Library·Padma Purāṇa·6·6.36
नारद उवाच- कीदृशी स्यान्महादेव पक्षवर्द्धनिसंज्ञका । यया वै कृतया जंतुर्महपापात्प्रमुच्यते
nārada uvāca- kīdṛśī syānmahādeva pakṣavarddhanisaṃjñakā | yayā vai kṛtayā jaṃturmahapāpātpramucyate
Sanskrit only: no published translation is held for this verse.
श्रीमहादेव उवाच- अमा वा यदि वा पूर्णा संपूर्णा जायते तदा । भूत्वा वै नाडिकाषष्ठिर्जायते प्रतिपद्दिने । अश्वमेधायुतैस्तुल्या सा भवेत्पक्षवर्द्धिनी
śrīmahādeva uvāca- amā vā yadi vā pūrṇā saṃpūrṇā jāyate tadā | bhūtvā vai nāḍikāṣaṣṭhirjāyate pratipaddine | aśvamedhāyutaistulyā sā bhavetpakṣavarddhinī
Sanskrit only: no published translation is held for this verse.
नारद उवाच- पूजाविधिं तु पृच्छामि सांप्रतं देवसत्तम । यत्कृते तु महादेव महाफलमवाप्नुयात्
nārada uvāca- pūjāvidhiṃ tu pṛcchāmi sāṃprataṃ devasattama | yatkṛte tu mahādeva mahāphalamavāpnuyāt
Sanskrit only: no published translation is held for this verse.
महादेव उवाच- पूजाविधिं प्रवक्ष्यामि सांप्रतं द्विजनंदन । पूजिते चार्चिते विष्णौ फलं प्राप्नोत्यसंशयः
mahādeva uvāca- pūjāvidhiṃ pravakṣyāmi sāṃprataṃ dvijanaṃdana | pūjite cārcite viṣṇau phalaṃ prāpnotyasaṃśayaḥ
Sanskrit only: no published translation is held for this verse.
येन पूजाविधानेन तुष्टिं प्राप्नोति माधवः । अव्रणं जलपूर्णं च कुंभं चंदनचर्चितम्
yena pūjāvidhānena tuṣṭiṃ prāpnoti mādhavaḥ | avraṇaṃ jalapūrṇaṃ ca kuṃbhaṃ caṃdanacarcitam
Sanskrit only: no published translation is held for this verse.
पंचरत्नसमायुक्तं पुष्पमालाभिवेष्टितम् । स्थाप्यं ताम्रमयं पात्रं सगोधूमं घटोपरि
paṃcaratnasamāyuktaṃ puṣpamālābhiveṣṭitam | sthāpyaṃ tāmramayaṃ pātraṃ sagodhūmaṃ ghaṭopari
Sanskrit only: no published translation is held for this verse.
सौवर्णं कारयेद्देवं माससंज्ञाभिनामकम् । पंचामृतेन विधिना स्नपनं सुमनोरमम्
sauvarṇaṃ kārayeddevaṃ māsasaṃjñābhināmakam | paṃcāmṛtena vidhinā snapanaṃ sumanoramam
Sanskrit only: no published translation is held for this verse.
कारयेद्देवदेवेशं जगन्नाथं जगत्पतिम् । विलेपनं तु कर्त्तव्यं कुंकुमागरुचंदनैः
kārayeddevadeveśaṃ jagannāthaṃ jagatpatim | vilepanaṃ tu karttavyaṃ kuṃkumāgarucaṃdanaiḥ
Sanskrit only: no published translation is held for this verse.
वस्त्रयुग्मं च दातव्यं छत्रोपानहसंयुतम् । पूजयेद्देवताधीशं कुंभपात्रोपरिस्थितम्
vastrayugmaṃ ca dātavyaṃ chatropānahasaṃyutam | pūjayeddevatādhīśaṃ kuṃbhapātroparisthitam
Sanskrit only: no published translation is held for this verse.
पद्मनाभाय वै पादौ जानुनी विश्वमूर्त्तये । ऊरू वै ज्ञानगम्याय कटी दानप्रदाय च
padmanābhāya vai pādau jānunī viśvamūrttaye | ūrū vai jñānagamyāya kaṭī dānapradāya ca
Sanskrit only: no published translation is held for this verse.
