Padma Purāṇa 6.87

महेश्वर उवाच- चैत्रे तु चंपकेनैव जातीपुष्पेण वा पुनः । पूजनीयः प्रयत्नेन केशवः क्लेशनाशनः

maheśvara uvāca- caitre tu caṃpakenaiva jātīpuṣpeṇa vā punaḥ | pūjanīyaḥ prayatnena keśavaḥ kleśanāśanaḥ

Sanskrit only: no published translation is held for this verse.

दमनकैर्मरुकैश्चैव बिल्वपुष्पैरथापि वा । पूजयेज्जगतामीशं विष्णुं सर्वेश्वरेश्वरम्

damanakairmarukaiścaiva bilvapuṣpairathāpi vā | pūjayejjagatāmīśaṃ viṣṇuṃ sarveśvareśvaram

Sanskrit only: no published translation is held for this verse.

शतपत्रैस्तथादिव्यै रक्तैर्वा सुसमाहितः । पूजयंति नरा विष्णुं चैत्रमासे सुरेश्वरि

śatapatraistathādivyai raktairvā susamāhitaḥ | pūjayaṃti narā viṣṇuṃ caitramāse sureśvari

Sanskrit only: no published translation is held for this verse.

वैशाखे तु सदा देवि ह्यर्चनीयो महत्प्रभुः । केतकीपत्रमादाय वृषस्थे च दिवाकरे

vaiśākhe tu sadā devi hyarcanīyo mahatprabhuḥ | ketakīpatramādāya vṛṣasthe ca divākare

Sanskrit only: no published translation is held for this verse.

येनार्चितो हरिर्भक्त्या प्रीतो मन्वंतरं शतम् । ज्येष्ठे मासे तु संप्राप्ते नानापुष्पैः प्रपूजयेत्

yenārcito harirbhaktyā prīto manvaṃtaraṃ śatam | jyeṣṭhe māse tu saṃprāpte nānāpuṣpaiḥ prapūjayet

Sanskrit only: no published translation is held for this verse.

पूजिते देवदेवेशे सर्वे देवाः सुपूजिताः । कृत्वा पापसहस्राणि महापापशतानि च

pūjite devadeveśe sarve devāḥ supūjitāḥ | kṛtvā pāpasahasrāṇi mahāpāpaśatāni ca

Sanskrit only: no published translation is held for this verse.

तेपि यास्यंति भो देवि यत्र विष्णुः श्रिया सह । आषाढे मासि संप्राप्ते पूजां कुर्याद्विशेषतः

tepi yāsyaṃti bho devi yatra viṣṇuḥ śriyā saha | āṣāḍhe māsi saṃprāpte pūjāṃ kuryādviśeṣataḥ

Sanskrit only: no published translation is held for this verse.

करवीरैरक्तपुष्पैस्तथाब्जैर्वा सदा नराः । पूजां कुर्वंति ये विष्णोस्ते ज्ञेयाः पुण्यभागिनः

karavīrairaktapuṣpaistathābjairvā sadā narāḥ | pūjāṃ kurvaṃti ye viṣṇoste jñeyāḥ puṇyabhāginaḥ

Sanskrit only: no published translation is held for this verse.

जातरूपनिभैर्विष्णुं कदंबकुसुमैस्तथा । येऽर्चयिष्यंति गोविंदं न तेषां सौरिजं भयम्

jātarūpanibhairviṣṇuṃ kadaṃbakusumaistathā | ye'rcayiṣyaṃti goviṃdaṃ na teṣāṃ saurijaṃ bhayam

Sanskrit only: no published translation is held for this verse.

घनागमे घनश्यामः कदंबकुसुमार्चितः । ददाति वांछितान्कामान्यावदिंद्राश्चतुर्दश

ghanāgame ghanaśyāmaḥ kadaṃbakusumārcitaḥ | dadāti vāṃchitānkāmānyāvadiṃdrāścaturdaśa

Sanskrit only: no published translation is held for this verse.

यथा पद्मालयां प्राप्य प्रीतो भवति माधवः । कदंबकुसुमं लब्ध्वा प्रीतो भवति लोककृत्

yathā padmālayāṃ prāpya prīto bhavati mādhavaḥ | kadaṃbakusumaṃ labdhvā prīto bhavati lokakṛt

Sanskrit only: no published translation is held for this verse.

तुलसी कृष्णतुलसी वंजुलैर्वा सुरेश्वरि । सर्वदा पूजितो विष्णुः कष्टं हरति नित्यशः

tulasī kṛṣṇatulasī vaṃjulairvā sureśvari | sarvadā pūjito viṣṇuḥ kaṣṭaṃ harati nityaśaḥ

Sanskrit only: no published translation is held for this verse.

श्रावणे मासि संप्राप्ते येऽर्चयंति जनार्दनम् । अतसीपुष्पमादाय तथा दूर्वादलेन तु

śrāvaṇe māsi saṃprāpte ye'rcayaṃti janārdanam | atasīpuṣpamādāya tathā dūrvādalena tu

Sanskrit only: no published translation is held for this verse.

नानापुष्पैर्विशेषेण पूजनीयः प्रयत्नतः । ददाति विपुलान्कामान्यावदाभूतसंप्लवम्

nānāpuṣpairviśeṣeṇa pūjanīyaḥ prayatnataḥ | dadāti vipulānkāmānyāvadābhūtasaṃplavam

Sanskrit only: no published translation is held for this verse.

