Library·Padma Purāṇa·5·5.82
शिव उवाच- अथ दीक्षाविधिं वक्ष्ये शृणु नारद तत्त्वतः । श्रवणादेव मुच्येत विना तस्य विधानतः
śiva uvāca- atha dīkṣāvidhiṃ vakṣye śṛṇu nārada tattvataḥ | śravaṇādeva mucyeta vinā tasya vidhānataḥ
Sanskrit only: no published translation is held for this verse.
आविरंच्याज्जगत्सर्वं विज्ञाय नश्वरं बुधः । आध्यात्मिकादि त्रिविध दुःखमेवानुभूय च
āviraṃcyājjagatsarvaṃ vijñāya naśvaraṃ budhaḥ | ādhyātmikādi trividha duḥkhamevānubhūya ca
Sanskrit only: no published translation is held for this verse.
अनित्यत्वाच्च सर्वेषां सुखानां मुनिसत्तम । दुःखपक्षे विनिक्षिप्य तानि तेभ्यो विवर्जितः
anityatvācca sarveṣāṃ sukhānāṃ munisattama | duḥkhapakṣe vinikṣipya tāni tebhyo vivarjitaḥ
Sanskrit only: no published translation is held for this verse.
विरज्य संसृतेर्हानौ साधनानि विचिंतयेत् । अनुत्तमसुखस्यापि संप्राप्तौ भृशनिर्वृतः
virajya saṃsṛterhānau sādhanāni viciṃtayet | anuttamasukhasyāpi saṃprāptau bhṛśanirvṛtaḥ
Sanskrit only: no published translation is held for this verse.
नराणां दुष्करत्वं हि विज्ञाय च महामतिः । भृशमार्त्तस्ततो विप्र मां गुरुं शरणं व्रजेत्
narāṇāṃ duṣkaratvaṃ hi vijñāya ca mahāmatiḥ | bhṛśamārttastato vipra māṃ guruṃ śaraṇaṃ vrajet
Sanskrit only: no published translation is held for this verse.
शांतो विमत्सरः कृष्णे भक्तोऽनन्यप्रयोजनः । अनन्यसाधनः श्रीमान्कामलोभविवर्जितः
śāṃto vimatsaraḥ kṛṣṇe bhakto'nanyaprayojanaḥ | ananyasādhanaḥ śrīmānkāmalobhavivarjitaḥ
Sanskrit only: no published translation is held for this verse.
श्रीकृष्णरसतत्त्वज्ञः कृष्णमंत्रविदां वरः । कृष्णमंत्राश्रयो नित्यं मंत्रभक्तः सदा शुचिः
śrīkṛṣṇarasatattvajñaḥ kṛṣṇamaṃtravidāṃ varaḥ | kṛṣṇamaṃtrāśrayo nityaṃ maṃtrabhaktaḥ sadā śuciḥ
Sanskrit only: no published translation is held for this verse.
सद्धर्मशासकोनित्यं सदाचारनियोजकः । संप्रदायी कृपापूर्णो विरागी गुरुरुच्यते
saddharmaśāsakonityaṃ sadācāraniyojakaḥ | saṃpradāyī kṛpāpūrṇo virāgī gururucyate
Sanskrit only: no published translation is held for this verse.
एवमादिगुणः प्रायः शुश्रूषुर्गुरुपादयोः । गुरौ नितांतभक्तश्च मुमुक्षुः शिष्य उच्यते
evamādiguṇaḥ prāyaḥ śuśrūṣurgurupādayoḥ | gurau nitāṃtabhaktaśca mumukṣuḥ śiṣya ucyate
Sanskrit only: no published translation is held for this verse.
यत्साक्षात्सेवनं तस्य प्रेम्णा भागवतो भवेत् । स मोक्षः प्रोच्यते प्राज्ञैर्वेदवेदांगवेदिभिः
yatsākṣātsevanaṃ tasya premṇā bhāgavato bhavet | sa mokṣaḥ procyate prājñairvedavedāṃgavedibhiḥ
Sanskrit only: no published translation is held for this verse.
आश्रित्य स्वगुरोः पादौ निजवृत्तं निवेदयेत् । स संदेहानपाकृत्य बोधयित्वा पुनः पुनः
āśritya svaguroḥ pādau nijavṛttaṃ nivedayet | sa saṃdehānapākṛtya bodhayitvā punaḥ punaḥ
Sanskrit only: no published translation is held for this verse.
