Aryasura: Paramitasamasa 1

नमो बुद्धाय ॥ तथागतानां पदम् आरुरुक्षुराश्रित्य रत्नत्रयम् आदरेण । बोधौ निधायाविचलं मनश्च कुर्यात् परात्मव्यतिहारम् आदौ

namo buddhāya // tathāgatānāṃ padam ārurukṣurāśritya ratnatrayam ādareṇa / bodhau nidhāyāvicalaṃ manaśca kuryāt parātmavyatihāram ādau

Sanskrit only: no published translation is held for this verse.

ततः परं दानविधौ प्रयोगः कार्यस्तथा लोकहितोन्मुखेन । यथा स्वगात्राण्यपि याचितस्य न योगसंकोचविरूपता स्यात्

tataḥ paraṃ dānavidhau prayogaḥ kāryastathā lokahitonmukhena / yathā svagātrāṇyapi yācitasya na yogasaṃkocavirūpatā syāt

Sanskrit only: no published translation is held for this verse.

मात्सर्यदोषोपचयाय यत् स्यान् न त्यागचित्तं परिबृंहयेद् वा । तत्त्यक्तुमेवार्हति बोधिसत्त्वः परिग्रहच्छद्ममयं विघातम्

mātsaryadoṣopacayāya yat syān na tyāgacittaṃ paribṛṃhayed vā / tattyaktumevārhati bodhisattvaḥ parigrahacchadmamayaṃ vighātam

Sanskrit only: no published translation is held for this verse.

तद् बोधिसत्त्वः कथम् आददीत रत्नं धनं वा दिवि वापि राज्यम् । यत् त्यागचित्तप्रतिपक्षदक्षं संबोधिमार्गावरणं करोति

tad bodhisattvaḥ katham ādadīta ratnaṃ dhanaṃ vā divi vāpi rājyam / yat tyāgacittapratipakṣadakṣaṃ saṃbodhimārgāvaraṇaṃ karoti

Sanskrit only: no published translation is held for this verse.

संस्मृत्य चर्यातिशयं मुनीनां तदुन्मुखीं स्वामपि च प्रतिज्ञाम् । परिग्रहस्नेहविनिग्रहार्थं कुर्याद् इमांश्चेतसि सद्वितर्कान्

saṃsmṛtya caryātiśayaṃ munīnāṃ tadunmukhīṃ svāmapi ca pratijñām / parigrahasnehavinigrahārthaṃ kuryād imāṃścetasi sadvitarkān

Sanskrit only: no published translation is held for this verse.

यदा निसृष्टो जगते मयायं कायो ऽपी तत्त्यागकृतो ऽपि धर्मः । बाह्ये तदा वस्तुनि सङ्गचित्तं न मे गजस्नानम् इवानुरूपम्

yadā nisṛṣṭo jagate mayāyaṃ kāyo 'pī tattyāgakṛto 'pi dharmaḥ / bāhye tadā vastuni saṅgacittaṃ na me gajasnānam ivānurūpam

Sanskrit only: no published translation is held for this verse.

मांसार्थिनो मांसमिदं हरन्तु मज्जानमप्युद्धरणात् तदर्थी । अहं हि लोकार्थमिदं बिभर्मि शरीरकं किं बत वस्तु बाह्यम्

māṃsārthino māṃsamidaṃ harantu majjānamapyuddharaṇāt tadarthī / ahaṃ hi lokārthamidaṃ bibharmi śarīrakaṃ kiṃ bata vastu bāhyam

Sanskrit only: no published translation is held for this verse.

यथैव भैषज्यमहीरुहस्य त्वक्पत्त्रपुष्पादि जना हरन्ति । मदीयमेते ऽपहरन्ति चेति नैवं विकल्पाः समुदाचरन्ति

yathaiva bhaiṣajyamahīruhasya tvakpattrapuṣpādi janā haranti / madīyamete 'paharanti ceti naivaṃ vikalpāḥ samudācaranti

Sanskrit only: no published translation is held for this verse.

तथैव लोकार्थसमुद्यतेन स्वल्पो ऽपि कार्यो न मया विकल्पः । दुःखे कृतघ्ने सतताशुचौ च देहे परस्मायुपयुज्यमाने

tathaiva lokārthasamudyatena svalpo 'pi kāryo na mayā vikalpaḥ / duḥkhe kṛtaghne satatāśucau ca dehe parasmāyupayujyamāne

Sanskrit only: no published translation is held for this verse.

