Library·Padma Purāṇa·5·5.34
शेष उवाच। रथैः सदश्वैः शोभाढ्यैः सर्वशस्त्रास्त्रपूरितैः । नानारत्नसमायुक्तैर्ययुस्ते राक्षसाधमम्
śeṣa uvāca| rathaiḥ sadaśvaiḥ śobhāḍhyaiḥ sarvaśastrāstrapūritaiḥ | nānāratnasamāyuktairyayuste rākṣasādhamam
Sanskrit only: no published translation is held for this verse.
तान्दृष्ट्वा कामगे याने स्थितः प्रोवाच राक्षसः । मेघगंभीरया वाचा तर्जयन्निव भूरिशः
tāndṛṣṭvā kāmage yāne sthitaḥ provāca rākṣasaḥ | meghagaṃbhīrayā vācā tarjayanniva bhūriśaḥ
Sanskrit only: no published translation is held for this verse.
मायां तु सुभटा योद्धुं गच्छंतु निजमंदिरम् । मा त्यजंतु स्वकान्प्राणान्न मोक्ष्ये वाजिनं वरम्
māyāṃ tu subhaṭā yoddhuṃ gacchaṃtu nijamaṃdiram | mā tyajaṃtu svakānprāṇānna mokṣye vājinaṃ varam
Sanskrit only: no published translation is held for this verse.
विद्युन्मालीति विख्यातो रावणस्य सुहृत्सखा । मत्सख्युः प्रेतभूतस्य निष्कृतिं कर्तुमेयिवान्
vidyunmālīti vikhyāto rāvaṇasya suhṛtsakhā | matsakhyuḥ pretabhūtasya niṣkṛtiṃ kartumeyivān
Sanskrit only: no published translation is held for this verse.
क्वासौ रामो य आहत्य सखायं रावणं गतः । तस्य भ्रातापि कुत्रास्ते सर्वशूरशिरोमणिः
kvāsau rāmo ya āhatya sakhāyaṃ rāvaṇaṃ gataḥ | tasya bhrātāpi kutrāste sarvaśūraśiromaṇiḥ
Sanskrit only: no published translation is held for this verse.
तं हत्वा निष्कृतिं तस्य प्राप्स्ये रामस्य चानुजम् । पिबन्रुधिरमुद्भूतं कंठनालस्य बुद्बुदैः
taṃ hatvā niṣkṛtiṃ tasya prāpsye rāmasya cānujam | pibanrudhiramudbhūtaṃ kaṃṭhanālasya budbudaiḥ
Sanskrit only: no published translation is held for this verse.
इति वाक्यं समाकर्ण्य योधानां प्रवरोत्तमः । पुष्कलो निजगादैनं वीर्यशौर्यसमन्वितम्
iti vākyaṃ samākarṇya yodhānāṃ pravarottamaḥ | puṣkalo nijagādainaṃ vīryaśauryasamanvitam
Sanskrit only: no published translation is held for this verse.
पुष्कल उवाच। विकत्थनं न कुर्वंति संग्रामे सुभटा नराः । पराक्रमं दर्शयंति निजशस्त्रास्त्रवर्षणैः
puṣkala uvāca| vikatthanaṃ na kurvaṃti saṃgrāme subhaṭā narāḥ | parākramaṃ darśayaṃti nijaśastrāstravarṣaṇaiḥ
Sanskrit only: no published translation is held for this verse.
रावणो निहतो येन ससुहृत्स्वजनैर्वृतः । तस्य वाजिनमाहृत्य कुत्र गंतासि दुर्मद
rāvaṇo nihato yena sasuhṛtsvajanairvṛtaḥ | tasya vājinamāhṛtya kutra gaṃtāsi durmada
Sanskrit only: no published translation is held for this verse.
पतिष्यसि त्वं शत्रुघ्नबाणैः कोदंडनिर्गतैः । त्वामत्स्यंति शिवा भूमौ पतितं प्राणवर्जितम्
patiṣyasi tvaṃ śatrughnabāṇaiḥ kodaṃḍanirgataiḥ | tvāmatsyaṃti śivā bhūmau patitaṃ prāṇavarjitam
Sanskrit only: no published translation is held for this verse.