स्वपादप्रणतं शांतं शुश्रूषुं निजपादयोः । अतिहृष्टमनाः शिष्यं मनुमध्यापयेत्परम्
svapādapraṇataṃ śāṃtaṃ śuśrūṣuṃ nijapādayoḥ | atihṛṣṭamanāḥ śiṣyaṃ manumadhyāpayetparam
Sanskrit only: no published translation is held for this verse.
चंदनेन मृदा वापि विलिखेद्बाहुमूलयोः । वामदक्षिणयोर्विप्र शंखचक्रे यथाक्रमम्
caṃdanena mṛdā vāpi vilikhedbāhumūlayoḥ | vāmadakṣiṇayorvipra śaṃkhacakre yathākramam
Sanskrit only: no published translation is held for this verse.
ऊर्द्ध्वपुंड्रं ततः कुर्याद्भालादिषु विधानतः । ततोमंत्रद्वयं तस्य दक्षकर्णे विनिर्दिशेत्
ūrddhvapuṃḍraṃ tataḥ kuryādbhālādiṣu vidhānataḥ | tatomaṃtradvayaṃ tasya dakṣakarṇe vinirdiśet
Sanskrit only: no published translation is held for this verse.
मंत्रार्थं च वदेत्तस्मै यथावदनुपूर्वशः । दासशब्दयुतं नाम धार्यं तस्य प्रयत्नतः
maṃtrārthaṃ ca vadettasmai yathāvadanupūrvaśaḥ | dāsaśabdayutaṃ nāma dhāryaṃ tasya prayatnataḥ
Sanskrit only: no published translation is held for this verse.
ततोऽतिभक्त्या सस्नेहं वैष्णवान्भोजयेद्बुधः । श्रीगुरुं पूजयेच्चापि वस्त्रालंकरणादिभिः
tato'tibhaktyā sasnehaṃ vaiṣṇavānbhojayedbudhaḥ | śrīguruṃ pūjayeccāpi vastrālaṃkaraṇādibhiḥ
Sanskrit only: no published translation is held for this verse.
सर्वस्वं गुरवे दद्यात्तदर्द्धं वा महामुने । स्वदेहमपि निक्षिप्य गुरौ स्थेयमकिंचनैः
sarvasvaṃ gurave dadyāttadarddhaṃ vā mahāmune | svadehamapi nikṣipya gurau stheyamakiṃcanaiḥ
Sanskrit only: no published translation is held for this verse.
य एतैः पंचभिर्विद्वान्संस्कारैः संस्कृतो भवेत् । दास्यभागी स कृष्णस्य नान्यथा कल्पकोटिभिः
ya etaiḥ paṃcabhirvidvānsaṃskāraiḥ saṃskṛto bhavet | dāsyabhāgī sa kṛṣṇasya nānyathā kalpakoṭibhiḥ
Sanskrit only: no published translation is held for this verse.
अंकनं चोर्द्ध्वपुंड्रश्च मंत्रो नामविधारणम् । पंचमो याग इत्युक्ताः संस्काराः पूर्वसूरिभिः
aṃkanaṃ corddhvapuṃḍraśca maṃtro nāmavidhāraṇam | paṃcamo yāga ityuktāḥ saṃskārāḥ pūrvasūribhiḥ
Sanskrit only: no published translation is held for this verse.
अंकनं शंखचक्राद्यैः सच्छिद्रं पुंड्रमुच्यते । दासशब्दयुतं नाममंत्रो युगलसंज्ञकः
aṃkanaṃ śaṃkhacakrādyaiḥ sacchidraṃ puṃḍramucyate | dāsaśabdayutaṃ nāmamaṃtro yugalasaṃjñakaḥ
Sanskrit only: no published translation is held for this verse.
गुरुवैष्णवयोः पूजा याग इत्यभिधीयते । एते परमसंस्कारा मया ते परिकीर्तिताः
guruvaiṣṇavayoḥ pūjā yāga ityabhidhīyate | ete paramasaṃskārā mayā te parikīrtitāḥ
Sanskrit only: no published translation is held for this verse.
अथ तुभ्यं प्रपन्नानां धर्मान्वक्ष्यामि नारद । यानास्थाय गमिष्यंति हरिधाम नराः कलौ
atha tubhyaṃ prapannānāṃ dharmānvakṣyāmi nārada | yānāsthāya gamiṣyaṃti haridhāma narāḥ kalau
Sanskrit only: no published translation is held for this verse.
