Padma Purāṇa 3.57

व्यास उवाच- अथातः संप्रवक्ष्यामि दानधर्म्ममनुत्तमम् । ब्रह्मणाभिहितं पूर्वमृषीणां ब्रह्मवादिनाम्

vyāsa uvāca- athātaḥ saṃpravakṣyāmi dānadharmmamanuttamam | brahmaṇābhihitaṃ pūrvamṛṣīṇāṃ brahmavādinām

Sanskrit only: no published translation is held for this verse.

अर्थानामुचितं पात्रे श्रद्धया प्रतिपादनम् । दानमित्यभिनिर्दिष्टं भुक्तिमुक्तिफलप्रदम्

arthānāmucitaṃ pātre śraddhayā pratipādanam | dānamityabhinirdiṣṭaṃ bhuktimuktiphalapradam

Sanskrit only: no published translation is held for this verse.

यो ददाति विशिष्टेभ्यः श्रद्धया परया युतः । तद्वै दत्तमहं मन्ये शेषं कस्यापि रक्षति

yo dadāti viśiṣṭebhyaḥ śraddhayā parayā yutaḥ | tadvai dattamahaṃ manye śeṣaṃ kasyāpi rakṣati

Sanskrit only: no published translation is held for this verse.

नित्यं नैमित्तिकं काम्यं त्रिविधं दानमुच्यते । चतुर्थं विमलं प्रोक्तं सर्वदानोत्तमोत्तमम्

nityaṃ naimittikaṃ kāmyaṃ trividhaṃ dānamucyate | caturthaṃ vimalaṃ proktaṃ sarvadānottamottamam

Sanskrit only: no published translation is held for this verse.

अहन्यहनि यत्किंचिद्दीयते नुपकारिणे । अनुद्दिश्यफलं तस्माद्ब्राह्मणाय तु नित्यकम्

ahanyahani yatkiṃciddīyate nupakāriṇe | anuddiśyaphalaṃ tasmādbrāhmaṇāya tu nityakam

Sanskrit only: no published translation is held for this verse.

यत्तु पापोपशांत्यर्थं दीयते विदुषां करे । नैमित्तिकं तदुद्दिष्टं दानं सद्भिरनुत्तमम्

yattu pāpopaśāṃtyarthaṃ dīyate viduṣāṃ kare | naimittikaṃ taduddiṣṭaṃ dānaṃ sadbhiranuttamam

Sanskrit only: no published translation is held for this verse.

अपत्यविजयैश्वर्य सुखार्थं यत्प्रदीयते । दानं तत्काम्यमाख्यातमृषिभिर्धर्मचिंतकैः

apatyavijayaiśvarya sukhārthaṃ yatpradīyate | dānaṃ tatkāmyamākhyātamṛṣibhirdharmaciṃtakaiḥ

Sanskrit only: no published translation is held for this verse.

यदीश्वरस्य प्रीत्यर्थं ब्रह्मवित्सु प्रदीयते । चेतसा धर्मयुक्तेन दानं तद्विमलं शिवम्

yadīśvarasya prītyarthaṃ brahmavitsu pradīyate | cetasā dharmayuktena dānaṃ tadvimalaṃ śivam

Sanskrit only: no published translation is held for this verse.

दानधर्मं निषेवेत पात्रमासाद्य शक्तितः । उपास्यते तु तत्पात्रं यत्तारयति सर्वतः

dānadharmaṃ niṣeveta pātramāsādya śaktitaḥ | upāsyate tu tatpātraṃ yattārayati sarvataḥ

Sanskrit only: no published translation is held for this verse.

कुटुंबभुक्तिवसनाद्देयं यदतिरिच्यते । अन्यथा दीयते यद्वै न तद्दानं फलप्रदम्

kuṭuṃbabhuktivasanāddeyaṃ yadatiricyate | anyathā dīyate yadvai na taddānaṃ phalapradam

Sanskrit only: no published translation is held for this verse.

श्रोत्रियाय कुलीनाय विनीताय तपस्विने । व्रतस्थाय दरिद्राय प्रदेयं भक्तिपूर्वकम्

śrotriyāya kulīnāya vinītāya tapasvine | vratasthāya daridrāya pradeyaṃ bhaktipūrvakam

Sanskrit only: no published translation is held for this verse.