आध्यात्मिके चैव महीजलाद्ये बाह्ये महाभूतगणे च तुल्ये । इदं ममेदं न ममेति को ऽयम् अज्ञानपङ्काङ्कविधिर्मयापि

ādhyātmike caiva mahījalādye bāhye mahābhūtagaṇe ca tulye / idaṃ mamedaṃ na mameti ko 'yam ajñānapaṅkāṅkavidhirmayāpi

Sanskrit only: no published translation is held for this verse.

गृह्णीत गात्राण्यपि मे यथेष्टं मा कार्षुरस्मिन् परकीयबुद्धिम् । युष्माकमेव स्वमिदं किमर्थं नात्माभिमानो मम कश्चिदत्र

gṛhṇīta gātrāṇyapi me yatheṣṭaṃ mā kārṣurasmin parakīyabuddhim / yuṣmākameva svamidaṃ kimarthaṃ nātmābhimāno mama kaścidatra

Sanskrit only: no published translation is held for this verse.

इत्यद्भुता यस्य भवन्त्यभीक्ष्णं संबुद्धभावानुगुणा वितर्काः । तं बोधिसत्त्वातिशयं वदन्ति बुद्धा महासत्त्वमचिन्त्यसत्त्वाः

ityadbhutā yasya bhavantyabhīkṣṇaṃ saṃbuddhabhāvānuguṇā vitarkāḥ / taṃ bodhisattvātiśayaṃ vadanti buddhā mahāsattvamacintyasattvāḥ

Sanskrit only: no published translation is held for this verse.

एवं स दानप्रतिपत्तिशूरः करोति काये ऽपि न जात्वपेक्षाम् । तस्याप्रयत्नादुपयान्ति शुद्धिं कर्माणि वाक्कायमनोमयानि

evaṃ sa dānapratipattiśūraḥ karoti kāye 'pi na jātvapekṣām / tasyāprayatnādupayānti śuddhiṃ karmāṇi vākkāyamanomayāni

Sanskrit only: no published translation is held for this verse.

विशुद्धकर्मा च हितं परेषाम् आयासदुःखेन विना करोति । इत्थं स सत्त्वार्थमभिप्रयत्नो नयानये कौशलमभ्युपैति

viśuddhakarmā ca hitaṃ pareṣām āyāsaduḥkhena vinā karoti / itthaṃ sa sattvārthamabhiprayatno nayānaye kauśalamabhyupaiti

Sanskrit only: no published translation is held for this verse.

भूयस्तरं प्राप्य बलं स दानात् सद्धर्मदानेन ततः करोति । भवान्धकारे भ्रमतां जनानां सूर्योदयात् स्पष्टतरं प्रकाशम्

bhūyastaraṃ prāpya balaṃ sa dānāt saddharmadānena tataḥ karoti / bhavāndhakāre bhramatāṃ janānāṃ sūryodayāt spaṣṭataraṃ prakāśam

Sanskrit only: no published translation is held for this verse.

साधारणी लोकहितार्थसिद्धिः सर्वज्ञभावाभ्युदयप्रतिष्ठा । अतो ऽस्य पुण्याक्षयताभ्युदेति प्रभेव भानोरुदयस्थितस्य

sādhāraṇī lokahitārthasiddhiḥ sarvajñabhāvābhyudayapratiṣṭhā / ato 'sya puṇyākṣayatābhyudeti prabheva bhānorudayasthitasya

Sanskrit only: no published translation is held for this verse.

इत्यद्भुता दानमया गुणौघा ये बोधिसत्त्वाभरणीभवन्ति । तस्मात् तदीयं परिकर्म चित्तं दानस्य कारुण्यपुरःसरस्य

ityadbhutā dānamayā guṇaughā ye bodhisattvābharaṇībhavanti / tasmāt tadīyaṃ parikarma cittaṃ dānasya kāruṇyapuraḥsarasya

Sanskrit only: no published translation is held for this verse.