इत्थं गुरोर्लब्धमंत्रो गुरुभक्तिपरायणः । सेवमानो गुरुं नित्यं तत्कृपां भावयेत्सुधीः
itthaṃ gurorlabdhamaṃtro gurubhaktiparāyaṇaḥ | sevamāno guruṃ nityaṃ tatkṛpāṃ bhāvayetsudhīḥ
Sanskrit only: no published translation is held for this verse.
सतां धर्मां स्ततः शिक्षेत्प्रपन्नानां विशेषतः । स्वेष्टदेवधिया नित्यं वैष्णवान्परितोषयेत्
satāṃ dharmāṃ stataḥ śikṣetprapannānāṃ viśeṣataḥ | sveṣṭadevadhiyā nityaṃ vaiṣṇavānparitoṣayet
Sanskrit only: no published translation is held for this verse.
ताडनं भर्त्सनं कामिभोग्यत्वेन यथा स्त्रियः । गृह्णंति वैष्णवानां च तत्तद्ग्राह्यं तथा बुधैः
tāḍanaṃ bhartsanaṃ kāmibhogyatvena yathā striyaḥ | gṛhṇaṃti vaiṣṇavānāṃ ca tattadgrāhyaṃ tathā budhaiḥ
Sanskrit only: no published translation is held for this verse.
ऐहिक्यामुष्मिकी चिंता नैव कार्या कदाचन । ऐहिकं तु सदा भाव्यं पूर्वाचरितकर्मणा
aihikyāmuṣmikī ciṃtā naiva kāryā kadācana | aihikaṃ tu sadā bhāvyaṃ pūrvācaritakarmaṇā
Sanskrit only: no published translation is held for this verse.
आमुष्मिकं तथा कृष्णः स्वयमेव करिष्यति । अतो हि तत्कृते त्याज्यः प्रयत्नः सर्वथा नरैः
āmuṣmikaṃ tathā kṛṣṇaḥ svayameva kariṣyati | ato hi tatkṛte tyājyaḥ prayatnaḥ sarvathā naraiḥ
Sanskrit only: no published translation is held for this verse.
सर्वोपायपरित्यागः कृष्णीयात्मतयार्चनम् । सुचिरं प्रोषिते कांते यथा पतिपरायणा
sarvopāyaparityāgaḥ kṛṣṇīyātmatayārcanam | suciraṃ proṣite kāṃte yathā patiparāyaṇā
Sanskrit only: no published translation is held for this verse.
प्रियानुरागिणी दीना तस्यसंगैककांक्षिणी । तद्गुणान्भावयेन्नित्यं गायत्यपि शृणोति च
priyānurāgiṇī dīnā tasyasaṃgaikakāṃkṣiṇī | tadguṇānbhāvayennityaṃ gāyatyapi śṛṇoti ca
Sanskrit only: no published translation is held for this verse.
श्रीकृष्णगुणलीलादि स्मरणादि तथाचरेत् । न पुनः साधनत्वेन कार्यं तत्तु कदाचन
śrīkṛṣṇaguṇalīlādi smaraṇādi tathācaret | na punaḥ sādhanatvena kāryaṃ tattu kadācana
Sanskrit only: no published translation is held for this verse.
चिरं प्रोष्यागतं कांतं प्राप्य कांतधिया यथा । चुंबंती वा श्लिष्यंतीव नेत्रांते न पिबंत्यपि
ciraṃ proṣyāgataṃ kāṃtaṃ prāpya kāṃtadhiyā yathā | cuṃbaṃtī vā śliṣyaṃtīva netrāṃte na pibaṃtyapi
Sanskrit only: no published translation is held for this verse.
ब्रह्मानंदगतेवाशु सेवते परया मुदा । श्रीमदर्चावतारेण तथा परिचरेद्धरिम्
brahmānaṃdagatevāśu sevate parayā mudā | śrīmadarcāvatāreṇa tathā paricareddharim
Sanskrit only: no published translation is held for this verse.
अनन्यशरणो नित्यं तथैवानन्यसाधनः । अनन्यसाधनार्थत्वात्स्यादनन्य प्रयोजनः
ananyaśaraṇo nityaṃ tathaivānanyasādhanaḥ | ananyasādhanārthatvātsyādananya prayojanaḥ
Sanskrit only: no published translation is held for this verse.
