Padma Purāṇa 6.99

नारद उवाच- स मां संपूज्य विधिवद्दानवेंद्रो ऽतिभक्तितः । संप्रहस्य तदा वाक्यं जगाद नृपसत्तम

nārada uvāca- sa māṃ saṃpūjya vidhivaddānaveṃdro 'tibhaktitaḥ | saṃprahasya tadā vākyaṃ jagāda nṛpasattama

Sanskrit only: no published translation is held for this verse.

जलंधर उवाच- कुतस्त्वागम्यते ब्रह्मन्किं च दृष्टं त्वया क्वचित् । यदर्थमिह चायातस्तदा ज्ञापय मां मुने

jalaṃdhara uvāca- kutastvāgamyate brahmankiṃ ca dṛṣṭaṃ tvayā kvacit | yadarthamiha cāyātastadā jñāpaya māṃ mune

Sanskrit only: no published translation is held for this verse.

नारद उवाच- गतः कैलासशिखरं दैत्येंद्राहं यदृच्छया । तत्रोमया सहासीनं दृष्टवानस्मि शंकरम्

nārada uvāca- gataḥ kailāsaśikharaṃ daityeṃdrāhaṃ yadṛcchayā | tatromayā sahāsīnaṃ dṛṣṭavānasmi śaṃkaram

Sanskrit only: no published translation is held for this verse.

योजनायुतविस्तीर्णे कल्पद्रुम महावने । कामधेनुशताकीर्णे चिंतामणि सुदीपिते

yojanāyutavistīrṇe kalpadruma mahāvane | kāmadhenuśatākīrṇe ciṃtāmaṇi sudīpite

Sanskrit only: no published translation is held for this verse.

तं दृष्ट्वा महदाश्चर्यं वितर्को मेऽभवत्तदा । क्वापीदृशी भवेद्वृद्धिस्त्रिलोक्यां वा न वेति च

taṃ dṛṣṭvā mahadāścaryaṃ vitarko me'bhavattadā | kvāpīdṛśī bhavedvṛddhistrilokyāṃ vā na veti ca

Sanskrit only: no published translation is held for this verse.

तावत्तवापि दैत्येंद्र समृद्धिः सम्भृता मया । तद्विलोकनकामोऽहं त्वत्सान्निध्यमिहागतः

tāvattavāpi daityeṃdra samṛddhiḥ sambhṛtā mayā | tadvilokanakāmo'haṃ tvatsānnidhyamihāgataḥ

Sanskrit only: no published translation is held for this verse.

त्वत्समृद्धिमिमां पश्यन्स्त्रीरत्नरहितां ध्रुवम् । तर्कयामि शिवादन्यत्त्रिलोक्यां न समृद्धिमान्

tvatsamṛddhimimāṃ paśyanstrīratnarahitāṃ dhruvam | tarkayāmi śivādanyattrilokyāṃ na samṛddhimān

Sanskrit only: no published translation is held for this verse.

अप्सरो नागकन्याश्च यद्यपि त्वद्वशे स्थिताः । तथापि ता न पार्वत्या रूपेण सदृशा ध्रुवम्

apsaro nāgakanyāśca yadyapi tvadvaśe sthitāḥ | tathāpi tā na pārvatyā rūpeṇa sadṛśā dhruvam

Sanskrit only: no published translation is held for this verse.

यस्या लावण्यजलधौ निमग्नश्चतुराननः । स्वधैर्यममुचत्पूर्वं तया कान्योपमीयते

yasyā lāvaṇyajaladhau nimagnaścaturānanaḥ | svadhairyamamucatpūrvaṃ tayā kānyopamīyate

Sanskrit only: no published translation is held for this verse.

वीतरागोऽपि हि यथा मदनारिः स्वलीलया । विश्वतंत्रोऽपि तपसा स चात्मवशगः कृतः

vītarāgo'pi hi yathā madanāriḥ svalīlayā | viśvataṃtro'pi tapasā sa cātmavaśagaḥ kṛtaḥ

Sanskrit only: no published translation is held for this verse.

सौंदर्यगहने भ्रामन्शबरीरूपया पुरा । यस्याः पुनः पुनः पश्यन्रूपं धाता विसर्जने

sauṃdaryagahane bhrāmanśabarīrūpayā purā | yasyāḥ punaḥ punaḥ paśyanrūpaṃ dhātā visarjane

Sanskrit only: no published translation is held for this verse.

