Padma Purāṇa 3.40

सूत उवाच- एवमुक्तानि तीर्थानि विष्णुदेहानि सुव्रताः । एषामन्यतमा संगान्मुक्तो भवति मानवः

sūta uvāca- evamuktāni tīrthāni viṣṇudehāni suvratāḥ | eṣāmanyatamā saṃgānmukto bhavati mānavaḥ

Sanskrit only: no published translation is held for this verse.

तीर्थानुश्रवणं धन्यं धन्यं तीर्थनिषेवणम् । पापराशिनिपाताय नान्योपायः कलौयुगे

tīrthānuśravaṇaṃ dhanyaṃ dhanyaṃ tīrthaniṣevaṇam | pāparāśinipātāya nānyopāyaḥ kalauyuge

Sanskrit only: no published translation is held for this verse.

वासं कुर्यामहं तीर्थे तीर्थस्पर्शमहं तथा । एवं योऽनुदिनं ब्रूते स याति परमं महत्

vāsaṃ kuryāmahaṃ tīrthe tīrthasparśamahaṃ tathā | evaṃ yo'nudinaṃ brūte sa yāti paramaṃ mahat

Sanskrit only: no published translation is held for this verse.

पापानि तस्य नश्यंति तीर्थालापनमात्रतः । तीर्थानि खलु धन्यानि धन्यसेव्यानि सुव्रताः

pāpāni tasya naśyaṃti tīrthālāpanamātrataḥ | tīrthāni khalu dhanyāni dhanyasevyāni suvratāḥ

Sanskrit only: no published translation is held for this verse.

तीर्थानां सेवनादेव सेवितो भवति प्रभुः । नारायणो जगत्कर्ता नास्ति तीर्थात्परं पदम्

tīrthānāṃ sevanādeva sevito bhavati prabhuḥ | nārāyaṇo jagatkartā nāsti tīrthātparaṃ padam

Sanskrit only: no published translation is held for this verse.

ब्राह्मणस्तुलसी चैव अश्वत्थस्तीर्थसंचयः । विष्णुश्च परमेशानः सेव्य एव सदा नृभिः

brāhmaṇastulasī caiva aśvatthastīrthasaṃcayaḥ | viṣṇuśca parameśānaḥ sevya eva sadā nṛbhiḥ

Sanskrit only: no published translation is held for this verse.

ब्राह्मणानां विशेषेण सेवनं मुनिपुंगवाः । सर्वतीर्थावगाहादेरधिकं विदुरग्रजाः

brāhmaṇānāṃ viśeṣeṇa sevanaṃ munipuṃgavāḥ | sarvatīrthāvagāhāderadhikaṃ viduragrajāḥ

Sanskrit only: no published translation is held for this verse.

तस्माद्द्विजपदं साक्षात्सर्वतीर्थमयं शुभम् । भजेतानुदिनं विद्वांस्तत्र तीर्थाधिकं भवेत्

tasmāddvijapadaṃ sākṣātsarvatīrthamayaṃ śubham | bhajetānudinaṃ vidvāṃstatra tīrthādhikaṃ bhavet

Sanskrit only: no published translation is held for this verse.

अश्वत्थस्य तुलस्याश्च गवां कुर्यात्प्रदक्षिणम् । सर्वतीर्थफलंप्राप्य विष्णुलोके महीयते

aśvatthasya tulasyāśca gavāṃ kuryātpradakṣiṇam | sarvatīrthaphalaṃprāpya viṣṇuloke mahīyate

Sanskrit only: no published translation is held for this verse.

तस्माद्दुष्कृतकर्माणि नाशयेत्तीर्थसेवनात् । अन्यथा नरकं याति कर्म्मभोगाद्धि शाम्यति

tasmādduṣkṛtakarmāṇi nāśayettīrthasevanāt | anyathā narakaṃ yāti karmmabhogāddhi śāmyati

Sanskrit only: no published translation is held for this verse.

