Library·Padma Purāṇa·6·6.7
नारद उवाच- ततो जालंधरः क्रुद्धः प्राह तं दैत्यसूदनम् । कपटेन बलं हत्वा क्व यास्यसि बलाधम
nārada uvāca- tato jālaṃdharaḥ kruddhaḥ prāha taṃ daityasūdanam | kapaṭena balaṃ hatvā kva yāsyasi balādhama
Sanskrit only: no published translation is held for this verse.
इत्युक्त्वा तं शतमखं सिंधुसूनुः प्रतापवान् । ससूताश्वध्वजरथं छादयामास मार्गणैः
ityuktvā taṃ śatamakhaṃ siṃdhusūnuḥ pratāpavān | sasūtāśvadhvajarathaṃ chādayāmāsa mārgaṇaiḥ
Sanskrit only: no published translation is held for this verse.
पपात मूर्च्छितः शक्रो रथोपरि शरैः क्षतः । दृष्ट्वा तं पतितं शक्रं जगर्जार्णवनंदनः
papāta mūrcchitaḥ śakro rathopari śaraiḥ kṣataḥ | dṛṣṭvā taṃ patitaṃ śakraṃ jagarjārṇavanaṃdanaḥ
Sanskrit only: no published translation is held for this verse.
मूर्च्छां त्यक्त्वा मुमोचेंद्रो वज्रं जालंधरं प्रति । तदाद्रिदलनं हस्ते गृहीत्वा सिंधुसंभवः
mūrcchāṃ tyaktvā mumoceṃdro vajraṃ jālaṃdharaṃ prati | tadādridalanaṃ haste gṛhītvā siṃdhusaṃbhavaḥ
Sanskrit only: no published translation is held for this verse.
वज्रं कक्षापुटे धृत्वा रथादुत्तीर्य सत्वरम् । अभ्यधावत दैत्येंद्रो देवेंद्रं धर्तुमाहवे
vajraṃ kakṣāpuṭe dhṛtvā rathāduttīrya satvaram | abhyadhāvata daityeṃdro deveṃdraṃ dhartumāhave
Sanskrit only: no published translation is held for this verse.
ततो दुद्राव मघवा रथं त्यक्त्वा हरिं स्मरन् । रथमिंद्रस्य मदवानारुह्यार्णवनंदनः
tato dudrāva maghavā rathaṃ tyaktvā hariṃ smaran | rathamiṃdrasya madavānāruhyārṇavanaṃdanaḥ
Sanskrit only: no published translation is held for this verse.
यंतारं मातलिं कृत्वा ययौ प्राप्तमनोरथः । रथमिंद्रस्य तरसा यत्र यत्र ययौ बले
yaṃtāraṃ mātaliṃ kṛtvā yayau prāptamanorathaḥ | rathamiṃdrasya tarasā yatra yatra yayau bale
Sanskrit only: no published translation is held for this verse.
जालंधरो महाबाहुः स्वयं चांबुधरो यथा । ततः स कोपात्पुरुषोत्तमः स्वयं खड्गं समुद्यम्य च नंदकं रणे
jālaṃdharo mahābāhuḥ svayaṃ cāṃbudharo yathā | tataḥ sa kopātpuruṣottamaḥ svayaṃ khaḍgaṃ samudyamya ca naṃdakaṃ raṇe
Sanskrit only: no published translation is held for this verse.
संप्रेरयित्वा गरुडं मनोजवं जघान कोपेन च दैत्यवाहिनीम् । रथान्हयान्कुंजरपत्तिसंघान्स पातयामास बलात्सहस्रशः
saṃprerayitvā garuḍaṃ manojavaṃ jaghāna kopena ca daityavāhinīm | rathānhayānkuṃjarapattisaṃghānsa pātayāmāsa balātsahasraśaḥ
Sanskrit only: no published translation is held for this verse.
जनार्दनः कश्यपसूनुसंवृतश्चकार संख्ये चरितं भयावहम् । केशास्थिमज्जारुधिरौघवाहिनीं पिशाचवेतालविहंगसेविताम्
janārdanaḥ kaśyapasūnusaṃvṛtaścakāra saṃkhye caritaṃ bhayāvaham | keśāsthimajjārudhiraughavāhinīṃ piśācavetālavihaṃgasevitām
Sanskrit only: no published translation is held for this verse.
