Padma Purāṇa 6.127

वपुश्च क्षणविध्वंसि पश्यंती निर्गता ह्यहम् । नरकार्णवसंपात दारुणांतर वह्निना

vapuśca kṣaṇavidhvaṃsi paśyaṃtī nirgatā hyaham | narakārṇavasaṃpāta dāruṇāṃtara vahninā

Sanskrit only: no published translation is held for this verse.

हृदये कुणपव्याघ्र तदा तत्तप्यमानया । मया गत्वा कृतं स्नानं माघे मासि सितासिते

hṛdaye kuṇapavyāghra tadā tattapyamānayā | mayā gatvā kṛtaṃ snānaṃ māghe māsi sitāsite

Sanskrit only: no published translation is held for this verse.

तस्य स्नानस्य माहात्म्यं शृणु वृद्धनिशाचर । त्र्यहात्पापक्षयो जातः सप्तविंशतिभिर्दिनैः

tasya snānasya māhātmyaṃ śṛṇu vṛddhaniśācara | tryahātpāpakṣayo jātaḥ saptaviṃśatibhirdinaiḥ

Sanskrit only: no published translation is held for this verse.

शेषैर्मे यदभूत्पुण्यं तेन देवत्वमागता । रममाणा तु कैलासे गिरिजायाः प्रिया सखी

śeṣairme yadabhūtpuṇyaṃ tena devatvamāgatā | ramamāṇā tu kailāse girijāyāḥ priyā sakhī

Sanskrit only: no published translation is held for this verse.

जातिस्मरा तथा जाता प्रयागस्य प्रभावतः । स्मृत्वा प्रयागमाहात्म्यं माघे माघे व्रजाम्यहम्

jātismarā tathā jātā prayāgasya prabhāvataḥ | smṛtvā prayāgamāhātmyaṃ māghe māghe vrajāmyaham

Sanskrit only: no published translation is held for this verse.

इति राक्षस यत्पृष्टं त्वया विस्मितचेतसा । तन्मया कथितं सर्वं चरितं प्रीतये तव

iti rākṣasa yatpṛṣṭaṃ tvayā vismitacetasā | tanmayā kathitaṃ sarvaṃ caritaṃ prītaye tava

Sanskrit only: no published translation is held for this verse.

मत्प्रीतये चरित्रं स्वं त्वं ब्रूहि मम राक्षस । कर्मणा केनजातोऽसि विरूपोऽतिभयंकरः

matprītaye caritraṃ svaṃ tvaṃ brūhi mama rākṣasa | karmaṇā kenajāto'si virūpo'tibhayaṃkaraḥ

Sanskrit only: no published translation is held for this verse.

श्मश्रुलो दीर्घदंष्ट्रंश्च क्रव्यादो गिरिगह्वरे । राक्षस उवाच। इष्टं ददाति गृह्णाति गुह्यं वदति पृच्छति

śmaśrulo dīrghadaṃṣṭraṃśca kravyādo girigahvare | rākṣasa uvāca| iṣṭaṃ dadāti gṛhṇāti guhyaṃ vadati pṛcchati

Sanskrit only: no published translation is held for this verse.

प्रीत्या हि सज्जनो भद्रे तच्च सर्वं त्वयि स्थितम् । त्वया संभावितो नूनं मन्येऽहं वामलोचने

prītyā hi sajjano bhadre tacca sarvaṃ tvayi sthitam | tvayā saṃbhāvito nūnaṃ manye'haṃ vāmalocane

Sanskrit only: no published translation is held for this verse.

भाविनी निष्कृतिः सद्यस्त्वयास्य क्रूरकर्मणः । अतो वक्ष्यामि ते भद्रे दुष्कृतं यत्स्वयंकृतम्

bhāvinī niṣkṛtiḥ sadyastvayāsya krūrakarmaṇaḥ | ato vakṣyāmi te bhadre duṣkṛtaṃ yatsvayaṃkṛtam

Sanskrit only: no published translation is held for this verse.

निवेद्य सज्जने दुःखं ततः सर्वसुखी भवेत् । शृणु सुश्रोण्यहं काश्यां बह्वृचो वेदपारगः

nivedya sajjane duḥkhaṃ tataḥ sarvasukhī bhavet | śṛṇu suśroṇyahaṃ kāśyāṃ bahvṛco vedapāragaḥ

Sanskrit only: no published translation is held for this verse.

