Padma Purāṇa 6.188

ईश्वर उवाच- अतः परं प्रवक्ष्यामि भवानि भवमुक्तये । गीताचतुर्दशाध्यायमवधारय सुस्मिते

īśvara uvāca- ataḥ paraṃ pravakṣyāmi bhavāni bhavamuktaye | gītācaturdaśādhyāyamavadhāraya susmite

Sanskrit only: no published translation is held for this verse.

मेदिन्यां यत्किलस्थूलमस्ति काश्मीरमंडलम् । राजधानी सरस्वत्या आस्ते चैव मनोहरा

medinyāṃ yatkilasthūlamasti kāśmīramaṃḍalam | rājadhānī sarasvatyā āste caiva manoharā

Sanskrit only: no published translation is held for this verse.

यामधिष्ठाय वाग्देवी ब्रह्मलोकं प्रयच्छति । हंसमारुह्यमानापि सावित्रीप्रहतैरपि

yāmadhiṣṭhāya vāgdevī brahmalokaṃ prayacchati | haṃsamāruhyamānāpi sāvitrīprahatairapi

Sanskrit only: no published translation is held for this verse.

सरस्वतीपदांभोज सेवामाश्रित्य कुंकुमैः । यत्र गौरवयंत्याशा हंसपक्षपुटोद्भवैः

sarasvatīpadāṃbhoja sevāmāśritya kuṃkumaiḥ | yatra gauravayaṃtyāśā haṃsapakṣapuṭodbhavaiḥ

Sanskrit only: no published translation is held for this verse.

निरंतरं तया चैव नृणां संस्कृतभाषिणाम् । सुपर्वाणमयी भाषा निमेषेणोपलभ्यते

niraṃtaraṃ tayā caiva nṛṇāṃ saṃskṛtabhāṣiṇām | suparvāṇamayī bhāṣā nimeṣeṇopalabhyate

Sanskrit only: no published translation is held for this verse.

प्रातर्गृहांगणोद्भूतै र्यत्रकुंकुमपांसुलैः । सर्वतोरुणितच्छाय शशांकरविमंडलम्

prātargṛhāṃgaṇodbhūtai ryatrakuṃkumapāṃsulaiḥ | sarvatoruṇitacchāya śaśāṃkaravimaṃḍalam

Sanskrit only: no published translation is held for this verse.

तत्रासीत्तेजसां राशिः शौर्यवर्मा नरेश्वरः । उद्यदुज्ज्वलबाणौघ खंडितारातिमंडलः

tatrāsīttejasāṃ rāśiḥ śauryavarmā nareśvaraḥ | udyadujjvalabāṇaugha khaṃḍitārātimaṃḍalaḥ

Sanskrit only: no published translation is held for this verse.

अभूच्च सिंहलद्वीपे राजा सिंहपराक्रमः । नाम्ना विक्रमवेतालः कलानामपि शेवधिः

abhūcca siṃhaladvīpe rājā siṃhaparākramaḥ | nāmnā vikramavetālaḥ kalānāmapi śevadhiḥ

Sanskrit only: no published translation is held for this verse.

उभौ परस्परं मैत्रीं वर्द्धयांचक्रतुः क्रमात् । तत्तद्देशसमुत्पन्नैरपूर्वैः प्रचुरोत्करैः

ubhau parasparaṃ maitrīṃ varddhayāṃcakratuḥ kramāt | tattaddeśasamutpannairapūrvaiḥ pracurotkaraiḥ

Sanskrit only: no published translation is held for this verse.

एकदा प्रहितं प्रेम्णा प्रभूतं शौर्यवर्मणा । राजा विक्रमवेतालो विलोक्य शुनकीद्वयम्

ekadā prahitaṃ premṇā prabhūtaṃ śauryavarmaṇā | rājā vikramavetālo vilokya śunakīdvayam

Sanskrit only: no published translation is held for this verse.

मत्तमातंगतुरग मणिभूषणचामरम् । प्रेषयामास मित्राय प्रभूतं शौर्यवर्मणे

mattamātaṃgaturaga maṇibhūṣaṇacāmaram | preṣayāmāsa mitrāya prabhūtaṃ śauryavarmaṇe

Sanskrit only: no published translation is held for this verse.

