Padma Purāṇa 6.207

सौभरिरुवाच- धर्मात्मज निशम्यैतद्वचस्तस्य महात्मनः । नारदस्य शिबी राजा प्रोवाचेदं विनीतवत्

saubhariruvāca- dharmātmaja niśamyaitadvacastasya mahātmanaḥ | nāradasya śibī rājā provācedaṃ vinītavat

Sanskrit only: no published translation is held for this verse.

शिबिरुवाच- तिष्ठंत्यो मरुमार्गे ता राक्षस्यो मुनिपुंगव । एतस्या द्वारिकायास्तु लेभिरे सलिलं कुतः

śibiruvāca- tiṣṭhaṃtyo marumārge tā rākṣasyo munipuṃgava | etasyā dvārikāyāstu lebhire salilaṃ kutaḥ

Sanskrit only: no published translation is held for this verse.

नारद उवाच- शृणु राजन्कथां दिव्यां पूतां पापप्रणाशिनीम् । विमलाख्यस्य विप्रस्य हिमवद्द्रोणिवासिनः

nārada uvāca- śṛṇu rājankathāṃ divyāṃ pūtāṃ pāpapraṇāśinīm | vimalākhyasya viprasya himavaddroṇivāsinaḥ

Sanskrit only: no published translation is held for this verse.

एकस्तु हिमवद्द्रोण्यां विमलो नाम भूसुरः । देवर्षिपितृवह्नीनां पूजकोऽतिथिपूजकः

ekastu himavaddroṇyāṃ vimalo nāma bhūsuraḥ | devarṣipitṛvahnīnāṃ pūjako'tithipūjakaḥ

Sanskrit only: no published translation is held for this verse.

हरिपादार्चनरतो वेदवेदांगधर्मवित् । वासुदेवगुणग्राम पुराणश्रुतिमानसः

haripādārcanarato vedavedāṃgadharmavit | vāsudevaguṇagrāma purāṇaśrutimānasaḥ

Sanskrit only: no published translation is held for this verse.

वार्द्धके तस्य पुत्रोऽभूत्प्रसादाच्चक्रपाणिनः । चकार हरिदत्तेति नाम्ना तं जनकस्तदा

vārddhake tasya putro'bhūtprasādāccakrapāṇinaḥ | cakāra haridatteti nāmnā taṃ janakastadā

Sanskrit only: no published translation is held for this verse.

विधिवद्विदधे चास्य क्षौरकर्मादिकं च तत् । गुरोः सकाशाज्जग्राह छंदांसि हरिदत्तकः

vidhivadvidadhe cāsya kṣaurakarmādikaṃ ca tat | guroḥ sakāśājjagrāha chaṃdāṃsi haridattakaḥ

Sanskrit only: no published translation is held for this verse.

अधीत्य विधिवद्वेदान्दत्त्वा च गुरुदक्षिणाम् । प्रवव्राज विरक्तः सन्समूलं चाश्रमद्वयम्

adhītya vidhivadvedāndattvā ca gurudakṣiṇām | pravavrāja viraktaḥ sansamūlaṃ cāśramadvayam

Sanskrit only: no published translation is held for this verse.

ज्ञात्वा तत्कर्मतन्माता व्यलपत्पुत्रवत्सला । स्नापयंती कुचद्वंद्वं पुत्रविश्लेषजाश्रुभिः

jñātvā tatkarmatanmātā vyalapatputravatsalā | snāpayaṃtī kucadvaṃdvaṃ putraviśleṣajāśrubhiḥ

Sanskrit only: no published translation is held for this verse.

मातोवाच- मामनाथां परित्यज्य तात यातोऽसि कुत्र वै । पितरं च जराग्रस्तं षट्पदो बल्वजाविव

mātovāca- māmanāthāṃ parityajya tāta yāto'si kutra vai | pitaraṃ ca jarāgrastaṃ ṣaṭpado balvajāviva

Sanskrit only: no published translation is held for this verse.