जातः पुरा द्विजः श्रेष्ठः कुले महति निर्मले । राज्ञां दुष्कृतिनां भीरु शूद्राणां च तथा विशाम्

jātaḥ purā dvijaḥ śreṣṭhaḥ kule mahati nirmale | rājñāṃ duṣkṛtināṃ bhīru śūdrāṇāṃ ca tathā viśām

Sanskrit only: no published translation is held for this verse.

वाराणस्यां कृतो घोरो मया दुष्टप्रतिग्रहः । बहुधा बहुधा वारं निषिद्धः कुत्सितो बहु

vārāṇasyāṃ kṛto ghoro mayā duṣṭapratigrahaḥ | bahudhā bahudhā vāraṃ niṣiddhaḥ kutsito bahu

Sanskrit only: no published translation is held for this verse.

चांडालस्यापि न त्यक्तो मया दुष्टप्रतिग्रहः । अन्यच्च पातकं तत्र ममाभून्मूढचेतसः । तन्नास्ति दुष्कृतं कर्म मया यत्र न यत्कृतम्

cāṃḍālasyāpi na tyakto mayā duṣṭapratigrahaḥ | anyacca pātakaṃ tatra mamābhūnmūḍhacetasaḥ | tannāsti duṣkṛtaṃ karma mayā yatra na yatkṛtam

Sanskrit only: no published translation is held for this verse.

अन्यच्च श्रूयतां दोषः क्षेत्रस्य वरवर्णिनि । अविमुक्तेऽणुमात्रं यत्तदघं मेरुतां व्रजेत् । न धर्मस्तु मया कश्चित्संचितस्तत्र जन्मनि

anyacca śrūyatāṃ doṣaḥ kṣetrasya varavarṇini | avimukte'ṇumātraṃ yattadaghaṃ merutāṃ vrajet | na dharmastu mayā kaścitsaṃcitastatra janmani

Sanskrit only: no published translation is held for this verse.

ततो बहुतिथे काले मृतस्तत्रैव शोभने । अविमुक्तप्रभावेण न चाहं नरकं गतः

tato bahutithe kāle mṛtastatraiva śobhane | avimuktaprabhāveṇa na cāhaṃ narakaṃ gataḥ

Sanskrit only: no published translation is held for this verse.

अविमुक्ते मृतः कश्चिन्नरकं नेति किल्बिषी । अविमुक्ते कृतं किंचित्पापं वज्री भवेद्दृढम्

avimukte mṛtaḥ kaścinnarakaṃ neti kilbiṣī | avimukte kṛtaṃ kiṃcitpāpaṃ vajrī bhaveddṛḍham

Sanskrit only: no published translation is held for this verse.

वज्रलेपेन पापेन तेन मे जन्म राक्षसम् । रौद्रं क्रूरतरं पापं संभूतं हिमपर्वते

vajralepena pāpena tena me janma rākṣasam | raudraṃ krūrataraṃ pāpaṃ saṃbhūtaṃ himaparvate

Sanskrit only: no published translation is held for this verse.

द्विर्जातो गृध्रयोनौ प्राक्त्रिर्व्याघ्रो द्विः सरीसृपः । एकवारमुलूकस्तु विड्वराहस्ततः परम्

dvirjāto gṛdhrayonau prāktrirvyāghro dviḥ sarīsṛpaḥ | ekavāramulūkastu viḍvarāhastataḥ param

Sanskrit only: no published translation is held for this verse.

इदं तु दशमं जन्म राक्षसं मम भामिनी । अतीतानि सहस्राणि वर्षाणि मम जन्मनः

idaṃ tu daśamaṃ janma rākṣasaṃ mama bhāminī | atītāni sahasrāṇi varṣāṇi mama janmanaḥ

Sanskrit only: no published translation is held for this verse.

नास्ति मे निष्कृतिर्भद्रे एतस्माद्दुःखसागरात् । अत्र त्रियोजनं सुभ्रूर्निर्जंतु हि मया कृतम्

nāsti me niṣkṛtirbhadre etasmādduḥkhasāgarāt | atra triyojanaṃ subhrūrnirjaṃtu hi mayā kṛtam

Sanskrit only: no published translation is held for this verse.

अनागसां च भूतानां बहूनां च कृतः क्षयः । कर्मणा तेन मे सुभ्रूर्दह्यते सततं मनः

anāgasāṃ ca bhūtānāṃ bahūnāṃ ca kṛtaḥ kṣayaḥ | karmaṇā tena me subhrūrdahyate satataṃ manaḥ

Sanskrit only: no published translation is held for this verse.