मा गर्ज दुष्ट रामस्य सेवके मयि संस्थिते । गर्जंति सुभटा युद्धे शत्रुं जित्वा महोदयात्
mā garja duṣṭa rāmasya sevake mayi saṃsthite | garjaṃti subhaṭā yuddhe śatruṃ jitvā mahodayāt
Sanskrit only: no published translation is held for this verse.
शेष उवाच। एवं ब्रुवंतं तं वीरं पुष्कलं रणदुर्मदम् । जघान शक्त्या सुभृशं हृदि राक्षससत्तमः
śeṣa uvāca| evaṃ bruvaṃtaṃ taṃ vīraṃ puṣkalaṃ raṇadurmadam | jaghāna śaktyā subhṛśaṃ hṛdi rākṣasasattamaḥ
Sanskrit only: no published translation is held for this verse.
आयांतीं तां महाशक्तिमायसीं कांचनाश्रिताम् । चिच्छेद त्रिभिरत्युग्रैः शितैर्बाणैः स पुष्कलः
āyāṃtīṃ tāṃ mahāśaktimāyasīṃ kāṃcanāśritām | ciccheda tribhiratyugraiḥ śitairbāṇaiḥ sa puṣkalaḥ
Sanskrit only: no published translation is held for this verse.
सा त्रिधा ह्यपतद्भूमौ विशिखैर्निष्प्रभीकृता । पतंती विरराजासौ विष्णोः शक्तित्रयीव किम्
sā tridhā hyapatadbhūmau viśikhairniṣprabhīkṛtā | pataṃtī virarājāsau viṣṇoḥ śaktitrayīva kim
Sanskrit only: no published translation is held for this verse.
तां छिन्नां शक्तिकां दृष्ट्वा राक्षसः परतापनः । जग्राह शूलं तरसा त्रिशिखं लोहनिर्मितम्
tāṃ chinnāṃ śaktikāṃ dṛṣṭvā rākṣasaḥ paratāpanaḥ | jagrāha śūlaṃ tarasā triśikhaṃ lohanirmitam
Sanskrit only: no published translation is held for this verse.
तीक्ष्णाग्रं ज्वलनप्रख्यं राक्षसेंद्रो व्यमोचयत् । आयांतं तिलशश्चक्रे बाणैः पुष्कलसंज्ञितः
tīkṣṇāgraṃ jvalanaprakhyaṃ rākṣaseṃdro vyamocayat | āyāṃtaṃ tilaśaścakre bāṇaiḥ puṣkalasaṃjñitaḥ
Sanskrit only: no published translation is held for this verse.
छित्त्वा त्रिशूलं तरसा राघवस्य हि सेवकः । पुष्कलश्चाप आधत्त बाणांस्तीक्ष्णान्मनोजवान्
chittvā triśūlaṃ tarasā rāghavasya hi sevakaḥ | puṣkalaścāpa ādhatta bāṇāṃstīkṣṇānmanojavān
Sanskrit only: no published translation is held for this verse.
ते बाणा हृदि तस्याशु लग्ना रागं बतासृजन् । वैष्णवस्य यथा स्वांते गुणा विष्णोर्मनोहराः
te bāṇā hṛdi tasyāśu lagnā rāgaṃ batāsṛjan | vaiṣṇavasya yathā svāṃte guṇā viṣṇormanoharāḥ
Sanskrit only: no published translation is held for this verse.
तद्बाणवेधदुःखार्तो विद्युन्माली सुदुर्मदः । जग्राह मुद्गरं घोरं पुष्कलं हंतुमुद्यतः
tadbāṇavedhaduḥkhārto vidyunmālī sudurmadaḥ | jagrāha mudgaraṃ ghoraṃ puṣkalaṃ haṃtumudyataḥ
Sanskrit only: no published translation is held for this verse.
