Padma Purāṇa 5.8

शेष उवाच। वात्स्यायनमुनिश्रेष्ठ कथा पापप्रणाशिनी । ब्रह्मण्यदेवदेवस्य सर्वधर्मैकरक्षितुः

śeṣa uvāca| vātsyāyanamuniśreṣṭha kathā pāpapraṇāśinī | brahmaṇyadevadevasya sarvadharmaikarakṣituḥ

Sanskrit only: no published translation is held for this verse.

राजानं मूर्च्छितं दृष्ट्वा कुंभजन्मा तपोनिधिः । शनैःशनैः करेणाशु पस्पर्शाश्रु जगाद च

rājānaṃ mūrcchitaṃ dṛṣṭvā kuṃbhajanmā taponidhiḥ | śanaiḥśanaiḥ kareṇāśu pasparśāśru jagāda ca

Sanskrit only: no published translation is held for this verse.

भो रामाश्वसिहि क्षिप्रं किमर्थमवसीदसि । भवान्दैत्यकुलच्छेत्ता महाविष्णुः सनातनः

bho rāmāśvasihi kṣipraṃ kimarthamavasīdasi | bhavāndaityakulacchettā mahāviṣṇuḥ sanātanaḥ

Sanskrit only: no published translation is held for this verse.

भूतं भव्यं भवच्चैव जगत्स्थास्नु चरिष्णु च । त्वदृते नास्ति संचारी किमर्थमिह मूर्च्छितः

bhūtaṃ bhavyaṃ bhavaccaiva jagatsthāsnu cariṣṇu ca | tvadṛte nāsti saṃcārī kimarthamiha mūrcchitaḥ

Sanskrit only: no published translation is held for this verse.

श्रुत्वा वाक्यं महाराजः कुंभजन्मसमीरितम् । उत्तस्थौ विगलन्नेत्र बाष्पपूरितसन्मुखः

śrutvā vākyaṃ mahārājaḥ kuṃbhajanmasamīritam | uttasthau vigalannetra bāṣpapūritasanmukhaḥ

Sanskrit only: no published translation is held for this verse.

उवाच दीनदीनं च विस्पष्टाक्षरविस्तरम् । त्रपाभर नमन्मूर्तिर्ब्रह्मद्रोहपराङ्मुखः

uvāca dīnadīnaṃ ca vispaṣṭākṣaravistaram | trapābhara namanmūrtirbrahmadrohaparāṅmukhaḥ

Sanskrit only: no published translation is held for this verse.

श्रीराम उवाच। अहो मे पश्यता ज्ञानं विमूढस्य दुरात्मनः । यद्ब्राह्मणकुले रूढं हतवान्कामलोलुपः

śrīrāma uvāca| aho me paśyatā jñānaṃ vimūḍhasya durātmanaḥ | yadbrāhmaṇakule rūḍhaṃ hatavānkāmalolupaḥ

Sanskrit only: no published translation is held for this verse.

महिलार्थे त्वहं विप्रं वेदशास्त्रविवेकवान् । हतवान्वाडवकुलं बुद्धिहीनोति दुर्मतिः

mahilārthe tvahaṃ vipraṃ vedaśāstravivekavān | hatavānvāḍavakulaṃ buddhihīnoti durmatiḥ

Sanskrit only: no published translation is held for this verse.

इक्ष्वाकूणां कुले जातु ब्राह्मणो न दुरुक्तिभाक् । ईदृशं कुर्वता कर्म मयैतत्सुकलंकितम्

ikṣvākūṇāṃ kule jātu brāhmaṇo na duruktibhāk | īdṛśaṃ kurvatā karma mayaitatsukalaṃkitam

Sanskrit only: no published translation is held for this verse.

ये ब्राह्मणास्तु पूजार्हा दानसम्मानभोजनैः । ते मया निहता विप्राः शरसंघातसंहितैः

ye brāhmaṇāstu pūjārhā dānasammānabhojanaiḥ | te mayā nihatā viprāḥ śarasaṃghātasaṃhitaiḥ

Sanskrit only: no published translation is held for this verse.

काँल्लोकान्नु गमिष्यामि कुंभीपाकोऽपि दुःसहः । न तादृशं तीर्थमस्ति यन्मां पावयितुं क्षमम्

kā~llokānnu gamiṣyāmi kuṃbhīpāko'pi duḥsahaḥ | na tādṛśaṃ tīrthamasti yanmāṃ pāvayituṃ kṣamam

Sanskrit only: no published translation is held for this verse.

न यज्ञो न तपो दानं न वा चैव व्रतादिकम् । यत्तु वै ब्राह्मणद्रोग्धुर्ममपावनतारकम्

na yajño na tapo dānaṃ na vā caiva vratādikam | yattu vai brāhmaṇadrogdhurmamapāvanatārakam

Sanskrit only: no published translation is held for this verse.

