Padma Purāṇa 6.98

नारद उवाच- पुनर्दैत्यं समायांतं दृष्ट्वा देवाः सवासवाः । भयप्रकंपिताः सर्वे विष्णुं स्तोतुं प्रचक्रमुः

nārada uvāca- punardaityaṃ samāyāṃtaṃ dṛṣṭvā devāḥ savāsavāḥ | bhayaprakaṃpitāḥ sarve viṣṇuṃ stotuṃ pracakramuḥ

Sanskrit only: no published translation is held for this verse.

देवा ऊचुः। नमो मत्स्यकूर्मादि नानास्वरूपैः सदाभक्तकार्योद्यतायार्तिहंत्रे । विधात्रादिसर्गस्थितिध्वंसकर्त्रे गदाशंखपद्मारिहस्तायतेऽस्तु

devā ūcuḥ| namo matsyakūrmādi nānāsvarūpaiḥ sadābhaktakāryodyatāyārtihaṃtre | vidhātrādisargasthitidhvaṃsakartre gadāśaṃkhapadmārihastāyate'stu

Sanskrit only: no published translation is held for this verse.

रमावल्लभायासुराणां निहंत्रे भुजंगादिनाथाय पीतांबराय । मखादिक्रियापाककर्त्रे विकर्त्रे शरण्याय तस्मै नताः स्मो नताः स्मः

ramāvallabhāyāsurāṇāṃ nihaṃtre bhujaṃgādināthāya pītāṃbarāya | makhādikriyāpākakartre vikartre śaraṇyāya tasmai natāḥ smo natāḥ smaḥ

Sanskrit only: no published translation is held for this verse.

नमो दैत्यसंतापिता मर्त्यदुःखाचलध्वंस दंभोलये विष्णवेते । भुजंगेशतल्पेशयायार्कचंद्र द्विनेत्राय तस्मै नतास्मो नताः स्मः

namo daityasaṃtāpitā martyaduḥkhācaladhvaṃsa daṃbholaye viṣṇavete | bhujaṃgeśatalpeśayāyārkacaṃdra dvinetrāya tasmai natāsmo natāḥ smaḥ

Sanskrit only: no published translation is held for this verse.

नारद उवाच- संकष्टनाशनं स्तोत्रं नित्यं यस्तु पठेन्नरः । स कदाचिन्नसंकष्टै पीड्यते कृपया हरेः

nārada uvāca- saṃkaṣṭanāśanaṃ stotraṃ nityaṃ yastu paṭhennaraḥ | sa kadācinnasaṃkaṣṭai pīḍyate kṛpayā hareḥ

Sanskrit only: no published translation is held for this verse.

इति देवाः स्तुतिं यावत्कुर्वंति दनुजद्विषः । तावत्सुराणामापत्तिर्विज्ञाता विष्णुना तदा

iti devāḥ stutiṃ yāvatkurvaṃti danujadviṣaḥ | tāvatsurāṇāmāpattirvijñātā viṣṇunā tadā

Sanskrit only: no published translation is held for this verse.

सहसोत्थाय दैत्यारिः कृपया खिन्नमानसः । आरुह्य गरुडं वेगाल्लक्ष्मीं वचनमब्रवीत्

sahasotthāya daityāriḥ kṛpayā khinnamānasaḥ | āruhya garuḍaṃ vegāllakṣmīṃ vacanamabravīt

Sanskrit only: no published translation is held for this verse.

विष्णुरुवाच- जलंधरेण ते भ्रात्रा देवानां कदनं कृतम् । तैराहूतो गमिष्यामि युद्धायाद्य त्वरान्वितः

viṣṇuruvāca- jalaṃdhareṇa te bhrātrā devānāṃ kadanaṃ kṛtam | tairāhūto gamiṣyāmi yuddhāyādya tvarānvitaḥ

Sanskrit only: no published translation is held for this verse.

