Padma Purāṇa 5.103

यम उवाच- एतन्माधवमासस्य समासात्किंचिदीरितम् । माहात्म्यं पूर्णिमायाश्च विशेषाद्द्विजसत्तम

yama uvāca- etanmādhavamāsasya samāsātkiṃcidīritam | māhātmyaṃ pūrṇimāyāśca viśeṣāddvijasattama

Sanskrit only: no published translation is held for this verse.

वैशाखमासे मधुसूदनस्य प्रियं य एनं पठतीतिहासम् । स याति कृष्णालयमाशुपूतः कल्पाननेकानिह मोदते च

vaiśākhamāse madhusūdanasya priyaṃ ya enaṃ paṭhatītihāsam | sa yāti kṛṣṇālayamāśupūtaḥ kalpānanekāniha modate ca

Sanskrit only: no published translation is held for this verse.

धन्यं यशस्यमायुष्यमिदं स्वस्त्ययनं महत् । स्वर्ग्यं श्रीदं सौमनस्यं प्रशस्यमघमर्षणम्

dhanyaṃ yaśasyamāyuṣyamidaṃ svastyayanaṃ mahat | svargyaṃ śrīdaṃ saumanasyaṃ praśasyamaghamarṣaṇam

Sanskrit only: no published translation is held for this verse.

इदं माधवमासस्य माहात्म्यं माधवप्रियम् । चरित्रं भूपतेस्तस्य संवादं चावयोरपि

idaṃ mādhavamāsasya māhātmyaṃ mādhavapriyam | caritraṃ bhūpatestasya saṃvādaṃ cāvayorapi

Sanskrit only: no published translation is held for this verse.

श्रुत्वा पठित्वा विधिवदनुमोद्य मनःप्रियम् । भवेद्भक्तिर्भगवति यया स्यात्पापसंक्षयः

śrutvā paṭhitvā vidhivadanumodya manaḥpriyam | bhavedbhaktirbhagavati yayā syātpāpasaṃkṣayaḥ

Sanskrit only: no published translation is held for this verse.

अथ गच्छ महीदेव देवलोकाद्यथेच्छया । निपात्य भुवि वैदेहं रुदंत्यद्यापि बांधवाः

atha gaccha mahīdeva devalokādyathecchayā | nipātya bhuvi vaidehaṃ rudaṃtyadyāpi bāṃdhavāḥ

Sanskrit only: no published translation is held for this verse.

विलप्यमानैरपि बंधुभिस्तैर्न यावदग्नौ तव तच्छरीरम् । प्रक्षिप्यते हंत जवैर्न तावद्याहि स्वयं सुप्त इव प्रबुद्धः

vilapyamānairapi baṃdhubhistairna yāvadagnau tava taccharīram | prakṣipyate haṃta javairna tāvadyāhi svayaṃ supta iva prabuddhaḥ

Sanskrit only: no published translation is held for this verse.

ममप्रसादादिह पुण्ययोगः श्रुतो यथावत्तमिमं विधेहि । विधानतो वै समये समंते समागमोंऽते भविता सुरैश्च

mamaprasādādiha puṇyayogaḥ śruto yathāvattamimaṃ vidhehi | vidhānato vai samaye samaṃte samāgamoṃ'te bhavitā suraiśca

Sanskrit only: no published translation is held for this verse.

सूत उवाच- इति देववचः श्रुत्वा नत्वा धर्माधिपं ततः । पुनः पपात स इह परितुष्टमना द्विजः

sūta uvāca- iti devavacaḥ śrutvā natvā dharmādhipaṃ tataḥ | punaḥ papāta sa iha parituṣṭamanā dvijaḥ

Sanskrit only: no published translation is held for this verse.

धर्मराजप्रसादेन ततस्तत्र महीतले । संसुप्तइव चोत्तस्थौ बंधुवर्गसमन्वितः

dharmarājaprasādena tatastatra mahītale | saṃsuptaiva cottasthau baṃdhuvargasamanvitaḥ

Sanskrit only: no published translation is held for this verse.

विधिमेनं द्विजो भूमौ वर्षेवर्षे च स स्वयम् । स्वयं च कारयामास माधवस्नापनं जनम्

vidhimenaṃ dvijo bhūmau varṣevarṣe ca sa svayam | svayaṃ ca kārayāmāsa mādhavasnāpanaṃ janam

Sanskrit only: no published translation is held for this verse.

