Padma Purāṇa 5.49

शेष उवाच। मासाः सप्ताभवंस्तस्य हयवर्यस्य हेलया । चरतो भारतं वर्षमनेकनृपपूरितम्

śeṣa uvāca| māsāḥ saptābhavaṃstasya hayavaryasya helayā | carato bhārataṃ varṣamanekanṛpapūritam

Sanskrit only: no published translation is held for this verse.

स पूजितो भूपवरैः परीत्य वरभारतम् । परीवृतो वीरवरैः शत्रुघ्नादिभिरुद्भटैः

sa pūjito bhūpavaraiḥ parītya varabhāratam | parīvṛto vīravaraiḥ śatrughnādibhirudbhaṭaiḥ

Sanskrit only: no published translation is held for this verse.

स बभ्राम बहून्देशान्हिमालयसमीपतः । न कोपि तं निजग्राह हयं रामबलं स्मरन्

sa babhrāma bahūndeśānhimālayasamīpataḥ | na kopi taṃ nijagrāha hayaṃ rāmabalaṃ smaran

Sanskrit only: no published translation is held for this verse.

अंगवंगकलिंगानां राजभिः संस्तुतो हयः । जगाम राज्ञो नगरे सुरथस्य मनोहरे

aṃgavaṃgakaliṃgānāṃ rājabhiḥ saṃstuto hayaḥ | jagāma rājño nagare surathasya manohare

Sanskrit only: no published translation is held for this verse.

कुंडलं नाम नगरमदितेर्यत्र कुंडलम् । कर्णयोः पतितं भूमौ हर्षभयसुकंपयोः

kuṃḍalaṃ nāma nagaramaditeryatra kuṃḍalam | karṇayoḥ patitaṃ bhūmau harṣabhayasukaṃpayoḥ

Sanskrit only: no published translation is held for this verse.

यत्र धर्मव्यतिक्रांतिं न करोति कदापिना । श्रीरामस्मरणं प्रेम्णा करोति जनतान्वहम्

yatra dharmavyatikrāṃtiṃ na karoti kadāpinā | śrīrāmasmaraṇaṃ premṇā karoti janatānvaham

Sanskrit only: no published translation is held for this verse.

अश्वत्थानां तु यत्रार्चा तुलस्याः प्रत्यहं नृभिः । क्रियते रघुनाथस्य सेवकैः पापवर्जितैः

aśvatthānāṃ tu yatrārcā tulasyāḥ pratyahaṃ nṛbhiḥ | kriyate raghunāthasya sevakaiḥ pāpavarjitaiḥ

Sanskrit only: no published translation is held for this verse.

यत्र देवालया रम्या राघवप्रतिमायुताः । पूज्यंते प्रत्यहं शुद्धचित्तैः कपटवर्जितैः

yatra devālayā ramyā rāghavapratimāyutāḥ | pūjyaṃte pratyahaṃ śuddhacittaiḥ kapaṭavarjitaiḥ

Sanskrit only: no published translation is held for this verse.

वाचि नाम हरेर्यत्र न वै कलहसंकथा । हृदि ध्यानं तु तस्यैव न च कामफलस्मृतिः

vāci nāma hareryatra na vai kalahasaṃkathā | hṛdi dhyānaṃ tu tasyaiva na ca kāmaphalasmṛtiḥ

Sanskrit only: no published translation is held for this verse.

देवनं यत्र रामस्य वार्त्ताभिः पूतदेहिनाम् । न जातुचिन्नृणामस्ति सत्यव्यसनमानिनाम्

devanaṃ yatra rāmasya vārttābhiḥ pūtadehinām | na jātucinnṛṇāmasti satyavyasanamāninām

Sanskrit only: no published translation is held for this verse.

तस्मिन्वसति धर्मात्मा सुरथः सत्यवान्बली । रघुनाथपदस्मारहृष्टचित्तः परोन्मदः

tasminvasati dharmātmā surathaḥ satyavānbalī | raghunāthapadasmārahṛṣṭacittaḥ paronmadaḥ

Sanskrit only: no published translation is held for this verse.

किं वर्णयामि रामस्य सेवकं सुरथं वरम् । यस्याशेषगुणा भूमौ विस्तृताः पावयंत्यघम्

kiṃ varṇayāmi rāmasya sevakaṃ surathaṃ varam | yasyāśeṣaguṇā bhūmau vistṛtāḥ pāvayaṃtyagham

Sanskrit only: no published translation is held for this verse.

