Library·Padma Purāṇa·2·2.42
सख्य ऊचुः- सुदेवा का त्वया प्रोक्ता किमाचारा वदस्व नः । त्वया प्रोक्तं महाभागे वद नः सत्यमेव च
sakhya ūcuḥ- sudevā kā tvayā proktā kimācārā vadasva naḥ | tvayā proktaṃ mahābhāge vada naḥ satyameva ca
Sanskrit only: no published translation is held for this verse.
सुकलोवाच- अयोध्यायां महाराजः स आसीद्धर्मकोविदः । मनुपुत्रो महाभागः सर्वधर्मार्थतत्परः
sukalovāca- ayodhyāyāṃ mahārājaḥ sa āsīddharmakovidaḥ | manuputro mahābhāgaḥ sarvadharmārthatatparaḥ
Sanskrit only: no published translation is held for this verse.
इक्ष्वाकुर्नाम सर्वज्ञो देवब्राह्मणपूजकः । तस्य भार्या सदा पुण्या पतिव्रतपरायणा
ikṣvākurnāma sarvajño devabrāhmaṇapūjakaḥ | tasya bhāryā sadā puṇyā pativrataparāyaṇā
Sanskrit only: no published translation is held for this verse.
तया सार्द्धं यजेद्यज्ञं तीर्थानि विविधानि च । वेदराजस्य वीरस्य काशीशस्य महात्मनः
tayā sārddhaṃ yajedyajñaṃ tīrthāni vividhāni ca | vedarājasya vīrasya kāśīśasya mahātmanaḥ
Sanskrit only: no published translation is held for this verse.
सुदेवा नाम वै कन्या सत्याचारपरायणा । उपयेमे महाराज इक्ष्वाकुस्तां महीपतिः
sudevā nāma vai kanyā satyācāraparāyaṇā | upayeme mahārāja ikṣvākustāṃ mahīpatiḥ
Sanskrit only: no published translation is held for this verse.
सुदेवा चारुसर्वांगी सत्यव्रतपरायणा । तया सार्द्धं स वै राजा जनानां पुण्यनायकः
sudevā cārusarvāṃgī satyavrataparāyaṇā | tayā sārddhaṃ sa vai rājā janānāṃ puṇyanāyakaḥ
Sanskrit only: no published translation is held for this verse.
स रेमे नृपशार्दूलो नित्यं च प्रियया तया । एकदा तु महाराजस्तया सार्द्धं वनं ययौ
sa reme nṛpaśārdūlo nityaṃ ca priyayā tayā | ekadā tu mahārājastayā sārddhaṃ vanaṃ yayau
Sanskrit only: no published translation is held for this verse.
गंगारण्यं समासाद्य मृगयां क्रीडते सदा । सिंहान्हत्वा वराहांश्च गजांश्च महिषांस्तथा
gaṃgāraṇyaṃ samāsādya mṛgayāṃ krīḍate sadā | siṃhānhatvā varāhāṃśca gajāṃśca mahiṣāṃstathā
Sanskrit only: no published translation is held for this verse.
क्रीडमानस्य तस्याग्रे वराहश्च समागतः । बहुशूकरयूथेन पुत्रपौत्रैरलंकृतः
krīḍamānasya tasyāgre varāhaśca samāgataḥ | bahuśūkarayūthena putrapautrairalaṃkṛtaḥ
Sanskrit only: no published translation is held for this verse.
एका च शूकरी तस्य प्रियापार्श्वे प्रतिष्ठिता । वराहैः शूकरैस्तस्य तमेव परिवारिता
ekā ca śūkarī tasya priyāpārśve pratiṣṭhitā | varāhaiḥ śūkaraistasya tameva parivāritā
Sanskrit only: no published translation is held for this verse.
दृष्ट्वा च राजराजेंद्रं दुर्जयं मृगयारतम् । पर्वताधारमाश्रित्य भार्यया सह शूकरः
dṛṣṭvā ca rājarājeṃdraṃ durjayaṃ mṛgayāratam | parvatādhāramāśritya bhāryayā saha śūkaraḥ
Sanskrit only: no published translation is held for this verse.
