Padma Purāṇa 2.51

ब्राह्मण्युवाच- गते तस्मिन्दुराचारे गोभिले पापचेतसि । पद्मावती रुरोदाथ दुःखेन महतान्विता

brāhmaṇyuvāca- gate tasmindurācāre gobhile pāpacetasi | padmāvatī rurodātha duḥkhena mahatānvitā

Sanskrit only: no published translation is held for this verse.

तस्यास्तु रुदितं श्रुत्वा सख्यः सर्वा द्विजोत्तम । पप्रच्छुस्तां राजकन्यां ताः सर्वाश्च वराननाः

tasyāstu ruditaṃ śrutvā sakhyaḥ sarvā dvijottama | papracchustāṃ rājakanyāṃ tāḥ sarvāśca varānanāḥ

Sanskrit only: no published translation is held for this verse.

कस्माद्रोदिषि भद्रं ते कथयस्व हि चेष्टितम् । क्व गतोऽसौ महाराजो माथुराधिपतिस्तव

kasmādrodiṣi bhadraṃ te kathayasva hi ceṣṭitam | kva gato'sau mahārājo māthurādhipatistava

Sanskrit only: no published translation is held for this verse.

येन त्वं हि समाहूता प्रियेत्युक्त्वा वदस्व नः । ता उवाच सुदुःखेन रोदमाना पुनः पुनः

yena tvaṃ hi samāhūtā priyetyuktvā vadasva naḥ | tā uvāca suduḥkhena rodamānā punaḥ punaḥ

Sanskrit only: no published translation is held for this verse.

तया आवेदितं सर्वं यज्जातं दोषसंभवम् । ताभिर्नीता पितुर्गेहं वेपमाना सुदुःखिता

tayā āveditaṃ sarvaṃ yajjātaṃ doṣasaṃbhavam | tābhirnītā piturgehaṃ vepamānā suduḥkhitā

Sanskrit only: no published translation is held for this verse.

मातुः समक्षं तस्यास्तु आचचक्षुस्तदा स्त्रियः । समाकर्ण्य ततो देवी गता सा भर्तृमंदिरम्

mātuḥ samakṣaṃ tasyāstu ācacakṣustadā striyaḥ | samākarṇya tato devī gatā sā bhartṛmaṃdiram

Sanskrit only: no published translation is held for this verse.

भर्तारं श्रावयामास सुतावृत्तांतमेव हि । समाकर्ण्य ततो राजा महादुःखी अजायत

bhartāraṃ śrāvayāmāsa sutāvṛttāṃtameva hi | samākarṇya tato rājā mahāduḥkhī ajāyata

Sanskrit only: no published translation is held for this verse.

यानाच्छादनकं दत्वा परिवारसमन्विताम् । मथुरां प्रेषयामास गता सा प्रियमंदिरम्

yānācchādanakaṃ datvā parivārasamanvitām | mathurāṃ preṣayāmāsa gatā sā priyamaṃdiram

Sanskrit only: no published translation is held for this verse.

सुतादोषं समाच्छाद्य पितामाता द्विजोत्तम । उग्रसेनस्तु धर्मात्मा पद्मावतीं समागताम्

sutādoṣaṃ samācchādya pitāmātā dvijottama | ugrasenastu dharmātmā padmāvatīṃ samāgatām

Sanskrit only: no published translation is held for this verse.

स दृष्ट्वा मुमुदे चाशु उवाचेदं वचः पुनः । त्वया विना न शक्तोस्मि जीवितुं हि वरानने

sa dṛṣṭvā mumude cāśu uvācedaṃ vacaḥ punaḥ | tvayā vinā na śaktosmi jīvituṃ hi varānane

Sanskrit only: no published translation is held for this verse.

बहुप्रभासि मे प्रीता गुणशीलैस्तु सर्वदा । भक्त्या सत्येन ते कांते पतिदैवत्यकैर्गुणैः

bahuprabhāsi me prītā guṇaśīlaistu sarvadā | bhaktyā satyena te kāṃte patidaivatyakairguṇaiḥ

Sanskrit only: no published translation is held for this verse.