एकदा शिबिकारूढश्चारु चामरवीजितः । सुवर्णशृंखलारूढं वाद्यडिंडिमडंबरम्

ekadā śibikārūḍhaścāru cāmaravījitaḥ | suvarṇaśṛṃkhalārūḍhaṃ vādyaḍiṃḍimaḍaṃbaram

Sanskrit only: no published translation is held for this verse.

शुनीयुगलमादाय मृगया कौतुकोत्सुकः । राजा जगाम बाह्यालीं समं राजकुमारकैः

śunīyugalamādāya mṛgayā kautukotsukaḥ | rājā jagāma bāhyālīṃ samaṃ rājakumārakaiḥ

Sanskrit only: no published translation is held for this verse.

पणबंधविधानेन समुपेतं शशामिषम् । तत्र राजकुमाराणां महान्कोलाहलोऽभवत्

paṇabaṃdhavidhānena samupetaṃ śaśāmiṣam | tatra rājakumārāṇāṃ mahānkolāhalo'bhavat

Sanskrit only: no published translation is held for this verse.

ततः समानवयसा केनचिद्राजसूनुना । बहुमूल्यं पणं कृत्वा राजाचिक्रीडकौतुकी

tataḥ samānavayasā kenacidrājasūnunā | bahumūlyaṃ paṇaṃ kṛtvā rājācikrīḍakautukī

Sanskrit only: no published translation is held for this verse.

ततोवतार्य दोलाया विरुदावलिगर्विताम् । धावतः शशकस्योच्चैः पृष्ठे मुंचन्नृपं शुनीम्

tatovatārya dolāyā virudāvaligarvitām | dhāvataḥ śaśakasyoccaiḥ pṛṣṭhe muṃcannṛpaṃ śunīm

Sanskrit only: no published translation is held for this verse.

मुमोच राजपुत्रोऽपि प्रेमपात्रं महाभुजः । विरराम शुनीमुच्चैः संकीर्त्य विरुदावलीम्

mumoca rājaputro'pi premapātraṃ mahābhujaḥ | virarāma śunīmuccaiḥ saṃkīrtya virudāvalīm

Sanskrit only: no published translation is held for this verse.

अलक्ष्यमाणवेगेऽस्मिन्शुनीयुगलकेभृशम् । धावत्युत्थितमेवासीत्पश्यतां सर्वभूभृताम्

alakṣyamāṇavege'sminśunīyugalakebhṛśam | dhāvatyutthitamevāsītpaśyatāṃ sarvabhūbhṛtām

Sanskrit only: no published translation is held for this verse.

पपात गर्ते महति शशकोऽतिश्रमादसौ । पतितोऽपि शुनी वश्यो नाभवच्छशशावकः

papāta garte mahati śaśako'tiśramādasau | patito'pi śunī vaśyo nābhavacchaśaśāvakaḥ

Sanskrit only: no published translation is held for this verse.

ततः शनैः समुत्थाय धावन्नाक्रम्यरोषतः । जगृहे राजशुन्याऽसौ शशकः फेनमुद्वमन्

tataḥ śanaiḥ samutthāya dhāvannākramyaroṣataḥ | jagṛhe rājaśunyā'sau śaśakaḥ phenamudvaman

Sanskrit only: no published translation is held for this verse.

ततः कथंचिदुप्लुत्य गच्छन्विस्खलयञ्छशः । राजपुत्रशुनक्यासौ गृहीतः कंधरातटे

tataḥ kathaṃciduplutya gacchanviskhalayañchaśaḥ | rājaputraśunakyāsau gṛhītaḥ kaṃdharātaṭe

Sanskrit only: no published translation is held for this verse.

जितमस्माभिरत्यर्थमिति संजल्पतां नृणाम् । कोलाहले शंकिताया शुन्या निर्गतवान्मुखात्

jitamasmābhiratyarthamiti saṃjalpatāṃ nṛṇām | kolāhale śaṃkitāyā śunyā nirgatavānmukhāt

Sanskrit only: no published translation is held for this verse.

ततो दंष्ट्राव्रणश्रेणी क्षरद्रुधिरधारकः । क्वापि र्ममरभूभागे निलीयस्थितवाञ्छशः

tato daṃṣṭrāvraṇaśreṇī kṣaradrudhiradhārakaḥ | kvāpi rmamarabhūbhāge nilīyasthitavāñchaśaḥ

Sanskrit only: no published translation is held for this verse.

