Padma Purāṇa 6.229

संदर्शनाय योगानां सनकादि महात्मनाम् । सनकश्च सनंदश्च तृतीयश्च सनातनः

saṃdarśanāya yogānāṃ sanakādi mahātmanām | sanakaśca sanaṃdaśca tṛtīyaśca sanātanaḥ

Sanskrit only: no published translation is held for this verse.

सनत्कुमारजाताश्च वोढुः पंचशिखस्तथा । सप्तैते ब्रह्मणः पुत्रा योगिनः सुमहौजसः

sanatkumārajātāśca voḍhuḥ paṃcaśikhastathā | saptaite brahmaṇaḥ putrā yoginaḥ sumahaujasaḥ

Sanskrit only: no published translation is held for this verse.

विरक्ताः सर्वभोगेषु शुद्धाः सत्वगुणाः सदा । भगवद्दर्शनोद्भूतसुखैकरससेविनः

viraktāḥ sarvabhogeṣu śuddhāḥ satvaguṇāḥ sadā | bhagavaddarśanodbhūtasukhaikarasasevinaḥ

Sanskrit only: no published translation is held for this verse.

नरनारायणाद्याश्च श्वेतद्वीपे वसंति ये । तेषां संदर्शनार्थाय तत्र संनिहितो हरिः

naranārāyaṇādyāśca śvetadvīpe vasaṃti ye | teṣāṃ saṃdarśanārthāya tatra saṃnihito hariḥ

Sanskrit only: no published translation is held for this verse.

शुभ्रांशुकोटिसंकाशे नानारत्नमयोज्ज्वले । श्वेतद्वीपे महायोगि सेविते भयवर्जिते

śubhrāṃśukoṭisaṃkāśe nānāratnamayojjvale | śvetadvīpe mahāyogi sevite bhayavarjite

Sanskrit only: no published translation is held for this verse.

तत्रोद्यानानि रम्याणि पारिजातसमानि वै । संतानकलताकीर्णं चन्दनद्रुममंडितम्

tatrodyānāni ramyāṇi pārijātasamāni vai | saṃtānakalatākīrṇaṃ candanadrumamaṃḍitam

Sanskrit only: no published translation is held for this verse.

फुल्लपद्मोत्पलोपेतं नानातोयालयैर्युतम् । तन्मध्ये नगरी रम्या नाम्ना चैरावती शुभा

phullapadmotpalopetaṃ nānātoyālayairyutam | tanmadhye nagarī ramyā nāmnā cairāvatī śubhā

Sanskrit only: no published translation is held for this verse.

नानारत्नमयैर्दिव्यैर्विमानैरुपशोभिता । दिव्यस्त्रीपुंभिराक्रांता बहुप्रासादसंकुला

nānāratnamayairdivyairvimānairupaśobhitā | divyastrīpuṃbhirākrāṃtā bahuprāsādasaṃkulā

Sanskrit only: no published translation is held for this verse.

तन्मध्येऽन्तपुरं रम्यं रत्नद्रुमसमाकुलम् । बालसूर्यनिभैस्तुंगैः प्रासादैर्बहुभिर्वृतम्

tanmadhye'ntapuraṃ ramyaṃ ratnadrumasamākulam | bālasūryanibhaistuṃgaiḥ prāsādairbahubhirvṛtam

Sanskrit only: no published translation is held for this verse.

तन्मध्ये मंडपं दिव्यं मणिकांचनशोभितम् । चंदनागुरुकर्पूरकुंकुमामोदवाशितम्

tanmadhye maṃḍapaṃ divyaṃ maṇikāṃcanaśobhitam | caṃdanāgurukarpūrakuṃkumāmodavāśitam

Sanskrit only: no published translation is held for this verse.

नानाकुसुमशोभाढ्यैर्वितानैः समलंकृतम् । दिव्याप्सरः समाकीर्णं सामगानोपशोभितम्

nānākusumaśobhāḍhyairvitānaiḥ samalaṃkṛtam | divyāpsaraḥ samākīrṇaṃ sāmagānopaśobhitam

Sanskrit only: no published translation is held for this verse.

मध्ये सिंहासनं तत्र सूर्यवैश्वानरप्रभम् । तन्मध्येऽष्टदलं पद्मं चंद्रबिंबमिवापरम्

madhye siṃhāsanaṃ tatra sūryavaiśvānaraprabham | tanmadhye'ṣṭadalaṃ padmaṃ caṃdrabiṃbamivāparam

Sanskrit only: no published translation is held for this verse.