यैः कोपितं ब्रह्मकुलं नरैर्निरयगामिभिः । ते नरा बहुशो दुःखं भोक्ष्यंति निरयं गताः

yaiḥ kopitaṃ brahmakulaṃ narairnirayagāmibhiḥ | te narā bahuśo duḥkhaṃ bhokṣyaṃti nirayaṃ gatāḥ

Sanskrit only: no published translation is held for this verse.

वेदा मूलं तु धर्माणां वर्णाश्रमविवेकिनाम् । तन्मूलं ब्राह्मणकुलं सर्ववेदैकशाखिनः

vedā mūlaṃ tu dharmāṇāṃ varṇāśramavivekinām | tanmūlaṃ brāhmaṇakulaṃ sarvavedaikaśākhinaḥ

Sanskrit only: no published translation is held for this verse.

मूलच्छेत्तुर्ममौद्धत्यात्को लोकोनु भविष्यति । किमद्यकरणीयं वै येन मे हि शिवं भवेत्

mūlacchetturmamauddhatyātko lokonu bhaviṣyati | kimadyakaraṇīyaṃ vai yena me hi śivaṃ bhavet

Sanskrit only: no published translation is held for this verse.

शेष उवाच। विलपंतं भृशं रामं राजेंद्रं रघुपुंगवम् । मायामनुष्यवपुषं कुंभजन्माब्रवीद्वचः

śeṣa uvāca| vilapaṃtaṃ bhṛśaṃ rāmaṃ rājeṃdraṃ raghupuṃgavam | māyāmanuṣyavapuṣaṃ kuṃbhajanmābravīdvacaḥ

Sanskrit only: no published translation is held for this verse.

अगस्त्य उवाच। मा विषादं महाधीर कुरु राजन्महामते । न ते ब्राह्मणहत्या स्याद्दुष्टानां नाशमिच्छतः

agastya uvāca| mā viṣādaṃ mahādhīra kuru rājanmahāmate | na te brāhmaṇahatyā syādduṣṭānāṃ nāśamicchataḥ

Sanskrit only: no published translation is held for this verse.

त्वं पुराणः पुमान्साक्षादीश्वरः प्रकृतेः परः । कर्ता हर्ताऽविता साक्षी निर्गुणः स्वेच्छया गुणी

tvaṃ purāṇaḥ pumānsākṣādīśvaraḥ prakṛteḥ paraḥ | kartā hartā'vitā sākṣī nirguṇaḥ svecchayā guṇī

Sanskrit only: no published translation is held for this verse.

सुरापो ब्रह्महत्याकृत्स्वर्णस्तेयी महाघकृत् । सर्वे त्वन्नामवादेन पूताः शीघ्रं भवंति हि

surāpo brahmahatyākṛtsvarṇasteyī mahāghakṛt | sarve tvannāmavādena pūtāḥ śīghraṃ bhavaṃti hi

Sanskrit only: no published translation is held for this verse.

इयं देवी जनकजा महाविद्या महामते । यस्याः स्मरणमात्रेण मुक्ता यास्यंति सद्गतिम्

iyaṃ devī janakajā mahāvidyā mahāmate | yasyāḥ smaraṇamātreṇa muktā yāsyaṃti sadgatim

Sanskrit only: no published translation is held for this verse.

रावणोऽपि न वै दैत्यो वैकुंठे तव सेवकः । ऋषीणां शापतोऽवाप्तो दैत्यत्वं दनुजांतक

rāvaṇo'pi na vai daityo vaikuṃṭhe tava sevakaḥ | ṛṣīṇāṃ śāpato'vāpto daityatvaṃ danujāṃtaka

Sanskrit only: no published translation is held for this verse.

तस्यानुग्रहकर्ता त्वं न तु हंता द्विजन्मनः । एवं संचिंत्य मा भूयो निजं शोचितुमर्हसि

tasyānugrahakartā tvaṃ na tu haṃtā dvijanmanaḥ | evaṃ saṃciṃtya mā bhūyo nijaṃ śocitumarhasi

Sanskrit only: no published translation is held for this verse.

इति श्रुत्वा ततो वाक्यं रामः परपुरंजयः । उवाच मधुरं वाक्यं गद्गदस्वरभाषितम्

iti śrutvā tato vākyaṃ rāmaḥ parapuraṃjayaḥ | uvāca madhuraṃ vākyaṃ gadgadasvarabhāṣitam

Sanskrit only: no published translation is held for this verse.

श्रीराम उवाच। पातकं द्विविधं प्रोक्तं ज्ञाताज्ञातविभेदतः । ज्ञातं यद्बुद्धिपूर्वं हि अज्ञातं तद्विवर्जितम्

śrīrāma uvāca| pātakaṃ dvividhaṃ proktaṃ jñātājñātavibhedataḥ | jñātaṃ yadbuddhipūrvaṃ hi ajñātaṃ tadvivarjitam

Sanskrit only: no published translation is held for this verse.