करोरुजंघायुधशस्त्रपूरितां सुदुस्तरां व्याघ्रगजेंद्र सेविताम् । रक्तांत्रहारांगदभूषितांतां विघूर्णनेत्रोत्सवकांतिवाससम्
karorujaṃghāyudhaśastrapūritāṃ sudustarāṃ vyāghragajeṃdra sevitām | raktāṃtrahārāṃgadabhūṣitāṃtāṃ vighūrṇanetrotsavakāṃtivāsasam
Sanskrit only: no published translation is held for this verse.
विष्णुना निहतं सैन्यं दृष्ट्वा दानवपुंगवाः । जालंधराज्ञया सर्वे रुरुधुः परितो हरिम्
viṣṇunā nihataṃ sainyaṃ dṛṣṭvā dānavapuṃgavāḥ | jālaṃdharājñayā sarve rurudhuḥ parito harim
Sanskrit only: no published translation is held for this verse.
दैत्यास्ते तत्र बाणौघान्वर्षमाणा यथांबुदाः । यथाद्विरेफाः कमलं पर्वतं जलदा इव
daityāste tatra bāṇaughānvarṣamāṇā yathāṃbudāḥ | yathādvirephāḥ kamalaṃ parvataṃ jaladā iva
Sanskrit only: no published translation is held for this verse.
चूतं यथा पक्षिगणा गगनं धूपसंचयः । न दृश्योऽभूत्तदा विष्णुर्न तार्क्ष्यो रणसंकटे
cūtaṃ yathā pakṣigaṇā gaganaṃ dhūpasaṃcayaḥ | na dṛśyo'bhūttadā viṣṇurna tārkṣyo raṇasaṃkaṭe
Sanskrit only: no published translation is held for this verse.
सर्वे ते रथमारूढा सर्वशस्त्रैर्महासुराः । वैकुंठाधिपतिं जघ्नुर्गर्जंतो भीमनिस्वनैः
sarve te rathamārūḍhā sarvaśastrairmahāsurāḥ | vaikuṃṭhādhipatiṃ jaghnurgarjaṃto bhīmanisvanaiḥ
Sanskrit only: no published translation is held for this verse.
तान्सर्वान्भीमरूपेण दैत्यारिः कुपितस्तदा । रणे निपातयामास वायुः पर्णचयं यथा
tānsarvānbhīmarūpeṇa daityāriḥ kupitastadā | raṇe nipātayāmāsa vāyuḥ parṇacayaṃ yathā
Sanskrit only: no published translation is held for this verse.
शैलरोमा ततो विष्णुं दैत्यः कोपादधावत । हरेरपि शरास्तस्य शरीरे शीर्णतां गताः
śailaromā tato viṣṇuṃ daityaḥ kopādadhāvata | harerapi śarāstasya śarīre śīrṇatāṃ gatāḥ
Sanskrit only: no published translation is held for this verse.
शैलरोमा च दैत्यारि शरीरं चाहनच्छरैः । हरिः खड्गं विनिर्धूय शिरस्तस्य जहार ह
śailaromā ca daityāri śarīraṃ cāhanaccharaiḥ | hariḥ khaḍgaṃ vinirdhūya śirastasya jahāra ha
Sanskrit only: no published translation is held for this verse.
छिन्ने शिरसि दैत्यस्य कबंधो विक्रमन्रणे । शैलरोमा भुजाभ्यां च तार्क्ष्यं जग्राह पक्षयोः
chinne śirasi daityasya kabaṃdho vikramanraṇe | śailaromā bhujābhyāṃ ca tārkṣyaṃ jagrāha pakṣayoḥ
Sanskrit only: no published translation is held for this verse.
शिरश्चोत्पत्य तरसा विलग्नं स्कंधयोर्दृढम् । ततस्तत्रास्ययुद्धेन हृषीकेशोऽपि विस्मितः
śiraścotpatya tarasā vilagnaṃ skaṃdhayordṛḍham | tatastatrāsyayuddhena hṛṣīkeśo'pi vismitaḥ
Sanskrit only: no published translation is held for this verse.
शिरः संलग्नमालोक्य गरुडो न्यपतद्भुवि । पुनश्चोत्पत्य वेगेन शिरःस्थानं समाश्रयत्
śiraḥ saṃlagnamālokya garuḍo nyapatadbhuvi | punaścotpatya vegena śiraḥsthānaṃ samāśrayat
Sanskrit only: no published translation is held for this verse.
