Padma Purāṇa 6.217

राजोवाच- वर्णितं मे त्वया साधो माहात्म्यं बदरीभवम् । यं निशम्य मनो याति मम निर्मलतां मुने

rājovāca- varṇitaṃ me tvayā sādho māhātmyaṃ badarībhavam | yaṃ niśamya mano yāti mama nirmalatāṃ mune

Sanskrit only: no published translation is held for this verse.

एतदद्भुतमाहात्म्यं शक्रप्रस्थाख्यमुत्तमम् । सकलं मुनिशार्दूलचतुवर्गप्रदायकम्

etadadbhutamāhātmyaṃ śakraprasthākhyamuttamam | sakalaṃ muniśārdūlacatuvargapradāyakam

Sanskrit only: no published translation is held for this verse.

भुवि नातः परं तीर्थं वतिरश्चातमपि मुक्तिदम् । श्रेष्ठं सकलपापघ्नं दर्शनादेव नारद

bhuvi nātaḥ paraṃ tīrthaṃ vatiraścātamapi muktidam | śreṣṭhaṃ sakalapāpaghnaṃ darśanādeva nārada

Sanskrit only: no published translation is held for this verse.

एतदंतर्गतस्यास्य हरिद्वारस्य नारद । माहात्म्यं श्रोतुमिच्छामि त्वत्तः संतोषकारकात्

etadaṃtargatasyāsya haridvārasya nārada | māhātmyaṃ śrotumicchāmi tvattaḥ saṃtoṣakārakāt

Sanskrit only: no published translation is held for this verse.

मामुद्धर मुने दीनमविद्याकामकर्म्मभिः । वर्णनेनास्य तीर्थस्य शक्रप्रस्थगतस्य वै

māmuddhara mune dīnamavidyākāmakarmmabhiḥ | varṇanenāsya tīrthasya śakraprasthagatasya vai

Sanskrit only: no published translation is held for this verse.

नारद उवाच- आकर्णय महाभाग वर्णयामि तवाग्रतः । हरिद्वारस्य माहात्म्यमश्वमेधफलप्रदम्

nārada uvāca- ākarṇaya mahābhāga varṇayāmi tavāgrataḥ | haridvārasya māhātmyamaśvamedhaphalapradam

Sanskrit only: no published translation is held for this verse.

अत्रैकः श्वपचः पापः यथास्वर्गतिमाप्तवान् । तत्तेऽहं कथयाम्यद्य शृणुष्वैकमनाः प्रभो

atraikaḥ śvapacaḥ pāpaḥ yathāsvargatimāptavān | tatte'haṃ kathayāmyadya śṛṇuṣvaikamanāḥ prabho

Sanskrit only: no published translation is held for this verse.

धर्मक्षेत्रे कुरुक्षेत्रे कालिग इति विश्रुतः । श्वपचः पापकर्म्मा वै वसति स्म पुराद्बहिः

dharmakṣetre kurukṣetre kāliga iti viśrutaḥ | śvapacaḥ pāpakarmmā vai vasati sma purādbahiḥ

Sanskrit only: no published translation is held for this verse.

पंचषड्वर्षदेशीयान्बालान्नगरवासिनाम् । प्रसह्य वंचयित्वा च वने नीत्वा जघान सः

paṃcaṣaḍvarṣadeśīyānbālānnagaravāsinām | prasahya vaṃcayitvā ca vane nītvā jaghāna saḥ

Sanskrit only: no published translation is held for this verse.

तेषामलंकारमयं रजतं हेमवन्नृपः । रत्नादिकं च कायस्थं हत्वा तान्जगृहेऽधमः

teṣāmalaṃkāramayaṃ rajataṃ hemavannṛpaḥ | ratnādikaṃ ca kāyasthaṃ hatvā tānjagṛhe'dhamaḥ

Sanskrit only: no published translation is held for this verse.

विवेश साधुनिलये रात्रौ धनजिहीर्षया । पथिकान्धनमालक्ष्य स जघ्ने निर्जनं वने

viveśa sādhunilaye rātrau dhanajihīrṣayā | pathikāndhanamālakṣya sa jaghne nirjanaṃ vane

Sanskrit only: no published translation is held for this verse.

कुरुक्षेत्रे समायाता एकदा रविपर्वणि । नानादिग्भ्यो जना राजन्नानादान जिहीर्षया

kurukṣetre samāyātā ekadā raviparvaṇi | nānādigbhyo janā rājannānādāna jihīrṣayā

Sanskrit only: no published translation is held for this verse.

तस्मिन्यथाविधि स्नात्वा रविपर्वणि भूपते । दानं दत्त्वा यथावच्च लोकाः स्वान्स्वान्गृहान्ययुः

tasminyathāvidhi snātvā raviparvaṇi bhūpate | dānaṃ dattvā yathāvacca lokāḥ svānsvāngṛhānyayuḥ

Sanskrit only: no published translation is held for this verse.

