Library·Padma Purāṇa·2·2.43
त्रयश्चत्वारिंशत्तमोऽध्यायः 2.43 सुकलोवाच- एवं ते शूकराः सर्वे युद्धाय समुपस्थिताः । पुरः स्थितस्य ते राज्ञो ह्यवतस्थुश्च लुब्धकाः
trayaścatvāriṃśattamo'dhyāyaḥ 2.43 sukalovāca- evaṃ te śūkarāḥ sarve yuddhāya samupasthitāḥ | puraḥ sthitasya te rājño hyavatasthuśca lubdhakāḥ
Sanskrit only: no published translation is held for this verse.
महावराहो राजेंद्र गिरिसानुं समाश्रितः । महता यूथभावेन व्यूहं कृत्वा प्रतिष्ठति
mahāvarāho rājeṃdra girisānuṃ samāśritaḥ | mahatā yūthabhāvena vyūhaṃ kṛtvā pratiṣṭhati
Sanskrit only: no published translation is held for this verse.
कपिलः स्थूलपीनांगो महादंष्ट्रो महामुखः । दुःसहः शूकरो राजन्गर्जते चातिभैरवम्
kapilaḥ sthūlapīnāṃgo mahādaṃṣṭro mahāmukhaḥ | duḥsahaḥ śūkaro rājangarjate cātibhairavam
Sanskrit only: no published translation is held for this verse.
तानपश्यन्महाराजः शालतालवनाश्रयान् । तेषां तद्वचनं श्रुत्वा मनुपुत्रः प्रतापवान्
tānapaśyanmahārājaḥ śālatālavanāśrayān | teṣāṃ tadvacanaṃ śrutvā manuputraḥ pratāpavān
Sanskrit only: no published translation is held for this verse.
गृह्यतां शूर वाराहो विध्यतां बलदर्पितः । एवमाभाष्य तान्वीरो मनुपुत्रः प्रतापवान्
gṛhyatāṃ śūra vārāho vidhyatāṃ baladarpitaḥ | evamābhāṣya tānvīro manuputraḥ pratāpavān
Sanskrit only: no published translation is held for this verse.
अथ ते लुब्धकाः सर्वे मृगया मदमोहिताः । संनद्धा दंशिताः सर्वे श्वभिः सार्द्धं प्रजग्मिरे
atha te lubdhakāḥ sarve mṛgayā madamohitāḥ | saṃnaddhā daṃśitāḥ sarve śvabhiḥ sārddhaṃ prajagmire
Sanskrit only: no published translation is held for this verse.
हर्षेण महताविष्टो राजराजो महाबलः । अश्वारूढः सुसैन्येन चतुरंगेण संयतः
harṣeṇa mahatāviṣṭo rājarājo mahābalaḥ | aśvārūḍhaḥ susainyena caturaṃgeṇa saṃyataḥ
Sanskrit only: no published translation is held for this verse.
गंगातीरं समायातो मेरौ गिरिवरोत्तमे । रत्नधातुसमाकीर्णे नानावृक्षैरलंकृते
gaṃgātīraṃ samāyāto merau girivarottame | ratnadhātusamākīrṇe nānāvṛkṣairalaṃkṛte
Sanskrit only: no published translation is held for this verse.
सुकलोवाच- यो बलधाम मरीचिचयकरनिकरमयप्रोत्तुंगोऽत्युच्चम् । गगनमेव संप्राप्तो नाना नगाचरितशोभो गिरिराजो भाति
sukalovāca- yo baladhāma marīcicayakaranikaramayaprottuṃgo'tyuccam | gaganameva saṃprāpto nānā nagācaritaśobho girirājo bhāti
Sanskrit only: no published translation is held for this verse.
योजनबहलविमल गंगाप्रवाह समुच्चरत्तीरवीचीतरंगभंगैर्मुक्ताफलसदृशैर्निर्मलांबुकणैः । सर्वत्र प्रक्षालित धवलतलशिलातलोगिरींद्र सुःश्रियायुक्तः
yojanabahalavimala gaṃgāpravāha samuccarattīravīcītaraṃgabhaṃgairmuktāphalasadṛśairnirmalāṃbukaṇaiḥ | sarvatra prakṣālita dhavalatalaśilātalogirīṃdra suḥśriyāyuktaḥ
Sanskrit only: no published translation is held for this verse.
