Library·Padma Purāṇa·4·4.3
शौनक उवाच- कार्त्तिकस्य च माहात्म्यं ब्रूहि सूत ममाग्रतः । तद्व्रतस्य फलं किं वा दोषं किं तदकुर्वतः
śaunaka uvāca- kārttikasya ca māhātmyaṃ brūhi sūta mamāgrataḥ | tadvratasya phalaṃ kiṃ vā doṣaṃ kiṃ tadakurvataḥ
Sanskrit only: no published translation is held for this verse.
सूत उवाच- पुरैकदा मुनिश्रेष्ठ व्यासं सत्यवतीसुतम् । जैमिनिः पृष्टवानेतदारेभे कथितं मुनिः
sūta uvāca- puraikadā muniśreṣṭha vyāsaṃ satyavatīsutam | jaiminiḥ pṛṣṭavānetadārebhe kathitaṃ muniḥ
Sanskrit only: no published translation is held for this verse.
व्यास उवाच- तिलतैलं मैथुनं यः शुभदे कार्त्तिके त्यजेत् । बहुजन्मकृतैःपापैर्मुक्तो याति हरेर्गृहम्
vyāsa uvāca- tilatailaṃ maithunaṃ yaḥ śubhade kārttike tyajet | bahujanmakṛtaiḥpāpairmukto yāti harergṛham
Sanskrit only: no published translation is held for this verse.
मत्स्यं च मैथुनं यो वै कार्त्तिके न परित्यजेत् । प्रतिजन्मनि संमूढः शूकरश्च भवेद्ध्रुवम्
matsyaṃ ca maithunaṃ yo vai kārttike na parityajet | pratijanmani saṃmūḍhaḥ śūkaraśca bhaveddhruvam
Sanskrit only: no published translation is held for this verse.
कार्त्तिके तुलसीपत्रैः पूजयेद्वै जनार्दनम् । पत्रेपत्रेऽश्वमेधस्य फलं प्राप्नोति मानवः
kārttike tulasīpatraiḥ pūjayedvai janārdanam | patrepatre'śvamedhasya phalaṃ prāpnoti mānavaḥ
Sanskrit only: no published translation is held for this verse.
कार्त्तिके मुनिपुष्पैर्यः पूजयेन्मधुसूदनम् । देवानां दुर्लभं मोक्षं प्राप्नोति कृपया हरेः
kārttike munipuṣpairyaḥ pūjayenmadhusūdanam | devānāṃ durlabhaṃ mokṣaṃ prāpnoti kṛpayā hareḥ
Sanskrit only: no published translation is held for this verse.
कार्त्तिके मुनिशाकं वै योऽश्नाति च नरोत्तमः । संवत्सरकृतं पापं शाकेनैकेन नश्यति
kārttike muniśākaṃ vai yo'śnāti ca narottamaḥ | saṃvatsarakṛtaṃ pāpaṃ śākenaikena naśyati
Sanskrit only: no published translation is held for this verse.
फलं तस्य नरोऽश्नाति चोर्जे यो वै हरिप्रिये । प्रदत्त्वा तु हरेर्ब्रह्मन्वृजिनं कोटिजन्मजम्
phalaṃ tasya naro'śnāti corje yo vai haripriye | pradattvā tu harerbrahmanvṛjinaṃ koṭijanmajam
Sanskrit only: no published translation is held for this verse.
सुरसं सर्पिषायुक्तं दद्याद्यो हरयेपि च । सर्वपापैर्विनिर्मुक्तः स गच्छेद्धरिमंदिरम्
surasaṃ sarpiṣāyuktaṃ dadyādyo harayepi ca | sarvapāpairvinirmuktaḥ sa gaccheddharimaṃdiram
Sanskrit only: no published translation is held for this verse.
कार्तिके यो नरो दद्यादेकपद्मं हरावपि । अंते विष्णुपदं गच्छेत्सर्वपापविवर्जितः
kārtike yo naro dadyādekapadmaṃ harāvapi | aṃte viṣṇupadaṃ gacchetsarvapāpavivarjitaḥ
Sanskrit only: no published translation is held for this verse.
प्रातःस्नानं नरो यो वै कार्तिके श्रीहरिप्रिये । करोतिसर्वतीर्थेषुयत्स्नात्वातत्फलंलभेत्
prātaḥsnānaṃ naro yo vai kārtike śrīharipriye | karotisarvatīrtheṣuyatsnātvātatphalaṃlabhet
Sanskrit only: no published translation is held for this verse.
