Padma Purāṇa 5.81

ऋषय ऊचु- सूत जीव चिरं साधो श्रीकृष्णचरितामृतम् । त्वया प्रकाशितं सर्वं भक्तानां भवतारणम्

ṛṣaya ūcu- sūta jīva ciraṃ sādho śrīkṛṣṇacaritāmṛtam | tvayā prakāśitaṃ sarvaṃ bhaktānāṃ bhavatāraṇam

Sanskrit only: no published translation is held for this verse.

श्रीकृष्णलीलां निखिलां ब्रूहि दैनंदिनीं प्रभो । ययाकर्णितया साधो कृष्णे भक्तिर्विवर्द्धते

śrīkṛṣṇalīlāṃ nikhilāṃ brūhi dainaṃdinīṃ prabho | yayākarṇitayā sādho kṛṣṇe bhaktirvivarddhate

Sanskrit only: no published translation is held for this verse.

गुरोः शिष्यस्य मंत्रस्य विधानं लक्षणं पृथक् । वदास्माकं महाभाग त्वं हि नः परमः सुहृत्

guroḥ śiṣyasya maṃtrasya vidhānaṃ lakṣaṇaṃ pṛthak | vadāsmākaṃ mahābhāga tvaṃ hi naḥ paramaḥ suhṛt

Sanskrit only: no published translation is held for this verse.

सूत उवाच- एकदा यमुनातीरे समासीनं जगद्गुरुम् । नारदः प्रणिपत्याह देवदेवं सदाशिवम्

sūta uvāca- ekadā yamunātīre samāsīnaṃ jagadgurum | nāradaḥ praṇipatyāha devadevaṃ sadāśivam

Sanskrit only: no published translation is held for this verse.

नारद उवाच- देवदेव महादेव सर्वज्ञ जगदीश्वर । भगवद्धर्मतत्त्वज्ञ कृष्णमंत्रविदां वर

nārada uvāca- devadeva mahādeva sarvajña jagadīśvara | bhagavaddharmatattvajña kṛṣṇamaṃtravidāṃ vara

Sanskrit only: no published translation is held for this verse.

कृष्णमंत्रा मया लब्धास्त्वत्तो ये च पितुः परे । ते सर्वे साधितास्तत्वान्मंत्रराजादयो मया

kṛṣṇamaṃtrā mayā labdhāstvatto ye ca pituḥ pare | te sarve sādhitāstatvānmaṃtrarājādayo mayā

Sanskrit only: no published translation is held for this verse.

बहुवर्षसहस्रैस्तु शाकमूलफलाशिना । शुष्कपर्णांबुवाय्वादि भोजिना च निराशिना

bahuvarṣasahasraistu śākamūlaphalāśinā | śuṣkaparṇāṃbuvāyvādi bhojinā ca nirāśinā

Sanskrit only: no published translation is held for this verse.

स्त्रीणां संदर्शनालापवर्जिना भूमिशायिना । कामादिषड्गुणं जित्वा बाह्येंद्रियनियम्यता

strīṇāṃ saṃdarśanālāpavarjinā bhūmiśāyinā | kāmādiṣaḍguṇaṃ jitvā bāhyeṃdriyaniyamyatā

Sanskrit only: no published translation is held for this verse.

एवंकृतेऽपि नैवात्मा संतुष्टो मम शंकर । तद्ब्रूहि यत्प्रसिध्येत संस्काराद्यैर्विना प्रभो

evaṃkṛte'pi naivātmā saṃtuṣṭo mama śaṃkara | tadbrūhi yatprasidhyeta saṃskārādyairvinā prabho

Sanskrit only: no published translation is held for this verse.

सकृदुच्चारणादेव ददाति फलमुत्तमम् । यदि योग्योऽस्मि देवेश तदा मे कृपया वद

sakṛduccāraṇādeva dadāti phalamuttamam | yadi yogyo'smi deveśa tadā me kṛpayā vada

Sanskrit only: no published translation is held for this verse.

शिव उवाच- साधु पृष्टं महाभाग त्वया लोकहितैषिणा । सुगोप्यमपि वक्ष्यामि मंत्रचिंतामणिं तव

śiva uvāca- sādhu pṛṣṭaṃ mahābhāga tvayā lokahitaiṣiṇā | sugopyamapi vakṣyāmi maṃtraciṃtāmaṇiṃ tava

Sanskrit only: no published translation is held for this verse.