देवैश्चारणकिन्नरैः परिवृतो गंधर्वविद्याधरैः सिद्धैरप्सरसांगणैर्मुनिजनैर्नागेंद्र विद्याधरैः । श्रीखंडैर्बहुचंदनैस्ससरलैः शालैस्तमालैर्गिरी रुद्रा क्षैर्वरसिद्धिदायकघनैः कल्पद्रुमैः शोभते
devaiścāraṇakinnaraiḥ parivṛto gaṃdharvavidyādharaiḥ siddhairapsarasāṃgaṇairmunijanairnāgeṃdra vidyādharaiḥ | śrīkhaṃḍairbahucaṃdanaissasaralaiḥ śālaistamālairgirī rudrā kṣairvarasiddhidāyakaghanaiḥ kalpadrumaiḥ śobhate
Sanskrit only: no published translation is held for this verse.
नानाधातुविचित्रो वै नानारत्नविचित्रितैः । विमानैः कांचनैर्दंडैः कलत्रैरुपशोभते
nānādhātuvicitro vai nānāratnavicitritaiḥ | vimānaiḥ kāṃcanairdaṃḍaiḥ kalatrairupaśobhate
Sanskrit only: no published translation is held for this verse.
नालिकेरवनैर्दिव्यैः पूगवृक्षैर्विराजते । दिव्यपुन्नागबकुलैः कदलीखंडमंडितैः
nālikeravanairdivyaiḥ pūgavṛkṣairvirājate | divyapunnāgabakulaiḥ kadalīkhaṃḍamaṃḍitaiḥ
Sanskrit only: no published translation is held for this verse.
पुष्पकैश्चंपकैरद्रि पाःटलैः केतकैस्तथा । नानावल्लीवितानैश्च पुष्पितैः पद्मकैस्तथा
puṣpakaiścaṃpakairadri pāḥṭalaiḥ ketakaistathā | nānāvallīvitānaiśca puṣpitaiḥ padmakaistathā
Sanskrit only: no published translation is held for this verse.
नानावर्णैः सुपुष्पैश्च नानावृक्षैरलंकृतः । दिव्यवृक्षैः समाकीर्णः स्फाटिकस्य शिलातलैः
nānāvarṇaiḥ supuṣpaiśca nānāvṛkṣairalaṃkṛtaḥ | divyavṛkṣaiḥ samākīrṇaḥ sphāṭikasya śilātalaiḥ
Sanskrit only: no published translation is held for this verse.
योगियोगीन्द्र संसिद्धैः कंदरांतर्निवासिभिः । निर्झरैश्चैव रम्यैश्च बहुप्रस्रवणैर्गिरिः
yogiyogīndra saṃsiddhaiḥ kaṃdarāṃtarnivāsibhiḥ | nirjharaiścaiva ramyaiśca bahuprasravaṇairgiriḥ
Sanskrit only: no published translation is held for this verse.
नदीप्रवाहसंह्रष्टैः संगमैरुपशोभते । ह्रदैश्च पल्वलैः कुंडैर्निर्मलोदकधारिभिः
nadīpravāhasaṃhraṣṭaiḥ saṃgamairupaśobhate | hradaiśca palvalaiḥ kuṃḍairnirmalodakadhāribhiḥ
Sanskrit only: no published translation is held for this verse.
गिरिराजो विभात्येकः सानुभिः सह संस्थितैः । शरभैश्चैव शार्दूलैर्मृगयूथैरलंकृतः
girirājo vibhātyekaḥ sānubhiḥ saha saṃsthitaiḥ | śarabhaiścaiva śārdūlairmṛgayūthairalaṃkṛtaḥ
Sanskrit only: no published translation is held for this verse.
महामत्तैश्च मातंगैर्महिषैरुरुभिः सदा । अनेकैर्दिव्यभावैश्च गिरिराजो विभाति सः
mahāmattaiśca mātaṃgairmahiṣairurubhiḥ sadā | anekairdivyabhāvaiśca girirājo vibhāti saḥ
Sanskrit only: no published translation is held for this verse.
अयोध्याधिपतिर्वीर इक्ष्वाकुर्मनुनंदनः । तया सुभार्यया युक्तश्चतुरंगबलेन च
ayodhyādhipatirvīra ikṣvākurmanunaṃdanaḥ | tayā subhāryayā yuktaścaturaṃgabalena ca
Sanskrit only: no published translation is held for this verse.
