Padma Purāṇa 2.38

सूत उवाच- एवं संबोधितो वेनः पापभावं गतः किल । पुरुषेण तेन जैनेन महापापेन मोहितः

sūta uvāca- evaṃ saṃbodhito venaḥ pāpabhāvaṃ gataḥ kila | puruṣeṇa tena jainena mahāpāpena mohitaḥ

Sanskrit only: no published translation is held for this verse.

नमस्कृत्य ततः पादौ तस्यैव च दुरात्मनः । वेदधर्मं परित्यज्य सत्यधर्मादिकां क्रियाम्

namaskṛtya tataḥ pādau tasyaiva ca durātmanaḥ | vedadharmaṃ parityajya satyadharmādikāṃ kriyām

Sanskrit only: no published translation is held for this verse.

सुयज्ञानां निवृत्तिः स्याद्वेदानां हितथैव च । पुण्यशास्त्रमयो धर्मस्तदा नैव प्रवर्तितः

suyajñānāṃ nivṛttiḥ syādvedānāṃ hitathaiva ca | puṇyaśāstramayo dharmastadā naiva pravartitaḥ

Sanskrit only: no published translation is held for this verse.

सर्वपापमयो लोकः संजातस्तस्य शासनात् । नैव यागाश्च वेदाश्च धर्मशास्त्रार्थमुत्तमम्

sarvapāpamayo lokaḥ saṃjātastasya śāsanāt | naiva yāgāśca vedāśca dharmaśāstrārthamuttamam

Sanskrit only: no published translation is held for this verse.

न दानाध्ययनं विप्रास्तस्मिञ्छासति पार्थिवे । एवं धर्मप्रलोपोभून्महत्पापं प्रवर्तितम्

na dānādhyayanaṃ viprāstasmiñchāsati pārthive | evaṃ dharmapralopobhūnmahatpāpaṃ pravartitam

Sanskrit only: no published translation is held for this verse.

अंगेन वार्यमाणस्तु अन्यथा कुरुते भृशम् । न ननाम पितुः पादौ मातुश्चैव दुरात्मवान्

aṃgena vāryamāṇastu anyathā kurute bhṛśam | na nanāma pituḥ pādau mātuścaiva durātmavān

Sanskrit only: no published translation is held for this verse.

सनकस्यापि विप्रस्य अहमेकः प्रतापवान् । पित्रा निवार्यमाणश्च मात्रा चैव दुरात्मवान्

sanakasyāpi viprasya ahamekaḥ pratāpavān | pitrā nivāryamāṇaśca mātrā caiva durātmavān

Sanskrit only: no published translation is held for this verse.

न करोति शुभं पुण्यं तीर्थदानादिकं कदा । आत्मभावानुरूपं च बहुकालं महायशाः

na karoti śubhaṃ puṇyaṃ tīrthadānādikaṃ kadā | ātmabhāvānurūpaṃ ca bahukālaṃ mahāyaśāḥ

Sanskrit only: no published translation is held for this verse.

पुनः सर्वैर्विचार्यैवं कस्मात्पापी व्यजायत । अंगप्रजापतेः पुत्रो वंशलाञ्छनमागतः

punaḥ sarvairvicāryaivaṃ kasmātpāpī vyajāyata | aṃgaprajāpateḥ putro vaṃśalāñchanamāgataḥ

Sanskrit only: no published translation is held for this verse.

पुनः पप्रच्छ धर्मात्मा सुतां मृत्योर्महात्मनः । कस्य दोषात्समुत्पन्नो वद सत्यं मम प्रिये

punaḥ papraccha dharmātmā sutāṃ mṛtyormahātmanaḥ | kasya doṣātsamutpanno vada satyaṃ mama priye

Sanskrit only: no published translation is held for this verse.