उदरं विश्वनाथाय हृदयं श्रीधराय च । कंठं कौस्तुभकंठाय बाहू क्षत्रांतकारिणे
udaraṃ viśvanāthāya hṛdayaṃ śrīdharāya ca | kaṃṭhaṃ kaustubhakaṃṭhāya bāhū kṣatrāṃtakāriṇe
Sanskrit only: no published translation is held for this verse.
ललाटं व्योममूर्ध्ने तु शिरो वै सर्वरूपिणे । स्वनाम्ना चैव कमलां सर्वांगीं दिव्यरूपिणीम्
lalāṭaṃ vyomamūrdhne tu śiro vai sarvarūpiṇe | svanāmnā caiva kamalāṃ sarvāṃgīṃ divyarūpiṇīm
Sanskrit only: no published translation is held for this verse.
एवं विधिवत्संपूज्य ततोऽर्घं दापयेत्सुधीः । नालिकेरेण शुभ्रेण देवदेवस्य चक्रिणः
evaṃ vidhivatsaṃpūjya tato'rghaṃ dāpayetsudhīḥ | nālikereṇa śubhreṇa devadevasya cakriṇaḥ
Sanskrit only: no published translation is held for this verse.
अनेनैवार्घदानेन संपूर्णं जायते व्रतम् । संसारार्णवमग्नं मां समुद्धर जगत्पते
anenaivārghadānena saṃpūrṇaṃ jāyate vratam | saṃsārārṇavamagnaṃ māṃ samuddhara jagatpate
Sanskrit only: no published translation is held for this verse.
त्वमीशः सर्वलोकानां त्वं साक्षाच्च जगत्पतिः । गृहाणार्घं मया दत्तं पद्मनाभ नमोस्तु ते
tvamīśaḥ sarvalokānāṃ tvaṃ sākṣācca jagatpatiḥ | gṛhāṇārghaṃ mayā dattaṃ padmanābha namostu te
Sanskrit only: no published translation is held for this verse.
नैवेद्यानि सुहृद्यानि षड्रसानि विशेषतः । देयानि तु विशेषेण केशवाय सुभक्तितः
naivedyāni suhṛdyāni ṣaḍrasāni viśeṣataḥ | deyāni tu viśeṣeṇa keśavāya subhaktitaḥ
Sanskrit only: no published translation is held for this verse.
नागपत्रं सकर्पूरं दद्याद्देवस्य भक्तितः । घृतेन दीपकं कुर्यात्तिलतैलेन वा पुनः
nāgapatraṃ sakarpūraṃ dadyāddevasya bhaktitaḥ | ghṛtena dīpakaṃ kuryāttilatailena vā punaḥ
Sanskrit only: no published translation is held for this verse.
कृत्वा सम्यग्विधानेन गुरोः पूजां प्रकारयेत् । वस्त्राणि चैव चोष्णीषं कंचुकं च प्रदापयेत्
kṛtvā samyagvidhānena guroḥ pūjāṃ prakārayet | vastrāṇi caiva coṣṇīṣaṃ kaṃcukaṃ ca pradāpayet
Sanskrit only: no published translation is held for this verse.
दक्षिणां च यथाशक्त्या गुरुवे संप्रदापयेत् । भोजनं चैव तांबूलं दत्त्वा चार्घं प्रदापयेत्
dakṣiṇāṃ ca yathāśaktyā guruve saṃpradāpayet | bhojanaṃ caiva tāṃbūlaṃ dattvā cārghaṃ pradāpayet
Sanskrit only: no published translation is held for this verse.
स्ववित्तस्यानुमानेन यथाशक्त्या तु निर्द्धनैः । कार्या सम्यक्प्रयत्नेन द्वादशी पक्षवर्द्धिनी
svavittasyānumānena yathāśaktyā tu nirddhanaiḥ | kāryā samyakprayatnena dvādaśī pakṣavarddhinī
Sanskrit only: no published translation is held for this verse.
ततो जागरणं कुर्याद्गीतनृत्यसमन्वितम् । पुराणपाठसहितं हास्याह्लादसमन्वितम्
tato jāgaraṇaṃ kuryādgītanṛtyasamanvitam | purāṇapāṭhasahitaṃ hāsyāhlādasamanvitam
Sanskrit only: no published translation is held for this verse.
स्तुवंति च प्रशंसंति जागरं चक्रपाणिनः । नित्योत्सवो भवेत्तेषां गृहे वै दशजन्मसु
stuvaṃti ca praśaṃsaṃti jāgaraṃ cakrapāṇinaḥ | nityotsavo bhavetteṣāṃ gṛhe vai daśajanmasu
Sanskrit only: no published translation is held for this verse.