यमब्राह्मणसंवादो मयायं परिकीर्तितः । तस्य माधवमासस्य पुण्यस्नानप्रसङ्गतः

yamabrāhmaṇasaṃvādo mayāyaṃ parikīrtitaḥ | tasya mādhavamāsasya puṇyasnānaprasaṅgataḥ

Sanskrit only: no published translation is held for this verse.

वैशाखमासे सततं हरिप्रिये स्नानं विदध्याच्च ददाति भक्त्या । दानं च होमं सुकृतं तथा बुधो हरेःपदं तस्य नदुर्ल्लभं कदा

vaiśākhamāse satataṃ haripriye snānaṃ vidadhyācca dadāti bhaktyā | dānaṃ ca homaṃ sukṛtaṃ tathā budho hareḥpadaṃ tasya nadurllabhaṃ kadā

Sanskrit only: no published translation is held for this verse.

यःशृणोत्येकचित्तेनमाहात्म्यंमेषसूर्यजम् । सर्वपापविनिर्मुक्तो याति विष्णोः परं पदम्

yaḥśṛṇotyekacittenamāhātmyaṃmeṣasūryajam | sarvapāpavinirmukto yāti viṣṇoḥ paraṃ padam

Sanskrit only: no published translation is held for this verse.

ऋषय ऊचुः - सूतसूत महाप्राज्ञ त्वयाऽतिकरुणात्मना । वैशाखमासमाहात्म्यं कीर्तितं पापनाशनम्

ṛṣaya ūcuḥ - sūtasūta mahāprājña tvayā'tikaruṇātmanā | vaiśākhamāsamāhātmyaṃ kīrtitaṃ pāpanāśanam

Sanskrit only: no published translation is held for this verse.

नियमा मधुहन्तुर्ये माधवे कथितास्त्वया । पूजनं स्नानदानाद्यं श्रौतस्मार्तविधानतः

niyamā madhuhanturye mādhave kathitāstvayā | pūjanaṃ snānadānādyaṃ śrautasmārtavidhānataḥ

Sanskrit only: no published translation is held for this verse.

यथा च माधवो देवः प्रीयते पापनाशनः । अधुना श्रोतुमिच्छामो ध्यानं तस्य महात्मनः

yathā ca mādhavo devaḥ prīyate pāpanāśanaḥ | adhunā śrotumicchāmo dhyānaṃ tasya mahātmanaḥ

Sanskrit only: no published translation is held for this verse.

कृष्णस्य भक्तवृन्दानां प्रियस्य भवतारणम्

kṛṣṇasya bhaktavṛndānāṃ priyasya bhavatāraṇam

Sanskrit only: no published translation is held for this verse.

सूत उवाच- शृणुध्वं मुनयः सर्वे कृष्णस्य जगदात्मनः । गोगोपगोपीप्राणस्य वृन्दावनचरस्य च

sūta uvāca- śṛṇudhvaṃ munayaḥ sarve kṛṣṇasya jagadātmanaḥ | gogopagopīprāṇasya vṛndāvanacarasya ca

Sanskrit only: no published translation is held for this verse.

एकदा नारदः पृष्टो गौतमेन द्विजोत्तमाः । स तस्मै प्राह यद्ध्यानं तद्वक्ष्ये पापनाशनम्

ekadā nāradaḥ pṛṣṭo gautamena dvijottamāḥ | sa tasmai prāha yaddhyānaṃ tadvakṣye pāpanāśanam

Sanskrit only: no published translation is held for this verse.

नारद उवाच- सुमप्रकरसौरभोद्गलितमाध्विकाद्युल्लसत्सुशाखिनवपल्लवप्रकरनम्र शोभायुतम् । प्रफुल्लनवमञ्जरीललितवल्लरीवेष्टितं स्मरेत सततं शिवं शितमतिः सुवृन्दावनम्

nārada uvāca- sumaprakarasaurabhodgalitamādhvikādyullasatsuśākhinavapallavaprakaranamra śobhāyutam | praphullanavamañjarīlalitavallarīveṣṭitaṃ smareta satataṃ śivaṃ śitamatiḥ suvṛndāvanam

Sanskrit only: no published translation is held for this verse.