आयुःप्रतीभानबलादि बौद्धं निष्पादयेयं जगतामनेन । सत्त्वा मया चामिषसंगृहीताः सद्धर्मपात्राण्यपि मे भवेयुः

āyuḥpratībhānabalādi bauddhaṃ niṣpādayeyaṃ jagatāmanena / sattvā mayā cāmiṣasaṃgṛhītāḥ saddharmapātrāṇyapi me bhaveyuḥ

Sanskrit only: no published translation is held for this verse.

इत्यन्नदानं प्रददाति विद्वान् न स्वर्गसंपत्तिपरिग्रहाय । पानान्यपि क्लेशतृषः शमाय लोकस्य लोकार्थचरो ददाति

ityannadānaṃ pradadāti vidvān na svargasaṃpattiparigrahāya / pānānyapi kleśatṛṣaḥ śamāya lokasya lokārthacaro dadāti

Sanskrit only: no published translation is held for this verse.

बौद्धस्य चैवर्द्धिविचेष्टितस्य निर्वाणसौख्यस्य च सर्वलोकः । लाभी कथं स्यादिति लोकनाथो यानं महायानरतिर्ददाति

bauddhasya caivarddhiviceṣṭitasya nirvāṇasaukhyasya ca sarvalokaḥ / lābhī kathaṃ syāditi lokanātho yānaṃ mahāyānaratirdadāti

Sanskrit only: no published translation is held for this verse.

संबुद्धवर्णस्य च हेमभासो लज्जामयस्यैव च भूषणस्य । निष्पत्तये वस्त्रविधीनुदारान् सत्कृत्य कालानुगुणं ददाति

saṃbuddhavarṇasya ca hemabhāso lajjāmayasyaiva ca bhūṣaṇasya / niṣpattaye vastravidhīnudārān satkṛtya kālānuguṇaṃ dadāti

Sanskrit only: no published translation is held for this verse.

संबोधिमण्डासनम् आसनानि शय्याश्च शय्यात्रयम् ईक्षमाणः । सर्वज्ञचक्षुःप्रतिलब्धये च चैत्येषु रथ्यासु च दीपमालाम्

saṃbodhimaṇḍāsanam āsanāni śayyāśca śayyātrayam īkṣamāṇaḥ / sarvajñacakṣuḥpratilabdhaye ca caityeṣu rathyāsu ca dīpamālām

Sanskrit only: no published translation is held for this verse.

वाद्यानि दिव्यश्रुतिसंग्रहार्थं संबुद्धशीलाय च गन्धदानम् । सभाप्रपारामविहारगेहाञ् शरण्यभावाभिमुखो ददाति

vādyāni divyaśrutisaṃgrahārthaṃ saṃbuddhaśīlāya ca gandhadānam / sabhāprapārāmavihāragehāñ śaraṇyabhāvābhimukho dadāti

Sanskrit only: no published translation is held for this verse.

दानं रसानां तु सुसंस्कृताणां रसारसाग्रत्वपरिग्रहाय । भैषज्यदानान्यजरामरत्वं लोकान् इमान् प्रापयितुं ददाति

dānaṃ rasānāṃ tu susaṃskṛtāṇāṃ rasārasāgratvaparigrahāya / bhaiṣajyadānānyajarāmaratvaṃ lokān imān prāpayituṃ dadāti

Sanskrit only: no published translation is held for this verse.

भुजिष्यतामात्मसमं निनीषुर्दाशीकृतान् क्लेशगणेन लोकान् । स दासदास्यादि सदा ददाति दासानुदासानपराकरिष्यन्

bhujiṣyatāmātmasamaṃ ninīṣurdāśīkṛtān kleśagaṇena lokān / sa dāsadāsyādi sadā dadāti dāsānudāsānaparākariṣyan

Sanskrit only: no published translation is held for this verse.

ददाति पुत्रान् दुहितृः प्रियाश्च बोधिप्रियत्वादनवद्यदानम् । एकान्तसद्धर्मरतिप्रियश्च क्रीडाविशेषान् रतिहेतुभूतान्

dadāti putrān duhitṛḥ priyāśca bodhipriyatvādanavadyadānam / ekāntasaddharmaratipriyaśca krīḍāviśeṣān ratihetubhūtān

Sanskrit only: no published translation is held for this verse.