सुनीथोवाच- पूर्वमेव स्ववृत्तांतमात्मपुण्यं च नंदिनी । समाचष्ट च अंगाय मम दोषान्महामते

sunīthovāca- pūrvameva svavṛttāṃtamātmapuṇyaṃ ca naṃdinī | samācaṣṭa ca aṃgāya mama doṣānmahāmate

Sanskrit only: no published translation is held for this verse.

बाल्ये कृतं मया पापं सुशंखस्य महात्मनः । तपसि संस्थितस्यापि नान्यत्किंचित्कृतं मया

bālye kṛtaṃ mayā pāpaṃ suśaṃkhasya mahātmanaḥ | tapasi saṃsthitasyāpi nānyatkiṃcitkṛtaṃ mayā

Sanskrit only: no published translation is held for this verse.

शप्ताहं कुप्यता तेन दुष्टा ते संततिर्भवेत् । इति जाने महाभाग तेनायं दुष्टतां गतः

śaptāhaṃ kupyatā tena duṣṭā te saṃtatirbhavet | iti jāne mahābhāga tenāyaṃ duṣṭatāṃ gataḥ

Sanskrit only: no published translation is held for this verse.

समाकर्ण्य महातेजास्तया सह वनं ययौ । गते तस्मिन्महाभागे सभार्ये च वने तदा

samākarṇya mahātejāstayā saha vanaṃ yayau | gate tasminmahābhāge sabhārye ca vane tadā

Sanskrit only: no published translation is held for this verse.

सप्तैते ऋषयस्तत्र वेनपार्श्वं गतास्तथा । समाहूय ततः प्रोचुरंगस्य तनयं प्रति

saptaite ṛṣayastatra venapārśvaṃ gatāstathā | samāhūya tataḥ procuraṃgasya tanayaṃ prati

Sanskrit only: no published translation is held for this verse.

ऋषय ऊचुः- मा वेन साहसं कार्षीःप्रजापालो भवानिह । त्वया सर्वमिदं लोकं त्रैलोक्यं सचराचरम्

ṛṣaya ūcuḥ- mā vena sāhasaṃ kārṣīḥprajāpālo bhavāniha | tvayā sarvamidaṃ lokaṃ trailokyaṃ sacarācaram

Sanskrit only: no published translation is held for this verse.

धर्मे चैव महाभाग सकलं हि प्रतिष्ठितम् । पापकर्मपरित्यज्य पुण्यं कर्म समाचर

dharme caiva mahābhāga sakalaṃ hi pratiṣṭhitam | pāpakarmaparityajya puṇyaṃ karma samācara

Sanskrit only: no published translation is held for this verse.

एवमुक्तेषु तेष्वेव प्रहसन्वाक्यमब्रवीत् । वेन उवाच- अहमेव परो धर्मोऽहमेवार्हः सनातनः

evamukteṣu teṣveva prahasanvākyamabravīt | vena uvāca- ahameva paro dharmo'hamevārhaḥ sanātanaḥ

Sanskrit only: no published translation is held for this verse.

अहं धाता अहं गोप्ता अहं वेदार्थ एव च । अहं धर्मो महापुण्यो जैनधर्मः सनातनः

ahaṃ dhātā ahaṃ goptā ahaṃ vedārtha eva ca | ahaṃ dharmo mahāpuṇyo jainadharmaḥ sanātanaḥ

Sanskrit only: no published translation is held for this verse.

मामेव कर्मणा विप्रा भजध्वं धर्मरूपिणम् । ऋषय उचुः- ब्राह्मणाः क्षत्त्रिया वैश्यास्त्रयोवर्णा द्विजातयः

māmeva karmaṇā viprā bhajadhvaṃ dharmarūpiṇam | ṛṣaya ucuḥ- brāhmaṇāḥ kṣattriyā vaiśyāstrayovarṇā dvijātayaḥ

Sanskrit only: no published translation is held for this verse.

सर्वेषामेव वर्णानां श्रुतिरेषा सनातनी । वेदाचारेण वर्तंते तेन जीवंति जंतवः

sarveṣāmeva varṇānāṃ śrutireṣā sanātanī | vedācāreṇa vartaṃte tena jīvaṃti jaṃtavaḥ

Sanskrit only: no published translation is held for this verse.