सेवकास्तस्य भूपस्य पर्यटंतः कदाचन । अपश्यन्हयमेधस्य हयं चंदनचर्चितम्

sevakāstasya bhūpasya paryaṭaṃtaḥ kadācana | apaśyanhayamedhasya hayaṃ caṃdanacarcitam

Sanskrit only: no published translation is held for this verse.

ते दृष्ट्वा विस्मयं प्राप्ता हयपत्रमलोकयन् । स्पष्टाक्षरसमायुक्तं चंदनादिकचर्चितम्

te dṛṣṭvā vismayaṃ prāptā hayapatramalokayan | spaṣṭākṣarasamāyuktaṃ caṃdanādikacarcitam

Sanskrit only: no published translation is held for this verse.

ज्ञात्वा रामेण संमुक्तं हयं नेत्रमनोहरम् । हृष्टा राज्ञे सभास्थाय कथयामासुरुत्सुकाः

jñātvā rāmeṇa saṃmuktaṃ hayaṃ netramanoharam | hṛṣṭā rājñe sabhāsthāya kathayāmāsurutsukāḥ

Sanskrit only: no published translation is held for this verse.

स्वामिन्नयोध्यानगरीपतिस्तस्यास्तु राघवः । हयमेधक्रतोर्योग्यो हयो मुक्तः परिभ्रमन्

svāminnayodhyānagarīpatistasyāstu rāghavaḥ | hayamedhakratoryogyo hayo muktaḥ paribhraman

Sanskrit only: no published translation is held for this verse.

स ते पुरस्य निकटे प्राप्तः सेवकसंयुतः । गृहाण त्वं महाराज हयं तं सुमनोहरम्

sa te purasya nikaṭe prāptaḥ sevakasaṃyutaḥ | gṛhāṇa tvaṃ mahārāja hayaṃ taṃ sumanoharam

Sanskrit only: no published translation is held for this verse.

शेष उवाच। इति श्रुत्वा निजप्रोक्तं वाक्यं हर्षपरिप्लुतः । उवाच वीरान्बलिनो मेघगंभीरया गिरा

śeṣa uvāca| iti śrutvā nijaproktaṃ vākyaṃ harṣapariplutaḥ | uvāca vīrānbalino meghagaṃbhīrayā girā

Sanskrit only: no published translation is held for this verse.

सुरथ उवाच। धन्या वयं राममुखं पश्यामः सह सेवकाः । ग्रहीष्यामि हयं तस्य भटकोटिपरीवृतम्

suratha uvāca| dhanyā vayaṃ rāmamukhaṃ paśyāmaḥ saha sevakāḥ | grahīṣyāmi hayaṃ tasya bhaṭakoṭiparīvṛtam

Sanskrit only: no published translation is held for this verse.

तदा मोक्ष्यामि वाहं तं यदा रामः समाव्रजेत् । कृतार्थं मम भक्तस्य चिरं ध्यानरतस्य वै

tadā mokṣyāmi vāhaṃ taṃ yadā rāmaḥ samāvrajet | kṛtārthaṃ mama bhaktasya ciraṃ dhyānaratasya vai

Sanskrit only: no published translation is held for this verse.

शेष उवाच। इत्थमुक्त्वा महीपालः सेवकान्स्वयमादिशत् । गृह्णंतु वाहं प्रसभं मोच्यो नाश्वोऽक्षिगोचरः

śeṣa uvāca| itthamuktvā mahīpālaḥ sevakānsvayamādiśat | gṛhṇaṃtu vāhaṃ prasabhaṃ mocyo nāśvo'kṣigocaraḥ

Sanskrit only: no published translation is held for this verse.

अनेन सुमहाँल्लाभो भविष्यति तु मे मतम् । यद्रामचरणौ प्रेक्षे ब्रह्मशक्रादिदुर्ल्लभौ

anena sumahā~llābho bhaviṣyati tu me matam | yadrāmacaraṇau prekṣe brahmaśakrādidurllabhau

Sanskrit only: no published translation is held for this verse.

स एव धन्यः स्वजनः पुत्रो वा बांधवोऽथवा । पशुर्वा वाहनं वापि रामाप्तिर्येन संभवेत्

sa eva dhanyaḥ svajanaḥ putro vā bāṃdhavo'thavā | paśurvā vāhanaṃ vāpi rāmāptiryena saṃbhavet

Sanskrit only: no published translation is held for this verse.

