Padma Purāṇa 5.25

शेष उवाच। अथ वीक्ष्य भटान्निजान्नृपो रुधिरौघेण परिप्लुतांगकान् । सुखमाप न वै शुशोच तान्परिपप्रच्छ सुतस्य चेष्टितम्

śeṣa uvāca| atha vīkṣya bhaṭānnijānnṛpo rudhiraugheṇa pariplutāṃgakān | sukhamāpa na vai śuśoca tānparipapraccha sutasya ceṣṭitam

Sanskrit only: no published translation is held for this verse.

गदताखिलकर्म तस्य वै स कथं चाहरदश्ववर्यकम् । कथयंतु पुनः कियद्बलं बत वीराः कति योद्धुमागताः

gadatākhilakarma tasya vai sa kathaṃ cāharadaśvavaryakam | kathayaṃtu punaḥ kiyadbalaṃ bata vīrāḥ kati yoddhumāgatāḥ

Sanskrit only: no published translation is held for this verse.

अथ शत्रुबलोन्मुखः कथं मम वीरो दमनो रणं व्यधात् । विजयं च विधाय दुर्जयं किल वीरं बत कोऽप्यशातयत्

atha śatrubalonmukhaḥ kathaṃ mama vīro damano raṇaṃ vyadhāt | vijayaṃ ca vidhāya durjayaṃ kila vīraṃ bata ko'pyaśātayat

Sanskrit only: no published translation is held for this verse.

इत्याकर्ण्य वचो राज्ञः प्रत्यूचुस्तेऽस्य सेवकाः । क्षतजेन परिक्लिन्न गात्रवस्त्रादिधारिणः

ityākarṇya vaco rājñaḥ pratyūcuste'sya sevakāḥ | kṣatajena pariklinna gātravastrādidhāriṇaḥ

Sanskrit only: no published translation is held for this verse.

राजन्नश्वं समालोक्य पत्रचिह्नाद्यलंकृतम् । ग्राहयामास गर्वेण तृणीकृत्य रघूत्तमम्

rājannaśvaṃ samālokya patracihnādyalaṃkṛtam | grāhayāmāsa garveṇa tṛṇīkṛtya raghūttamam

Sanskrit only: no published translation is held for this verse.

ततो हयानुगः प्राप्तः स्वल्पसैन्यसमावृतः । तेन साकमभूद्युद्धं तुमुलं रोमहर्षणम्

tato hayānugaḥ prāptaḥ svalpasainyasamāvṛtaḥ | tena sākamabhūdyuddhaṃ tumulaṃ romaharṣaṇam

Sanskrit only: no published translation is held for this verse.

तं मूर्च्छितं ततः कृत्वा तव पुत्रः स्वसायकैः । यावत्तिष्ठत्यथायातः शत्रुघ्नः स्वबलैर्वृतः

taṃ mūrcchitaṃ tataḥ kṛtvā tava putraḥ svasāyakaiḥ | yāvattiṣṭhatyathāyātaḥ śatrughnaḥ svabalairvṛtaḥ

Sanskrit only: no published translation is held for this verse.

ततो युद्धं महदभूच्छस्त्रास्त्रपरिबृंहितम् । बहुशो जयमापेदे तव पुत्रो महाबलः

tato yuddhaṃ mahadabhūcchastrāstraparibṛṃhitam | bahuśo jayamāpede tava putro mahābalaḥ

Sanskrit only: no published translation is held for this verse.

इदानीं तेन मुक्त्वास्त्रं शत्रुघ्नभ्रातृसूनुना । मूर्च्छितः प्रधने राजन्कृतो वीरः सुतस्तव

idānīṃ tena muktvāstraṃ śatrughnabhrātṛsūnunā | mūrcchitaḥ pradhane rājankṛto vīraḥ sutastava

Sanskrit only: no published translation is held for this verse.

इति वाक्यं समाकर्ण्य रोषशोकसमन्वितः । स्थगितांग इवासीत्स समुद्र इव पर्वणि

iti vākyaṃ samākarṇya roṣaśokasamanvitaḥ | sthagitāṃga ivāsītsa samudra iva parvaṇi

Sanskrit only: no published translation is held for this verse.

उवाच सेनाधिपतिं रोषप्रस्फुरिताधरः । दन्तैर्दताँल्लिहन्नोष्ठं जिह्वया शोककर्शितः

uvāca senādhipatiṃ roṣaprasphuritādharaḥ | dantairdatā~llihannoṣṭhaṃ jihvayā śokakarśitaḥ

Sanskrit only: no published translation is held for this verse.