शैलरोमा ततो विष्णुं जहार गरुडाद्बली । हरिर्जघ्ने तलेनाशु गतायुश्चापतद्भुवि
śailaromā tato viṣṇuṃ jahāra garuḍādbalī | harirjaghne talenāśu gatāyuścāpatadbhuvi
Sanskrit only: no published translation is held for this verse.
ततो जालंधरः सूतं खड्गरोमाणमब्रवीत् । संप्रेषय रथं तत्र यत्र देवो जनार्दनः
tato jālaṃdharaḥ sūtaṃ khaḍgaromāṇamabravīt | saṃpreṣaya rathaṃ tatra yatra devo janārdanaḥ
Sanskrit only: no published translation is held for this verse.
जालंधरस्य वचनात्खङ्गरोमानयद्रथम् । दृष्ट्वा तं पुरतो विष्णुमुवाचार्णवनंदनः
jālaṃdharasya vacanātkhaṅgaromānayadratham | dṛṣṭvā taṃ purato viṣṇumuvācārṇavanaṃdanaḥ
Sanskrit only: no published translation is held for this verse.
निःशंकं जहि मां विष्णो नाहं त्वा हन्मि माधव । तस्य तद्वचनं श्रुत्वा क्रोधसंरक्तलोचनः
niḥśaṃkaṃ jahi māṃ viṣṇo nāhaṃ tvā hanmi mādhava | tasya tadvacanaṃ śrutvā krodhasaṃraktalocanaḥ
Sanskrit only: no published translation is held for this verse.
नारायणः प्राणहरैः शरैरेनमपूरयत् । विष्णुना च विभिन्नांगोऽर्णवसूनुः प्रतापवान्
nārāyaṇaḥ prāṇaharaiḥ śarairenamapūrayat | viṣṇunā ca vibhinnāṃgo'rṇavasūnuḥ pratāpavān
Sanskrit only: no published translation is held for this verse.
हरिं संपूरयामास मार्गणौघैर्निरंतरम् । नारायणः प्राणहरैः शरैरेनमपूरयत्
hariṃ saṃpūrayāmāsa mārgaṇaughairniraṃtaram | nārāyaṇaḥ prāṇaharaiḥ śarairenamapūrayat
Sanskrit only: no published translation is held for this verse.
गरुडं पतितं दृष्ट्वासिंधुसूनोः शरैर्भुवि । रथं संस्मारयामास वैकुंठस्थं जनार्दनः
garuḍaṃ patitaṃ dṛṣṭvāsiṃdhusūnoḥ śarairbhuvi | rathaṃ saṃsmārayāmāsa vaikuṃṭhasthaṃ janārdanaḥ
Sanskrit only: no published translation is held for this verse.
सरथस्तस्य संप्राप्तः सूतहीनो हयैर्वृतः । अश्वैर्युतं रथं दृष्ट्वा विस्मितो भगवान्रणे
sarathastasya saṃprāptaḥ sūtahīno hayairvṛtaḥ | aśvairyutaṃ rathaṃ dṛṣṭvā vismito bhagavānraṇe
Sanskrit only: no published translation is held for this verse.
संबोधयित्वा गरुडं सारथ्ये समयोजयत् । स धृत्वा मुकुटं मूर्ध्नि कौस्तुभं हृदये मणिम्
saṃbodhayitvā garuḍaṃ sārathye samayojayat | sa dhṛtvā mukuṭaṃ mūrdhni kaustubhaṃ hṛdaye maṇim
Sanskrit only: no published translation is held for this verse.
पुरुषार्थान्हयान्कृत्वा ययौ जालंधरं हरिः । मेदिनीं रथचक्रेण दारयंश्च सुरैः सह
puruṣārthānhayānkṛtvā yayau jālaṃdharaṃ hariḥ | medinīṃ rathacakreṇa dārayaṃśca suraiḥ saha
Sanskrit only: no published translation is held for this verse.
जघान तरसा बाणैर्दानवानां च वाहिनीम् । देवराजेन संदिष्टो वीतिहोत्रो रणांगणे
jaghāna tarasā bāṇairdānavānāṃ ca vāhinīm | devarājena saṃdiṣṭo vītihotro raṇāṃgaṇe
Sanskrit only: no published translation is held for this verse.