रहस्यानां रहस्यं यद्गुह्यानां गुह्यमुत्तमम् । न मया कथितं देव्यै नाग्रजेभ्यः पुरा तव

rahasyānāṃ rahasyaṃ yadguhyānāṃ guhyamuttamam | na mayā kathitaṃ devyai nāgrajebhyaḥ purā tava

Sanskrit only: no published translation is held for this verse.

वक्ष्यामि युगलं तुभ्यं कृष्णमंत्रमनुत्तमम् । मंत्रचिंतामणिर्नाम युगलं द्वयमेव च

vakṣyāmi yugalaṃ tubhyaṃ kṛṣṇamaṃtramanuttamam | maṃtraciṃtāmaṇirnāma yugalaṃ dvayameva ca

Sanskrit only: no published translation is held for this verse.

पर्याया अस्य मंत्रस्य तथा पंचपदीति च । गोपीजनपदं वल्लभां तं तु चरणानिति

paryāyā asya maṃtrasya tathā paṃcapadīti ca | gopījanapadaṃ vallabhāṃ taṃ tu caraṇāniti

Sanskrit only: no published translation is held for this verse.

शरणं च प्रपद्ये च एष पंचपदात्मकः । मंत्रचिंतामणिः प्रोक्तः षोडशार्णो महामनुः

śaraṇaṃ ca prapadye ca eṣa paṃcapadātmakaḥ | maṃtraciṃtāmaṇiḥ proktaḥ ṣoḍaśārṇo mahāmanuḥ

Sanskrit only: no published translation is held for this verse.

नमो गोपीजनेत्युक्त्वा वल्लभाभ्यां वदेत्ततः । पदद्वयात्मको मंत्रो दशार्णः खलु कथ्यते

namo gopījanetyuktvā vallabhābhyāṃ vadettataḥ | padadvayātmako maṃtro daśārṇaḥ khalu kathyate

Sanskrit only: no published translation is held for this verse.

एतां पंचपदीं जप्त्वा श्रद्धयाश्रद्धया सकृत् । कृष्णप्रियाणां सान्निध्यं गच्छत्येव न संशयः

etāṃ paṃcapadīṃ japtvā śraddhayāśraddhayā sakṛt | kṛṣṇapriyāṇāṃ sānnidhyaṃ gacchatyeva na saṃśayaḥ

Sanskrit only: no published translation is held for this verse.

न पुरश्चरणप्रेक्षा नास्य न्यासविधिक्रमः । न देशकालनियमो नारिमित्रादिशोधनम्

na puraścaraṇaprekṣā nāsya nyāsavidhikramaḥ | na deśakālaniyamo nārimitrādiśodhanam

Sanskrit only: no published translation is held for this verse.

सर्वेऽधिकारिणश्चात्र चंडालांता मुनीश्वर । स्त्रियः शूद्रादयश्चापि जडमूकादि पंगवः

sarve'dhikāriṇaścātra caṃḍālāṃtā munīśvara | striyaḥ śūdrādayaścāpi jaḍamūkādi paṃgavaḥ

Sanskrit only: no published translation is held for this verse.

अन्ये हूणाः किराताश्च पुलिंदाः पुष्कसास्तथा । आभीराय वनाः कंकाः खसाद्याः पापयोनयः

anye hūṇāḥ kirātāśca puliṃdāḥ puṣkasāstathā | ābhīrāya vanāḥ kaṃkāḥ khasādyāḥ pāpayonayaḥ

Sanskrit only: no published translation is held for this verse.

दंभाहंकारपरमाः पापाः पैशुन्यतत्पराः । गोब्राह्मणादि हंतारो महोपपातकान्विताः

daṃbhāhaṃkāraparamāḥ pāpāḥ paiśunyatatparāḥ | gobrāhmaṇādi haṃtāro mahopapātakānvitāḥ

Sanskrit only: no published translation is held for this verse.

ज्ञानवैराग्यरहिताः श्रवणादिविवर्जिताः । एते चान्ये च सर्वे स्युर्मनोरस्याधिकारिणः

jñānavairāgyarahitāḥ śravaṇādivivarjitāḥ | ete cānye ca sarve syurmanorasyādhikāriṇaḥ

Sanskrit only: no published translation is held for this verse.