यस्तु दद्यान्महीं भक्त्या ब्राह्मणायाहिताग्नये । स याति परमं स्थानं यत्र गत्वा न शोचति

yastu dadyānmahīṃ bhaktyā brāhmaṇāyāhitāgnaye | sa yāti paramaṃ sthānaṃ yatra gatvā na śocati

Sanskrit only: no published translation is held for this verse.

इक्षुभिः संयुतां भूमिं यवगोधूमशालिनीम् । ददाति वेदविदुषे यः स भूयो न जायते

ikṣubhiḥ saṃyutāṃ bhūmiṃ yavagodhūmaśālinīm | dadāti vedaviduṣe yaḥ sa bhūyo na jāyate

Sanskrit only: no published translation is held for this verse.

गोचर्ममात्रामपि वा यो भूमिं संप्रयच्छति । ब्राह्मणाय दरिद्राय सर्वपापैः प्रमुच्यते

gocarmamātrāmapi vā yo bhūmiṃ saṃprayacchati | brāhmaṇāya daridrāya sarvapāpaiḥ pramucyate

Sanskrit only: no published translation is held for this verse.

भूमिदानात्परं दानं विद्यते नेह किंचन । अन्नदानं तेन तुल्यं विद्यादानं ततोधिकम्

bhūmidānātparaṃ dānaṃ vidyate neha kiṃcana | annadānaṃ tena tulyaṃ vidyādānaṃ tatodhikam

Sanskrit only: no published translation is held for this verse.

यो ब्राह्मणाय शांताय शुचये धर्मशीलिने । ददाति विद्यां विधिना ब्रह्मलोके महीयते

yo brāhmaṇāya śāṃtāya śucaye dharmaśīline | dadāti vidyāṃ vidhinā brahmaloke mahīyate

Sanskrit only: no published translation is held for this verse.

दद्यादहरहः स्वर्णं श्रद्धया ब्रह्मचारिणे । सर्वपापविनिर्मुक्तो ब्रह्मणः स्थानमाप्नुयात्

dadyādaharahaḥ svarṇaṃ śraddhayā brahmacāriṇe | sarvapāpavinirmukto brahmaṇaḥ sthānamāpnuyāt

Sanskrit only: no published translation is held for this verse.

गृहस्थायान्नदानेन फलमाप्नोति मानवः । अन्नमेवास्य दातव्यं दत्वाप्नोति परां गतिम्

gṛhasthāyānnadānena phalamāpnoti mānavaḥ | annamevāsya dātavyaṃ datvāpnoti parāṃ gatim

Sanskrit only: no published translation is held for this verse.

वैशाख्यां पूर्णमास्यां तु ब्राह्मणान्सप्त पंच वा । उपोष्य विधिना शांतः शुचिः प्रयतमानसः

vaiśākhyāṃ pūrṇamāsyāṃ tu brāhmaṇānsapta paṃca vā | upoṣya vidhinā śāṃtaḥ śuciḥ prayatamānasaḥ

Sanskrit only: no published translation is held for this verse.

पूजयित्वा तिलैः कृष्णैर्मधुना च विशेषतः । प्रीयतां धर्मराजेति यदा मनसि वर्त्तते

pūjayitvā tilaiḥ kṛṣṇairmadhunā ca viśeṣataḥ | prīyatāṃ dharmarājeti yadā manasi varttate

Sanskrit only: no published translation is held for this verse.

यावज्जीवं तु यत्पापं तत्क्षणादेव नश्यति । कृष्णाजिने तिलान्कृत्वा हिरण्यं मधुसर्पिषी

yāvajjīvaṃ tu yatpāpaṃ tatkṣaṇādeva naśyati | kṛṣṇājine tilānkṛtvā hiraṇyaṃ madhusarpiṣī

Sanskrit only: no published translation is held for this verse.

ददाति यस्तु विप्राय सर्वं तरति दुष्कृतम् । घृतान्नमुदकुंभं च वैशाख्यां तु विशेषतः

dadāti yastu viprāya sarvaṃ tarati duṣkṛtam | ghṛtānnamudakuṃbhaṃ ca vaiśākhyāṃ tu viśeṣataḥ

Sanskrit only: no published translation is held for this verse.

निर्द्दिश्य धर्मराजाय विप्रेभ्यो मुच्यते भयात् । सुवर्णतिलयुक्तैस्तु ब्राह्मणान्सप्त पंच वा

nirddiśya dharmarājāya viprebhyo mucyate bhayāt | suvarṇatilayuktaistu brāhmaṇānsapta paṃca vā

Sanskrit only: no published translation is held for this verse.