मुद्गरः प्रहितस्तेन विद्युन्माल्यभिधेन हि । हृदि लग्नोसृजच्छीघ्रं कश्मलं तदकारयत्
mudgaraḥ prahitastena vidyunmālyabhidhena hi | hṛdi lagnosṛjacchīghraṃ kaśmalaṃ tadakārayat
Sanskrit only: no published translation is held for this verse.
मुद्गरप्रहतो वीरः कंपमानः सवेपथुः । पपात स्यंदनोपस्थे पुष्कलः शत्रुतापनः
mudgaraprahato vīraḥ kaṃpamānaḥ savepathuḥ | papāta syaṃdanopasthe puṣkalaḥ śatrutāpanaḥ
Sanskrit only: no published translation is held for this verse.
उग्रदंष्ट्रोऽथ तद्भ्राता लक्ष्मीनिधिमयोधयत् । शस्त्रास्त्रैर्बहुधा मुक्तैर्वीरप्राणहृतिंकरैः
ugradaṃṣṭro'tha tadbhrātā lakṣmīnidhimayodhayat | śastrāstrairbahudhā muktairvīraprāṇahṛtiṃkaraiḥ
Sanskrit only: no published translation is held for this verse.
पुष्कलस्तत्क्षणात्प्राप्य संज्ञां राक्षसमब्रवीत् । धन्योसि राक्षसश्रेष्ठ महीयांस्ते पराक्रमः
puṣkalastatkṣaṇātprāpya saṃjñāṃ rākṣasamabravīt | dhanyosi rākṣasaśreṣṭha mahīyāṃste parākramaḥ
Sanskrit only: no published translation is held for this verse.
पश्येदानीं ममाप्युच्चैः प्रतिज्ञां शूरमानिताम् । विमानात्पातयाम्यद्य भूमौ त्वां शितसायकैः
paśyedānīṃ mamāpyuccaiḥ pratijñāṃ śūramānitām | vimānātpātayāmyadya bhūmau tvāṃ śitasāyakaiḥ
Sanskrit only: no published translation is held for this verse.
इत्युक्त्वा निशितं बाणं समगृह्णाद्दुरासदम् । ज्वलंतमग्नितेजस्कं महौदार्यसमन्वितम्
ityuktvā niśitaṃ bāṇaṃ samagṛhṇāddurāsadam | jvalaṃtamagnitejaskaṃ mahaudāryasamanvitam
Sanskrit only: no published translation is held for this verse.
स यावत्तत्प्रतीकर्तुं विधत्ते स्वपराक्रमम् । तावद्धृदिगतोऽत्युग्रस्तीक्ष्णधारः ससायकः
sa yāvattatpratīkartuṃ vidhatte svaparākramam | tāvaddhṛdigato'tyugrastīkṣṇadhāraḥ sasāyakaḥ
Sanskrit only: no published translation is held for this verse.
तेन बाणेन विभ्रांतो भ्रमच्चित्तः स राक्षसः । पपात कामगोपस्थाद्भूमौ विगतचेतनः
tena bāṇena vibhrāṃto bhramaccittaḥ sa rākṣasaḥ | papāta kāmagopasthādbhūmau vigatacetanaḥ
Sanskrit only: no published translation is held for this verse.
उग्रदंष्ट्रेण वै दृष्टः पतमानो निजाग्रजः । गृहीत्वा तं विमानांतर्निनाय रिपुशंकितः
ugradaṃṣṭreṇa vai dṛṣṭaḥ patamāno nijāgrajaḥ | gṛhītvā taṃ vimānāṃtarnināya ripuśaṃkitaḥ
Sanskrit only: no published translation is held for this verse.
प्राह चारिं महारोषात्पुष्कलं बलिनां वरम् । मद्भ्रातरं पातयित्वा कुत्र यास्यसि दुर्मते
prāha cāriṃ mahāroṣātpuṣkalaṃ balināṃ varam | madbhrātaraṃ pātayitvā kutra yāsyasi durmate
Sanskrit only: no published translation is held for this verse.