पुरतो लुब्धका यांति शूराः श्वानश्च शीघ्रगाः । यत्रास्ते शूकरः शूरो भार्यया सहितो बली
purato lubdhakā yāṃti śūrāḥ śvānaśca śīghragāḥ | yatrāste śūkaraḥ śūro bhāryayā sahito balī
Sanskrit only: no published translation is held for this verse.
बहुभिः शूकरैर्गुप्तो गुरुभिः शिशुभिस्ततः । मेरुभूमिं समाश्रित्य गंगातीरं समंततः
bahubhiḥ śūkarairgupto gurubhiḥ śiśubhistataḥ | merubhūmiṃ samāśritya gaṃgātīraṃ samaṃtataḥ
Sanskrit only: no published translation is held for this verse.
सुकलोवाच-। तामुवाच वराहस्तु सुप्रियां हर्षसंयुतः । प्रिये पश्य समायातः कोशलाधिपतिर्बली
sukalovāca-| tāmuvāca varāhastu supriyāṃ harṣasaṃyutaḥ | priye paśya samāyātaḥ kośalādhipatirbalī
Sanskrit only: no published translation is held for this verse.
मामुद्दिश्य महाप्राज्ञो मृगयां क्रीडते नृपः । युद्धमेव करिष्यामि सुरासुरप्रहर्षकम्
māmuddiśya mahāprājño mṛgayāṃ krīḍate nṛpaḥ | yuddhameva kariṣyāmi surāsurapraharṣakam
Sanskrit only: no published translation is held for this verse.
अथ भूपो महातेजा बाणपाणिर्धनुर्धरः । सुदेवां सत्यधर्मांगीं तामुवाच प्रहर्षितः
atha bhūpo mahātejā bāṇapāṇirdhanurdharaḥ | sudevāṃ satyadharmāṃgīṃ tāmuvāca praharṣitaḥ
Sanskrit only: no published translation is held for this verse.
पश्य प्रिये महाकोलं गर्जमानं महाबलम् । परिवारसमायुक्तं दुःसहं मृगघातिभिः
paśya priye mahākolaṃ garjamānaṃ mahābalam | parivārasamāyuktaṃ duḥsahaṃ mṛgaghātibhiḥ
Sanskrit only: no published translation is held for this verse.
अद्यैवाहं हनिष्यामि सुबाणैर्निशितैः प्रिये । मामेव हि महाशूरो युद्धाय समुपाश्रयेत्
adyaivāhaṃ haniṣyāmi subāṇairniśitaiḥ priye | māmeva hi mahāśūro yuddhāya samupāśrayet
Sanskrit only: no published translation is held for this verse.
एवमुक्त्वा प्रियो भार्यां लुब्धकान्वाक्यमब्रवीत् । यथा शूरो महाशूराः प्रेषयध्वं हि शूकरम्
evamuktvā priyo bhāryāṃ lubdhakānvākyamabravīt | yathā śūro mahāśūrāḥ preṣayadhvaṃ hi śūkaram
Sanskrit only: no published translation is held for this verse.
अथ ते प्रेषिताः शूरा बलतेजः पराक्रमाः । गर्जमानाः प्रधावंति बलतेजः पराक्रमाः
atha te preṣitāḥ śūrā balatejaḥ parākramāḥ | garjamānāḥ pradhāvaṃti balatejaḥ parākramāḥ
Sanskrit only: no published translation is held for this verse.
कोलं प्रतिगताः सर्वे वायुवेगेन सांप्रतम् । विध्यंति बाणजालैस्ते निशितैर्वनचारकाः
kolaṃ pratigatāḥ sarve vāyuvegena sāṃpratam | vidhyaṃti bāṇajālaiste niśitairvanacārakāḥ
Sanskrit only: no published translation is held for this verse.
नाना शस्त्रैरथास्त्रैश्च वाराहं वीररूपिणम्
nānā śastrairathāstraiśca vārāhaṃ vīrarūpiṇam
Sanskrit only: no published translation is held for this verse.
सुकलोवाच- पतंति बाणतोमरा विमुक्ता लुब्धकैः शरा घनागिरिंप्रवर्षिणो यथातथा धरांतरे । हतो दृढप्रहारिभिः स निर्जितस्ततस्तथा शतैस्तु यूथपालकः स कोलः संगरंगतः
sukalovāca- pataṃti bāṇatomarā vimuktā lubdhakaiḥ śarā ghanāgiriṃpravarṣiṇo yathātathā dharāṃtare | hato dṛḍhaprahāribhiḥ sa nirjitastatastathā śataistu yūthapālakaḥ sa kolaḥ saṃgaraṃgataḥ
Sanskrit only: no published translation is held for this verse.