एकः कश्चिद्विशां श्रेष्ठो धनेन महता यतः । पश्चात्सर्वजनेभ्यस्तु चचाल स्वगृहंप्रति

ekaḥ kaścidviśāṃ śreṣṭho dhanena mahatā yataḥ | paścātsarvajanebhyastu cacāla svagṛhaṃprati

Sanskrit only: no published translation is held for this verse.

अश्ववारः पदातीनां विंशतिं पुरतो दधत् । कालिगः स महापापस्तमनुप्रस्थितः श्रियै

aśvavāraḥ padātīnāṃ viṃśatiṃ purato dadhat | kāligaḥ sa mahāpāpastamanuprasthitaḥ śriyai

Sanskrit only: no published translation is held for this verse.

कतिचिद्वसतीर्गत्वा सह तेन विशाधमः । सॐऽत्यजस्तद्धनं हर्तुं न लेभे समयं नृप

katicidvasatīrgatvā saha tena viśādhamaḥ | saoṃ'tyajastaddhanaṃ hartuṃ na lebhe samayaṃ nṛpa

Sanskrit only: no published translation is held for this verse.

बलेनापि गृहीतुं न क्षमोऽभूत्तस्य सश्रियम् । वैश्यस्तु जनविंशत्या संयुक्तस्तु स एकलः

balenāpi gṛhītuṃ na kṣamo'bhūttasya saśriyam | vaiśyastu janaviṃśatyā saṃyuktastu sa ekalaḥ

Sanskrit only: no published translation is held for this verse.

अत्रागतः स पापात्मा वैश्यस्यार्थेन पार्थिव । निशीथे शिबिरं तस्य धनं हर्त्तुं समाविशत्

atrāgataḥ sa pāpātmā vaiśyasyārthena pārthiva | niśīthe śibiraṃ tasya dhanaṃ harttuṃ samāviśat

Sanskrit only: no published translation is held for this verse.

एकेन तस्य वैश्यस्य जनेन स तु लक्षितः । प्रविशन्नेव पापात्मा ददता प्रहरं स्वकम्

ekena tasya vaiśyasya janena sa tu lakṣitaḥ | praviśanneva pāpātmā dadatā praharaṃ svakam

Sanskrit only: no published translation is held for this verse.

तमालक्ष्य समीपस्थं स जनः प्रहरप्रदः । उभयोः पादयोराजन्स्वपन्नेव गृहीतवान्

tamālakṣya samīpasthaṃ sa janaḥ praharapradaḥ | ubhayoḥ pādayorājansvapanneva gṛhītavān

Sanskrit only: no published translation is held for this verse.

तौ गृहीत्वा जनानन्यान्बोधयन्प्रहरप्रदः । हस्तेनैव तु पापेन चौरेणाघातितो हि सः

tau gṛhītvā janānanyānbodhayanpraharapradaḥ | hastenaiva tu pāpena caureṇāghātito hi saḥ

Sanskrit only: no published translation is held for this verse.

श्रुत्वा पलायमानस्तु गृहीतोऽन्यैर्जनैस्तदा । गृहीतारं पुनर्हत्वा सहसा स पलायितः

śrutvā palāyamānastu gṛhīto'nyairjanaistadā | gṛhītāraṃ punarhatvā sahasā sa palāyitaḥ

Sanskrit only: no published translation is held for this verse.

एकेन केनचिद्राजन्सेवकेन धनुर्भृता । दूरादेव शरेणाशु धावन्स निहतोऽधमः

ekena kenacidrājansevakena dhanurbhṛtā | dūrādeva śareṇāśu dhāvansa nihato'dhamaḥ

Sanskrit only: no published translation is held for this verse.

हतमात्रः शरेणाशु तत्याज स च जीवितम् । चौरेण निहतौ राजन्वैश्यस्यानुचरावुभौ

hatamātraḥ śareṇāśu tatyāja sa ca jīvitam | caureṇa nihatau rājanvaiśyasyānucarāvubhau

Sanskrit only: no published translation is held for this verse.

ते त्रयो वरयानानि गणानीतानि भूपते । समारुह्य दिविस्थित्वा वैश्यमेतद्बभाषिरे

te trayo varayānāni gaṇānītāni bhūpate | samāruhya divisthitvā vaiśyametadbabhāṣire

Sanskrit only: no published translation is held for this verse.

कालिगवैश्यानुचरा ऊचुः । भो भो वैश्यपते साधो तीर्थमेतदनुत्तमम् । इंद्रप्रस्थे हरिद्वारं शिवकृत्पापिनामपि

kāligavaiśyānucarā ūcuḥ | bho bho vaiśyapate sādho tīrthametadanuttamam | iṃdraprasthe haridvāraṃ śivakṛtpāpināmapi

Sanskrit only: no published translation is held for this verse.