तस्माद्गृहीत्वा क्रत्वश्वं स्वर्णपत्रेण शोभितम् । बध्नंतु वाजिशालायां कामवेगं मनोरमम्

tasmādgṛhītvā kratvaśvaṃ svarṇapatreṇa śobhitam | badhnaṃtu vājiśālāyāṃ kāmavegaṃ manoramam

Sanskrit only: no published translation is held for this verse.

इत्युक्तास्ते ततो गत्वा वाहं रामस्य शोभितम् । गृहीत्वा तरसा राज्ञे ददुः सर्वं शुभांगिनम्

ityuktāste tato gatvā vāhaṃ rāmasya śobhitam | gṛhītvā tarasā rājñe daduḥ sarvaṃ śubhāṃginam

Sanskrit only: no published translation is held for this verse.

राजा प्राप्य मुदा चाश्वं रामस्य दनुजार्दनः । सेवकान्प्राह बलिनो धर्मकृत्यविचक्षणः

rājā prāpya mudā cāśvaṃ rāmasya danujārdanaḥ | sevakānprāha balino dharmakṛtyavicakṣaṇaḥ

Sanskrit only: no published translation is held for this verse.

वात्स्यायन महाबुद्धे शृणुष्वैकाग्रमानसः । न तस्य विषये कश्चित्परदाररतो नरः

vātsyāyana mahābuddhe śṛṇuṣvaikāgramānasaḥ | na tasya viṣaye kaścitparadārarato naraḥ

Sanskrit only: no published translation is held for this verse.

न परद्रव्यनिरतो न च कामेषु लंपटः । न जिह्वाभिरतोन्मार्गे कीर्त्तयेद्रामकीर्तनात्

na paradravyanirato na ca kāmeṣu laṃpaṭaḥ | na jihvābhiratonmārge kīrttayedrāmakīrtanāt

Sanskrit only: no published translation is held for this verse.

यः सेवकान्नृपो वक्ति यूयं सेवार्थमागताः । कथयंतु भवच्चेष्टां धर्मकर्मविशारदाः

yaḥ sevakānnṛpo vakti yūyaṃ sevārthamāgatāḥ | kathayaṃtu bhavacceṣṭāṃ dharmakarmaviśāradāḥ

Sanskrit only: no published translation is held for this verse.

एकपत्नीव्रतधरा न परद्रव्यलोलुपाः । परापवादानिरता न च वेदोत्पथं गताः

ekapatnīvratadharā na paradravyalolupāḥ | parāpavādāniratā na ca vedotpathaṃ gatāḥ

Sanskrit only: no published translation is held for this verse.

श्रीरामस्मरणादीनि कुर्वंति प्रत्यहं भटाः । तानहं रामसेवार्थं रक्षाम्यंतक कोपवान्

śrīrāmasmaraṇādīni kurvaṃti pratyahaṃ bhaṭāḥ | tānahaṃ rāmasevārthaṃ rakṣāmyaṃtaka kopavān

Sanskrit only: no published translation is held for this verse.

एतद्विरुद्धधर्माणो ये नराः पापसंयुताः । तानहं विषये मह्यं वासयामि न दुर्मतीन्

etadviruddhadharmāṇo ye narāḥ pāpasaṃyutāḥ | tānahaṃ viṣaye mahyaṃ vāsayāmi na durmatīn

Sanskrit only: no published translation is held for this verse.

तस्य देशे न पापिष्ठाः पापं कुर्वंति मानसे । हरिध्यानहताशेष पातकामोदसंयुताः

tasya deśe na pāpiṣṭhāḥ pāpaṃ kurvaṃti mānase | haridhyānahatāśeṣa pātakāmodasaṃyutāḥ

Sanskrit only: no published translation is held for this verse.

यदैवमभवद्देशो राजा धर्मेण संयुतः । तदा तत्स्था नराः सर्वे मृता गच्छंति निर्वृतिम्

yadaivamabhavaddeśo rājā dharmeṇa saṃyutaḥ | tadā tatsthā narāḥ sarve mṛtā gacchaṃti nirvṛtim

Sanskrit only: no published translation is held for this verse.