मां वै युधि विनिर्जित्य गंतासि जयमुत्तमम् । स्थिते मयि तव स्वांते जयाशा विनिवर्त्य ताम्
māṃ vai yudhi vinirjitya gaṃtāsi jayamuttamam | sthite mayi tava svāṃte jayāśā vinivartya tām
Sanskrit only: no published translation is held for this verse.
एवं ब्रुवंतं तरसा जघान दशभिः शरैः । हृदये तस्य दुष्टस्य रोषपूरितलोचनः
evaṃ bruvaṃtaṃ tarasā jaghāna daśabhiḥ śaraiḥ | hṛdaye tasya duṣṭasya roṣapūritalocanaḥ
Sanskrit only: no published translation is held for this verse.
स ताडितो दशशरैः पुष्कलेन महात्मना । चुक्रोध हृदि दुर्बुद्धिस्तं हंतुमुपचक्रमे
sa tāḍito daśaśaraiḥ puṣkalena mahātmanā | cukrodha hṛdi durbuddhistaṃ haṃtumupacakrame
Sanskrit only: no published translation is held for this verse.
दंतान्निष्पिष्य सक्रोधो मुष्टिमुद्यम्य चाहनत् । व्यनदद्वज्रनिर्घातपातशंकां सृजन्हृदि
daṃtānniṣpiṣya sakrodho muṣṭimudyamya cāhanat | vyanadadvajranirghātapātaśaṃkāṃ sṛjanhṛdi
Sanskrit only: no published translation is held for this verse.
मुष्टिनाभिहतो वीरः पुष्कलः परमास्त्रवित् । नाकंपत विनिष्पेषं वांछंस्तस्य दुरात्मनः
muṣṭinābhihato vīraḥ puṣkalaḥ paramāstravit | nākaṃpata viniṣpeṣaṃ vāṃchaṃstasya durātmanaḥ
Sanskrit only: no published translation is held for this verse.
वत्सदंतान्महातीक्ष्णान्मुमोच हृदि सायकान् । तैर्बाणैर्व्यथितो दैत्यस्त्रिशूलं तु समाददे
vatsadaṃtānmahātīkṣṇānmumoca hṛdi sāyakān | tairbāṇairvyathito daityastriśūlaṃ tu samādade
Sanskrit only: no published translation is held for this verse.
जाज्वल्यमानं त्रिशिखं ज्वालामालातिभीषणम् । लग्नं हृदि महावीर पुष्कलस्य तु दारुणम्
jājvalyamānaṃ triśikhaṃ jvālāmālātibhīṣaṇam | lagnaṃ hṛdi mahāvīra puṣkalasya tu dāruṇam
Sanskrit only: no published translation is held for this verse.
मूर्च्छितस्तेन शूलेन निहतो धन्विसत्तमः । कश्मलं परमं प्राप्तः पपात स्यंदनोपरि
mūrcchitastena śūlena nihato dhanvisattamaḥ | kaśmalaṃ paramaṃ prāptaḥ papāta syaṃdanopari
Sanskrit only: no published translation is held for this verse.
मूर्च्छां प्राप्तं तमाज्ञाय हनूमान्पवनात्मजः । कोपव्याकुलितस्वांतो बभाषे तं तु राक्षसम्
mūrcchāṃ prāptaṃ tamājñāya hanūmānpavanātmajaḥ | kopavyākulitasvāṃto babhāṣe taṃ tu rākṣasam
Sanskrit only: no published translation is held for this verse.
कुत्र गच्छसि दुर्बुद्धे मयि योद्धरि संस्थिते । त्वां हन्मि चरणाघातैर्वाजिहर्तारमागतम्
kutra gacchasi durbuddhe mayi yoddhari saṃsthite | tvāṃ hanmi caraṇāghātairvājihartāramāgatam
Sanskrit only: no published translation is held for this verse.