तिष्ठत्येकः सुवीर्येण पुत्रान्पौत्रान्गुरूञ्छिशून् । ज्ञात्वा तेषां महाराज मृगाणां कदनं महत्
tiṣṭhatyekaḥ suvīryeṇa putrānpautrāngurūñchiśūn | jñātvā teṣāṃ mahārāja mṛgāṇāṃ kadanaṃ mahat
Sanskrit only: no published translation is held for this verse.
तानुवाच सुतान्पौत्रान्भार्यां तां च स शूकरः । कोशलाधिपतिर्वीरो मनुपुत्रो महाबलः
tānuvāca sutānpautrānbhāryāṃ tāṃ ca sa śūkaraḥ | kośalādhipatirvīro manuputro mahābalaḥ
Sanskrit only: no published translation is held for this verse.
क्रीडते मृगयां कांते मृगान्संहरते बहून् । स मां दृष्ट्वा महाराज एष्यते नात्र संशयः
krīḍate mṛgayāṃ kāṃte mṛgānsaṃharate bahūn | sa māṃ dṛṣṭvā mahārāja eṣyate nātra saṃśayaḥ
Sanskrit only: no published translation is held for this verse.
अन्येषां लुब्धकानां मे नास्ति प्राणभयं ध्रुवम् । ममरूपं नृपो दृष्ट्वा क्षमां नैव करिष्यति
anyeṣāṃ lubdhakānāṃ me nāsti prāṇabhayaṃ dhruvam | mamarūpaṃ nṛpo dṛṣṭvā kṣamāṃ naiva kariṣyati
Sanskrit only: no published translation is held for this verse.
हर्षेण महताविष्टो बाणपाणिर्धनुर्द्धरः । श्वभिर्युक्तो महातेजा लुब्धकैः परिवारितः
harṣeṇa mahatāviṣṭo bāṇapāṇirdhanurddharaḥ | śvabhiryukto mahātejā lubdhakaiḥ parivāritaḥ
Sanskrit only: no published translation is held for this verse.
प्रिये करिष्यते घातं ममाप्येवं न संशयः
priye kariṣyate ghātaṃ mamāpyevaṃ na saṃśayaḥ
Sanskrit only: no published translation is held for this verse.
शूकर्युवाच- यदायदा पश्यसि लुब्धकान्बहून्महावने कांत समायुधान्बहून् । एतैस्तु पुत्रैर्ममपौत्रकैः समं दूरं नु भो यासि पलायमानः
śūkaryuvāca- yadāyadā paśyasi lubdhakānbahūnmahāvane kāṃta samāyudhānbahūn | etaistu putrairmamapautrakaiḥ samaṃ dūraṃ nu bho yāsi palāyamānaḥ
Sanskrit only: no published translation is held for this verse.
त्यक्त्वा सुधैर्यं बलपौरुषं महन्महाभयेनापि विषण्णचेतनः । दृष्ट्वा नृपेंद्रं पुरुषोत्तमोत्तमं करोषि किं कांत वदस्वकारणम्
tyaktvā sudhairyaṃ balapauruṣaṃ mahanmahābhayenāpi viṣaṇṇacetanaḥ | dṛṣṭvā nṛpeṃdraṃ puruṣottamottamaṃ karoṣi kiṃ kāṃta vadasvakāraṇam
Sanskrit only: no published translation is held for this verse.
तस्यास्तु वाक्यं सनिशम्य कोल उवाच तां शूकरराजउत्तरम् । यदर्थभीतोस्मि सुलुब्धकात्प्रिये दृष्ट्वा गतो दूर निशम्यशूकरान्
tasyāstu vākyaṃ saniśamya kola uvāca tāṃ śūkararājauttaram | yadarthabhītosmi sulubdhakātpriye dṛṣṭvā gato dūra niśamyaśūkarān
Sanskrit only: no published translation is held for this verse.
सुलुब्धकाः पापकराः शठाः प्रिये कुर्वंति पापं गिरिदुर्गकंदरे । सदैव दुष्टा बहुपापचिंतका जाताश्च सर्वे परिपापिनां कुले
sulubdhakāḥ pāpakarāḥ śaṭhāḥ priye kurvaṃti pāpaṃ giridurgakaṃdare | sadaiva duṣṭā bahupāpaciṃtakā jātāśca sarve paripāpināṃ kule
Sanskrit only: no published translation is held for this verse.