यमानुचरनिर्वेशो नाभवत्सौरथे पुरे । तदा यमो मुनेरूपं धृत्वा प्रागान्महीश्वरम्

yamānucaranirveśo nābhavatsaurathe pure | tadā yamo munerūpaṃ dhṛtvā prāgānmahīśvaram

Sanskrit only: no published translation is held for this verse.

वल्कलांबरधारी च जटाशोभितशीर्षकः । सुरथं तु सभामध्ये ददर्श हरिसेवकम्

valkalāṃbaradhārī ca jaṭāśobhitaśīrṣakaḥ | surathaṃ tu sabhāmadhye dadarśa harisevakam

Sanskrit only: no published translation is held for this verse.

तुलसीमस्तके यस्य वाचि नाम हरेः परम् । धर्मकर्मरतां वार्त्तां श्रावयंतं निजाञ्जनान्

tulasīmastake yasya vāci nāma hareḥ param | dharmakarmaratāṃ vārttāṃ śrāvayaṃtaṃ nijāñjanān

Sanskrit only: no published translation is held for this verse.

तदा मुनिं नृपो दृष्ट्वा तपोमूर्तिमिव स्थितम् । ववंदे चरणौ तस्य पाद्यादिकमथाकरोत्

tadā muniṃ nṛpo dṛṣṭvā tapomūrtimiva sthitam | vavaṃde caraṇau tasya pādyādikamathākarot

Sanskrit only: no published translation is held for this verse.

सुखोपविष्टं विश्रांतं मुनिं प्राह नृपाग्रणीः । धन्यमद्य जनुर्मह्यं धन्यमद्य गृहं मम

sukhopaviṣṭaṃ viśrāṃtaṃ muniṃ prāha nṛpāgraṇīḥ | dhanyamadya janurmahyaṃ dhanyamadya gṛhaṃ mama

Sanskrit only: no published translation is held for this verse.

कथाः कथयतान्मह्यं रामस्य विविधा वराः । याः शृण्वतां पापहानिर्भविष्यति पदे पदे

kathāḥ kathayatānmahyaṃ rāmasya vividhā varāḥ | yāḥ śṛṇvatāṃ pāpahānirbhaviṣyati pade pade

Sanskrit only: no published translation is held for this verse.

इत्थमुक्तं समाकर्ण्य जहास स मुनिर्भृशम् । दंतान्प्रदर्शयन्सर्वांस्तालास्फालितपाणिकः

itthamuktaṃ samākarṇya jahāsa sa munirbhṛśam | daṃtānpradarśayansarvāṃstālāsphālitapāṇikaḥ

Sanskrit only: no published translation is held for this verse.

हसंतं तं मुनिं प्राह हसने कारणं किमु । कथयस्व प्रसादेन यथा स्यान्मनसः सुखम्

hasaṃtaṃ taṃ muniṃ prāha hasane kāraṇaṃ kimu | kathayasva prasādena yathā syānmanasaḥ sukham

Sanskrit only: no published translation is held for this verse.

ततो मुनिर्नृपं प्राह शृणु राजन्धियायुतः । यदहं तेऽभिधास्यामि स्मिते कारणमुत्तमम्

tato munirnṛpaṃ prāha śṛṇu rājandhiyāyutaḥ | yadahaṃ te'bhidhāsyāmi smite kāraṇamuttamam

Sanskrit only: no published translation is held for this verse.

त्वया प्रोक्तं हरेः कीर्तिं कथयस्व ममाग्रतः । को हरिः कस्य वा कीर्तिः सर्वे कर्मवशा नराः

tvayā proktaṃ hareḥ kīrtiṃ kathayasva mamāgrataḥ | ko hariḥ kasya vā kīrtiḥ sarve karmavaśā narāḥ

Sanskrit only: no published translation is held for this verse.

कर्मणा प्राप्यते स्वर्गः कर्मणा नरकं व्रजेत् । कर्मणैव भवेत्सर्वं पुत्रपौत्रादिकं बहु

karmaṇā prāpyate svargaḥ karmaṇā narakaṃ vrajet | karmaṇaiva bhavetsarvaṃ putrapautrādikaṃ bahu

Sanskrit only: no published translation is held for this verse.