जिघ्रंत्या राजशुन्याऽसौ भूभागं धनरोषया । दृष्टमात्रः परित्रस्तो हस्तमात्रं ततोऽगमत्

jighraṃtyā rājaśunyā'sau bhūbhāgaṃ dhanaroṣayā | dṛṣṭamātraḥ paritrasto hastamātraṃ tato'gamat

Sanskrit only: no published translation is held for this verse.

यत्र कर्पूरकदली क्रोडव्याघ्रदरीतलः । चोली कपोलफलकान्चुबन्वाति समीरणः२५। उद्भिन्न केतकीकोशरजोमुकुलितेक्षणः । विस्रब्धाहरणा यत्रच्छायां तां परितन्वतः

yatra karpūrakadalī kroḍavyāghradarītalaḥ | colī kapolaphalakāncubanvāti samīraṇaḥ25| udbhinna ketakīkośarajomukulitekṣaṇaḥ | visrabdhāharaṇā yatracchāyāṃ tāṃ paritanvataḥ

Sanskrit only: no published translation is held for this verse.

नारिकेलफलैर्यत्र स्वयं निपतितैरधः । अपि चूतफलैस्तृप्ताः पक्वैः शाखामृगा अपि

nārikelaphalairyatra svayaṃ nipatitairadhaḥ | api cūtaphalaistṛptāḥ pakvaiḥ śākhāmṛgā api

Sanskrit only: no published translation is held for this verse.

अपि केसरिणो यत्र खेलंति कलभैः समम् । फणिनः केकिबर्हेषु निर्विशंकं विशंति च

api kesariṇo yatra khelaṃti kalabhaiḥ samam | phaṇinaḥ kekibarheṣu nirviśaṃkaṃ viśaṃti ca

Sanskrit only: no published translation is held for this verse.

यत्राश्रमांतरे विप्रो वत्सनामा जितेंद्रियः । शांतश्चतुर्दशाध्यायं जपन्नास्ते निरंतरम्

yatrāśramāṃtare vipro vatsanāmā jiteṃdriyaḥ | śāṃtaścaturdaśādhyāyaṃ japannāste niraṃtaram

Sanskrit only: no published translation is held for this verse.

तत्र तच्छिष्यपादाब्ज प्रक्षालनजलैः कृते । कर्दमे न्यपतद्गत्वा जीवशेषो मुहुः श्वसन्

tatra tacchiṣyapādābja prakṣālanajalaiḥ kṛte | kardame nyapatadgatvā jīvaśeṣo muhuḥ śvasan

Sanskrit only: no published translation is held for this verse.

ततः कर्दमसंस्पर्शमात्रनिस्तीर्ण संसृतिः । दिव्यं विमानमारुह्य निर्ययौ शशको दिवम्

tataḥ kardamasaṃsparśamātranistīrṇa saṃsṛtiḥ | divyaṃ vimānamāruhya niryayau śaśako divam

Sanskrit only: no published translation is held for this verse.

ततः शुन्यपि लिप्तांगीस्तोकैः कर्दमबिंदुभिः । क्षुत्पिपासार्तिरहिता शुनीरूपं विहाय सा

tataḥ śunyapi liptāṃgīstokaiḥ kardamabiṃdubhiḥ | kṣutpipāsārtirahitā śunīrūpaṃ vihāya sā

Sanskrit only: no published translation is held for this verse.

ततो दिव्यांगनारम्यं गंधर्वैरुपशोभितम् । दिव्यं विमानमारुह्य शुन्यपि त्रिदिवं ययौ

tato divyāṃganāramyaṃ gaṃdharvairupaśobhitam | divyaṃ vimānamāruhya śunyapi tridivaṃ yayau

Sanskrit only: no published translation is held for this verse.

ततो जहास मेधावी शिष्यो नाम्ना स्वकंधरः । विचार्य विस्मितः पूर्वजन्मवैरस्य कारणम्

tato jahāsa medhāvī śiṣyo nāmnā svakaṃdharaḥ | vicārya vismitaḥ pūrvajanmavairasya kāraṇam

Sanskrit only: no published translation is held for this verse.