एवमुक्त्वा महादैत्याञ्जघान परसैनिकान् । विमानस्थान्नखाग्रेण दारयन्नभसि स्थितः
evamuktvā mahādaityāñjaghāna parasainikān | vimānasthānnakhāgreṇa dārayannabhasi sthitaḥ
Sanskrit only: no published translation is held for this verse.
लांगूलेनाहताः केचित्केचित्पादतला हताः । बाहुभ्यां दारिताः केचित्पवनस्य तनूभुवा
lāṃgūlenāhatāḥ kecitkecitpādatalā hatāḥ | bāhubhyāṃ dāritāḥ kecitpavanasya tanūbhuvā
Sanskrit only: no published translation is held for this verse.
नश्यंति केचिन्निहताः केचिन्मूर्च्छंति संहताः । पलायंते पदाघातभयपीडाहतास्ततः
naśyaṃti kecinnihatāḥ kecinmūrcchaṃti saṃhatāḥ | palāyaṃte padāghātabhayapīḍāhatāstataḥ
Sanskrit only: no published translation is held for this verse.
अनेके निहतास्तत्र राक्षसाश्चातिदारुणाः । छिन्ना भिन्ना द्विधा जाताः पवनस्य सुतेन वै
aneke nihatāstatra rākṣasāścātidāruṇāḥ | chinnā bhinnā dvidhā jātāḥ pavanasya sutena vai
Sanskrit only: no published translation is held for this verse.
कामगंतुविमानं तद्भिन्नप्राकारतोरणम् । हाहा कुर्वद्भिरसुरैः समंतात्परिवारितम्
kāmagaṃtuvimānaṃ tadbhinnaprākāratoraṇam | hāhā kurvadbhirasuraiḥ samaṃtātparivāritam
Sanskrit only: no published translation is held for this verse.
हनूमति महाशूरे क्षणं भूमौ क्षणं दिवि । इतस्ततः प्रदृश्येत कामयानं दुरासदम्
hanūmati mahāśūre kṣaṇaṃ bhūmau kṣaṇaṃ divi | itastataḥ pradṛśyeta kāmayānaṃ durāsadam
Sanskrit only: no published translation is held for this verse.
यत्रयत्र विमानं तत्तत्रतत्र समीरजः । प्रहरन्नेव दृश्येत कामरूपधरः कपिः
yatrayatra vimānaṃ tattatratatra samīrajaḥ | praharanneva dṛśyeta kāmarūpadharaḥ kapiḥ
Sanskrit only: no published translation is held for this verse.
एवं तदाकुलीभूते विमानस्थे महाजने । उग्रदंष्ट्रस्तु दैत्येंद्रो हनूमंतमुपेयिवान्
evaṃ tadākulībhūte vimānasthe mahājane | ugradaṃṣṭrastu daityeṃdro hanūmaṃtamupeyivān
Sanskrit only: no published translation is held for this verse.
कपे त्वया महत्कर्म कृतं यद्भटपातनम् । क्षणं तिष्ठसि चेत्कुर्वे तव प्राणवियोजनम्
kape tvayā mahatkarma kṛtaṃ yadbhaṭapātanam | kṣaṇaṃ tiṣṭhasi cetkurve tava prāṇaviyojanam
Sanskrit only: no published translation is held for this verse.
एवमुक्त्वा हनूमंतं प्रजघान स दुर्मतिः । त्रिशूलेन सुतीक्ष्णेन ज्वलत्पावककांतिना
evamuktvā hanūmaṃtaṃ prajaghāna sa durmatiḥ | triśūlena sutīkṣṇena jvalatpāvakakāṃtinā
Sanskrit only: no published translation is held for this verse.
तदागतं त्रिशूलं च मुखे जग्राह वीर्यवान् । चूर्णयामास सकलं सर्वलोहविनिर्मितम्
tadāgataṃ triśūlaṃ ca mukhe jagrāha vīryavān | cūrṇayāmāsa sakalaṃ sarvalohavinirmitam
Sanskrit only: no published translation is held for this verse.