सुवर्णमुक्तामणिविद्रुमादीन् ददाति सल्लक्षणसंपदर्थम् । रत्नप्रदीप्तानि च भूषणानि चित्राण्यनुव्यञ्जनसौष्ठवाय

suvarṇamuktāmaṇividrumādīn dadāti sallakṣaṇasaṃpadartham / ratnapradīptāni ca bhūṣaṇāni citrāṇyanuvyañjanasauṣṭhavāya

Sanskrit only: no published translation is held for this verse.

ध्यानार्थमुद्यानतपोवनानि सद्धर्मकोषाय च वित्तकोषम् । मुनीन्द्रराज्याय ददात्यखिन्नो राज्यानि चाज्ञापनमण्डितानि

dhyānārthamudyānatapovanāni saddharmakoṣāya ca vittakoṣam / munīndrarājyāya dadātyakhinno rājyāni cājñāpanamaṇḍitāni

Sanskrit only: no published translation is held for this verse.

चक्राङ्किताभ्यां चरणोत्तमाभ्याम् संबोधिमण्डाक्रमणोत्सुकत्वात् । स निर्विकारश्चरणप्रदानं लोकार्थनिष्पत्तिकरो ददाति

cakrāṅkitābhyāṃ caraṇottamābhyām saṃbodhimaṇḍākramaṇotsukatvāt / sa nirvikāraścaraṇapradānaṃ lokārthaniṣpattikaro dadāti

Sanskrit only: no published translation is held for this verse.

दुःखापगायामतिशीघ्रगायां मग्नस्य लोकस्य कथं न दद्याम् । सद्धर्महस्तानिति संप्रदत्ते हस्तान्विकोषाम्बुरुहप्रकाशान्

duḥkhāpagāyāmatiśīghragāyāṃ magnasya lokasya kathaṃ na dadyām / saddharmahastāniti saṃpradatte hastānvikoṣāmburuhaprakāśān

Sanskrit only: no published translation is held for this verse.

श्रद्धेन्द्रियादिप्रतिपूरणार्थं स कर्णनासादि ददात्यखिन्नः । चक्षुश्च चक्षुर्विमलीकरिष्यंल्लोकस्य सर्वावरणप्रहाणात्

śraddhendriyādipratipūraṇārthaṃ sa karṇanāsādi dadātyakhinnaḥ / cakṣuśca cakṣurvimalīkariṣyaṃllokasya sarvāvaraṇaprahāṇāt

Sanskrit only: no published translation is held for this verse.

उत्कृत्य मांसानि सशोणितानि ददाति कारुण्यवशेन नाथः । भूम्यग्निवाय्वम्बुवदेव मे स्याल्लोकोपजीव्यः कथम् एष कायः

utkṛtya māṃsāni saśoṇitāni dadāti kāruṇyavaśena nāthaḥ / bhūmyagnivāyvambuvadeva me syāllokopajīvyaḥ katham eṣa kāyaḥ

Sanskrit only: no published translation is held for this verse.

लोकोत्तमज्ञानसमापनार्थं स उत्तमाङ्गैरपि सत्करोति । अभ्यागतस्यार्थिजनस्य याच्ञां प्रागेव देहावयवैस्तदन्यैः

lokottamajñānasamāpanārthaṃ sa uttamāṅgairapi satkaroti / abhyāgatasyārthijanasya yācñāṃ prāgeva dehāvayavaistadanyaiḥ

Sanskrit only: no published translation is held for this verse.

मज्जानमप्यद्भुतवीरचेष्टो ददाति लोकस्य कथं न कुर्याम् । तथागतं विग्रहमप्रधृष्यं वृष्ट्यापि वज्रोज्ज्वलया पतन्त्या

majjānamapyadbhutavīraceṣṭo dadāti lokasya kathaṃ na kuryām / tathāgataṃ vigrahamapradhṛṣyaṃ vṛṣṭyāpi vajrojjvalayā patantyā

Sanskrit only: no published translation is held for this verse.

इत्येवमाद्यं सततानवद्यं तद्बोधिसत्त्वाम्बुधरप्रमुक्तम् । प्रह्लाद्य दानाम्बु जगत्समग्रं सर्वज्ञतासागरमभ्युपैति

ityevamādyaṃ satatānavadyaṃ tadbodhisattvāmbudharapramuktam / prahlādya dānāmbu jagatsamagraṃ sarvajñatāsāgaramabhyupaiti

Sanskrit only: no published translation is held for this verse.