वार्द्धके त्वं मया प्राप्तः श्रीपतेः पादसेवया । मां विहायाभजस्त्वं वै चरणं तस्य मुक्तये

vārddhake tvaṃ mayā prāptaḥ śrīpateḥ pādasevayā | māṃ vihāyābhajastvaṃ vai caraṇaṃ tasya muktaye

Sanskrit only: no published translation is held for this verse.

अहं मूढा ध्रुवं तात ध्रुवमाराध्य यद्धरिम् । अध्रुवं वांछितवती भवन्तं तु सुखलब्धये

ahaṃ mūḍhā dhruvaṃ tāta dhruvamārādhya yaddharim | adhruvaṃ vāṃchitavatī bhavantaṃ tu sukhalabdhaye

Sanskrit only: no published translation is held for this verse.

त्वं सुधीर्वत्स सर्वार्थं यद्विष्णुं भजसे स्वयम् । अध्रुवं जगदेतद्वै मत्वासीस्त्वमपि ध्रुवम्

tvaṃ sudhīrvatsa sarvārthaṃ yadviṣṇuṃ bhajase svayam | adhruvaṃ jagadetadvai matvāsīstvamapi dhruvam

Sanskrit only: no published translation is held for this verse.

किं करोमि क्व गच्छामि माया ज्ञानं छिनत्ति मे । सुफलोत्पादकं शास्त्री रंभामूलमिवोल्बणा

kiṃ karomi kva gacchāmi māyā jñānaṃ chinatti me | suphalotpādakaṃ śāstrī raṃbhāmūlamivolbaṇā

Sanskrit only: no published translation is held for this verse.

धन्यो दशरथो राजा यो मृतो रामशोकतः । धिङ्मां पुत्रस्य विश्लेषाद्धारयंती स्वजीवितम्

dhanyo daśaratho rājā yo mṛto rāmaśokataḥ | dhiṅmāṃ putrasya viśleṣāddhārayaṃtī svajīvitam

Sanskrit only: no published translation is held for this verse.

आगच्छ दर्शंन देहि तात मां परितारय । वद वेदमयीं वाणीं पितुरग्रे गुणार्णव

āgaccha darśaṃna dehi tāta māṃ paritāraya | vada vedamayīṃ vāṇīṃ pituragre guṇārṇava

Sanskrit only: no published translation is held for this verse.

नारद उवाच- एवं विलप्य तन्माता राजन्सा पतिता भुवि । दलनाद्राहुदत्तानां लेखा चांद्रमसी यथा

nārada uvāca- evaṃ vilapya tanmātā rājansā patitā bhuvi | dalanādrāhudattānāṃ lekhā cāṃdramasī yathā

Sanskrit only: no published translation is held for this verse.

अथाजगाम विप्रर्षिर्विमलो नृपसत्तमः । दृष्ट्वा तां पतितां भूमौ किंकिमित्यभ्यभाषत

athājagāma viprarṣirvimalo nṛpasattamaḥ | dṛṣṭvā tāṃ patitāṃ bhūmau kiṃkimityabhyabhāṣata

Sanskrit only: no published translation is held for this verse.

कस्मादियं कीर्णकेशव्यस्तवस्त्रविभूषणा । पतिता भुवि कल्याणं हरिदत्तस्य विद्यते

kasmādiyaṃ kīrṇakeśavyastavastravibhūṣaṇā | patitā bhuvi kalyāṇaṃ haridattasya vidyate

Sanskrit only: no published translation is held for this verse.

तस्यावयस्यास्ताः सर्वाः प्रोचुस्तं विमलं नृप । वयस्या ऊचुः - अधीत्य वेदांस्ते पुत्रो दत्त्वा च गुरुदक्षिणाम्

tasyāvayasyāstāḥ sarvāḥ procustaṃ vimalaṃ nṛpa | vayasyā ūcuḥ - adhītya vedāṃste putro dattvā ca gurudakṣiṇām

Sanskrit only: no published translation is held for this verse.