वयं त्रयः सुतीर्थेऽस्मिन्नपमृत्युगता अपि । गच्छामस्त्रिदिवं वैश्य सांप्रतं शिवमस्तु ते

vayaṃ trayaḥ sutīrthe'sminnapamṛtyugatā api | gacchāmastridivaṃ vaiśya sāṃprataṃ śivamastu te

Sanskrit only: no published translation is held for this verse.

श्रीनारद उवाच- इत्युक्त्वा ते ययुः स्वर्गं शिवे शिवकृतां पदम् । यत्रेच्छया हि लभ्यंते भोग्यवस्तून्यनेकशः

śrīnārada uvāca- ityuktvā te yayuḥ svargaṃ śive śivakṛtāṃ padam | yatrecchayā hi labhyaṃte bhogyavastūnyanekaśaḥ

Sanskrit only: no published translation is held for this verse.

अथ रात्रौ व्यतीतायां प्रातरत्र विशांवरः । स्वभृत्यदेहयोः कृत्वा दाहमस्थीन्यपातयत्

atha rātrau vyatītāyāṃ prātaratra viśāṃvaraḥ | svabhṛtyadehayoḥ kṛtvā dāhamasthīnyapātayat

Sanskrit only: no published translation is held for this verse.

तीर्थेऽत्र पात्यमानेषु भृत्यौ तावस्थिषु प्रभो । स्वर्गात्पुनरिहायातौ तं वैश्यमिदमूचतुः

tīrthe'tra pātyamāneṣu bhṛtyau tāvasthiṣu prabho | svargātpunarihāyātau taṃ vaiśyamidamūcatuḥ

Sanskrit only: no published translation is held for this verse.

भृत्या ऊचतुः । भो भो वैश्यपते साधो तीर्थेऽत्र मरणाद्भुवि । पापानामपि जंतूनां स्वर्गप्राप्तिर्न संशयः

bhṛtyā ūcatuḥ | bho bho vaiśyapate sādho tīrthe'tra maraṇādbhuvi | pāpānāmapi jaṃtūnāṃ svargaprāptirna saṃśayaḥ

Sanskrit only: no published translation is held for this verse.

स्थले मृतस्य जंतोश्चेत्पतंत्यस्थीनि वारिणि । तीर्थस्यास्य तदा वैश्य सत्यलोके स्थितिर्भवेत्

sthale mṛtasya jaṃtoścetpataṃtyasthīni vāriṇi | tīrthasyāsya tadā vaiśya satyaloke sthitirbhavet

Sanskrit only: no published translation is held for this verse.

स्थले मृताभ्यामावाभ्यामस्थिपातेन वारिणि । संप्राप्ता ब्रह्मणो लोके स्थितिराब्रह्मसंस्थिते

sthale mṛtābhyāmāvābhyāmasthipātena vāriṇi | saṃprāptā brahmaṇo loke sthitirābrahmasaṃsthite

Sanskrit only: no published translation is held for this verse.

स्थले मृतस्य चौरस्यापेतुरस्थीनिनांबुनि । यतोऽत स विशांनाथ तस्थौ वृंदारकालये

sthale mṛtasya caurasyāpeturasthīnināṃbuni | yato'ta sa viśāṃnātha tasthau vṛṃdārakālaye

Sanskrit only: no published translation is held for this verse.

तस्यापि देहमन्विष्य तीर्थेस्मिन्नाशु पातय । यथासोऽपि सुरश्रेष्ठ प्राप्नुयान्नौ गतिं पराम्

tasyāpi dehamanviṣya tīrthesminnāśu pātaya | yathāso'pi suraśreṣṭha prāpnuyānnau gatiṃ parām

Sanskrit only: no published translation is held for this verse.

उपकारः सदाकार्यः परेषामपि साधुभिः । अपकारो न मंतव्यः कृतो भृशमसज्जनैः

upakāraḥ sadākāryaḥ pareṣāmapi sādhubhiḥ | apakāro na maṃtavyaḥ kṛto bhṛśamasajjanaiḥ

Sanskrit only: no published translation is held for this verse.

नारद उवाच- इत्युक्त्वा तौ महाभागौ गतौ हरिपुरं प्रति । हरिद्वारस्य तीर्थस्य सलिलेनास्थिपातनात्

nārada uvāca- ityuktvā tau mahābhāgau gatau haripuraṃ prati | haridvārasya tīrthasya salilenāsthipātanāt

Sanskrit only: no published translation is held for this verse.

स वैश्यस्तु महाभागस्तस्य चौरस्य विग्रहम् । दग्धुमन्वेषयामास न लब्धं तत्तु भूपते

sa vaiśyastu mahābhāgastasya caurasya vigraham | dagdhumanveṣayāmāsa na labdhaṃ tattu bhūpate

Sanskrit only: no published translation is held for this verse.

