Rupa Gosvamin: Haribhaktirasamrtasindhu 2.5

अखण्ड-सुख-रूपत्वे ऽप्य् एषाम् अस्ति क्वचित् क्वचित् । रसेषु गहनास्वाद-विशेषः को ऽप्य् अनुत्तमः

akhaṇḍa-sukha-rūpatve 'py eṣām asti kvacit kvacit | raseṣu gahanāsvāda-viśeṣaḥ ko 'py anuttamaḥ

Sanskrit only: no published translation is held for this verse.

प्रतीयमाना अप्य् अज्ञैर् ग्राम्यैः सपदि दुःखवत् । करुणाद्या रसाः प्राज्ञैः प्रौढानन्द-मया मताः

pratīyamānā apy ajñair grāmyaiḥ sapadi duḥkhavat | karuṇādyā rasāḥ prājñaiḥ prauḍhānanda-mayā matāḥ

Sanskrit only: no published translation is held for this verse.

अलौकिक-विभावत्वं नीतेभ्यो रति-लीलया । सद्-उक्त्या च सुखं तेभ्यः स्यात् सुव्यक्तम् इति स्थितिः

alaukika-vibhāvatvaṃ nītebhyo rati-līlayā | sad-uktyā ca sukhaṃ tebhyaḥ syāt suvyaktam iti sthitiḥ

Sanskrit only: no published translation is held for this verse.

तथा च नाट्यादौ-- करुणादाव् अपि रसे जायते यत् परं सुखम् । सुचेतसाम् अनुभवः प्रमाणं तत्र केवलम्

tathā ca nāṭyādau-- karuṇādāv api rase jāyate yat paraṃ sukham | sucetasām anubhavaḥ pramāṇaṃ tatra kevalam

Sanskrit only: no published translation is held for this verse.

सर्वत्र करुणाख्यस्य रसस्यैवोपपादनात् । भवेद् रामायणादीनाम् अन्यथा दुःख-हेतुता

sarvatra karuṇākhyasya rasasyaivopapādanāt | bhaved rāmāyaṇādīnām anyathā duḥkha-hetutā

Sanskrit only: no published translation is held for this verse.

तथात्वे राम-पादाब्ज-प्रेम-कल्लोल-वारिधिः । प्रीत्या रामायणं नित्यं हनुमान् शृणुयात् कथम्

tathātve rāma-pādābja-prema-kallola-vāridhiḥ | prītyā rāmāyaṇaṃ nityaṃ hanumān śṛṇuyāt katham

Sanskrit only: no published translation is held for this verse.

अपि च-- सञ्चारी स्यात् समानो वा कृष्ण-रत्याः सुहृद्-रतिः । अधिका पुष्यमाणा चेद् भावोल्लासा रतिः

api ca-- sañcārī syāt samāno vā kṛṣṇa-ratyāḥ suhṛd-ratiḥ | adhikā puṣyamāṇā ced bhāvollāsā ratiḥ

Sanskrit only: no published translation is held for this verse.

फल्गु-वैराग्य-निर्दग्धाः शुष्क-ज्ञानाश् च हैतुकाः । मीमांसका विशेषेण भक्त्यास्वाद-बहिर्मुखाः

phalgu-vairāgya-nirdagdhāḥ śuṣka-jñānāś ca haitukāḥ | mīmāṃsakā viśeṣeṇa bhaktyāsvāda-bahirmukhāḥ

Sanskrit only: no published translation is held for this verse.

इत्य् एष भक्ति-रसिकश् चौराद् इव महा-निधिः । जरन्-मीमांसकाद् रक्ष्यः कृष्ण-भक्ति-रसः सदा

ity eṣa bhakti-rasikaś caurād iva mahā-nidhiḥ | jaran-mīmāṃsakād rakṣyaḥ kṛṣṇa-bhakti-rasaḥ sadā

Sanskrit only: no published translation is held for this verse.

सर्वथैव दुरूहो ऽयम् अभक्तैर् भगवद्-रसः । तत्-पादाम्बुज-सर्वस्वैर् भक्तैर् एवानुरस्यते

sarvathaiva durūho 'yam abhaktair bhagavad-rasaḥ | tat-pādāmbuja-sarvasvair bhaktair evānurasyate

Sanskrit only: no published translation is held for this verse.

व्यतीत्य भावना-वर्त्म यश् चमत्कार-कार-भूः । हृदि सत्त्वोज्ज्वले बाढं स्वदते स रसो मतः

vyatītya bhāvanā-vartma yaś camatkāra-kāra-bhūḥ | hṛdi sattvojjvale bāḍhaṃ svadate sa raso mataḥ

Sanskrit only: no published translation is held for this verse.

भावनायाः पदे यस् तु बुधेनानन्य-बुद्धिना । भाव्यते गाढ-संस्कारैश् चित्ते भावः स कथ्यते

bhāvanāyāḥ pade yas tu budhenānanya-buddhinā | bhāvyate gāḍha-saṃskāraiś citte bhāvaḥ sa kathyate

Sanskrit only: no published translation is held for this verse.

गोपाल-रूप-शोभां दधद् अपि रघुनाथ-भाव-विस्तारी । तुष्यतु सनातनात्मा दैक्षिण-विभागे सुधाम्बुनिधेः

gopāla-rūpa-śobhāṃ dadhad api raghunātha-bhāva-vistārī | tuṣyatu sanātanātmā daikṣiṇa-vibhāge sudhāmbunidheḥ

Sanskrit only: no published translation is held for this verse.