Padma Purāṇa 3.50

ऋषय ऊचुः- भवता कथितं सर्वं यत्किंचित्पृष्टमेव च । इदानीमपि पृच्छाम एकं वद महामते

ṛṣaya ūcuḥ- bhavatā kathitaṃ sarvaṃ yatkiṃcitpṛṣṭameva ca | idānīmapi pṛcchāma ekaṃ vada mahāmate

Sanskrit only: no published translation is held for this verse.

एतेषां खलु तीर्थानां सेवनाद्यत्फलं लभेत् । सर्वेषां किल कृत्वैकं कर्म केन च लभ्यते

eteṣāṃ khalu tīrthānāṃ sevanādyatphalaṃ labhet | sarveṣāṃ kila kṛtvaikaṃ karma kena ca labhyate

Sanskrit only: no published translation is held for this verse.

एतन्नो ब्रूहि सर्वज्ञ कर्मैवं यदि वर्तते । सूत उवाच- कर्मयोगः किल प्रोक्तो वर्णानां द्विजपूर्वशः

etanno brūhi sarvajña karmaivaṃ yadi vartate | sūta uvāca- karmayogaḥ kila prokto varṇānāṃ dvijapūrvaśaḥ

Sanskrit only: no published translation is held for this verse.

नानाविधो महाभागास्तत्र चैकं विशिष्यते । हरिभक्तिः कृता येन मनसा वचसा गिरा

nānāvidho mahābhāgāstatra caikaṃ viśiṣyate | haribhaktiḥ kṛtā yena manasā vacasā girā

Sanskrit only: no published translation is held for this verse.

जितं तेन जितं तेन जितमेव न संशयः । हरिरेव समाराध्यः सर्वदेवेश्वरेश्वरः

jitaṃ tena jitaṃ tena jitameva na saṃśayaḥ | harireva samārādhyaḥ sarvadeveśvareśvaraḥ

Sanskrit only: no published translation is held for this verse.

हरिनाममहामंत्रैर्नश्येत्पापपिशाचकम् । हरेः प्रदक्षिणं कृत्वा सकृदप्यमलाशयाः

harināmamahāmaṃtrairnaśyetpāpapiśācakam | hareḥ pradakṣiṇaṃ kṛtvā sakṛdapyamalāśayāḥ

Sanskrit only: no published translation is held for this verse.

सर्वतीर्थसमाप्लावं लभंते यन्न संशयः । प्रतिमां च हरेर्दृष्ट्वा सर्वतीर्थफलं लभेत्

sarvatīrthasamāplāvaṃ labhaṃte yanna saṃśayaḥ | pratimāṃ ca harerdṛṣṭvā sarvatīrthaphalaṃ labhet

Sanskrit only: no published translation is held for this verse.

विष्णुनामपरं जप्त्वा सर्वमंत्रफलं लभेत् । विष्णुप्रसादतुलसीमाघ्राय द्विजसत्तमाः

viṣṇunāmaparaṃ japtvā sarvamaṃtraphalaṃ labhet | viṣṇuprasādatulasīmāghrāya dvijasattamāḥ

Sanskrit only: no published translation is held for this verse.

प्रचंडं विकरालं तद्यमस्यास्यं न पश्यति । सकृत्प्रणामी कृष्णस्य मातुः स्तन्यं पिबेन्नहि

pracaṃḍaṃ vikarālaṃ tadyamasyāsyaṃ na paśyati | sakṛtpraṇāmī kṛṣṇasya mātuḥ stanyaṃ pibennahi

Sanskrit only: no published translation is held for this verse.

हरिपादे मनो येषां तेभ्यो नित्यं नमोनमः । पुल्कसः श्वपचो वापि ये चान्ये म्लेच्छजातयः

haripāde mano yeṣāṃ tebhyo nityaṃ namonamaḥ | pulkasaḥ śvapaco vāpi ye cānye mlecchajātayaḥ

Sanskrit only: no published translation is held for this verse.

तेऽपि वंद्या महाभागा हरिपादैकसेवकाः । किं पुनर्ब्राह्मणाः पुण्या भक्ता राजर्षयस्तथा

te'pi vaṃdyā mahābhāgā haripādaikasevakāḥ | kiṃ punarbrāhmaṇāḥ puṇyā bhaktā rājarṣayastathā

Sanskrit only: no published translation is held for this verse.

हरौ भक्तिं विधायैव गर्भवासं न पश्यति । हरेरग्रे स्वनैरुच्चैर्नृत्यंस्तन्नामकृन्नरः

harau bhaktiṃ vidhāyaiva garbhavāsaṃ na paśyati | hareragre svanairuccairnṛtyaṃstannāmakṛnnaraḥ

Sanskrit only: no published translation is held for this verse.

पुनाति भुवनं विप्रा गंगादि सलिलं यथा । दर्शनात्स्पर्शनात्तस्य आलापादपि भक्तितः

punāti bhuvanaṃ viprā gaṃgādi salilaṃ yathā | darśanātsparśanāttasya ālāpādapi bhaktitaḥ

Sanskrit only: no published translation is held for this verse.