पुनरावृत्य तत्रैव सर्वतीर्थशिरोमणौ । हरिद्वारे महाराज स सस्नाविति वांच्छया

punarāvṛtya tatraiva sarvatīrthaśiromaṇau | haridvāre mahārāja sa sasnāviti vāṃcchayā

Sanskrit only: no published translation is held for this verse.

अहमुत्पाद्य सत्पुत्रान्धर्म्मार्जितधनेन च । संतोष्य विप्रान्बंधूंश्च विष्णुमाराध्य सेवया

ahamutpādya satputrāndharmmārjitadhanena ca | saṃtoṣya viprānbaṃdhūṃśca viṣṇumārādhya sevayā

Sanskrit only: no published translation is held for this verse.

त्वय्येव मरणं प्राप्य गच्छामि हरिमंदिरम् । तीर्थराज नमस्तुभ्यमेतत्कर्तव्यमस्ति ते

tvayyeva maraṇaṃ prāpya gacchāmi harimaṃdiram | tīrtharāja namastubhyametatkartavyamasti te

Sanskrit only: no published translation is held for this verse.

इति कामनया राजन्स वैश्यस्तत्र कामदे । तीर्थे स्नात्वा गतः सर्वैर्भृत्य्स्वं समगाद्गृहम्

iti kāmanayā rājansa vaiśyastatra kāmade | tīrthe snātvā gataḥ sarvairbhṛtysvaṃ samagādgṛham

Sanskrit only: no published translation is held for this verse.

तत्र गत्वा सपत्न्यां तु पुत्रानुत्पाद्य बुद्धिमान् । धर्मोपार्जितवित्तेन तोषयामास बांधवान्

tatra gatvā sapatnyāṃ tu putrānutpādya buddhimān | dharmopārjitavittena toṣayāmāsa bāṃdhavān

Sanskrit only: no published translation is held for this verse.

भक्त्या परमया राजन्नाराध्य कमलापतिम् । तीर्थेऽस्मिन्मरणं प्राप्तो यतो वैकुंठमाप्नुयात्

bhaktyā paramayā rājannārādhya kamalāpatim | tīrthe'sminmaraṇaṃ prāpto yato vaikuṃṭhamāpnuyāt

Sanskrit only: no published translation is held for this verse.

इति वै वर्णितो राजंस्तीर्थस्य महिमा तव । हरिद्वारस्य पुण्यस्य श्रवणेऽस्य फलं शृणु

iti vai varṇito rājaṃstīrthasya mahimā tava | haridvārasya puṇyasya śravaṇe'sya phalaṃ śṛṇu

Sanskrit only: no published translation is held for this verse.

तिलद्रोणस्य दानेन माघे यत्फलमाप्नुयात् । जनस्तत्फलमाप्नोति शृण्वन्माहात्म्यमस्य तु

tiladroṇasya dānena māghe yatphalamāpnuyāt | janastatphalamāpnoti śṛṇvanmāhātmyamasya tu

Sanskrit only: no published translation is held for this verse.

गोपीचंदन दानेन ब्रह्मपत्रेषु भोजनात् । यत्फलं तन्महिम्नोऽस्य श्रवणादेव कार्तिके

gopīcaṃdana dānena brahmapatreṣu bhojanāt | yatphalaṃ tanmahimno'sya śravaṇādeva kārtike

Sanskrit only: no published translation is held for this verse.

जागरे च प्रबोधिन्यां प्रहरे पश्चिमे नृप । यत्फलंन्तन्महिम्नोऽस्य तीर्थस्याकर्णनाद्भवेत्

jāgare ca prabodhinyāṃ prahare paścime nṛpa | yatphalaṃntanmahimno'sya tīrthasyākarṇanādbhavet

Sanskrit only: no published translation is held for this verse.

हरिद्वारस्य सदृशं शक्रप्रस्थगतस्य वै । न तीर्थं पृथिवीलोके चतुर्वर्गफलप्रदम्

haridvārasya sadṛśaṃ śakraprasthagatasya vai | na tīrthaṃ pṛthivīloke caturvargaphalapradam

Sanskrit only: no published translation is held for this verse.

इतिं श्रीपाद्मेमहापुराणे पंचपंचाशत्साहस्र्यां संहितायामुत्तरखंडे इंद्रप्रस्थमाहाम्त्ये हरिद्वारवर्णनंनाम सप्ताधिकद्विशततमोऽध्यायः

itiṃ śrīpādmemahāpurāṇe paṃcapaṃcāśatsāhasryāṃ saṃhitāyāmuttarakhaṃḍe iṃdraprasthamāhāmtye haridvāravarṇanaṃnāma saptādhikadviśatatamo'dhyāyaḥ

Sanskrit only: no published translation is held for this verse.