Library·Padma Purāṇa·6·6.110
धर्मदत्त उवाच। जयश्च विजयश्चैव विष्णोर्द्वास्थौ मया श्रुतौ । किंतु ताभ्यां पुरा चीर्णं यस्मात्तद्रूपधारिणौ
dharmadatta uvāca| jayaśca vijayaścaiva viṣṇordvāsthau mayā śrutau | kiṃtu tābhyāṃ purā cīrṇaṃ yasmāttadrūpadhāriṇau
Sanskrit only: no published translation is held for this verse.
गणावूचतुः। तृणबिंदोस्तु कन्यायां देवहूत्यां पुरा द्विज । कर्दमस्य तु दृष्ट्यैव पुत्रौ द्वौ संबभूवतुः
gaṇāvūcatuḥ| tṛṇabiṃdostu kanyāyāṃ devahūtyāṃ purā dvija | kardamasya tu dṛṣṭyaiva putrau dvau saṃbabhūvatuḥ
Sanskrit only: no published translation is held for this verse.
ज्येष्ठो जयः कनिष्ठोऽभूद्विजयश्चेति नामतः । अन्यस्यामभवत्पश्चात्कपिलो योगधर्मवित्
jyeṣṭho jayaḥ kaniṣṭho'bhūdvijayaśceti nāmataḥ | anyasyāmabhavatpaścātkapilo yogadharmavit
Sanskrit only: no published translation is held for this verse.
जयश्च विजयश्चैव विष्णुभक्तिरतौ सदा । संनियम्येंद्रियग्रामं धर्मशीलौ बभूवतुः
jayaśca vijayaścaiva viṣṇubhaktiratau sadā | saṃniyamyeṃdriyagrāmaṃ dharmaśīlau babhūvatuḥ
Sanskrit only: no published translation is held for this verse.
नित्यमष्टाक्षरी जाप्यौ विष्णुव्रतकरावुभौ । साक्षात्कारं ददौ विष्णुस्तयोर्नित्यार्चने सदा
nityamaṣṭākṣarī jāpyau viṣṇuvratakarāvubhau | sākṣātkāraṃ dadau viṣṇustayornityārcane sadā
Sanskrit only: no published translation is held for this verse.
मरुत्तेन कदाचित्तावाहूतौ यज्ञकर्मणि । जग्मतुर्यज्ञकुशलौ देवर्षिगणसेवितौ
maruttena kadācittāvāhūtau yajñakarmaṇi | jagmaturyajñakuśalau devarṣigaṇasevitau
Sanskrit only: no published translation is held for this verse.
जयस्तत्राभवद्ब्रह्मा याजको विजयोऽभवत् । ततो यज्ञविधिं कृत्स्नं परिपूर्णं च चक्रतुः
jayastatrābhavadbrahmā yājako vijayo'bhavat | tato yajñavidhiṃ kṛtsnaṃ paripūrṇaṃ ca cakratuḥ
Sanskrit only: no published translation is held for this verse.
मरुतोऽवभृथस्नातस्ताभ्यां वित्तं ददौ बहु । तत्समादाय तौ वित्तं जग्मतुः स्वाश्रमं प्रति
maruto'vabhṛthasnātastābhyāṃ vittaṃ dadau bahu | tatsamādāya tau vittaṃ jagmatuḥ svāśramaṃ prati
Sanskrit only: no published translation is held for this verse.
यजनाय तदा विष्णोस्तुष्ट्यर्थं तौ तदा मुने । तद्धनं विभजंतो वै पस्पर्द्धाते परस्परम्
yajanāya tadā viṣṇostuṣṭyarthaṃ tau tadā mune | taddhanaṃ vibhajaṃto vai pasparddhāte parasparam
Sanskrit only: no published translation is held for this verse.
जयोऽब्रवीत्समो भागः क्रियतामिति तत्र सः । विजयश्चाब्रवीत्तत्र यल्लब्धं येन तस्य तत्
jayo'bravītsamo bhāgaḥ kriyatāmiti tatra saḥ | vijayaścābravīttatra yallabdhaṃ yena tasya tat
Sanskrit only: no published translation is held for this verse.
ततो जयोऽशपत्क्रोधाद्विजयं क्षुब्धमानसः । गृहीत्वा न ददास्येतत्तस्माद्ग्राहो भवेति तम्
tato jayo'śapatkrodhādvijayaṃ kṣubdhamānasaḥ | gṛhītvā na dadāsyetattasmādgrāho bhaveti tam
Sanskrit only: no published translation is held for this verse.