नान्यं च पूजयेद्देवं न नमेत्तं स्मरेन्न च । न च पश्येन्न गायेच्च न च निंदेत्कदाचन
nānyaṃ ca pūjayeddevaṃ na namettaṃ smarenna ca | na ca paśyenna gāyecca na ca niṃdetkadācana
Sanskrit only: no published translation is held for this verse.
नान्योच्छिष्टं च भुंजीत नान्यशेषं च धारयेत् । अवैष्णवानां संभाषा वंदनादि विवर्जयेत्
nānyocchiṣṭaṃ ca bhuṃjīta nānyaśeṣaṃ ca dhārayet | avaiṣṇavānāṃ saṃbhāṣā vaṃdanādi vivarjayet
Sanskrit only: no published translation is held for this verse.
ईशवैष्णवयोर्निंदां शृणुयान्न कदाचन । कर्णौ पिधाय गंतव्यं शक्तौ दंडं समाचरेत्
īśavaiṣṇavayorniṃdāṃ śṛṇuyānna kadācana | karṇau pidhāya gaṃtavyaṃ śaktau daṃḍaṃ samācaret
Sanskrit only: no published translation is held for this verse.
आश्रित्य चातकीं वृत्तिं देहपातावधि द्विज । द्वयस्यार्थं भावयित्वा स्थेयमित्येव मे मतिः
āśritya cātakīṃ vṛttiṃ dehapātāvadhi dvija | dvayasyārthaṃ bhāvayitvā stheyamityeva me matiḥ
Sanskrit only: no published translation is held for this verse.
सरः समुद्र नद्यादीन्विहाय चातको यथा । तृषितो म्रियते वापि याचते वा पयोधरम्
saraḥ samudra nadyādīnvihāya cātako yathā | tṛṣito mriyate vāpi yācate vā payodharam
Sanskrit only: no published translation is held for this verse.
एवमेव प्रयत्नेन साधनानि विचिंतयेत् । स्वेष्टदेवःसदायाच्योगतिस्त्वंमेभवेरिति
evameva prayatnena sādhanāni viciṃtayet | sveṣṭadevaḥsadāyācyogatistvaṃmebhaveriti
Sanskrit only: no published translation is held for this verse.
स्वेष्टदेव तदीयानां गुरोरपि विशेषतः । आनुकूल्ये सदा स्थेयं प्रातिकूल्यं विवर्जयेत्
sveṣṭadeva tadīyānāṃ gurorapi viśeṣataḥ | ānukūlye sadā stheyaṃ prātikūlyaṃ vivarjayet
Sanskrit only: no published translation is held for this verse.
सकृत्प्रपन्नो वक्ष्यामि कल्याणगुणतां तयोः । विचिंत्य विश्वसेदेतौ मामिमावुद्धरिष्यतः
sakṛtprapanno vakṣyāmi kalyāṇaguṇatāṃ tayoḥ | viciṃtya viśvasedetau māmimāvuddhariṣyataḥ
Sanskrit only: no published translation is held for this verse.
संसारसागरान्नाथ मित्र पुत्र गृहा कुलात् । गोप्तारौ मे युवामेव प्रपन्नभयभंजनौ
saṃsārasāgarānnātha mitra putra gṛhā kulāt | goptārau me yuvāmeva prapannabhayabhaṃjanau
Sanskrit only: no published translation is held for this verse.
योहं ममास्ति यत्किंचिदिह लोके परत्र च । तत्सर्वं भवतोरद्य चरणेषु समर्चितम्
yohaṃ mamāsti yatkiṃcidiha loke paratra ca | tatsarvaṃ bhavatoradya caraṇeṣu samarcitam
Sanskrit only: no published translation is held for this verse.
अहमस्म्यपराधानामालयस्त्यक्त साधनः । अगतिश्च ततो नाथौ भवंतावेव मे गतिः
ahamasmyaparādhānāmālayastyakta sādhanaḥ | agatiśca tato nāthau bhavaṃtāveva me gatiḥ
Sanskrit only: no published translation is held for this verse.
तवास्मि राधिकाकांत कर्मणा मनसा गिरा । कृष्णकांते तवैवास्मि युवामेव गतिर्मम
tavāsmi rādhikākāṃta karmaṇā manasā girā | kṛṣṇakāṃte tavaivāsmi yuvāmeva gatirmama
Sanskrit only: no published translation is held for this verse.