भाद्र मासे तु संप्राप्ते शृणु त्वं नगनंदिनि । चंपकैर्वा श्वेतपुष्पैरक्तसिंदूरकैस्तथा

bhādra māse tu saṃprāpte śṛṇu tvaṃ naganaṃdini | caṃpakairvā śvetapuṣpairaktasiṃdūrakaistathā

Sanskrit only: no published translation is held for this verse.

कह्लारैर्वा महादेवि सर्वकामफलं लभेत् । आश्विने वै शुभेमासे कर्त्तव्यं विष्णुपूजनम्

kahlārairvā mahādevi sarvakāmaphalaṃ labhet | āśvine vai śubhemāse karttavyaṃ viṣṇupūjanam

Sanskrit only: no published translation is held for this verse.

यूथिकानवजातीभिस्तथा नानाविधैः शुभैः । पूजनीयः प्रयत्नेन भक्तिपूर्वं सदा जनैः

yūthikānavajātībhistathā nānāvidhaiḥ śubhaiḥ | pūjanīyaḥ prayatnena bhaktipūrvaṃ sadā janaiḥ

Sanskrit only: no published translation is held for this verse.

पद्मान्येव समानीय येऽर्चयंति जनार्दनम् । धर्मार्थकाममोक्षांस्ते लभंते मानवा भुवि

padmānyeva samānīya ye'rcayaṃti janārdanam | dharmārthakāmamokṣāṃste labhaṃte mānavā bhuvi

Sanskrit only: no published translation is held for this verse.

कार्तिकेमासि संप्राप्ते पूजनीयो महेश्वरः । यावंति ऋतुपुष्पाणि देयानि माधवस्य च

kārtikemāsi saṃprāpte pūjanīyo maheśvaraḥ | yāvaṃti ṛtupuṣpāṇi deyāni mādhavasya ca

Sanskrit only: no published translation is held for this verse.

तिलानि तिलपुष्पाणि तैर्वा ह्यर्चनकं चरेत् । पूजिते सति देवेशि अनंतफलमश्नुते

tilāni tilapuṣpāṇi tairvā hyarcanakaṃ caret | pūjite sati deveśi anaṃtaphalamaśnute

Sanskrit only: no published translation is held for this verse.

बकुलपुष्पैः पुन्नागैश्चंपकैर्वा जनार्दनम् । कार्तिके पूजयिष्यंति ते देवा न हि मानवाः

bakulapuṣpaiḥ punnāgaiścaṃpakairvā janārdanam | kārtike pūjayiṣyaṃti te devā na hi mānavāḥ

Sanskrit only: no published translation is held for this verse.

मार्गशीर्षे प्रयत्नेन पूजनीयः सदा प्रभुः । नानापुष्पैः सनैवेद्यैर्धूपैर्नीराजनैस्तथा

mārgaśīrṣe prayatnena pūjanīyaḥ sadā prabhuḥ | nānāpuṣpaiḥ sanaivedyairdhūpairnīrājanaistathā

Sanskrit only: no published translation is held for this verse.

मार्गशीर्षे विशेषेण दिव्यैः पुष्पैः प्रपूजयेत् । पौषमासे महादेवि स्वर्चनं शुभदं स्मृतम्

mārgaśīrṣe viśeṣeṇa divyaiḥ puṣpaiḥ prapūjayet | pauṣamāse mahādevi svarcanaṃ śubhadaṃ smṛtam

Sanskrit only: no published translation is held for this verse.

नानातुलसिपत्रैश्च मृगनाभिजलैस्तथा । माघमासे तु संप्राप्ते नानापुष्पैः प्रपूजयेत्

nānātulasipatraiśca mṛganābhijalaistathā | māghamāse tu saṃprāpte nānāpuṣpaiḥ prapūjayet

Sanskrit only: no published translation is held for this verse.

पूजिते देवदेवेशे वांछितं लभते ध्रुवम् । कर्पूरजा तथा पूजा नानानैवेद्यमोदकैः

pūjite devadeveśe vāṃchitaṃ labhate dhruvam | karpūrajā tathā pūjā nānānaivedyamodakaiḥ

Sanskrit only: no published translation is held for this verse.

फाल्गुने चैव संप्राप्ते ह्यर्चनं माधवस्य च । कृत्वा वासंतिकीं पूजां पुष्पाण्यादाय सर्वशः

phālgune caiva saṃprāpte hyarcanaṃ mādhavasya ca | kṛtvā vāsaṃtikīṃ pūjāṃ puṣpāṇyādāya sarvaśaḥ

Sanskrit only: no published translation is held for this verse.

नवीनैर्वाथ देवेशि सर्वैर्वा पूजयेत्ततः । पूजिते तु जगन्नाथे वैकुंठपदमव्ययम् । प्राप्नोति पुरुषो नित्यं श्रीविष्णोश्च प्रसादतः

navīnairvātha deveśi sarvairvā pūjayettataḥ | pūjite tu jagannāthe vaikuṃṭhapadamavyayam | prāpnoti puruṣo nityaṃ śrīviṣṇośca prasādataḥ

Sanskrit only: no published translation is held for this verse.

इति श्रीपाद्मे महापुराणेपंचपंचाशत्सहस्रसंहितायामुत्तरखंडे उमामहेश्वरसंवादे मासिकपुष्पोनाम सप्ताशीतितमोऽध्यायः

iti śrīpādme mahāpurāṇepaṃcapaṃcāśatsahasrasaṃhitāyāmuttarakhaṃḍe umāmaheśvarasaṃvāde māsikapuṣponāma saptāśītitamo'dhyāyaḥ

Sanskrit only: no published translation is held for this verse.