Library·Padma Purāṇa·2·2.52
शिवशर्मोवाच-। मंगले श्रूयतां वाक्यं यदि पृच्छसि सांप्रतम् । यदर्थं हि त्वया पृष्टं तन्निबोध वरानने
śivaśarmovāca-| maṃgale śrūyatāṃ vākyaṃ yadi pṛcchasi sāṃpratam | yadarthaṃ hi tvayā pṛṣṭaṃ tannibodha varānane
Sanskrit only: no published translation is held for this verse.
इयं हि सांप्रतं प्राप्ता वराकी भिक्षुरूपिणी । वसुदत्तस्य विप्रस्य सुतेयं चारुलोचने
iyaṃ hi sāṃprataṃ prāptā varākī bhikṣurūpiṇī | vasudattasya viprasya suteyaṃ cārulocane
Sanskrit only: no published translation is held for this verse.
सुदेवा नाम भद्रेयं मम जाया प्रिया सदा । केनापि कारणेनैव देशं त्यक्त्वा समागता
sudevā nāma bhadreyaṃ mama jāyā priyā sadā | kenāpi kāraṇenaiva deśaṃ tyaktvā samāgatā
Sanskrit only: no published translation is held for this verse.
ममदुःखेन दग्धेयं वियोगेन वरानने । मां ज्ञात्वा तु समायाता भिक्षुरूपेण ते गृहम्
mamaduḥkhena dagdheyaṃ viyogena varānane | māṃ jñātvā tu samāyātā bhikṣurūpeṇa te gṛham
Sanskrit only: no published translation is held for this verse.
एवं ज्ञात्वा त्वया भद्रे आतिथ्यं परिशोभितम् । कर्त्तव्यं न च संदेह इच्छंत्या मम सुप्रियम्
evaṃ jñātvā tvayā bhadre ātithyaṃ pariśobhitam | karttavyaṃ na ca saṃdeha icchaṃtyā mama supriyam
Sanskrit only: no published translation is held for this verse.
भर्तुर्वाक्यं निशम्यैव मंगला पतिदेवता । हर्षेण महताविष्टा स्वयमेव सुमंगला
bharturvākyaṃ niśamyaiva maṃgalā patidevatā | harṣeṇa mahatāviṣṭā svayameva sumaṃgalā
Sanskrit only: no published translation is held for this verse.
स्नानाच्छादन भोज्यं च मम चक्रे वरानने । रत्नकांचनयुक्तैश्चाभरणैश्च पतिव्रता
snānācchādana bhojyaṃ ca mama cakre varānane | ratnakāṃcanayuktaiścābharaṇaiśca pativratā
Sanskrit only: no published translation is held for this verse.
अहं हि भूषिता भद्रे तयैव पतिकाम्यया । तयाहं भूषिता देवि मानस्नानैश्च भोजनैः
ahaṃ hi bhūṣitā bhadre tayaiva patikāmyayā | tayāhaṃ bhūṣitā devi mānasnānaiśca bhojanaiḥ
Sanskrit only: no published translation is held for this verse.
भर्त्राहं मानिता देवि जातं दुःखमनंतकम् । ममोरसि महातीव्रं सर्वप्राणविनाशनम्
bhartrāhaṃ mānitā devi jātaṃ duḥkhamanaṃtakam | mamorasi mahātīvraṃ sarvaprāṇavināśanam
Sanskrit only: no published translation is held for this verse.
तस्या मानो मया दृष्टो दुःखमात्मगतं तथा । चिंता मे दारुणा जाता यया प्राणा व्रजंति मे
tasyā māno mayā dṛṣṭo duḥkhamātmagataṃ tathā | ciṃtā me dāruṇā jātā yayā prāṇā vrajaṃti me
Sanskrit only: no published translation is held for this verse.
कदापि वचनं दत्तं न मया पापया शुभम् । अस्यैव विप्रवर्यस्य आचरंत्या च दुष्कृतम्
kadāpi vacanaṃ dattaṃ na mayā pāpayā śubham | asyaiva vipravaryasya ācaraṃtyā ca duṣkṛtam
Sanskrit only: no published translation is held for this verse.
पादप्रक्षालनं नैव अंगसंवाहनं नहि । एकांतं न मया दत्तं तस्यैव हि महात्मनः
pādaprakṣālanaṃ naiva aṃgasaṃvāhanaṃ nahi | ekāṃtaṃ na mayā dattaṃ tasyaiva hi mahātmanaḥ
Sanskrit only: no published translation is held for this verse.
