation is held for this verse.
चाक्षुषस्यांतरे प्राप्ते वैवस्वतसमागते । प्रजापालं विना लोके प्रजाः सीदंति सर्वदा
cākṣuṣasyāṃtare prāpte vaivasvatasamāgate | prajāpālaṃ vinā loke prajāḥ sīdaṃti sarvadā
Sanskrit only: no published translation is held for this verse.
ऋषयो धर्मतत्त्वज्ञाः प्रजाहेतोस्तपोधनाः । व्यचिंतयन्महीपालं धर्मज्ञं सत्यपंडितम्
ṛṣayo dharmatattvajñāḥ prajāhetostapodhanāḥ | vyaciṃtayanmahīpālaṃ dharmajñaṃ satyapaṃḍitam
Sanskrit only: no published translation is held for this verse.
तं वेनमेव ददृशुः संपन्नं लक्षणैर्युतम् । प्राजापत्ये पदे पुण्ये अभ्यषिंचन्द्विजोत्तमाः
taṃ venameva dadṛśuḥ saṃpannaṃ lakṣaṇairyutam | prājāpatye pade puṇye abhyaṣiṃcandvijottamāḥ
Sanskrit only: no published translation is held for this verse.
अभिषिक्ते महाभागे त्वंगपुत्रे तदा नृपे । ते प्रजापतयः सर्वे जग्मुश्चैव तपोवनम्
abhiṣikte mahābhāge tvaṃgaputre tadā nṛpe | te prajāpatayaḥ sarve jagmuścaiva tapovanam
Sanskrit only: no published translation is held for this verse.
गतेषु तेषु सर्वेषु वेनो राज्यमकारयत् । सूत उवाच- सा सुनीथा सुतं दृष्ट्वा सर्वराज्यप्रसाधकम्
gateṣu teṣu sarveṣu veno rājyamakārayat | sūta uvāca- sā sunīthā sutaṃ dṛṣṭvā sarvarājyaprasādhakam
Sanskrit only: no published translation is held for this verse.
विशंकते प्रभावेण शापात्तस्य महात्मनः । मम पुत्रो महाभागो धर्मत्राता भविष्यति
viśaṃkate prabhāveṇa śāpāttasya mahātmanaḥ | mama putro mahābhāgo dharmatrātā bhaviṣyati
Sanskrit only: no published translation is held for this verse.
इत्येवं चिंतयेन्नित्यं पूर्वपापाद्विशंकिता । धर्मांगानि सुपुण्यानि सुताग्रे परिदर्शयेत्
ityevaṃ ciṃtayennityaṃ pūrvapāpādviśaṃkitā | dharmāṃgāni supuṇyāni sutāgre paridarśayet
Sanskrit only: no published translation is held for this verse.
सत्यभावादि कान्पुण्यान्गुणान्सा वै प्रकाशयेत् । इत्युवाच सुतं सा हि अहं धर्मसुता सुत
satyabhāvādi kānpuṇyānguṇānsā vai prakāśayet | ityuvāca sutaṃ sā hi ahaṃ dharmasutā suta
Sanskrit only: no published translation is held for this verse.
पिता ते धर्मतत्त्वज्ञस्तस्माद्धर्मं समाचर । इत्येवं बोधयेन्नित्यं पुत्रं वेनं तदा सती
pitā te dharmatattvajñastasmāddharmaṃ samācara | ityevaṃ bodhayennityaṃ putraṃ venaṃ tadā satī
Sanskrit only: no published translation is held for this verse.
मातापित्रोस्तयोर्वाक्यं प्रजायुक्तं प्रपालयेत् । एवं वेनः प्रजापालः संजातःक्षितिमंडले
mātāpitrostayorvākyaṃ prajāyuktaṃ prapālayet | evaṃ venaḥ prajāpālaḥ saṃjātaḥkṣitimaṃḍale
Sanskrit only: no published translation is held for this verse.
सुखेन जीवते लोकःप्रजाधर्मेणरंजिताः । एवं राज्यप्रभावं तु वेनस्यापि महात्मनः
sukhena jīvate lokaḥprajādharmeṇaraṃjitāḥ | evaṃ rājyaprabhāvaṃ tu venasyāpi mahātmanaḥ
Sanskrit only: no published translation is held for this verse.
धर्मभावाः प्रवर्तंते तस्मिञ्छासति पार्थिवे
dharmabhāvāḥ pravartaṃte tasmiñchāsati pārthive
Sanskrit only: no published translation is held for this verse.