तेषां हि हस्तान्मरणाद्बिभेमि मृतोपि यास्यामि पुनश्च पापम् । दूरं गिरिं पर्वतकंदरं च व्रजामि कांते अपमृत्युभीतः
teṣāṃ hi hastānmaraṇādbibhemi mṛtopi yāsyāmi punaśca pāpam | dūraṃ giriṃ parvatakaṃdaraṃ ca vrajāmi kāṃte apamṛtyubhītaḥ
Sanskrit only: no published translation is held for this verse.
अयं हि पुण्यो नरनाथ आगतो विश्वाधिकः केशवरूप भूपः । युद्धं करिष्ये समरे महात्मना सार्द्धं प्रिये पौरुषविक्रमेण
ayaṃ hi puṇyo naranātha āgato viśvādhikaḥ keśavarūpa bhūpaḥ | yuddhaṃ kariṣye samare mahātmanā sārddhaṃ priye pauruṣavikrameṇa
Sanskrit only: no published translation is held for this verse.
जेष्यामि भूपं यदि स्वेन तेजसा भोक्ष्यामि कीर्तिं त्वतुलां पृथिव्याम् । तेनाहतो वीरवरेण संगरे यास्यामि लोकं मधुसूदनस्य
jeṣyāmi bhūpaṃ yadi svena tejasā bhokṣyāmi kīrtiṃ tvatulāṃ pṛthivyām | tenāhato vīravareṇa saṃgare yāsyāmi lokaṃ madhusūdanasya
Sanskrit only: no published translation is held for this verse.
ममांगभूतेन पलेनमेदसा तृप्तिं परां यास्यति भूमिनाथः । तृप्ता भविष्यंति सुलोकदेवता अस्मादयंचागतो वज्रपाणिः
mamāṃgabhūtena palenamedasā tṛptiṃ parāṃ yāsyati bhūmināthaḥ | tṛptā bhaviṣyaṃti sulokadevatā asmādayaṃcāgato vajrapāṇiḥ
Sanskrit only: no published translation is held for this verse.
अस्यैव हस्तान्मरणं यदाभवेल्लाभश्च मे सुंदरि कीर्तिरुत्तमा । तस्माद्यशो भूमितले जगत्त्रये व्रजामि लोकं मधुसूदनस्य
asyaiva hastānmaraṇaṃ yadābhavellābhaśca me suṃdari kīrtiruttamā | tasmādyaśo bhūmitale jagattraye vrajāmi lokaṃ madhusūdanasya
Sanskrit only: no published translation is held for this verse.
नैवं भीतोस्मि क्षुब्धोस्मि गतोऽहं गिरिसानुषु । पापाद्भीतो गतः कांतेधर्मं दृष्ट्वा स्थितोह्यहम्
naivaṃ bhītosmi kṣubdhosmi gato'haṃ girisānuṣu | pāpādbhīto gataḥ kāṃtedharmaṃ dṛṣṭvā sthitohyaham
Sanskrit only: no published translation is held for this verse.
न जाने पातकं पूर्वमन्यजन्मनि चार्जितम् । येनाहं शौकरीं योनिं गतोऽहं पापसंचयात्
na jāne pātakaṃ pūrvamanyajanmani cārjitam | yenāhaṃ śaukarīṃ yoniṃ gato'haṃ pāpasaṃcayāt
Sanskrit only: no published translation is held for this verse.
क्षालयिष्याम्यहं घोरं पूर्वपातकसंचयम् । बाणोदकैर्महाघोरैः सुतीक्ष्णैर्निशितैः शतैः
kṣālayiṣyāmyahaṃ ghoraṃ pūrvapātakasaṃcayam | bāṇodakairmahāghoraiḥ sutīkṣṇairniśitaiḥ śataiḥ
Sanskrit only: no published translation is held for this verse.
पुत्रान्पौत्रांस्तु वाराहि कन्यां कुटुंबबालकम् । गिरिं गच्छ गृहीत्वा तु मम मोहमिमं त्यज
putrānpautrāṃstu vārāhi kanyāṃ kuṭuṃbabālakam | giriṃ gaccha gṛhītvā tu mama mohamimaṃ tyaja
Sanskrit only: no published translation is held for this verse.
ममस्नेहं परित्यज्य हरिरेष समागतः । अस्य हस्तात्प्रयास्यामि तद्विष्णोः परमं पदम्
mamasnehaṃ parityajya harireṣa samāgataḥ | asya hastātprayāsyāmi tadviṣṇoḥ paramaṃ padam
Sanskrit only: no published translation is held for this verse.