विकाशि सुमनोरसास्वदनमंजुलैः संचरच्छिलीमुखमुखोद्गतैर्मुखरितान्तरं झंकृतैः । कपोतशुकसारिकापरभृतादिभिः पत्रिभिर्विराणितमितस्ततो भुजगशत्रुनृत्याकुलम्

vikāśi sumanorasāsvadanamaṃjulaiḥ saṃcaracchilīmukhamukhodgatairmukharitāntaraṃ jhaṃkṛtaiḥ | kapotaśukasārikāparabhṛtādibhiḥ patribhirvirāṇitamitastato bhujagaśatrunṛtyākulam

Sanskrit only: no published translation is held for this verse.

कलिन्ददुहितुश्च लल्लहरिविप्लुषां वाहिभिर्विनिद्र सरसीरुहोदररजश्च योद्धूसरैः । प्रदीपित मनोभवव्रजविलासिनी वाससां विलोलनपरैर्निषेवितमनारतं मारुतैः

kalindaduhituśca lallaharivipluṣāṃ vāhibhirvinidra sarasīruhodararajaśca yoddhūsaraiḥ | pradīpita manobhavavrajavilāsinī vāsasāṃ vilolanaparairniṣevitamanārataṃ mārutaiḥ

Sanskrit only: no published translation is held for this verse.

प्रवालनवपल्लवं मरकतच्छदं मौक्तिकप्रभाप्रकरकोरकं कमलरागनानाफलम् । स्थविष्ठमखिलर्तुभिः सततसेवितं कामदं तदन्तरपिकल्पकाङ्घ्रिपमुदञ्चितं चिन्तयेत्

pravālanavapallavaṃ marakatacchadaṃ mauktikaprabhāprakarakorakaṃ kamalarāganānāphalam | sthaviṣṭhamakhilartubhiḥ satatasevitaṃ kāmadaṃ tadantarapikalpakāṅghripamudañcitaṃ cintayet

Sanskrit only: no published translation is held for this verse.

सुहेमशिखराचलेउदितभानुवद्भासुरामधोऽस्य कनकस्थलीममृतशीकरासारिणः । प्रदीप्तमणिकुट्टिमां कुसुमरेणुपुञ्जोज्ज्वलां स्मरेत्पुनरतन्द्रितो विगतषट्तरङ्गांबुधः

suhemaśikharācaleuditabhānuvadbhāsurāmadho'sya kanakasthalīmamṛtaśīkarāsāriṇaḥ | pradīptamaṇikuṭṭimāṃ kusumareṇupuñjojjvalāṃ smaretpunaratandrito vigataṣaṭtaraṅgāṃbudhaḥ

Sanskrit only: no published translation is held for this verse.

तद्रत्नकुट्टिमनिविष्टमहिष्ठयोगपीठेऽष्टपत्रमरुणं कमलं विचिन्त्य । उद्यद्विरोचनसरोचिरमुष्यमध्ये संचिन्तयेत्सुखनिविष्टमथोमुकुन्दम्

tadratnakuṭṭimaniviṣṭamahiṣṭhayogapīṭhe'ṣṭapatramaruṇaṃ kamalaṃ vicintya | udyadvirocanasarociramuṣyamadhye saṃcintayetsukhaniviṣṭamathomukundam

Sanskrit only: no published translation is held for this verse.

सुत्रामहेति दलिताञ्जनमेघपुञ्जप्रत्यग्रनीलजलजन्मसमानभासम् । सुस्निग्धनीलघनकुञ्चितकेशजालं राजन्मनोज्ञशितिकण्ठशिखण्डचूडम्

sutrāmaheti dalitāñjanameghapuñjapratyagranīlajalajanmasamānabhāsam | susnigdhanīlaghanakuñcitakeśajālaṃ rājanmanojñaśitikaṇṭhaśikhaṇḍacūḍam

Sanskrit only: no published translation is held for this verse.

रोलम्बलालितसुरद्रुमसूनुसंपद्युक्तं समुत्कचनवोत्पलकर्णपूरम् । लोलालिभिः स्फुरितभालतलप्रदीप्तगोरोचनातिलकमुज्ज्वलचिल्लिचापम्

rolambalālitasuradrumasūnusaṃpadyuktaṃ samutkacanavotpalakarṇapūram | lolālibhiḥ sphuritabhālatalapradīptagorocanātilakamujjvalacillicāpam

Sanskrit only: no published translation is held for this verse.