अन्विष्य भोगान्विषमेण नासौ ददाति नोत्पीडनया परस्य । न त्रासलज्जाप्रतिकारहेतोर्न दक्षिनीयान् परिमार्गमाणः

anviṣya bhogānviṣameṇa nāsau dadāti notpīḍanayā parasya / na trāsalajjāpratikārahetorna dakṣinīyān parimārgamāṇaḥ

Sanskrit only: no published translation is held for this verse.

न च प्रणीते सति रूक्षदानम् अदक्षिणीया इति वावमन्य । विपाककाङ्क्षाकृपणीकृतं वा सत्कारहीनं विजुगुप्सितं वा

na ca praṇīte sati rūkṣadānam adakṣiṇīyā iti vāvamanya / vipākakāṅkṣākṛpaṇīkṛtaṃ vā satkārahīnaṃ vijugupsitaṃ vā

Sanskrit only: no published translation is held for this verse.

नैवोन्नतिं शीलवते प्रयच्छन् विपर्ययं गच्छति नेतरस्मै । नात्मानमुत्कर्षति नैव निन्दां करोति सो ऽन्यस्य समप्रयोगः

naivonnatiṃ śīlavate prayacchan viparyayaṃ gacchati netarasmai / nātmānamutkarṣati naiva nindāṃ karoti so 'nyasya samaprayogaḥ

Sanskrit only: no published translation is held for this verse.

न चास्य मिथ्याशयदानमस्ति नैवास्त्यनध्याशयदानमस्य । न क्रोधदोषोपहतं ददाति नैवानुतापं कुरुते स दत्त्वा

na cāsya mithyāśayadānamasti naivāstyanadhyāśayadānamasya / na krodhadoṣopahataṃ dadāti naivānutāpaṃ kurute sa dattvā

Sanskrit only: no published translation is held for this verse.

न श्लाघ्यमानो विपुलं ददाति नाश्लाघ्यमानो ऽन्यतरं ददाति । न याचकानामुपघातदानं यद् वा भवेद् विप्रतिपत्तिहेतुः

na ślāghyamāno vipulaṃ dadāti nāślāghyamāno 'nyataraṃ dadāti / na yācakānāmupaghātadānaṃ yad vā bhaved vipratipattihetuḥ

Sanskrit only: no published translation is held for this verse.

नाकालदानं स ददाति किंचिद् ददाति काले विषमे ऽपि नैव । न देवभावाय न राज्यहेतोर्न हीनयानस्पृहयालुभावात्

nākāladānaṃ sa dadāti kiṃcid dadāti kāle viṣame 'pi naiva / na devabhāvāya na rājyahetorna hīnayānaspṛhayālubhāvāt

Sanskrit only: no published translation is held for this verse.

नासौ मुखोल्लोकनया ददाति न कीर्तिशब्दाय न हास्यहेतोः । पर्याप्तमेतच्च ममेति नैवं यद्वा विहिंसाहसितं परेषाम्

nāsau mukhollokanayā dadāti na kīrtiśabdāya na hāsyahetoḥ / paryāptametacca mameti naivaṃ yadvā vihiṃsāhasitaṃ pareṣām

Sanskrit only: no published translation is held for this verse.

सर्वज्ञभावापरिणामितं वा सगर्हितं वा स ददाति नैव । ततो ऽस्य तत् पारमिताभिधानं परां विशुद्धिं समुपैति दानम्

sarvajñabhāvāpariṇāmitaṃ vā sagarhitaṃ vā sa dadāti naiva / tato 'sya tat pāramitābhidhānaṃ parāṃ viśuddhiṃ samupaiti dānam

Sanskrit only: no published translation is held for this verse.

दानोद्भवं तस्य च पुण्यराशिं लोकात् समग्रादपि पिण्डितानि । पुण्यानि नैवाभिभवन्ति यस्माल्लोकोत्तमत्त्वं स ततो ऽभ्युपैति

dānodbhavaṃ tasya ca puṇyarāśiṃ lokāt samagrādapi piṇḍitāni / puṇyāni naivābhibhavanti yasmāllokottamattvaṃ sa tato 'bhyupaiti

Sanskrit only: no published translation is held for this verse.