यदि भक्तिर्भवेदेषां कृष्णे सर्वेश्वरेश्वरे । तदाधिकारिणः सर्वे नान्यथा मुनिसत्तम

yadi bhaktirbhavedeṣāṃ kṛṣṇe sarveśvareśvare | tadādhikāriṇaḥ sarve nānyathā munisattama

Sanskrit only: no published translation is held for this verse.

याज्ञिको दाननिरतः सर्वतंत्रोपसेवकः । सत्यवादी यतिर्वापि वेदवेदांगपारगः

yājñiko dānanirataḥ sarvataṃtropasevakaḥ | satyavādī yatirvāpi vedavedāṃgapāragaḥ

Sanskrit only: no published translation is held for this verse.

ब्रह्मनिष्ठः कुलीनो वा तपस्वी व्रततत्परः । अत्राधिकारी न भवेत्कृष्णभक्तिविवर्जितः

brahmaniṣṭhaḥ kulīno vā tapasvī vratatatparaḥ | atrādhikārī na bhavetkṛṣṇabhaktivivarjitaḥ

Sanskrit only: no published translation is held for this verse.

तस्मादकृष्णभक्ताय कृतघ्नाय न मानिने । न च श्रद्धाविहीनाय वक्तव्यं नास्तिकाय च

tasmādakṛṣṇabhaktāya kṛtaghnāya na mānine | na ca śraddhāvihīnāya vaktavyaṃ nāstikāya ca

Sanskrit only: no published translation is held for this verse.

न चाशुश्रूषवे वाच्यं नासंवत्सरसेविने । श्रीकृष्णेऽनन्यभक्ताय दंभलोभविवर्जिने

na cāśuśrūṣave vācyaṃ nāsaṃvatsarasevine | śrīkṛṣṇe'nanyabhaktāya daṃbhalobhavivarjine

Sanskrit only: no published translation is held for this verse.

कामक्रोधविमुक्ताय देयमेतत्प्रयत्नतः । ऋषिश्चैवाहमेतस्य गायत्रीछंद उच्यते

kāmakrodhavimuktāya deyametatprayatnataḥ | ṛṣiścaivāhametasya gāyatrīchaṃda ucyate

Sanskrit only: no published translation is held for this verse.

देवता बल्लवीकांतो मंत्रस्य परिकीर्तितः । सप्रियस्य हरेर्दास्ये विनियोग उदाहृतः

devatā ballavīkāṃto maṃtrasya parikīrtitaḥ | sapriyasya harerdāsye viniyoga udāhṛtaḥ

Sanskrit only: no published translation is held for this verse.

आचक्राद्यैस्तथा मंत्रैः पंचांगानि प्रकल्पयेत् । अथवापि स्वबीजेन करांगन्यासकौ चरेत्

ācakrādyaistathā maṃtraiḥ paṃcāṃgāni prakalpayet | athavāpi svabījena karāṃganyāsakau caret

Sanskrit only: no published translation is held for this verse.

मंत्रस्य प्रथमो वर्णो बिंदुना मूर्ध्निभूषितः । गमित्येवं भवेद्बीजं नमः शक्तिरिहोदिता

maṃtrasya prathamo varṇo biṃdunā mūrdhnibhūṣitaḥ | gamityevaṃ bhavedbījaṃ namaḥ śaktirihoditā

Sanskrit only: no published translation is held for this verse.

अंतिमार्णैर्दशांगानि तैरेव च तथार्चनम् । गंधपुष्पादिभिस्तच्च जलैरेवाप्यसंभवे

aṃtimārṇairdaśāṃgāni taireva ca tathārcanam | gaṃdhapuṣpādibhistacca jalairevāpyasaṃbhave

Sanskrit only: no published translation is held for this verse.

न्यासपूर्वविधानेन कर्तव्यं हरितुष्टये । अतएवास्य मंत्रस्य न्यासाद्यन्ये वदंति च

nyāsapūrvavidhānena kartavyaṃ harituṣṭaye | ataevāsya maṃtrasya nyāsādyanye vadaṃti ca

Sanskrit only: no published translation is held for this verse.

सकृदुच्चारणादेव कृतकृत्यत्वदायिनः । तथापि दशधा नित्यं जपाद्यर्थं प्रविन्यसेत्

sakṛduccāraṇādeva kṛtakṛtyatvadāyinaḥ | tathāpi daśadhā nityaṃ japādyarthaṃ pravinyaset

Sanskrit only: no published translation is held for this verse.