पापिनां नरके वासः सुकृती स्वर्गमश्नुते । तस्मात्पुण्यं निषेवेत तीर्थं खलु विचक्षणः

pāpināṃ narake vāsaḥ sukṛtī svargamaśnute | tasmātpuṇyaṃ niṣeveta tīrthaṃ khalu vicakṣaṇaḥ

Sanskrit only: no published translation is held for this verse.

ऋषय ऊचुः- श्रुतानि किल तीर्थानि समाहात्म्यानि सुव्रत । इदानीं श्रोतुमिच्छामः प्रयागस्य विशेषकम्

ṛṣaya ūcuḥ- śrutāni kila tīrthāni samāhātmyāni suvrata | idānīṃ śrotumicchāmaḥ prayāgasya viśeṣakam

Sanskrit only: no published translation is held for this verse.

प्रयागं तु पुरा प्रोक्तं संक्षेपात्सूत यत्त्वया । विशेषाच्छ्रोतुमिच्छामः सूत नः कथ्यतामिति

prayāgaṃ tu purā proktaṃ saṃkṣepātsūta yattvayā | viśeṣācchrotumicchāmaḥ sūta naḥ kathyatāmiti

Sanskrit only: no published translation is held for this verse.

सूत उवाच- साधु पृष्टं महाभागाः प्रयागं प्रति सुव्रताः । हंताहं तत्प्रवक्ष्यामि प्रयागस्योपवर्णनम्

sūta uvāca- sādhu pṛṣṭaṃ mahābhāgāḥ prayāgaṃ prati suvratāḥ | haṃtāhaṃ tatpravakṣyāmi prayāgasyopavarṇanam

Sanskrit only: no published translation is held for this verse.

मार्कंडेयेन कथितं यत्पुरा पांडुसूनवे । भारते तु यदा वृत्ते प्राप्तराज्ये पृथासुते

mārkaṃḍeyena kathitaṃ yatpurā pāṃḍusūnave | bhārate tu yadā vṛtte prāptarājye pṛthāsute

Sanskrit only: no published translation is held for this verse.

एतस्मिन्नंतरे राजा कुंतीपुत्रो युधिष्ठिरः । भ्रातृशोकेन संतप्तः चिंतयंस्तु पुनः पुनः

etasminnaṃtare rājā kuṃtīputro yudhiṣṭhiraḥ | bhrātṛśokena saṃtaptaḥ ciṃtayaṃstu punaḥ punaḥ

Sanskrit only: no published translation is held for this verse.

आसीद्दुर्योधनो राजा एकादशचमूपतिः । अस्मान्संतप्य बहुशः सर्वे ते निधनं गताः

āsīdduryodhano rājā ekādaśacamūpatiḥ | asmānsaṃtapya bahuśaḥ sarve te nidhanaṃ gatāḥ

Sanskrit only: no published translation is held for this verse.

वासुदेवं समाश्रित्य पंचशेषास्तु पांडवाः । कथं द्रोणं च भीष्मं च कर्णं चैव महाबलम्

vāsudevaṃ samāśritya paṃcaśeṣāstu pāṃḍavāḥ | kathaṃ droṇaṃ ca bhīṣmaṃ ca karṇaṃ caiva mahābalam

Sanskrit only: no published translation is held for this verse.

दुर्योधनं च राजानं भ्रातृपुत्रसमन्वितम् । राजानो निहताः सर्वे ये चान्ये शूरमानिनः

duryodhanaṃ ca rājānaṃ bhrātṛputrasamanvitam | rājāno nihatāḥ sarve ye cānye śūramāninaḥ

Sanskrit only: no published translation is held for this verse.

विना राज्येन कर्तव्यं किं भोगैर्जीवितेनवा । धिक्कष्टमिति संचिंत्य राजा विह्वलतां गतः

vinā rājyena kartavyaṃ kiṃ bhogairjīvitenavā | dhikkaṣṭamiti saṃciṃtya rājā vihvalatāṃ gataḥ

Sanskrit only: no published translation is held for this verse.