तन्मध्ये कर्णिकायां तु समासीनो जनार्दनः । शुद्धजांबूनदप्रख्यो मुक्ताहारविभूषितः

tanmadhye karṇikāyāṃ tu samāsīno janārdanaḥ | śuddhajāṃbūnadaprakhyo muktāhāravibhūṣitaḥ

Sanskrit only: no published translation is held for this verse.

शंखचक्रगदापद्मशक्तिहस्तचतुष्टयः । हारकेयूरकटकैरंगुलीयैश्च शोभितः

śaṃkhacakragadāpadmaśaktihastacatuṣṭayaḥ | hārakeyūrakaṭakairaṃgulīyaiśca śobhitaḥ

Sanskrit only: no published translation is held for this verse.

सुवर्णपंकजप्रख्यः पदयुग्मविराजितः । संतानकनिभैः शुभ्रैर्नखपंक्तिविराजितः

suvarṇapaṃkajaprakhyaḥ padayugmavirājitaḥ | saṃtānakanibhaiḥ śubhrairnakhapaṃktivirājitaḥ

Sanskrit only: no published translation is held for this verse.

षोडशाब्दवयो रूपयौवनेन विराजितः । विशालभालदेशे तु कुंकुमेन सुगंधिना

ṣoḍaśābdavayo rūpayauvanena virājitaḥ | viśālabhāladeśe tu kuṃkumena sugaṃdhinā

Sanskrit only: no published translation is held for this verse.

रचितेनोर्ध्वपुंड्रेण सीमंतेनोपशोभितः । मथितामृतफेनाभ शुक्लवस्त्रसुवेष्टितः

racitenordhvapuṃḍreṇa sīmaṃtenopaśobhitaḥ | mathitāmṛtaphenābha śuklavastrasuveṣṭitaḥ

Sanskrit only: no published translation is held for this verse.

मुक्तामयाभ्यां शुभ्राभ्यां कुंडलाभ्यां विराजितः । पद्मासनसमासीनो जगन्मोहनविग्रहः

muktāmayābhyāṃ śubhrābhyāṃ kuṃḍalābhyāṃ virājitaḥ | padmāsanasamāsīno jaganmohanavigrahaḥ

Sanskrit only: no published translation is held for this verse.

वामांके संस्थिता देवी तस्य दिव्यस्वरूपिणी । तस्यैव सदृशी लक्ष्मीः शीलसुष्टुगुणादिभिः

vāmāṃke saṃsthitā devī tasya divyasvarūpiṇī | tasyaiva sadṛśī lakṣmīḥ śīlasuṣṭuguṇādibhiḥ

Sanskrit only: no published translation is held for this verse.

पद्मकिंजल्कसंकाशा यौवनारंभशोभिता । सर्वलक्षणसंपन्ना तप्तकांचनभूषणा

padmakiṃjalkasaṃkāśā yauvanāraṃbhaśobhitā | sarvalakṣaṇasaṃpannā taptakāṃcanabhūṣaṇā

Sanskrit only: no published translation is held for this verse.

दिव्यस्रग्वसनोपेता नीलकुंचितमूर्धजा । चतुर्भुजैर्विराजंती केयूराङ्गदभूषिता

divyasragvasanopetā nīlakuṃcitamūrdhajā | caturbhujairvirājaṃtī keyūrāṅgadabhūṣitā

Sanskrit only: no published translation is held for this verse.

मुक्ताहारैर्विराजंती मंदारांचितशीर्षजा । श्लक्ष्णनासापुटयुता लसद्दंतिवरा जिता

muktāhārairvirājaṃtī maṃdārāṃcitaśīrṣajā | ślakṣṇanāsāpuṭayutā lasaddaṃtivarā jitā

Sanskrit only: no published translation is held for this verse.

कस्तूरीतिलकोपेता नासाग्रांचित मौक्तिका । स्वर्णकुंभसमप्रख्य पीनोन्नतपयोधरा

kastūrītilakopetā nāsāgrāṃcita mauktikā | svarṇakuṃbhasamaprakhya pīnonnatapayodharā

Sanskrit only: no published translation is held for this verse.

दिव्यकुंकुमलिप्तांगी पद्ममालोपशोभिता । वस्त्रपात्रं मातुलिड्गं दर्पणं हेमपंकजम्

divyakuṃkumaliptāṃgī padmamālopaśobhitā | vastrapātraṃ mātuliḍgaṃ darpaṇaṃ hemapaṃkajam

Sanskrit only: no published translation is held for this verse.