आपूर्णशारदगताङ्क शशाङ्कबिम्बकान्ताननं कमलपत्रविशालनेत्रम् । रत्नस्फुरन्मकरकुण्डलरश्मिदीप्तगण्डस्थलीमुकुरमुन्नतचारुनासम्

āpūrṇaśāradagatāṅka śaśāṅkabimbakāntānanaṃ kamalapatraviśālanetram | ratnasphuranmakarakuṇḍalaraśmidīptagaṇḍasthalīmukuramunnatacārunāsam

Sanskrit only: no published translation is held for this verse.

सिन्दूरसुन्दरतराधरमिन्दुकुन्दमन्दारमन्दहसितद्युतिदीपिताशम् । वन्यप्रवालकुसुमप्रचयावकॢप्तग्रैवेयकोज्ज्वलमनोहरकम्बुकण्ठम्

sindūrasundaratarādharamindukundamandāramandahasitadyutidīpitāśam | vanyapravālakusumapracayāvakḷptagraiveyakojjvalamanoharakambukaṇṭham

Sanskrit only: no published translation is held for this verse.

मत्तभ्रमद्भ्रमरघुष्टविलम्बमानं संतानकप्रसरदामपरिष्कृतांसम् । हारावलीभगणराजितपीवरोरुव्योमस्थलीलसितकौस्तुभभानुमन्तम्

mattabhramadbhramaraghuṣṭavilambamānaṃ saṃtānakaprasaradāmapariṣkṛtāṃsam | hārāvalībhagaṇarājitapīvaroruvyomasthalīlasitakaustubhabhānumantam

Sanskrit only: no published translation is held for this verse.

श्रीवत्सलक्षणसुलक्षितमुन्नतांसमाजानुपीनपरिवृत्तसुजातबाहुम् । आबन्धुरोदरमुदारगभीरनाभिं भृङ्गाङ्गनानि करमंजुलरोमराजिम्

śrīvatsalakṣaṇasulakṣitamunnatāṃsamājānupīnaparivṛttasujātabāhum | ābandhurodaramudāragabhīranābhiṃ bhṛṅgāṅganāni karamaṃjularomarājim

Sanskrit only: no published translation is held for this verse.

नानामणिप्रघटिताङ्गदकङ्कणोर्मि ग्रैवेयसारसननूपुरतुन्दबन्धम् । दिव्याङ्गरागपरिपिञ्जरिताङ्गयष्टिमापीतवस्त्रपरिवीतनितम्बबिम्बम्

nānāmaṇipraghaṭitāṅgadakaṅkaṇormi graiveyasārasananūpuratundabandham | divyāṅgarāgaparipiñjaritāṅgayaṣṭimāpītavastraparivītanitambabimbam

Sanskrit only: no published translation is held for this verse.

चारूरुजानुमनुवृत्तमनोज्ञजङ्घं कान्तोन्नतप्रपदनिन्दित कूर्मकान्तिम् । माणिक्यदर्पणलसन्नखराजराजद्रक्ताङ्गुलिच्छदनुसुन्दरपादपद्मम्

cārūrujānumanuvṛttamanojñajaṅghaṃ kāntonnataprapadanindita kūrmakāntim | māṇikyadarpaṇalasannakharājarājadraktāṅgulicchadanusundarapādapadmam

Sanskrit only: no published translation is held for this verse.

मत्स्याङ्कुशारिदरकेतुयवाब्जवज्रैः संलक्षितारुणकराङ्घ्रितलाभिरामम् । लावण्यसारसमुदायविनिर्मिताङ्गं सौन्दर्यनिन्दितमनोभव देहकान्तिम्

matsyāṅkuśāridaraketuyavābjavajraiḥ saṃlakṣitāruṇakarāṅghritalābhirāmam | lāvaṇyasārasamudāyavinirmitāṅgaṃ saundaryaninditamanobhava dehakāntim

Sanskrit only: no published translation is held for this verse.