कार्तिके यो नरो दद्यात्प्रदीपं नभसि द्विजः । विप्रहत्यादिभिः पापैर्मुक्तो गच्छेद्धरेर्गृहम्
kārtike yo naro dadyātpradīpaṃ nabhasi dvijaḥ | viprahatyādibhiḥ pāpairmukto gaccheddharergṛham
Sanskrit only: no published translation is held for this verse.
मुहूर्तमपि यो दद्यात्कार्त्तिके प्रीतये हरेः । दीपं नभसि विप्रेन्द्र तस्मिंस्तुष्टः सदा हरिः
muhūrtamapi yo dadyātkārttike prītaye hareḥ | dīpaṃ nabhasi viprendra tasmiṃstuṣṭaḥ sadā hariḥ
Sanskrit only: no published translation is held for this verse.
यो दद्याच्च गृहे दीपं कृष्णस्य सघृतं द्विजः । कार्तिके चाश्वमेधस्य फलं स्याद्वै दिनेदिने
yo dadyācca gṛhe dīpaṃ kṛṣṇasya saghṛtaṃ dvijaḥ | kārtike cāśvamedhasya phalaṃ syādvai dinedine
Sanskrit only: no published translation is held for this verse.
प्रदीपस्य च माहात्म्यं विशेषमुच्यते मया । निशामय द्विजश्रेष्ठ सेतिहासं समाहितः
pradīpasya ca māhātmyaṃ viśeṣamucyate mayā | niśāmaya dvijaśreṣṭha setihāsaṃ samāhitaḥ
Sanskrit only: no published translation is held for this verse.
पूर्वं त्रेतायुगे विप्रो वैकुंठो नामतः शुचिः । यस्य संगप्रभावेण मुक्तो भवति पातकी
pūrvaṃ tretāyuge vipro vaikuṃṭho nāmataḥ śuciḥ | yasya saṃgaprabhāveṇa mukto bhavati pātakī
Sanskrit only: no published translation is held for this verse.
एकदा कार्तिके सोऽपि प्रदीपं पुरतो हरेः । दत्वा गृहं गतो विप्रो घृतपूर्णं द्विजर्षभः
ekadā kārtike so'pi pradīpaṃ purato hareḥ | datvā gṛhaṃ gato vipro ghṛtapūrṇaṃ dvijarṣabhaḥ
Sanskrit only: no published translation is held for this verse.
सर्पिस्तत्स्वादितु चाखुरागतोऽपि प्रदीपतः । यावत्खादितुमारेभे बोधितोऽसौ प्रदीपकः
sarpistatsvāditu cākhurāgato'pi pradīpataḥ | yāvatkhāditumārebhe bodhito'sau pradīpakaḥ
Sanskrit only: no published translation is held for this verse.
मूषकोऽग्निभयात्तत्र वेगेनापि पलायितः । आखोश्च सकलं पापं विनष्टं कृपया हरेः
mūṣako'gnibhayāttatra vegenāpi palāyitaḥ | ākhośca sakalaṃ pāpaṃ vinaṣṭaṃ kṛpayā hareḥ
Sanskrit only: no published translation is held for this verse.
सर्पेण दंशितश्चाखुः प्राणत्यागं चकार ह । ततो यमाज्ञया दूताः पाशमुद्गरपाणयः
sarpeṇa daṃśitaścākhuḥ prāṇatyāgaṃ cakāra ha | tato yamājñayā dūtāḥ pāśamudgarapāṇayaḥ
Sanskrit only: no published translation is held for this verse.
आगतास्तं समानेतुं बबंधुश्चर्मरज्जुभिः । यावन्नेतुं मनश्चक्रुः शंखचक्रगदाधराः
āgatāstaṃ samānetuṃ babaṃdhuścarmarajjubhiḥ | yāvannetuṃ manaścakruḥ śaṃkhacakragadādharāḥ
Sanskrit only: no published translation is held for this verse.
आगता गरुडारूढा विष्णुदूताश्चतुर्भुजाः । विमानं गगने चैव राजहंसयुतं शुभम्
āgatā garuḍārūḍhā viṣṇudūtāścaturbhujāḥ | vimānaṃ gagane caiva rājahaṃsayutaṃ śubham
Sanskrit only: no published translation is held for this verse.
निर्मितं कनकैः शुद्धैः कामगं कृपया हरेः । पाशं छित्वा ततो दूताः प्रोचुस्ते यमकिंकरान्
nirmitaṃ kanakaiḥ śuddhaiḥ kāmagaṃ kṛpayā hareḥ | pāśaṃ chitvā tato dūtāḥ procuste yamakiṃkarān
Sanskrit only: no published translation is held for this verse.