समाभाष्य प्रियां भार्यां पद्मावतीं नरेश्वरः । तया सार्धं स वै रेमे उग्रसेनो नृपोत्तमः

samābhāṣya priyāṃ bhāryāṃ padmāvatīṃ nareśvaraḥ | tayā sārdhaṃ sa vai reme ugraseno nṛpottamaḥ

Sanskrit only: no published translation is held for this verse.

ववृधे दारुणो गर्भः सर्वलोकभयप्रदः । पद्मावती विजानाति तस्य गर्भस्य कारणम्

vavṛdhe dāruṇo garbhaḥ sarvalokabhayapradaḥ | padmāvatī vijānāti tasya garbhasya kāraṇam

Sanskrit only: no published translation is held for this verse.

स्वोदरे वर्द्धमानस्य चिंतयंती दिवानिशम् । अनेन किमु जातेन लोकनाशकरेण वै

svodare varddhamānasya ciṃtayaṃtī divāniśam | anena kimu jātena lokanāśakareṇa vai

Sanskrit only: no published translation is held for this verse.

अनेनापि न मे कार्यं दुष्टपुत्रेण सांप्रतम् । औषधीं पृच्छते सा तु गर्भपातस्य सर्वतः

anenāpi na me kāryaṃ duṣṭaputreṇa sāṃpratam | auṣadhīṃ pṛcchate sā tu garbhapātasya sarvataḥ

Sanskrit only: no published translation is held for this verse.

नारी महौषधीं सा हि विंदंती च दिने दिने । गर्भस्य पातनायैव उपाया बहुशः कृताः

nārī mahauṣadhīṃ sā hi viṃdaṃtī ca dine dine | garbhasya pātanāyaiva upāyā bahuśaḥ kṛtāḥ

Sanskrit only: no published translation is held for this verse.

ववृधे दारुणो गर्भः सर्वलोकभयंकरः । तामुवाच ततो गर्भः पद्मावतीं च मातरम्

vavṛdhe dāruṇo garbhaḥ sarvalokabhayaṃkaraḥ | tāmuvāca tato garbhaḥ padmāvatīṃ ca mātaram

Sanskrit only: no published translation is held for this verse.

कस्मात्त्वं व्यथसे मातरौषधीभिर्दिनेदिने । पुण्येन वर्द्धते चायुः पापेनाल्पं तु जीवितम्

kasmāttvaṃ vyathase mātarauṣadhībhirdinedine | puṇyena varddhate cāyuḥ pāpenālpaṃ tu jīvitam

Sanskrit only: no published translation is held for this verse.

आत्मकर्मविपाकेन जीवंति च म्रियंति च । आमगर्भाः प्रयांत्यन्ये अपक्वास्तु महीतले

ātmakarmavipākena jīvaṃti ca mriyaṃti ca | āmagarbhāḥ prayāṃtyanye apakvāstu mahītale

Sanskrit only: no published translation is held for this verse.

जातमात्रा म्रियंतेऽन्ये कति ते यौवनान्विताः । बाला वृद्धाश्च तरुणा आयुषोवशतां गताः

jātamātrā mriyaṃte'nye kati te yauvanānvitāḥ | bālā vṛddhāśca taruṇā āyuṣovaśatāṃ gatāḥ

Sanskrit only: no published translation is held for this verse.

सर्वे कर्मविपाकेन जीवंति च म्रियंति च । ओषध्यो मंत्रदेवाश्च निमित्ताः स्युर्न संशयः

sarve karmavipākena jīvaṃti ca mriyaṃti ca | oṣadhyo maṃtradevāśca nimittāḥ syurna saṃśayaḥ

Sanskrit only: no published translation is held for this verse.