राजापि पर्यपृच्छत्तं विस्मयस्मेरलोचनः । प्रणम्य परया भक्त्या विनयैकपयोनिधिः

rājāpi paryapṛcchattaṃ vismayasmeralocanaḥ | praṇamya parayā bhaktyā vinayaikapayonidhiḥ

Sanskrit only: no published translation is held for this verse.

कथां कथय मे विप्र हीनयोनि निषेवितौ । अज्ञौयौ जग्मतुः स्वर्गे शुनी शशकशावकौ

kathāṃ kathaya me vipra hīnayoni niṣevitau | ajñauyau jagmatuḥ svarge śunī śaśakaśāvakau

Sanskrit only: no published translation is held for this verse.

शिष्य उवाच। वत्सनामा द्विजन्मास्ते वनेऽमुष्मिन्जितेंद्रियः । चतुर्दशं तु ह्यध्यायं गीतानां सर्वदा जपन्

śiṣya uvāca| vatsanāmā dvijanmāste vane'muṣminjiteṃdriyaḥ | caturdaśaṃ tu hyadhyāyaṃ gītānāṃ sarvadā japan

Sanskrit only: no published translation is held for this verse.

शिष्योऽहं तस्य भूपाल ब्रह्मविद्याविशारदः । चतुर्दश तु अध्यायं जपामि प्रत्यहं नृप

śiṣyo'haṃ tasya bhūpāla brahmavidyāviśāradaḥ | caturdaśa tu adhyāyaṃ japāmi pratyahaṃ nṛpa

Sanskrit only: no published translation is held for this verse.

मदीयचरणांभोजप्रक्षालनजले लुठन् । शशस्त्रिदिवमापन्नः शुनक्या सह भूपते

madīyacaraṇāṃbhojaprakṣālanajale luṭhan | śaśastridivamāpannaḥ śunakyā saha bhūpate

Sanskrit only: no published translation is held for this verse.

राजोवाच। हेतुना केन कथय हसितं च द्विजोत्तम । अतः किमपि साकूतं मन्यमानेन सादरम्

rājovāca| hetunā kena kathaya hasitaṃ ca dvijottama | ataḥ kimapi sākūtaṃ manyamānena sādaram

Sanskrit only: no published translation is held for this verse.

शिष्य उवाच। महाराष्ट्रेति नगरं नाम्ना प्रत्युदकं महत् । तत्रासीद्ब्राह्मणो नाम्ना केशवः कितवाग्रणीः

śiṣya uvāca| mahārāṣṭreti nagaraṃ nāmnā pratyudakaṃ mahat | tatrāsīdbrāhmaṇo nāmnā keśavaḥ kitavāgraṇīḥ

Sanskrit only: no published translation is held for this verse.

विलोभनाभवत्तस्य जाया स्वैरविहारिणी । तेन सा हन्यते क्रोधाद्वैरं संचिंत्य जन्मनः

vilobhanābhavattasya jāyā svairavihāriṇī | tena sā hanyate krodhādvairaṃ saṃciṃtya janmanaḥ

Sanskrit only: no published translation is held for this verse.

ततः स्त्रीवधपापेन शशको जायते द्विजः । किल्बिषाच्छुनकी सापि जाता वंचनजन्मनः

tataḥ strīvadhapāpena śaśako jāyate dvijaḥ | kilbiṣācchunakī sāpi jātā vaṃcanajanmanaḥ

Sanskrit only: no published translation is held for this verse.

पूर्वेण जन्मनाभ्यस्तं वैरं विस्मरतो नहि । आसेदिवद्भ्यां बहुधा योन्यंतरमपि क्वचित्

pūrveṇa janmanābhyastaṃ vairaṃ vismarato nahi | āsedivadbhyāṃ bahudhā yonyaṃtaramapi kvacit

Sanskrit only: no published translation is held for this verse.

इत्याकलय्य सकलं भूपालः श्रद्धयान्वितः । गीतामभ्यस्य सकलामवाप परमां गतिम्

ityākalayya sakalaṃ bhūpālaḥ śraddhayānvitaḥ | gītāmabhyasya sakalāmavāpa paramāṃ gatim

Sanskrit only: no published translation is held for this verse.