चूर्णयित्वा त्रिशूलं तदायसं दैत्यमोचितम् । जघान तं चपेटाभिर्बह्वीभिर्हनुमान्बली
cūrṇayitvā triśūlaṃ tadāyasaṃ daityamocitam | jaghāna taṃ capeṭābhirbahvībhirhanumānbalī
Sanskrit only: no published translation is held for this verse.
स आहतः कपीन्द्रेण चपेटाभिरितस्ततः । व्यथितो व्यसृजन्मायां सर्वलोकभयंकरीम्
sa āhataḥ kapīndreṇa capeṭābhiritastataḥ | vyathito vyasṛjanmāyāṃ sarvalokabhayaṃkarīm
Sanskrit only: no published translation is held for this verse.
तदा तमोभवत्तीव्रं यत्र को वा न लक्ष्यते । यत्र स्वीयो न पारक्यो विदामास जनान्बहून्
tadā tamobhavattīvraṃ yatra ko vā na lakṣyate | yatra svīyo na pārakyo vidāmāsa janānbahūn
Sanskrit only: no published translation is held for this verse.
शिलाः पर्वतशृंगाभाः पतंति सुभटोपरि । ताभिर्हतास्तु ते सर्वे व्याकुला अथ जज्ञिरे
śilāḥ parvataśṛṃgābhāḥ pataṃti subhaṭopari | tābhirhatāstu te sarve vyākulā atha jajñire
Sanskrit only: no published translation is held for this verse.
विद्युतो विलसंत्यत्र गर्जंति जलदा घनम् । वर्षंति पूयरुधिरं मुंचंति समलं जलम्
vidyuto vilasaṃtyatra garjaṃti jaladā ghanam | varṣaṃti pūyarudhiraṃ muṃcaṃti samalaṃ jalam
Sanskrit only: no published translation is held for this verse.
आकाशात्पतमानानि कबंधानि बहूनि च । दृश्यंते छिन्नशीर्षाणि सकुंडलयुतानि च
ākāśātpatamānāni kabaṃdhāni bahūni ca | dṛśyaṃte chinnaśīrṣāṇi sakuṃḍalayutāni ca
Sanskrit only: no published translation is held for this verse.
नग्ना विरूपाः सुभृशं कीर्णकेशाः सुदुर्मुखाः । दृश्यंते सर्वतो दैत्या दारुणा भयकारिणः
nagnā virūpāḥ subhṛśaṃ kīrṇakeśāḥ sudurmukhāḥ | dṛśyaṃte sarvato daityā dāruṇā bhayakāriṇaḥ
Sanskrit only: no published translation is held for this verse.
तदा व्याकुलिता लोकाः परस्परभयाकुलाः । पलायनपरा जाता महोत्पातममंसत
tadā vyākulitā lokāḥ parasparabhayākulāḥ | palāyanaparā jātā mahotpātamamaṃsata
Sanskrit only: no published translation is held for this verse.
तदा शत्रुघ्न आयातो रथे स्थित्वा महायशाः । श्रीरामस्मरणं कृत्वा चापे संधाय सायकान्
tadā śatrughna āyāto rathe sthitvā mahāyaśāḥ | śrīrāmasmaraṇaṃ kṛtvā cāpe saṃdhāya sāyakān
Sanskrit only: no published translation is held for this verse.
तां मायां स विधूयाथ मोहनास्त्रेण वीर्यवान् । शरधाराः किरन्व्योम्नि ववर्ष समरेसुरम्
tāṃ māyāṃ sa vidhūyātha mohanāstreṇa vīryavān | śaradhārāḥ kiranvyomni vavarṣa samaresuram
Sanskrit only: no published translation is held for this verse.
तदादिशः प्रसेदुस्ता रविस्त्वपरिवेषवान् । मेघा यथागतं याता विद्युतः शांतिमागताः
tadādiśaḥ prasedustā ravistvapariveṣavān | meghā yathāgataṃ yātā vidyutaḥ śāṃtimāgatāḥ
Sanskrit only: no published translation is held for this verse.