ससर्जाप्सरसस्तास्तास्तत्समैकापि नाभवत् । अतः स्त्रीरत्नसंभोक्तुः समृद्धिस्तस्य सा वरा

sasarjāpsarasastāstāstatsamaikāpi nābhavat | ataḥ strīratnasaṃbhoktuḥ samṛddhistasya sā varā

Sanskrit only: no published translation is held for this verse.

तथा न तव दैत्येंद्र सर्वरत्नाधिपस्य च । एवमुक्त्वा तमामंत्र्य गते मयि स दैत्यराट्

tathā na tava daityeṃdra sarvaratnādhipasya ca | evamuktvā tamāmaṃtrya gate mayi sa daityarāṭ

Sanskrit only: no published translation is held for this verse.

तद्रूपश्रवणादासीदनंगज्वरपीडितः । अथ संप्रेषयामास दूतं च सिंहिकासुतम्

tadrūpaśravaṇādāsīdanaṃgajvarapīḍitaḥ | atha saṃpreṣayāmāsa dūtaṃ ca siṃhikāsutam

Sanskrit only: no published translation is held for this verse.

त्र्यंबकाय तदा किंचिद्विष्णुमायाविमोहितः । कैलासमगमद्राहुः सर्वशुक्लेंदुवर्चसम्

tryaṃbakāya tadā kiṃcidviṣṇumāyāvimohitaḥ | kailāsamagamadrāhuḥ sarvaśukleṃduvarcasam

Sanskrit only: no published translation is held for this verse.

कार्त्स्न्येन कृष्णपक्षेंदुवर्चसं स्वांगजेन तु । निवेदितस्तदादेशान्नंदिना च प्रवेशितः । त्र्यंबकाभ्रूलतासंज्ञा प्रेरितो वाक्यमब्रवीत्

kārtsnyena kṛṣṇapakṣeṃduvarcasaṃ svāṃgajena tu | niveditastadādeśānnaṃdinā ca praveśitaḥ | tryaṃbakābhrūlatāsaṃjñā prerito vākyamabravīt

Sanskrit only: no published translation is held for this verse.

राहुरुवाच- देवपन्नगसेव्यस्य त्रैलोक्याधिपतेः प्रभोः । सर्वरत्नेश्वरस्य त्वमाज्ञां शृणु वृषध्वज

rāhuruvāca- devapannagasevyasya trailokyādhipateḥ prabhoḥ | sarvaratneśvarasya tvamājñāṃ śṛṇu vṛṣadhvaja

Sanskrit only: no published translation is held for this verse.

श्मशानवासिनो नित्यं मुंडमालाधरस्य च । दिगंबरस्य ते भार्या कथं हैमवती शुभा

śmaśānavāsino nityaṃ muṃḍamālādharasya ca | digaṃbarasya te bhāryā kathaṃ haimavatī śubhā

Sanskrit only: no published translation is held for this verse.

अहं रत्नाधिनाथोऽस्मि सा च स्त्री रत्नसंज्ञका । तस्मान्ममैव सा योग्या नैव भिक्षाशिनस्तव

ahaṃ ratnādhinātho'smi sā ca strī ratnasaṃjñakā | tasmānmamaiva sā yogyā naiva bhikṣāśinastava

Sanskrit only: no published translation is held for this verse.

नारद उवाच- वदत्येवं तदा राहौ भ्रूमध्याच्छूलपाणिनः । अभवत्पुरुषो रौद्रस्तीव्राशनिसमस्वनः

nārada uvāca- vadatyevaṃ tadā rāhau bhrūmadhyācchūlapāṇinaḥ | abhavatpuruṣo raudrastīvrāśanisamasvanaḥ

Sanskrit only: no published translation is held for this verse.

सिंहास्यः प्रचलज्जिह्वः सज्वलन्नयनो महान् । ऊर्ध्वकेशः शुष्कतनुर्नृसिंह इव चापरः

siṃhāsyaḥ pracalajjihvaḥ sajvalannayano mahān | ūrdhvakeśaḥ śuṣkatanurnṛsiṃha iva cāparaḥ

Sanskrit only: no published translation is held for this verse.

स तं खादितुमारेभे दृष्ट्वा राहुर्भयातुरः । अधावदतिवेगेन बहिः स च दधार तम्

sa taṃ khāditumārebhe dṛṣṭvā rāhurbhayāturaḥ | adhāvadativegena bahiḥ sa ca dadhāra tam

Sanskrit only: no published translation is held for this verse.

स च राहुर्महाबाहुर्मेघगंभीरया गिरा । उवाच देवदेवेशं पाहि मां शरणागतम्

sa ca rāhurmahābāhurmeghagaṃbhīrayā girā | uvāca devadeveśaṃ pāhi māṃ śaraṇāgatam

Sanskrit only: no published translation is held for this verse.

