Padma Purāṇa 4.23

शौनक उवाच। कथयस्व मुने सूत माहात्म्यं कलुषक्षयम् । शेषपंचदिनस्यापि कार्त्तिकस्यानुकंपया

śaunaka uvāca| kathayasva mune sūta māhātmyaṃ kaluṣakṣayam | śeṣapaṃcadinasyāpi kārttikasyānukaṃpayā

Sanskrit only: no published translation is held for this verse.

सूत उवाच। शृणु शौनक यत्पृष्टं माहात्म्यं पापनाशनम् । वक्ष्याम्यहं वै चोर्जस्य शेषपंचदिनस्य च

sūta uvāca| śṛṇu śaunaka yatpṛṣṭaṃ māhātmyaṃ pāpanāśanam | vakṣyāmyahaṃ vai corjasya śeṣapaṃcadinasya ca

Sanskrit only: no published translation is held for this verse.

व्रतानां मुनिशार्दूल प्रवरं विष्णुपंचकम् । तस्मिन्यः पूजयेद्भक्त्या श्रीहरिं राधया सह

vratānāṃ muniśārdūla pravaraṃ viṣṇupaṃcakam | tasminyaḥ pūjayedbhaktyā śrīhariṃ rādhayā saha

Sanskrit only: no published translation is held for this verse.

गंधपुष्पैर्धूपदीपैर्वस्त्रैर्नानाविधैः फलैः । स याति विष्णुसदनं सर्वपापविवर्जितः

gaṃdhapuṣpairdhūpadīpairvastrairnānāvidhaiḥ phalaiḥ | sa yāti viṣṇusadanaṃ sarvapāpavivarjitaḥ

Sanskrit only: no published translation is held for this verse.

ब्रह्मचारी गृहस्थो वा वानप्रस्थोऽथवा यतिः । न प्राप्नोति परं स्थानमकृत्वा विष्णुपंचकम्

brahmacārī gṛhastho vā vānaprastho'thavā yatiḥ | na prāpnoti paraṃ sthānamakṛtvā viṣṇupaṃcakam

Sanskrit only: no published translation is held for this verse.

सर्वपापहरं पुण्यं विख्यातं विष्णुपंचकम् । तत्र स्नानं तु यः कुर्यात्सर्वतीर्थफलं लभेत्

sarvapāpaharaṃ puṇyaṃ vikhyātaṃ viṣṇupaṃcakam | tatra snānaṃ tu yaḥ kuryātsarvatīrthaphalaṃ labhet

Sanskrit only: no published translation is held for this verse.

श्रीहरेः पुरतो विप्र तुलस्याश्च समीपतः । प्रदीपं सर्पिषा पूर्णं दद्याद्यो भक्तिभावतः

śrīhareḥ purato vipra tulasyāśca samīpataḥ | pradīpaṃ sarpiṣā pūrṇaṃ dadyādyo bhaktibhāvataḥ

Sanskrit only: no published translation is held for this verse.

नभसि श्रीहरेः प्रीत्यै याति स विष्णुमंदिरम् । पापी याति हरेर्धाम सत्यमेतन्मयोदितम्

nabhasi śrīhareḥ prītyai yāti sa viṣṇumaṃdiram | pāpī yāti harerdhāma satyametanmayoditam

Sanskrit only: no published translation is held for this verse.

स्नापयेच्चाच्युतं भक्त्या मधुक्षीरघृतादिभिः । दद्यात्किं नो हरिः प्रीतस्तस्मै साधुजनाय वै

snāpayeccācyutaṃ bhaktyā madhukṣīraghṛtādibhiḥ | dadyātkiṃ no hariḥ prītastasmai sādhujanāya vai

Sanskrit only: no published translation is held for this verse.

नैवेद्यं देवदेवेशं परमान्नं निवेदयेत् । तस्य पुण्यं प्रसंख्यातुं न शक्तो वै चतुर्मुखः

naivedyaṃ devadeveśaṃ paramānnaṃ nivedayet | tasya puṇyaṃ prasaṃkhyātuṃ na śakto vai caturmukhaḥ

Sanskrit only: no published translation is held for this verse.

अर्चयित्वा हृषीकेशमेकादश्यां समाहितः । निष्प्राप्य गोमयं सम्यक्मंत्रवत्समुपासते

arcayitvā hṛṣīkeśamekādaśyāṃ samāhitaḥ | niṣprāpya gomayaṃ samyakmaṃtravatsamupāsate

Sanskrit only: no published translation is held for this verse.