बुद्धिपूर्वं कृतं कर्म भोगेनैव विनश्यति । नश्येदनुशयादन्यदिदं शास्त्रविनिश्चितम्

buddhipūrvaṃ kṛtaṃ karma bhogenaiva vinaśyati | naśyedanuśayādanyadidaṃ śāstraviniścitam

Sanskrit only: no published translation is held for this verse.

कुर्वतो बुद्धिपूर्वं मे ब्रह्महत्यां सुनिंदिताम् । न मे दुःखापनोदाय साधुवादः सुसंमतः

kurvato buddhipūrvaṃ me brahmahatyāṃ suniṃditām | na me duḥkhāpanodāya sādhuvādaḥ susaṃmataḥ

Sanskrit only: no published translation is held for this verse.

प्रब्रूहि तादृशं मह्यं यादृशं पापदाहकम् । व्रतं दानं मखं किंचित्तीर्थमाराधनं महत्

prabrūhi tādṛśaṃ mahyaṃ yādṛśaṃ pāpadāhakam | vrataṃ dānaṃ makhaṃ kiṃcittīrthamārādhanaṃ mahat

Sanskrit only: no published translation is held for this verse.

येन मे विमला कीर्तिर्लोकान्वै पावयिष्यति । पापाचाराप्तकालुष्यान्ब्रह्महत्याहतप्रभान्

yena me vimalā kīrtirlokānvai pāvayiṣyati | pāpācārāptakāluṣyānbrahmahatyāhataprabhān

Sanskrit only: no published translation is held for this verse.

शेष उवाच। इत्युक्तवंतं तं रामं जगाद स तपोनिधिः । सुरासुरनमन्मौलि मणिनीराजितांघ्रिकम्

śeṣa uvāca| ityuktavaṃtaṃ taṃ rāmaṃ jagāda sa taponidhiḥ | surāsuranamanmauli maṇinīrājitāṃghrikam

Sanskrit only: no published translation is held for this verse.

शृणु राम महावीर लोकानुग्रहकारक । विप्रहत्यापनोदाय तव यद्वचनं ब्रुवे

śṛṇu rāma mahāvīra lokānugrahakāraka | viprahatyāpanodāya tava yadvacanaṃ bruve

Sanskrit only: no published translation is held for this verse.

सर्वं स पापं तरति योऽश्वमेधं यजेत वै । तस्मात्त्वं यज विश्वात्मन्वाजिमेधेन शोभिना

sarvaṃ sa pāpaṃ tarati yo'śvamedhaṃ yajeta vai | tasmāttvaṃ yaja viśvātmanvājimedhena śobhinā

Sanskrit only: no published translation is held for this verse.

सप्ततंतुर्महीभर्त्रा त्वया साध्यो मनीषिणा । महासमृद्धियुक्तेन महाबलसुशालिना

saptataṃturmahībhartrā tvayā sādhyo manīṣiṇā | mahāsamṛddhiyuktena mahābalasuśālinā

Sanskrit only: no published translation is held for this verse.

स वाजिमेधो विप्राणां हत्यायाः पापनोदनः । कृतवान्यं महाराजो दिलीपस्तव पूर्वजः

sa vājimedho viprāṇāṃ hatyāyāḥ pāpanodanaḥ | kṛtavānyaṃ mahārājo dilīpastava pūrvajaḥ

Sanskrit only: no published translation is held for this verse.

शतक्रतुः शतं कृत्वा क्रतूनां पुरुषर्षभः । पदमापामरावत्यां देवदैत्यसुसेवितम्

śatakratuḥ śataṃ kṛtvā kratūnāṃ puruṣarṣabhaḥ | padamāpāmarāvatyāṃ devadaityasusevitam

Sanskrit only: no published translation is held for this verse.

मनुश्च सगरो राजा मरुत्तो नहुषात्मजः । एते ते पूर्वजाः सर्वे यज्ञं कृत्वा पदं गताः

manuśca sagaro rājā marutto nahuṣātmajaḥ | ete te pūrvajāḥ sarve yajñaṃ kṛtvā padaṃ gatāḥ

Sanskrit only: no published translation is held for this verse.

तस्मात्त्वं कुरु राजेंद्र समर्थोऽसि समंततः । भ्रातरो लोकपालाभा वर्तंते तव भावुकाः

tasmāttvaṃ kuru rājeṃdra samartho'si samaṃtataḥ | bhrātaro lokapālābhā vartaṃte tava bhāvukāḥ

Sanskrit only: no published translation is held for this verse.

इत्युक्तमाकर्ण्य मुनेः स भाग्यवान् रघूत्तमो ब्राह्मणघातभीतः । पप्रच्छ यागे सुमतिं चिकीर्षन्विधिं पुरावित्परिगीयमानः

ityuktamākarṇya muneḥ sa bhāgyavān raghūttamo brāhmaṇaghātabhītaḥ | papraccha yāge sumatiṃ cikīrṣanvidhiṃ purāvitparigīyamānaḥ

Sanskrit only: no published translation is held for this verse.