लक्ष्मीरुवाच- अहं ते वल्लभा नाथ भक्ता च यदि सर्वदा । तत्कथं ते मम भ्राता युद्धे वध्यः कृपानिधे

lakṣmīruvāca- ahaṃ te vallabhā nātha bhaktā ca yadi sarvadā | tatkathaṃ te mama bhrātā yuddhe vadhyaḥ kṛpānidhe

Sanskrit only: no published translation is held for this verse.

श्रीभगवानुवाच- रुद्रांशसंभवत्वाच्च ब्रह्मणो वचनादपि । प्रीत्या च तव नैवायं मम वध्यो जलंधरः

śrībhagavānuvāca- rudrāṃśasaṃbhavatvācca brahmaṇo vacanādapi | prītyā ca tava naivāyaṃ mama vadhyo jalaṃdharaḥ

Sanskrit only: no published translation is held for this verse.

नारद उवाच- इत्युक्त्वा गरुडारूढः शंखचक्रगदासिभृत् । विष्णुर्वेगाद्ययौ योद्धुं यत्र देवाः स्तुवंति ते

nārada uvāca- ityuktvā garuḍārūḍhaḥ śaṃkhacakragadāsibhṛt | viṣṇurvegādyayau yoddhuṃ yatra devāḥ stuvaṃti te

Sanskrit only: no published translation is held for this verse.

अथारुणानुजात्युग्रपक्षवातप्रपीडिताः । वात्याविवर्तिता दैत्या बभ्रमुः खे यथा घनाः

athāruṇānujātyugrapakṣavātaprapīḍitāḥ | vātyāvivartitā daityā babhramuḥ khe yathā ghanāḥ

Sanskrit only: no published translation is held for this verse.

ततो जलंधरो दृष्ट्वा दैत्यान्वात्या प्रपीडितान् । नोवाच वचनं क्रोधात्ततो विष्णुं समभ्ययात्

tato jalaṃdharo dṛṣṭvā daityānvātyā prapīḍitān | novāca vacanaṃ krodhāttato viṣṇuṃ samabhyayāt

Sanskrit only: no published translation is held for this verse.

ततः समभवद्युद्धं विष्णुदैत्येंद्रयोर्महत् । आकाशं कुर्वतोर्बाणैरंते निरवकाशवत्

tataḥ samabhavadyuddhaṃ viṣṇudaityeṃdrayormahat | ākāśaṃ kurvatorbāṇairaṃte niravakāśavat

Sanskrit only: no published translation is held for this verse.

विष्णुर्दैत्यस्य बाणौघैर्ध्वजं च्छत्रं धनुर्हयान् । चिच्छेद तं च हृदये बाणेनैकेनताडयन्

viṣṇurdaityasya bāṇaughairdhvajaṃ cchatraṃ dhanurhayān | ciccheda taṃ ca hṛdaye bāṇenaikenatāḍayan

Sanskrit only: no published translation is held for this verse.

ततो दैत्यं समुत्पत्य गदापाणिस्त्वरान्वितः । आगत्य गरुडं मूर्ध्नि पातयामास भूतले

tato daityaṃ samutpatya gadāpāṇistvarānvitaḥ | āgatya garuḍaṃ mūrdhni pātayāmāsa bhūtale

Sanskrit only: no published translation is held for this verse.

विष्णुर्गदां च खड्गेन चिच्छेद प्रहसन्निव । तावत्स सुहृदे विष्णुं जघान दृढमुष्टिना

viṣṇurgadāṃ ca khaḍgena ciccheda prahasanniva | tāvatsa suhṛde viṣṇuṃ jaghāna dṛḍhamuṣṭinā

Sanskrit only: no published translation is held for this verse.

ततस्तौ बाहुयुद्धेन युयुधाते महाबलौ । बाहुभिर्मुष्टिभिश्चैव जानुभिर्नादयन्महीम्

tatastau bāhuyuddhena yuyudhāte mahābalau | bāhubhirmuṣṭibhiścaiva jānubhirnādayanmahīm

Sanskrit only: no published translation is held for this verse.

एवं सुरुचिरं युद्धं कृत्वा विष्णुः प्रतापवान् । उवाच दैत्यराजानं मेघगंभीरया गिरा

evaṃ suruciraṃ yuddhaṃ kṛtvā viṣṇuḥ pratāpavān | uvāca daityarājānaṃ meghagaṃbhīrayā girā

Sanskrit only: no published translation is held for this verse.