मामेव हि न जानासि भवती यादृशो ह्यहम् । दृष्टः श्रुतस्त्वया पूर्वं कालनेमिर्महाबलः

māmeva hi na jānāsi bhavatī yādṛśo hyaham | dṛṣṭaḥ śrutastvayā pūrvaṃ kālanemirmahābalaḥ

Sanskrit only: no published translation is held for this verse.

दानवानां महावीर्यस्त्रैलोक्यस्य भयप्रदः । देवासुरे महायुद्धे हतोहं विष्णुना पुरा

dānavānāṃ mahāvīryastrailokyasya bhayapradaḥ | devāsure mahāyuddhe hatohaṃ viṣṇunā purā

Sanskrit only: no published translation is held for this verse.

साधयितुं च तद्वैरमागतोऽस्मि तवोदरम् । साहसं च श्रमं मातर्मा कुरुष्व दिन दिने

sādhayituṃ ca tadvairamāgato'smi tavodaram | sāhasaṃ ca śramaṃ mātarmā kuruṣva dina dine

Sanskrit only: no published translation is held for this verse.

एवमुक्त्वा द्विजश्रेष्ठ मातरं विरराम सः । मातोद्यमं परित्यज्य महादुःखादभूत्तदा

evamuktvā dvijaśreṣṭha mātaraṃ virarāma saḥ | mātodyamaṃ parityajya mahāduḥkhādabhūttadā

Sanskrit only: no published translation is held for this verse.

दशाब्दाश्च गता यावत्तावद्वृद्धिमवाप्तवान् । पश्चाज्जज्ञे महातेजाः कंसोभूत्स महाबलः

daśābdāśca gatā yāvattāvadvṛddhimavāptavān | paścājjajñe mahātejāḥ kaṃsobhūtsa mahābalaḥ

Sanskrit only: no published translation is held for this verse.

येन संत्रासिता लोकास्त्रैलोक्यस्य निवासिनः । यो हतो वासुदेवेन गतो मोक्षं न संशयः

yena saṃtrāsitā lokāstrailokyasya nivāsinaḥ | yo hato vāsudevena gato mokṣaṃ na saṃśayaḥ

Sanskrit only: no published translation is held for this verse.

एवं श्रुतं मया कांत भविष्यं तु भविष्यति । पुराणेष्वेव सर्वेषु निश्चितं कथितं तव

evaṃ śrutaṃ mayā kāṃta bhaviṣyaṃ tu bhaviṣyati | purāṇeṣveva sarveṣu niścitaṃ kathitaṃ tava

Sanskrit only: no published translation is held for this verse.

पितृगेहेस्थिता कन्या नाशमेवं प्रयाति सा । गृहावासाय मे कांत कन्या मोहं न कारयेत्

pitṛgehesthitā kanyā nāśamevaṃ prayāti sā | gṛhāvāsāya me kāṃta kanyā mohaṃ na kārayet

Sanskrit only: no published translation is held for this verse.

इमां दुष्टां महापापां परित्यज्य स्थिरो भव । प्राप्तव्यं तु महापापं दुःखं दारुणमेव च

imāṃ duṣṭāṃ mahāpāpāṃ parityajya sthiro bhava | prāptavyaṃ tu mahāpāpaṃ duḥkhaṃ dāruṇameva ca

Sanskrit only: no published translation is held for this verse.

लोके श्रेयःकरं कांत तद्भुंक्ष्व त्वं मया सह । शूकर्युवाच- एतद्वाक्यं सुमंत्रं तु श्रुत्वा स हि द्विजोत्तमः

loke śreyaḥkaraṃ kāṃta tadbhuṃkṣva tvaṃ mayā saha | śūkaryuvāca- etadvākyaṃ sumaṃtraṃ tu śrutvā sa hi dvijottamaḥ

Sanskrit only: no published translation is held for this verse.

त्यागे मतिं चकारासौ समाहूता ह्यहं तदा । सकलं वस्त्रशृंगारं मम दत्तं शुभे शृणु

tyāge matiṃ cakārāsau samāhūtā hyahaṃ tadā | sakalaṃ vastraśṛṃgāraṃ mama dattaṃ śubhe śṛṇu

Sanskrit only: no published translation is held for this verse.