ब्रह्महत्यादिभिः पापैर्मुच्यते नात्र संशयः । हरेः प्रदक्षिणं कुर्वन्नुच्चैस्तन्नामकृन्नरः

brahmahatyādibhiḥ pāpairmucyate nātra saṃśayaḥ | hareḥ pradakṣiṇaṃ kurvannuccaistannāmakṛnnaraḥ

Sanskrit only: no published translation is held for this verse.

करतालादिसंधानं सुस्वरं कलशब्दितम् । ब्रह्महत्यादिकं पापं तेनैव करतालितम्

karatālādisaṃdhānaṃ susvaraṃ kalaśabditam | brahmahatyādikaṃ pāpaṃ tenaiva karatālitam

Sanskrit only: no published translation is held for this verse.

हरिभक्तिकथामुक्त्वा ख्यायिकां शृणुयाच्च यः । तस्य संदर्शनादेव पूतो भवति मानवः

haribhaktikathāmuktvā khyāyikāṃ śṛṇuyācca yaḥ | tasya saṃdarśanādeva pūto bhavati mānavaḥ

Sanskrit only: no published translation is held for this verse.

किं पुनस्तस्य पापानामाशंका मुनिपुंगवाः । तीर्थानां च परं तीर्थं कृष्णनाम महर्षयः

kiṃ punastasya pāpānāmāśaṃkā munipuṃgavāḥ | tīrthānāṃ ca paraṃ tīrthaṃ kṛṣṇanāma maharṣayaḥ

Sanskrit only: no published translation is held for this verse.

तीर्थीकुर्वंति जगतीं गृहीतं कृष्णनाम यैः । तस्मान्मुनिवराः पुण्यं नातः परतरं विदुः

tīrthīkurvaṃti jagatīṃ gṛhītaṃ kṛṣṇanāma yaiḥ | tasmānmunivarāḥ puṇyaṃ nātaḥ parataraṃ viduḥ

Sanskrit only: no published translation is held for this verse.

विष्णुप्रसादनिर्माल्यं भुक्त्वा धृत्वा च मस्तके । विष्णुरेव भवेन्मर्त्यो यमशोकविनाशनः

viṣṇuprasādanirmālyaṃ bhuktvā dhṛtvā ca mastake | viṣṇureva bhavenmartyo yamaśokavināśanaḥ

Sanskrit only: no published translation is held for this verse.

अर्चनीयो नमस्कार्यो हरिरेव न संशयः । ये महाविष्णुमव्यक्तं देवं वापि महेश्वरम्

arcanīyo namaskāryo harireva na saṃśayaḥ | ye mahāviṣṇumavyaktaṃ devaṃ vāpi maheśvaram

Sanskrit only: no published translation is held for this verse.

एकीभावेन पश्यंति न तेषां पुनरुद्भवः । तस्मादनादिनिधनं विष्णुमात्मानमव्ययम्

ekībhāvena paśyaṃti na teṣāṃ punarudbhavaḥ | tasmādanādinidhanaṃ viṣṇumātmānamavyayam

Sanskrit only: no published translation is held for this verse.

हरिं चैकं प्रपश्यध्वं पूजयध्वं तथैव हि । ये समानं प्रपश्यंति हरिं वै देवतांतरम्

hariṃ caikaṃ prapaśyadhvaṃ pūjayadhvaṃ tathaiva hi | ye samānaṃ prapaśyaṃti hariṃ vai devatāṃtaram

Sanskrit only: no published translation is held for this verse.

ते यांति नरकान्घोरांन्न तांस्तु गणयेद्धीरः । मूर्खं वा पंडितं वापि ब्राह्मणं केशवप्रियम्

te yāṃti narakānghorāṃnna tāṃstu gaṇayeddhīraḥ | mūrkhaṃ vā paṃḍitaṃ vāpi brāhmaṇaṃ keśavapriyam

Sanskrit only: no published translation is held for this verse.

श्वपाकं वा मोचयति नारायणः स्वयं प्रभुः । नारायणात्परो नास्ति पापराशि दवानलः

śvapākaṃ vā mocayati nārāyaṇaḥ svayaṃ prabhuḥ | nārāyaṇātparo nāsti pāparāśi davānalaḥ

Sanskrit only: no published translation is held for this verse.

कृत्वापि पातकं घोरं कृष्णनाम्ना विमुच्यते । स्वयं नारायणो देवः स्वनाम्नि जगतां गुरुः

kṛtvāpi pātakaṃ ghoraṃ kṛṣṇanāmnā vimucyate | svayaṃ nārāyaṇo devaḥ svanāmni jagatāṃ guruḥ

Sanskrit only: no published translation is held for this verse.

आत्मनोऽभ्यधिकां शक्तिं स्थापयामास सुव्रताः । अत्र ये विवदंते वै आयासलघुदर्शनात्

ātmano'bhyadhikāṃ śaktiṃ sthāpayāmāsa suvratāḥ | atra ye vivadaṃte vai āyāsalaghudarśanāt

Sanskrit only: no published translation is held for this verse.