नारायणपरो भूत्वा प्राव्रजद्धरिदत्तकः । तस्य विश्लेषशोकेन पतितेयं धरातले

nārāyaṇaparo bhūtvā prāvrajaddharidattakaḥ | tasya viśleṣaśokena patiteyaṃ dharātale

Sanskrit only: no published translation is held for this verse.

नारद उवाच- इत्याकर्ण्य वचस्तासां विमलो बुद्धिमत्तरः । प्राबोधयन्निजां भार्यामिति वागमृतेन सः

nārada uvāca- ityākarṇya vacastāsāṃ vimalo buddhimattaraḥ | prābodhayannijāṃ bhāryāmiti vāgamṛtena saḥ

Sanskrit only: no published translation is held for this verse.

विमल उवाच- उत्तिष्ठ जाये शृणु वाक्यमीरितं मया किमर्थं पतिता विषीदसि । धन्यः सुतस्ते य इमं विनश्वरं विज्ञाय भेजे हरिपादपल्लवम्

vimala uvāca- uttiṣṭha jāye śṛṇu vākyamīritaṃ mayā kimarthaṃ patitā viṣīdasi | dhanyaḥ sutaste ya imaṃ vinaśvaraṃ vijñāya bheje haripādapallavam

Sanskrit only: no published translation is held for this verse.

धन्या त्वमप्यस्य जनि प्रदायिनी यस्याः सुतस्ते हरिपादभागभूत् । संतारयिष्यत्यपि मामसंशयं कुलं कुलोत्थानपि पूरुषान्शुभे

dhanyā tvamapyasya jani pradāyinī yasyāḥ sutaste haripādabhāgabhūt | saṃtārayiṣyatyapi māmasaṃśayaṃ kulaṃ kulotthānapi pūruṣānśubhe

Sanskrit only: no published translation is held for this verse.

क्व विश्वमेकतच्च पतच्चलं क्व सेवनं शाश्वतलोकदं हरेः । मत्वेति भेजुर्भरतादयो नृपा यथा हरिं साध्वि तथैव ते सुतः

kva viśvamekatacca pataccalaṃ kva sevanaṃ śāśvatalokadaṃ hareḥ | matveti bhejurbharatādayo nṛpā yathā hariṃ sādhvi tathaiva te sutaḥ

Sanskrit only: no published translation is held for this verse.

दारा धनागार शरीरबांधवा एते भवंति प्रतिजन्मदुःखदाः । तावन्नयावद्धरिपादपल्लवं भजेत धीरोऽखिलकामवर्जितः

dārā dhanāgāra śarīrabāṃdhavā ete bhavaṃti pratijanmaduḥkhadāḥ | tāvannayāvaddharipādapallavaṃ bhajeta dhīro'khilakāmavarjitaḥ

Sanskrit only: no published translation is held for this verse.

नारद उवाच- एवं प्रबोधिता तेन धीरेण धरणीतलात् । उत्थाय निजभर्तारमब्रवीद्दीनया गिरा

nārada uvāca- evaṃ prabodhitā tena dhīreṇa dharaṇītalāt | utthāya nijabhartāramabravīddīnayā girā

Sanskrit only: no published translation is held for this verse.

भार्योवाच। सर्वं जानाम्यहं कांत यत्त्वया साधुभाषितम् । कुलधुर्यं न पश्यामि यतस्तप्यामि वै भृशम्

bhāryovāca| sarvaṃ jānāmyahaṃ kāṃta yattvayā sādhubhāṣitam | kuladhuryaṃ na paśyāmi yatastapyāmi vai bhṛśam

Sanskrit only: no published translation is held for this verse.

पुत्रे सति महत्तीर्थे किं वा केशवसेवया । गृह एवावयोर्मृत्युश्चेत्स्याल्लोकद्वयं तदा

putre sati mahattīrthe kiṃ vā keśavasevayā | gṛha evāvayormṛtyuścetsyāllokadvayaṃ tadā

Sanskrit only: no published translation is held for this verse.

