Padma Purāṇa 6.97

नारद उवाच- ये देवैर्निर्जिताः पूर्वं दैत्याः पातालसंस्थिताः

nārada uvāca- ye devairnirjitāḥ pūrvaṃ daityāḥ pātālasaṃsthitāḥ

Sanskrit only: no published translation is held for this verse.

ते हि भूमंडलं जाता निर्भयास्तमुपासितुम् । कदाचिच्छिन्नशिरसं राहुं दृष्ट्वा स दैत्यराट् । पप्रच्छ भार्गवं विप्रं केनेदं विहितं प्रभो

te hi bhūmaṃḍalaṃ jātā nirbhayāstamupāsitum | kadācicchinnaśirasaṃ rāhuṃ dṛṣṭvā sa daityarāṭ | papraccha bhārgavaṃ vipraṃ kenedaṃ vihitaṃ prabho

Sanskrit only: no published translation is held for this verse.

भार्गवस्तस्य शिरसश्छेदं राहोः शशंस ह । अमृतार्थं समुद्रस्य मथनं देवकारितम्

bhārgavastasya śirasaśchedaṃ rāhoḥ śaśaṃsa ha | amṛtārthaṃ samudrasya mathanaṃ devakāritam

Sanskrit only: no published translation is held for this verse.

रत्नापहरणं चैव दैत्यानां च पराभवम् । तच्छ्रुत्वा क्रोधरक्ताक्षः स्वपितुर्मथनं तदा

ratnāpaharaṇaṃ caiva daityānāṃ ca parābhavam | tacchrutvā krodharaktākṣaḥ svapiturmathanaṃ tadā

Sanskrit only: no published translation is held for this verse.

स दूतं प्रेषयामास घस्मरं शक्रसंनिधौ । दूतस्त्रिविष्टपं गत्वा सुधर्मां प्राप्य सत्वरम्

sa dūtaṃ preṣayāmāsa ghasmaraṃ śakrasaṃnidhau | dūtastriviṣṭapaṃ gatvā sudharmāṃ prāpya satvaram

Sanskrit only: no published translation is held for this verse.

गर्वादखर्वमौलिस्तु देवेंद्रं वाक्यमब्रवीत् । दूत उवाच- जलंधरोऽब्धितनयः सर्वदैत्यजनेश्वरः

garvādakharvamaulistu deveṃdraṃ vākyamabravīt | dūta uvāca- jalaṃdharo'bdhitanayaḥ sarvadaityajaneśvaraḥ

Sanskrit only: no published translation is held for this verse.

दूतोऽहं प्रेषितस्तेन स यदाह शृणुष्व तत् । कस्मात्त्वया मम पिता मथितः सागरोऽद्रिणा

dūto'haṃ preṣitastena sa yadāha śṛṇuṣva tat | kasmāttvayā mama pitā mathitaḥ sāgaro'driṇā

Sanskrit only: no published translation is held for this verse.

नीतानि सर्वरत्नानि तानि शीघ्रं प्रयच्छ मे । इति दूतवचः श्रुत्वा विस्मितस्त्रिदशाधिपः । उवाच घस्मरं घोरं भयरोषसमन्वितः

nītāni sarvaratnāni tāni śīghraṃ prayaccha me | iti dūtavacaḥ śrutvā vismitastridaśādhipaḥ | uvāca ghasmaraṃ ghoraṃ bhayaroṣasamanvitaḥ

Sanskrit only: no published translation is held for this verse.

ईश्वर उवाच- शृणु दूत मया पूर्वं मथितः सागरो यथा । अद्रयो मद्भयाद्भीताः स्वकुक्षिस्थास्तथा कृताः

īśvara uvāca- śṛṇu dūta mayā pūrvaṃ mathitaḥ sāgaro yathā | adrayo madbhayādbhītāḥ svakukṣisthāstathā kṛtāḥ

Sanskrit only: no published translation is held for this verse.

अन्येऽपि मद्द्विषस्तेन रक्षिता दितिजास्तथा । तस्मात्तद्रत्नजातं तु मयाप्यपहृतं किल

anye'pi maddviṣastena rakṣitā ditijāstathā | tasmāttadratnajātaṃ tu mayāpyapahṛtaṃ kila

Sanskrit only: no published translation is held for this verse.