फलानां गौरवाच्चापि ते यांति नरकं बहु । तस्माद्धरौ भक्तिमान्स्याद्धरिनामपरायणः

phalānāṃ gauravāccāpi te yāṃti narakaṃ bahu | tasmāddharau bhaktimānsyāddharināmaparāyaṇaḥ

Sanskrit only: no published translation is held for this verse.

पूजकं पृष्ठतो रक्षेन्नामिनं वक्षसि प्रभुः । हरिनाममहावज्रं पापपर्वतदारणे

pūjakaṃ pṛṣṭhato rakṣennāminaṃ vakṣasi prabhuḥ | harināmamahāvajraṃ pāpaparvatadāraṇe

Sanskrit only: no published translation is held for this verse.

तस्य पादौ तु सफलौ तदर्थं गतिशालिनौ । तावेव धन्यावाख्यातौ यौ तु पूजाकरौ करौ

tasya pādau tu saphalau tadarthaṃ gatiśālinau | tāveva dhanyāvākhyātau yau tu pūjākarau karau

Sanskrit only: no published translation is held for this verse.

उत्तमांगमुत्तमांगं तद्धरौ नम्रमेव यत् । सा जिह्वा या हरिं स्तौति तन्मनस्तत्पदानुगम्

uttamāṃgamuttamāṃgaṃ taddharau namrameva yat | sā jihvā yā hariṃ stauti tanmanastatpadānugam

Sanskrit only: no published translation is held for this verse.

तानि लोमानि चोच्यंते यानि तन्नाम्नि चोत्थितम् । कुर्वंति तच्च नेत्रांबु यदच्युतप्रसंगतः

tāni lomāni cocyaṃte yāni tannāmni cotthitam | kurvaṃti tacca netrāṃbu yadacyutaprasaṃgataḥ

Sanskrit only: no published translation is held for this verse.

अहो लोका अतितरां दैवदोषेण वंचिताः । नामोच्चारणमात्रेण मुक्तिदं न भजंति वै

aho lokā atitarāṃ daivadoṣeṇa vaṃcitāḥ | nāmoccāraṇamātreṇa muktidaṃ na bhajaṃti vai

Sanskrit only: no published translation is held for this verse.

वंचितास्ते च कलुषाः स्त्रीणां संगप्रसंगतः । प्रतिष्ठंति च लोमानि येषां नो कृष्णशब्दने

vaṃcitāste ca kaluṣāḥ strīṇāṃ saṃgaprasaṃgataḥ | pratiṣṭhaṃti ca lomāni yeṣāṃ no kṛṣṇaśabdane

Sanskrit only: no published translation is held for this verse.

ते मूर्खा ह्यकृतात्मानः पुत्रशोकादि विह्वलाः । रुदंति बहुलालापैर्न कृष्णाक्षरकीर्तने

te mūrkhā hyakṛtātmānaḥ putraśokādi vihvalāḥ | rudaṃti bahulālāpairna kṛṣṇākṣarakīrtane

Sanskrit only: no published translation is held for this verse.

जिह्वां लब्ध्वापि लोकेऽस्मिन्कृष्णनामजपेन्नहि । लब्ध्वापि मुक्तिसोपानं हेलयैव च्यवंति ते

jihvāṃ labdhvāpi loke'sminkṛṣṇanāmajapennahi | labdhvāpi muktisopānaṃ helayaiva cyavaṃti te

Sanskrit only: no published translation is held for this verse.

तस्माद्यत्नेन वै विष्णुं कर्मयोगेन मानवः । कर्मयोगार्च्चितो विष्णुः प्रसीदत्येव नान्यथा

tasmādyatnena vai viṣṇuṃ karmayogena mānavaḥ | karmayogārccito viṣṇuḥ prasīdatyeva nānyathā

Sanskrit only: no published translation is held for this verse.

तीर्थादप्यधिकं तीर्थं विष्णोर्भजनमुच्यते । सर्वेषां खलु तीर्थानां स्नानपानावगाहनैः

tīrthādapyadhikaṃ tīrthaṃ viṣṇorbhajanamucyate | sarveṣāṃ khalu tīrthānāṃ snānapānāvagāhanaiḥ

Sanskrit only: no published translation is held for this verse.

यत्फलं लभते मर्त्यस्तत्फलं कृष्णसेवनात् । यजंते कर्मयोगेन धन्या एव नरा हरिम्

yatphalaṃ labhate martyastatphalaṃ kṛṣṇasevanāt | yajaṃte karmayogena dhanyā eva narā harim

Sanskrit only: no published translation is held for this verse.

तस्माद्भजध्वं मुनयः कृष्णं परममंगलम्

tasmādbhajadhvaṃ munayaḥ kṛṣṇaṃ paramamaṃgalam

Sanskrit only: no published translation is held for this verse.

इति श्रीपाद्मे महापुराणे स्वर्गखंडे विष्णुभक्तिप्रशंसनं नाम पंचाशत्तमोऽध्यायः

iti śrīpādme mahāpurāṇe svargakhaṃḍe viṣṇubhaktipraśaṃsanaṃ nāma paṃcāśattamo'dhyāyaḥ

Sanskrit only: no published translation is held for this verse.