स्वपुत्रपौत्रबांधवैः परांश्च संहरेत्स वै पतंति ते स्वदंष्ट्रया हताहवेऽवलुब्धकाः । पतंति पादहस्तकाः स्थितस्य वेगभ्रामणैः सलुब्धगर्जमेवतं वराहोऽपश्यदागतम्
svaputrapautrabāṃdhavaiḥ parāṃśca saṃharetsa vai pataṃti te svadaṃṣṭrayā hatāhave'valubdhakāḥ | pataṃti pādahastakāḥ sthitasya vegabhrāmaṇaiḥ salubdhagarjamevataṃ varāho'paśyadāgatam
Sanskrit only: no published translation is held for this verse.
स्वतेजसा विनाशितं मुखाग्रदंष्ट्रया हतं । गतः स यत्र भूपतिः स वांछतेनसंगरम्
svatejasā vināśitaṃ mukhāgradaṃṣṭrayā hataṃ | gataḥ sa yatra bhūpatiḥ sa vāṃchatenasaṃgaram
Sanskrit only: no published translation is held for this verse.
इक्ष्वाकुनाथं सुमहत्प्रसह्य संत्रास्य क्रुद्धः स हि शूकरेशः । युद्धं वने वांछति तेन सार्द्धमिक्ष्वाकुणा संगरहर्षयुक्तः
ikṣvākunāthaṃ sumahatprasahya saṃtrāsya kruddhaḥ sa hi śūkareśaḥ | yuddhaṃ vane vāṃchati tena sārddhamikṣvākuṇā saṃgaraharṣayuktaḥ
Sanskrit only: no published translation is held for this verse.
वाराहः पुनरेव युद्धकुशलः संवांछते संगरं तुंडाग्रेण सुतीक्ष्णदंतनखरैः क्रुद्धो धरां क्षोभयन् । हुंकारोच्चारगर्वात्प्रहरति विमलं भूपतिं तं च राजञ्ज्ञात्वा विष्णुपराक्रमं मनुसुतस्त्वानन्दरोमांचितः
vārāhaḥ punareva yuddhakuśalaḥ saṃvāṃchate saṃgaraṃ tuṃḍāgreṇa sutīkṣṇadaṃtanakharaiḥ kruddho dharāṃ kṣobhayan | huṃkāroccāragarvātpraharati vimalaṃ bhūpatiṃ taṃ ca rājañjñātvā viṣṇuparākramaṃ manusutastvānandaromāṃcitaḥ
Sanskrit only: no published translation is held for this verse.
दृष्ट्वा शूकरपौरुषं यमतुलं मेने पतिर्वावराड्देवारिं मनसा विचिन्त्य सहसा वाराहरूपेण वै । संप्रेक्ष्यैव महाबलं बहुतरं युक्तं त्वरेर्वारणं सैन्यं कोलविनाशनाय सहसा संगृह्य संगृह्यताम्
dṛṣṭvā śūkarapauruṣaṃ yamatulaṃ mene patirvāvarāḍdevāriṃ manasā vicintya sahasā vārāharūpeṇa vai | saṃprekṣyaiva mahābalaṃ bahutaraṃ yuktaṃ tvarervāraṇaṃ sainyaṃ kolavināśanāya sahasā saṃgṛhya saṃgṛhyatām
Sanskrit only: no published translation is held for this verse.
प्रेषिताश्च वारणा रथाश्च वेगवत्तराः सुबाणखड्गधारिणो भुशुंडिभिश्च मुद्गरैः । सपाशपाणिलुब्धका नदंति तत्र तत्परा निवारितो न तिष्ठतो हयागजाश्च यद्गताः
preṣitāśca vāraṇā rathāśca vegavattarāḥ subāṇakhaḍgadhāriṇo bhuśuṃḍibhiśca mudgaraiḥ | sapāśapāṇilubdhakā nadaṃti tatra tatparā nivārito na tiṣṭhato hayāgajāśca yadgatāḥ
Sanskrit only: no published translation is held for this verse.
क्वचित्क्वचिन्न दृश्यते क्वचित्क्वचित्प्रदृश्यते क्वचिद्भयं प्रदर्शयेत्क्वचिद्धयान्प्रमर्दयेत्
kvacitkvacinna dṛśyate kvacitkvacitpradṛśyate kvacidbhayaṃ pradarśayetkvaciddhayānpramardayet
Sanskrit only: no published translation is held for this verse.
