Padma Purāṇa 5.102

यम उवाच- ततस्तु करुणावार्धिस्तेषां शोकेन पीडितः । भूपतिः श्रीहरेर्दूतान्विनयेनाह वाडव

yama uvāca- tatastu karuṇāvārdhisteṣāṃ śokena pīḍitaḥ | bhūpatiḥ śrīharerdūtānvinayenāha vāḍava

Sanskrit only: no published translation is held for this verse.

ऐश्वर्यस्याभिजात्यस्य गुणानां सुकृतस्य च । संतः फलं हि गण्यंते यद्भीतपरिरक्षणम्

aiśvaryasyābhijātyasya guṇānāṃ sukṛtasya ca | saṃtaḥ phalaṃ hi gaṇyaṃte yadbhītaparirakṣaṇam

Sanskrit only: no published translation is held for this verse.

यद्यस्ति सुकृतं किंचिन्मम तेनैव जंतवः । स्वर्गे गच्छंतु मुक्तौघाः स्थाने तेषां वसाम्यहम्

yadyasti sukṛtaṃ kiṃcinmama tenaiva jaṃtavaḥ | svarge gacchaṃtu muktaughāḥ sthāne teṣāṃ vasāmyaham

Sanskrit only: no published translation is held for this verse.

एवं भूपवचः श्रुत्वा तस्य सत्यवतो हि ते । ध्यायंतः सत्यमौदार्यमब्रुवंस्ते वचो नृपम्

evaṃ bhūpavacaḥ śrutvā tasya satyavato hi te | dhyāyaṃtaḥ satyamaudāryamabruvaṃste vaco nṛpam

Sanskrit only: no published translation is held for this verse.

दूता ऊचु- अनेन तव कारुण्यकर्मणा वचसा नृप । बभूव वृद्धिर्धर्मस्य संचितस्य विशेषतः

dūtā ūcu- anena tava kāruṇyakarmaṇā vacasā nṛpa | babhūva vṛddhirdharmasya saṃcitasya viśeṣataḥ

Sanskrit only: no published translation is held for this verse.

स्नानं दानं जपो होमस्तपो देवार्चनादिकम् । कृतं यन्माधवे मासि तदनंतफलं विदुः

snānaṃ dānaṃ japo homastapo devārcanādikam | kṛtaṃ yanmādhave māsi tadanaṃtaphalaṃ viduḥ

Sanskrit only: no published translation is held for this verse.

स्वर्गे यज्वा च दाता च क्रीडते त्रिदशैः सह । वापीषु हेमपद्मासु कल्पवृक्षतलेऽपि च

svarge yajvā ca dātā ca krīḍate tridaśaiḥ saha | vāpīṣu hemapadmāsu kalpavṛkṣatale'pi ca

Sanskrit only: no published translation is held for this verse.

गीयमानो मुदं याति गीर्वाणरमणीगणैः । जलान्नदानतो लोकं लभते वारुणं शुभम्

gīyamāno mudaṃ yāti gīrvāṇaramaṇīgaṇaiḥ | jalānnadānato lokaṃ labhate vāruṇaṃ śubham

Sanskrit only: no published translation is held for this verse.

कुलानि हेलया सप्त संतारयति गोप्रदः । हयं दत्वा रवेर्लोकं याति विद्याप्रदो नरः

kulāni helayā sapta saṃtārayati gopradaḥ | hayaṃ datvā raverlokaṃ yāti vidyāprado naraḥ

Sanskrit only: no published translation is held for this verse.

ब्रह्मलोकं तथा हेमदानाद्याति सुरालये । यो ददाति तथा कन्यां विष्णुलोकं स गच्छति

brahmalokaṃ tathā hemadānādyāti surālaye | yo dadāti tathā kanyāṃ viṣṇulokaṃ sa gacchati

Sanskrit only: no published translation is held for this verse.

माधवेमासि यः स्नात्वा दत्वा संपूज्य माधवम् । अवाप्य सकलान्कामान्प्रयाति पदमव्ययम्

mādhavemāsi yaḥ snātvā datvā saṃpūjya mādhavam | avāpya sakalānkāmānprayāti padamavyayam

Sanskrit only: no published translation is held for this verse.