तदा विमानं पुरतो दृश्यते राक्षसैर्युतम् । छिंधि भिंधीति भाषाभिर्व्याकुलं सुतरां महत्
tadā vimānaṃ purato dṛśyate rākṣasairyutam | chiṃdhi bhiṃdhīti bhāṣābhirvyākulaṃ sutarāṃ mahat
Sanskrit only: no published translation is held for this verse.
बाणाश्च शतसाहस्राः स्वर्णपुंखैश्च शोभिताः । पेतुर्विमाने नभसि स्थिते कामगमे मुहुः
bāṇāśca śatasāhasrāḥ svarṇapuṃkhaiśca śobhitāḥ | peturvimāne nabhasi sthite kāmagame muhuḥ
Sanskrit only: no published translation is held for this verse.
तदा भग्नं विमानं हि दृश्यते न तदुच्चकैः । स्वपुरी खण्डमेकत्र भग्नांगमिव भूतले
tadā bhagnaṃ vimānaṃ hi dṛśyate na taduccakaiḥ | svapurī khaṇḍamekatra bhagnāṃgamiva bhūtale
Sanskrit only: no published translation is held for this verse.
तदा प्रकुपितो दैत्यो बाणान्धनुषि संदधे । तैर्बाणैर्विकिरन्रामभ्रातरं चाभिगर्जितः
tadā prakupito daityo bāṇāndhanuṣi saṃdadhe | tairbāṇairvikiranrāmabhrātaraṃ cābhigarjitaḥ
Sanskrit only: no published translation is held for this verse.
ते बाणाः शतशस्तस्य लग्ना वपुषि भूरिशः । शोभामापुः शोणितौघान्वहंतस्तीक्ष्णवक्त्रिणः
te bāṇāḥ śataśastasya lagnā vapuṣi bhūriśaḥ | śobhāmāpuḥ śoṇitaughānvahaṃtastīkṣṇavaktriṇaḥ
Sanskrit only: no published translation is held for this verse.
शत्रुघ्नः परया शक्त्या संयुक्तो वायुदैवतम् । अस्त्रं धनुषि चाधत्त राक्षसानां प्रकम्पनम्
śatrughnaḥ parayā śaktyā saṃyukto vāyudaivatam | astraṃ dhanuṣi cādhatta rākṣasānāṃ prakampanam
Sanskrit only: no published translation is held for this verse.
तेनास्त्रेण विमानात्खात्पतन्तो मुक्तमूर्धजाः । दृश्यंते भूतवेतालसंघा इव नभश्चराः
tenāstreṇa vimānātkhātpatanto muktamūrdhajāḥ | dṛśyaṃte bhūtavetālasaṃghā iva nabhaścarāḥ
Sanskrit only: no published translation is held for this verse.
तदस्त्रं रघुनाथस्य भ्रात्रा मुक्तं विलोक्य सः । अस्त्रं च पाशुपत्यं स चापे धाद्दनुजात्मजः
tadastraṃ raghunāthasya bhrātrā muktaṃ vilokya saḥ | astraṃ ca pāśupatyaṃ sa cāpe dhāddanujātmajaḥ
Sanskrit only: no published translation is held for this verse.
ततः प्रवृत्ता वेताला भूताः प्रेतनिशाचराः । कपालकर्तरीयुक्ताः पिबन्तः शोणितं बहु
tataḥ pravṛttā vetālā bhūtāḥ pretaniśācarāḥ | kapālakartarīyuktāḥ pibantaḥ śoṇitaṃ bahu
Sanskrit only: no published translation is held for this verse.
ते वै शत्रुघ्नवीराणां रुधिराणि पपुर्मुदा । जीवतामपि दुर्वाराः कर्तरीपाणिशोभिताः
te vai śatrughnavīrāṇāṃ rudhirāṇi papurmudā | jīvatāmapi durvārāḥ kartarīpāṇiśobhitāḥ
Sanskrit only: no published translation is held for this verse.