दैवेनापि ममाद्यैव स्वर्गद्वारमनुत्तमम् । उद्घाटितकपाटं तु यास्यामि सुमहादिवम्
daivenāpi mamādyaiva svargadvāramanuttamam | udghāṭitakapāṭaṃ tu yāsyāmi sumahādivam
Sanskrit only: no published translation is held for this verse.
सुकलोवाच- तच्छ्रुत्वा वचनं तस्य शूकरस्य महात्मनः । उवाच तत्प्रिया सख्यः सीदमानांतरा तदा
sukalovāca- tacchrutvā vacanaṃ tasya śūkarasya mahātmanaḥ | uvāca tatpriyā sakhyaḥ sīdamānāṃtarā tadā
Sanskrit only: no published translation is held for this verse.
शूकर्युवाच- यस्मिन्यूथे भवान्स्वामी पुत्रपौत्रैरलंकृतः । मित्रैश्च भ्रातृभिश्चैव अन्यैः स्वजनबांधवैः
śūkaryuvāca- yasminyūthe bhavānsvāmī putrapautrairalaṃkṛtaḥ | mitraiśca bhrātṛbhiścaiva anyaiḥ svajanabāṃdhavaiḥ
Sanskrit only: no published translation is held for this verse.
त्वयैवालंकृतो यूथो भवता परिशोभते । त्वां विनायं महाभाग कीदृग्यूथो भविष्यति
tvayaivālaṃkṛto yūtho bhavatā pariśobhate | tvāṃ vināyaṃ mahābhāga kīdṛgyūtho bhaviṣyati
Sanskrit only: no published translation is held for this verse.
तवैव स्वबलेनापि गर्जमानाश्च शूकराः । विचरंति गिरौ कांत तनया मम बालकाः
tavaiva svabalenāpi garjamānāśca śūkarāḥ | vicaraṃti girau kāṃta tanayā mama bālakāḥ
Sanskrit only: no published translation is held for this verse.
कंदान्मूलान्सुभक्षंति निर्भयास्तव तेजसा । दुर्गेषु वनकुंजेषु ग्रामेषु नगरेषु च
kaṃdānmūlānsubhakṣaṃti nirbhayāstava tejasā | durgeṣu vanakuṃjeṣu grāmeṣu nagareṣu ca
Sanskrit only: no published translation is held for this verse.
न कुर्वंति भयं तीव्रं सिंहानामिह पर्वते । मनुष्याणां महाबाहो पालितास्तव तेजसा
na kurvaṃti bhayaṃ tīvraṃ siṃhānāmiha parvate | manuṣyāṇāṃ mahābāho pālitāstava tejasā
Sanskrit only: no published translation is held for this verse.
त्वया त्यक्ता अमी सर्वे बालका मम दारकाः । दीनाश्चैवाकुलाश्चैव भविष्यंति विचेतनाः
tvayā tyaktā amī sarve bālakā mama dārakāḥ | dīnāścaivākulāścaiva bhaviṣyaṃti vicetanāḥ
Sanskrit only: no published translation is held for this verse.
नित्यमेव सुखं वर्त्म गत्वा पश्यंति बालकाः । पतिहीना यथा नारी शोभते नैव शोभना
nityameva sukhaṃ vartma gatvā paśyaṃti bālakāḥ | patihīnā yathā nārī śobhate naiva śobhanā
Sanskrit only: no published translation is held for this verse.
अलंकृता यथा दिव्यैरलंकारैः सकांचनैः । परिच्छदै रत्नवस्त्रैः पितृमातृसहोदरैः
alaṃkṛtā yathā divyairalaṃkāraiḥ sakāṃcanaiḥ | paricchadai ratnavastraiḥ pitṛmātṛsahodaraiḥ
Sanskrit only: no published translation is held for this verse.
श्वश्रूश्वशुरकैश्चान्यैः पतिहीना न भाति सा । चंद्रहीना यथा रात्री पुत्रहीनं यथा कुलम्
śvaśrūśvaśurakaiścānyaiḥ patihīnā na bhāti sā | caṃdrahīnā yathā rātrī putrahīnaṃ yathā kulam
Sanskrit only: no published translation is held for this verse.