शरणं वां प्रपन्नोऽस्मि करुणानिकराकरौ । प्रसादं कुरु तं दास्यं मयि दुष्टेऽपराधिनि
śaraṇaṃ vāṃ prapanno'smi karuṇānikarākarau | prasādaṃ kuru taṃ dāsyaṃ mayi duṣṭe'parādhini
Sanskrit only: no published translation is held for this verse.
इत्येवं जपता नित्यं स्थातव्यं पद्यपंचकम् । अचिरादेव तद्दास्यमिच्छता मुनिसत्तम
ityevaṃ japatā nityaṃ sthātavyaṃ padyapaṃcakam | acirādeva taddāsyamicchatā munisattama
Sanskrit only: no published translation is held for this verse.
बाह्यधर्मा मया ह्येते संक्षेपेणोपवर्णिताः । आंतरः परमो धर्मः प्रपन्नानामथोच्यते
bāhyadharmā mayā hyete saṃkṣepeṇopavarṇitāḥ | āṃtaraḥ paramo dharmaḥ prapannānāmathocyate
Sanskrit only: no published translation is held for this verse.
कृष्णप्रिया सखीभावं समाश्रित्य प्रयत्नतः । तयोः सेवां प्रकुर्वीत दिवानक्तमतंद्रितः
kṛṣṇapriyā sakhībhāvaṃ samāśritya prayatnataḥ | tayoḥ sevāṃ prakurvīta divānaktamataṃdritaḥ
Sanskrit only: no published translation is held for this verse.
उक्तो मंत्रस्तदंगानि तथा तस्याधिकारिणः । तद्धर्माश्च तथा तेभ्यः फलं मंत्रस्य नारद
ukto maṃtrastadaṃgāni tathā tasyādhikāriṇaḥ | taddharmāśca tathā tebhyaḥ phalaṃ maṃtrasya nārada
Sanskrit only: no published translation is held for this verse.
अनुतिष्ठ त्वमप्येतत्तयोर्दास्यमवाप्स्यसि । स्वाधिकारक्षये विप्र संदेहो नात्र कश्चन
anutiṣṭha tvamapyetattayordāsyamavāpsyasi | svādhikārakṣaye vipra saṃdeho nātra kaścana
Sanskrit only: no published translation is held for this verse.
सकृन्मात्रप्रपन्नाय तवास्मीति च याचते । निजदास्यं हरिर्दद्यान्न मेऽत्रास्ति विचारणा
sakṛnmātraprapannāya tavāsmīti ca yācate | nijadāsyaṃ harirdadyānna me'trāsti vicāraṇā
Sanskrit only: no published translation is held for this verse.
अत्र ते वर्णयिष्यामि रहस्यं परमाद्भुतम् । श्रुतपूर्वं मया कृष्णात्साक्षाद्भगवतः परम्
atra te varṇayiṣyāmi rahasyaṃ paramādbhutam | śrutapūrvaṃ mayā kṛṣṇātsākṣādbhagavataḥ param
Sanskrit only: no published translation is held for this verse.
एष ते कथितो धर्म आंतरो मुनिसत्तम । गुह्यादेष गुह्यतमो गोपनीयः प्रयत्नतः
eṣa te kathito dharma āṃtaro munisattama | guhyādeṣa guhyatamo gopanīyaḥ prayatnataḥ
Sanskrit only: no published translation is held for this verse.
मंत्ररत्नमहं पूर्वं जपन्कैलासमूर्द्धनि । ध्यायन्नारायणं देवमवसं गहने वने
maṃtraratnamahaṃ pūrvaṃ japankailāsamūrddhani | dhyāyannārāyaṇaṃ devamavasaṃ gahane vane
Sanskrit only: no published translation is held for this verse.
ततस्तु भगवांस्तुष्टः प्रादुरास ममाग्रतः । व्रियतां वर इत्युक्ते मयाप्युद्घाट्य लोचने
tatastu bhagavāṃstuṣṭaḥ prādurāsa mamāgrataḥ | vriyatāṃ vara ityukte mayāpyudghāṭya locane
Sanskrit only: no published translation is held for this verse.