विष्णुभक्तोऽप्यसौ मूढा व्यर्थं तु बंधनं कृतम् । गच्छध्वं शमनप्रेष्या यदि वांछास्ति जीवितुम्
viṣṇubhakto'pyasau mūḍhā vyarthaṃ tu baṃdhanaṃ kṛtam | gacchadhvaṃ śamanapreṣyā yadi vāṃchāsti jīvitum
Sanskrit only: no published translation is held for this verse.
श्रुत्वा प्रकंपितास्ते वै पृच्छंति विनयान्विताः । केन पुण्यप्रभावेण युष्माभिर्नीयते पुरम्
śrutvā prakaṃpitāste vai pṛcchaṃti vinayānvitāḥ | kena puṇyaprabhāveṇa yuṣmābhirnīyate puram
Sanskrit only: no published translation is held for this verse.
असौ विष्णोर्महापापी यूयं तद्वक्तुमर्हथ । विष्णुदूता ऊचुः- पुरतो वासुदेवस्य प्रदीपबोधनं कृतम्
asau viṣṇormahāpāpī yūyaṃ tadvaktumarhatha | viṣṇudūtā ūcuḥ- purato vāsudevasya pradīpabodhanaṃ kṛtam
Sanskrit only: no published translation is held for this verse.
तेनैव कर्मणा दूता नयामो विष्णुमंदिरम् । अनिच्छयापि यः कुर्याद्विष्णोर्दीपस्य बोधनम्
tenaiva karmaṇā dūtā nayāmo viṣṇumaṃdiram | anicchayāpi yaḥ kuryādviṣṇordīpasya bodhanam
Sanskrit only: no published translation is held for this verse.
कोटिजन्मार्जितं पापं त्यक्त्वा याति हरेर्गृहम् । भक्त्या प्रदीपं यो दद्यात्कार्तिके तु हरेर्दिनैः
koṭijanmārjitaṃ pāpaṃ tyaktvā yāti harergṛham | bhaktyā pradīpaṃ yo dadyātkārtike tu harerdinaiḥ
Sanskrit only: no published translation is held for this verse.
तस्य पुण्यं समाख्यातुं न शक्तो हरिणा विना । घृतपूर्णप्रदीपं यो भक्त्या दद्याद्धरेर्गृहे
tasya puṇyaṃ samākhyātuṃ na śakto hariṇā vinā | ghṛtapūrṇapradīpaṃ yo bhaktyā dadyāddharergṛhe
Sanskrit only: no published translation is held for this verse.
अश्वमेधसहस्रेण तस्य किं वा प्रयोजनम् । अश्वमेधप्रकर्ता यः स्वर्गं याति हरेर्दिने
aśvamedhasahasreṇa tasya kiṃ vā prayojanam | aśvamedhaprakartā yaḥ svargaṃ yāti harerdine
Sanskrit only: no published translation is held for this verse.
कार्तिके दीपदाता च स गच्छेद्धरिमंदिरम् । व्यास उवाच- इति श्रुत्वा ततो दूता गतास्ते वै यथागताः
kārtike dīpadātā ca sa gaccheddharimaṃdiram | vyāsa uvāca- iti śrutvā tato dūtā gatāste vai yathāgatāḥ
Sanskrit only: no published translation is held for this verse.
विष्णुदूता रथे कृत्वा गतास्तं विष्णुमंदिरम् । विष्णुसान्निध्य एवास्य मन्वंतरशतं गतम्
viṣṇudūtā rathe kṛtvā gatāstaṃ viṣṇumaṃdiram | viṣṇusānnidhya evāsya manvaṃtaraśataṃ gatam
Sanskrit only: no published translation is held for this verse.
ततो मर्त्ये राजकन्या बभूव कृपया हरेः । पुत्रपौत्रसमायुक्ता चिरं भोगं चकार सा
tato martye rājakanyā babhūva kṛpayā hareḥ | putrapautrasamāyuktā ciraṃ bhogaṃ cakāra sā
Sanskrit only: no published translation is held for this verse.
इतः पुनर्गता सा तु गोलोकं हरिसेवया । सूत उवाच- भक्त्या शृणोति यो मर्त्यो दीपमाहात्म्यमुत्तमम्
itaḥ punargatā sā tu golokaṃ harisevayā | sūta uvāca- bhaktyā śṛṇoti yo martyo dīpamāhātmyamuttamam
Sanskrit only: no published translation is held for this verse.
सर्वपापविनिर्मुक्तः स याति विष्णुमंदिरम्
sarvapāpavinirmuktaḥ sa yāti viṣṇumaṃdiram
Sanskrit only: no published translation is held for this verse.