सत्पुत्रोत्पादने यत्नः कर्त्तव्यः खलु मानवैः । तारयंति पितॄन्पुत्रा यतः संसारवारिधैः

satputrotpādane yatnaḥ karttavyaḥ khalu mānavaiḥ | tārayaṃti pitṝnputrā yataḥ saṃsāravāridhaiḥ

Sanskrit only: no published translation is held for this verse.

स्रष्टारं सर्वजंतूनां धातारं पुत्रकाम्यया । भज वांछसि चेत्पुत्रं कुलधुर्यं महामते

sraṣṭāraṃ sarvajaṃtūnāṃ dhātāraṃ putrakāmyayā | bhaja vāṃchasi cetputraṃ kuladhuryaṃ mahāmate

Sanskrit only: no published translation is held for this verse.

नारद उवाच- इत्याकर्ण्यवचस्तस्याः प्रत्याह विमलो द्विजः । ब्रह्मक्षेत्रं प्रयागं हि याम्यहं पुत्रकाम्यया

nārada uvāca- ityākarṇyavacastasyāḥ pratyāha vimalo dvijaḥ | brahmakṣetraṃ prayāgaṃ hi yāmyahaṃ putrakāmyayā

Sanskrit only: no published translation is held for this verse.

इत्युक्त्वा चलितः सोऽथ हरिद्वारमगाद्द्विजः । स्नात्वा तत्रापि विधिवदिंद्रप्रस्थमथागमत्

ityuktvā calitaḥ so'tha haridvāramagāddvijaḥ | snātvā tatrāpi vidhivadiṃdraprasthamathāgamat

Sanskrit only: no published translation is held for this verse.

कतिभिर्वासरैर्वीर सायंकालेऽखिलार्थिदम् । स्नात्वा भुक्त्वा निशायां स सुष्वाप यमुनातटे

katibhirvāsarairvīra sāyaṃkāle'khilārthidam | snātvā bhuktvā niśāyāṃ sa suṣvāpa yamunātaṭe

Sanskrit only: no published translation is held for this verse.

निशीथे स्वपतस्तस्य विमलस्यांतिके विधिः । हंसमारुह्य देवेशस्तीर्थैः सर्वैरनुद्रुतः

niśīthe svapatastasya vimalasyāṃtike vidhiḥ | haṃsamāruhya deveśastīrthaiḥ sarvairanudrutaḥ

Sanskrit only: no published translation is held for this verse.

आगत्योत्थापयामास विमलं पुत्रवांच्छकम् । उवाच च सुरश्रेष्ठो वचनं मधुराक्षरम्

āgatyotthāpayāmāsa vimalaṃ putravāṃcchakam | uvāca ca suraśreṣṭho vacanaṃ madhurākṣaram

Sanskrit only: no published translation is held for this verse.

ब्रह्मोवाच- जाने समीतिं चित्तं त्वदीये मनसि स्थितम् । न तत्पूरयितुं कल्पो यतस्तत्कारणं शृणु

brahmovāca- jāne samītiṃ cittaṃ tvadīye manasi sthitam | na tatpūrayituṃ kalpo yatastatkāraṇaṃ śṛṇu

Sanskrit only: no published translation is held for this verse.

एकदा मेरुशिखरे मिलिताः सर्वदेवताः । तुष्टुवुर्मद्भवमुखा माधवं कार्यसिद्धये

ekadā meruśikhare militāḥ sarvadevatāḥ | tuṣṭuvurmadbhavamukhā mādhavaṃ kāryasiddhaye

Sanskrit only: no published translation is held for this verse.

स्तुतो स्मदादिविबुधैः कृपया भगवान्हरिः । प्रसन्नोभूत्तदा विष्णुर्वृणुध्वमिति चाब्रवीत्

stuto smadādivibudhaiḥ kṛpayā bhagavānhariḥ | prasannobhūttadā viṣṇurvṛṇudhvamiti cābravīt

Sanskrit only: no published translation is held for this verse.