एकतोऽपि तपो दान क्रतु सुत्यादिकाः क्रियाः । एकतो विधिवन्मासो माधवश्चरितो महान्

ekato'pi tapo dāna kratu sutyādikāḥ kriyāḥ | ekato vidhivanmāso mādhavaścarito mahān

Sanskrit only: no published translation is held for this verse.

तस्य माधवमासस्य दिनैकस्यापि भूपते । कृतं यत्सुकृतं तत्ते सर्वदानाधिकं पुरा

tasya mādhavamāsasya dinaikasyāpi bhūpate | kṛtaṃ yatsukṛtaṃ tatte sarvadānādhikaṃ purā

Sanskrit only: no published translation is held for this verse.

कारुण्येन दिनैकस्य पुण्यं देहि धरापते । निरये पच्यमानेभ्यो दुःखितेभ्यो दयानिधे

kāruṇyena dinaikasya puṇyaṃ dehi dharāpate | niraye pacyamānebhyo duḥkhitebhyo dayānidhe

Sanskrit only: no published translation is held for this verse.

न दयासदृशो धर्मो न दयासदृशं तपः । न दयासदृशं दानं न दयासदृशः सखा

na dayāsadṛśo dharmo na dayāsadṛśaṃ tapaḥ | na dayāsadṛśaṃ dānaṃ na dayāsadṛśaḥ sakhā

Sanskrit only: no published translation is held for this verse.

पुण्यदः पुण्यमाप्नोति नरो लक्षगुणं सदा । कारुण्येन विशेषात्ते धर्मवृद्धिस्ततो भवेत्

puṇyadaḥ puṇyamāpnoti naro lakṣaguṇaṃ sadā | kāruṇyena viśeṣātte dharmavṛddhistato bhavet

Sanskrit only: no published translation is held for this verse.

दुःखितानां हि भूतानां दुःखोद्धर्त्ता नरो हि यः । स एव सुकृती लोके ज्ञेयो नारायणांशजः

duḥkhitānāṃ hi bhūtānāṃ duḥkhoddharttā naro hi yaḥ | sa eva sukṛtī loke jñeyo nārāyaṇāṃśajaḥ

Sanskrit only: no published translation is held for this verse.

वैशाखे मासि पूर्णायां स्नानदानादिकं त्वया । यत्तीर्थे विहितं वीर सर्वाघविनिषूदनम्

vaiśākhe māsi pūrṇāyāṃ snānadānādikaṃ tvayā | yattīrthe vihitaṃ vīra sarvāghaviniṣūdanam

Sanskrit only: no published translation is held for this verse.

तदेभ्यो देहि विधिवत्कृत्वा साक्ष्ये हरिं प्रभुम् । त्रिवाचिकं च निरयाद्येनामी स्वर्गमाप्नुयुः

tadebhyo dehi vidhivatkṛtvā sākṣye hariṃ prabhum | trivācikaṃ ca nirayādyenāmī svargamāpnuyuḥ

Sanskrit only: no published translation is held for this verse.

कपोतार्थं स्वमांसानि कारुण्येन पुरा शिबिः । दत्वा दयानिधिः स्वर्गे राजते कीर्तिवारिधिः

kapotārthaṃ svamāṃsāni kāruṇyena purā śibiḥ | datvā dayānidhiḥ svarge rājate kīrtivāridhiḥ

Sanskrit only: no published translation is held for this verse.

दधीचिरपि राजर्षिर्दत्वास्थि च यमात्मनः । त्रैलोक्यकौमुदीं कीर्तिं लब्धवान्स्वर्गमक्षयम्

dadhīcirapi rājarṣirdatvāsthi ca yamātmanaḥ | trailokyakaumudīṃ kīrtiṃ labdhavānsvargamakṣayam

Sanskrit only: no published translation is held for this verse.

सहस्रजिच्च राजर्षिः प्राणानिष्टान्महायशाः । ब्राह्मणार्थे परित्यज्य गतो लोकाननुत्तमान्

sahasrajicca rājarṣiḥ prāṇāniṣṭānmahāyaśāḥ | brāhmaṇārthe parityajya gato lokānanuttamān

Sanskrit only: no published translation is held for this verse.

न स्वर्गे नापवर्गेऽपि तत्सुखं लभते नरः । यदार्तजंतुनिर्व्वाणदानोत्थमिति नो मतिः

na svarge nāpavarge'pi tatsukhaṃ labhate naraḥ | yadārtajaṃtunirvvāṇadānotthamiti no matiḥ

Sanskrit only: no published translation is held for this verse.