ब्रह्मवंशात्समुद्भूतो भवान्ब्राह्मण एव च । पश्चाद्राजा पृथिव्याश्च संजातः कृतविक्रमः

brahmavaṃśātsamudbhūto bhavānbrāhmaṇa eva ca | paścādrājā pṛthivyāśca saṃjātaḥ kṛtavikramaḥ

Sanskrit only: no published translation is held for this verse.

राजपुण्येन राजेंद्र सुखं जीवंति वै द्विजाः । राज्ञः पापेन नश्यंति तस्मात्पुण्यं समाचर

rājapuṇyena rājeṃdra sukhaṃ jīvaṃti vai dvijāḥ | rājñaḥ pāpena naśyaṃti tasmātpuṇyaṃ samācara

Sanskrit only: no published translation is held for this verse.

समादृतस्त्वया धर्मः कृतश्चापि नराधिप । त्रेतायुगस्य कर्मापि द्वापरस्य तथा नहि

samādṛtastvayā dharmaḥ kṛtaścāpi narādhipa | tretāyugasya karmāpi dvāparasya tathā nahi

Sanskrit only: no published translation is held for this verse.

कलेश्चैव प्रवेशं तु वर्त्तयिष्यंति मानवाः । जैनधर्मं समाश्रित्य सर्वे पापप्रमोहिताः

kaleścaiva praveśaṃ tu varttayiṣyaṃti mānavāḥ | jainadharmaṃ samāśritya sarve pāpapramohitāḥ

Sanskrit only: no published translation is held for this verse.

वेदाचारं परित्यज्य पापं यास्यंति मानवाः । पापस्य मूलमेवं वै जैनधर्मं न संशयः

vedācāraṃ parityajya pāpaṃ yāsyaṃti mānavāḥ | pāpasya mūlamevaṃ vai jainadharmaṃ na saṃśayaḥ

Sanskrit only: no published translation is held for this verse.

अनेन मुग्धा राजेंद्र महामोहेन पातिताः । मानवाः पापसंघातास्तेषां नाशाय नान्यथा

anena mugdhā rājeṃdra mahāmohena pātitāḥ | mānavāḥ pāpasaṃghātāsteṣāṃ nāśāya nānyathā

Sanskrit only: no published translation is held for this verse.

भविष्यत्येव गोविंदः सर्वपापापहारकः । स्वेच्छारूपं समासाद्य संहरिष्यति पातकात्

bhaviṣyatyeva goviṃdaḥ sarvapāpāpahārakaḥ | svecchārūpaṃ samāsādya saṃhariṣyati pātakāt

Sanskrit only: no published translation is held for this verse.

पापेषु संगतेष्वेवं म्लेच्छनाशाय वै पुनः । कल्किरेव स्वयं देवो भविष्यति न संशयः

pāpeṣu saṃgateṣvevaṃ mlecchanāśāya vai punaḥ | kalkireva svayaṃ devo bhaviṣyati na saṃśayaḥ

Sanskrit only: no published translation is held for this verse.

व्यवहारं कलेश्चैव त्यज पुण्यं समाश्रय । वर्तयस्व हि सत्येन प्रजापालो भवस्व हि

vyavahāraṃ kaleścaiva tyaja puṇyaṃ samāśraya | vartayasva hi satyena prajāpālo bhavasva hi

Sanskrit only: no published translation is held for this verse.

वेन उवाच- अहं ज्ञानवतां श्रेष्ठः सर्वं ज्ञातं मया इह । योऽन्यथा वर्तते चैव स दंड्यो भवति ध्रुवम्

vena uvāca- ahaṃ jñānavatāṃ śreṣṭhaḥ sarvaṃ jñātaṃ mayā iha | yo'nyathā vartate caiva sa daṃḍyo bhavati dhruvam

Sanskrit only: no published translation is held for this verse.