आस्यारविन्दपरिपूरितवेणुरन्ध्रलोलत्कराङ्गुलिसमीरितदिव्यरागैः । शश्वद्भवैः कृतनिविष्टसमस्तजन्तुसंतानसंनतिमनन्तसुखाम्बुराशिम्

āsyāravindaparipūritaveṇurandhralolatkarāṅgulisamīritadivyarāgaiḥ | śaśvadbhavaiḥ kṛtaniviṣṭasamastajantusaṃtānasaṃnatimanantasukhāmburāśim

Sanskrit only: no published translation is held for this verse.

गोभिर्मुखाम्बुजविलीनविलोचनाभिरूधोभरस्खलितमन्थरमन्दगाभिः । दन्ताग्रदष्टपरिशिष्टतृणाङ्कुराभिरालम्बिवालधिलताभिरथाभिवीतम्

gobhirmukhāmbujavilīnavilocanābhirūdhobharaskhalitamantharamandagābhiḥ | dantāgradaṣṭapariśiṣṭatṛṇāṅkurābhirālambivāladhilatābhirathābhivītam

Sanskrit only: no published translation is held for this verse.

संप्रस्नुतस्तनविभूषणपूर्णनिश्चलास्याद्दृढक्षरितफेनिलदुग्धमुग्धैः । वेणुप्रवर्तितमनोहरमन्दगीतदत्तोच्चकर्णयुगलैरपितर्णकैश्च

saṃprasnutastanavibhūṣaṇapūrṇaniścalāsyāddṛḍhakṣaritapheniladugdhamugdhaiḥ | veṇupravartitamanoharamandagītadattoccakarṇayugalairapitarṇakaiśca

Sanskrit only: no published translation is held for this verse.

प्रत्यग्रशृङ्गमृदुमस्तकसंप्रहारसंरम्भभावनविलोलखुराग्रपातैः । आमेदुरैर्बहुलसास्नगलैरुदग्रपुच्छैश्च वत्सतरवत्सतरीनिकायैः

pratyagraśṛṅgamṛdumastakasaṃprahārasaṃrambhabhāvanavilolakhurāgrapātaiḥ | āmedurairbahulasāsnagalairudagrapucchaiśca vatsataravatsatarīnikāyaiḥ

Sanskrit only: no published translation is held for this verse.

हम्भारवक्षुभितदिग्वलयैर्महद्भिरध्युक्षभिः पृथुककुद्भरभारखिन्नैः । उत्तम्भितश्रुतिपुटीपरिपीतवंशध्वानामृतोद्धतविकासिविशालघोणैः

hambhāravakṣubhitadigvalayairmahadbhiradhyukṣabhiḥ pṛthukakudbharabhārakhinnaiḥ | uttambhitaśrutipuṭīparipītavaṃśadhvānāmṛtoddhatavikāsiviśālaghoṇaiḥ

Sanskrit only: no published translation is held for this verse.

गोपैः समानगुणशीलवयोविलासवेशैश्च मूर्छितकलस्वनवेणुवीणैः । मन्दोच्चतारपटुगानपरैर्विलोलदोर्वल्लरीललितलास्यविधानदक्षैः

gopaiḥ samānaguṇaśīlavayovilāsaveśaiśca mūrchitakalasvanaveṇuvīṇaiḥ | mandoccatārapaṭugānaparairviloladorvallarīlalitalāsyavidhānadakṣaiḥ

Sanskrit only: no published translation is held for this verse.

जङ्घान्तपीवरकटीरतटीनिबद्धव्यालोलकिङ्किणिघटारणितैरटद्भिः । मुग्धैस्तरक्षुनखकल्पितकान्तभूषैरव्यक्तमंजुवचनैः पृथुकैः परीतम्

jaṅghāntapīvarakaṭīrataṭīnibaddhavyālolakiṅkiṇighaṭāraṇitairaṭadbhiḥ | mugdhaistarakṣunakhakalpitakāntabhūṣairavyaktamaṃjuvacanaiḥ pṛthukaiḥ parītam

Sanskrit only: no published translation is held for this verse.

अथ सुललितगोपसुन्दरीणां पृथुकबरीषनितम्बमन्थराणाम् । गुरुकुचभरभंगुरावलग्नत्रिवलिविजृम्भितरोमराजिभाजाम्

atha sulalitagopasundarīṇāṃ pṛthukabarīṣanitambamantharāṇām | gurukucabharabhaṃgurāvalagnatrivalivijṛmbhitaromarājibhājām

Sanskrit only: no published translation is held for this verse.