त्वद्दर्शनसुधासिक्तं गतं शैत्यं मनो मम । तीर्थं फलति कालेन सद्यः साधुसमागमः

tvaddarśanasudhāsiktaṃ gataṃ śaityaṃ mano mama | tīrthaṃ phalati kālena sadyaḥ sādhusamāgamaḥ

Sanskrit only: no published translation is held for this verse.

अतः सत्संगतिं सुभ्रूः प्रशंसंति मनीषिणः । एतत्ते कथितं सर्वं स्वदुःखं हृद्गतं मया

ataḥ satsaṃgatiṃ subhrūḥ praśaṃsaṃti manīṣiṇaḥ | etatte kathitaṃ sarvaṃ svaduḥkhaṃ hṛdgataṃ mayā

Sanskrit only: no published translation is held for this verse.

विरलः सज्जनः सुभ्रूः स्वात्मा यस्य न खिद्यते । जानास्यत्रोचितं त्वं हि किंचिन्नो वच्म्यतः परम्

viralaḥ sajjanaḥ subhrūḥ svātmā yasya na khidyate | jānāsyatrocitaṃ tvaṃ hi kiṃcinno vacmyataḥ param

Sanskrit only: no published translation is held for this verse.

अस्य दुःखोदधेः पारं कथं यामीति चिंतयन् । सज्जनानां समा भूतिः सर्वेषामुपजीवनम्

asya duḥkhodadheḥ pāraṃ kathaṃ yāmīti ciṃtayan | sajjanānāṃ samā bhūtiḥ sarveṣāmupajīvanam

Sanskrit only: no published translation is held for this verse.

क्षीरार्णवः पयो दत्ते हंसाय न बकाय किम् । दत्तात्रेय उवाच। इति तस्य वचः श्रुत्वा दयार्द्रीकृतमानसा 6.127.१५०। धर्मदाने मतिं कृत्वा जगौ कांचनमालिनी । करिष्ये निष्कृतिं रक्ष इदानीं खलु मा शुचः

kṣīrārṇavaḥ payo datte haṃsāya na bakāya kim | dattātreya uvāca| iti tasya vacaḥ śrutvā dayārdrīkṛtamānasā 6.127.150| dharmadāne matiṃ kṛtvā jagau kāṃcanamālinī | kariṣye niṣkṛtiṃ rakṣa idānīṃ khalu mā śucaḥ

Sanskrit only: no published translation is held for this verse.

प्रतिज्ञां तु दृढां कृत्वा यतिष्ये तव मुक्तये । बहवो हि कृता माघा वर्षे वर्षे यथाविधि

pratijñāṃ tu dṛḍhāṃ kṛtvā yatiṣye tava muktaye | bahavo hi kṛtā māghā varṣe varṣe yathāvidhi

Sanskrit only: no published translation is held for this verse.

श्रद्धापूर्वं मया भद्र ब्रह्मक्षेत्रे सितासिते । तां वदामि तु संख्यातिं तस्य धर्मस्य राक्षस

śraddhāpūrvaṃ mayā bhadra brahmakṣetre sitāsite | tāṃ vadāmi tu saṃkhyātiṃ tasya dharmasya rākṣasa

Sanskrit only: no published translation is held for this verse.

गूढो धर्मो हि कर्तव्य इत्यूचुर्विबुधा जनाः । आर्ते दानं प्रशंसंति मुनयो वेदवादिनः

gūḍho dharmo hi kartavya ityūcurvibudhā janāḥ | ārte dānaṃ praśaṃsaṃti munayo vedavādinaḥ

Sanskrit only: no published translation is held for this verse.

सागरे वर्षतो भद्र किं मेघस्य फलं भवेत् । अनुभूतं मया रक्षः स्वयं तत्पुण्यजं फलम्

sāgare varṣato bhadra kiṃ meghasya phalaṃ bhavet | anubhūtaṃ mayā rakṣaḥ svayaṃ tatpuṇyajaṃ phalam

Sanskrit only: no published translation is held for this verse.

तत्तु दास्यामि ते मित्र सद्यः पापविनाशनम् । निष्पीड्याथ ततो वस्त्रं जलं कृत्वा करांबुजे

tattu dāsyāmi te mitra sadyaḥ pāpavināśanam | niṣpīḍyātha tato vastraṃ jalaṃ kṛtvā karāṃbuje

Sanskrit only: no published translation is held for this verse.