तवैव दुर्नयैर्विप्रः शिवशर्मा द्विजोत्तमः । गतो वै मतिमान्दुष्टे कुलदुष्टप्रचारिणि

tavaiva durnayairvipraḥ śivaśarmā dvijottamaḥ | gato vai matimānduṣṭe kuladuṣṭapracāriṇi

Sanskrit only: no published translation is held for this verse.

यत्र ते तिष्ठते भर्ता तत्र गच्छ न संशयः । तव यद्रोचते स्थानं यथादिष्टं तथा कुरु

yatra te tiṣṭhate bhartā tatra gaccha na saṃśayaḥ | tava yadrocate sthānaṃ yathādiṣṭaṃ tathā kuru

Sanskrit only: no published translation is held for this verse.

एवमुक्त्वा महाभागे पितृमातृकुटुंबकैः । परित्यक्ता गता शीघ्रं निर्लज्जाहं वरानने

evamuktvā mahābhāge pitṛmātṛkuṭuṃbakaiḥ | parityaktā gatā śīghraṃ nirlajjāhaṃ varānane

Sanskrit only: no published translation is held for this verse.

न लभाम्यहमेवापि वासस्थानं सुखं शुभे । भर्त्सयंति च मां लोकाः पुंश्चलीयं समागता

na labhāmyahamevāpi vāsasthānaṃ sukhaṃ śubhe | bhartsayaṃti ca māṃ lokāḥ puṃścalīyaṃ samāgatā

Sanskrit only: no published translation is held for this verse.

अटमाना गता देशात्कुलमानेन वर्जिता । देशे गुर्जरके पुण्ये सौराष्ट्रे शिवमंदिरे

aṭamānā gatā deśātkulamānena varjitā | deśe gurjarake puṇye saurāṣṭre śivamaṃdire

Sanskrit only: no published translation is held for this verse.

वनस्थलेति विख्यातं नगरं वृद्धिसंकुलम् । अतीव पीडिता देवि क्षुधयाहं तदा शृणु

vanasthaleti vikhyātaṃ nagaraṃ vṛddhisaṃkulam | atīva pīḍitā devi kṣudhayāhaṃ tadā śṛṇu

Sanskrit only: no published translation is held for this verse.

कर्परं हि करे गृह्य भिक्षार्थमुपचक्रमे । गृहिणां द्वारदेशेषु प्रविशामि सुदुःखिता

karparaṃ hi kare gṛhya bhikṣārthamupacakrame | gṛhiṇāṃ dvāradeśeṣu praviśāmi suduḥkhitā

Sanskrit only: no published translation is held for this verse.

मम रूपं विपश्यंति लोकाः कुत्संति भामिनि । न ददंते च मे भिक्षां पापा चेयं समागता

mama rūpaṃ vipaśyaṃti lokāḥ kutsaṃti bhāmini | na dadaṃte ca me bhikṣāṃ pāpā ceyaṃ samāgatā

Sanskrit only: no published translation is held for this verse.

एवं दुःखसमाहारा दारिद्र्यपरिपीडिता । अटंत्या च मया दृष्टं गृहमेकमनुत्तमम्

evaṃ duḥkhasamāhārā dāridryaparipīḍitā | aṭaṃtyā ca mayā dṛṣṭaṃ gṛhamekamanuttamam

Sanskrit only: no published translation is held for this verse.

तुंगप्राकारसंवेष्टं वेदशालासमन्वितम् । वेदध्वनिसमाकीर्णं बहुविप्रसमाकुलम्

tuṃgaprākārasaṃveṣṭaṃ vedaśālāsamanvitam | vedadhvanisamākīrṇaṃ bahuviprasamākulam

Sanskrit only: no published translation is held for this verse.

धनधान्यसमाकीर्णं दासीदासैरलंकृतम् । प्रविवेश गृहं रम्यं लक्ष्मीमुदितमेव तत्

dhanadhānyasamākīrṇaṃ dāsīdāsairalaṃkṛtam | praviveśa gṛhaṃ ramyaṃ lakṣmīmuditameva tat

Sanskrit only: no published translation is held for this verse.