सेनापते कुरुष्वारान्मम सेनां तु सज्जिताम् । योत्स्ये रामस्य सुभटैर्ममपुत्रोपघातकैः

senāpate kuruṣvārānmama senāṃ tu sajjitām | yotsye rāmasya subhaṭairmamaputropaghātakaiḥ

Sanskrit only: no published translation is held for this verse.

अद्याहं मम पुत्रस्य दुःखदं निशितैः शरैः । पातयिष्ये यदि ह्येनं रक्षितापि महेश्वरः

adyāhaṃ mama putrasya duḥkhadaṃ niśitaiḥ śaraiḥ | pātayiṣye yadi hyenaṃ rakṣitāpi maheśvaraḥ

Sanskrit only: no published translation is held for this verse.

सेनापतिरिदं वाक्यं प्रोक्तं सुभुजभूपतेः । निशम्य च तथा कृत्वा सज्जीभूतो भवत्स्वयम्

senāpatiridaṃ vākyaṃ proktaṃ subhujabhūpateḥ | niśamya ca tathā kṛtvā sajjībhūto bhavatsvayam

Sanskrit only: no published translation is held for this verse.

राज्ञे निवेदयामास ससज्जां चतुरंगिणीम् । सेनां कालबलप्रख्यां हतदुर्जनकोटिकाम्

rājñe nivedayāmāsa sasajjāṃ caturaṃgiṇīm | senāṃ kālabalaprakhyāṃ hatadurjanakoṭikām

Sanskrit only: no published translation is held for this verse.

श्रुत्वा सेनापतेर्वाक्यं सुबाहुः परवीरहा । निर्जगाम ततो यत्र शत्रुघ्नः स्वसुतार्दनः

śrutvā senāpatervākyaṃ subāhuḥ paravīrahā | nirjagāma tato yatra śatrughnaḥ svasutārdanaḥ

Sanskrit only: no published translation is held for this verse.

कुंजरैश्च मदोन्मत्तैर्हयैश्चापि मनोजवैः । रथैश्च सर्वशस्त्रास्त्रपूरितै रिपुजेतृभिः

kuṃjaraiśca madonmattairhayaiścāpi manojavaiḥ | rathaiśca sarvaśastrāstrapūritai ripujetṛbhiḥ

Sanskrit only: no published translation is held for this verse.

भूश्चकंपे तदा तत्र सैन्यभारेण भूरिणा । संमर्दः सुमहानासीत्तत्र सैन्ये विसर्पति

bhūścakaṃpe tadā tatra sainyabhāreṇa bhūriṇā | saṃmardaḥ sumahānāsīttatra sainye visarpati

Sanskrit only: no published translation is held for this verse.

राजानं निर्गतं दृष्ट्वा रथेन कनकांगिना । शत्रुघ्नबलमुद्युक्तं सर्ववैरिप्रहारकम्

rājānaṃ nirgataṃ dṛṣṭvā rathena kanakāṃginā | śatrughnabalamudyuktaṃ sarvavairiprahārakam

Sanskrit only: no published translation is held for this verse.

सुकेतुस्तस्य वै भ्राता गदायुद्धविशारदः । रथेनाश्वा जगामायं सर्वशस्त्रास्त्रपूरितः

suketustasya vai bhrātā gadāyuddhaviśāradaḥ | rathenāśvā jagāmāyaṃ sarvaśastrāstrapūritaḥ

Sanskrit only: no published translation is held for this verse.

चित्रांगस्तु सुतो राज्ञः सर्वयुद्धविचक्षणः । जगाम स्वरथेनाशु शत्रुघ्नबलमुन्मदम्

citrāṃgastu suto rājñaḥ sarvayuddhavicakṣaṇaḥ | jagāma svarathenāśu śatrughnabalamunmadam

Sanskrit only: no published translation is held for this verse.

तस्यानुजो विचित्राख्यो विचित्ररणकोविदः । ययौ रथेन हैमेन भ्रातृदुःखेन पीडितः

tasyānujo vicitrākhyo vicitraraṇakovidaḥ | yayau rathena haimena bhrātṛduḥkhena pīḍitaḥ

Sanskrit only: no published translation is held for this verse.

अन्ये शूरा महेष्वासाः सर्वशस्त्रास्त्रकोविदाः । ययुर्नृपसमादिष्टाः प्रधनं वीरपूरितम्

anye śūrā maheṣvāsāḥ sarvaśastrāstrakovidāḥ | yayurnṛpasamādiṣṭāḥ pradhanaṃ vīrapūritam

Sanskrit only: no published translation is held for this verse.

राजा सुबाहुः संरोषादागतः प्रधनांगणे । विलोकयामास सुतं मूर्च्छितं शरपीडितम्

rājā subāhuḥ saṃroṣādāgataḥ pradhanāṃgaṇe | vilokayāmāsa sutaṃ mūrcchitaṃ śarapīḍitam

Sanskrit only: no published translation is held for this verse.