तर्पयेदुदपात्रैस्तु ब्रह्महत्यां व्यपोहति । माघमासे तमिस्रे तु द्वादश्यां समुपोषितः

tarpayedudapātraistu brahmahatyāṃ vyapohati | māghamāse tamisre tu dvādaśyāṃ samupoṣitaḥ

Sanskrit only: no published translation is held for this verse.

शुक्लांबरधरः कृष्णैस्तिलैर्हुत्वा हुताशनम् । प्रदद्याद्ब्राह्मणेभ्यस्तु तिलानेव समाहितः

śuklāṃbaradharaḥ kṛṣṇaistilairhutvā hutāśanam | pradadyādbrāhmaṇebhyastu tilāneva samāhitaḥ

Sanskrit only: no published translation is held for this verse.

जन्मप्रभृति यत्पापं सर्वं तरति वै द्विजः । अमावास्यामनुप्राप्य ब्राह्मणाय तपस्विने

janmaprabhṛti yatpāpaṃ sarvaṃ tarati vai dvijaḥ | amāvāsyāmanuprāpya brāhmaṇāya tapasvine

Sanskrit only: no published translation is held for this verse.

यत्किंचिद्देवदेवेशं दद्याच्चोद्दिश्य केशवम् । प्रीयतामीश्वरो विष्णुर्हृषीकेशः सनातनः

yatkiṃciddevadeveśaṃ dadyāccoddiśya keśavam | prīyatāmīśvaro viṣṇurhṛṣīkeśaḥ sanātanaḥ

Sanskrit only: no published translation is held for this verse.

सप्तजन्मकृतं पापं तत्क्षणादेव नश्यति । यस्तु कृष्णचतुर्दश्यां स्नात्वा देवं पिनाकिनम्

saptajanmakṛtaṃ pāpaṃ tatkṣaṇādeva naśyati | yastu kṛṣṇacaturdaśyāṃ snātvā devaṃ pinākinam

Sanskrit only: no published translation is held for this verse.

आराधयेद्द्विजमुखेन तस्यास्ति पुनर्भवः । कृष्णाष्टम्यां विशेषेण धार्मिकाय द्विजातये

ārādhayeddvijamukhena tasyāsti punarbhavaḥ | kṛṣṇāṣṭamyāṃ viśeṣeṇa dhārmikāya dvijātaye

Sanskrit only: no published translation is held for this verse.

स्नात्वाभ्यर्च्य यथान्यायं पादप्रक्षालनादिभिः । प्रीयतां मे महादेवो दद्याद्द्रव्यं स्वकीयकम्

snātvābhyarcya yathānyāyaṃ pādaprakṣālanādibhiḥ | prīyatāṃ me mahādevo dadyāddravyaṃ svakīyakam

Sanskrit only: no published translation is held for this verse.

सर्वपापविनिर्मुक्तः प्राप्नोति परमां गतिम् । द्विजैः कृष्णचतुर्दश्यां कृष्णाष्टम्यां विशेषतः

sarvapāpavinirmuktaḥ prāpnoti paramāṃ gatim | dvijaiḥ kṛṣṇacaturdaśyāṃ kṛṣṇāṣṭamyāṃ viśeṣataḥ

Sanskrit only: no published translation is held for this verse.

अमावास्यां तथा भक्तैः पूजनीयस्त्रिविक्रमः । एकादश्यां निराहारो द्वादश्यां पुरुषोत्तमम्

amāvāsyāṃ tathā bhaktaiḥ pūjanīyastrivikramaḥ | ekādaśyāṃ nirāhāro dvādaśyāṃ puruṣottamam

Sanskrit only: no published translation is held for this verse.

अर्चयेद्ब्राह्मणमुखे स गच्छेत्परमं पदम् । एषा तिथिर्वैष्णवी स्याद्द्वादशी शुक्लपक्षतः

arcayedbrāhmaṇamukhe sa gacchetparamaṃ padam | eṣā tithirvaiṣṇavī syāddvādaśī śuklapakṣataḥ

Sanskrit only: no published translation is held for this verse.

तस्यामाराधयेद्देवं प्रयत्नेन जनार्दनम् । यत्किंचिद्देवमीशानमुद्दिश्य ब्राह्मणे शुचौ

tasyāmārādhayeddevaṃ prayatnena janārdanam | yatkiṃciddevamīśānamuddiśya brāhmaṇe śucau

Sanskrit only: no published translation is held for this verse.