करपद्मधृता देवी चेतसाभीष्टदायिनी । तस्यैताः सदृशास्तत्र शक्तयः परितो हरेः

karapadmadhṛtā devī cetasābhīṣṭadāyinī | tasyaitāḥ sadṛśāstatra śaktayaḥ parito hareḥ

Sanskrit only: no published translation is held for this verse.

ईशावास्या महादेवी जाह्नवी कमलालया । सावित्री सर्वगा पद्मा शक्तयः परिकीर्तिताः

īśāvāsyā mahādevī jāhnavī kamalālayā | sāvitrī sarvagā padmā śaktayaḥ parikīrtitāḥ

Sanskrit only: no published translation is held for this verse.

श्रद्धा मेधा धृतिः प्रज्ञा धारणा शांतिरेव च । श्रुतिस्मृतिर्धृतिर्मेधा वृद्धिर्बुद्धिर्मनीषिणी

śraddhā medhā dhṛtiḥ prajñā dhāraṇā śāṃtireva ca | śrutismṛtirdhṛtirmedhā vṛddhirbuddhirmanīṣiṇī

Sanskrit only: no published translation is held for this verse.

दास्यस्ते ताः श्रियः प्रोक्ताः सर्वकार्यस्य कारिकाः । अनंतवैनतेयादि देवता नित्यकिंकराः

dāsyaste tāḥ śriyaḥ proktāḥ sarvakāryasya kārikāḥ | anaṃtavainateyādi devatā nityakiṃkarāḥ

Sanskrit only: no published translation is held for this verse.

साध्या मरुद्गणाश्चैव सेवंते नित्यदेवताः । प्रासादेषु विमानेषु वनेषु नगरेषु च

sādhyā marudgaṇāścaiva sevaṃte nityadevatāḥ | prāsādeṣu vimāneṣu vaneṣu nagareṣu ca

Sanskrit only: no published translation is held for this verse.

तत्प्रसादोपलब्धेषु भोगेष्वत्रानुरंजिताः । क्रीडंती सततं नित्या हेयनिष्फलवर्जिताः

tatprasādopalabdheṣu bhogeṣvatrānuraṃjitāḥ | krīḍaṃtī satataṃ nityā heyaniṣphalavarjitāḥ

Sanskrit only: no published translation is held for this verse.

ये विष्णुमंत्रजप्तारः सततं श्रद्धयान्विताः । ये द्वादशीव्रते युक्तास्तत्पदं यांति तेऽव्ययम्

ye viṣṇumaṃtrajaptāraḥ satataṃ śraddhayānvitāḥ | ye dvādaśīvrate yuktāstatpadaṃ yāṃti te'vyayam

Sanskrit only: no published translation is held for this verse.

न वेदैर्न च दानैश्च न यज्ञैर्न व्रतैरपि । प्राप्तुं च शक्यं गिरिजे विष्णुलोकं सनातनम्

na vedairna ca dānaiśca na yajñairna vratairapi | prāptuṃ ca śakyaṃ girije viṣṇulokaṃ sanātanam

Sanskrit only: no published translation is held for this verse.

भक्त्या चानन्यया प्राप्तुं शक्यं विष्णुपदं नृणाम् । तस्मात्संपूजयेन्नित्यं भक्त्या देवं जनार्दनम्

bhaktyā cānanyayā prāptuṃ śakyaṃ viṣṇupadaṃ nṛṇām | tasmātsaṃpūjayennityaṃ bhaktyā devaṃ janārdanam

Sanskrit only: no published translation is held for this verse.

कीर्तनं नाममात्रं च ध्यायन्मंत्रं जपेत्सदा । जुहुयात्तर्पयेद्भक्त्या सर्वगं सर्वकामदम्

kīrtanaṃ nāmamātraṃ ca dhyāyanmaṃtraṃ japetsadā | juhuyāttarpayedbhaktyā sarvagaṃ sarvakāmadam

Sanskrit only: no published translation is held for this verse.

एवमुक्तं तृतीयं तु व्यूहं तु परमात्मनः । स्वरूपं तव सुश्रोणि यथाप्रोक्तं पुरातनैः

evamuktaṃ tṛtīyaṃ tu vyūhaṃ tu paramātmanaḥ | svarūpaṃ tava suśroṇi yathāproktaṃ purātanaiḥ

Sanskrit only: no published translation is held for this verse.

अतः परं प्रवक्ष्यामि चतुर्थं व्यूहमुत्तमम् । दिवौकसां रक्षणार्थं दुग्धाब्धौ परमेश्वरः

ataḥ paraṃ pravakṣyāmi caturthaṃ vyūhamuttamam | divaukasāṃ rakṣaṇārthaṃ dugdhābdhau parameśvaraḥ

Sanskrit only: no published translation is held for this verse.