ददाह दानवानीकं समीरणसमन्वितम् । तदाह तं भगवता दैत्यसैन्यं सुरैः सह
dadāha dānavānīkaṃ samīraṇasamanvitam | tadāha taṃ bhagavatā daityasainyaṃ suraiḥ saha
Sanskrit only: no published translation is held for this verse.
जालंधरः स्वल्पशेषं दध्यौ दृष्ट्वा बलं स्वकम् । अथाह भार्गवं राजा मत्सैन्यं निहतं सुरैः
jālaṃdharaḥ svalpaśeṣaṃ dadhyau dṛṣṭvā balaṃ svakam | athāha bhārgavaṃ rājā matsainyaṃ nihataṃ suraiḥ
Sanskrit only: no published translation is held for this verse.
त्वयि तिष्ठति मंत्रज्ञे विख्यातो विद्यया भवान् । किं तया विद्यया ब्रह्मन्क्षत्रेणाथ बलेन च
tvayi tiṣṭhati maṃtrajñe vikhyāto vidyayā bhavān | kiṃ tayā vidyayā brahmankṣatreṇātha balena ca
Sanskrit only: no published translation is held for this verse.
या न रक्षति रोगार्तान्यद्बलं शरणागतान् । जालंधरवचः श्रुत्वा भार्गवस्तमभाषत
yā na rakṣati rogārtānyadbalaṃ śaraṇāgatān | jālaṃdharavacaḥ śrutvā bhārgavastamabhāṣata
Sanskrit only: no published translation is held for this verse.
पश्य राजन्मम बलं ब्राह्मणस्य रणांगणे । इत्युक्त्वा वारिणा स्पृष्टा हुंकारेण प्रबोधिताः
paśya rājanmama balaṃ brāhmaṇasya raṇāṃgaṇe | ityuktvā vāriṇā spṛṣṭā huṃkāreṇa prabodhitāḥ
Sanskrit only: no published translation is held for this verse.
उत्थापितास्ते कविना शरौघैः प्राणहारकैः । देवाहता रणे पेतुः समंतात्सिंधुसूनुना
utthāpitāste kavinā śaraughaiḥ prāṇahārakaiḥ | devāhatā raṇe petuḥ samaṃtātsiṃdhusūnunā
Sanskrit only: no published translation is held for this verse.
बाणैर्जर्जरदेहास्ते धृतप्राणा नराधिप । न मृतास्त्वमरत्वाच्च बाणैर्भिन्नाश्च सत्तम
bāṇairjarjaradehāste dhṛtaprāṇā narādhipa | na mṛtāstvamaratvācca bāṇairbhinnāśca sattama
Sanskrit only: no published translation is held for this verse.
ततो नारायणो देवो बृहस्पतिमभाषत । धिग्बलं दैवतगुरो यो न जीवयसे सुरान्
tato nārāyaṇo devo bṛhaspatimabhāṣata | dhigbalaṃ daivataguro yo na jīvayase surān
Sanskrit only: no published translation is held for this verse.
धिषणस्तु जगन्नाथमुवाच त्वरितं तदा । ओषधीभिरहं स्वामिन्जीवयिष्यामि निर्जरान्
dhiṣaṇastu jagannāthamuvāca tvaritaṃ tadā | oṣadhībhirahaṃ svāminjīvayiṣyāmi nirjarān
Sanskrit only: no published translation is held for this verse.
इत्युक्त्वा धिषणः सोऽपि ययौ क्षीरार्णवस्थितम् । द्रोणमद्रिं तदा गत्वा सुखं गृह्यौषधीः स्वयम्
ityuktvā dhiṣaṇaḥ so'pi yayau kṣīrārṇavasthitam | droṇamadriṃ tadā gatvā sukhaṃ gṛhyauṣadhīḥ svayam
Sanskrit only: no published translation is held for this verse.
गुरुस्तासां च योगेन जीवयामास निर्जरान् । उत्थितास्ते ततो देवा जघ्नुर्दानववाहिनीम्
gurustāsāṃ ca yogena jīvayāmāsa nirjarān | utthitāste tato devā jaghnurdānavavāhinīm
Sanskrit only: no published translation is held for this verse.