मर्दयित्वा भटान्वीरान्वाराहो रणदुर्जयः । शब्दं चकारदुर्धषं क्रोधारुणविलोचनः
mardayitvā bhaṭānvīrānvārāho raṇadurjayaḥ | śabdaṃ cakāradurdhaṣaṃ krodhāruṇavilocanaḥ
Sanskrit only: no published translation is held for this verse.
कोशलाधिपतिर्वीरस्तं दृष्ट्वा रणदुर्जयम् । युध्यमानं महाकायं मुचंतं मेघवत्स्वनम्
kośalādhipatirvīrastaṃ dṛṣṭvā raṇadurjayam | yudhyamānaṃ mahākāyaṃ mucaṃtaṃ meghavatsvanam
Sanskrit only: no published translation is held for this verse.
गर्जतिसमरं विचरति विलसति वीरान्स्वतेजसा धीरः । तडिदिव मुखेषु दंष्ट्रा तस्य विभात्युल्लसत्येव
garjatisamaraṃ vicarati vilasati vīrānsvatejasā dhīraḥ | taḍidiva mukheṣu daṃṣṭrā tasya vibhātyullasatyeva
Sanskrit only: no published translation is held for this verse.
मनुपुत्रस्तथा दृष्ट्वा कोलं च निशितैः शरैः । प्रतिभिन्नमेकैकं शस्त्राहतं च बंधुभिः
manuputrastathā dṛṣṭvā kolaṃ ca niśitaiḥ śaraiḥ | pratibhinnamekaikaṃ śastrāhataṃ ca baṃdhubhiḥ
Sanskrit only: no published translation is held for this verse.
नरपतिरुवाच सैन्याः किमिह न गृह्णंतु ओजसा शूराः । युध्यध्वं तत्र निशितैर्बाणैस्तीक्ष्णैरनेनापि
narapatiruvāca sainyāḥ kimiha na gṛhṇaṃtu ojasā śūrāḥ | yudhyadhvaṃ tatra niśitairbāṇaistīkṣṇairanenāpi
Sanskrit only: no published translation is held for this verse.
समाकर्ण्य ततो वाक्यं क्रुद्धस्यापि महात्मनः । ततस्ते सैनिकाः सर्वे युद्धाय समुपस्थिताः
samākarṇya tato vākyaṃ kruddhasyāpi mahātmanaḥ | tataste sainikāḥ sarve yuddhāya samupasthitāḥ
Sanskrit only: no published translation is held for this verse.
अनेकैर्भटसाहस्रैर्वने तं समरे स्थितम् । दिक्षु सर्वासु संहत्य बिभिदुः शूकरं रणे
anekairbhaṭasāhasrairvane taṃ samare sthitam | dikṣu sarvāsu saṃhatya bibhiduḥ śūkaraṃ raṇe
Sanskrit only: no published translation is held for this verse.
विद्धश्च कैश्चित्तदा बाणजालैः सुयोधैश्च संग्रामभूमौ विशालैः । क्वचिच्चक्रघातैः क्वचिद्वज्रपातैर्हतं दुर्जयं संगरे तं महांतैः
viddhaśca kaiścittadā bāṇajālaiḥ suyodhaiśca saṃgrāmabhūmau viśālaiḥ | kvaciccakraghātaiḥ kvacidvajrapātairhataṃ durjayaṃ saṃgare taṃ mahāṃtaiḥ
Sanskrit only: no published translation is held for this verse.
ततः पौरुषैः क्रोधयुक्तः स कोलः सुविच्छिद्य पाशान्रणे प्रस्थितः सः । महाशूकरैः सार्धमेव प्रयातस्ततः शोणितस्यापि धाराभिषिक्तः
tataḥ pauruṣaiḥ krodhayuktaḥ sa kolaḥ suvicchidya pāśānraṇe prasthitaḥ saḥ | mahāśūkaraiḥ sārdhameva prayātastataḥ śoṇitasyāpi dhārābhiṣiktaḥ
Sanskrit only: no published translation is held for this verse.
