Padma Purāṇa 2.58

विष्णुरुवाच- क्रीडाप्रयुक्तासु वनं प्रविष्टा वैश्यस्य भार्या सुकला सुतन्वी । ददर्श सर्वं गहनं मनोरमं तामेव पप्रच्छ सखीं सती सा

viṣṇuruvāca- krīḍāprayuktāsu vanaṃ praviṣṭā vaiśyasya bhāryā sukalā sutanvī | dadarśa sarvaṃ gahanaṃ manoramaṃ tāmeva papraccha sakhīṃ satī sā

Sanskrit only: no published translation is held for this verse.

अरण्यमेतत्प्रवरं सुपुण्यं दिव्यं सखे कस्य मनोभिरामम् । सिद्धंसुकामैः प्रवरैः समस्तैः पप्रच्छ हर्षात्सुकला सखीं ताम्

araṇyametatpravaraṃ supuṇyaṃ divyaṃ sakhe kasya manobhirāmam | siddhaṃsukāmaiḥ pravaraiḥ samastaiḥ papraccha harṣātsukalā sakhīṃ tām

Sanskrit only: no published translation is held for this verse.

क्रीडोवाच- एतद्वनं दिव्यगुणैः प्रयुक्तं सिद्धस्वभावैः परिभावनेन । पुष्पाकुलं कामफलोपयुक्तं विपश्य सर्वं मकरध्वजस्य

krīḍovāca- etadvanaṃ divyaguṇaiḥ prayuktaṃ siddhasvabhāvaiḥ paribhāvanena | puṣpākulaṃ kāmaphalopayuktaṃ vipaśya sarvaṃ makaradhvajasya

Sanskrit only: no published translation is held for this verse.

एवं वाक्यं ततः श्रुत्वा हर्षेण महतान्विता । समालोक्य महद्वृत्तं कामस्य च दुरात्मनः

evaṃ vākyaṃ tataḥ śrutvā harṣeṇa mahatānvitā | samālokya mahadvṛttaṃ kāmasya ca durātmanaḥ

Sanskrit only: no published translation is held for this verse.

वायुना नीयमानं तं समाघ्राति न सौरभम् । वाति वायुः स्वभावेन सौरभेण समन्वितः

vāyunā nīyamānaṃ taṃ samāghrāti na saurabham | vāti vāyuḥ svabhāvena saurabheṇa samanvitaḥ

Sanskrit only: no published translation is held for this verse.

तद्बाणो विशतेनासां यथा तथा सुलीलया । सा गंधं नैव गृह्णाति पुष्पाणां च वरानना

tadbāṇo viśatenāsāṃ yathā tathā sulīlayā | sā gaṃdhaṃ naiva gṛhṇāti puṣpāṇāṃ ca varānanā

Sanskrit only: no published translation is held for this verse.

न चास्वादयते सा तु सुरसान्सा महासती । स सखा कामदेवस्य रममाणो विनिर्जितः

na cāsvādayate sā tu surasānsā mahāsatī | sa sakhā kāmadevasya ramamāṇo vinirjitaḥ

Sanskrit only: no published translation is held for this verse.

लज्जितः पराङ्मुखो भूत्वा भूं पपात लवच्छदैः । फलेभ्यो हि सुपक्वेभ्यः पुष्पमंजरिसंस्कृतः

lajjitaḥ parāṅmukho bhūtvā bhūṃ papāta lavacchadaiḥ | phalebhyo hi supakvebhyaḥ puṣpamaṃjarisaṃskṛtaḥ

Sanskrit only: no published translation is held for this verse.

लवरूपोपतद्भूमौ रसस्त्वेष तया जितः । मकरंदः सुदीनात्मा फलाद्भूमिं ततः पुनः

lavarūpopatadbhūmau rasastveṣa tayā jitaḥ | makaraṃdaḥ sudīnātmā phalādbhūmiṃ tataḥ punaḥ

Sanskrit only: no published translation is held for this verse.

भक्ष्यते मक्षिकाभिश्च यथामृतो रणे तथा । मक्षिकाभक्ष्यमाणस्तु प्रवाहेन प्रयाति सः

bhakṣyate makṣikābhiśca yathāmṛto raṇe tathā | makṣikābhakṣyamāṇastu pravāhena prayāti saḥ

Sanskrit only: no published translation is held for this verse.

मंदंमंदं प्रयात्येव तं हसंति च पक्षिणः । नानारुतैः प्रचलंति सुखमानंदनिर्भरैः

maṃdaṃmaṃdaṃ prayātyeva taṃ hasaṃti ca pakṣiṇaḥ | nānārutaiḥ pracalaṃti sukhamānaṃdanirbharaiḥ

Sanskrit only: no published translation is held for this verse.