दीयते विष्णुमेवापि तदनंतफलं स्मृतम् । यो हि यां देवतामिच्छेत्समाराधयितुं नरः

dīyate viṣṇumevāpi tadanaṃtaphalaṃ smṛtam | yo hi yāṃ devatāmicchetsamārādhayituṃ naraḥ

Sanskrit only: no published translation is held for this verse.

ब्राह्मणान्पूजयेद्यत्नात्स तस्यास्तोषयेत्ततः । द्विजानां वपुरास्थाय नित्यं तिष्ठंति देवताः

brāhmaṇānpūjayedyatnātsa tasyāstoṣayettataḥ | dvijānāṃ vapurāsthāya nityaṃ tiṣṭhaṃti devatāḥ

Sanskrit only: no published translation is held for this verse.

पूज्यंते ब्राह्मणा लाभे प्रतिमादिषु तैः क्वचित् । प्रतिमादिषु यत्नेन तस्मात्फलमभीप्सता

pūjyaṃte brāhmaṇā lābhe pratimādiṣu taiḥ kvacit | pratimādiṣu yatnena tasmātphalamabhīpsatā

Sanskrit only: no published translation is held for this verse.

द्विजेषु देवता नित्यं पूजनीया विशेषतः । विभूतिकामः सततं पूजयेद्धि पुरंदरम्

dvijeṣu devatā nityaṃ pūjanīyā viśeṣataḥ | vibhūtikāmaḥ satataṃ pūjayeddhi puraṃdaram

Sanskrit only: no published translation is held for this verse.

ब्रह्मवर्चसकामस्तु ब्रह्माणं ज्ञानकामुकः । आरोग्यकामोथ रविं धनकामो हुताशनम्

brahmavarcasakāmastu brahmāṇaṃ jñānakāmukaḥ | ārogyakāmotha raviṃ dhanakāmo hutāśanam

Sanskrit only: no published translation is held for this verse.

कर्म्मणां सिद्धिकामस्तु पूजयेद्वै विनायकम् । भोगकामस्तु शशिनं बलकामः समीरणम्

karmmaṇāṃ siddhikāmastu pūjayedvai vināyakam | bhogakāmastu śaśinaṃ balakāmaḥ samīraṇam

Sanskrit only: no published translation is held for this verse.

मुमुक्षुः सर्वसंसारात्प्रयत्नेनार्चयेद्धरिम् । यस्तु योगं तथा मोक्षमन्विच्छेऽज्ज्ञानमैश्वरम्

mumukṣuḥ sarvasaṃsārātprayatnenārcayeddharim | yastu yogaṃ tathā mokṣamanvicche'jjñānamaiśvaram

Sanskrit only: no published translation is held for this verse.

अर्चयेत विरूपाक्षं प्रयत्नेन सुरेश्वरम् । ये वांच्छंति महाभोगान्ज्ञानानि च महेश्वरम्

arcayeta virūpākṣaṃ prayatnena sureśvaram | ye vāṃcchaṃti mahābhogānjñānāni ca maheśvaram

Sanskrit only: no published translation is held for this verse.

ते पूजयंति भूतेशं केशवं चापि भोगिनः । वारिदस्तृप्तिमाप्नोति जलदानं ततोधिकम्

te pūjayaṃti bhūteśaṃ keśavaṃ cāpi bhoginaḥ | vāridastṛptimāpnoti jaladānaṃ tatodhikam

Sanskrit only: no published translation is held for this verse.

तैलप्रदः प्रजामिष्टां दीपदश्चक्षुरुत्तमम् । भूमिदः सर्वमाप्नोति दीर्घमायुर्हिरण्यदः

tailapradaḥ prajāmiṣṭāṃ dīpadaścakṣuruttamam | bhūmidaḥ sarvamāpnoti dīrghamāyurhiraṇyadaḥ

Sanskrit only: no published translation is held for this verse.

गृहदाताग्र्यवेश्मानि रूप्यदो रूपमुत्तमम् । वासोदश्चंद्रसालोक्यमश्वदो यानमुत्तमम्

gṛhadātāgryaveśmāni rūpyado rūpamuttamam | vāsodaścaṃdrasālokyamaśvado yānamuttamam

Sanskrit only: no published translation is held for this verse.