देवान्समुत्थितान्दृष्ट्वा बभाषे सिंधुजः कविम् । विना त्वद्विद्यया काव्य कथमेते समुत्थिताः
devānsamutthitāndṛṣṭvā babhāṣe siṃdhujaḥ kavim | vinā tvadvidyayā kāvya kathamete samutthitāḥ
Sanskrit only: no published translation is held for this verse.
इति दैत्योक्तमाकर्ण्य शुक्रः प्राहार्णवात्मजम् । क्षीरसागरमध्यस्थो द्रोणोनाम महागिरिः
iti daityoktamākarṇya śukraḥ prāhārṇavātmajam | kṣīrasāgaramadhyastho droṇonāma mahāgiriḥ
Sanskrit only: no published translation is held for this verse.
औषध्यस्तत्र तिष्ठंति जीवयंति च या मृतान् । तत्र गत्वा सुराचार्यो गृहीत्वोषधिसंचयम्
auṣadhyastatra tiṣṭhaṃti jīvayaṃti ca yā mṛtān | tatra gatvā surācāryo gṛhītvoṣadhisaṃcayam
Sanskrit only: no published translation is held for this verse.
रणे विनिहतान्देवानुत्थापयति मंत्रतः । भार्गवोक्तमथाकर्ण्य सैन्यभारं महाबलः
raṇe vinihatāndevānutthāpayati maṃtrataḥ | bhārgavoktamathākarṇya sainyabhāraṃ mahābalaḥ
Sanskrit only: no published translation is held for this verse.
शुंभे निक्षिप्य तरसा ययौ जालंधरोऽर्णवम् । अथ प्रविष्टः क्षीराब्धौ वेश्मदिव्यं महाप्रभम्
śuṃbhe nikṣipya tarasā yayau jālaṃdharo'rṇavam | atha praviṣṭaḥ kṣīrābdhau veśmadivyaṃ mahāprabham
Sanskrit only: no published translation is held for this verse.
प्रविश्य तत्र क्षीराब्धेः क्रीडास्थानं ददर्श सः । नोष्णो न शीतलो वायुर्न तमो यत्र दृश्यते
praviśya tatra kṣīrābdheḥ krīḍāsthānaṃ dadarśa saḥ | noṣṇo na śītalo vāyurna tamo yatra dṛśyate
Sanskrit only: no published translation is held for this verse.
यत्र गायंति नृत्यंति क्रीडंति च वरस्त्रियः । सुपीनस्तनभाराढ्याः कृशोदर्यः सुदंतिकाः 6.7.५०। नेत्रविभ्रमविक्षेपैर्नितंबपरिवर्त्तनैः । अंगैः संमोहनै रम्यैर्बाहुवल्लीविचालनैः
yatra gāyaṃti nṛtyaṃti krīḍaṃti ca varastriyaḥ | supīnastanabhārāḍhyāḥ kṛśodaryaḥ sudaṃtikāḥ 6.7.50| netravibhramavikṣepairnitaṃbaparivarttanaiḥ | aṃgaiḥ saṃmohanai ramyairbāhuvallīvicālanaiḥ
Sanskrit only: no published translation is held for this verse.
पादविन्यासरणि तैर्मधुरैर्वचनस्तवैः । सौगंध्यसौख्यदैर्वासैर्नेत्रभ्रमरहुंकृतैः
pādavinyāsaraṇi tairmadhurairvacanastavaiḥ | saugaṃdhyasaukhyadairvāsairnetrabhramarahuṃkṛtaiḥ
Sanskrit only: no published translation is held for this verse.
चामरांदोललीलाभिः स्रग्भिः स्मितविलोकितैः। सेवां चक्रुर्विलासिन्यस्तत्र सुतः।।५३।।। क्रीडंतं तत्र दुग्धाब्धिं संवीक्ष्य समरोत्सुकः। अथाह प्रणिपत्यासौ क्षीराब्धिं तात हंसि माम्। द्रोणाचलौषधीर्व्याजादंबुभिः प्लावयस्वतः
cāmarāṃdolalīlābhiḥ sragbhiḥ smitavilokitaiḥ| sevāṃ cakrurvilāsinyastatra sutaḥ||53||| krīḍaṃtaṃ tatra dugdhābdhiṃ saṃvīkṣya samarotsukaḥ| athāha praṇipatyāsau kṣīrābdhiṃ tāta haṃsi mām| droṇācalauṣadhīrvyājādaṃbubhiḥ plāvayasvataḥ
Sanskrit only: no published translation is held for this verse.