तद्गृहं सर्वतोभद्रं तस्यैव शिवशर्मणः । भिक्षां देहीत्युवाचाथ सुदेवा दुःखपीडिता

tadgṛhaṃ sarvatobhadraṃ tasyaiva śivaśarmaṇaḥ | bhikṣāṃ dehītyuvācātha sudevā duḥkhapīḍitā

Sanskrit only: no published translation is held for this verse.

शिवशर्माथ शुश्राव भिक्षाशब्दं द्विजोत्तमः । मंगलां नाम वै भार्यां लक्ष्मीरूपां वराननाम्

śivaśarmātha śuśrāva bhikṣāśabdaṃ dvijottamaḥ | maṃgalāṃ nāma vai bhāryāṃ lakṣmīrūpāṃ varānanām

Sanskrit only: no published translation is held for this verse.

तां हसन्प्राह धर्मात्मा शिवशर्मा महामतिः । इयं हि दुर्बला प्राप्ता भिक्षार्थं द्वारमागता

tāṃ hasanprāha dharmātmā śivaśarmā mahāmatiḥ | iyaṃ hi durbalā prāptā bhikṣārthaṃ dvāramāgatā

Sanskrit only: no published translation is held for this verse.

समाहूय प्रिये चैनां देहि त्वं भोजनं शुभे । कृपया परयाविष्टा ज्ञात्वा मां तु समागताम्

samāhūya priye caināṃ dehi tvaṃ bhojanaṃ śubhe | kṛpayā parayāviṣṭā jñātvā māṃ tu samāgatām

Sanskrit only: no published translation is held for this verse.

प्रोवाच मंगला कांतं दास्यामि प्रिय भोजनम् । एवमुक्त्वा च भर्तारं मंगला मंगलान्विता

provāca maṃgalā kāṃtaṃ dāsyāmi priya bhojanam | evamuktvā ca bhartāraṃ maṃgalā maṃgalānvitā

Sanskrit only: no published translation is held for this verse.

पुनर्मां भोजयामास मिष्टान्नेन सुदुर्बलाम् । मामुवाच स धर्मात्मा शिवशर्मा महामुनिः

punarmāṃ bhojayāmāsa miṣṭānnena sudurbalām | māmuvāca sa dharmātmā śivaśarmā mahāmuniḥ

Sanskrit only: no published translation is held for this verse.

का त्वमत्र समायाता कस्य वा भ्रमसे जगत् । केन कार्येण सर्वत्र कथयस्व ममाग्रतः

kā tvamatra samāyātā kasya vā bhramase jagat | kena kāryeṇa sarvatra kathayasva mamāgrataḥ

Sanskrit only: no published translation is held for this verse.

एवमाकर्ण्य तद्वाक्यं भर्तुश्चैव महात्मनः । स्वरेण लक्षितः कांतो मया वै पापया तदा

evamākarṇya tadvākyaṃ bhartuścaiva mahātmanaḥ | svareṇa lakṣitaḥ kāṃto mayā vai pāpayā tadā

Sanskrit only: no published translation is held for this verse.

व्रीडयाधोमुखीजाता दृष्टो भर्ता यदा मया । मंगला चारुसर्वांगी भर्तारमिदमब्रवीत्

vrīḍayādhomukhījātā dṛṣṭo bhartā yadā mayā | maṃgalā cārusarvāṃgī bhartāramidamabravīt

Sanskrit only: no published translation is held for this verse.

का चेयं हि समाचक्ष्व त्वां दृष्ट्वा हि विलज्जति । कथयस्व प्रसादेन का च एषा भविष्यति

kā ceyaṃ hi samācakṣva tvāṃ dṛṣṭvā hi vilajjati | kathayasva prasādena kā ca eṣā bhaviṣyati

Sanskrit only: no published translation is held for this verse.