अन्नदाता श्रियं स्वेष्टां गोदो ब्राह्मणविष्टपम् । यानशय्याप्रदो भार्य्यामैश्वर्यमभयप्रदः

annadātā śriyaṃ sveṣṭāṃ godo brāhmaṇaviṣṭapam | yānaśayyāprado bhāryyāmaiśvaryamabhayapradaḥ

Sanskrit only: no published translation is held for this verse.

धान्यदः शाश्वतं सौख्यं ब्रह्मदो ब्रह्मशाश्वतम् । धान्यान्यपि यथाशक्ति विप्रेषु प्रतिपादयेत्

dhānyadaḥ śāśvataṃ saukhyaṃ brahmado brahmaśāśvatam | dhānyānyapi yathāśakti vipreṣu pratipādayet

Sanskrit only: no published translation is held for this verse.

वेदविद्याविशिष्टेषु प्रेत्य स्वर्गं समश्नुते । गवां चान्नप्रदानेन सर्वपापैः प्रमुच्यते

vedavidyāviśiṣṭeṣu pretya svargaṃ samaśnute | gavāṃ cānnapradānena sarvapāpaiḥ pramucyate

Sanskrit only: no published translation is held for this verse.

इंधनानां प्रदानेन दीप्ताग्निर्जायते नरः । फलमूलानि पानानि शाकानि विविधानि च

iṃdhanānāṃ pradānena dīptāgnirjāyate naraḥ | phalamūlāni pānāni śākāni vividhāni ca

Sanskrit only: no published translation is held for this verse.

प्रदद्याद्ब्राह्मणेभ्यस्तु मुदायुक्तः सदा भवेत् । औषधं स्नेहमाहारं रोगिणो रोगशांतये

pradadyādbrāhmaṇebhyastu mudāyuktaḥ sadā bhavet | auṣadhaṃ snehamāhāraṃ rogiṇo rogaśāṃtaye

Sanskrit only: no published translation is held for this verse.

ददानो रोगरहितः सुखी दीर्घायुरेव च । असिपत्रवनं मार्गं क्षुरधारासमन्वितम्

dadāno rogarahitaḥ sukhī dīrghāyureva ca | asipatravanaṃ mārgaṃ kṣuradhārāsamanvitam

Sanskrit only: no published translation is held for this verse.

तीक्ष्णतापं च तरति छत्रोपानत्प्रदो नरः । यद्यदिष्टतमं लोके यच्चास्यापेक्षितं गृहे

tīkṣṇatāpaṃ ca tarati chatropānatprado naraḥ | yadyadiṣṭatamaṃ loke yaccāsyāpekṣitaṃ gṛhe

Sanskrit only: no published translation is held for this verse.

तत्तद्गुणवते देयं तदेवाक्षयमिच्छता । अयने विषुवे चैव ग्रहणे चंद्रसूर्ययोः

tattadguṇavate deyaṃ tadevākṣayamicchatā | ayane viṣuve caiva grahaṇe caṃdrasūryayoḥ

Sanskrit only: no published translation is held for this verse.

संक्रांत्यादिषु कालेषु दत्तं भवति चाक्षयम् । प्रयागादिषु तीर्थेषु पुण्येष्वायतनेषु च

saṃkrāṃtyādiṣu kāleṣu dattaṃ bhavati cākṣayam | prayāgādiṣu tīrtheṣu puṇyeṣvāyataneṣu ca

Sanskrit only: no published translation is held for this verse.

दत्वा चाक्षयमाप्नोति नदीप्रस्रवणेषु च । दानधर्मात्परो धर्मो भूतानां नेह विद्यते

datvā cākṣayamāpnoti nadīprasravaṇeṣu ca | dānadharmātparo dharmo bhūtānāṃ neha vidyate

Sanskrit only: no published translation is held for this verse.

तस्माद्विप्राय दातव्यं श्रोत्रियाय द्विजातिभिः । स्वर्गाय भूतिकामेन तथा पापोपशांतये

tasmādviprāya dātavyaṃ śrotriyāya dvijātibhiḥ | svargāya bhūtikāmena tathā pāpopaśāṃtaye

Sanskrit only: no published translation is held for this verse.

मुमुक्षुणा तु दातव्यं ब्राह्मणेभ्यस्तथान्वहम् । दीयमानं तु यो मोहाद्गोविप्राग्निसुरेषु च

mumukṣuṇā tu dātavyaṃ brāhmaṇebhyastathānvaham | dīyamānaṃ tu yo mohādgoviprāgnisureṣu ca

Sanskrit only: no published translation is held for this verse.