शंखोऽप्येवं पुरा देवानद्विषत्सागरात्मजः । ममानुजेन निहतः प्रविष्टः सागरोदरम्

śaṃkho'pyevaṃ purā devānadviṣatsāgarātmajaḥ | mamānujena nihataḥ praviṣṭaḥ sāgarodaram

Sanskrit only: no published translation is held for this verse.

तद्गच्छ कथयस्वास्यसर्वं मथनकारणम्

tadgaccha kathayasvāsyasarvaṃ mathanakāraṇam

Sanskrit only: no published translation is held for this verse.

नारद उवाच- इत्थं विसर्जितो दूतस्तदेंद्रेणागमद्गृहम् । तदिंद्रवचनं दैत्यराजायाकथयत्तदा

nārada uvāca- itthaṃ visarjito dūtastadeṃdreṇāgamadgṛham | tadiṃdravacanaṃ daityarājāyākathayattadā

Sanskrit only: no published translation is held for this verse.

तन्निशम्य तदा दैत्यो रोषात्प्रस्फुरिताधरः । उद्योगमकरोत्तूर्णं सर्वदेवजिगीषया

tanniśamya tadā daityo roṣātprasphuritādharaḥ | udyogamakarottūrṇaṃ sarvadevajigīṣayā

Sanskrit only: no published translation is held for this verse.

तदोद्योगे सुरेंद्रस्य दिग्भ्यः पातालतस्तथा । दितिजाः प्रत्यपद्यंत शतशः कोटिशस्तथा

tadodyoge sureṃdrasya digbhyaḥ pātālatastathā | ditijāḥ pratyapadyaṃta śataśaḥ koṭiśastathā

Sanskrit only: no published translation is held for this verse.

अथ शुंभनिशुंभाद्यैर्बलाधिपतिकोटिभिः । गत्वा त्रिविष्टपं दैत्यो युद्धायाधिष्ठितोऽभवत्

atha śuṃbhaniśuṃbhādyairbalādhipatikoṭibhiḥ | gatvā triviṣṭapaṃ daityo yuddhāyādhiṣṭhito'bhavat

Sanskrit only: no published translation is held for this verse.

निर्ययुस्त्वमरावत्या देवा युद्धाय दंशिताः । पुरमावृत्य तिष्ठंति दृष्ट्वा दैत्यबलं महत्

niryayustvamarāvatyā devā yuddhāya daṃśitāḥ | puramāvṛtya tiṣṭhaṃti dṛṣṭvā daityabalaṃ mahat

Sanskrit only: no published translation is held for this verse.

ततः समभवद्युद्धं देवदानवसेनयोः । मुशलैः परिघैर्बाणैर्गदापरशुशक्तिभिः

tataḥ samabhavadyuddhaṃ devadānavasenayoḥ | muśalaiḥ parighairbāṇairgadāparaśuśaktibhiḥ

Sanskrit only: no published translation is held for this verse.

तेऽन्योन्यं समधावेतां जघ्नतुश्च परस्परम् । क्षणेनाभवतां सेने रुधिरौघ परिप्लुते

te'nyonyaṃ samadhāvetāṃ jaghnatuśca parasparam | kṣaṇenābhavatāṃ sene rudhiraugha pariplute

Sanskrit only: no published translation is held for this verse.

पतितैः पात्यमानैश्च गजाश्वरथपत्तिभिः । व्यराजत रणे भूमिः संध्याभ्रपटलैरिव

patitaiḥ pātyamānaiśca gajāśvarathapattibhiḥ | vyarājata raṇe bhūmiḥ saṃdhyābhrapaṭalairiva

Sanskrit only: no published translation is held for this verse.

तत्र युद्धे हतान्दैत्यान्भार्गवस्तूदतिष्ठयत् । विद्ययाऽमृतजीविन्या मंत्रितैस्तोयबिंदुभिः

tatra yuddhe hatāndaityānbhārgavastūdatiṣṭhayat | vidyayā'mṛtajīvinyā maṃtritaistoyabiṃdubhiḥ

Sanskrit only: no published translation is held for this verse.

देवास्तत्र तथा युद्धे जीवयेदंगिरस्सुतः । दिव्यौषधीः समानीय द्रोणदेश्याः पुनः पुनः

devāstatra tathā yuddhe jīvayedaṃgirassutaḥ | divyauṣadhīḥ samānīya droṇadeśyāḥ punaḥ punaḥ

Sanskrit only: no published translation is held for this verse.