विष्णुरुवाच- वरं वरय दैत्येंद्र प्रीतोऽस्मि तव विक्रमात् । अदेयमपि ते दद्मि यत्ते मनसि वर्तते

viṣṇuruvāca- varaṃ varaya daityeṃdra prīto'smi tava vikramāt | adeyamapi te dadmi yatte manasi vartate

Sanskrit only: no published translation is held for this verse.

जलंधर उवाच- यदि भावुकतुष्टोऽसि वरमेतं ददस्व मे । मद्भगिन्या सह तया मद्गृहे सगणो वस

jalaṃdhara uvāca- yadi bhāvukatuṣṭo'si varametaṃ dadasva me | madbhaginyā saha tayā madgṛhe sagaṇo vasa

Sanskrit only: no published translation is held for this verse.

नारद उवाच- तथेत्युक्त्वा स भगवान्सर्वदेवगणैः सह । जलंधरं नाम पुरमगमद्रमया सह

nārada uvāca- tathetyuktvā sa bhagavānsarvadevagaṇaiḥ saha | jalaṃdharaṃ nāma puramagamadramayā saha

Sanskrit only: no published translation is held for this verse.

जलंधरश्च देवानामधिकारेषु दानवान् । स्थापयित्वा सहर्षः सन्पुनरागान्महीतले

jalaṃdharaśca devānāmadhikāreṣu dānavān | sthāpayitvā saharṣaḥ sanpunarāgānmahītale

Sanskrit only: no published translation is held for this verse.

देवगंधर्वसिद्धेषु यत्किंचिद्रत्नसंज्ञितम् । तदात्मवशगं कृत्वा तिष्ठत्सागरनंदनः

devagaṃdharvasiddheṣu yatkiṃcidratnasaṃjñitam | tadātmavaśagaṃ kṛtvā tiṣṭhatsāgaranaṃdanaḥ

Sanskrit only: no published translation is held for this verse.

पातालभवने दैत्यं निशुंभं च महाबलम् । स्थापयित्वा स शेषादीननयद्भूतलं बली

pātālabhavane daityaṃ niśuṃbhaṃ ca mahābalam | sthāpayitvā sa śeṣādīnanayadbhūtalaṃ balī

Sanskrit only: no published translation is held for this verse.

देवगंधर्वसिद्धौघान्यक्षरासमानुषान् । स्वपुरे नागरान्कृत्वा शशास भुवनत्रयम्

devagaṃdharvasiddhaughānyakṣarāsamānuṣān | svapure nāgarānkṛtvā śaśāsa bhuvanatrayam

Sanskrit only: no published translation is held for this verse.

एवं जलंधरः कृत्वा देवांश्च वशवर्त्तिनः । धर्मेण पालयामास प्रजाः पुत्रानिवौरसान्

evaṃ jalaṃdharaḥ kṛtvā devāṃśca vaśavarttinaḥ | dharmeṇa pālayāmāsa prajāḥ putrānivaurasān

Sanskrit only: no published translation is held for this verse.

न कश्चित्व्याधितो नैव दुःखितो न कृशस्तथा । न दीनो दृश्यते तस्मिन्धर्माद्राज्यं प्रशासति

na kaścitvyādhito naiva duḥkhito na kṛśastathā | na dīno dṛśyate tasmindharmādrājyaṃ praśāsati

Sanskrit only: no published translation is held for this verse.

एवं महीं शासति दानवेंद्रे धर्मेण सम्यक्च यदृच्छयाहम् । कदाचिदागामथ तस्य लक्ष्मीं विलोकितुं श्रीरमणं च सेवितुम्

evaṃ mahīṃ śāsati dānaveṃdre dharmeṇa samyakca yadṛcchayāham | kadācidāgāmatha tasya lakṣmīṃ vilokituṃ śrīramaṇaṃ ca sevitum

Sanskrit only: no published translation is held for this verse.