संभाषां कथमस्यैव करिष्ये पापनिश्चया । रात्रौ चैव तदा तत्र पतिता दुःखसागरे
saṃbhāṣāṃ kathamasyaiva kariṣye pāpaniścayā | rātrau caiva tadā tatra patitā duḥkhasāgare
Sanskrit only: no published translation is held for this verse.
एवं हि चिंतमानायाः स्फुटितं हृदयं मम । गताः प्राणास्तदा कायं परित्यज्य वरानने
evaṃ hi ciṃtamānāyāḥ sphuṭitaṃ hṛdayaṃ mama | gatāḥ prāṇāstadā kāyaṃ parityajya varānane
Sanskrit only: no published translation is held for this verse.
तत्र दूताः समायाता धर्मराजस्य वै तदा । वीराश्च दारुणाः क्रूरा गदाचक्रासिधारिणः
tatra dūtāḥ samāyātā dharmarājasya vai tadā | vīrāśca dāruṇāḥ krūrā gadācakrāsidhāriṇaḥ
Sanskrit only: no published translation is held for this verse.
तैस्तु बद्धा महाभागे शृंखलैर्दृढबंधनैः । नीता यमपुरं तैस्तु रुदमाना सुदुःखिता
taistu baddhā mahābhāge śṛṃkhalairdṛḍhabaṃdhanaiḥ | nītā yamapuraṃ taistu rudamānā suduḥkhitā
Sanskrit only: no published translation is held for this verse.
मुद्गरैस्ताड्यमानाहं दुर्गमार्गेण पीडिता । भर्त्स्यमाना यमस्याग्रे तैस्तत्राहं प्रवेशिता
mudgaraistāḍyamānāhaṃ durgamārgeṇa pīḍitā | bhartsyamānā yamasyāgre taistatrāhaṃ praveśitā
Sanskrit only: no published translation is held for this verse.
दृष्टाहं यमराजेन सक्रोधेन महात्मना । अंगारसंचये क्षिप्ता क्षिप्ता नरकसंचये
dṛṣṭāhaṃ yamarājena sakrodhena mahātmanā | aṃgārasaṃcaye kṣiptā kṣiptā narakasaṃcaye
Sanskrit only: no published translation is held for this verse.
लोहस्य पुरुषं कृत्वा अग्निना परितापितः । ममोरसि समुत्क्षिप्तो निजभर्तुश्च वंचनात्
lohasya puruṣaṃ kṛtvā agninā paritāpitaḥ | mamorasi samutkṣipto nijabhartuśca vaṃcanāt
Sanskrit only: no published translation is held for this verse.
नानापीडातिसंतप्ता नरकाग्निप्रतापिता । तैलद्रोण्यां परिक्षिप्ता करम्भवालुकोपरि
nānāpīḍātisaṃtaptā narakāgnipratāpitā | tailadroṇyāṃ parikṣiptā karambhavālukopari
Sanskrit only: no published translation is held for this verse.
असिपत्रैश्च संच्छिन्ना जलमंत्रेण वाहिता । कूटशाल्मलिवृक्षेषु क्षिप्ता तेन महात्मना
asipatraiśca saṃcchinnā jalamaṃtreṇa vāhitā | kūṭaśālmalivṛkṣeṣu kṣiptā tena mahātmanā
Sanskrit only: no published translation is held for this verse.
पूयशोणितविष्ठायां पतिता कृमिसंकुले । सर्वेषु नरकेष्वेवं क्षिप्ताहं नृपनंदिनि
pūyaśoṇitaviṣṭhāyāṃ patitā kṛmisaṃkule | sarveṣu narakeṣvevaṃ kṣiptāhaṃ nṛpanaṃdini
Sanskrit only: no published translation is held for this verse.
पीडायुक्तेषु तीव्रेषु तेनैवापि महात्मना । करपत्रैः पाटिताहं शक्तिभिस्ताडिता भृशम्
pīḍāyukteṣu tīvreṣu tenaivāpi mahātmanā | karapatraiḥ pāṭitāhaṃ śaktibhistāḍitā bhṛśam
Sanskrit only: no published translation is held for this verse.
अन्येष्वेव नरकेषु पातिता नृपनंदिनि । योनिगर्तेषु क्षिप्तास्मि पतिता दुःखसंकटे
anyeṣveva narakeṣu pātitā nṛpanaṃdini | yonigarteṣu kṣiptāsmi patitā duḥkhasaṃkaṭe
Sanskrit only: no published translation is held for this verse.