अतो धन्यतमा चेयं कर्त्तव्या पक्षवर्द्धनी । कृत्वा तु सकलं पुण्यं फलं प्राप्नोत्यसंशयम्
ato dhanyatamā ceyaṃ karttavyā pakṣavarddhanī | kṛtvā tu sakalaṃ puṇyaṃ phalaṃ prāpnotyasaṃśayam
Sanskrit only: no published translation is held for this verse.
पक्षवर्द्धनी माहात्म्यं ये शृण्वंति मनीषिणः । तैः कृतं सत्कृतं सर्वं यावदाभूतसंप्लवम्
pakṣavarddhanī māhātmyaṃ ye śṛṇvaṃti manīṣiṇaḥ | taiḥ kṛtaṃ satkṛtaṃ sarvaṃ yāvadābhūtasaṃplavam
Sanskrit only: no published translation is held for this verse.
पंचाग्निसाधने पुण्यं यच्च स्यात्तीर्थसाधने । तत्पुण्यं समवाप्नोति विष्णोर्जागरकारणात्
paṃcāgnisādhane puṇyaṃ yacca syāttīrthasādhane | tatpuṇyaṃ samavāpnoti viṣṇorjāgarakāraṇāt
Sanskrit only: no published translation is held for this verse.
पक्षवर्द्धनिका पुण्या पवित्रा पापनाशिनी । उपवासकृता विप्र हत्याकोटिविनाशिनी
pakṣavarddhanikā puṇyā pavitrā pāpanāśinī | upavāsakṛtā vipra hatyākoṭivināśinī
Sanskrit only: no published translation is held for this verse.
वसिष्ठेन कृता पूर्वं भारद्वाजेन वै मुने । ध्रुवेण चांबरीषेण कृतेयं विष्णुवल्लभा
vasiṣṭhena kṛtā pūrvaṃ bhāradvājena vai mune | dhruveṇa cāṃbarīṣeṇa kṛteyaṃ viṣṇuvallabhā
Sanskrit only: no published translation is held for this verse.
इयं काशीसमा पुण्या इयं वै द्वारका समा । उपोषिता च भक्तेन वांछितं च ददात्यसौ
iyaṃ kāśīsamā puṇyā iyaṃ vai dvārakā samā | upoṣitā ca bhaktena vāṃchitaṃ ca dadātyasau
Sanskrit only: no published translation is held for this verse.
इयं धन्या धन्यतमा हत्यायुतविनाशिनी । कर्त्तव्या तु विशेषेण वैष्णवैर्ज्ञानतत्परैः
iyaṃ dhanyā dhanyatamā hatyāyutavināśinī | karttavyā tu viśeṣeṇa vaiṣṇavairjñānatatparaiḥ
Sanskrit only: no published translation is held for this verse.
अहो सर्वेश्वरो देवः संसेव्यो व्रततत्परैः । किमन्यद्बहुनोक्तेन कर्तव्यं व्रतमुत्तमम्
aho sarveśvaro devaḥ saṃsevyo vratatatparaiḥ | kimanyadbahunoktena kartavyaṃ vratamuttamam
Sanskrit only: no published translation is held for this verse.
यथा च वर्द्धते चंद्रः सिते पक्षे विशेषतः । तथा वै वर्द्धते भक्त कारणात्पक्षवर्द्धिनी
yathā ca varddhate caṃdraḥ site pakṣe viśeṣataḥ | tathā vai varddhate bhakta kāraṇātpakṣavarddhinī
Sanskrit only: no published translation is held for this verse.
सूर्योदये यथा ध्वांतं नश्यते तत्क्षणादपि । तथाघं नाशमाप्नोति करणात्पक्षवर्द्धिनी
sūryodaye yathā dhvāṃtaṃ naśyate tatkṣaṇādapi | tathāghaṃ nāśamāpnoti karaṇātpakṣavarddhinī
Sanskrit only: no published translation is held for this verse.
इति श्रीपाद्मे महापुराणे पंचपंचाशत्साहस्र्यां संहितायामुत्तरखंडे उमापतिनारदसंवादे पक्षवर्द्धनी एकादशीमाहात्म्यंनाम षट्त्रिंशोऽध्यायः
iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe umāpatināradasaṃvāde pakṣavarddhanī ekādaśīmāhātmyaṃnāma ṣaṭtriṃśo'dhyāyaḥ
Sanskrit only: no published translation is held for this verse.