निश्चेष्टोऽथ निरुत्साहः किं चित्तिष्ठत्यधोमुखः । लब्धसंज्ञो यदा राजा चिंतयानः पुनः पुनः

niśceṣṭo'tha nirutsāhaḥ kiṃ cittiṣṭhatyadhomukhaḥ | labdhasaṃjño yadā rājā ciṃtayānaḥ punaḥ punaḥ

Sanskrit only: no published translation is held for this verse.

कं चरे विधिना योगं नियमं तीर्थमेव वा । येनाहं शीघ्रमामुच्ये महापातककिल्बिषात्

kaṃ care vidhinā yogaṃ niyamaṃ tīrthameva vā | yenāhaṃ śīghramāmucye mahāpātakakilbiṣāt

Sanskrit only: no published translation is held for this verse.

यत्र स्नात्वा नरो याति विष्णुलोकमनुत्तमम् । कथं पृच्छामि वै कृष्णं येनेदं कारितं महत्

yatra snātvā naro yāti viṣṇulokamanuttamam | kathaṃ pṛcchāmi vai kṛṣṇaṃ yenedaṃ kāritaṃ mahat

Sanskrit only: no published translation is held for this verse.

धृतराष्ट्रं कथं पृच्छे यस्य पुत्रशतं हतम् । व्यासं कथमहं पृच्छे यस्य गोत्रक्षयः कृतः

dhṛtarāṣṭraṃ kathaṃ pṛcche yasya putraśataṃ hatam | vyāsaṃ kathamahaṃ pṛcche yasya gotrakṣayaḥ kṛtaḥ

Sanskrit only: no published translation is held for this verse.

एवं वैक्लव्यमापन्नो धर्मपुत्रो युधिष्ठिरः । रुदंतः पांडवाः सर्वे भ्रातृशोकपरिप्लुताः

evaṃ vaiklavyamāpanno dharmaputro yudhiṣṭhiraḥ | rudaṃtaḥ pāṃḍavāḥ sarve bhrātṛśokapariplutāḥ

Sanskrit only: no published translation is held for this verse.

ये च तत्र महात्मानः समेताः पांडवाश्रिताः । कुंती च द्रौपदी चैव ये च तत्र समागताः

ye ca tatra mahātmānaḥ sametāḥ pāṃḍavāśritāḥ | kuṃtī ca draupadī caiva ye ca tatra samāgatāḥ

Sanskrit only: no published translation is held for this verse.

भूमौ निपतिताः सर्वे रोदमानाः समंततः । वाराणस्यां तु मार्कंडस्तेन ज्ञातो युधिष्ठरः

bhūmau nipatitāḥ sarve rodamānāḥ samaṃtataḥ | vārāṇasyāṃ tu mārkaṃḍastena jñāto yudhiṣṭharaḥ

Sanskrit only: no published translation is held for this verse.

यथाविक्लवमापन्नो रोदमानः सुदुःखितः । अचिरेणैव कालेन मार्कंडस्तु महातपाः

yathāviklavamāpanno rodamānaḥ suduḥkhitaḥ | acireṇaiva kālena mārkaṃḍastu mahātapāḥ

Sanskrit only: no published translation is held for this verse.

हस्तिनापुर संप्राप्तो राजद्वारे स तिष्ठति । द्वारपालोऽपि तं दृष्ट्वा राज्ञः कथितवान्द्रुतम्

hastināpura saṃprāpto rājadvāre sa tiṣṭhati | dvārapālo'pi taṃ dṛṣṭvā rājñaḥ kathitavāndrutam

Sanskrit only: no published translation is held for this verse.

त्वां द्रष्टुकामो मार्कंडो द्वारे तिष्ठत्यसौ मुनिः । त्वरितो धर्मपुत्रस्तु द्वारमेत्याह तत्परः

tvāṃ draṣṭukāmo mārkaṃḍo dvāre tiṣṭhatyasau muniḥ | tvarito dharmaputrastu dvārametyāha tatparaḥ

Sanskrit only: no published translation is held for this verse.

युधिष्ठिर उवाच- स्वागतं ते महाप्राज्ञ स्वागतं ते महामुने । अद्य मे सफलं जन्म अद्य मे पावितं कुलम्

yudhiṣṭhira uvāca- svāgataṃ te mahāprājña svāgataṃ te mahāmune | adya me saphalaṃ janma adya me pāvitaṃ kulam

Sanskrit only: no published translation is held for this verse.