अत्यर्थं भाषमाणं तं राजानं पापचेतनम् । कुपितास्ते महात्मानः सर्वे वै ब्रह्मणः सुताः

atyarthaṃ bhāṣamāṇaṃ taṃ rājānaṃ pāpacetanam | kupitāste mahātmānaḥ sarve vai brahmaṇaḥ sutāḥ

Sanskrit only: no published translation is held for this verse.

कुपितेष्वेव विप्रेषु वेनो राजा महात्मसु । ब्रह्मशापभयात्तेषां वल्मीकं प्रविवेश ह

kupiteṣveva vipreṣu veno rājā mahātmasu | brahmaśāpabhayātteṣāṃ valmīkaṃ praviveśa ha

Sanskrit only: no published translation is held for this verse.

अथ ते मुनयः क्रुद्धा वेनं पश्यंति सर्वतः । ज्ञात्वा प्रनष्टं भूपं तं वल्मीकस्थं सुसांप्रतम्

atha te munayaḥ kruddhā venaṃ paśyaṃti sarvataḥ | jñātvā pranaṣṭaṃ bhūpaṃ taṃ valmīkasthaṃ susāṃpratam

Sanskrit only: no published translation is held for this verse.

बलादानिन्युस्तं विप्राः क्रूरं तं पापचेतनम् । दृष्ट्वा च पापकर्माणं मुनयः सुसमाहिताः

balādāninyustaṃ viprāḥ krūraṃ taṃ pāpacetanam | dṛṣṭvā ca pāpakarmāṇaṃ munayaḥ susamāhitāḥ

Sanskrit only: no published translation is held for this verse.

सव्यं पाणिं ममंथुस्ते भूपस्य जातमन्यवः । तस्माज्जातो महाह्रस्वो नीलवर्णो भयंकरः

savyaṃ pāṇiṃ mamaṃthuste bhūpasya jātamanyavaḥ | tasmājjāto mahāhrasvo nīlavarṇo bhayaṃkaraḥ

Sanskrit only: no published translation is held for this verse.

बर्बरो रक्तनेत्रस्तु बाणपाणिर्धनुर्द्धरः । सर्वेषामेव पापानां निषादानां बभूव ह

barbaro raktanetrastu bāṇapāṇirdhanurddharaḥ | sarveṣāmeva pāpānāṃ niṣādānāṃ babhūva ha

Sanskrit only: no published translation is held for this verse.

धाता पालयिता राजा म्लेच्छानां तु विशेषतः । तं दृष्ट्वा पापकर्माणमृषयस्तु महामते

dhātā pālayitā rājā mlecchānāṃ tu viśeṣataḥ | taṃ dṛṣṭvā pāpakarmāṇamṛṣayastu mahāmate

Sanskrit only: no published translation is held for this verse.

ममंथुर्दक्षिणं पाणिं वेनस्यापि महात्मनः । तस्माज्जातो महात्मा स येन दुग्धा वसुंधरा

mamaṃthurdakṣiṇaṃ pāṇiṃ venasyāpi mahātmanaḥ | tasmājjāto mahātmā sa yena dugdhā vasuṃdharā

Sanskrit only: no published translation is held for this verse.

पृथुर्नाम महाप्राज्ञो राजराजो महाबलः । तस्य पुण्यप्रसादाच्च वेनो धर्मार्थकोविदः

pṛthurnāma mahāprājño rājarājo mahābalaḥ | tasya puṇyaprasādācca veno dharmārthakovidaḥ

Sanskrit only: no published translation is held for this verse.

चक्रवर्तिपदं भुक्त्वा प्रसादात्तस्य चक्रिणः । जगाम वैष्णवं लोकं तद्विष्णोः परमं पदम्

cakravartipadaṃ bhuktvā prasādāttasya cakriṇaḥ | jagāma vaiṣṇavaṃ lokaṃ tadviṣṇoḥ paramaṃ padam

Sanskrit only: no published translation is held for this verse.