दृष्टो देवःप्रिया सार्द्धं संस्थितो गरुडोपरि । प्रणिपत्यावोचमहं वरदं कमलापतिम्
dṛṣṭo devaḥpriyā sārddhaṃ saṃsthito garuḍopari | praṇipatyāvocamahaṃ varadaṃ kamalāpatim
Sanskrit only: no published translation is held for this verse.
यद्रूपं ते कृपासिंधो परमानंददायकम् । सर्वानंदाश्रयं नित्यं मूर्तिमत्सर्वतोऽधिकम्
yadrūpaṃ te kṛpāsiṃdho paramānaṃdadāyakam | sarvānaṃdāśrayaṃ nityaṃ mūrtimatsarvato'dhikam
Sanskrit only: no published translation is held for this verse.
निर्गुणं निष्क्रियं शांतं यद्ब्रह्मेति विदुर्बुधाः । तदहं द्रष्टुमिच्छामि चक्षुर्भ्यां परमेश्वर
nirguṇaṃ niṣkriyaṃ śāṃtaṃ yadbrahmeti vidurbudhāḥ | tadahaṃ draṣṭumicchāmi cakṣurbhyāṃ parameśvara
Sanskrit only: no published translation is held for this verse.
ततो मामाह भगवान्प्रपन्नं कमलापतिः । तदद्य द्रक्ष्यसे रूपं यत्ते मनसि कांक्षितम्
tato māmāha bhagavānprapannaṃ kamalāpatiḥ | tadadya drakṣyase rūpaṃ yatte manasi kāṃkṣitam
Sanskrit only: no published translation is held for this verse.
यमुना पश्चिमे तीरे गच्छ वृंदावनं मम । इत्युक्त्वांतर्दधे देवः प्रियासार्द्धं जगत्पतिः
yamunā paścime tīre gaccha vṛṃdāvanaṃ mama | ityuktvāṃtardadhe devaḥ priyāsārddhaṃ jagatpatiḥ
Sanskrit only: no published translation is held for this verse.
अहमप्यागतस्तर्हि यमुनायास्तटं शुभम् । तत्र कृष्णमपश्यं च सर्वदेवेश्वरेश्वरम्
ahamapyāgatastarhi yamunāyāstaṭaṃ śubham | tatra kṛṣṇamapaśyaṃ ca sarvadeveśvareśvaram
Sanskrit only: no published translation is held for this verse.
गोपवेषधरं कांतं किशोरवयसान्वितम् । प्रियास्कंधे सुविन्यस्त वामहस्तं मनोहरम्
gopaveṣadharaṃ kāṃtaṃ kiśoravayasānvitam | priyāskaṃdhe suvinyasta vāmahastaṃ manoharam
Sanskrit only: no published translation is held for this verse.
हसंतं हासयतं तां मध्ये गोपीकदंबके । स्निग्धमेघसमाभासं कल्याणगुणमंदिरम्
hasaṃtaṃ hāsayataṃ tāṃ madhye gopīkadaṃbake | snigdhameghasamābhāsaṃ kalyāṇaguṇamaṃdiram
Sanskrit only: no published translation is held for this verse.
प्रहस्य च ततः कृष्णो मामाहामृतभाषणः । अहं ते दर्शनं यातो ज्ञात्वा रुद्र तवेप्सितम्
prahasya ca tataḥ kṛṣṇo māmāhāmṛtabhāṣaṇaḥ | ahaṃ te darśanaṃ yāto jñātvā rudra tavepsitam
Sanskrit only: no published translation is held for this verse.
यदद्य मे त्वया दृष्टमिदं रूपमलौकिकम् । घनीभूतामलप्रेम सच्चिदानंदविग्रहम्
yadadya me tvayā dṛṣṭamidaṃ rūpamalaukikam | ghanībhūtāmalaprema saccidānaṃdavigraham
Sanskrit only: no published translation is held for this verse.
नीरूपं निर्गुणं व्यापि क्रियाहीनं परात्परम् । वदंत्युपनिषत्संघा इदमेव ममानघम्
nīrūpaṃ nirguṇaṃ vyāpi kriyāhīnaṃ parātparam | vadaṃtyupaniṣatsaṃghā idameva mamānagham
Sanskrit only: no published translation is held for this verse.
प्रकृत्युत्थगुणाभावादनंतत्वात्तथेश्वरम् । असिद्धत्वान्मद्गुणानां निर्गुणं मां वदंति हि
prakṛtyutthaguṇābhāvādanaṃtatvāttatheśvaram | asiddhatvānmadguṇānāṃ nirguṇaṃ māṃ vadaṃti hi
Sanskrit only: no published translation is held for this verse.
