Padma Purāṇa 4.16

शौनक उवाच । कर्मणा केन भोः सूत चैनसां संक्षयो भवेत् । श्रीहरेश्च कृपा भूयात्तद्वदस्वानुकंपया

śaunaka uvāca | karmaṇā kena bhoḥ sūta cainasāṃ saṃkṣayo bhavet | śrīhareśca kṛpā bhūyāttadvadasvānukaṃpayā

Sanskrit only: no published translation is held for this verse.

सूत उवाच । शृणु शौनक वक्ष्यामि शृण्वतां पापनाशनम् । येन विष्णोः कृपा स्याद्वै वृजिनक्षयकारिणी

sūta uvāca | śṛṇu śaunaka vakṣyāmi śṛṇvatāṃ pāpanāśanam | yena viṣṇoḥ kṛpā syādvai vṛjinakṣayakāriṇī

Sanskrit only: no published translation is held for this verse.

पौर्णमास्यां तु यो विप्र भक्तिभावसमन्वितः । कुर्य्यान्नानाविधानेन सपर्य्यां श्रीजगद्विभोः

paurṇamāsyāṃ tu yo vipra bhaktibhāvasamanvitaḥ | kuryyānnānāvidhānena saparyyāṃ śrījagadvibhoḥ

Sanskrit only: no published translation is held for this verse.

कलुषं तस्य नश्येत कोटिजन्मार्जितं मुने । तस्मिन्श्रीरमणस्यास्य कृपा जाता भवेद्ध्रुवम्

kaluṣaṃ tasya naśyeta koṭijanmārjitaṃ mune | tasminśrīramaṇasyāsya kṛpā jātā bhaveddhruvam

Sanskrit only: no published translation is held for this verse.

द्वादश्यामन्नदानं यो भक्त्या कुर्याद्द्विजातये । तस्य नश्यंति पापानि तमांसी वारुणोदये

dvādaśyāmannadānaṃ yo bhaktyā kuryāddvijātaye | tasya naśyaṃti pāpāni tamāṃsī vāruṇodaye

Sanskrit only: no published translation is held for this verse.

यो नरः श्रीहरिं कुर्यात्स्नपनं पयसा द्विज । तत्प्रीतिः श्रीहरेः सद्यो द्वादश्यां शर्करादिभिः

yo naraḥ śrīhariṃ kuryātsnapanaṃ payasā dvija | tatprītiḥ śrīhareḥ sadyo dvādaśyāṃ śarkarādibhiḥ

Sanskrit only: no published translation is held for this verse.

मंत्रं विना तु यो विप्र दद्याच्छ्रीहरये किल । पाषाणसदृशं पुष्पं दाता याति अधोगतिम्

maṃtraṃ vinā tu yo vipra dadyācchrīharaye kila | pāṣāṇasadṛśaṃ puṣpaṃ dātā yāti adhogatim

Sanskrit only: no published translation is held for this verse.

क्ष्मासुराय च मूर्खाय पाषाणसदृशं तु यत् । दद्याद्दानं नरो यो वै तस्य पुण्यं न विद्यते

kṣmāsurāya ca mūrkhāya pāṣāṇasadṛśaṃ tu yat | dadyāddānaṃ naro yo vai tasya puṇyaṃ na vidyate

Sanskrit only: no published translation is held for this verse.

विद्याहीनो द्विजो मोहाद्दानं गृह्णाति मूढधीः । कालानलं यथा जीर्णं तेन स निरयं व्रजेत्

vidyāhīno dvijo mohāddānaṃ gṛhṇāti mūḍhadhīḥ | kālānalaṃ yathā jīrṇaṃ tena sa nirayaṃ vrajet

Sanskrit only: no published translation is held for this verse.

यथा दारुमयो हस्ती मृगश्चित्रमयो यथा । विद्याहीनो द्विजो विप्र त्रयस्ते नामधारकाः

yathā dārumayo hastī mṛgaścitramayo yathā | vidyāhīno dvijo vipra trayaste nāmadhārakāḥ

Sanskrit only: no published translation is held for this verse.

यथाध्वनिस्थितं वारि पवनार्केण शुद्ध्यति । भक्त्या तु पार्षदं दृष्ट्वा तस्य नश्यति कल्मषम्

yathādhvanisthitaṃ vāri pavanārkeṇa śuddhyati | bhaktyā tu pārṣadaṃ dṛṣṭvā tasya naśyati kalmaṣam

Sanskrit only: no published translation is held for this verse.

यो नरश्चाश्विने मासि सघृतान्पूर्णिमा दिने । दद्याच्छ्रीहरये लाजान्क्रीडार्थं तु वराटिकाम्

yo naraścāśvine māsi saghṛtānpūrṇimā dine | dadyācchrīharaye lājānkrīḍārthaṃ tu varāṭikām

Sanskrit only: no published translation is held for this verse.

भक्त्या याति हरेः स्थानं पुनरावृत्तिवर्जितः । न दद्याद्यो नरो मोहात्तस्मिन्न तुष्टिदो हरिः

bhaktyā yāti hareḥ sthānaṃ punarāvṛttivarjitaḥ | na dadyādyo naro mohāttasminna tuṣṭido hariḥ

Sanskrit only: no published translation is held for this verse.

वराटिकां यावतीं यो हरये पौर्णिमादिने । तावद्दिनं हरेः स्थानं चाश्विने संवसेद्ध्रुवम्

varāṭikāṃ yāvatīṃ yo haraye paurṇimādine | tāvaddinaṃ hareḥ sthānaṃ cāśvine saṃvaseddhruvam

Sanskrit only: no published translation is held for this verse.