प्रीत्या शकुनयस्तत्र वनमध्यनगस्थिताः । सुकलया जितो ह्येष निम्नं पंथानमाश्रितः

prītyā śakunayastatra vanamadhyanagasthitāḥ | sukalayā jito hyeṣa nimnaṃ paṃthānamāśritaḥ

Sanskrit only: no published translation is held for this verse.

प्रीत्या समेता रतिः कामभार्या गत्वाब्रवीत्सा सुकलां विहस्य । स्वस्त्यस्तु ते स्वागतमेव भद्रे रमस्व प्रीत्या नयनाभिरामम्

prītyā sametā ratiḥ kāmabhāryā gatvābravītsā sukalāṃ vihasya | svastyastu te svāgatameva bhadre ramasva prītyā nayanābhirāmam

Sanskrit only: no published translation is held for this verse.

ते रूपमिष्टममलमिंद्रस्यापि महात्मनः । यदेष्टं ते तदा ब्रूहि समानेष्ये न संशयः

te rūpamiṣṭamamalamiṃdrasyāpi mahātmanaḥ | yadeṣṭaṃ te tadā brūhi samāneṣye na saṃśayaḥ

Sanskrit only: no published translation is held for this verse.

सूत उवाच- वदंत्यौ ते स्त्रियौ दृष्ट्वा श्रुत्वोवाच सुभाषितम् । रतिं प्रतिगृहीत्वा मे गतो भर्त्ता महामतिः

sūta uvāca- vadaṃtyau te striyau dṛṣṭvā śrutvovāca subhāṣitam | ratiṃ pratigṛhītvā me gato bharttā mahāmatiḥ

Sanskrit only: no published translation is held for this verse.

यत्र मे तिष्ठते भर्त्ता तत्राहं पतिसंयुता । तत्र कामश्च मे प्रीतिरयं कायो निराश्रयः

yatra me tiṣṭhate bharttā tatrāhaṃ patisaṃyutā | tatra kāmaśca me prītirayaṃ kāyo nirāśrayaḥ

Sanskrit only: no published translation is held for this verse.

द्वे अप्युक्तं समाकर्ण्य रतिप्रीती विलज्जिते । व्रीडमाने गते ते द्वे यत्र कामो महाबलः

dve apyuktaṃ samākarṇya ratiprītī vilajjite | vrīḍamāne gate te dve yatra kāmo mahābalaḥ

Sanskrit only: no published translation is held for this verse.

ऊचतुस्तं महावीरमिंद्रकाय समाश्रितम् । चापमाकर्षमाणं तं नेत्रलक्ष्यं महाबलम्

ūcatustaṃ mahāvīramiṃdrakāya samāśritam | cāpamākarṣamāṇaṃ taṃ netralakṣyaṃ mahābalam

Sanskrit only: no published translation is held for this verse.

दुर्जयेयं महाप्राज्ञ त्यज पौरुषमात्मनः । पतिकामा महाभागा पतिव्रता सदैव सा

durjayeyaṃ mahāprājña tyaja pauruṣamātmanaḥ | patikāmā mahābhāgā pativratā sadaiva sā

Sanskrit only: no published translation is held for this verse.

काम उवाच- अनया लोक्यते रूपमिंद्रस्यास्य महात्मनः । यदि देवि तदा चाहं हनिष्यामि न संशयः

kāma uvāca- anayā lokyate rūpamiṃdrasyāsya mahātmanaḥ | yadi devi tadā cāhaṃ haniṣyāmi na saṃśayaḥ

Sanskrit only: no published translation is held for this verse.

अथ वेषधरो देवो महारूपः सुराधिपः । स तयानुगतस्तूर्णं परया लीलया तदा

atha veṣadharo devo mahārūpaḥ surādhipaḥ | sa tayānugatastūrṇaṃ parayā līlayā tadā

Sanskrit only: no published translation is held for this verse.

सर्वभोगसमाकीर्णः सर्वाभरणशोभितः । दिव्यमाल्यांबरधरो दिव्यगंधानुलेपनः

sarvabhogasamākīrṇaḥ sarvābharaṇaśobhitaḥ | divyamālyāṃbaradharo divyagaṃdhānulepanaḥ

Sanskrit only: no published translation is held for this verse.