पञ्चस्वभिज्ञासु विनिश्चितात्मा लोकाय यद्वर्षति दानवर्षम् । समन्ततस्तस्य कुतः प्रमाणं परिक्षयो वा सततप्रवृत्तेः

pañcasvabhijñāsu viniścitātmā lokāya yadvarṣati dānavarṣam / samantatastasya kutaḥ pramāṇaṃ parikṣayo vā satatapravṛtteḥ

Sanskrit only: no published translation is held for this verse.

यदक्षयाणां जगतां हिताय ज्ञानस्य हेतुश्च यदक्षयस्य । त्रैधातुकेन क्षयिणा न तच्च संलिप्यते व्योमवदम्बुदेन

yadakṣayāṇāṃ jagatāṃ hitāya jñānasya hetuśca yadakṣayasya / traidhātukena kṣayiṇā na tacca saṃlipyate vyomavadambudena

Sanskrit only: no published translation is held for this verse.

तच्छून्यताकारसमाहितं च निमित्तदोषैः परिवर्जितं च । अकिंचनक्लेशवियोगसिद्धेस्तेनाक्षयं तत्कथितं मुनीन्द्रैः

tacchūnyatākārasamāhitaṃ ca nimittadoṣaiḥ parivarjitaṃ ca / akiṃcanakleśaviyogasiddhestenākṣayaṃ tatkathitaṃ munīndraiḥ

Sanskrit only: no published translation is held for this verse.

अस्मिन् पुनः सत्पुरुषावदाने दाने निदाने सुखविस्ताराणाम् । चिकीर्षता योगमनित्यसंज्ञा भोगेषु कार्या करुणा च लोके

asmin punaḥ satpuruṣāvadāne dāne nidāne sukhavistārāṇām / cikīrṣatā yogamanityasaṃjñā bhogeṣu kāryā karuṇā ca loke

Sanskrit only: no published translation is held for this verse.

भोगाननित्यानभिवीक्षमानः सात्म्यं गतायां च ततः कृपायाम् । स निश्चयं गच्छति दीयते यद् एतान् मदीयां न तु यद्गृहे मे

bhogānanityānabhivīkṣamānaḥ sātmyaṃ gatāyāṃ ca tataḥ kṛpāyām / sa niścayaṃ gacchati dīyate yad etān madīyāṃ na tu yadgṛhe me

Sanskrit only: no published translation is held for this verse.

यद्दत्तम् अस्मान् न भयं कदा चिद् गेहे यदस्माद्भयमभ्युपैति । साधारणं रक्ष्यमतर्पकं च दत्ते तु नैते प्रभवन्त्यनर्थाः

yaddattam asmān na bhayaṃ kadā cid gehe yadasmādbhayamabhyupaiti / sādhāraṇaṃ rakṣyamatarpakaṃ ca datte tu naite prabhavantyanarthāḥ

Sanskrit only: no published translation is held for this verse.

सुखं परत्रापि करोति दत्तम् इहैव दुःखं प्रकरोत्यदत्तम् । उल्कास्वभावं हि धनं नराणाम् अत्यज्यमानं व्यसनं ददाति

sukhaṃ paratrāpi karoti dattam ihaiva duḥkhaṃ prakarotyadattam / ulkāsvabhāvaṃ hi dhanaṃ narāṇām atyajyamānaṃ vyasanaṃ dadāti

Sanskrit only: no published translation is held for this verse.

अदीयमानं निधनं प्रयाति निधानतां याति हि दीयमानम् । धनस्य निःसारलघोः स सारो यद्दीयते लोकहितोन्मुखेन

adīyamānaṃ nidhanaṃ prayāti nidhānatāṃ yāti hi dīyamānam / dhanasya niḥsāralaghoḥ sa sāro yaddīyate lokahitonmukhena

Sanskrit only: no published translation is held for this verse.