ब्राह्मणं मां महादेव खादितुं समुपागतः । एतस्माद्रक्ष देवेश शरणागतवत्सल

brāhmaṇaṃ māṃ mahādeva khādituṃ samupāgataḥ | etasmādrakṣa deveśa śaraṇāgatavatsala

Sanskrit only: no published translation is held for this verse.

महादेवो वचः श्रुत्वा ब्राह्मणस्य तदाब्रवीत् । नैवासौ वध्यतामेति दूतोऽयं परवान्यतः

mahādevo vacaḥ śrutvā brāhmaṇasya tadābravīt | naivāsau vadhyatāmeti dūto'yaṃ paravānyataḥ

Sanskrit only: no published translation is held for this verse.

मुंचेति पुरुषः श्रुत्वा राहुं तत्याज सोंबरे । राहुं त्यक्त्वा स षुरुषो महादेवं व्यजिज्ञपत्

muṃceti puruṣaḥ śrutvā rāhuṃ tatyāja soṃbare | rāhuṃ tyaktvā sa ṣuruṣo mahādevaṃ vyajijñapat

Sanskrit only: no published translation is held for this verse.

पुरुष उवाच- क्षुधा मां बाधते स्वामिन्क्षुत्क्षामश्चास्मि सर्वथा । किं भक्ष्यं मम देवेश तदाज्ञापय मां प्रभो

puruṣa uvāca- kṣudhā māṃ bādhate svāminkṣutkṣāmaścāsmi sarvathā | kiṃ bhakṣyaṃ mama deveśa tadājñāpaya māṃ prabho

Sanskrit only: no published translation is held for this verse.

ईश्वर उवाच- संभक्षयात्मनः शीघ्रं मांसं त्वं हस्तपादयोः

īśvara uvāca- saṃbhakṣayātmanaḥ śīghraṃ māṃsaṃ tvaṃ hastapādayoḥ

Sanskrit only: no published translation is held for this verse.

नारद उवाच- सशिवेनैवमाज्ञप्तश्चखाद पुरुषः स्वयम् । हस्तपादोद्भवं मांसं शिरःशेषो यदाभवत्

nārada uvāca- saśivenaivamājñaptaścakhāda puruṣaḥ svayam | hastapādodbhavaṃ māṃsaṃ śiraḥśeṣo yadābhavat

Sanskrit only: no published translation is held for this verse.

दृष्ट्वा शिरोऽवशेषं तु सुप्रसन्नः सदाशिवः । पुरुषं भीमकर्माणं तमुवाच सविस्मयः

dṛṣṭvā śiro'vaśeṣaṃ tu suprasannaḥ sadāśivaḥ | puruṣaṃ bhīmakarmāṇaṃ tamuvāca savismayaḥ

Sanskrit only: no published translation is held for this verse.

ईश्वर उवाच- त्वं कीर्तिमुखसंज्ञो हि भव मद्द्वारगः सदा । त्वदर्चां नैव कुर्वंति नैव ते मत्प्रियंकराः ३१*। नारद उवाच- तदाप्रभृति देवस्य द्वारे कीर्तिमुखः स्थितः । नार्चयंतीह ये पूर्वं तेषामर्चा वृथा भवेत्

īśvara uvāca- tvaṃ kīrtimukhasaṃjño hi bhava maddvāragaḥ sadā | tvadarcāṃ naiva kurvaṃti naiva te matpriyaṃkarāḥ 31*| nārada uvāca- tadāprabhṛti devasya dvāre kīrtimukhaḥ sthitaḥ | nārcayaṃtīha ye pūrvaṃ teṣāmarcā vṛthā bhavet

Sanskrit only: no published translation is held for this verse.

राहुर्विमुक्तो यस्तेन सोऽपतद्बर्बरस्थले । अतः स बर्बरोद्भूत इति भूमौ पृथां गतः

rāhurvimukto yastena so'patadbarbarasthale | ataḥ sa barbarodbhūta iti bhūmau pṛthāṃ gataḥ

Sanskrit only: no published translation is held for this verse.

ततश्च राहुः पुनरेव जातमात्मानमस्मिन्निति मन्यमानः । समेत्य सर्वं कथयां बभूव जलंधरायेशविचेष्टितं तत्

tataśca rāhuḥ punareva jātamātmānamasminniti manyamānaḥ | sametya sarvaṃ kathayāṃ babhūva jalaṃdharāyeśaviceṣṭitaṃ tat

Sanskrit only: no published translation is held for this verse.