गोमूत्रं मंत्रवद्भूयो द्वादश्यां प्राशयेद्व्रती । क्षीरं तथा त्रयोदश्यां चतुर्दश्यां तथा दधि

gomūtraṃ maṃtravadbhūyo dvādaśyāṃ prāśayedvratī | kṣīraṃ tathā trayodaśyāṃ caturdaśyāṃ tathā dadhi

Sanskrit only: no published translation is held for this verse.

संप्राप्य पापशुद्ध्यर्थं लंघयित्वा चतुर्दिनम् । पंचमे तु दिने स्नात्वा विधिवत्पूज्य केशवम्

saṃprāpya pāpaśuddhyarthaṃ laṃghayitvā caturdinam | paṃcame tu dine snātvā vidhivatpūjya keśavam

Sanskrit only: no published translation is held for this verse.

भोजयेद्ब्राह्मणान्भक्त्या तेभ्यो दद्याच्च दक्षिणाम् । ततो नक्तं समश्नीयात्पंचगव्यं सुमंत्रितम्

bhojayedbrāhmaṇānbhaktyā tebhyo dadyācca dakṣiṇām | tato naktaṃ samaśnīyātpaṃcagavyaṃ sumaṃtritam

Sanskrit only: no published translation is held for this verse.

एवं कर्तुमशक्तो यः फलमूलं च भोजनम् । कुर्याद्धविष्यं वा विप्र यथोक्तविधिना ह वै

evaṃ kartumaśakto yaḥ phalamūlaṃ ca bhojanam | kuryāddhaviṣyaṃ vā vipra yathoktavidhinā ha vai

Sanskrit only: no published translation is held for this verse.

श्रीहरेः पंचकं विप्र कुर्याद्यस्तुलसीदलैः । पूजयेत्तं स विज्ञेयः स्वयं नारायणः प्रभुः

śrīhareḥ paṃcakaṃ vipra kuryādyastulasīdalaiḥ | pūjayettaṃ sa vijñeyaḥ svayaṃ nārāyaṇaḥ prabhuḥ

Sanskrit only: no published translation is held for this verse.

पुरा त्रेतायुगे शूद्रो दस्युवृत्तिपरायणः । नाम्ना दंडकरो नित्यं धर्मनिंदां करोति यः

purā tretāyuge śūdro dasyuvṛttiparāyaṇaḥ | nāmnā daṃḍakaro nityaṃ dharmaniṃdāṃ karoti yaḥ

Sanskrit only: no published translation is held for this verse.

असत्यभाषी मित्रघ्नो वेश्याविभ्रम लोलुपः । ब्रह्मस्वहारी क्रूरश्च परस्त्रीगमने रतः

asatyabhāṣī mitraghno veśyāvibhrama lolupaḥ | brahmasvahārī krūraśca parastrīgamane rataḥ

Sanskrit only: no published translation is held for this verse.

शरणागतहंता च पाखंडजनसंगभाक् । गोमांसाशी सुरापश्च परनिंदाकरः सदा

śaraṇāgatahaṃtā ca pākhaṃḍajanasaṃgabhāk | gomāṃsāśī surāpaśca paraniṃdākaraḥ sadā

Sanskrit only: no published translation is held for this verse.

विश्वासघाती ज्ञातीनां वृत्तिच्छेदी द्विजोत्तम । दुष्टं सर्वे समालोक्य तादृशं तद्गृहे द्विजः

viśvāsaghātī jñātīnāṃ vṛtticchedī dvijottama | duṣṭaṃ sarve samālokya tādṛśaṃ tadgṛhe dvijaḥ

Sanskrit only: no published translation is held for this verse.

आगता ज्ञातयः क्रुद्धास्तस्य पापपरायणम् । ज्ञातय ऊचुः। रे रे मूढ दुराचार विनाशं प्रतिनीयते । या प्रतिष्ठार्जिता पूर्वैरस्माकं निर्मलेऽन्वये

āgatā jñātayaḥ kruddhāstasya pāpaparāyaṇam | jñātaya ūcuḥ| re re mūḍha durācāra vināśaṃ pratinīyate | yā pratiṣṭhārjitā pūrvairasmākaṃ nirmale'nvaye

Sanskrit only: no published translation is held for this verse.

इति क्रुद्धा द्विजश्रेष्ठ अपकीर्तिभयादपि । पापिनां प्रवरं सर्वे तत्यजुस्तं कुलादरम्

iti kruddhā dvijaśreṣṭha apakīrtibhayādapi | pāpināṃ pravaraṃ sarve tatyajustaṃ kulādaram

Sanskrit only: no published translation is held for this verse.