रथोपस्थस्थितं मूढं स्वसुतं दमनाभिधम् । वीक्ष्य दुःखं मुहुः प्राप वीजयामास पल्लवैः

rathopasthasthitaṃ mūḍhaṃ svasutaṃ damanābhidham | vīkṣya duḥkhaṃ muhuḥ prāpa vījayāmāsa pallavaiḥ

Sanskrit only: no published translation is held for this verse.

जलेन सिक्तः संस्पृष्टो राज्ञा कोमलपाणिना । संज्ञामाप शनैर्वीरो दमनः परमास्त्रवित्

jalena siktaḥ saṃspṛṣṭo rājñā komalapāṇinā | saṃjñāmāpa śanairvīro damanaḥ paramāstravit

Sanskrit only: no published translation is held for this verse.

उत्थितः क्व धनुर्मेऽस्ति क्व पुष्कल इतो गतः । संसज्य समरं त्यक्त्वा मद्बाणव्रणपीडितः

utthitaḥ kva dhanurme'sti kva puṣkala ito gataḥ | saṃsajya samaraṃ tyaktvā madbāṇavraṇapīḍitaḥ

Sanskrit only: no published translation is held for this verse.

इति वाक्यं समाकर्ण्य सुबाहुः पुत्रभाषितम् । परमं हर्षमापेदे परिरभ्य सुतं स्वकम्

iti vākyaṃ samākarṇya subāhuḥ putrabhāṣitam | paramaṃ harṣamāpede parirabhya sutaṃ svakam

Sanskrit only: no published translation is held for this verse.

दमनो वीक्ष्य जनकं नृपं नम्रशिरोधरः । पपात पादयोर्भक्त्या क्षतदेहोऽस्त्रराजिभिः

damano vīkṣya janakaṃ nṛpaṃ namraśirodharaḥ | papāta pādayorbhaktyā kṣatadeho'strarājibhiḥ

Sanskrit only: no published translation is held for this verse.

स्वसुतं रथसंस्थं तु विधाय नृपतिः पुनः । जगाद सेनाधिपतिं रणकर्मविशारदः

svasutaṃ rathasaṃsthaṃ tu vidhāya nṛpatiḥ punaḥ | jagāda senādhipatiṃ raṇakarmaviśāradaḥ

Sanskrit only: no published translation is held for this verse.

व्यूहं रचय संग्रामे क्रौंचाख्यं रिपुदुर्जयम् । यमाविश्य जये सैन्यं शत्रुघ्नस्य महीपतेः

vyūhaṃ racaya saṃgrāme krauṃcākhyaṃ ripudurjayam | yamāviśya jaye sainyaṃ śatrughnasya mahīpateḥ

Sanskrit only: no published translation is held for this verse.

तद्वाक्यमाकर्ण्य सुबाहुभूपतेः । क्रौंचाख्यसद्व्यूहविशेषमादधात् । यन्नो विशंते सहसा रिपोर्गणा । महाबलाः शस्त्रसमूहधारिणः

tadvākyamākarṇya subāhubhūpateḥ | krauṃcākhyasadvyūhaviśeṣamādadhāt | yanno viśaṃte sahasā riporgaṇā | mahābalāḥ śastrasamūhadhāriṇaḥ

Sanskrit only: no published translation is held for this verse.

मुखे सुकेतुस्तस्यासीद्गले चित्रांगसंज्ञकः । पक्षयो राजपुत्रौ द्वौ पुच्छे राजा प्रतिष्ठितः

mukhe suketustasyāsīdgale citrāṃgasaṃjñakaḥ | pakṣayo rājaputrau dvau pucche rājā pratiṣṭhitaḥ

Sanskrit only: no published translation is held for this verse.

मध्ये सैन्यं महत्तस्य चतुरंगैस्तु शोभितम् । कृत्वा न्यवेदयद्राज्ञे क्रौंचव्यूहं विचित्रितम्

madhye sainyaṃ mahattasya caturaṃgaistu śobhitam | kṛtvā nyavedayadrājñe krauṃcavyūhaṃ vicitritam

Sanskrit only: no published translation is held for this verse.

राजा दृष्ट्वा सुसन्नद्धं क्रौंचव्यूहं सुनिर्मितम् । रणाय स्वमतिं चक्रे शत्रुघ्नकटके स्थितैः

rājā dṛṣṭvā susannaddhaṃ krauṃcavyūhaṃ sunirmitam | raṇāya svamatiṃ cakre śatrughnakaṭake sthitaiḥ

Sanskrit only: no published translation is held for this verse.