करोति प्रहारं च तुंडेन वीरहयानां द्विपानां च चिच्छेद वीरः । स्वदंष्ट्राग्रभागेन तीक्ष्णेन वीरान्पदातीन्हि संपातयेद्रोषभावैः
karoti prahāraṃ ca tuṃḍena vīrahayānāṃ dvipānāṃ ca ciccheda vīraḥ | svadaṃṣṭrāgrabhāgena tīkṣṇena vīrānpadātīnhi saṃpātayedroṣabhāvaiḥ
Sanskrit only: no published translation is held for this verse.
जघानास्य शुंडं गजस्यापि रुष्टो भटान्हतान्पादनखैस्तु हृष्टः
jaghānāsya śuṃḍaṃ gajasyāpi ruṣṭo bhaṭānhatānpādanakhaistu hṛṣṭaḥ
Sanskrit only: no published translation is held for this verse.
ततस्ते शूकराः सर्वे लुब्धकाश्च परस्परम् । युयुधुः संगरं कृत्वा क्रोधारुणविलोचनाः
tataste śūkarāḥ sarve lubdhakāśca parasparam | yuyudhuḥ saṃgaraṃ kṛtvā krodhāruṇavilocanāḥ
Sanskrit only: no published translation is held for this verse.
लुब्धकैश्च हताः कोलाः कोलैश्चापि सुलुब्धकाः । निहताः पतिता भूमौ क्षतजेनापि सारुणाः
lubdhakaiśca hatāḥ kolāḥ kolaiścāpi sulubdhakāḥ | nihatāḥ patitā bhūmau kṣatajenāpi sāruṇāḥ
Sanskrit only: no published translation is held for this verse.
जीवं त्यक्त्वा हताः कोलैर्लुब्धकाः पतिता रणे । मृताश्च शूकरास्तत्र श्वानः प्राणांश्च तत्यजुः
jīvaṃ tyaktvā hatāḥ kolairlubdhakāḥ patitā raṇe | mṛtāśca śūkarāstatra śvānaḥ prāṇāṃśca tatyajuḥ
Sanskrit only: no published translation is held for this verse.
यत्रयत्र मृता भूमौ पतिता मृगघातकाः । बहवः शूकरा राज्ञा खड्गपातैर्निपातिताः
yatrayatra mṛtā bhūmau patitā mṛgaghātakāḥ | bahavaḥ śūkarā rājñā khaḍgapātairnipātitāḥ
Sanskrit only: no published translation is held for this verse.
कति नष्टा हताः कोला भीता दुर्गेषु संस्थिताः । कुंजेषु कंदरांतेषु गुहांतेषु नृपोत्तम
kati naṣṭā hatāḥ kolā bhītā durgeṣu saṃsthitāḥ | kuṃjeṣu kaṃdarāṃteṣu guhāṃteṣu nṛpottama
Sanskrit only: no published translation is held for this verse.
लुब्धकाश्च मृताः केचिच्छिन्ना दंष्ट्राग्रसूकरैः । प्राणांस्त्यक्त्वा गताः स्वर्गं खंडशो विदलीकृताः
lubdhakāśca mṛtāḥ kecicchinnā daṃṣṭrāgrasūkaraiḥ | prāṇāṃstyaktvā gatāḥ svargaṃ khaṃḍaśo vidalīkṛtāḥ
Sanskrit only: no published translation is held for this verse.
वागुराः पाशजालाश्च कुटकाः पंजरास्तथा । नाड्यश्च पतिता भूमौ यत्रतत्र समंततः
vāgurāḥ pāśajālāśca kuṭakāḥ paṃjarāstathā | nāḍyaśca patitā bhūmau yatratatra samaṃtataḥ
Sanskrit only: no published translation is held for this verse.
एको दयितया सार्धं वाराहः परितिष्ठति । पौत्रकैः पंचसप्तभिर्युद्धार्थं बलदर्पितः
eko dayitayā sārdhaṃ vārāhaḥ paritiṣṭhati | pautrakaiḥ paṃcasaptabhiryuddhārthaṃ baladarpitaḥ
Sanskrit only: no published translation is held for this verse.
तमुवाच तदा कांतं शूकरं शूकरी पुनः । गच्छ कांत मयासार्द्धमेभिस्तु बालकैः सह
tamuvāca tadā kāṃtaṃ śūkaraṃ śūkarī punaḥ | gaccha kāṃta mayāsārddhamebhistu bālakaiḥ saha
Sanskrit only: no published translation is held for this verse.
