Rupa Gosvamin: Haribhaktirasamrtasindhu 4.6

भयानक-भक्ति-रसाख्या षष्ठ-लहरी वक्ष्यमाणैर् विभावाद्यैः पुष्टिं भय-रतिर् गता । भयानकाभिधो भक्ति-रसो धीरैर् उदीर्यते

bhayānaka-bhakti-rasākhyā ṣaṣṭha-laharī vakṣyamāṇair vibhāvādyaiḥ puṣṭiṃ bhaya-ratir gatā | bhayānakābhidho bhakti-raso dhīrair udīryate

Sanskrit only: no published translation is held for this verse.

कृष्णश् च दारुणाश् चेति तस्मिन्न् आलम्बना द्विधा । अनुकम्प्येषु सागस्सु कृष्णस् तस्य च बन्धुषु

kṛṣṇaś ca dāruṇāś ceti tasminn ālambanā dvidhā | anukampyeṣu sāgassu kṛṣṇas tasya ca bandhuṣu

Sanskrit only: no published translation is held for this verse.

दारुणाः स्नेहतः शश्वत्-तद्-अनिष्ठाप्ति-दर्शिषु । दर्शनाच् छ्रवणाच् चेति स्मरणाच् च प्रकीर्तिताः

dāruṇāḥ snehataḥ śaśvat-tad-aniṣṭhāpti-darśiṣu | darśanāc chravaṇāc ceti smaraṇāc ca prakīrtitāḥ

Sanskrit only: no published translation is held for this verse.

तत्र अनुकम्प्येषु कृष्णो, यथा-- किं शुष्यद्-वदनो ऽपि मुञ्च खचितं चित्ते पृथुं वेपथुं विश्वस्य प्रकृतिं भजस्व न मनाग् अप्य् अस्ति मन्तुं तव । उष्म-म्रक्षितम् ऋक्ष-राज रभसाद् विस्तीर्य वीर्यं त्वया पृथ्वी प्रत्युत युद्ध-कौतुक-मयी सेवैव मे निर्मिता

tatra anukampyeṣu kṛṣṇo, yathā-- kiṃ śuṣyad-vadano 'pi muñca khacitaṃ citte pṛthuṃ vepathuṃ viśvasya prakṛtiṃ bhajasva na manāg apy asti mantuṃ tava | uṣma-mrakṣitam ṛkṣa-rāja rabhasād vistīrya vīryaṃ tvayā pṛthvī pratyuta yuddha-kautuka-mayī sevaiva me nirmitā

Sanskrit only: no published translation is held for this verse.

यथा वा-- मुर-मथन पुरस् ते को भुजङ्गस् तपस्वी लघु-हरम् इति कार्षीर् मा स्म दीनाय मन्युम् । गुरुर् अयम् अपराधस् तथ्यम् अज्ञानतो ऽभूद् अशरणम् अतिमूढं रक्ष रक्ष प्रसीद

yathā vā-- mura-mathana puras te ko bhujaṅgas tapasvī laghu-haram iti kārṣīr mā sma dīnāya manyum | gurur ayam aparādhas tathyam ajñānato 'bhūd aśaraṇam atimūḍhaṃ rakṣa rakṣa prasīda

Sanskrit only: no published translation is held for this verse.

बन्धुषु दारुणा दर्शनाद्, यथा-- हा किं करोमि तरलं भवनान्तराले गोपेन्द्र गोपय बलाद् उपरुध्य बालम् । क्ष्मा-मण्डलेन सह चञ्चलयन् मनो मे शृङ्गाणि लङ्घयति पश्य तुरङ्ग-दैत्यः

bandhuṣu dāruṇā darśanād, yathā-- hā kiṃ karomi taralaṃ bhavanāntarāle gopendra gopaya balād uparudhya bālam | kṣmā-maṇḍalena saha cañcalayan mano me śṛṅgāṇi laṅghayati paśya turaṅga-daityaḥ

Sanskrit only: no published translation is held for this verse.

