Revakhanda of the Vayupurana 109

ततो गच्छेन्महीपाल चक्रतीर्थमनुत्तमम् । सेनापुरमितिख्यातं सर्वपापक्षयंकरम्

tato gacchenmahīpāla cakratīrthamanuttamam / senāpuramitikhyātaṃ sarvapāpakṣayaṃkaram

Sanskrit only: no published translation is held for this verse.

सैनापत्याभिषेकाय देवदेवेन चक्रिणा । आनीतश्च महासेनो देवैः सेन्द्रपुरोगमैः

saināpatyābhiṣekāya devadevena cakriṇā / ānītaśca mahāseno devaiḥ sendrapurogamaiḥ

Sanskrit only: no published translation is held for this verse.

दानवानां वधार्थाय जयाय च दिवौकसाम् । भूमिदानेन विप्रेन्द्रांस् तर्पयित्वा यथाविधि

dānavānāṃ vadhārthāya jayāya ca divaukasām / bhūmidānena viprendrāṃs tarpayitvā yathāvidhi

Sanskrit only: no published translation is held for this verse.

शङ्खभेरीनिनादैश्च पटहानां च निस्वनैः । वीणावेणुमृदङ्गैश्च झल्लरीस्वरमङ्गलैः

śaṅkhabherīninādaiśca paṭahānāṃ ca nisvanaiḥ / vīṇāveṇumṛdaṅgaiśca jhallarīsvaramaṅgalaiḥ

Sanskrit only: no published translation is held for this verse.

ततः कृत्वा स्वनं घोरं दानवो बलदर्पितः । रुरुर्नाम विघातार्थमभिषेकस्य चागतः

tataḥ kṛtvā svanaṃ ghoraṃ dānavo baladarpitaḥ / rururnāma vighātārthamabhiṣekasya cāgataḥ

Sanskrit only: no published translation is held for this verse.

हस्त्यश्वरथपत्त्योघैः पूरयन्वै दिशो दश । तत्र तेन महद्युद्धं प्रवृत्तं किल भारत

hastyaśvarathapattyoghaiḥ pūrayanvai diśo daśa / tatra tena mahadyuddhaṃ pravṛttaṃ kila bhārata

Sanskrit only: no published translation is held for this verse.

शक्त्यृष्टिपाशमुशलैः खड्गैस्तोमरटङ्कनैः । भल्लैः कर्णिकनाराचैः कबन्धपटसंकुलैः

śaktyṛṣṭipāśamuśalaiḥ khaḍgaistomaraṭaṅkanaiḥ / bhallaiḥ karṇikanārācaiḥ kabandhapaṭasaṃkulaiḥ

Sanskrit only: no published translation is held for this verse.

ततस्तु तां शत्रुबलस्य सेनां क्षणेन चापन्च्युतबाणघातैः । विध्वस्तहस्त्यश्वरथान्महात्मा जग्राह चक्रं रिपुसङ्घनाशनः

tatastu tāṃ śatrubalasya senāṃ kṣaṇena cāpancyutabāṇaghātaiḥ / vidhvastahastyaśvarathānmahātmā jagrāha cakraṃ ripusaṅghanāśanaḥ

Sanskrit only: no published translation is held for this verse.

ज्वलच्च चक्रं निशितं भयंकरं सुरासुराणां च सुदर्शनं रणे । चकर्त दैत्यस्य शिरस्तदानीं करात्प्रमुक्तं मधुघातिनश्च तत्

jvalacca cakraṃ niśitaṃ bhayaṃkaraṃ surāsurāṇāṃ ca sudarśanaṃ raṇe / cakarta daityasya śirastadānīṃ karātpramuktaṃ madhughātinaśca tat

Sanskrit only: no published translation is held for this verse.

तं दृष्ट्वा सहसा विघ्नमभिषेके षडाननः । त्यक्त्वा तु तत्र संस्थानं चचार विपुलं तपः

taṃ dṛṣṭvā sahasā vighnamabhiṣeke ṣaḍānanaḥ / tyaktvā tu tatra saṃsthānaṃ cacāra vipulaṃ tapaḥ

Sanskrit only: no published translation is held for this verse.

मुक्तं चक्रं विनाशाय हरिणा लोकधारिणा । द्विदलं दानवं कृत्वा पपात विमले जले

muktaṃ cakraṃ vināśāya hariṇā lokadhāriṇā / dvidalaṃ dānavaṃ kṛtvā papāta vimale jale

Sanskrit only: no published translation is held for this verse.

तदा प्रभृति तत्तीर्थं चक्रतीर्थमिति श्रुतम् । सर्वपापविनाशाय निर्मितं विश्वमूर्तिना

tadā prabhṛti tattīrthaṃ cakratīrthamiti śrutam / sarvapāpavināśāya nirmitaṃ viśvamūrtinā

Sanskrit only: no published translation is held for this verse.

चक्रतीर्थे तु यः स्नात्वा पूजयेद् देवमच्युतम् । पुण्डरीकस्य यज्ञस्य फलमाप्नोति मानवः

cakratīrthe tu yaḥ snātvā pūjayed devamacyutam / puṇḍarīkasya yajñasya phalamāpnoti mānavaḥ

Sanskrit only: no published translation is held for this verse.

तत्र तीर्थे तु यः स्नात्वा पूजयेद् ब्राह्मणाञ्छुभान् । शान्तदान्तजितक्रोधान्स लभेत्कोटिजं फलम्

tatra tīrthe tu yaḥ snātvā pūjayed brāhmaṇāñchubhān / śāntadāntajitakrodhānsa labhetkoṭijaṃ phalam

Sanskrit only: no published translation is held for this verse.

तत्र तीर्थे तु यो भक्त्या त्यजते देहमात्मनः । विष्णुलोकं मृतो याति जयशब्दादिमङ्गलैः

tatra tīrthe tu yo bhaktyā tyajate dehamātmanaḥ / viṣṇulokaṃ mṛto yāti jayaśabdādimaṅgalaiḥ

Sanskrit only: no published translation is held for this verse.

क्रीडयित्वा यथाकामं देवगन्धर्वपूजितः । इहागत्य च भूयो ऽपि जायते विपुले कुले

krīḍayitvā yathākāmaṃ devagandharvapūjitaḥ / ihāgatya ca bhūyo 'pi jāyate vipule kule

Sanskrit only: no published translation is held for this verse.

एतत्पुण्यं पापहरं धन्यं दुःखप्रणाशनम् । कथितं ते महाभाग भूयश्चान्यच्छृणुष्व मे

etatpuṇyaṃ pāpaharaṃ dhanyaṃ duḥkhapraṇāśanam / kathitaṃ te mahābhāga bhūyaścānyacchṛṇuṣva me

Sanskrit only: no published translation is held for this verse.