अदृश्यत्वान्ममैतस्य रूपस्य चर्मचक्षुषा । अरूपं मां वदंत्येते वेदाः सर्वे महेश्वर
adṛśyatvānmamaitasya rūpasya carmacakṣuṣā | arūpaṃ māṃ vadaṃtyete vedāḥ sarve maheśvara
Sanskrit only: no published translation is held for this verse.
व्यापकत्वाच्चिदंशेन ब्रह्मेति च विदुर्बुधाः । अकर्तृत्वात्प्रपंचस्य निष्क्रियं मां वदंति हि
vyāpakatvāccidaṃśena brahmeti ca vidurbudhāḥ | akartṛtvātprapaṃcasya niṣkriyaṃ māṃ vadaṃti hi
Sanskrit only: no published translation is held for this verse.
मायागुणैर्यतोमेंऽशा कुर्वंति सर्जनादिकम् । न करोमि स्वयं किंचित्सृष्ट्यादिकमहं शिव
māyāguṇairyatomeṃ'śā kurvaṃti sarjanādikam | na karomi svayaṃ kiṃcitsṛṣṭyādikamahaṃ śiva
Sanskrit only: no published translation is held for this verse.
अहमासां महादेव गोपीनां प्रेमविह्वलः । क्रियांतरं न जानामि नात्मानमपि नारद
ahamāsāṃ mahādeva gopīnāṃ premavihvalaḥ | kriyāṃtaraṃ na jānāmi nātmānamapi nārada
Sanskrit only: no published translation is held for this verse.
विहराम्यनया नित्यमस्याः प्रेमवशीकृतः । इमां तु मत्प्रियां विद्धि राधिकां परदेवताम्
viharāmyanayā nityamasyāḥ premavaśīkṛtaḥ | imāṃ tu matpriyāṃ viddhi rādhikāṃ paradevatām
Sanskrit only: no published translation is held for this verse.
अस्याश्च परितः पश्य सख्यः शतसहस्रशः । नित्याः सर्वा इमा रुद्र यथाहं नित्यविग्रहः
asyāśca paritaḥ paśya sakhyaḥ śatasahasraśaḥ | nityāḥ sarvā imā rudra yathāhaṃ nityavigrahaḥ
Sanskrit only: no published translation is held for this verse.
गोपा गावो गोपिकाश्च सदा वृंदावनं मम । सर्वमेतन्नित्यमेव चिदानंदरसात्मकम्
gopā gāvo gopikāśca sadā vṛṃdāvanaṃ mama | sarvametannityameva cidānaṃdarasātmakam
Sanskrit only: no published translation is held for this verse.
इदमानंदकंदाख्यं विद्धि वृंदावनं मम । यस्मिन्प्रवेशमात्रेण न पुनः संसृतिं विशेत्
idamānaṃdakaṃdākhyaṃ viddhi vṛṃdāvanaṃ mama | yasminpraveśamātreṇa na punaḥ saṃsṛtiṃ viśet
Sanskrit only: no published translation is held for this verse.
मद्वनं प्राप्य यो मूढः पुनरन्यत्र गच्छति । स आत्महा भवेदेव सत्यं सत्यं मयोदितम्
madvanaṃ prāpya yo mūḍhaḥ punaranyatra gacchati | sa ātmahā bhavedeva satyaṃ satyaṃ mayoditam
Sanskrit only: no published translation is held for this verse.
वृंदावनं परित्यज्य नैव गच्छाम्यहं क्वचित् । निवसाम्यनया सार्द्धमहमत्रैव सर्वदा
vṛṃdāvanaṃ parityajya naiva gacchāmyahaṃ kvacit | nivasāmyanayā sārddhamahamatraiva sarvadā
Sanskrit only: no published translation is held for this verse.
इत्येवं सर्वमाख्यातं यत्ते रुद्र हृदि स्थितम् । कथयस्व ममेदानीं किमन्यच्छ्रोतुमिच्छसि
ityevaṃ sarvamākhyātaṃ yatte rudra hṛdi sthitam | kathayasva mamedānīṃ kimanyacchrotumicchasi
Sanskrit only: no published translation is held for this verse.