सुधांशुकोटिसंकाशः सहस्राक्षेण शोभिते । पुरंदरसयूथैस्तु च्छादिते दुग्धवारिधौ

sudhāṃśukoṭisaṃkāśaḥ sahasrākṣeṇa śobhite | puraṃdarasayūthaistu cchādite dugdhavāridhau

Sanskrit only: no published translation is held for this verse.

तस्मिन्ननंतपर्यंके शेतेऽसौ विस्तृते शुभे । दिव्यासनसमासीनः पद्मनाभोऽच्युतो हरिः

tasminnanaṃtaparyaṃke śete'sau vistṛte śubhe | divyāsanasamāsīnaḥ padmanābho'cyuto hariḥ

Sanskrit only: no published translation is held for this verse.

नीलजीमूतसंकाशः पद्मपत्रायतेक्षणः । विवस्वत्कोटिसंकाश किरीटेन विराजितः

nīlajīmūtasaṃkāśaḥ padmapatrāyatekṣaṇaḥ | vivasvatkoṭisaṃkāśa kirīṭena virājitaḥ

Sanskrit only: no published translation is held for this verse.

नानारत्नोज्ज्वलद्दिव्यं कुंडलाभ्यां विराजितः । बालार्कसदृशज्योत्स्ना पीतवस्त्रेण वेष्टितः

nānāratnojjvaladdivyaṃ kuṃḍalābhyāṃ virājitaḥ | bālārkasadṛśajyotsnā pītavastreṇa veṣṭitaḥ

Sanskrit only: no published translation is held for this verse.

स्फुरद्रक्तारविंदाभ हस्तांघ्रितलशोभितः । हारकेयूरकटकैरंगुलीयैर्विराजितः

sphuradraktāraviṃdābha hastāṃghritalaśobhitaḥ | hārakeyūrakaṭakairaṃgulīyairvirājitaḥ

Sanskrit only: no published translation is held for this verse.

शंखचक्रगदाशार्ङ्गखड्गहस्तैर्विभूषितः । सुपुष्पफलशाखाढ्यकल्पवृक्षैर्विराजितः

śaṃkhacakragadāśārṅgakhaḍgahastairvibhūṣitaḥ | supuṣpaphalaśākhāḍhyakalpavṛkṣairvirājitaḥ

Sanskrit only: no published translation is held for this verse.

विश्वस्य जन्ममरण नाभिपंकजशोभितः । हरिचंदनलिप्तांगः सर्वाभरणभूषितः

viśvasya janmamaraṇa nābhipaṃkajaśobhitaḥ | haricaṃdanaliptāṃgaḥ sarvābharaṇabhūṣitaḥ

Sanskrit only: no published translation is held for this verse.

मंदारपारिजातादि दिव्यपुष्पैर्मनोरमैः । सुस्निग्धनीलकुटिलकबरीकृतकेशवान्

maṃdārapārijātādi divyapuṣpairmanoramaiḥ | susnigdhanīlakuṭilakabarīkṛtakeśavān

Sanskrit only: no published translation is held for this verse.

श्लक्ष्णोन्नतसुनासांस जानुयुग्मविराजितः । मणिविद्रुमशाखाढ्य नूपुराङ्घ्रिविराजितः

ślakṣṇonnatasunāsāṃsa jānuyugmavirājitaḥ | maṇividrumaśākhāḍhya nūpurāṅghrivirājitaḥ

Sanskrit only: no published translation is held for this verse.

अकलंकितचंद्राभ नखपंक्तिविराजितः । अशोकपुष्पसंकाश रक्तोष्ठमुखपंकजः

akalaṃkitacaṃdrābha nakhapaṃktivirājitaḥ | aśokapuṣpasaṃkāśa raktoṣṭhamukhapaṃkajaḥ

Sanskrit only: no published translation is held for this verse.

अनर्घ्यमुक्तिकाभास दंतपंक्तिविराजितः । संपूर्णचंद्रप्रतिम स्मितवक्त्रसुशोभितः

anarghyamuktikābhāsa daṃtapaṃktivirājitaḥ | saṃpūrṇacaṃdrapratima smitavaktrasuśobhitaḥ

Sanskrit only: no published translation is held for this verse.

आरूढयौवनः श्रीमान्कोमलावयवोज्ज्वलः । शरण्यः सर्वलोकानां सर्वलोकफलप्रदः

ārūḍhayauvanaḥ śrīmānkomalāvayavojjvalaḥ | śaraṇyaḥ sarvalokānāṃ sarvalokaphalapradaḥ

Sanskrit only: no published translation is held for this verse.