तया रत्या समायातो यत्रास्ते पतिदेवता । प्रत्युवाच महाभागां सुकलां सत्यचारिणीम्

tayā ratyā samāyāto yatrāste patidevatā | pratyuvāca mahābhāgāṃ sukalāṃ satyacāriṇīm

Sanskrit only: no published translation is held for this verse.

पूर्वं दूती समक्षं ते प्रीत्या च प्रहिता मया । कस्मान्न मन्यसे भद्रे भजंतं त्वामिहागतम्

pūrvaṃ dūtī samakṣaṃ te prītyā ca prahitā mayā | kasmānna manyase bhadre bhajaṃtaṃ tvāmihāgatam

Sanskrit only: no published translation is held for this verse.

सुकलोवाच- रक्षायुक्तास्मि भद्रं ते भर्तुः पुत्रैर्महात्मभिः । एकाकिनीसहायैश्च नैव कस्य भयं मम

sukalovāca- rakṣāyuktāsmi bhadraṃ te bhartuḥ putrairmahātmabhiḥ | ekākinīsahāyaiśca naiva kasya bhayaṃ mama

Sanskrit only: no published translation is held for this verse.

शूरैश्च पुरुषाकारैः सर्वत्र परिरक्षिता । नाति प्रस्तावये वक्तुं व्यग्रा कर्मणि तस्य च

śūraiśca puruṣākāraiḥ sarvatra parirakṣitā | nāti prastāvaye vaktuṃ vyagrā karmaṇi tasya ca

Sanskrit only: no published translation is held for this verse.

यावत्प्रस्यंदते नेत्रं तावत्कालं महामते । भवान्न लज्जते कस्माद्रममाणो मया सह

yāvatprasyaṃdate netraṃ tāvatkālaṃ mahāmate | bhavānna lajjate kasmādramamāṇo mayā saha

Sanskrit only: no published translation is held for this verse.

भवान्को हि समायातो निर्भयो मरणादपि । इंद्र उवाच- त्वामेवं हि प्रपश्यामि वनमध्ये समागताम्

bhavānko hi samāyāto nirbhayo maraṇādapi | iṃdra uvāca- tvāmevaṃ hi prapaśyāmi vanamadhye samāgatām

Sanskrit only: no published translation is held for this verse.

समाख्यातास्त्वया शूरा भर्तुश्च तनयाः पुनः । कथं पश्याम्यहं तावद्दर्शयस्व ममाग्रतः

samākhyātāstvayā śūrā bhartuśca tanayāḥ punaḥ | kathaṃ paśyāmyahaṃ tāvaddarśayasva mamāgrataḥ

Sanskrit only: no published translation is held for this verse.

सुकलोवाच- सनिजसकलवर्गस्याधिपत्ये निवेश्य धृतिमतिगतिबुद्ध्य्ख्यैस्तु संन्यस्य सत्यम् । अचलसकलधर्मो नित्ययुक्तो महात्मा मदनसबलधर्मात्मा सदामां जुगोप

sukalovāca- sanijasakalavargasyādhipatye niveśya dhṛtimatigatibuddhykhyaistu saṃnyasya satyam | acalasakaladharmo nityayukto mahātmā madanasabaladharmātmā sadāmāṃ jugopa

Sanskrit only: no published translation is held for this verse.

मामेवं परिरक्षते दमगुणैः शौचैस्तु धर्मः सदा सत्यं पश्य समागतं मम पुरः शांतिक्षमाभ्यांयुतम् । बोधश्चातिमहाबलः पृथुयशा यो मां न मुंचेत्कदा बद्धाहं दृढबंधनैः स्वगुणजैः सांनिध्यमेवं गतः

māmevaṃ parirakṣate damaguṇaiḥ śaucaistu dharmaḥ sadā satyaṃ paśya samāgataṃ mama puraḥ śāṃtikṣamābhyāṃyutam | bodhaścātimahābalaḥ pṛthuyaśā yo māṃ na muṃcetkadā baddhāhaṃ dṛḍhabaṃdhanaiḥ svaguṇajaiḥ sāṃnidhyamevaṃ gataḥ

Sanskrit only: no published translation is held for this verse.

रक्षायुक्ताः कृताः सर्वे सत्याद्या मम सांप्रतम् । धर्मलाभादिकाः सर्वे दमबुद्धिपराक्रमाः

rakṣāyuktāḥ kṛtāḥ sarve satyādyā mama sāṃpratam | dharmalābhādikāḥ sarve damabuddhiparākramāḥ

Sanskrit only: no published translation is held for this verse.