तदतिरुचिरचारुवेणुवाद्यामृतरसपल्लविताङ्गजाङ्घ्रिपस्य । मुकुलविमलरम्यरूढरोमोद्गमसमलंकृतगात्रवल्लरीणाम्

tadatiruciracāruveṇuvādyāmṛtarasapallavitāṅgajāṅghripasya | mukulavimalaramyarūḍharomodgamasamalaṃkṛtagātravallarīṇām

Sanskrit only: no published translation is held for this verse.

तदतिरुचिर मन्दहासचन्द्रातपपरिजृम्भितरागवारिराशेः । तरलतरतरङ्गभङ्गविप्रुट्प्रकरघनश्रमबिन्दुसंततानाम्

tadatirucira mandahāsacandrātapaparijṛmbhitarāgavārirāśeḥ | taralatarataraṅgabhaṅgavipruṭprakaraghanaśramabindusaṃtatānām

Sanskrit only: no published translation is held for this verse.

तदतिललितमन्दचिल्लिचापच्युतनिशितेक्षणमारबाणवृष्ट्या । दलितसकलमर्मविह्वलाङ्गप्रविसृतदुःसहवेपथुव्यथानाम्

tadatilalitamandacillicāpacyutaniśitekṣaṇamārabāṇavṛṣṭyā | dalitasakalamarmavihvalāṅgapravisṛtaduḥsahavepathuvyathānām

Sanskrit only: no published translation is held for this verse.

तदतिरुचिरवेषरूपशोभामृतरसपानविधानलालसानाम् । प्रणयसलिलपूरवाहिनीनामलसविलोलविलोचनाम्बुजानाम्

tadatiruciraveṣarūpaśobhāmṛtarasapānavidhānalālasānām | praṇayasalilapūravāhinīnāmalasavilolavilocanāmbujānām

Sanskrit only: no published translation is held for this verse.

विस्रंसत्कबरीकलापविगलत्फुल्लत्प्रसूनास्रवन् । माध्वीलम्पटचञ्चरीकघटयासंसेवितानां मुहुः । मारोन्मादमदस्खलन्मृदुगिरामालोलकाञ्च्युल्लस-। न्नीवीविश्लथमानचीनसिचयान्तार्चिर्नितम्बत्विषाम्

visraṃsatkabarīkalāpavigalatphullatprasūnāsravan | mādhvīlampaṭacañcarīkaghaṭayāsaṃsevitānāṃ muhuḥ | māronmādamadaskhalanmṛdugirāmālolakāñcyullasa-| nnīvīviślathamānacīnasicayāntārcirnitambatviṣām

Sanskrit only: no published translation is held for this verse.

स्खलितलसितपादाम्भोजमन्दाभिघातच्छुरितमणितुलाकोट्याकुलाशामुखानाम् । चलदधरदलानांकुड्मलापक्ष्मलाक्षि- द्वयसरसिरुहाणामुल्लसत्कुण्डलानाम्

skhalitalasitapādāmbhojamandābhighātacchuritamaṇitulākoṭyākulāśāmukhānām | caladadharadalānāṃkuḍmalāpakṣmalākṣi- dvayasarasiruhāṇāmullasatkuṇḍalānām

Sanskrit only: no published translation is held for this verse.

द्राघिष्ठश्वसनसमीरणाभितापप्रम्लानीभवदरुणौष्ठपल्लवानाम् । नानोपायनविलसत्कराम्बुजानामालीभिः सततनिषेवितं समन्तात्

drāghiṣṭhaśvasanasamīraṇābhitāpapramlānībhavadaruṇauṣṭhapallavānām | nānopāyanavilasatkarāmbujānāmālībhiḥ satataniṣevitaṃ samantāt

Sanskrit only: no published translation is held for this verse.