सर्वेषु दातृजातेषु पुरा जातोसि भूपते । कर्मणानेन संख्यासु धीर धैर्यं नियोज्य च

sarveṣu dātṛjāteṣu purā jātosi bhūpate | karmaṇānena saṃkhyāsu dhīra dhairyaṃ niyojya ca

Sanskrit only: no published translation is held for this verse.

दृष्ट्वा तवधियं धर्म दया दानं सुनिश्चलम् । अस्माभिरपि तूत्साहः क्रियते धर्म्मवादिभिः

dṛṣṭvā tavadhiyaṃ dharma dayā dānaṃ suniścalam | asmābhirapi tūtsāhaḥ kriyate dharmmavādibhiḥ

Sanskrit only: no published translation is held for this verse.

यदि ते रोचते राजन्न विलंबतया ततः । तदेभ्यो देहि तत्पुण्यं यातनादुःखदाहकम्

yadi te rocate rājanna vilaṃbatayā tataḥ | tadebhyo dehi tatpuṇyaṃ yātanāduḥkhadāhakam

Sanskrit only: no published translation is held for this verse.

इत्युक्तः स तदा देवं कृत्वा साक्ष्ये गदाधरम् । तेभ्यस्त्रिवाचिकं पुण्यं दयावान्विधिना ददौ

ityuktaḥ sa tadā devaṃ kṛtvā sākṣye gadādharam | tebhyastrivācikaṃ puṇyaṃ dayāvānvidhinā dadau

Sanskrit only: no published translation is held for this verse.

दत्ते माधवमासस्य तस्मिन्नेकदिनोद्भवे । स्वकृते जंतवो याम्ययातनापरिवर्जिताः

datte mādhavamāsasya tasminnekadinodbhave | svakṛte jaṃtavo yāmyayātanāparivarjitāḥ

Sanskrit only: no published translation is held for this verse.

विमानवरमारूढाः सर्वे ते त्रिदिवं ययुः । प्रणमंतः स्तुवंतश्च पश्यंतस्तं प्रहर्षिताः

vimānavaramārūḍhāḥ sarve te tridivaṃ yayuḥ | praṇamaṃtaḥ stuvaṃtaśca paśyaṃtastaṃ praharṣitāḥ

Sanskrit only: no published translation is held for this verse.

नृपेण दत्तं तदवाप्य पुण्यं वैशाखमासैकदिनाभिजातम् । सर्वे ययुस्ते नरकाद्विमुक्ता दिवं विमानाधिगता हि चित्रम्

nṛpeṇa dattaṃ tadavāpya puṇyaṃ vaiśākhamāsaikadinābhijātam | sarve yayuste narakādvimuktā divaṃ vimānādhigatā hi citram

Sanskrit only: no published translation is held for this verse.

नूनं विचित्रो भुवि भूतवर्गः संभूतभावो बहुधा विचित्रः । तथा विचित्रोऽखिलकर्मयोगस्तत्कर्मशक्तिप्रचयो विचित्रः

nūnaṃ vicitro bhuvi bhūtavargaḥ saṃbhūtabhāvo bahudhā vicitraḥ | tathā vicitro'khilakarmayogastatkarmaśaktipracayo vicitraḥ

Sanskrit only: no published translation is held for this verse.

संस्तूयमानो मुनिदेवसंघैर्यस्तद्विशेषाधिकलब्धपुण्यः । परं पदं योगिवरैरलभ्यं ययौ जगन्नाथगणाभिवंद्यः

saṃstūyamāno munidevasaṃghairyastadviśeṣādhikalabdhapuṇyaḥ | paraṃ padaṃ yogivarairalabhyaṃ yayau jagannāthagaṇābhivaṃdyaḥ

Sanskrit only: no published translation is held for this verse.

इति श्रीपद्मपुराणे पातालखंडे वैशाखमासमाहात्म्ये । द्व्युत्तरशततमोऽध्यायः

iti śrīpadmapurāṇe pātālakhaṃḍe vaiśākhamāsamāhātmye | dvyuttaraśatatamo'dhyāyaḥ

Sanskrit only: no published translation is held for this verse.