क्षीरसागर उवाच-। तं प्राप्तं शरणं पुत्र प्लावयाम्यूर्मिभिः कथम् । मुनींद्रास्तं न शंसंति यस्त्यजेच्छरणागतम्
kṣīrasāgara uvāca-| taṃ prāptaṃ śaraṇaṃ putra plāvayāmyūrmibhiḥ katham | munīṃdrāstaṃ na śaṃsaṃti yastyajeccharaṇāgatam
Sanskrit only: no published translation is held for this verse.
पितृव्यवचनं श्रुत्वा संक्रोधात्संततं गिरिम् । तलप्रहरणेनैव ताडयामास दैत्यराट्
pitṛvyavacanaṃ śrutvā saṃkrodhātsaṃtataṃ girim | talapraharaṇenaiva tāḍayāmāsa daityarāṭ
Sanskrit only: no published translation is held for this verse.
ततो द्रोणगिरी राजन्भीतो जालंधराद्भृशम् । अथाजगाम रूपेण प्राह जालंधरं प्रति
tato droṇagirī rājanbhīto jālaṃdharādbhṛśam | athājagāma rūpeṇa prāha jālaṃdharaṃ prati
Sanskrit only: no published translation is held for this verse.
तवाहमभवं दासो रक्ष मां शरणागतम् । रसातलं महाबाहो यास्यामि तव शासनात्
tavāhamabhavaṃ dāso rakṣa māṃ śaraṇāgatam | rasātalaṃ mahābāho yāsyāmi tava śāsanāt
Sanskrit only: no published translation is held for this verse.
यावत्त्वं कुरुषे राज्यं तावत्स्थास्याम्यहं प्रभो । ओषधीनां विरावेण सिद्धानां रोदनेन च
yāvattvaṃ kuruṣe rājyaṃ tāvatsthāsyāmyahaṃ prabho | oṣadhīnāṃ virāveṇa siddhānāṃ rodanena ca
Sanskrit only: no published translation is held for this verse.
रसातलं जगामाद्रिः सिंधुसूनोः प्रपश्यतः । ततो जालंधरो वीर आजगाम महारणम्
rasātalaṃ jagāmādriḥ siṃdhusūnoḥ prapaśyataḥ | tato jālaṃdharo vīra ājagāma mahāraṇam
Sanskrit only: no published translation is held for this verse.
पूर्वकल्पितमारुह्य रथस्थं केशवं ययौ । रथस्थं माधवं दृष्ट्वा जहासोच्चैर्नदीसुतः
pūrvakalpitamāruhya rathasthaṃ keśavaṃ yayau | rathasthaṃ mādhavaṃ dṛṣṭvā jahāsoccairnadīsutaḥ
Sanskrit only: no published translation is held for this verse.
तावत्त्वं तिष्ठ शकटे यावद्धन्यामरीनहम् । एवमुक्त्वा जघानाशु शरैस्तां देववाहिनीम्
tāvattvaṃ tiṣṭha śakaṭe yāvaddhanyāmarīnaham | evamuktvā jaghānāśu śaraistāṃ devavāhinīm
Sanskrit only: no published translation is held for this verse.
बाणैर्विदारिता देवास्त्राहीत्यूचुर्बृहस्पतिम् । ततो बृहस्पतिः शीघ्रमगमत्क्षीरसागरम्
bāṇairvidāritā devāstrāhītyūcurbṛhaspatim | tato bṛhaspatiḥ śīghramagamatkṣīrasāgaram
Sanskrit only: no published translation is held for this verse.
अदृष्ट्वा तं ततो द्रोणमभूच्चिन्तापरो नृप । अथागत्य रणं तूर्णममरान्प्राह गीष्पतिः
adṛṣṭvā taṃ tato droṇamabhūccintāparo nṛpa | athāgatya raṇaṃ tūrṇamamarānprāha gīṣpatiḥ
Sanskrit only: no published translation is held for this verse.
पलायध्वं सुराः सर्वे द्रोणाद्रिः क्षयमागतः । एवमुक्तवतस्तस्य गुरोश्चिच्छेद सिंधुजः
palāyadhvaṃ surāḥ sarve droṇādriḥ kṣayamāgataḥ | evamuktavatastasya gurościccheda siṃdhujaḥ
Sanskrit only: no published translation is held for this verse.