विजयस्तस्य तं शापं श्रुत्वा सोऽप्यशपच्च तम् । मदभ्रांतोशपद्यस्मात्तस्मान्मातंगतां व्रज
vijayastasya taṃ śāpaṃ śrutvā so'pyaśapacca tam | madabhrāṃtośapadyasmāttasmānmātaṃgatāṃ vraja
Sanskrit only: no published translation is held for this verse.
तौ तथा चख्यतुर्विष्णुं दृष्ट्वा नित्यार्चने विभुम् । शापयोस्तुनिवृत्तिं तौ ययाचाते रमापतिम्
tau tathā cakhyaturviṣṇuṃ dṛṣṭvā nityārcane vibhum | śāpayostunivṛttiṃ tau yayācāte ramāpatim
Sanskrit only: no published translation is held for this verse.
भक्तावावां कथं देव ग्राहमांतगयोनिगौ । भविष्यावः कृपासिंधो तच्छापो विनिवर्त्यताम्
bhaktāvāvāṃ kathaṃ deva grāhamāṃtagayonigau | bhaviṣyāvaḥ kṛpāsiṃdho tacchāpo vinivartyatām
Sanskrit only: no published translation is held for this verse.
श्रीभगवानुवाच। मद्भक्तयोर्वचोऽसत्यं न कदाचिद्भविष्यति । मयापि नान्यथा कर्तुं शक्यते तत्कदाचन
śrībhagavānuvāca| madbhaktayorvaco'satyaṃ na kadācidbhaviṣyati | mayāpi nānyathā kartuṃ śakyate tatkadācana
Sanskrit only: no published translation is held for this verse.
प्रह्लादवचनात्स्तंभऽप्याविर्भूतो ह्यहं पुरा । तथांबरीषवाक्येन जातो मार्गे स्वयं किल
prahlādavacanātstaṃbha'pyāvirbhūto hyahaṃ purā | tathāṃbarīṣavākyena jāto mārge svayaṃ kila
Sanskrit only: no published translation is held for this verse.
तस्माद्ध्रुवमिमौ शापावनुभूय स्वयंकृतौ । लभेतां मत्पदं नित्यमित्युक्त्वांतर्दधे हरिः
tasmāddhruvamimau śāpāvanubhūya svayaṃkṛtau | labhetāṃ matpadaṃ nityamityuktvāṃtardadhe hariḥ
Sanskrit only: no published translation is held for this verse.
गणावूचतुः । ततस्तौ ग्राहमातंगा बभूतां गंडकी तटे । जातिस्मरौ च तद्योन्यामपि विष्णुव्रते स्थितौ
gaṇāvūcatuḥ | tatastau grāhamātaṃgā babhūtāṃ gaṃḍakī taṭe | jātismarau ca tadyonyāmapi viṣṇuvrate sthitau
Sanskrit only: no published translation is held for this verse.
कदाचित्स गजः स्नातुं कार्तिके गंडकीं गतः । तावज्जग्राह च ग्राहः संस्मरञ्छापकारणम्
kadācitsa gajaḥ snātuṃ kārtike gaṃḍakīṃ gataḥ | tāvajjagrāha ca grāhaḥ saṃsmarañchāpakāraṇam
Sanskrit only: no published translation is held for this verse.
ग्राहगृहीतोऽसौ नागः संस्मार श्रीपतिं तदा । तावदाविरभूद्विष्णुः शंखचक्रगदाधरः
grāhagṛhīto'sau nāgaḥ saṃsmāra śrīpatiṃ tadā | tāvadāvirabhūdviṣṇuḥ śaṃkhacakragadādharaḥ
Sanskrit only: no published translation is held for this verse.
तॄतस्तौ ग्राहमातंगौ चक्रं क्षिप्त्वा समुद्धृतौ । दत्त्वा च निजसारूप्यं वैकुंठमनयद्विभुः
tṝtastau grāhamātaṃgau cakraṃ kṣiptvā samuddhṛtau | dattvā ca nijasārūpyaṃ vaikuṃṭhamanayadvibhuḥ
Sanskrit only: no published translation is held for this verse.