निवारयत्यधर्मात्मा तिर्यग्योनिं व्रजेत सः । यस्तु द्रव्यार्जनं कृत्वा नार्चयेद्ब्राह्मणान्सुरान्

nivārayatyadharmātmā tiryagyoniṃ vrajeta saḥ | yastu dravyārjanaṃ kṛtvā nārcayedbrāhmaṇānsurān

Sanskrit only: no published translation is held for this verse.

सर्वस्वमपहृत्यैनं राजा राष्ट्रात्प्रवासयेत् । यस्तु दुर्भिक्षवेलायामन्नाद्यं न प्रयच्छति

sarvasvamapahṛtyainaṃ rājā rāṣṭrātpravāsayet | yastu durbhikṣavelāyāmannādyaṃ na prayacchati

Sanskrit only: no published translation is held for this verse.

म्रियमाणेषु विप्रेषु ब्राह्मणः स तु गर्हितः । न तस्मात्प्रतिगृह्णीयुः न वसेयुश्च तेन हि

mriyamāṇeṣu vipreṣu brāhmaṇaḥ sa tu garhitaḥ | na tasmātpratigṛhṇīyuḥ na vaseyuśca tena hi

Sanskrit only: no published translation is held for this verse.

आज्ञायित्वा स्वकाद्राष्ट्राद्राजा तं विप्रवासयेत् । पश्चात्सद्भ्यो ददातीह स्वद्रव्यं धर्मसाधनम्

ājñāyitvā svakādrāṣṭrādrājā taṃ vipravāsayet | paścātsadbhyo dadātīha svadravyaṃ dharmasādhanam

Sanskrit only: no published translation is held for this verse.

सपूर्वाभ्यधिकः पापी नरके पच्यते नरः । स्वाध्यायवंतो ये विप्रा विद्यावंतो जितेंद्रियाः

sapūrvābhyadhikaḥ pāpī narake pacyate naraḥ | svādhyāyavaṃto ye viprā vidyāvaṃto jiteṃdriyāḥ

Sanskrit only: no published translation is held for this verse.

सत्यसंयमसंयुक्तास्तेभ्यो दद्याद्द्विजोत्तमाः । प्रभुक्तमपि विद्वांसं धार्मिकं भोजयेद्द्विजम्

satyasaṃyamasaṃyuktāstebhyo dadyāddvijottamāḥ | prabhuktamapi vidvāṃsaṃ dhārmikaṃ bhojayeddvijam

Sanskrit only: no published translation is held for this verse.

न च मूर्खमवृत्तस्थं दशरात्रमुपोषितम् । सन्निकृष्टमतिक्रम्य श्रोत्रियं यः प्रयच्छति

na ca mūrkhamavṛttasthaṃ daśarātramupoṣitam | sannikṛṣṭamatikramya śrotriyaṃ yaḥ prayacchati

Sanskrit only: no published translation is held for this verse.

स तेन कर्मणा पापी दहत्यासप्तमं कुलम् । यदि स्यादधिको विप्रः शीलविद्यादिभिः स्वयम्

sa tena karmaṇā pāpī dahatyāsaptamaṃ kulam | yadi syādadhiko vipraḥ śīlavidyādibhiḥ svayam

Sanskrit only: no published translation is held for this verse.

तस्मै यत्नेन दातव्यमतिक्रम्य च सन्निधिम् । योर्चितं प्रतिगृह्णीयाद्दद्यादर्चितमेव च

tasmai yatnena dātavyamatikramya ca sannidhim | yorcitaṃ pratigṛhṇīyāddadyādarcitameva ca

Sanskrit only: no published translation is held for this verse.

तावुभौ गच्छतः स्वर्गं नरकं तु विपर्यये । न वार्यपि प्रयच्छेत नास्तिके हैतुकेपि च

tāvubhau gacchataḥ svargaṃ narakaṃ tu viparyaye | na vāryapi prayaccheta nāstike haitukepi ca

Sanskrit only: no published translation is held for this verse.

न पाखंडेषु सर्वेषु नावेदविदिधर्मवित् । रूप्यं चैव हिरण्यं च गामश्वं पृथिवीं तिलान्

na pākhaṃḍeṣu sarveṣu nāvedavididharmavit | rūpyaṃ caiva hiraṇyaṃ ca gāmaśvaṃ pṛthivīṃ tilān

Sanskrit only: no published translation is held for this verse.