यज्ञोपवीतं केशांश्च बाणैस्तीक्ष्णैर्हसन्सुरान् । ततो दुद्राव वेगेन गुरुः प्राणभयार्दितः
yajñopavītaṃ keśāṃśca bāṇaistīkṣṇairhasansurān | tato dudrāva vegena guruḥ prāṇabhayārditaḥ
Sanskrit only: no published translation is held for this verse.
देवाः सर्वे रणं हित्वा पलायांचक्रिरे नृप । एवं विद्राव्य देवान्वै जनार्द्दनमधावत
devāḥ sarve raṇaṃ hitvā palāyāṃcakrire nṛpa | evaṃ vidrāvya devānvai janārddanamadhāvata
Sanskrit only: no published translation is held for this verse.
हृषीकेशोऽपि दैत्येशमन्वधावद्रणोत्सुकः । ततो युद्धमभूद्धोरं विष्णोर्जालंधरस्य च
hṛṣīkeśo'pi daityeśamanvadhāvadraṇotsukaḥ | tato yuddhamabhūddhoraṃ viṣṇorjālaṃdharasya ca
Sanskrit only: no published translation is held for this verse.
दुर्द्धर्षणो बाणजालैः प्लावयामास केशवम् । तान्बाणान्खंडशः कृत्वा पूरयित्वा शरैर्महान्
durddharṣaṇo bāṇajālaiḥ plāvayāmāsa keśavam | tānbāṇānkhaṃḍaśaḥ kṛtvā pūrayitvā śarairmahān
Sanskrit only: no published translation is held for this verse.
वासुदेवोसुरं बाणैर्जालंधरमपीडयत् । जालंधरो रथं त्यक्त्वा शरपीडितविग्रहः
vāsudevosuraṃ bāṇairjālaṃdharamapīḍayat | jālaṃdharo rathaṃ tyaktvā śarapīḍitavigrahaḥ
Sanskrit only: no published translation is held for this verse.
विष्णुं विजेतुं दुद्राव संयतिस्थमथ द्रुतम् । तमायांतं रणे दृष्ट्वा हरिर्विव्याध सायकैः
viṣṇuṃ vijetuṃ dudrāva saṃyatisthamatha drutam | tamāyāṃtaṃ raṇe dṛṣṭvā harirvivyādha sāyakaiḥ
Sanskrit only: no published translation is held for this verse.
बाणानंगेसहद्विष्णोः प्राप्तोऽसौ रथसंनिधौ । हस्तेनैकेन गरुडं द्वितीयेन रथं हरेः
bāṇānaṃgesahadviṣṇoḥ prāpto'sau rathasaṃnidhau | hastenaikena garuḍaṃ dvitīyena rathaṃ hareḥ
Sanskrit only: no published translation is held for this verse.
भ्रामयित्वांबरे शश्वत्श्वेतद्वीपे न्यपातयत् । जालंधरकरक्षिप्तो गरुडोऽपि पपात ह
bhrāmayitvāṃbare śaśvatśvetadvīpe nyapātayat | jālaṃdharakarakṣipto garuḍo'pi papāta ha
Sanskrit only: no published translation is held for this verse.
क्रौंचद्वीपे स तत्रैव विश्राममकरोच्चिरम् । अच्युतः प्रच्युतस्तस्माद्भ्रमतो रथमंडलात्
krauṃcadvīpe sa tatraiva viśrāmamakarocciram | acyutaḥ pracyutastasmādbhramato rathamaṃḍalāt
Sanskrit only: no published translation is held for this verse.
रणमागत्य दैत्येशं तिष्ठतिष्ठेत्यभाषत । दृष्ट्वा तमागतं भूयः केशवं समरप्रियः
raṇamāgatya daityeśaṃ tiṣṭhatiṣṭhetyabhāṣata | dṛṣṭvā tamāgataṃ bhūyaḥ keśavaṃ samarapriyaḥ
Sanskrit only: no published translation is held for this verse.
पूरयन्मार्गणैर्भूमिं जगर्जार्णवनंदनः
pūrayanmārgaṇairbhūmiṃ jagarjārṇavanaṃdanaḥ
Sanskrit only: no published translation is held for this verse.