ततस्तमब्रवं देवमहं च मुनिसत्तम । ईदृशस्त्वं कथं लभ्यस्तमुपायं वदस्व मे
tatastamabravaṃ devamahaṃ ca munisattama | īdṛśastvaṃ kathaṃ labhyastamupāyaṃ vadasva me
Sanskrit only: no published translation is held for this verse.
ततो मामाह भगवान्साधु रुद्र तवोदितम् । अतिगुह्यतमं ह्येतद्गोपनीयं प्रयत्नतः
tato māmāha bhagavānsādhu rudra tavoditam | atiguhyatamaṃ hyetadgopanīyaṃ prayatnataḥ
Sanskrit only: no published translation is held for this verse.
सकृदावां प्रपन्नो यस्त्यक्तोपाय उपासते । गोपीभावेन देवेश स मामेति न चेतरः
sakṛdāvāṃ prapanno yastyaktopāya upāsate | gopībhāvena deveśa sa māmeti na cetaraḥ
Sanskrit only: no published translation is held for this verse.
सकृदावां प्रपन्नो वा मत्प्रियामेकिकामुत । सेवतेनन्यभावेन स मामेति न संशयः
sakṛdāvāṃ prapanno vā matpriyāmekikāmuta | sevatenanyabhāvena sa māmeti na saṃśayaḥ
Sanskrit only: no published translation is held for this verse.
यो मामेव प्रपन्नश्च मत्प्रियां न महेश्वर । न कदापि स चाप्नोति मामेवं ते मयोदितम्
yo māmeva prapannaśca matpriyāṃ na maheśvara | na kadāpi sa cāpnoti māmevaṃ te mayoditam
Sanskrit only: no published translation is held for this verse.
सकृदेव प्रपन्नोयस्तवास्मीति वदेदपि । साधनेन विनाप्येव मामाप्नोति न संशयः
sakṛdeva prapannoyastavāsmīti vadedapi | sādhanena vināpyeva māmāpnoti na saṃśayaḥ
Sanskrit only: no published translation is held for this verse.
तस्मात्सर्वप्रयत्नेन मत्प्रियां शरणं व्रजेत् । आश्रित्य मत्प्रियां रुद्र मां वशीकर्त्तुमर्हसि
tasmātsarvaprayatnena matpriyāṃ śaraṇaṃ vrajet | āśritya matpriyāṃ rudra māṃ vaśīkarttumarhasi
Sanskrit only: no published translation is held for this verse.
इदं रहस्यं परमं मया ते परिकीर्तितम् । त्वयाप्येतन्महादेव गोपनीयं प्रयत्नतः
idaṃ rahasyaṃ paramaṃ mayā te parikīrtitam | tvayāpyetanmahādeva gopanīyaṃ prayatnataḥ
Sanskrit only: no published translation is held for this verse.
त्वमप्येनां समाश्रित्य राधिकां मम वल्लभाम् । जपन्मे युगलं मंत्रं सदा तिष्ठ मदालये
tvamapyenāṃ samāśritya rādhikāṃ mama vallabhām | japanme yugalaṃ maṃtraṃ sadā tiṣṭha madālaye
Sanskrit only: no published translation is held for this verse.
शिव उवाच-। इत्युक्त्वा दक्षिणे कर्णे मम कृष्णो दयानिधिः । उपदिश्य परं मंत्रं संस्कारांश्च विधाय हि
śiva uvāca-| ityuktvā dakṣiṇe karṇe mama kṛṣṇo dayānidhiḥ | upadiśya paraṃ maṃtraṃ saṃskārāṃśca vidhāya hi
Sanskrit only: no published translation is held for this verse.
सगणोंऽतर्दधे विप्र तत्रैव मम पश्यतः । अहमप्यत्र तिष्ठामि तदारभ्य निरंतरम्
sagaṇoṃ'tardadhe vipra tatraiva mama paśyataḥ | ahamapyatra tiṣṭhāmi tadārabhya niraṃtaram
Sanskrit only: no published translation is held for this verse.
सर्वमेतन्मया तुभ्यं सांगमेव प्रकीर्त्तितम् । अधुना वद विप्रेंद्र किं भूयः श्रोतुमिच्छसि
sarvametanmayā tubhyaṃ sāṃgameva prakīrttitam | adhunā vada vipreṃdra kiṃ bhūyaḥ śrotumicchasi
Sanskrit only: no published translation is held for this verse.