अविद्वान्प्रतिगृह्णीयाद्भस्मी भवति काष्ठवत् । द्विजातिभ्यो धनं लिप्सेत्प्रशस्तेभ्यो द्विजोतमः

avidvānpratigṛhṇīyādbhasmī bhavati kāṣṭhavat | dvijātibhyo dhanaṃ lipsetpraśastebhyo dvijotamaḥ

Sanskrit only: no published translation is held for this verse.

अपि राजन्यवैश्याभ्यां न तु शूद्रात्कथंचन । वृत्तिसंकोचमन्विच्छेन्नेहेत धनविस्तरम्

api rājanyavaiśyābhyāṃ na tu śūdrātkathaṃcana | vṛttisaṃkocamanvicchenneheta dhanavistaram

Sanskrit only: no published translation is held for this verse.

धनलोभे प्रसक्तस्तु ब्राह्मण्यादेव हीयते । वेदानधीत्य सकलान्यज्ञांश्चावाप्य सर्वशः

dhanalobhe prasaktastu brāhmaṇyādeva hīyate | vedānadhītya sakalānyajñāṃścāvāpya sarvaśaḥ

Sanskrit only: no published translation is held for this verse.

न तां गतिमवाप्नोति संतोषाद्यामवाप्नुयात् । प्रतिग्रहरुचिर्न स्याच्छूद्रान्न तु समाहरेत्

na tāṃ gatimavāpnoti saṃtoṣādyāmavāpnuyāt | pratigraharucirna syācchūdrānna tu samāharet

Sanskrit only: no published translation is held for this verse.

स्थित्यर्थादधिकं गृह्णन्ब्राह्मणो यात्यधोगतिम् । यस्तु याति न संतोषं न स स्वर्गस्य भाजनम्

sthityarthādadhikaṃ gṛhṇanbrāhmaṇo yātyadhogatim | yastu yāti na saṃtoṣaṃ na sa svargasya bhājanam

Sanskrit only: no published translation is held for this verse.

उद्वेजयति भूतानि यथा चौरस्तथैव सः । गुरुं भृत्यांश्चोज्जिहीर्षुस्तर्पयन्देवतातिथीन्

udvejayati bhūtāni yathā caurastathaiva saḥ | guruṃ bhṛtyāṃścojjihīrṣustarpayandevatātithīn

Sanskrit only: no published translation is held for this verse.

सर्वतः प्रतिगृह्णीयान्न तु तृप्येत्स्वयं ततः । एवं गृहस्थो युक्तात्मा देवतातिथिपूजकः

sarvataḥ pratigṛhṇīyānna tu tṛpyetsvayaṃ tataḥ | evaṃ gṛhastho yuktātmā devatātithipūjakaḥ

Sanskrit only: no published translation is held for this verse.

वर्तमानः संयतात्मा याति तत्परमं पदम् । पुत्रेषु भार्यां निक्षिप्य गत्वारण्यं तु तत्त्ववित्

vartamānaḥ saṃyatātmā yāti tatparamaṃ padam | putreṣu bhāryāṃ nikṣipya gatvāraṇyaṃ tu tattvavit

Sanskrit only: no published translation is held for this verse.

एकाकी विचरेन्नित्यमुदासीनः समाहितः । एष वः कथितो धर्म्मो गृहस्थानां द्विजोत्तमाः । ज्ञात्वा तु तिष्ठेन्नियतं तथानुष्ठापयेद्द्विजान्

ekākī vicarennityamudāsīnaḥ samāhitaḥ | eṣa vaḥ kathito dharmmo gṛhasthānāṃ dvijottamāḥ | jñātvā tu tiṣṭhenniyataṃ tathānuṣṭhāpayeddvijān

Sanskrit only: no published translation is held for this verse.

इति देवमनादिमेकमीशं गृहधर्मेण समर्चयेदजस्रम् । समतीत्य स सर्वभूतयोनिं प्रकृतिं याति परं न याति जन्म

iti devamanādimekamīśaṃ gṛhadharmeṇa samarcayedajasram | samatītya sa sarvabhūtayoniṃ prakṛtiṃ yāti paraṃ na yāti janma

Sanskrit only: no published translation is held for this verse.