अद्य मे पितरस्तृप्तास्त्वयि दृष्टे महामुने । सिंहासन उपस्थाप्य पादशौचार्चनादिभिः

adya me pitarastṛptāstvayi dṛṣṭe mahāmune | siṃhāsana upasthāpya pādaśaucārcanādibhiḥ

Sanskrit only: no published translation is held for this verse.

युधिष्ठिरो महात्मा वै पूजयामास तं मुनिम् । ततस्तमूचे मार्कण्डः पूजितोऽहं त्वया विभो

yudhiṣṭhiro mahātmā vai pūjayāmāsa taṃ munim | tatastamūce mārkaṇḍaḥ pūjito'haṃ tvayā vibho

Sanskrit only: no published translation is held for this verse.

आख्याहि त्वरितो राजन्किमर्थं त्वरितं त्वया । केन वा विक्लवीभूतः कथयस्व ममाग्रतः

ākhyāhi tvarito rājankimarthaṃ tvaritaṃ tvayā | kena vā viklavībhūtaḥ kathayasva mamāgrataḥ

Sanskrit only: no published translation is held for this verse.

युधिष्ठिर उवाच- अस्माकं चैव यद्वृत्तं राज्यस्यार्थे महामुने । एतत्सर्वं विदित्वा तु भगवानिह चागतः

yudhiṣṭhira uvāca- asmākaṃ caiva yadvṛttaṃ rājyasyārthe mahāmune | etatsarvaṃ viditvā tu bhagavāniha cāgataḥ

Sanskrit only: no published translation is held for this verse.

मार्कंडेय उवाच- शृणु राजन्महाबाहो यत्र धर्मो व्यवस्थितः । नैव दृष्टं रणे पापं युध्यमानस्य धीमतः

mārkaṃḍeya uvāca- śṛṇu rājanmahābāho yatra dharmo vyavasthitaḥ | naiva dṛṣṭaṃ raṇe pāpaṃ yudhyamānasya dhīmataḥ

Sanskrit only: no published translation is held for this verse.

किं पुना राजधर्मेण क्षत्रियस्य विशेषतः । तदेवं हृदये कृत्वा तस्मात्पापं न चिंतयेत्

kiṃ punā rājadharmeṇa kṣatriyasya viśeṣataḥ | tadevaṃ hṛdaye kṛtvā tasmātpāpaṃ na ciṃtayet

Sanskrit only: no published translation is held for this verse.

ततो युधिष्ठिरो राजा प्रणम्य शिरसा मुनिम् । पृच्छामि त्वां मुनिश्रेष्ठ सदा त्रैकाल्यदर्शनम् । कथयस्व समासेन मुच्येऽहं येन किल्बिषात्

tato yudhiṣṭhiro rājā praṇamya śirasā munim | pṛcchāmi tvāṃ muniśreṣṭha sadā traikālyadarśanam | kathayasva samāsena mucye'haṃ yena kilbiṣāt

Sanskrit only: no published translation is held for this verse.

मार्कंडेय उवाच- शृणु राजन्महाभाग यन्मां पृच्छसि भारत । एवं सांख्यं च योगं च तीर्थं चैव युधिष्ठिर

mārkaṃḍeya uvāca- śṛṇu rājanmahābhāga yanmāṃ pṛcchasi bhārata | evaṃ sāṃkhyaṃ ca yogaṃ ca tīrthaṃ caiva yudhiṣṭhira

Sanskrit only: no published translation is held for this verse.

किं पुनर्ब्राह्मणैः पुण्यैः कीर्तितं वै पुरा विभो । प्रयागगमनं श्रेष्ठं नराणां पुण्यकर्मणाम्

kiṃ punarbrāhmaṇaiḥ puṇyaiḥ kīrtitaṃ vai purā vibho | prayāgagamanaṃ śreṣṭhaṃ narāṇāṃ puṇyakarmaṇām

Sanskrit only: no published translation is held for this verse.