इत्युक्तास्तेन ते देवा यथाभिलषितं वरम् । श्रीपतेः प्राप्य ते जग्मुः सर्वे स्वं स्वं निकेतनम्

ityuktāstena te devā yathābhilaṣitaṃ varam | śrīpateḥ prāpya te jagmuḥ sarve svaṃ svaṃ niketanam

Sanskrit only: no published translation is held for this verse.

मयोक्तमिति देवेश देहि मे वरमुत्तमम् । प्रयागं नाम मे क्षेत्रं भवत्वखिलकामदम्

mayoktamiti deveśa dehi me varamuttamam | prayāgaṃ nāma me kṣetraṃ bhavatvakhilakāmadam

Sanskrit only: no published translation is held for this verse.

ततः शतगुणं भूयाद्दिवतीयं क्षेत्रकं मम । इंद्रप्रस्थगतं सम्यग्वृत्तं त्वत्तो मयानघ

tataḥ śataguṇaṃ bhūyāddivatīyaṃ kṣetrakaṃ mama | iṃdraprasthagataṃ samyagvṛttaṃ tvatto mayānagha

Sanskrit only: no published translation is held for this verse.

इत्याकर्ण्य वचो मह्यं भगवानाह मां तदा । तथास्त्विति पुनर्वाचमुवाच श्रूयतां वचः

ityākarṇya vaco mahyaṃ bhagavānāha māṃ tadā | tathāstviti punarvācamuvāca śrūyatāṃ vacaḥ

Sanskrit only: no published translation is held for this verse.

श्रीभगवानुवाच । इंद्रस्य खांडवारण्ये इंद्रप्रस्थाभिधं शुभम् । क्षेत्रं कलिंदजातीरे मत्तुल्यास्तत्र ये मृताः

śrībhagavānuvāca | iṃdrasya khāṃḍavāraṇye iṃdraprasthābhidhaṃ śubham | kṣetraṃ kaliṃdajātīre mattulyāstatra ye mṛtāḥ

Sanskrit only: no published translation is held for this verse.

विरिंचे रचिता तत्र स्वकीया द्वारकापुरी । मया शतगुणांभोधी तीरस्थायाः पुरा गुणैः

viriṃce racitā tatra svakīyā dvārakāpurī | mayā śataguṇāṃbhodhī tīrasthāyāḥ purā guṇaiḥ

Sanskrit only: no published translation is held for this verse.

तामुल्लंघ्य नरो यस्तु तीर्थमन्यन्निषेव्यते । न तीर्थफलमाप्नोति स पुमान्न मृषोदितम्

tāmullaṃghya naro yastu tīrthamanyanniṣevyate | na tīrthaphalamāpnoti sa pumānna mṛṣoditam

Sanskrit only: no published translation is held for this verse.

सर्वतीर्थोदितं पुण्यं शक्रतीर्थे लभेन्नरः । द्वारका च पुरी मायातीर्थमन्यच्च रक्षति

sarvatīrthoditaṃ puṇyaṃ śakratīrthe labhennaraḥ | dvārakā ca purī māyātīrthamanyacca rakṣati

Sanskrit only: no published translation is held for this verse.

यो निमज्ज्यान्यतीर्थेषु कृत्वा च विविधां क्रियाम् । अत्रैष्यति फलं तेभ्यः फलं प्राप्स्यति स ध्रुवम्

yo nimajjyānyatīrtheṣu kṛtvā ca vividhāṃ kriyām | atraiṣyati phalaṃ tebhyaḥ phalaṃ prāpsyati sa dhruvam

Sanskrit only: no published translation is held for this verse.

इत्युक्त्वांतर्द्धधे विष्णुरहमप्यगमं स्वकम् । लोकं द्विजेंद्र वैकुंठादधोभागे व्यवस्थितम्

ityuktvāṃtarddhadhe viṣṇurahamapyagamaṃ svakam | lokaṃ dvijeṃdra vaikuṃṭhādadhobhāge vyavasthitam

Sanskrit only: no published translation is held for this verse.