सदृशी तस्य देवी तु रूपशीलगुणादिभिः । तप्तकांचनसंकाशा तप्तकांचनभूषणा

sadṛśī tasya devī tu rūpaśīlaguṇādibhiḥ | taptakāṃcanasaṃkāśā taptakāṃcanabhūṣaṇā

Sanskrit only: no published translation is held for this verse.

तरुणी रूपलावण्या कान्तिशीलगुणान्विता । दुग्धाब्धिफेनसंकाश शुभवस्त्रेण वेष्टिता

taruṇī rūpalāvaṇyā kāntiśīlaguṇānvitā | dugdhābdhiphenasaṃkāśa śubhavastreṇa veṣṭitā

Sanskrit only: no published translation is held for this verse.

मंदारकेतकी जाती पुष्पार्चितशिरोरुहा । कस्तूरीतिलकोपेता रत्नसीमंतशोभिता

maṃdāraketakī jātī puṣpārcitaśiroruhā | kastūrītilakopetā ratnasīmaṃtaśobhitā

Sanskrit only: no published translation is held for this verse.

नानावर्णसुशोभाढ्या कर्णभूषणभूषिता । प्रवालसदृशज्योत्स्ना रक्तधारसुविस्मिता

nānāvarṇasuśobhāḍhyā karṇabhūṣaṇabhūṣitā | pravālasadṛśajyotsnā raktadhārasuvismitā

Sanskrit only: no published translation is held for this verse.

मत्तभृङ्गोपमैः स्निग्धैरलकैः सुविराजिता । तनुमध्या विशालाक्षी पीनोन्नतपयोधरा

mattabhṛṅgopamaiḥ snigdhairalakaiḥ suvirājitā | tanumadhyā viśālākṣī pīnonnatapayodharā

Sanskrit only: no published translation is held for this verse.

चतुर्हस्तैर्विराजंती सर्वाभरणभूषिता । उद्बाहुभ्यां धृता देवी हेमपद्मयुगं शुभम्

caturhastairvirājaṃtī sarvābharaṇabhūṣitā | udbāhubhyāṃ dhṛtā devī hemapadmayugaṃ śubham

Sanskrit only: no published translation is held for this verse.

इतराभ्यां समाश्लिष्य भर्तारं निबिडं स्थिता । आलोकयंती सततं त्रिदशांश्च कटाक्षकै

itarābhyāṃ samāśliṣya bhartāraṃ nibiḍaṃ sthitā | ālokayaṃtī satataṃ tridaśāṃśca kaṭākṣakai

Sanskrit only: no published translation is held for this verse.

निरीक्षितास्तया देव्या धन्यास्ते सततं शिवे । तत्र देवा विमानस्थाः सिद्धचारणकिन्नराः

nirīkṣitāstayā devyā dhanyāste satataṃ śive | tatra devā vimānasthāḥ siddhacāraṇakinnarāḥ

Sanskrit only: no published translation is held for this verse.

गायंति सततं देवीमानंदाश्रुपरिप्लुताः । दैतेयैर्बाध्यमानैस्तु ब्रह्मरुद्रादिभिः सुरैः

gāyaṃti satataṃ devīmānaṃdāśrupariplutāḥ | daiteyairbādhyamānaistu brahmarudrādibhiḥ suraiḥ

Sanskrit only: no published translation is held for this verse.

संस्तूयमानस्तत्रेशो देवानामभयं ददौ । देवानामभयं दत्त्वा सर्वदेवेश्वरो हरिः

saṃstūyamānastatreśo devānāmabhayaṃ dadau | devānāmabhayaṃ dattvā sarvadeveśvaro hariḥ

Sanskrit only: no published translation is held for this verse.

राक्षसान्हंतुमारेभे जगत्संरक्षणाय वै । एवं चतुर्थं व्यूहं तु हरेः प्रोक्तं तवानघे

rākṣasānhaṃtumārebhe jagatsaṃrakṣaṇāya vai | evaṃ caturthaṃ vyūhaṃ tu hareḥ proktaṃ tavānaghe

Sanskrit only: no published translation is held for this verse.

किमन्यच्छ्रोतुकामासीत्तद्ब्रवीमि वरानने । धन्यासि कृतकृत्यासि भक्तासि पुरुषोत्तमे

kimanyacchrotukāmāsīttadbravīmi varānane | dhanyāsi kṛtakṛtyāsi bhaktāsi puruṣottame

Sanskrit only: no published translation is held for this verse.