तदाप्रभृति तत्स्थानं हरिक्षेत्रमिति श्रुतम् । चक्रसंघर्षणाद्यस्मिन्पाषाणोऽपि हि लांछितः
tadāprabhṛti tatsthānaṃ harikṣetramiti śrutam | cakrasaṃgharṣaṇādyasminpāṣāṇo'pi hi lāṃchitaḥ
Sanskrit only: no published translation is held for this verse.
ताविमौ विश्रुतौ लोके जयश्च विजयश्च ह । नित्यं विष्णुप्रियौ द्वाःस्थौ पृष्टौ यौ हि त्वया द्विज
tāvimau viśrutau loke jayaśca vijayaśca ha | nityaṃ viṣṇupriyau dvāḥsthau pṛṣṭau yau hi tvayā dvija
Sanskrit only: no published translation is held for this verse.
अतस्त्वमपि धर्मज्ञ नित्यं विष्णुव्रते स्थितः । त्यक्तमात्सर्यदंभो हि भव स्वसमदर्शनः
atastvamapi dharmajña nityaṃ viṣṇuvrate sthitaḥ | tyaktamātsaryadaṃbho hi bhava svasamadarśanaḥ
Sanskrit only: no published translation is held for this verse.
तुलामकरमेषेषु प्रातःस्नायी सदा भव । एकादशीव्रते तिष्ठ तुलसीवनपालकः
tulāmakarameṣeṣu prātaḥsnāyī sadā bhava | ekādaśīvrate tiṣṭha tulasīvanapālakaḥ
Sanskrit only: no published translation is held for this verse.
ब्राह्मणानपि गाश्चापि वैष्णवांश्च सदा भज । मसूराश्चारनालाश्च वृंताकानपि खाद मा
brāhmaṇānapi gāścāpi vaiṣṇavāṃśca sadā bhaja | masūrāścāranālāśca vṛṃtākānapi khāda mā
Sanskrit only: no published translation is held for this verse.
एवं त्वमपि देहांते तद्विष्णोः परमं पदम् । प्राप्नोषि धर्मदत्त त्वं तद्भक्त्यैव यथा वयम्
evaṃ tvamapi dehāṃte tadviṣṇoḥ paramaṃ padam | prāpnoṣi dharmadatta tvaṃ tadbhaktyaiva yathā vayam
Sanskrit only: no published translation is held for this verse.
तवाजन्मव्रतात्तस्माद्विष्णुसंतुष्टिकारकात् । न यज्ञा न च दानानि न तीर्थान्यधिकानि वै
tavājanmavratāttasmādviṣṇusaṃtuṣṭikārakāt | na yajñā na ca dānāni na tīrthānyadhikāni vai
Sanskrit only: no published translation is held for this verse.
धन्योऽसि विप्राग्र्य यतस्त्वयैतद्व्रतं कृतं तुष्टिकरं जगद्गुरोः । यत्पुण्यभागाप्तफलं मुरारेः प्रणीयतेस्माभिरियं सलोकताम्
dhanyo'si viprāgrya yatastvayaitadvrataṃ kṛtaṃ tuṣṭikaraṃ jagadguroḥ | yatpuṇyabhāgāptaphalaṃ murāreḥ praṇīyatesmābhiriyaṃ salokatām
Sanskrit only: no published translation is held for this verse.
नारद उवाच। इत्थं तौ धर्मदत्तं तमुपदिश्य विमानगौ । तया कलहया सार्द्धं वैकुंठभवनं गतौ
nārada uvāca| itthaṃ tau dharmadattaṃ tamupadiśya vimānagau | tayā kalahayā sārddhaṃ vaikuṃṭhabhavanaṃ gatau
Sanskrit only: no published translation is held for this verse.
धर्मदत्तोप्यसौ जातप्रत्ययस्तद्व्रते स्थितः । देहांते तद्विभोः स्थानं भार्याभ्यामन्वितोऽभ्यगात्
dharmadattopyasau jātapratyayastadvrate sthitaḥ | dehāṃte tadvibhoḥ sthānaṃ bhāryābhyāmanvito'bhyagāt
Sanskrit only: no published translation is held for this verse.
इतिहासमिमं पुराभवं शृणुते यश्च पुमान्यथाविधि । हरिसंनिधिकारिणीं मतिं लभतेऽसौ कृपया जगद्गुरोः
itihāsamimaṃ purābhavaṃ śṛṇute yaśca pumānyathāvidhi | harisaṃnidhikāriṇīṃ matiṃ labhate'sau kṛpayā jagadguroḥ
Sanskrit only: no published translation is held for this verse.