दृष्ट्वा देवांस्तथा युद्धे पुनरेव समुत्थितान् । जलंधरः क्रोधवशो भार्गवं वाक्यमब्रवीत्

dṛṣṭvā devāṃstathā yuddhe punareva samutthitān | jalaṃdharaḥ krodhavaśo bhārgavaṃ vākyamabravīt

Sanskrit only: no published translation is held for this verse.

जलंधर उवाच- मया देवा हता युद्धे उत्तिष्ठंति कथं पुनः । तव संजीवनीविद्या नैवान्यत्रेति विश्रुतम्

jalaṃdhara uvāca- mayā devā hatā yuddhe uttiṣṭhaṃti kathaṃ punaḥ | tava saṃjīvanīvidyā naivānyatreti viśrutam

Sanskrit only: no published translation is held for this verse.

भृगुरुवाच- दिव्यौषधीः समानीय द्रोणाद्रेरंगिराः सुरान् । जीवयत्येष वै शीघ्रं द्रोणाद्रिं समपाहर

bhṛguruvāca- divyauṣadhīḥ samānīya droṇādreraṃgirāḥ surān | jīvayatyeṣa vai śīghraṃ droṇādriṃ samapāhara

Sanskrit only: no published translation is held for this verse.

नारद उवाच- इत्युक्तः स तु दैत्येंद्रो नीत्वा द्रोणाचलं तदा । प्राक्षिपत्सागरे तूर्णं पुनरागान्महाहवम्

nārada uvāca- ityuktaḥ sa tu daityeṃdro nītvā droṇācalaṃ tadā | prākṣipatsāgare tūrṇaṃ punarāgānmahāhavam

Sanskrit only: no published translation is held for this verse.

अथ देवान्हतान्दृष्ट्वा द्रोणाद्रिमगमद्गुरुः । तावत्तत्र गिरींद्रं तं न ददर्श सुरार्चितः

atha devānhatāndṛṣṭvā droṇādrimagamadguruḥ | tāvattatra girīṃdraṃ taṃ na dadarśa surārcitaḥ

Sanskrit only: no published translation is held for this verse.

ज्ञात्वा दैत्यहृतं द्रोणं विषण्णो भयविह्वलः । आगत्य दूराद्व्याजह्रे श्वासाकुलितविग्रहः

jñātvā daityahṛtaṃ droṇaṃ viṣaṇṇo bhayavihvalaḥ | āgatya dūrādvyājahre śvāsākulitavigrahaḥ

Sanskrit only: no published translation is held for this verse.

पलायध्वं पलायध्वं नायं जेतुं हि शक्यते । रुद्रांशसंभवो ह्येष स्मरध्वं शक्रचेष्टितम्

palāyadhvaṃ palāyadhvaṃ nāyaṃ jetuṃ hi śakyate | rudrāṃśasaṃbhavo hyeṣa smaradhvaṃ śakraceṣṭitam

Sanskrit only: no published translation is held for this verse.

श्रुत्वा तद्वचनं देवा भयविह्वलितास्तदा । दैत्यैस्तैर्वध्यमानास्ते पलायंत दिशो दश

śrutvā tadvacanaṃ devā bhayavihvalitāstadā | daityaistairvadhyamānāste palāyaṃta diśo daśa

Sanskrit only: no published translation is held for this verse.

देवान्विदारितान्दृष्ट्वा दैत्यः सागरनंदनः । शंखभेरीजयरवैः प्रविवेशामरावतीम्

devānvidāritāndṛṣṭvā daityaḥ sāgaranaṃdanaḥ | śaṃkhabherījayaravaiḥ praviveśāmarāvatīm

Sanskrit only: no published translation is held for this verse.

प्रविष्टे नगरं दैत्ये देवाःशक्रपुरोगमाः । सुवर्णाद्रिगुहां प्राप्य न्यवसन्दैत्यतापिताः

praviṣṭe nagaraṃ daitye devāḥśakrapurogamāḥ | suvarṇādriguhāṃ prāpya nyavasandaityatāpitāḥ

Sanskrit only: no published translation is held for this verse.

ततश्च सर्वेष्वसुराधिकारेष्विंद्रादिकानां विनिवेशयत्तदा । शुंभादिकान्दैत्यवरान्पृथक्पृथक्स्वयं सुवर्णाद्रिगुहामगात्पुनः

tataśca sarveṣvasurādhikāreṣviṃdrādikānāṃ viniveśayattadā | śuṃbhādikāndaityavarānpṛthakpṛthaksvayaṃ suvarṇādriguhāmagātpunaḥ

Sanskrit only: no published translation is held for this verse.