ततो गतो महारण्यं विनष्टाखिल वैभवः । कुर्यात्स दस्युभिः सार्द्धं दस्युकर्म निरंतरम्

tato gato mahāraṇyaṃ vinaṣṭākhila vaibhavaḥ | kuryātsa dasyubhiḥ sārddhaṃ dasyukarma niraṃtaram

Sanskrit only: no published translation is held for this verse.

पथि प्रगच्छतां तेषां भयाद्विप्र न खादितुम् । प्राप्तं किंचित्क्षुधार्त्तास्ते गताश्चान्य स्थलं प्रति

pathi pragacchatāṃ teṣāṃ bhayādvipra na khāditum | prāptaṃ kiṃcitkṣudhārttāste gatāścānya sthalaṃ prati

Sanskrit only: no published translation is held for this verse.

तत्र प्रविष्टास्ते सर्वे दृष्ट्वा पुण्यजनान्बहून् । धात्रीमूले स्थितान्ब्रह्मन्वैष्णवान्द्विजसत्तमान्

tatra praviṣṭāste sarve dṛṣṭvā puṇyajanānbahūn | dhātrīmūle sthitānbrahmanvaiṣṇavāndvijasattamān

Sanskrit only: no published translation is held for this verse.

सर्वे ते दस्यवो विप्र गता दंडकरोऽपि सः । तेषां परिसरं गत्वा प्रणामं वै चकार ह

sarve te dasyavo vipra gatā daṃḍakaro'pi saḥ | teṣāṃ parisaraṃ gatvā praṇāmaṃ vai cakāra ha

Sanskrit only: no published translation is held for this verse.

दंडकर उवाच। क्षुधार्तोऽहं द्विजश्रेष्ठाः प्राणा यास्यंति मे ध्रुवम् । ददध्वं खादितुं किंचिद्युष्माकं शरणं गतः

daṃḍakara uvāca| kṣudhārto'haṃ dvijaśreṣṭhāḥ prāṇā yāsyaṃti me dhruvam | dadadhvaṃ khādituṃ kiṃcidyuṣmākaṃ śaraṇaṃ gataḥ

Sanskrit only: no published translation is held for this verse.

आकर्ण्य वचनं तस्य चोचुस्ते धर्मतत्पराः । सर्वपापहरे त्वं च विख्याते विष्णुपंचके

ākarṇya vacanaṃ tasya cocuste dharmatatparāḥ | sarvapāpahare tvaṃ ca vikhyāte viṣṇupaṃcake

Sanskrit only: no published translation is held for this verse.

कथमन्नं खादितुं ते वांछा त्वद्य हरेर्दिने । विशेषं ते ब्रूहि संज्ञा काते भवति सांप्रतम्

kathamannaṃ khādituṃ te vāṃchā tvadya harerdine | viśeṣaṃ te brūhi saṃjñā kāte bhavati sāṃpratam

Sanskrit only: no published translation is held for this verse.

स उवाच मुदा विप्रा नाम्ना दंडकरोप्यहम् । सर्वपापसमायुक्तश्चोद्धारो मे कथं भवेत्

sa uvāca mudā viprā nāmnā daṃḍakaropyaham | sarvapāpasamāyuktaścoddhāro me kathaṃ bhavet

Sanskrit only: no published translation is held for this verse.

ऊचुस्ते वै व्रतं श्रेष्ठं कुरुष्व विष्णुपंचकम् । विप्राणामाज्ञया विप्र चकार विष्णुपंचकम्

ūcuste vai vrataṃ śreṣṭhaṃ kuruṣva viṣṇupaṃcakam | viprāṇāmājñayā vipra cakāra viṣṇupaṃcakam

Sanskrit only: no published translation is held for this verse.

स प्रेत्य च हरेः स्थानमारुह्य स्यंदने वरे । आसाद्य श्रीहरेरूपं तस्थौ जन्मविवर्जितः

sa pretya ca hareḥ sthānamāruhya syaṃdane vare | āsādya śrīharerūpaṃ tasthau janmavivarjitaḥ

Sanskrit only: no published translation is held for this verse.

य इदं शृणुयाद्भक्त्या चाख्यानं पापनाशनम् । कोटिजन्मार्जितं पापं तस्य नश्यति तत्क्षणात्

ya idaṃ śṛṇuyādbhaktyā cākhyānaṃ pāpanāśanam | koṭijanmārjitaṃ pāpaṃ tasya naśyati tatkṣaṇāt

Sanskrit only: no published translation is held for this verse.