अथ ध्यानं प्रवक्ष्यामि मंत्रस्यास्य द्विजोत्तम । पीतांबरं घनश्यामं द्विभुजं वनमालिनम्

atha dhyānaṃ pravakṣyāmi maṃtrasyāsya dvijottama | pītāṃbaraṃ ghanaśyāmaṃ dvibhujaṃ vanamālinam

Sanskrit only: no published translation is held for this verse.

बर्हिबर्हकृतोत्तंसं शशिकोटिनिभाननम् । घूर्णायमाननयनं कर्णिकारावतंसिनम्

barhibarhakṛtottaṃsaṃ śaśikoṭinibhānanam | ghūrṇāyamānanayanaṃ karṇikārāvataṃsinam

Sanskrit only: no published translation is held for this verse.

अभितश्चंदनेनाथ मध्ये कुंकुमबिंदुना । रचितं तिलकं भाले बिभ्रतं मंडलाकृतिम्

abhitaścaṃdanenātha madhye kuṃkumabiṃdunā | racitaṃ tilakaṃ bhāle bibhrataṃ maṃḍalākṛtim

Sanskrit only: no published translation is held for this verse.

तरुणादित्यसंकाशं कुंडलाभ्यां विराजितम् । घर्माम्बुकणिकाराजद्दर्पणाभकपोलकम्

taruṇādityasaṃkāśaṃ kuṃḍalābhyāṃ virājitam | gharmāmbukaṇikārājaddarpaṇābhakapolakam

Sanskrit only: no published translation is held for this verse.

प्रियास्य न्यस्तनयनं लीलापांगोन्नतभ्रुवम् । अग्रभागन्यस्तमुक्ता विस्फुरत्प्रोच्चनासिकम्

priyāsya nyastanayanaṃ līlāpāṃgonnatabhruvam | agrabhāganyastamuktā visphuratproccanāsikam

Sanskrit only: no published translation is held for this verse.

दशनज्योत्स्नया राजत्पक्वबिंबफलाधरम् । केयूरांगदसद्रत्नमुद्रिकाभिर्लसत्करम्

daśanajyotsnayā rājatpakvabiṃbaphalādharam | keyūrāṃgadasadratnamudrikābhirlasatkaram

Sanskrit only: no published translation is held for this verse.

बिभ्रतं मुरलद्यं वामे पाणौ पद्मं तथैव च । कांचीदामस्फुरन्मध्यं नूपुराभ्यां लसत्पदम्

bibhrataṃ muraladyaṃ vāme pāṇau padmaṃ tathaiva ca | kāṃcīdāmasphuranmadhyaṃ nūpurābhyāṃ lasatpadam

Sanskrit only: no published translation is held for this verse.

रतिकेलिरसावेश चपलं चपलेक्षणम् । हसंतं प्रियया सार्द्धं हासयंतं च तां मुहुः

ratikelirasāveśa capalaṃ capalekṣaṇam | hasaṃtaṃ priyayā sārddhaṃ hāsayaṃtaṃ ca tāṃ muhuḥ

Sanskrit only: no published translation is held for this verse.

इत्थं कल्पतरोर्मूले रत्नसिंहासनोपरि । वृंदारण्ये स्मरेत्कृष्णं संस्थितं प्रियया सह

itthaṃ kalpatarormūle ratnasiṃhāsanopari | vṛṃdāraṇye smaretkṛṣṇaṃ saṃsthitaṃ priyayā saha

Sanskrit only: no published translation is held for this verse.

वामपार्श्वे स्थितां तस्य राधिकां च स्मरेत्ततः । नीलचोलकसंवीतां तप्तहेमसमप्रभाम्

vāmapārśve sthitāṃ tasya rādhikāṃ ca smarettataḥ | nīlacolakasaṃvītāṃ taptahemasamaprabhām

Sanskrit only: no published translation is held for this verse.

पट्टांचलेनावृतार्द्ध सुस्मेराननपंकजाम् । कांतवक्त्रे न्यस्तनेत्रां चकोरी चंचलेक्षणाम्

paṭṭāṃcalenāvṛtārddha susmerānanapaṃkajām | kāṃtavaktre nyastanetrāṃ cakorī caṃcalekṣaṇām

Sanskrit only: no published translation is held for this verse.

