Padma Purāṇa 6.109

गणावूचतुः । कदाचिद्विष्णुदासोऽथ कृत्वा नित्यविधिं द्विजः । पाककर्माकरोद्यावदहरत्कोप्यलक्षितः

gaṇāvūcatuḥ | kadācidviṣṇudāso'tha kṛtvā nityavidhiṃ dvijaḥ | pākakarmākarodyāvadaharatkopyalakṣitaḥ

Sanskrit only: no published translation is held for this verse.

तमदृष्ट्वाप्यसौ पाकं पुनर्नैवाकरोत्तदा । सायंकालार्चनस्यासौ व्रतभंगभयाद्द्विजः

tamadṛṣṭvāpyasau pākaṃ punarnaivākarottadā | sāyaṃkālārcanasyāsau vratabhaṃgabhayāddvijaḥ

Sanskrit only: no published translation is held for this verse.

द्वितीयेऽह्नि ततः पाकं कृत्वा यावत्स विष्णवे । उपहारार्पणं कर्तुं तावत्कोप्यहरत्पुनः

dvitīye'hni tataḥ pākaṃ kṛtvā yāvatsa viṣṇave | upahārārpaṇaṃ kartuṃ tāvatkopyaharatpunaḥ

Sanskrit only: no published translation is held for this verse.

एवं सप्तदिनं तस्य पाकं कोप्यहरद्द्विज । जातः सविस्मयः सोऽथ मनस्येव व्यचारयत्

evaṃ saptadinaṃ tasya pākaṃ kopyaharaddvija | jātaḥ savismayaḥ so'tha manasyeva vyacārayat

Sanskrit only: no published translation is held for this verse.

अहो नित्यं समभ्येत्य कः पाकं हरते मम । क्षेत्रसंन्यासिनां स्थानमत्याज्यं सर्वथा मया

aho nityaṃ samabhyetya kaḥ pākaṃ harate mama | kṣetrasaṃnyāsināṃ sthānamatyājyaṃ sarvathā mayā

Sanskrit only: no published translation is held for this verse.

पुनः पाकं विधायात्र भुज्यते यदि चेन्मया । सायंकालार्चनं चैतत्परित्याज्यं कथं मया

punaḥ pākaṃ vidhāyātra bhujyate yadi cenmayā | sāyaṃkālārcanaṃ caitatparityājyaṃ kathaṃ mayā

Sanskrit only: no published translation is held for this verse.

किंचित्पाकं विधायैतद्भोक्तव्यं तु मया नहि । अनिर्वेद्य हरौ सर्वं वैष्णवैर्नैव भुज्यते

kiṃcitpākaṃ vidhāyaitadbhoktavyaṃ tu mayā nahi | anirvedya harau sarvaṃ vaiṣṇavairnaiva bhujyate

Sanskrit only: no published translation is held for this verse.

उपोषितोऽहं च कथं तिष्ठाम्यत्र व्रतस्थितः । अद्य संरक्षणं सम्यक्पाकस्यात्र करोम्यहम्

upoṣito'haṃ ca kathaṃ tiṣṭhāmyatra vratasthitaḥ | adya saṃrakṣaṇaṃ samyakpākasyātra karomyaham

Sanskrit only: no published translation is held for this verse.

इति पाकं विधायासौ तत्रैवालक्षितः स्थितः । तावद्ददर्श चांडालं पाकान्नहरणे स्थितम्

iti pākaṃ vidhāyāsau tatraivālakṣitaḥ sthitaḥ | tāvaddadarśa cāṃḍālaṃ pākānnaharaṇe sthitam

Sanskrit only: no published translation is held for this verse.

क्षुत्क्षामं दीनवदनमस्थिचर्मावशेषितम् । तमालोक्य द्विजाग्र्योभूत्कृपयापन्नमानसः

kṣutkṣāmaṃ dīnavadanamasthicarmāvaśeṣitam | tamālokya dvijāgryobhūtkṛpayāpannamānasaḥ

Sanskrit only: no published translation is held for this verse.

विलोक्यान्नहरं विप्रस्तिष्ठतिष्ठेत्यभाषत । कथमत्ति भवान्रूक्षं घृतमेतद्गृहाण भोः

vilokyānnaharaṃ viprastiṣṭhatiṣṭhetyabhāṣata | kathamatti bhavānrūkṣaṃ ghṛtametadgṛhāṇa bhoḥ

Sanskrit only: no published translation is held for this verse.

इत्थं ब्रुवंतं विप्राग्र्यं आयांतं च विलोक्य सः । वेगादधावत्तद्भीत्या मूर्च्छितश्च पपात ह

itthaṃ bruvaṃtaṃ viprāgryaṃ āyāṃtaṃ ca vilokya saḥ | vegādadhāvattadbhītyā mūrcchitaśca papāta ha

Sanskrit only: no published translation is held for this verse.