प्राह प्रीतो वराहस्तां विवस्तां सुप्रियामिति । क्व गच्छामि प्रभग्नोहं स्थानं नास्ति महीतले
prāha prīto varāhastāṃ vivastāṃ supriyāmiti | kva gacchāmi prabhagnohaṃ sthānaṃ nāsti mahītale
Sanskrit only: no published translation is held for this verse.
मयि नष्टे महाभागे कोलयूथं विनंक्ष्यति । द्वयोश्च सिंहयोर्मध्ये जलं पिबति शूकरः
mayi naṣṭe mahābhāge kolayūthaṃ vinaṃkṣyati | dvayośca siṃhayormadhye jalaṃ pibati śūkaraḥ
Sanskrit only: no published translation is held for this verse.
द्वयोः शूकरयोर्मध्ये सिंहो नैव पिबत्यपः । एवं शूकरजातीषु दृश्यते बलमुत्तमम्
dvayoḥ śūkarayormadhye siṃho naiva pibatyapaḥ | evaṃ śūkarajātīṣu dṛśyate balamuttamam
Sanskrit only: no published translation is held for this verse.
तदहं नाशयाम्येव यदा भग्नो व्रजाम्यहम् । जाने धर्मं महाभागे बहुश्रेयोविधायकम्
tadahaṃ nāśayāmyeva yadā bhagno vrajāmyaham | jāne dharmaṃ mahābhāge bahuśreyovidhāyakam
Sanskrit only: no published translation is held for this verse.
कस्माल्लोभाद्भयाद्वापि युध्यमानः प्रणश्यति । रणतीर्थं परित्यज्य सस्यात्पापी न संशयः
kasmāllobhādbhayādvāpi yudhyamānaḥ praṇaśyati | raṇatīrthaṃ parityajya sasyātpāpī na saṃśayaḥ
Sanskrit only: no published translation is held for this verse.
निशितं शस्त्रसंव्यूहं दृष्ट्वा हर्षं प्रगच्छति । अवगाह्यामरीं सिंधुं तीर्थपारं प्रगच्छति
niśitaṃ śastrasaṃvyūhaṃ dṛṣṭvā harṣaṃ pragacchati | avagāhyāmarīṃ siṃdhuṃ tīrthapāraṃ pragacchati
Sanskrit only: no published translation is held for this verse.
स याति वैष्णवं लोकं पुरुषांश्च समुद्धरेत् । समायांतं च तदहं कथं भग्नो व्रजामि वै
sa yāti vaiṣṇavaṃ lokaṃ puruṣāṃśca samuddharet | samāyāṃtaṃ ca tadahaṃ kathaṃ bhagno vrajāmi vai
Sanskrit only: no published translation is held for this verse.
योधनं शस्त्रसंकीर्णं प्रवीरानन्ददायकम् । दृष्ट्वा प्रयाति संहृष्टस्तस्य पुण्यफलं शृणु
yodhanaṃ śastrasaṃkīrṇaṃ pravīrānandadāyakam | dṛṣṭvā prayāti saṃhṛṣṭastasya puṇyaphalaṃ śṛṇu
Sanskrit only: no published translation is held for this verse.
पदेपदे महत्स्नानं भागीरथ्याः प्रजायते । रणाद्भग्नो गृहं याति यो लोभाच्च प्रिये शृणु
padepade mahatsnānaṃ bhāgīrathyāḥ prajāyate | raṇādbhagno gṛhaṃ yāti yo lobhācca priye śṛṇu
Sanskrit only: no published translation is held for this verse.
मातृदोषं प्रकाशेत स्त्रीजातः परिकथ्यते । अत्र यज्ञाश्च तीर्थाश्च अत्र देवा महौजसः
mātṛdoṣaṃ prakāśeta strījātaḥ parikathyate | atra yajñāśca tīrthāśca atra devā mahaujasaḥ
Sanskrit only: no published translation is held for this verse.
पश्यंति कौतुकं कांते मुनयः सिद्धचारणाः । त्रैलोक्यं वर्तते तत्र यत्र वीरप्रकाशनम्
paśyaṃti kautukaṃ kāṃte munayaḥ siddhacāraṇāḥ | trailokyaṃ vartate tatra yatra vīraprakāśanam
Sanskrit only: no published translation is held for this verse.
समराद्भग्नं प्रपश्यंति सर्वे त्रैलोक्यवासिनः । शपंति निर्घृणं पापं प्रहसन्ति पुनःपुनः
samarādbhagnaṃ prapaśyaṃti sarve trailokyavāsinaḥ | śapaṃti nirghṛṇaṃ pāpaṃ prahasanti punaḥpunaḥ
Sanskrit only: no published translation is held for this verse.