दीपहीनं यथा गेहं नैव भाति कदाचन । त्वां विनायं तथा यूथो नैव शोभेत मानद
dīpahīnaṃ yathā gehaṃ naiva bhāti kadācana | tvāṃ vināyaṃ tathā yūtho naiva śobheta mānada
Sanskrit only: no published translation is held for this verse.
आचारेण विना मर्त्यो ज्ञानहीनो यतिर्यथा । मंत्रहीनो यथा राजा तथायं नैव शोभते
ācāreṇa vinā martyo jñānahīno yatiryathā | maṃtrahīno yathā rājā tathāyaṃ naiva śobhate
Sanskrit only: no published translation is held for this verse.
कैवर्तेन विना नौर्वा संपूर्णा परिसागरे । न भात्येवं यथा सार्थः सार्थवाहेन वै विना
kaivartena vinā naurvā saṃpūrṇā parisāgare | na bhātyevaṃ yathā sārthaḥ sārthavāhena vai vinā
Sanskrit only: no published translation is held for this verse.
सेनाध्यक्षेण च विना यथा सैन्यं न भाति च । त्वां विना वै तथा सैन्यं शूकराणां महामते
senādhyakṣeṇa ca vinā yathā sainyaṃ na bhāti ca | tvāṃ vinā vai tathā sainyaṃ śūkarāṇāṃ mahāmate
Sanskrit only: no published translation is held for this verse.
दीनो भविष्यति तथा वेदहीनो यथा द्विजः । मयि भारं कुटुंबस्य विनिवेश्य प्रगच्छसि
dīno bhaviṣyati tathā vedahīno yathā dvijaḥ | mayi bhāraṃ kuṭuṃbasya viniveśya pragacchasi
Sanskrit only: no published translation is held for this verse.
मरणं सुलभं ज्ञात्वा का प्रतिज्ञा तवेदृशी । त्वां विनाहं न शक्नोमि धर्तुं प्राणान्प्रियेश्वर
maraṇaṃ sulabhaṃ jñātvā kā pratijñā tavedṛśī | tvāṃ vināhaṃ na śaknomi dhartuṃ prāṇānpriyeśvara
Sanskrit only: no published translation is held for this verse.
त्वयैव सहिता स्वर्गं भूमिं वाथ महामते । नरकं वापि भोक्ष्यामि सत्यंसत्यं वदाम्यहम्
tvayaiva sahitā svargaṃ bhūmiṃ vātha mahāmate | narakaṃ vāpi bhokṣyāmi satyaṃsatyaṃ vadāmyaham
Sanskrit only: no published translation is held for this verse.
त्वं वा पुत्रांस्तुपौत्रांस्तु गृहीत्वा यूथमुत्तमम् । आवां व्रजाव यूथेश दुर्गमेवं सुकंदरम्
tvaṃ vā putrāṃstupautrāṃstu gṛhītvā yūthamuttamam | āvāṃ vrajāva yūtheśa durgamevaṃ sukaṃdaram
Sanskrit only: no published translation is held for this verse.
जीवितव्यं परित्यज्य रणाय परिगम्यते । तत्र को दृश्यते लाभो मरणे वद सांप्रतम्
jīvitavyaṃ parityajya raṇāya parigamyate | tatra ko dṛśyate lābho maraṇe vada sāṃpratam
Sanskrit only: no published translation is held for this verse.
वाराह उवाच- वीराणां त्वं न जानासि सुधर्मं शृणु सांप्रतम् । युद्धार्थिना हि वीरेण वीरं गत्वा प्रयाचितम्
vārāha uvāca- vīrāṇāṃ tvaṃ na jānāsi sudharmaṃ śṛṇu sāṃpratam | yuddhārthinā hi vīreṇa vīraṃ gatvā prayācitam
Sanskrit only: no published translation is held for this verse.
देहि मे योधनं संख्ये युद्धार्थ्यहं समागतः । परेण याचितं युद्धं न ददाति यदा नरः
dehi me yodhanaṃ saṃkhye yuddhārthyahaṃ samāgataḥ | pareṇa yācitaṃ yuddhaṃ na dadāti yadā naraḥ
Sanskrit only: no published translation is held for this verse.