प्रयागान्मामकात्क्षेत्रात्काशी शतगुणा स्मृता । काश्याः शतगुणं तीर्थं निगमोद्बोधकं तथा

prayāgānmāmakātkṣetrātkāśī śataguṇā smṛtā | kāśyāḥ śataguṇaṃ tīrthaṃ nigamodbodhakaṃ tathā

Sanskrit only: no published translation is held for this verse.

तीर्थसप्तकमेतत्तु त्रयं तुल्यफलं स्मृतम् । एतत्त्रयमनुल्लंघ्य यो गच्छति सितासितम्

tīrthasaptakametattu trayaṃ tulyaphalaṃ smṛtam | etattrayamanullaṃghya yo gacchati sitāsitam

Sanskrit only: no published translation is held for this verse.

तस्याहं वांछितं विप्र ददामि खलु नान्यथा । केचिदाहुः सप्तपुरी समपुण्या महर्षयः

tasyāhaṃ vāṃchitaṃ vipra dadāmi khalu nānyathā | kecidāhuḥ saptapurī samapuṇyā maharṣayaḥ

Sanskrit only: no published translation is held for this verse.

अयोध्याद्याः शतं ताभ्य इंद्रप्रस्थं प्रचक्षते । त्वमत्रागत्य विप्रेंद्र सर्वकामफलप्रदे

ayodhyādyāḥ śataṃ tābhya iṃdraprasthaṃ pracakṣate | tvamatrāgatya vipreṃdra sarvakāmaphalaprade

Sanskrit only: no published translation is held for this verse.

तीर्थे श्रीद्वारकाख्ये हि कुरु स्नानं सुतेच्छया । यावंति सर्वतीर्थानि ब्रह्मांडकलशोदरे

tīrthe śrīdvārakākhye hi kuru snānaṃ sutecchayā | yāvaṃti sarvatīrthāni brahmāṃḍakalaśodare

Sanskrit only: no published translation is held for this verse.

तेभ्यो परिमितं पुण्यं शतनामनि कीर्तिते । सुतं ते कुलधौरेयं तीर्थमेतत्प्रदास्यति

tebhyo parimitaṃ puṇyaṃ śatanāmani kīrtite | sutaṃ te kuladhaureyaṃ tīrthametatpradāsyati

Sanskrit only: no published translation is held for this verse.

स्नानाच्च तव गोविंदः प्रसन्नात्मा भविष्यति । नारद उवाच- इत्युक्त्वा देवदेवेशो ब्रह्मा तत्र तिरोधते

snānācca tava goviṃdaḥ prasannātmā bhaviṣyati | nārada uvāca- ityuktvā devadeveśo brahmā tatra tirodhate

Sanskrit only: no published translation is held for this verse.

विमलोऽपि तदा स्नात्वा देवादीनप्यतर्पयत् । इत्युवाच स धर्मात्मा द्वारके कृष्णवल्लभे

vimalo'pi tadā snātvā devādīnapyatarpayat | ityuvāca sa dharmātmā dvārake kṛṣṇavallabhe

Sanskrit only: no published translation is held for this verse.

सुतं वंशकरं देहि मह्यंभक्ताय ते नमः । इत्युक्ते तेन विप्रेण देववागभवत्तदा

sutaṃ vaṃśakaraṃ dehi mahyaṃbhaktāya te namaḥ | ityukte tena vipreṇa devavāgabhavattadā

Sanskrit only: no published translation is held for this verse.

देववागुवाच- पुत्रस्ते धर्म्मतत्वज्ञो वंशकर्त्ता भविष्यति । प्रसादादस्य तीर्थस्य सर्वतीर्थशिरोमणेः

devavāguvāca- putraste dharmmatatvajño vaṃśakarttā bhaviṣyati | prasādādasya tīrthasya sarvatīrthaśiromaṇeḥ

Sanskrit only: no published translation is held for this verse.

याहि गेहं विलंबं मा सुकृतं तेन मज्जनम् । नारद उवाच- इत्याकर्ण्य सतां वाणीं विश्वस्तः पुत्रजन्मनि

yāhi gehaṃ vilaṃbaṃ mā sukṛtaṃ tena majjanam | nārada uvāca- ityākarṇya satāṃ vāṇīṃ viśvastaḥ putrajanmani

Sanskrit only: no published translation is held for this verse.