अंगुष्ठतर्जनीभ्यां च निजकांतमुखांबुजे । अर्पयंतीं पूगफलं पर्णचूर्णसमन्वितम्

aṃguṣṭhatarjanībhyāṃ ca nijakāṃtamukhāṃbuje | arpayaṃtīṃ pūgaphalaṃ parṇacūrṇasamanvitam

Sanskrit only: no published translation is held for this verse.

मुक्ताहारस्फुरच्चारु पीनोन्नतपयोधराम् । क्षीणमध्यां पृथुश्रोणीं किंकिणीजालमंडिताम्

muktāhārasphuraccāru pīnonnatapayodharām | kṣīṇamadhyāṃ pṛthuśroṇīṃ kiṃkiṇījālamaṃḍitām

Sanskrit only: no published translation is held for this verse.

रत्नताटंककेयूरमुद्रा वलयधारिणीम् । रणत्कटकमंजीर रत्नपादांगुलीयकाम्

ratnatāṭaṃkakeyūramudrā valayadhāriṇīm | raṇatkaṭakamaṃjīra ratnapādāṃgulīyakām

Sanskrit only: no published translation is held for this verse.

लावण्यसारमुग्धांगीं सर्वावयवसुंदरीम् । आनंदरससंमग्नां प्रसन्नां नवयौवनाम्

lāvaṇyasāramugdhāṃgīṃ sarvāvayavasuṃdarīm | ānaṃdarasasaṃmagnāṃ prasannāṃ navayauvanām

Sanskrit only: no published translation is held for this verse.

सख्यश्च तस्या विप्रेंद्र तत्समानवयोगुणाः । तत्सेवनपराभाव्याश्चामरव्यजनादिभिः

sakhyaśca tasyā vipreṃdra tatsamānavayoguṇāḥ | tatsevanaparābhāvyāścāmaravyajanādibhiḥ

Sanskrit only: no published translation is held for this verse.

अथ तुभ्यं प्रवक्ष्यामि मंत्रार्थं शृणु नारद । बहिरंगैः प्रपंचस्य स्वांशैर्मायादि शक्तिभिः

atha tubhyaṃ pravakṣyāmi maṃtrārthaṃ śṛṇu nārada | bahiraṃgaiḥ prapaṃcasya svāṃśairmāyādi śaktibhiḥ

Sanskrit only: no published translation is held for this verse.

अंतरंगैस्तथा नित्यविभूतैस्तैश्चिदादिभिः । गोपनादुच्यते गोपी राधिका कृष्णवल्लभा । देवी कृष्णमयी प्रोक्ता राधिका परदेवता

aṃtaraṃgaistathā nityavibhūtaistaiścidādibhiḥ | gopanāducyate gopī rādhikā kṛṣṇavallabhā | devī kṛṣṇamayī proktā rādhikā paradevatā

Sanskrit only: no published translation is held for this verse.

सर्वलक्ष्मीस्वरूपा सा कृष्णाह्लादस्वरूपिणी । ततः सा प्रोच्यते विप्र ह्लादिनीति मनीषिभिः

sarvalakṣmīsvarūpā sā kṛṣṇāhlādasvarūpiṇī | tataḥ sā procyate vipra hlādinīti manīṣibhiḥ

Sanskrit only: no published translation is held for this verse.

तत्कलाकोटिकोट्यंश दुर्गाद्यास्त्रिगुणात्मिकाः । सा तु साक्षान्महालक्ष्मीः कृष्णो नारायणः प्रभुः

tatkalākoṭikoṭyaṃśa durgādyāstriguṇātmikāḥ | sā tu sākṣānmahālakṣmīḥ kṛṣṇo nārāyaṇaḥ prabhuḥ

Sanskrit only: no published translation is held for this verse.

नैतयोर्विद्यते भेदः स्वल्पोऽपि मुनिसत्तम । इयं दुर्गा हरी रुद्रः कृष्णः शक्र इयं शची

naitayorvidyate bhedaḥ svalpo'pi munisattama | iyaṃ durgā harī rudraḥ kṛṣṇaḥ śakra iyaṃ śacī

Sanskrit only: no published translation is held for this verse.