धर्मराजेन तेनाहं नरकेषु निपातिता । वल्गुनीयोनिमासाद्य भुक्तं दुःखं सुदारुणम्
dharmarājena tenāhaṃ narakeṣu nipātitā | valgunīyonimāsādya bhuktaṃ duḥkhaṃ sudāruṇam
Sanskrit only: no published translation is held for this verse.
गताहं क्रौष्टुकीं योनिं शुनीयोनिं पुनर्गता । सकुक्कुटीं च मार्जारीमाखुयोनिं गता ह्यहम्
gatāhaṃ krauṣṭukīṃ yoniṃ śunīyoniṃ punargatā | sakukkuṭīṃ ca mārjārīmākhuyoniṃ gatā hyaham
Sanskrit only: no published translation is held for this verse.
एवं योनिविशेषेषु पापयोनिषु तेन च । क्षिप्तास्मि धर्मराजेन पीडिता सर्वयोनिषु
evaṃ yoniviśeṣeṣu pāpayoniṣu tena ca | kṣiptāsmi dharmarājena pīḍitā sarvayoniṣu
Sanskrit only: no published translation is held for this verse.
तेनैवाहं कृता भूमौ शूकरी नृपनंदिनि । तवहस्ते महाभागे संति तीर्थान्यनेकशः
tenaivāhaṃ kṛtā bhūmau śūkarī nṛpanaṃdini | tavahaste mahābhāge saṃti tīrthānyanekaśaḥ
Sanskrit only: no published translation is held for this verse.
तेनोदकेन सिक्तास्मि त्वयैव वरवर्णिनि । मम पापं गतं देवि प्रसादात्तव सुंदरि
tenodakena siktāsmi tvayaiva varavarṇini | mama pāpaṃ gataṃ devi prasādāttava suṃdari
Sanskrit only: no published translation is held for this verse.
तवैव तेजःपुण्येन जातं ज्ञानं वरानने । इदानीं मामुद्धरस्व पतितां नरकसंकटे
tavaiva tejaḥpuṇyena jātaṃ jñānaṃ varānane | idānīṃ māmuddharasva patitāṃ narakasaṃkaṭe
Sanskrit only: no published translation is held for this verse.
यदा नोद्धरसे देवि पुनर्यास्यामि दारुणम् । नरकं च महाभागे त्राहि मां दुःखभागिनीम्
yadā noddharase devi punaryāsyāmi dāruṇam | narakaṃ ca mahābhāge trāhi māṃ duḥkhabhāginīm
Sanskrit only: no published translation is held for this verse.
गताहं पापभावेन दीनाहं च निराश्रया । सुदेवोवाच- किं कृतं हि मया भद्रे सुकृतं पुण्यसंभवम्
gatāhaṃ pāpabhāvena dīnāhaṃ ca nirāśrayā | sudevovāca- kiṃ kṛtaṃ hi mayā bhadre sukṛtaṃ puṇyasaṃbhavam
Sanskrit only: no published translation is held for this verse.
येनाहमुद्धरे त्वां वै तन्मे त्वं वद सांप्रतम् । शूकर्युवाच- अयं राजा महाभाग इक्ष्वाकुर्मनुनंदनः
yenāhamuddhare tvāṃ vai tanme tvaṃ vada sāṃpratam | śūkaryuvāca- ayaṃ rājā mahābhāga ikṣvākurmanunaṃdanaḥ
Sanskrit only: no published translation is held for this verse.
विष्णुरेष महाप्राज्ञो भवती श्रीर्हि नान्यथा । पतिव्रता महाभागा पतिव्रतपरायणा
viṣṇureṣa mahāprājño bhavatī śrīrhi nānyathā | pativratā mahābhāgā pativrataparāyaṇā
Sanskrit only: no published translation is held for this verse.
त्वं सती सर्वदा भद्रे सर्वतीर्थमयी प्रिया । देवि सर्वमयी नित्यं सर्वदेवमयी सदा
tvaṃ satī sarvadā bhadre sarvatīrthamayī priyā | devi sarvamayī nityaṃ sarvadevamayī sadā
Sanskrit only: no published translation is held for this verse.
महापतिव्रता लोक एका त्वं नृपतेः प्रिया । यया शुश्रूषितो भर्ता भवत्या हि अहर्निशम्
mahāpativratā loka ekā tvaṃ nṛpateḥ priyā | yayā śuśrūṣito bhartā bhavatyā hi aharniśam
Sanskrit only: no published translation is held for this verse.