कामाल्लोभाद्भयाद्वापि मोहाद्वा शृणु वल्लभे । कुंभीपाके तु नरके वसेद्युगसहस्रकम्
kāmāllobhādbhayādvāpi mohādvā śṛṇu vallabhe | kuṃbhīpāke tu narake vasedyugasahasrakam
Sanskrit only: no published translation is held for this verse.
क्षत्रियाणां परो धर्मो युद्धं देयं न संशयः । तद्युद्धं दीयमानेन रणभूमिगतेन वै
kṣatriyāṇāṃ paro dharmo yuddhaṃ deyaṃ na saṃśayaḥ | tadyuddhaṃ dīyamānena raṇabhūmigatena vai
Sanskrit only: no published translation is held for this verse.
निर्जितं तु परं तत्र यशःकीर्त्तिं प्रभुंजते । स वा हतो युध्यमानः पौरुषेणातिनिर्भयः
nirjitaṃ tu paraṃ tatra yaśaḥkīrttiṃ prabhuṃjate | sa vā hato yudhyamānaḥ pauruṣeṇātinirbhayaḥ
Sanskrit only: no published translation is held for this verse.
वीरलोकमवाप्नोति दिव्यान्भोगान्प्रभुंजते । यावद्वर्षसहस्राणां विंशत्येकां प्रिये शृणु
vīralokamavāpnoti divyānbhogānprabhuṃjate | yāvadvarṣasahasrāṇāṃ viṃśatyekāṃ priye śṛṇu
Sanskrit only: no published translation is held for this verse.
वीरलोके वसेत्तावद्देवाचारैर्महीयते । मनुपुत्रः समायात अयं वीरो न संशयः
vīraloke vasettāvaddevācārairmahīyate | manuputraḥ samāyāta ayaṃ vīro na saṃśayaḥ
Sanskrit only: no published translation is held for this verse.
संग्रामं याचमानस्तु युद्धं देयं मया ध्रुवम् । युद्धातिथिः समायातो विष्णुरूपः सनातनः
saṃgrāmaṃ yācamānastu yuddhaṃ deyaṃ mayā dhruvam | yuddhātithiḥ samāyāto viṣṇurūpaḥ sanātanaḥ
Sanskrit only: no published translation is held for this verse.
सत्कारो युद्धरूपेण कर्तव्यश्च मया शुभे । शूकर्युवाच- यदा युद्धं त्वया देयं राज्ञे चैव महात्मने
satkāro yuddharūpeṇa kartavyaśca mayā śubhe | śūkaryuvāca- yadā yuddhaṃ tvayā deyaṃ rājñe caiva mahātmane
Sanskrit only: no published translation is held for this verse.
ततोऽहं पौरुषं कांत पश्यामि तव कीदृशम् । एवमुक्त्वा प्रियान्पुत्रान्समाहूय त्वरान्विता
tato'haṃ pauruṣaṃ kāṃta paśyāmi tava kīdṛśam | evamuktvā priyānputrānsamāhūya tvarānvitā
Sanskrit only: no published translation is held for this verse.
उवाच पुत्रका यूयं शृणुध्वं वचनं मम । युद्धातिथिः समायातो विष्णुरूपः सनातनः
uvāca putrakā yūyaṃ śṛṇudhvaṃ vacanaṃ mama | yuddhātithiḥ samāyāto viṣṇurūpaḥ sanātanaḥ
Sanskrit only: no published translation is held for this verse.
मया तत्र प्रगंतव्यं यत्रायं हि गमिष्यति । यावत्तिष्ठति वै नाथो भवतां प्रतिपालकः
mayā tatra pragaṃtavyaṃ yatrāyaṃ hi gamiṣyati | yāvattiṣṭhati vai nātho bhavatāṃ pratipālakaḥ
Sanskrit only: no published translation is held for this verse.
यूयं गच्छत वै दूरं दुर्गं गिरिगुहामुखम् । सुखं जीवत मे वत्सा वर्जयित्वा सुलुब्धकान्
yūyaṃ gacchata vai dūraṃ durgaṃ giriguhāmukham | sukhaṃ jīvata me vatsā varjayitvā sulubdhakān
Sanskrit only: no published translation is held for this verse.
मया तत्रैव गंतव्यं यत्रैष हि गमिष्यति । भवतां श्रेष्ठोऽयं भ्राता यूथरक्षां करिष्यति
mayā tatraiva gaṃtavyaṃ yatraiṣa hi gamiṣyati | bhavatāṃ śreṣṭho'yaṃ bhrātā yūtharakṣāṃ kariṣyati
Sanskrit only: no published translation is held for this verse.