शक्रः शतं क्रतूनां तु कृत्वागात्परमं पदम् । ब्रह्मापि कर्मणा लोकं प्राप्य सत्याख्यमद्भुतम्

śakraḥ śataṃ kratūnāṃ tu kṛtvāgātparamaṃ padam | brahmāpi karmaṇā lokaṃ prāpya satyākhyamadbhutam

Sanskrit only: no published translation is held for this verse.

अनेके कर्मणा सिद्धा मरुदादय ईशिनः । कुर्वन्ति भोगसौख्यं च अप्सरोगणसेविताः

aneke karmaṇā siddhā marudādaya īśinaḥ | kurvanti bhogasaukhyaṃ ca apsarogaṇasevitāḥ

Sanskrit only: no published translation is held for this verse.

तस्मात्कुरुष्व यज्ञादीन्यजस्व किल देवताः । यथा ते विमलाकीर्तिर्भविष्यति महीतले

tasmātkuruṣva yajñādīnyajasva kila devatāḥ | yathā te vimalākīrtirbhaviṣyati mahītale

Sanskrit only: no published translation is held for this verse.

इति श्रुत्वा तु तद्वाक्यं कोपक्षुभितमानसः । उवाच रामैकमना विप्रं कर्मविशारदम्

iti śrutvā tu tadvākyaṃ kopakṣubhitamānasaḥ | uvāca rāmaikamanā vipraṃ karmaviśāradam

Sanskrit only: no published translation is held for this verse.

मा ब्रूहि कर्मणो वार्तां क्षयिष्णुफलदायिनीम् । गच्छ मन्नगरोपांताद्बहिर्लोकविगर्हितः

mā brūhi karmaṇo vārtāṃ kṣayiṣṇuphaladāyinīm | gaccha mannagaropāṃtādbahirlokavigarhitaḥ

Sanskrit only: no published translation is held for this verse.

इंद्रः पतिष्यति क्षिप्रं पतिष्यत्यपि पद्मजः । न पतिष्यंति मनुजा रामस्य भजनोत्सुकाः

iṃdraḥ patiṣyati kṣipraṃ patiṣyatyapi padmajaḥ | na patiṣyaṃti manujā rāmasya bhajanotsukāḥ

Sanskrit only: no published translation is held for this verse.

पश्य ध्रुवं च प्रह्लादं बिभीषणमथाद्भुतम् । ये चान्ये रामभक्ता वै कदापि न पतंति ते

paśya dhruvaṃ ca prahlādaṃ bibhīṣaṇamathādbhutam | ye cānye rāmabhaktā vai kadāpi na pataṃti te

Sanskrit only: no published translation is held for this verse.

ये रामनिंदका दुष्टास्तानि मे यमकिंकराः । ताडयिष्यंति लोहस्य मुद्गरैः पाशबन्धनैः

ye rāmaniṃdakā duṣṭāstāni me yamakiṃkarāḥ | tāḍayiṣyaṃti lohasya mudgaraiḥ pāśabandhanaiḥ

Sanskrit only: no published translation is held for this verse.

ब्राह्मणत्वाद्देहदंडं न कुर्यां ते द्विजाधम । गच्छ गच्छ मदालोकात्ताडयिष्यामि चान्यथा

brāhmaṇatvāddehadaṃḍaṃ na kuryāṃ te dvijādhama | gaccha gaccha madālokāttāḍayiṣyāmi cānyathā

Sanskrit only: no published translation is held for this verse.

इत्थमुक्तवति श्रेष्ठे भूपे सुरथसंज्ञिते । सेवका बाहुना धृत्वा निष्कासयितुमुद्यताः

itthamuktavati śreṣṭhe bhūpe surathasaṃjñite | sevakā bāhunā dhṛtvā niṣkāsayitumudyatāḥ

Sanskrit only: no published translation is held for this verse.

तदा यमो निजं रूपं धृत्वा लोकैकवंदितम् । प्राह भूपं प्रतुष्टोऽस्मि याचस्व हरिसेवक

tadā yamo nijaṃ rūpaṃ dhṛtvā lokaikavaṃditam | prāha bhūpaṃ pratuṣṭo'smi yācasva harisevaka

Sanskrit only: no published translation is held for this verse.

मया प्रलोभितो वाग्भिर्बह्वीभिरपि सुव्रत । चलितोसि न रामस्य सेवायाः साधुसेवितः

mayā pralobhito vāgbhirbahvībhirapi suvrata | calitosi na rāmasya sevāyāḥ sādhusevitaḥ

Sanskrit only: no published translation is held for this verse.