ददौ सा माघजं पुण्यं तस्मै वृद्धाय रक्षसे । शृणु राजन्विचित्रं हि प्रभावं माघधर्मजम्

dadau sā māghajaṃ puṇyaṃ tasmai vṛddhāya rakṣase | śṛṇu rājanvicitraṃ hi prabhāvaṃ māghadharmajam

Sanskrit only: no published translation is held for this verse.

तदैवं प्राप्य तत्पुण्यं विमुक्ता राक्षसी तनुः । संभूतो देवताकारस्तेजो भास्करविग्रहः

tadaivaṃ prāpya tatpuṇyaṃ vimuktā rākṣasī tanuḥ | saṃbhūto devatākārastejo bhāskaravigrahaḥ

Sanskrit only: no published translation is held for this verse.

देवयानं समारूढः सहर्षोत्फुल्ललोचनः । द्योतमानस्तदा व्योम्नि भासयन्प्रभया दिशः

devayānaṃ samārūḍhaḥ saharṣotphullalocanaḥ | dyotamānastadā vyomni bhāsayanprabhayā diśaḥ

Sanskrit only: no published translation is held for this verse.

दिव्यरूपधरो रेजे द्वितीय इव भास्करः । ततोऽभिनंदयामास सतां कांचनमालिनीम्

divyarūpadharo reje dvitīya iva bhāskaraḥ | tato'bhinaṃdayāmāsa satāṃ kāṃcanamālinīm

Sanskrit only: no published translation is held for this verse.

भद्रे वेत्तीश्वरो देवः कर्मणां यः फलप्रदः । तत्त्वयोपकृतं सर्वं यत्र मे नास्ति निष्कृतिः

bhadre vettīśvaro devaḥ karmaṇāṃ yaḥ phalapradaḥ | tattvayopakṛtaṃ sarvaṃ yatra me nāsti niṣkṛtiḥ

Sanskrit only: no published translation is held for this verse.

इदानीमपि कारुण्यात्प्रसीदानुग्रहं कुरु । शिक्षां विधेहि मे देवि सर्वनीतिमयीं शुभाम्

idānīmapi kāruṇyātprasīdānugrahaṃ kuru | śikṣāṃ vidhehi me devi sarvanītimayīṃ śubhām

Sanskrit only: no published translation is held for this verse.

सर्वधर्मकरीं नूनं न कुर्वे पातकं यथा । तां श्रुत्वा त्वदनुज्ञातः पश्चाद्यामि सुरालयम्

sarvadharmakarīṃ nūnaṃ na kurve pātakaṃ yathā | tāṃ śrutvā tvadanujñātaḥ paścādyāmi surālayam

Sanskrit only: no published translation is held for this verse.

दत्तात्रेय उवाच। एतन्निशम्य तेनोक्तं प्रियं धर्ममयं वचः । अतिप्रीत्याब्रवीद्धर्मं राजन्कांचनमालिनी

dattātreya uvāca| etanniśamya tenoktaṃ priyaṃ dharmamayaṃ vacaḥ | atiprītyābravīddharmaṃ rājankāṃcanamālinī

Sanskrit only: no published translation is held for this verse.

धर्मं भजस्व सततं त्यज भूतहिंसां सेवस्व साधुपुरुषान्जहि कामशत्रुम् । अन्यस्य दोषगुणकीर्तनमाशु हित्वा सत्यं वदार्चय हरिं व्रज देवलोकम्

dharmaṃ bhajasva satataṃ tyaja bhūtahiṃsāṃ sevasva sādhupuruṣānjahi kāmaśatrum | anyasya doṣaguṇakīrtanamāśu hitvā satyaṃ vadārcaya hariṃ vraja devalokam

Sanskrit only: no published translation is held for this verse.

देहेऽस्थिमांसरुधिरे स्वमतिं त्यज त्वं जायासुतादिषु सदा ममतां विमुंच । पश्यानिशं जगदिदं क्षणभंगुरं हि वैराग्यभावरसिको भव योगनिष्ठः

dehe'sthimāṃsarudhire svamatiṃ tyaja tvaṃ jāyāsutādiṣu sadā mamatāṃ vimuṃca | paśyāniśaṃ jagadidaṃ kṣaṇabhaṃguraṃ hi vairāgyabhāvarasiko bhava yoganiṣṭhaḥ

Sanskrit only: no published translation is held for this verse.

प्रीत्या मया निगदितं तव धर्ममार्गं चित्तो निधेहि सकलं भवशीलयुक्तः । संत्यज्य राक्षसतनुं धृतदेवदेहो ज्योतिर्मयो व्रज यथासुखमाशु नाकम्

prītyā mayā nigaditaṃ tava dharmamārgaṃ citto nidhehi sakalaṃ bhavaśīlayuktaḥ | saṃtyajya rākṣasatanuṃ dhṛtadevadeho jyotirmayo vraja yathāsukhamāśu nākam

Sanskrit only: no published translation is held for this verse.