भीतं तं मूर्च्छितं दृष्ट्वा चांडालं स द्विजोत्तमः । वेगादभ्येत्य कृपया स्ववस्त्रांतैरवीजयत्

bhītaṃ taṃ mūrcchitaṃ dṛṣṭvā cāṃḍālaṃ sa dvijottamaḥ | vegādabhyetya kṛpayā svavastrāṃtairavījayat

Sanskrit only: no published translation is held for this verse.

अथोत्थितं तमेवासौ विष्णुदासो व्यलोकयत् । साक्षान्नारायणं देवं शंखचक्रगदाधरम्

athotthitaṃ tamevāsau viṣṇudāso vyalokayat | sākṣānnārāyaṇaṃ devaṃ śaṃkhacakragadādharam

Sanskrit only: no published translation is held for this verse.

पीतांबरं चतुर्बाहुं श्रीवत्सांकं किरीटिनम् । अतसीपुष्पसंकाशं कौस्तुभोरःस्थलं विभुम्

pītāṃbaraṃ caturbāhuṃ śrīvatsāṃkaṃ kirīṭinam | atasīpuṣpasaṃkāśaṃ kaustubhoraḥsthalaṃ vibhum

Sanskrit only: no published translation is held for this verse.

तं दृष्ट्वा सात्विकैर्भावैरावृतो द्विजसत्तमः । स्तोतुं चापि नमस्कर्तुं तदानालं बभूव सः

taṃ dṛṣṭvā sātvikairbhāvairāvṛto dvijasattamaḥ | stotuṃ cāpi namaskartuṃ tadānālaṃ babhūva saḥ

Sanskrit only: no published translation is held for this verse.

अथ शक्रादयो देवास्तत्रैवाभ्याययुस्तदा । गंधर्वाप्सरसश्चापि जगुश्च ननृतुर्मुदा

atha śakrādayo devāstatraivābhyāyayustadā | gaṃdharvāpsarasaścāpi jaguśca nanṛturmudā

Sanskrit only: no published translation is held for this verse.

विमानशतसंकीर्णं देवर्षिगणसंकुलम् । गीतवादित्रनिर्घोषं स्थानं तदभवत्तदा

vimānaśatasaṃkīrṇaṃ devarṣigaṇasaṃkulam | gītavāditranirghoṣaṃ sthānaṃ tadabhavattadā

Sanskrit only: no published translation is held for this verse.

ततो विष्णुः समालिंग्य स्वभक्तं सात्विकं तथा । सायुज्यमात्मनो दत्त्वानयद्वैकुंठमंदिरम्

tato viṣṇuḥ samāliṃgya svabhaktaṃ sātvikaṃ tathā | sāyujyamātmano dattvānayadvaikuṃṭhamaṃdiram

Sanskrit only: no published translation is held for this verse.

विमानवरसंस्थानमास्थितं विष्णुसन्निधौ । दीक्षितश्चोलनृपतिर्विष्णुदासं ददर्श ह

vimānavarasaṃsthānamāsthitaṃ viṣṇusannidhau | dīkṣitaścolanṛpatirviṣṇudāsaṃ dadarśa ha

Sanskrit only: no published translation is held for this verse.

वैकुंठभवनं यांतं विष्णुदासं विलोक्य सः । स्वगुरुं मुद्गलं वेगादाह्वयेत्थं वचोऽब्रवीत्

vaikuṃṭhabhavanaṃ yāṃtaṃ viṣṇudāsaṃ vilokya saḥ | svaguruṃ mudgalaṃ vegādāhvayetthaṃ vaco'bravīt

Sanskrit only: no published translation is held for this verse.

चोल उवाच। यत्स्पर्धया मया चैतद्यज्ञदानादिकं कृतम् । स विष्णुरूपधृग्विप्रो याति वैकुंठमंदिरम्

cola uvāca| yatspardhayā mayā caitadyajñadānādikaṃ kṛtam | sa viṣṇurūpadhṛgvipro yāti vaikuṃṭhamaṃdiram

Sanskrit only: no published translation is held for this verse.

दीक्षितेन मया सम्यक्सत्रेऽस्मिन्विष्णवे त्वया । हुतमग्नौ कृता विप्रा दानाद्यैः पूर्णमानसाः

dīkṣitena mayā samyaksatre'sminviṣṇave tvayā | hutamagnau kṛtā viprā dānādyaiḥ pūrṇamānasāḥ

Sanskrit only: no published translation is held for this verse.