तदा प्रोवाच भूमीशो यमं दृष्ट्वा सुतोषितम् । उवाच यदि तुष्टोसि देहि मे वरमुत्तमम्

tadā provāca bhūmīśo yamaṃ dṛṣṭvā sutoṣitam | uvāca yadi tuṣṭosi dehi me varamuttamam

Sanskrit only: no published translation is held for this verse.

तावन्मम न वै मृत्युर्यावद्रामसमागमः । न भयं मे भवत्तो हि कदाचन हि धर्मराट्

tāvanmama na vai mṛtyuryāvadrāmasamāgamaḥ | na bhayaṃ me bhavatto hi kadācana hi dharmarāṭ

Sanskrit only: no published translation is held for this verse.

तदोवाच यमो भूपमिदं तव भविष्यति । सर्वं त्वदीप्सितं तथ्यं करिष्यति रघोःपतिः

tadovāca yamo bhūpamidaṃ tava bhaviṣyati | sarvaṃ tvadīpsitaṃ tathyaṃ kariṣyati raghoḥpatiḥ

Sanskrit only: no published translation is held for this verse.

इत्युक्त्वांतर्हितो धर्मो जगाम स्वपुरं प्रति । प्रशस्य तस्य चरितं हरिभक्तिपरात्मनः

ityuktvāṃtarhito dharmo jagāma svapuraṃ prati | praśasya tasya caritaṃ haribhaktiparātmanaḥ

Sanskrit only: no published translation is held for this verse.

स राजा धार्मिको रामसेवकः परया मुदा । गृहीत्वाश्वं प्रत्युवाच सेवकान्हरिसेवकान्

sa rājā dhārmiko rāmasevakaḥ parayā mudā | gṛhītvāśvaṃ pratyuvāca sevakānharisevakān

Sanskrit only: no published translation is held for this verse.

मया गृहीतो वाहोऽसौ राघवस्य महीपतेः । सज्जी भवंतु सर्वत्र यूयं रणविशारदाः

mayā gṛhīto vāho'sau rāghavasya mahīpateḥ | sajjī bhavaṃtu sarvatra yūyaṃ raṇaviśāradāḥ

Sanskrit only: no published translation is held for this verse.

इति प्रोक्तास्तु ते सर्वे भटा राज्ञो महाबलाः । सज्जीभूताः क्षणादेव सभायां जग्मुरुत्सुकाः

iti proktāstu te sarve bhaṭā rājño mahābalāḥ | sajjībhūtāḥ kṣaṇādeva sabhāyāṃ jagmurutsukāḥ

Sanskrit only: no published translation is held for this verse.

राज्ञो वीरा दशसुताश्चंपको मोहकस्तथा । रिपुंजयोऽतिदुर्वारः प्रतापीबलमोदकः

rājño vīrā daśasutāścaṃpako mohakastathā | ripuṃjayo'tidurvāraḥ pratāpībalamodakaḥ

Sanskrit only: no published translation is held for this verse.

हर्यक्षः सहदेवश्च भूरिदेवः सुतापनः । इति राज्ञो दश सुताः सज्जीभूता रणांगणे

haryakṣaḥ sahadevaśca bhūridevaḥ sutāpanaḥ | iti rājño daśa sutāḥ sajjībhūtā raṇāṃgaṇe

Sanskrit only: no published translation is held for this verse.

यातुमिच्छामकुर्वंस्ते महोत्साहसमन्विताः । राजापि स्वरथं चित्रं हेमशोभाविनिर्मितम्

yātumicchāmakurvaṃste mahotsāhasamanvitāḥ | rājāpi svarathaṃ citraṃ hemaśobhāvinirmitam

Sanskrit only: no published translation is held for this verse.

आह्वयामास सुजवैर्वाजिभिः समलंकृतम् । रणोत्साहेन संयुक्तः सर्वसैन्यपरीवृतः

āhvayāmāsa sujavairvājibhiḥ samalaṃkṛtam | raṇotsāhena saṃyuktaḥ sarvasainyaparīvṛtaḥ

Sanskrit only: no published translation is held for this verse.

सभायां सेवकान्सर्वान्दिशन्नास्ते महीपतिः

sabhāyāṃ sevakānsarvāndiśannāste mahīpatiḥ

Sanskrit only: no published translation is held for this verse.