तासामायतलोलनीलनयनव्याकोशलीनाम्बुज- स्रग्भिः संपरिपूजिताखिलतनुं नानाविलासास्पदम् । तन्मुग्धाननपङ्कजप्रविगलन्माध्वीरसास्वादिनीं- बिभ्राणं प्रणयान्मदाक्षिमधुहृन्मालां मनोहारिणीम्

tāsāmāyatalolanīlanayanavyākośalīnāmbuja- sragbhiḥ saṃparipūjitākhilatanuṃ nānāvilāsāspadam | tanmugdhānanapaṅkajapravigalanmādhvīrasāsvādinīṃ- bibhrāṇaṃ praṇayānmadākṣimadhuhṛnmālāṃ manohāriṇīm

Sanskrit only: no published translation is held for this verse.

गोपीगोपपशूनां बहिः स्मरेदग्रतोऽस्य गीर्वाणघटांवित्तार्थिनीं विरिञ्चित्रिनयनशतमन्युपूर्विकां स्तोत्रपराम्

gopīgopapaśūnāṃ bahiḥ smaredagrato'sya gīrvāṇaghaṭāṃvittārthinīṃ viriñcitrinayanaśatamanyupūrvikāṃ stotraparām

Sanskrit only: no published translation is held for this verse.

तद्वद्दक्षिणतो मुनिनिकरं दृढधर्मवाञ्छया समाम्नायपरम् । योगीन्द्रानथ पृष्ठे मुमुक्षमाणान्समाधिना तु सनकाद्यान्

tadvaddakṣiṇato muninikaraṃ dṛḍhadharmavāñchayā samāmnāyaparam | yogīndrānatha pṛṣṭhe mumukṣamāṇānsamādhinā tu sanakādyān

Sanskrit only: no published translation is held for this verse.

सव्ये सकान्तानथ यक्षसिद्धगन्धर्वविद्याधरचारणांश्च । सकिन्नरानप्सरसश्च मुख्याः कामार्थिनीर्नर्तनगीतवाद्यैः

savye sakāntānatha yakṣasiddhagandharvavidyādharacāraṇāṃśca | sakinnarānapsarasaśca mukhyāḥ kāmārthinīrnartanagītavādyaiḥ

Sanskrit only: no published translation is held for this verse.

शङ्खेन्दुकुन्दधवलं सकलागमज्ञं सौदामिनीततिपिशङ्गजटाकलापम् । तत्पादपङ्कजगताममलां च भक्तिं वाञ्छन्तमुज्झिततरान्यसमस्तसङ्गम्

śaṅkhendukundadhavalaṃ sakalāgamajñaṃ saudāminītatipiśaṅgajaṭākalāpam | tatpādapaṅkajagatāmamalāṃ ca bhaktiṃ vāñchantamujjhitatarānyasamastasaṅgam

Sanskrit only: no published translation is held for this verse.

नानाविध श्रुतिगुणान्वितसप्तरागग्रामत्रयीगतमनोहरमूर्छनाभिः । संप्रीणयन्तमुदिताभिरपि प्रभक्त्या संचिन्तयन्नभसि मां द्रुहिणप्रसूतम्

nānāvidha śrutiguṇānvitasaptarāgagrāmatrayīgatamanoharamūrchanābhiḥ | saṃprīṇayantamuditābhirapi prabhaktyā saṃcintayannabhasi māṃ druhiṇaprasūtam

Sanskrit only: no published translation is held for this verse.

इति ध्यात्वाऽत्मानं पटुविशदधीर्नन्दतनयं नरो बुद्ध्यैवाऽर्घप्रभृतिभिरनिन्द्योपहृतिभिः । यजेद्भूयो भक्त्या स्ववपुषि बहिष्ठैश्च विभवैरिति प्रोक्तं सर्वं यदभिलषितं भूसुरवराः

iti dhyātvā'tmānaṃ paṭuviśadadhīrnandatanayaṃ naro buddhyaivā'rghaprabhṛtibhiranindyopahṛtibhiḥ | yajedbhūyo bhaktyā svavapuṣi bahiṣṭhaiśca vibhavairiti proktaṃ sarvaṃ yadabhilaṣitaṃ bhūsuravarāḥ

Sanskrit only: no published translation is held for this verse.

इति श्रीपद्मपुराणे पातालखंडे वैशाखमाहात्म्ये त्र्युत्तरशततमोऽध्यायः

iti śrīpadmapurāṇe pātālakhaṃḍe vaiśākhamāhātmye tryuttaraśatatamo'dhyāyaḥ

Sanskrit only: no published translation is held for this verse.