एते पितृव्यकाः सर्वे भवतां त्राणकारकाः । दूरं प्रयात वै सर्वे मां विहाय सुपुत्रकाः
ete pitṛvyakāḥ sarve bhavatāṃ trāṇakārakāḥ | dūraṃ prayāta vai sarve māṃ vihāya suputrakāḥ
Sanskrit only: no published translation is held for this verse.
पुत्रा ऊचुः- अयं हि पर्वतश्रेष्ठो बहुमूलफलोदकः । भयं तु कस्य वै नास्ति सुखं जीवनमस्ति वै
putrā ūcuḥ- ayaṃ hi parvataśreṣṭho bahumūlaphalodakaḥ | bhayaṃ tu kasya vai nāsti sukhaṃ jīvanamasti vai
Sanskrit only: no published translation is held for this verse.
युवाभ्यां हि अकस्माद्वै इदमुक्तं भयंकरम् । तन्नो हि कारणं मातर्वद सत्यमिहैव हि
yuvābhyāṃ hi akasmādvai idamuktaṃ bhayaṃkaram | tanno hi kāraṇaṃ mātarvada satyamihaiva hi
Sanskrit only: no published translation is held for this verse.
शूकर्युवाच-। अयं राजा महारौद्रः कालरूपः समागतः । क्रीडते मृगया लुब्धो मृगान्हत्वा बहून्वने
śūkaryuvāca-| ayaṃ rājā mahāraudraḥ kālarūpaḥ samāgataḥ | krīḍate mṛgayā lubdho mṛgānhatvā bahūnvane
Sanskrit only: no published translation is held for this verse.
इक्ष्वाकुर्नाम दुर्धर्षो मनुपुत्रो महाबलः । संहरिष्यति कालोऽयं दूरं यात सुपुत्रकाः
ikṣvākurnāma durdharṣo manuputro mahābalaḥ | saṃhariṣyati kālo'yaṃ dūraṃ yāta suputrakāḥ
Sanskrit only: no published translation is held for this verse.
पुत्रा ऊचुः-। मातरं पितरं त्यक्त्वा यः प्रयाति स पापधीः । महारौद्रं सुघोरं तु नरकं प्रतिपद्यते
putrā ūcuḥ-| mātaraṃ pitaraṃ tyaktvā yaḥ prayāti sa pāpadhīḥ | mahāraudraṃ sughoraṃ tu narakaṃ pratipadyate
Sanskrit only: no published translation is held for this verse.
मातुः पुण्यं पयः पीत्वा पुष्टो भवति निर्घृणः । मातरं पितरं त्यक्त्वा यः प्रयाति सुदुर्बलः
mātuḥ puṇyaṃ payaḥ pītvā puṣṭo bhavati nirghṛṇaḥ | mātaraṃ pitaraṃ tyaktvā yaḥ prayāti sudurbalaḥ
Sanskrit only: no published translation is held for this verse.
पूयं नरकमेतीह कृमिदुर्गंधसंकुलम् । मातुस्तस्मान्न यास्यामो गुरुं त्यक्त्वा इहैव च
pūyaṃ narakametīha kṛmidurgaṃdhasaṃkulam | mātustasmānna yāsyāmo guruṃ tyaktvā ihaiva ca
Sanskrit only: no published translation is held for this verse.
एवं विषादः संजातस्तेषां धर्मार्थसंयुतः । व्यूहं कृत्वा स्थिताः सर्वे बलतेजः समाकुलाः
evaṃ viṣādaḥ saṃjātasteṣāṃ dharmārthasaṃyutaḥ | vyūhaṃ kṛtvā sthitāḥ sarve balatejaḥ samākulāḥ
Sanskrit only: no published translation is held for this verse.
साहसोत्साहसंपन्नाः पश्यंति नृपनंदनम् । नदंतः पौरुषैर्युक्ताः क्रीडमाना वने तदा
sāhasotsāhasaṃpannāḥ paśyaṃti nṛpanaṃdanam | nadaṃtaḥ pauruṣairyuktāḥ krīḍamānā vane tadā
Sanskrit only: no published translation is held for this verse.