एकस्य दिवसस्यापि पुण्यं देहि वरानने । पति शुश्रूषितस्यापि यदि मे कुरुषे प्रियम्
ekasya divasasyāpi puṇyaṃ dehi varānane | pati śuśrūṣitasyāpi yadi me kuruṣe priyam
Sanskrit only: no published translation is held for this verse.
मम माता पिता त्वं वै त्वं मे गुरुः सनातनः । अहं पापा दुराचारा असत्या ज्ञानवर्जिता
mama mātā pitā tvaṃ vai tvaṃ me guruḥ sanātanaḥ | ahaṃ pāpā durācārā asatyā jñānavarjitā
Sanskrit only: no published translation is held for this verse.
मामुद्धर महाभागे भीताहं यमताडनैः । सुकलोवाच- एवं श्रुत्वा तया प्रोक्तं समालोक्य नृपं तदा
māmuddhara mahābhāge bhītāhaṃ yamatāḍanaiḥ | sukalovāca- evaṃ śrutvā tayā proktaṃ samālokya nṛpaṃ tadā
Sanskrit only: no published translation is held for this verse.
किं करोमि महाराज एषा किं वदते पशुः । इक्ष्वाकुरुवाच- एनां दुःखां वराकीं वै पापयोनिं गतां शुभे
kiṃ karomi mahārāja eṣā kiṃ vadate paśuḥ | ikṣvākuruvāca- enāṃ duḥkhāṃ varākīṃ vai pāpayoniṃ gatāṃ śubhe
Sanskrit only: no published translation is held for this verse.
समुद्धरस्व पुण्यैस्त्वं महच्छ्रेयो भविष्यति । एवमुक्ता वरा नारी सुदेवा चारुमंगला
samuddharasva puṇyaistvaṃ mahacchreyo bhaviṣyati | evamuktā varā nārī sudevā cārumaṃgalā
Sanskrit only: no published translation is held for this verse.
उवाचैकाब्दपुण्यं ते मया दत्तं वरानने । एवमुक्तेन वाक्येन तया देव्या हि तत्क्षणात्
uvācaikābdapuṇyaṃ te mayā dattaṃ varānane | evamuktena vākyena tayā devyā hi tatkṣaṇāt
Sanskrit only: no published translation is held for this verse.
रूपयौवनसंपन्ना दिव्यमालाविभूषिता । दिव्यदेहा च संभूता तेजोज्वालासमावृता
rūpayauvanasaṃpannā divyamālāvibhūṣitā | divyadehā ca saṃbhūtā tejojvālāsamāvṛtā
Sanskrit only: no published translation is held for this verse.
सर्वभूषणशोभाढ्या नानारत्नैश्च शोभिता । संजाता दिव्यरूपा सा दिव्यगंधानुलेपना
sarvabhūṣaṇaśobhāḍhyā nānāratnaiśca śobhitā | saṃjātā divyarūpā sā divyagaṃdhānulepanā
Sanskrit only: no published translation is held for this verse.
दिव्यं विमानमारूढा अंतरिक्षं गता सती । तामुवाच ततो राज्ञीं प्रणतानतकंधरा
divyaṃ vimānamārūḍhā aṃtarikṣaṃ gatā satī | tāmuvāca tato rājñīṃ praṇatānatakaṃdharā
Sanskrit only: no published translation is held for this verse.
स्वस्त्यस्तु ते महाभागे प्रसादात्तव सुंदरि । व्रजामि पातकान्मुक्ता स्वर्गं पुण्यतमं शुभम्
svastyastu te mahābhāge prasādāttava suṃdari | vrajāmi pātakānmuktā svargaṃ puṇyatamaṃ śubham
Sanskrit only: no published translation is held for this verse.
प्रणम्यैवं गता स्वर्गं सुदेवा शृणु सत्तम । एतत्ते सर्वमाख्यातं सुकलाया निवेदितम्
praṇamyaivaṃ gatā svargaṃ sudevā śṛṇu sattama | etatte sarvamākhyātaṃ sukalāyā niveditam
Sanskrit only: no published translation is held for this verse.
इति श्रीपद्मपुराणे भूमिखंडे वेनोपाख्याने सुकलाचरित्रे सुदेवास्वर्गारोहणंनाम द्विपंचाशत्तमोऽध्यायः
iti śrīpadmapurāṇe bhūmikhaṃḍe venopākhyāne sukalācaritre sudevāsvargārohaṇaṃnāma dvipaṃcāśattamo'dhyāyaḥ
Sanskrit only: no published translation is held for this verse.