करवीरपुरे ह्यासीत्पुरा शूद्रोऽपि निर्द्दयः । कालद्विजो द्विजश्रेष्ठ नाम्ना पापी भयंकरः

karavīrapure hyāsītpurā śūdro'pi nirddayaḥ | kāladvijo dvijaśreṣṭha nāmnā pāpī bhayaṃkaraḥ

Sanskrit only: no published translation is held for this verse.

स्वकार्यनिरतः सोऽपि स्वामिकार्यप्रणाशकः । एकदा पंचतां यातो यमदूता भयंकराः

svakāryanirataḥ so'pi svāmikāryapraṇāśakaḥ | ekadā paṃcatāṃ yāto yamadūtā bhayaṃkarāḥ

Sanskrit only: no published translation is held for this verse.

आगतास्तं समानेतुं यमस्यतु निकेतनम् । बद्ध्वा निन्युश्च तं दृष्ट्वा पृष्टवान्सचिवं यमः

āgatāstaṃ samānetuṃ yamasyatu niketanam | baddhvā ninyuśca taṃ dṛṣṭvā pṛṣṭavānsacivaṃ yamaḥ

Sanskrit only: no published translation is held for this verse.

यम उवाच । अस्य किं विद्यतेऽमात्य कर्मापि च शुभाशुभम् । कथयस्व समूलं तु चित्रगुप्त विचक्षण

yama uvāca | asya kiṃ vidyate'mātya karmāpi ca śubhāśubham | kathayasva samūlaṃ tu citragupta vicakṣaṇa

Sanskrit only: no published translation is held for this verse.

चित्रगुप्त उवाच। असौ पापी दुराचारः स्वामिकार्यप्रणाशकः । नास्ति पुण्यं चाणुमात्रं नरके परिपच्यताम्

citragupta uvāca| asau pāpī durācāraḥ svāmikāryapraṇāśakaḥ | nāsti puṇyaṃ cāṇumātraṃ narake paripacyatām

Sanskrit only: no published translation is held for this verse.

शतमन्वन्तरं राजन्नागयोनौ च निष्ठुरः । पाषाणे जन्म चासाद्य गृहे स्थातुं निरंतरम्

śatamanvantaraṃ rājannāgayonau ca niṣṭhuraḥ | pāṣāṇe janma cāsādya gṛhe sthātuṃ niraṃtaram

Sanskrit only: no published translation is held for this verse.

सूत उवाच । तावत्कालं ततो विप्र निरये स पपात ह । ततोऽप्यश्मगृहे नागयोनौ जातः सुदुःखितः

sūta uvāca | tāvatkālaṃ tato vipra niraye sa papāta ha | tato'pyaśmagṛhe nāgayonau jātaḥ suduḥkhitaḥ

Sanskrit only: no published translation is held for this verse.

एकदा चाश्विने मासि पौर्णमासीदिने द्विज । लाजान्वराटिका नागो बिलात्प्राक्षेपयद्बहिः

ekadā cāśvine māsi paurṇamāsīdine dvija | lājānvarāṭikā nāgo bilātprākṣepayadbahiḥ

Sanskrit only: no published translation is held for this verse.

पतिता सा हरेरग्रे पापमस्य स्वयं हरिः । तूर्णं तु नाशयामास दयालुर्दुःखनाशकः

patitā sā hareragre pāpamasya svayaṃ hariḥ | tūrṇaṃ tu nāśayāmāsa dayālurduḥkhanāśakaḥ

Sanskrit only: no published translation is held for this verse.

कदाचित्प्राप्तकालस्तु पंचत्वं स जगाम ह । यमदूतास्तमानेतुं चागता बहुशो द्विज

kadācitprāptakālastu paṃcatvaṃ sa jagāma ha | yamadūtāstamānetuṃ cāgatā bahuśo dvija

Sanskrit only: no published translation is held for this verse.

बद्ध्वा नेतुं यदा चक्रुर्यमस्य सदनं प्रति । तदागता विष्णुदूताः शंखचक्रगदाधराः

baddhvā netuṃ yadā cakruryamasya sadanaṃ prati | tadāgatā viṣṇudūtāḥ śaṃkhacakragadādharāḥ

Sanskrit only: no published translation is held for this verse.

पाशं छित्त्वा रथे दिव्ये तमाशुगतकिल्बिषम् । तत्र चारोपयामासुः यमदूताः पलायिताः

pāśaṃ chittvā rathe divye tamāśugatakilbiṣam | tatra cāropayāmāsuḥ yamadūtāḥ palāyitāḥ

Sanskrit only: no published translation is held for this verse.

ततो निकेतनं विष्णोर्नागस्तैर्वेष्टितो ययौ । तत्र तस्थौ हरेरग्रे पुनरावर्त्तिवर्जितः

tato niketanaṃ viṣṇornāgastairveṣṭito yayau | tatra tasthau hareragre punarāvarttivarjitaḥ

Sanskrit only: no published translation is held for this verse.

भक्त्या यो हरये दद्याल्लाजांश्च सघृतान्द्विज । वराटिकां तस्य पुण्यं न जाने किं भवेद्ध्रुवम्

bhaktyā yo haraye dadyāllājāṃśca saghṛtāndvija | varāṭikāṃ tasya puṇyaṃ na jāne kiṃ bhaveddhruvam

Sanskrit only: no published translation is held for this verse.

य इमं शृणुयाद्विप्र चाध्यायं पापनाशनम् । तस्य नश्यंति पापानि श्रीहरेः कृपयापि च

ya imaṃ śṛṇuyādvipra cādhyāyaṃ pāpanāśanam | tasya naśyaṃti pāpāni śrīhareḥ kṛpayāpi ca

Sanskrit only: no published translation is held for this verse.