नैवाद्यापि समे देवः प्रसन्नो जायते ध्रुवम् । भक्त्यैव तस्य विप्रस्य साक्षात्कारं ददौ हरिः

naivādyāpi same devaḥ prasanno jāyate dhruvam | bhaktyaiva tasya viprasya sākṣātkāraṃ dadau hariḥ

Sanskrit only: no published translation is held for this verse.

तस्माद्दानैश्च यज्ञैश्च नैव विष्णुः प्रसीदति । भक्तिरेव परं तस्य निदानं दर्शने विभोः

tasmāddānaiśca yajñaiśca naiva viṣṇuḥ prasīdati | bhaktireva paraṃ tasya nidānaṃ darśane vibhoḥ

Sanskrit only: no published translation is held for this verse.

गणावूचतुः । इत्युक्त्वा भागिनेयं स्वमभिषिच्य नृपासने । आबाल्याद्दीक्षितो यज्ञे सा पुत्रत्वमगाद्यतः

gaṇāvūcatuḥ | ityuktvā bhāgineyaṃ svamabhiṣicya nṛpāsane | ābālyāddīkṣito yajñe sā putratvamagādyataḥ

Sanskrit only: no published translation is held for this verse.

तस्मादद्यापि तद्देशे सदा राज्यांशभागिनः । स्वस्रेया एव जायंते तत्कृताचारवर्तिनः

tasmādadyāpi taddeśe sadā rājyāṃśabhāginaḥ | svasreyā eva jāyaṃte tatkṛtācāravartinaḥ

Sanskrit only: no published translation is held for this verse.

यज्ञवाटं ततोऽभ्येत्य वह्निकुंडाग्रतः स्थितः । त्रिरुच्चैर्व्याजहाराशु विष्णुं संबोधयंस्तदा

yajñavāṭaṃ tato'bhyetya vahnikuṃḍāgrataḥ sthitaḥ | triruccairvyājahārāśu viṣṇuṃ saṃbodhayaṃstadā

Sanskrit only: no published translation is held for this verse.

विष्णो भक्तिं स्थिरां देहि मनोवाक्कायकर्मभिः । इत्युक्त्वा सोऽपतद्वह्नौ सर्वेषामेव पश्यताम्

viṣṇo bhaktiṃ sthirāṃ dehi manovākkāyakarmabhiḥ | ityuktvā so'patadvahnau sarveṣāmeva paśyatām

Sanskrit only: no published translation is held for this verse.

मुद्गलस्तु तदा क्रोधाच्छिखामुत्पाटयत्स्वकाम् । ततस्त्वद्यापि तद्गोत्रे मुद्गला विशिखाभवन्

mudgalastu tadā krodhācchikhāmutpāṭayatsvakām | tatastvadyāpi tadgotre mudgalā viśikhābhavan

Sanskrit only: no published translation is held for this verse.

तावदाविरभूद्विष्णुः कुंडाग्नौ भक्तवत्सलः । तमालिंग्य विमानाग्र्यं समारोहयदच्युतः

tāvadāvirabhūdviṣṇuḥ kuṃḍāgnau bhaktavatsalaḥ | tamāliṃgya vimānāgryaṃ samārohayadacyutaḥ

Sanskrit only: no published translation is held for this verse.

तमालिंग्यात्मसारूप्यं दत्त्वा वैकुंठमंदिरम् । तेनैव सह देवेशो जगाम त्रिदशैर्वृतः

tamāliṃgyātmasārūpyaṃ dattvā vaikuṃṭhamaṃdiram | tenaiva saha deveśo jagāma tridaśairvṛtaḥ

Sanskrit only: no published translation is held for this verse.

नारद उवाच। यो विष्णुदासः स तु पुण्यशीलो यश्चोलभूपः स सुशील नामा । एतावुभौ तत्समरूपभाजौ द्वाःस्थौ कृतौ तेन रमाप्रियेण

nārada uvāca| yo viṣṇudāsaḥ sa tu puṇyaśīlo yaścolabhūpaḥ sa suśīla nāmā | etāvubhau tatsamarūpabhājau dvāḥsthau kṛtau tena ramāpriyeṇa

Sanskrit only: no published translation is held for this verse.

इति श्रीपाद्मे महापुराणे पंचपंचाशत्साहस्र्यां संहितायां कार्तिकमाहात्म्ये श्रीकृष्णसत्यभामासंवादे कलहोपाख्यानंनाम नवाधिकशततमोऽध्यायः

iti śrīpādme mahāpurāṇe paṃcapaṃcāśatsāhasryāṃ saṃhitāyāṃ kārtikamāhātmye śrīkṛṣṇasatyabhāmāsaṃvāde kalahopākhyānaṃnāma navādhikaśatatamo'dhyāyaḥ

Sanskrit only: no published translation is held for this verse.