श्रुत्वाधर्मं ततो हृष्टः संतुष्टो राक्षसोऽब्रवीत् । भवप्रमुदिता नित्यं सर्वदा शिवमस्तु ते

śrutvādharmaṃ tato hṛṣṭaḥ saṃtuṣṭo rākṣaso'bravīt | bhavapramuditā nityaṃ sarvadā śivamastu te

Sanskrit only: no published translation is held for this verse.

आचन्द्रार्कं रमस्व त्वं कैलासे शिवसन्निधौ । उमयाऽखंडितं प्रेम तवास्तु वरवर्णिनि

ācandrārkaṃ ramasva tvaṃ kailāse śivasannidhau | umayā'khaṃḍitaṃ prema tavāstu varavarṇini

Sanskrit only: no published translation is held for this verse.

धर्मनिष्ठा तपोनिष्ठा मातस्त्वं भव सर्वदा । मास्तु लोभः शरीरे ते आपन्नार्ति सदा हर

dharmaniṣṭhā taponiṣṭhā mātastvaṃ bhava sarvadā | māstu lobhaḥ śarīre te āpannārti sadā hara

Sanskrit only: no published translation is held for this verse.

इत्युक्त्वा तु प्रणम्याथ सतां कांचनमालिनीम् । जगाम राक्षसः स्वर्गं गंधर्वैर्बहुभिः स्तुतः

ityuktvā tu praṇamyātha satāṃ kāṃcanamālinīm | jagāma rākṣasaḥ svargaṃ gaṃdharvairbahubhiḥ stutaḥ

Sanskrit only: no published translation is held for this verse.

देवकन्यास्तदागत्य ववर्षुः पुष्पवृष्टिभिः । तस्याः कांचनमालिन्या मूर्ध्नि हर्षसमाकुलाः

devakanyāstadāgatya vavarṣuḥ puṣpavṛṣṭibhiḥ | tasyāḥ kāṃcanamālinyā mūrdhni harṣasamākulāḥ

Sanskrit only: no published translation is held for this verse.

तामालिंग्य ततः प्रोचुः कन्यकास्तु प्रियं वचः । कृतं भद्रे त्वया चित्रं राक्षसस्य विमोक्षणम्

tāmāliṃgya tataḥ procuḥ kanyakāstu priyaṃ vacaḥ | kṛtaṃ bhadre tvayā citraṃ rākṣasasya vimokṣaṇam

Sanskrit only: no published translation is held for this verse.

दुष्टस्यास्य भयात्कश्चिद्विशत्यस्मिन्न कानने । अधुना निर्भया ह्यत्र विचरामो यथासुखम्

duṣṭasyāsya bhayātkaścidviśatyasminna kānane | adhunā nirbhayā hyatra vicarāmo yathāsukham

Sanskrit only: no published translation is held for this verse.

श्रुत्वा तद्वचनं राजंस्तासां कांचनमालिनी । हृष्टा तेनैव दानेन कृतकृत्या तदा सती

śrutvā tadvacanaṃ rājaṃstāsāṃ kāṃcanamālinī | hṛṣṭā tenaiva dānena kṛtakṛtyā tadā satī

Sanskrit only: no published translation is held for this verse.

तं राक्षसं कांचनमालिनीवरा गन्धर्वकन्या परिमोच्य सत्वरम् । क्रीडंत्यमूभिः प्रययौ हरालयं प्रीत्या सपूर्णा च परोपकारया

taṃ rākṣasaṃ kāṃcanamālinīvarā gandharvakanyā parimocya satvaram | krīḍaṃtyamūbhiḥ prayayau harālayaṃ prītyā sapūrṇā ca paropakārayā

Sanskrit only: no published translation is held for this verse.

संवादमेनं वरकन्यकेरितं भक्त्या परं यः शृणुयाच्च मानवः । न बाध्यते जातु सदा स राक्षसैर्धर्मे मतिस्तस्य भृशं हि जायते

saṃvādamenaṃ varakanyakeritaṃ bhaktyā paraṃ yaḥ śṛṇuyācca mānavaḥ | na bādhyate jātu sadā sa rākṣasairdharme matistasya bhṛśaṃ hi jāyate

Sanskrit only: no published translation is held for this verse.