मामेवं हि प्ररक्षंति किं मां प्रार्थयसे बलात् । को भवान्निर्भयो भूत्वा दूत्या सार्धं समागतः

māmevaṃ hi prarakṣaṃti kiṃ māṃ prārthayase balāt | ko bhavānnirbhayo bhūtvā dūtyā sārdhaṃ samāgataḥ

Sanskrit only: no published translation is held for this verse.

सत्यं धर्मस्तथा पुण्यं ज्ञानाद्याः प्रबलास्तथा । मम भर्तुः सहायाश्च ते मां रक्षंति वेश्मनि

satyaṃ dharmastathā puṇyaṃ jñānādyāḥ prabalāstathā | mama bhartuḥ sahāyāśca te māṃ rakṣaṃti veśmani

Sanskrit only: no published translation is held for this verse.

अहं रक्षायुता नित्यं दमशांतिपरायणा । न मां जेतुं समर्थश्च अपि साक्षाच्छचीपतिः

ahaṃ rakṣāyutā nityaṃ damaśāṃtiparāyaṇā | na māṃ jetuṃ samarthaśca api sākṣācchacīpatiḥ

Sanskrit only: no published translation is held for this verse.

यदि वा मन्मथो वापि समागच्छति वीर्यवान् । दंशिताहं सदा सत्यं सत्यकेनैव नान्यथा

yadi vā manmatho vāpi samāgacchati vīryavān | daṃśitāhaṃ sadā satyaṃ satyakenaiva nānyathā

Sanskrit only: no published translation is held for this verse.

निरर्थकास्तस्य बाणा भविष्यंति न संशयः । त्वामेवं हि हनिष्यंति धर्मादयो महाभटाः

nirarthakāstasya bāṇā bhaviṣyaṃti na saṃśayaḥ | tvāmevaṃ hi haniṣyaṃti dharmādayo mahābhaṭāḥ

Sanskrit only: no published translation is held for this verse.

दूरं गच्छ पलायत्वमत्र मा तिष्ठ सांप्रतम् । वार्यमाणो यदा तिष्ठेर्भस्मीभूतो भविष्यसि

dūraṃ gaccha palāyatvamatra mā tiṣṭha sāṃpratam | vāryamāṇo yadā tiṣṭherbhasmībhūto bhaviṣyasi

Sanskrit only: no published translation is held for this verse.

भर्त्रा विना निरीक्षेत मम रूपं यदा भवान् । यथा दारु दहेदग्निस्तथा धक्ष्यामि नान्यथा

bhartrā vinā nirīkṣeta mama rūpaṃ yadā bhavān | yathā dāru dahedagnistathā dhakṣyāmi nānyathā

Sanskrit only: no published translation is held for this verse.

एवं श्रुत्वा सहस्राक्षो मन्मथस्यापि सम्मुखम् । पश्य पौरुषमेतस्या युध्यस्व निजपौरुषैः

evaṃ śrutvā sahasrākṣo manmathasyāpi sammukham | paśya pauruṣametasyā yudhyasva nijapauruṣaiḥ

Sanskrit only: no published translation is held for this verse.

यथागतास्तथा सर्वे महाशापभयातुराः । स्वंस्वं स्थानं महाराज इंद्राद्याः प्रययुस्तदा

yathāgatāstathā sarve mahāśāpabhayāturāḥ | svaṃsvaṃ sthānaṃ mahārāja iṃdrādyāḥ prayayustadā

Sanskrit only: no published translation is held for this verse.

गतेषु तेषु सर्वेषु सुकला सा पतिव्रता । स्वगृहं पुण्यसंयुक्ता पतिध्यानेन चागता

gateṣu teṣu sarveṣu sukalā sā pativratā | svagṛhaṃ puṇyasaṃyuktā patidhyānena cāgatā

Sanskrit only: no published translation is held for this verse.

स्वगृहं पुण्यसंयुक्तं सर्वतीर्थमयं तदा । सर्वयज्ञमयं राजन्संप्राप्ता पतिदेवता

svagṛhaṃ puṇyasaṃyuktaṃ sarvatīrthamayaṃ tadā | sarvayajñamayaṃ rājansaṃprāptā patidevatā

Sanskrit only: no published translation is held for this verse.

इति श्रीपद्मपुराणे भूमिखंडे वेनोपाख्याने सुकलाचरित्रेष्टपंचाशत्तमोऽध्यायः

iti śrīpadmapurāṇe bhūmikhaṃḍe venopākhyāne sukalācaritreṣṭapaṃcāśattamo'dhyāyaḥ

Sanskrit only: no published translation is held for this verse.