विव्याध दैत्यं हरिराशु शक्त्या हृदि स्फुरंत्या स ततः पपात । सूतो न यत्तं समरान्निवासं तं प्राह रे केन कृतोस्म्यलज्जः
vivyādha daityaṃ harirāśu śaktyā hṛdi sphuraṃtyā sa tataḥ papāta | sūto na yattaṃ samarānnivāsaṃ taṃ prāha re kena kṛtosmyalajjaḥ
Sanskrit only: no published translation is held for this verse.
दैत्यारि जालंधरयोर्महत्तदा बभूव युद्धं धरणीतलस्थयोः । प्रेम्णा श्रियस्तं न जघान दानवं स्वयं हरिस्तस्य शरैः पपात
daityāri jālaṃdharayormahattadā babhūva yuddhaṃ dharaṇītalasthayoḥ | premṇā śriyastaṃ na jaghāna dānavaṃ svayaṃ haristasya śaraiḥ papāta
Sanskrit only: no published translation is held for this verse.
ततो निरीक्ष्य गोविंदं पतितं धरणीतले । प्रगृह्यार्णवजो दैत्य आरुरोह निजं रथम् । ततस्तमिंदिरा प्राप्ता रुदंती विष्णुवल्लभा
tato nirīkṣya goviṃdaṃ patitaṃ dharaṇītale | pragṛhyārṇavajo daitya āruroha nijaṃ ratham | tatastamiṃdirā prāptā rudaṃtī viṣṇuvallabhā
Sanskrit only: no published translation is held for this verse.
संस्थिता कमला तत्र पतिं कमललोचनम् । पतितं तु पतिं वीक्ष्य लक्ष्मीः प्राहार्णवात्मजम्
saṃsthitā kamalā tatra patiṃ kamalalocanam | patitaṃ tu patiṃ vīkṣya lakṣmīḥ prāhārṇavātmajam
Sanskrit only: no published translation is held for this verse.
शृणुष्व वचनं भ्रातर्जितो विष्णुर्धृतस्त्वया । भगिन्या न च वैधव्यं दातुं युक्तं महाबल
śṛṇuṣva vacanaṃ bhrātarjito viṣṇurdhṛtastvayā | bhaginyā na ca vaidhavyaṃ dātuṃ yuktaṃ mahābala
Sanskrit only: no published translation is held for this verse.
श्रुत्वा तु वचनं तस्या मुमोच जगतः पतिम् । जालंधरो महाबाहुः स्वस्रे भक्त्या ननाम च
śrutvā tu vacanaṃ tasyā mumoca jagataḥ patim | jālaṃdharo mahābāhuḥ svasre bhaktyā nanāma ca
Sanskrit only: no published translation is held for this verse.
ववंदे चरणौ विष्णोः स्वसुः स्नेहात्तदांजसा । विष्णुर्जालंधरं प्राह तुष्टोऽस्मि तव कर्मणा । वरं वरय दैत्येश किं प्रयच्छामि ते वरम्
vavaṃde caraṇau viṣṇoḥ svasuḥ snehāttadāṃjasā | viṣṇurjālaṃdharaṃ prāha tuṣṭo'smi tava karmaṇā | varaṃ varaya daityeśa kiṃ prayacchāmi te varam
Sanskrit only: no published translation is held for this verse.
जालंधर उवाच-। यदि त्वं मम तुष्टोऽसि शौर्येणानेन केशव । स्थातव्यं मत्पितुः स्थाने त्वया कमलया सह
jālaṃdhara uvāca-| yadi tvaṃ mama tuṣṭo'si śauryeṇānena keśava | sthātavyaṃ matpituḥ sthāne tvayā kamalayā saha
Sanskrit only: no published translation is held for this verse.
तथेत्युक्त्वा च संस्मृत्य गरुडं धरणीधरः । आरुह्य च जगन्नाथः क्षीराब्धिं प्रियया सह
tathetyuktvā ca saṃsmṛtya garuḍaṃ dharaṇīdharaḥ | āruhya ca jagannāthaḥ kṣīrābdhiṃ priyayā saha
Sanskrit only: no published translation is held for this verse.
तदाप्रभृति कृष्णस्य वासः श्वशुरमंदिरे । अब्धौ वसति देवेशो लक्ष्म्याः प्रियचिकीर्षया
tadāprabhṛti kṛṣṇasya vāsaḥ śvaśuramaṃdire | abdhau vasati deveśo lakṣmyāḥ priyacikīrṣayā
Sanskrit only: no published translation is held for this verse.