तदस्त्रं व्याप्नुवद्दृष्ट्वा सर्ववीरप्रभंजनम् । मुमोच तन्निरासाय चास्त्रं नारायणाभिधम्
tadastraṃ vyāpnuvaddṛṣṭvā sarvavīraprabhaṃjanam | mumoca tannirāsāya cāstraṃ nārāyaṇābhidham
Sanskrit only: no published translation is held for this verse.
नारायणास्त्रं तान्सर्वान्वारयामास तत्क्षणात् । ते सर्वे विलयं प्रापुर्निशाचरप्रणोदिताः
nārāyaṇāstraṃ tānsarvānvārayāmāsa tatkṣaṇāt | te sarve vilayaṃ prāpurniśācarapraṇoditāḥ
Sanskrit only: no published translation is held for this verse.
तदा क्रुद्धो निशाचारी विद्युन्माली समाददे । त्रिशूलं निशितं घोरं शत्रुघ्नं हंतुमुल्बणम्
tadā kruddho niśācārī vidyunmālī samādade | triśūlaṃ niśitaṃ ghoraṃ śatrughnaṃ haṃtumulbaṇam
Sanskrit only: no published translation is held for this verse.
शूलहस्तं समायांतं विद्युन्मालिनमाहवे । सायकैः प्राहरत्तस्य भुजे त्वर्धशशिप्रभैः
śūlahastaṃ samāyāṃtaṃ vidyunmālinamāhave | sāyakaiḥ prāharattasya bhuje tvardhaśaśiprabhaiḥ
Sanskrit only: no published translation is held for this verse.
तैर्बाणैश्छिन्नहस्तः स शिरसा हंतुमुद्यतः । हतोसि याहि शत्रुघ्न कस्त्वां त्राता भविष्यति
tairbāṇaiśchinnahastaḥ sa śirasā haṃtumudyataḥ | hatosi yāhi śatrughna kastvāṃ trātā bhaviṣyati
Sanskrit only: no published translation is held for this verse.
इति ब्रुवाणं तरसा चिच्छेद शितसायकैः । मस्तकं तस्य बलिनः शूरस्य सह कुंडलम्
iti bruvāṇaṃ tarasā ciccheda śitasāyakaiḥ | mastakaṃ tasya balinaḥ śūrasya saha kuṃḍalam
Sanskrit only: no published translation is held for this verse.
तं छिन्नशिरसं दृष्ट्वा उग्रदंष्ट्रः प्रतापवान् । मुष्टिना हंतुमारेभे शत्रुघ्नं शूरसेवितम्
taṃ chinnaśirasaṃ dṛṣṭvā ugradaṃṣṭraḥ pratāpavān | muṣṭinā haṃtumārebhe śatrughnaṃ śūrasevitam
Sanskrit only: no published translation is held for this verse.
शत्रुघ्नस्तु क्षुरप्रेण सायकेनाच्छिनच्छिरः । प्रधावतो रणे वीरान्सर्वशस्त्रास्त्रकोविदान्
śatrughnastu kṣurapreṇa sāyakenācchinacchiraḥ | pradhāvato raṇe vīrānsarvaśastrāstrakovidān
Sanskrit only: no published translation is held for this verse.
हतशेषा ययुः सर्वे राक्षसा नाथवर्जिताः । शत्रुघ्नं प्रणिपत्याथ ददुर्वाजिनमाहृतम्
hataśeṣā yayuḥ sarve rākṣasā nāthavarjitāḥ | śatrughnaṃ praṇipatyātha dadurvājinamāhṛtam
Sanskrit only: no published translation is held for this verse.
ततो वीणानिनादाश्च शंखनादाः समंततः । श्रूयंते शूरवीराणां जयनादा मनोहराः
tato vīṇāninādāśca śaṃkhanādāḥ samaṃtataḥ | śrūyaṃte śūravīrāṇāṃ jayanādā manoharāḥ
Sanskrit only: no published translation is held for this verse.