दुर्गतिं दर्शयेत्तस्य धर्मराजो न संशयः । सम्मुखः समरे युद्धे स्वशिरः शोणितं पिबेत्
durgatiṃ darśayettasya dharmarājo na saṃśayaḥ | sammukhaḥ samare yuddhe svaśiraḥ śoṇitaṃ pibet
Sanskrit only: no published translation is held for this verse.
अश्वमेधफलं भुंक्ते इंद्रलोकं प्रगच्छति । यदा जयति संग्रामे शत्रूञ्छूरो वरानने
aśvamedhaphalaṃ bhuṃkte iṃdralokaṃ pragacchati | yadā jayati saṃgrāme śatrūñchūro varānane
Sanskrit only: no published translation is held for this verse.
तदा प्रभुंजते लक्ष्मीं नानाभोगान्न संशयः । यदा तत्र त्यजेत्प्राणान्सम्मुखः सन्निराश्रयः
tadā prabhuṃjate lakṣmīṃ nānābhogānna saṃśayaḥ | yadā tatra tyajetprāṇānsammukhaḥ sannirāśrayaḥ
Sanskrit only: no published translation is held for this verse.
स गच्छेत्परमं स्थानं देवकन्यां प्रभुंजते । एवं धर्मं विजानामि कथं भग्नो व्रजाम्यहम्
sa gacchetparamaṃ sthānaṃ devakanyāṃ prabhuṃjate | evaṃ dharmaṃ vijānāmi kathaṃ bhagno vrajāmyaham
Sanskrit only: no published translation is held for this verse.
अनेन समरे युद्धं करिष्ये नात्र संशयः । मनोः पुत्रेण धीरेण राज्ञा इक्ष्वाकुणा सह
anena samare yuddhaṃ kariṣye nātra saṃśayaḥ | manoḥ putreṇa dhīreṇa rājñā ikṣvākuṇā saha
Sanskrit only: no published translation is held for this verse.
डिंभान्गृहीत्वा याहि त्वं सुखं जीव वरानने । तस्य श्रुत्वा वचः प्राह बद्धाहं तव बंधनैः
ḍiṃbhāngṛhītvā yāhi tvaṃ sukhaṃ jīva varānane | tasya śrutvā vacaḥ prāha baddhāhaṃ tava baṃdhanaiḥ
Sanskrit only: no published translation is held for this verse.
स्नेहमानरसाख्यैश्च रतिक्रीडनकैः प्रिय । पुरतस्ते सुतैः सार्द्धं प्राणांस्त्यक्ष्यामि मानद
snehamānarasākhyaiśca ratikrīḍanakaiḥ priya | purataste sutaiḥ sārddhaṃ prāṇāṃstyakṣyāmi mānada
Sanskrit only: no published translation is held for this verse.
एवमेतौ सुसंभाष्य परस्परहितैषिणौ । युद्धाय निश्चितौ भूत्वा समालोकयतो रिपून्
evametau susaṃbhāṣya parasparahitaiṣiṇau | yuddhāya niścitau bhūtvā samālokayato ripūn
Sanskrit only: no published translation is held for this verse.
कोशलाधिपतिं वीरं तमिक्ष्वाकुं महामतिम्
kośalādhipatiṃ vīraṃ tamikṣvākuṃ mahāmatim
Sanskrit only: no published translation is held for this verse.
यथैव मेघः परिगर्जते दिवि प्रावृट्सुकालेषु तडित्प्रकाशैः । तथैव संगर्जति कांतया समं समाह्वयेद्राजवरं खुराग्रैः
yathaiva meghaḥ parigarjate divi prāvṛṭsukāleṣu taḍitprakāśaiḥ | tathaiva saṃgarjati kāṃtayā samaṃ samāhvayedrājavaraṃ khurāgraiḥ
Sanskrit only: no published translation is held for this verse.
तं गर्जमानं ददृशे महात्मा वाराहमेकं पुरुषार्थयुक्तम् । ससार अश्वस्य जवेनयुक्तः ससम्मुखं तस्य नृवीरधीरः
taṃ garjamānaṃ dadṛśe mahātmā vārāhamekaṃ puruṣārthayuktam | sasāra aśvasya javenayuktaḥ sasammukhaṃ tasya nṛvīradhīraḥ
Sanskrit only: no published translation is held for this verse.