श्रवणाद्, यथा-- शृण्वन्ती तुरग-दानवं रुषा गोकुलं किल विशन्तम् उद्धुरम् । द्राग् अभूत् तनय-रक्षणाकुला शुष्यद्-आस्य-जलजा व्रजेश्वरी

śravaṇād, yathā-- śṛṇvantī turaga-dānavaṃ ruṣā gokulaṃ kila viśantam uddhuram | drāg abhūt tanaya-rakṣaṇākulā śuṣyad-āsya-jalajā vrajeśvarī

Sanskrit only: no published translation is held for this verse.

स्मरणाद्, यथा-- विरम विरम मातः पूतनायाः प्रसङ्गात् तनुम् इयम् अधुनापि स्मर्यमाणा धुनोति । कवलयितुम् इवान्धीकृत्य बालं घुरन्ती वपुर् अतिपुरुषं या घोरम् आविश्चकार

smaraṇād, yathā-- virama virama mātaḥ pūtanāyāḥ prasaṅgāt tanum iyam adhunāpi smaryamāṇā dhunoti | kavalayitum ivāndhīkṛtya bālaṃ ghurantī vapur atipuruṣaṃ yā ghoram āviścakāra

Sanskrit only: no published translation is held for this verse.

विभावस्य भ्रू-कुट्य्-आद्यास् तस्मिन्न् उद्दीपना मताः । मुख-शोषणम् उच्छ्वासः परावृत्य विलोकनम्

vibhāvasya bhrū-kuṭy-ādyās tasminn uddīpanā matāḥ | mukha-śoṣaṇam ucchvāsaḥ parāvṛtya vilokanam

Sanskrit only: no published translation is held for this verse.

स्व-सङ्गोपनम् उद्घूर्णा शरणान्वेषणं तथा । क्रोशनाद्याः क्रियाश् चात्र सात्त्विकाश् चाश्रु-वर्जिताः

sva-saṅgopanam udghūrṇā śaraṇānveṣaṇaṃ tathā | krośanādyāḥ kriyāś cātra sāttvikāś cāśru-varjitāḥ

Sanskrit only: no published translation is held for this verse.

इह सन्त्रास-मरण-चापलावेग-दीनताः । विषाद-मोहापस्मार-शङ्काद्या व्यभिचारिणः

iha santrāsa-maraṇa-cāpalāvega-dīnatāḥ | viṣāda-mohāpasmāra-śaṅkādyā vyabhicāriṇaḥ

Sanskrit only: no published translation is held for this verse.

अस्मिन् भग्न-रतिः स्थायी भावः स्याद् अपराधतः । भीषणेभ्यश् च तत्र स्याद् बहुधैवापराधिता

asmin bhagna-ratiḥ sthāyī bhāvaḥ syād aparādhataḥ | bhīṣaṇebhyaś ca tatra syād bahudhaivāparādhitā

Sanskrit only: no published translation is held for this verse.

तज्-जा भीर् नापरत्र स्याद् अनुग्राह्य-जनान् विना । आकृत्या ये प्रकृत्या ये ये प्रभावेण भीषणाः

taj-jā bhīr nāparatra syād anugrāhya-janān vinā | ākṛtyā ye prakṛtyā ye ye prabhāveṇa bhīṣaṇāḥ

Sanskrit only: no published translation is held for this verse.

एतद्-आलम्बना भीतिः केवल-प्रेम-शालिषु । नारी-बालादिषु तथा प्रायेणात्रोपजायते

etad-ālambanā bhītiḥ kevala-prema-śāliṣu | nārī-bālādiṣu tathā prāyeṇātropajāyate

Sanskrit only: no published translation is held for this verse.

आकृत्या पूतनाद्याः स्युः प्रकृत्या दुष्ट-भू-भुजः । भीषणास् तु प्रभावेण सुरेन्द्र-गिरिशादयः

ākṛtyā pūtanādyāḥ syuḥ prakṛtyā duṣṭa-bhū-bhujaḥ | bhīṣaṇās tu prabhāveṇa surendra-giriśādayaḥ

Sanskrit only: no published translation is held for this verse.

सदा भगवतो भीतिं गता आत्यन्तिकीम् अपि । कंसाद्या रति-शून्यत्वाद् अत्र नालम्बना मताः

sadā bhagavato bhītiṃ gatā ātyantikīm api | kaṃsādyā rati-śūnyatvād atra nālambanā matāḥ

Sanskrit only: no published translation is held for this verse.