चचाल जलमादाय द्वारकायाः कमंडलौ । मार्गे तस्य सखा विप्रो मलयाचलकेतनः

cacāla jalamādāya dvārakāyāḥ kamaṃḍalau | mārge tasya sakhā vipro malayācalaketanaḥ

Sanskrit only: no published translation is held for this verse.

मीलितश्चलितो गेहं कृत्वा तीर्थानि सर्वतः । तस्मै स्ववृत्तमाख्यातं ब्रह्मसंवादकात्मकम्

mīlitaścalito gehaṃ kṛtvā tīrthāni sarvataḥ | tasmai svavṛttamākhyātaṃ brahmasaṃvādakātmakam

Sanskrit only: no published translation is held for this verse.

यद्भूतं द्वारकातीर्थे श्रुत्वा सोऽपि विसिस्मये । उवाच स च धर्मात्मा सखे मम वचः शृणु

yadbhūtaṃ dvārakātīrthe śrutvā so'pi visismaye | uvāca sa ca dharmātmā sakhe mama vacaḥ śṛṇu

Sanskrit only: no published translation is held for this verse.

यावंति भारते क्षेत्रे तीर्थानि विहितानि मे । तावंति कर्तुमिच्छामि त्वदुक्तं तीर्थमुत्तमम्

yāvaṃti bhārate kṣetre tīrthāni vihitāni me | tāvaṃti kartumicchāmi tvaduktaṃ tīrthamuttamam

Sanskrit only: no published translation is held for this verse.

नीत्वा मां दर्शय सखे तत्तीर्थं सर्वकामदम् । सखायस्ते वरा भूमावुपकुर्वंति ये सखीन्

nītvā māṃ darśaya sakhe tattīrthaṃ sarvakāmadam | sakhāyaste varā bhūmāvupakurvaṃti ye sakhīn

Sanskrit only: no published translation is held for this verse.

न तैर्ननु समो लोके पितामाताऽथवा सुतः । निर्द्धनं पुरुषं लोके सर्वे मुंचंति बांधवाः

na tairnanu samo loke pitāmātā'thavā sutaḥ | nirddhanaṃ puruṣaṃ loke sarve muṃcaṃti bāṃdhavāḥ

Sanskrit only: no published translation is held for this verse.

न मुंचंति सखायस्तु तस्य दुःखेन दुःखिताः । संसारार्णवनिर्मग्नान्सखीनुद्धरते सखा

na muṃcaṃti sakhāyastu tasya duḥkhena duḥkhitāḥ | saṃsārārṇavanirmagnānsakhīnuddharate sakhā

Sanskrit only: no published translation is held for this verse.

उपदिश्य हरेर्भक्तिमार्गं जन्मेंधनानलम् । अतस्त्वं मे सखा श्रेष्ठ उपकारं विधेहि मे

upadiśya harerbhaktimārgaṃ janmeṃdhanānalam | atastvaṃ me sakhā śreṣṭha upakāraṃ vidhehi me

Sanskrit only: no published translation is held for this verse.

दर्शयैतद्वरश्रेष्ठं तीर्थाख्यं द्वारकां द्विज

darśayaitadvaraśreṣṭhaṃ tīrthākhyaṃ dvārakāṃ dvija

Sanskrit only: no published translation is held for this verse.

इति श्रीपाद्मे महापुराणे पंचपंचाशत्साहस्र्यां संहिंतायामुत्तरखंडे कालिंदीमाहात्म्ये सप्ताधिकद्विशततमोऽध्यायः

iti śrīpādme mahāpurāṇe paṃcapaṃcāśatsāhasryāṃ saṃhiṃtāyāmuttarakhaṃḍe kāliṃdīmāhātmye saptādhikadviśatatamo'dhyāyaḥ

Sanskrit only: no published translation is held for this verse.