सावित्रीयं हरिर्ब्रह्मा धूमोर्णासौ यमो हरिः । बहुना किं मुनिश्रेष्ठ विना ताभ्यां न किंचन

sāvitrīyaṃ harirbrahmā dhūmorṇāsau yamo hariḥ | bahunā kiṃ muniśreṣṭha vinā tābhyāṃ na kiṃcana

Sanskrit only: no published translation is held for this verse.

चिदचिल्लक्षणं सर्वं राधाकृष्णमयं जगत् । इत्थं सर्वं तयोरेव विभूतिं विद्धि नारद

cidacillakṣaṇaṃ sarvaṃ rādhākṛṣṇamayaṃ jagat | itthaṃ sarvaṃ tayoreva vibhūtiṃ viddhi nārada

Sanskrit only: no published translation is held for this verse.

न शक्यते मया वक्तुं वर्षकोटिशतैरपि । त्रैलोक्ये पृथिवी मान्या जंबूद्वीपं ततोवरम्

na śakyate mayā vaktuṃ varṣakoṭiśatairapi | trailokye pṛthivī mānyā jaṃbūdvīpaṃ tatovaram

Sanskrit only: no published translation is held for this verse.

तत्रापि भारतं वर्षं तत्रापि मथुरापुरी । तत्र वृंदावनं नाम तत्र गोपीकदंबकम्

tatrāpi bhārataṃ varṣaṃ tatrāpi mathurāpurī | tatra vṛṃdāvanaṃ nāma tatra gopīkadaṃbakam

Sanskrit only: no published translation is held for this verse.

तत्र राधासखीवर्गस्तत्रापि राधिका वरा । सांनिध्याधिक्यतस्तस्या आधिक्यं स्याद्यथोत्तरम्

tatra rādhāsakhīvargastatrāpi rādhikā varā | sāṃnidhyādhikyatastasyā ādhikyaṃ syādyathottaram

Sanskrit only: no published translation is held for this verse.

पृथिवी प्रभृतीनां तु नान्यत्किंचिदिहोदितम् । सैषा हि राधिका गोपी जनस्तस्याः सखीगणः

pṛthivī prabhṛtīnāṃ tu nānyatkiṃcidihoditam | saiṣā hi rādhikā gopī janastasyāḥ sakhīgaṇaḥ

Sanskrit only: no published translation is held for this verse.

तस्याः सखीसमूहस्य वल्लभौ प्राणनायकौ । राधाकृष्णौ तयोः पादाः शरणं स्यादिहाश्रये

tasyāḥ sakhīsamūhasya vallabhau prāṇanāyakau | rādhākṛṣṇau tayoḥ pādāḥ śaraṇaṃ syādihāśraye

Sanskrit only: no published translation is held for this verse.

प्रपद्ये गतवानस्मि जीवोऽहं भृशदुःखितः । सोऽहं यः शरणं प्राप्तो मम तस्य यदस्ति च

prapadye gatavānasmi jīvo'haṃ bhṛśaduḥkhitaḥ | so'haṃ yaḥ śaraṇaṃ prāpto mama tasya yadasti ca

Sanskrit only: no published translation is held for this verse.

सर्वं ताभ्यां तदर्थं हि तद्भोग्यं न ह्यहं मम । इत्यसौ कथितो विप्र मंत्रस्यार्थः समासतः

sarvaṃ tābhyāṃ tadarthaṃ hi tadbhogyaṃ na hyahaṃ mama | ityasau kathito vipra maṃtrasyārthaḥ samāsataḥ

Sanskrit only: no published translation is held for this verse.

युगलार्थस्तथा न्यासः प्रपत्तिः शरणागतिः । आत्मार्पणमिमे पंच पर्यायास्ते मयोदिताः

yugalārthastathā nyāsaḥ prapattiḥ śaraṇāgatiḥ | ātmārpaṇamime paṃca paryāyāste mayoditāḥ

Sanskrit only: no published translation is held for this verse.

अयमेव चिंतनीयो दिवानक्तमतंद्रितैः

ayameva ciṃtanīyo divānaktamataṃdritaiḥ

Sanskrit only: no published translation is held for this verse.

इति श्रीपद्मपुराणे पातालखंडे वृंदावनमाहात्म्ये एकाशीतितमोऽध्यायः

iti śrīpadmapurāṇe pātālakhaṃḍe vṛṃdāvanamāhātmye ekāśītitamo'dhyāyaḥ

Sanskrit only: no published translation is held for this verse.