यद्दत्तमेतद्विदुषां प्रशस्यं बालो जनस्तन्निचयप्रशंसी । प्रायो वियोगो हि परिग्रहेभ्यो दानाद्भवत्यभ्युदयो यशश्च

yaddattametadviduṣāṃ praśasyaṃ bālo janastannicayapraśaṃsī / prāyo viyogo hi parigrahebhyo dānādbhavatyabhyudayo yaśaśca

Sanskrit only: no published translation is held for this verse.

दत्तं न तत्क्लेशपरिग्रहाय क्लेशाय मात्सर्यमनार्यधर्मः । यद्दीयते सत्पथ एष तस्माद् अतो ऽन्यथा कापथमाहुरार्याः

dattaṃ na tatkleśaparigrahāya kleśāya mātsaryamanāryadharmaḥ / yaddīyate satpatha eṣa tasmād ato 'nyathā kāpathamāhurāryāḥ

Sanskrit only: no published translation is held for this verse.

अभ्यागते याचनके च तेन संबोधिसंभारविवृद्धिहेतौ । तत्प्रेष्यसंज्ञात्मनि संनिवेश्या कल्याणमित्रप्रियता च तस्मिन्

abhyāgate yācanake ca tena saṃbodhisaṃbhāravivṛddhihetau / tatpreṣyasaṃjñātmani saṃniveśyā kalyāṇamitrapriyatā ca tasmin

Sanskrit only: no published translation is held for this verse.

महात्मनां यत्प्रतनूभवन्ति रागादयो याचनकान्निशम्य । तेनोत्सवाभ्यागममप्यतीत्य तेषां प्रियं याचनकोपयानम्

mahātmanāṃ yatpratanūbhavanti rāgādayo yācanakānniśamya / tenotsavābhyāgamamapyatītya teṣāṃ priyaṃ yācanakopayānam

Sanskrit only: no published translation is held for this verse.

स चेत्पुनर्याचनके ऽपि लब्धे दातुं न शक्नोत्यतिदुर्बलत्वात् । तेनानुनेयो मधुरेण साम्ना स याचकः स्यान्न यथा समन्युः

sa cetpunaryācanake 'pi labdhe dātuṃ na śaknotyatidurbalatvāt / tenānuneyo madhureṇa sāmnā sa yācakaḥ syānna yathā samanyuḥ

Sanskrit only: no published translation is held for this verse.

कार्यश्च मात्सर्यविनिग्रहाय मोहप्रहाणाय च तेन यत्नः । तथा यथा याचनकः कदा चिद् वैमुख्यदीनो न ततो व्यापैति

kāryaśca mātsaryavinigrahāya mohaprahāṇāya ca tena yatnaḥ / tathā yathā yācanakaḥ kadā cid vaimukhyadīno na tato vyāpaiti

Sanskrit only: no published translation is held for this verse.

संबोधिचित्तं कुत एव तस्य द्रव्ये ऽपि यो मत्सरमभ्युपैति । वासः सुचित्तस्य हि नास्ति दोषैरम्भोनिधानस्य शवैर्यथैव

saṃbodhicittaṃ kuta eva tasya dravye 'pi yo matsaramabhyupaiti / vāsaḥ sucittasya hi nāsti doṣairambhonidhānasya śavairyathaiva

Sanskrit only: no published translation is held for this verse.

तस्मात् त्यक्त्वा सर्वतः सर्वदोषान् बोधिप्रार्थी सर्वदा सर्वदः स्यात् । त्रातुं लोकानेकवीरः क्व चित्तं चेष्टा दैन्यानूर्जितेयं क्व चैव

tasmāt tyaktvā sarvataḥ sarvadoṣān bodhiprārthī sarvadā sarvadaḥ syāt / trātuṃ lokānekavīraḥ kva cittaṃ ceṣṭā dainyānūrjiteyaṃ kva caiva

Sanskrit only: no published translation is held for this verse.

मूलं दानस्यास्य संबोधिचित्तं तन्न त्याज्यं दित्सता दानमीदृक् । तं संबुद्धास्त्यागिनामग्रमाहुर्यो लोकेषु त्यागमाधित्सुरग्रम्

mūlaṃ dānasyāsya saṃbodhicittaṃ tanna tyājyaṃ ditsatā dānamīdṛk / taṃ saṃbuddhāstyāgināmagramāhuryo lokeṣu tyāgamādhitsuragram

Sanskrit only: no published translation is held for this verse.